Michan’uy E Ma Mithmithegoad Ngad Rin’ed Ban’en!
“Damur guy? Michan’ rok [Abraham] ngak Got nge ngongol ni rin’ e peth nge maruwel u taabang; me yan i aw e michan’ rok ngak Got ni ke fel’ rogon u daken e ngongol ni rin’.”—JAMES 2:22
1, 2. Uw rogon e ngongol rodad ni faanra mmich Got u wan’dad?
BOOR e girdi’ e yad ma yog ni ke mich Got u wan’rad. Machane michan’ ni ndariy e ngongol nib peth ngay e dabi fas ya bod ba yam’. I yoloy James ni gachalpen Jesus ni gaar: “Faanra ke mus ni goo michan’ ngak Got ma de chag e ngongol ngay, ma aram e ba yam’ fare mich.” Miki weliy morngaagen Abraham ni bay madgun Got u wan’ ni “michan’ rok ngak Got nge ngongol ni rin’ e ba peth nga taabang.” (James 2:17, 22) Uw fene ga’ fan e pi thin nem ngodad?
2 Faanra riyul’ ni ke mich Got u wan’dad, ma aram gathi ke mus nra mich e pi n’en ni gad ma rung’ag ko muulung u wan’dad. Pi Mich Rok Jehovah e yad ma maruwel ni ngar micheged e n’en ni ke michan’rad ngay. Arrogon, michan’ e ra k’aringdad ngad maruwelgad ko Thin Rok Got ma ra mithmithegdad ni ngad folgad riy.
Michan’ e Der Ma Laniyan’
3, 4. Faanra mich Got u wan’dad ma uw rogon ni gad ra ngongol ngak yugu boch e girdi’?
3 Faanra riyul’ nib mich Got nge Kristus u wan’dad, ma dabda pired ni gad ba laniyan’. (James 2:1-4) Boch e girdi’ ni ke yoloy James e babyor ngorad e dar ngongolgad nrogon e tin riyul’ e girdien Kristus ya kar pired ni be yib laniyan’rad ngorad. (Roma 2:11) Ere be fith James: “Ngongol ni nguum ted nrogon e ngongol rok e piin ni ke michan’rad ngak e Somol rodad i Jesus Kristus ni Somol ko flaab e ke thil ko ngongol romed ngak e girdi’ nib thilthil rogon fa?” Faanra yib be’ nib moon nde mich Kristus u wan’ nga lan e muulung ni pire’ ban’en rok ma bay e luwow nib gol u bugliy pa’ ma be yin’ e mad nib fel’, mi ki yib be’ ni moon ni nde mich Kristus u wan’ nga lan e muulung, ni be’ nib “gafgow nib mogchoth e mad rok,” ma susun ni ngar ted fan e gali pumoon nem, machane kab gel e tay fan ngak fare moon ni pire’ ban’en rok. Kar pied e “chiya nib manigil” ngak, machane kar weliyed ngak fare pumoon nib gafgow ni nge sak’iy ara nge par nga but’ nga daken e fraf nga tooben e chiya.
4 Ke pi’ Jehovah e biyul’ ni aram e yam’ ni tay Jesus Kristus ni fan ko girdi’ ni pire’ ban’en rorad nge girdi’ nib gafgow. (2 Korinth 5:14) Faanra ke mus e girdi’ ni pire’ ban’en rorad e gad ra tay fan, ma aram e kad chuwgad ko michan’ rodad ngak Kristus, ya “feni flaab, me pag fan ir nge gafgow ni fan ngodad, ni fan e nge yognag e flaab ngodad u daken e gafgow ni ke tay.” (2 Korinth 8:9) Dab ud lemnaged e girdi’ ni aram rogon—ya ba kireb ni ngan tay fan e girdi’ ni fan e nge fel’ rogodad riy. Gathi ba laniyan’ Got, machane faanra gad ra par ni gad ba laniyan’, ma aram e kad “turguyed ban’en nib kireb.” (Job 34:19) Gad baadag ni ngad felan’naged Got, ere dabi siy ndabda mulgad ko n’en ni be wawliydad ni ngad pired ni gad ba laniyan’ ara ngad “pied boch e girdi’ nga lang ko thin ni fan e nge yog ngodad e tin ni gad be finey.”—Jude 4, 16.
5. Mini’ ni ke mel’eg Got ni “ngari gel e michan’ rorad,” ma uw rogon e ngongol rok e piin ni pire’ ban’en rorad?
5 Be weliy James morngaagen e piin ni pire’ ban’en rorad ma be weliy ni ngad t’ufeged gubin e girdi’ ndab ud laniyan’gad. (James 2:5-9) ‘I Got e ke mel’eg e girdi’ ni gafgow u roy u fayleng ni ngari gel e michan’ rorad ngak nguur pired nib pagan’rad ngak me yog ngorad e gin nsuwon Got ni yog nra pi’ ngak e piin nib t’uf Got rorad.” Aram rogon ya baga’ ni girdi’ nib gafgow e yad ma fol ko fare thin nib fel’. (1 Korinth 1:26-29) Girdi’ ni ffel’ rogon e baga’ ni yad ma gafgownag e girdi’ ko malfith rorad, sobut’ puluwrad, ma yad ma girngiyrad nga p’eowchen e pi tapuf oloboch. Yad ma yog e thin nib kireb u morngaagen Kristus ma yad ma gafgownagdad ya gad be machib u fithingan. Machane nguud pired nib mudugil u wan’dad ni nguud folgad ko “fare motochiyel rok fare gagiyeg nu tharmiy,” ni ngad t’ufeged e piin nib migid ngodad—ma ngad t’ufeged e girdi’ ni pire’ ban’en rorad nge piin nib gafgow. (Leviticus 19:18; Matthew 22:37-40) Baadag Got ni ngad rin’ed e re n’ey ya “kad denengad” ni faanra “dabda taareb rogonnaged e girdi’ ni gubin u lanin’dad ni bochan yaarad nge rogon e mad ni ka ron’ed.
‘Runguy e Ra Gel ko Pufthin’
6. Mang fan ni gad e girdi’ ni gad be th’ab e motochiyel ni faanra dabda runguyed yugu boch e girdi’?
6 Faanra dabda taareb rogonnaged e girdi’ ni gubin u lanin’dad ni bochan yaarad ma dabda runguyed yad, ma aram e gad e piin ni gad be th’ab e motochiyel. (James 2:10-13) Faan gad ra malog nga bang ko re n’ey, ma kad manged e girdi’ ni gad be togopuluw ko pi motochiyel rok Got. Piyu Israel ni dar uned ko ngongol ndarngal machane ur mororo’gad e kar manged e girdi’ ni ke th’ab e motochiyel ni pi’ Moses. Gadad e pi Kristiano e yibe pufthinnagdad ko “fare motochiyel ni ir e ma chuweg e girdi’ ko kireb”—ni ir Israel nib spiritual nge fare m’ag nib biech ni bay u gum’ercha’rad.—Jeremiah 31:31-33.
7. Mang fan ndabi runguy Got e girdi’ ni ma taareb rogonnag e girdi’ nib fel’ rogon nge girdi’ nib gafgow?
7 Faanra gad be yog nib mich Got u wan’dad machane dab ud taareb rogonnaged e girdi’ nib fel’ rogon nge girdi’ nib gafgow, ma bay e riya’ rodad. Girdi ni der ma runguy e yugu girdi’ e dabi runguyrad Got ko ngiyal’ ni nge pufthinnag e girdi’ riy. (Matthew 7:1, 2) Gaar James: “Ya runguy e ra gel ko pufthin.” Faanra gad ra fol ko kan ni thothup rok Jehovah ma ngad runguyed e girdi’ u gubin ban’en ni gad be rin’, ma dabi gechignagdad Got ko ngiyal’ ni ra pufthinnagdad. Ya ra runguydad Got ma aram me gel e runguy rok ko pufthin ni pag rogon ara gechig.
Michan’ ni Ra K’aring e Ngongol nib Fel’
8. Uw rarogon be’ ni ma yog ni mmich Got u wan’ machane dariy e ngongol nib peth ngay?
8 Michan’ e gathi ke mus ni be n’igindad ngad runguyed e girdi’, machane ku ra k’aringdad ngad ngongliyed yugu boch ngongol nib fel’. (James 2:14-26) Ra ngad dogned nib mich Got u wan’dad machane dariy e ngongol ni bpuluw ngay ma dabi ayuwegdad ngad thapgad ngak Got. Arrogon, ngan fol ko urngin e Motochiyel e gathi aram e n’en nra n’igin ni ngad pired ni gad mmat’aw u p’eowchen Got. (Roma 4:2-5) Be weliy James morngaagen e maruwel ni ngan rin’ u fithik’ e michan’ nge t’ufeg ma gathi bochan ngar ni fol ko motochiyel. Faanra michan’ nge t’ufeg e be k’aring e maruwel rodad ma gathi ke mus ni gad ra yog e thin ni ba gol ngak reb e tapigpig nib gafgow. Ya gad ra pi’ e ggan ngak reb e walag ni be yim’ ko bilig. Be fith James: ‘Ere mang e ra fel’ riy ngorad ni faanra lungum ngorad: “Nge ayuwegmed Got! Mpired ndabi yib e ulum ngomed ma ba fel’ rogomed ko abich!” ni faanra da mpi’ ngorad e tin ni nge yog ngorad?’ Dariy. (Job 31:16-22) Re “michan’” nem e ba yam’!
9. Mang e ra micheg ni mmich Got u wan’dad?
9 Sana gad ma chag ngak e girdi’ rok Got, machane ke mus ni ngongol e rayog ni nge micheg ni mich Got u wan’dad. Manigil ni faanra kad paged e machib ko Trinitas, me mich u wan’dad ni ke mus ntaareb e Got nriyul’ ni bay. Yugu aram rogon ni ke riyul’ ban’en u wan’um machane gathi aram e bay e michan’ rom. “Ku er rogon e pi moonyan nib mich u wan’rad, ma yad ma da’da’ ko marus,” ya yad manang ni yira thang e fan rorad. Faanra riyul’ nib bay e michan’ rodad, ma re michan’ nem e ra k’aringdad ngad maruwelgad ni ngad machibnaged fare thin nib fel’ ma ngad pied e ggan nge mad ngak e pi tapigpig rok Got ni ba t’uf ban’en rorad. Be fith James: “Ga baadag ni ngan dag ngom ni michan’ ngak Got nde chag e ngongol ngay e mm’ay fan?” Arrogon, michan’ e ba t’uf ni nge chag e ngongol ngay.
10. Mang fan ni kan pining ngak Abraham “chitamangin urngin e piin ni ke mich Got u wan’rad”?
10 Michan’ rok Abraham e ke mithmitheg ir ni nge fol rok Got. Ke mang Abraham “chitamangin urngin e piin ni ke mich Got u wan’rad,” ma aram e “i mat’aw ngak Got u daken e ngongol rok ko fa ngiyal’ nem ni pi’ Isak ni fak ni ba maligach u daken e altar.” (Roma 4:11, 12; Genesis 22:1-14) Faan mang e de pagan’ Abraham nrayog rok Got ni nge faseg Isak ko yam’ me rin’ e n’en ni ke micheg nra m’ug owchen u tabinaw rok? Faanra arrogon ma dabki fol Abraham rok Got me pi’ fak ni ba maligach. (Hebrews 11:19) “Ba fel’ rogon” ara ba flont e michan’ rok Abraham ngak Got u daken e ngongol ni rin’. Ere “ke yib i m’ug nib riyul’ fa gin’en ni ba’ u lan e babyor nib thothup [Genesis 15:6] ni be gaar: ‘I Abraham e i par nib mich Got u wan’, ma bochan e michan’ rok ngak Got me matheeg Got ngak ni ke mang be’ nib mat’aw.’” Ngongol ni rin’ Abraham ni ke pi’ Isak ni ba maligach e ke micheg ni ba riyul’ e thin ni yog Got ni ba mat’aw Abraham. Bochan nib peth e ngongol rok Abraham ko michan’ rok, ma aram me dag nib t’uf Got rok mu un pining ni “fager rok Jehovah.”
11. Uw rogon ni micheg Rahab ni mmich Got u wan’?
11 I micheg Abraham ni “ma mat’aw be’ ngak Got u daken e ngongol rok, ma gathi ke mus nu daken e michan’ rok ngak Got.” Ku aram rogon fare ppin ni Rahab ni ma chuway’ ngak u Jeriko. Ya “i mat’aw ngak Got ni bochan e ngongol rok ni faani fek fagali cha’ nu Israel nga naun rok, ni fagali cha’ nra bow ni mol’og me ayuwegrow ngar chuwgow ngar sulod u ba pa’ e kanawo’” mar milgow rok e pi toogor rorow nu Kanaan. U m’on ni mada’nag fagali cha’ nu Israel ma manang Rahab ni Jehovah e ir e bin riyul’ e Got, me pag e ngongol rok ni ma chuway’ ngak nge thin rok nib kireb ma aram me micheg ni ke mich Got u wan’. (Joshua 2:9-11; Hebrews 11:31) Tomren ni weliy James ni ke micheg Rahab e michan’ rok ko ngongol rok me gaar: “Bod rogon e dowef nra dariy e pogofan riy ma ba yam’, ere ku er rogon e michan’ ngak Got nra de chag e ngongol ngay ma ba yam’ fare michan’.” Faanra yim’ be’ ma dariy gelngin ara “pogofan,” ma ere dabiyog ni nge rin’ ban’en. Be’ ni ma yog ni bay e michan’ rok ma der ma maruweliy e bod rogon e dowef ndariy e pogofan riy ma dariy fan. Faanra riyul’ ni ba mich Got u wan’dad, ma ra mithmithegdad ni ngad folgad rok.
Mu Gagiyegnag Blowthem!
12. Mang e susun ni nge rin’ e piin ni piilal ko ulung?
12 Numon nge machib e ku rayog ni nge micheg ni ba mich Got u wan’ be’, machane ba t’uf ni nge gagiyegnag blowthen. (James 3:1-4) Piin ni piilal e yad e pi sensey u lan e ulung ma bay e maruwel nib mil fan ngorad ma thingara dum’gad ku Got. Ere, susun ni ngar yaliyed fan ni yad be rin’ e maruwel rorad mar yaliyed rarogorad. Gathi ke mus ni boor e tamilangan’ nge salap rorad, machane ku thingara pired nib t’uf Got rorad nge girdi’ nib mich Got u wan’rad. (Roma 12:3, 16; 1 Korinth 13:3, 4) Fonow ni ma pi’ e piin ni piilal e thingari puluw ko thin nu Bible. Faanra oloboch reb e piilal me yog ban’en nde mat’aw me magawonnag yugu boch e girdi’, ma aram ma ra pufthinnag Got u daken Kristus. Ere susun ni nge par e piin ni piilal ni yad ba sobut’an’ ma ra filed e Thin rok Got u gubin ngiyal’ mar yul’yul’gad ngay mar folgad riy.
13. Mang fan ni gad ma oloboch ko tin ni gad ma yog?
13 Gad gubin—ni mus ko pi sensey nib salap—“gadad ma oloboch” ni bochan gathi gad ba flont. Baga’ ni yima oloboch ko tin ni yima yog ban’en ma rayog ni nge sum e magawon ni bochan. I gaar James: “Cha’ nder ma oloboch ko tin ni ma yog e be’ nrib flont, ma ku rayog rok ni nge gagiyegnag ir.” Gathi gadad bod Jesus Kristus, ya gathi gad ba flont, ma dabiyog ni ngad gagiyegnaged blowthedad u gubin ngiyal’. Faanra rayog rodad ma rayog ni ngad gagiyegnaged dowdad ni polo’. Gad ma tay bochi yang i wasey ni ba’ gafan nga lan l’ugun e os ni fan ni nguur folgad rodad me yog ni ngad pow’iyed yad nga ranod ko gin ni gadad be finey, ma mus ko barkow ni be yan ni ba gel e nifeng ni be yannag, machane rayog nni kol e yap’ riy ni bochi yap’ nib achig, me sor i yan ko gin ni be finey e gabitey ni nge sor ngay.
14. Uw rogon ni dag James nri ba t’uf ni ngan gagiyegnag blowthey?
14 Thingari tamilang u wan’dad nrib t’uf ni ngad athamgilgad ngad gagiyegnaged blowthedad. (James 3:5-12) Faan gad ra taarebnag ko os, ma ba achig bochi yang i wasey ni ba’ gafan nga lan l’ugun e os; maku aram rogon bochi yap’ nib achig ko ba barkow. Ma “ereray rogon blowthey, aram feni achig, ma rayog ni nge weliy morngaagen bogi n’en ni baga’ morngaagen ni be weliy nib uf ngay.” Be yog e thin ko Bible ni dabun Got e girdi’ ni ma uf, ere nguud yibilayed e ayuw rok Got ni dabda rin’ed. (Psalm 12:3, 4; 1 Korinth 4:7) Maku thingar da gagiyegnaged blowthedad ko ngiyal’ ni kan k’aring e damumuw ngodad, ya dabda paged talin ni bochi daramram nrib achig e rayog ni nge urfiy bangi gerger ni baga’. I weliy James, “blowthey e bod ba nifiy” ma rayog ni nge kirebnagey. (Proverbs 18:21) Blowthey ni dan gagiyegnag e bod “ba fayleng nib sug ko kireb”! Gubin ban’en nib kireb ko re fayleng ney e ba l’ag ko blowthey ni dan gagiyegnag. Ba l’ag ngay e pi n’en nib kireb ni bod e t’ar e thin nga daken be’ nge machib ni googsur. (Leviticus 19:16; 2 Peter 2:1) Uw rogon u wan’um? Gathi susun ni nge mithmithegdad e michan’ rodad ni ngad athamgilgad ni ngad gagiyegnaged blowthedad?
15. Mang magawon nra sum ni bochan ni dan gagiyegnag e blowthey?
15 Blowthey ni dan gagiyegnag e ‘ra wereg e kireb nga fithik’ i dowdad ni polo’.’ Ya amu lemnag ni faanra in yay ni kan nang ni kad lifithed l’igindad, ma yira yog ni gadad ma ban. Machane uw rogon nra n’igin blowthey ni dan gagiyegnag ni nge ‘tay e nifiy nga urngin pangidad u roy u fayleng ni ke urfiy’? Ya ra n’igin e par e fayleng ni yibe cham ngay. Sana ke damumuw urngin e girdi’ ko reb e congregation ni bochan blowthen be’ ni dan gagiyegnag. I weliy James morngaagen “Gehenna,” ni ir e Loway nu Hinnom. Kan pi’ e bitir ni maligach u rom, ma aram me mang e teloor nu Jerusalem. (Jeremiah 7:31) Ere Gehenna e be yip’ fan e magothgoth ndabi math biid. Gelngin Gehenna e ba m’ag nga blowthey ni dan gagiyegnag. Faanra dabda gagiyegnaged blowthedad, ma rayog ni nge yib ngodad wenegan e magawon ni ke sunmeg blowthedad ni dad gagiyegnaged. (Matthew 5:22) Ku rayog ni ngan chuwegdad ko ulung ni faan gad ra t’ar e thin nga daken be’.—1 Korinth 5:11-13.
16. Bochan ni ke tamilang wenegan nib kireb nrayog ni nge yib ko blowthey ni dan gagiyegnag, me ere mang e susun ni ngad rin’ed?
16 Sana ga manang ya kam bieg e Thin rok Got ni ke turguy Jehovah ni nge suwey e girdi’ urngin mit e gamanman. (Genesis 1:28) Bay boor mit e gamanman nib maloboch ni kan llowan’nag. Ya amu lemnag e falcon ni kan llowan’nag ni nge kol yugu mit e gamanman. Fapi ‘gamanman ni ma gararaw’ ni i weliy James u morngaagen e ba muun ngay e porchoyog ni ke gagiyegnag e girdi’. (Psalm 58:4, 5) Mus ko ray ma rayog ni nge gagiyegnag e girdi’, machane dabiyog ni nge gagiyegnag blowthey. Susun ndab dogned e thin nib gel, ni ma kirebnagan’ e girdi’, ara da t’ared e thin nga daken e girdi’. Blowthey ni dan gagiyegnag e ba sug ko yub ni yira yim ngay. (Roma 3:13) Ma blowthen boch e tamachib ni googsur e ke chafeg boch e Kristiano ni kakrom nga bang rok Got. Ere dab ud paged ni nge gel e machib rok e pi tatogopuluw ngodad ndemtrug ko aram e thin ni kan weliy ara thin ni kan yoloy.—1 Timothy 1:18-20; 2 Peter 2:1-3.
17, 18. Mang e be weliy ko James 3:9-12, ma mang e susun ni ngad rin’ed?
17 Faanra mmich Got u wan’dad ma gad baadag ni ngad felan’naged gum’ercha’en ma aram e ra ayuwegdad ndabda uned ko apostasy ma dabda fanayed blowthedad nga rogon nde puluw. I weliy James u morngaagen e girdi’ ni ur fanayed blowtherad nga rogon nde puluw ni gaar: ‘Gadad ma maruwel ngay ngad pininged e magar ngak Jehovah ni ir e Chitmangiy, ma ka gadad ma yibilay e girdi’ ngay ni nge buch ban’en rorad, ni girdi’ nsunmegrad ni yad bod yaan Got.’ (Genesis 1:26) Jehovah e ir Chitamangidad ya i ‘sunmiy e fayleng nge urngin ban’en ni ba’ riy.” (Acts 17:24, 25) Maku ir Chitamangin e pi Kristiano ni kan dugliyrad ni yad girdien fachi ulung. Kan sunmegdad ni gad “bod yaan Got” nge rogon e lem nge gafarig rodad, nib muun ngay e ngongol ni t’ufeg, mab mat’aw, nge gonop ni dariy rok e gamanman. Ere, susun uw rogon ni gad ra ngongol ni faanra mmich Jehovah u wan’dad?
18 Faanra gad ra yibilay e girdi’ ngay ni nge buch ban’en rorad, ma be sor fan ngay ni gad be pining e kireb nge yib nga dakenrad. Ere gathi gadad e pi profet ni ke thagthagnag Got ni ngad pininged e kireb nge yib nga daken e girdi’, ya faanra un non ni aram rogon ma ir e mich ko fanenikan ma faanra aram rogon ma dariy fan e liyor ni gad be tay ku Got. De mat’aw ni “taab l’ugunef e ir e gad be pining e magar riy ngak Got ma ku ir e gadad ma yibilay e girdi’ ngay ni nge buch ban’en rorad.” (Luke 6:27, 28; Roma 12:14, 17-21; Jude 9) Rib gel fene denen ni ngan n’on e tang ku Got u nap’an e muulung nge mu’ min t’ar e thin nga daken reb e walag! Dabiyog ni nge yib e ran nib fel’ lamen nge ran nib mooy u taareb e alublub. Bod rogon “ba ke gek’iy ni fig e dabiyog ni nge k’uf ni olive,” ma dabiyog ni nge yib e ran nib fel’ lamen ko ran nib buday u fithik’ e day. Faanra udogned e thin nib kireb ngak be’ u gubin ngiyal’ ma aram e bay e m’ar rodad ko tirok Got ban’en ya susun ni nga dogned e thin nib fel’ u gubin ngiyal’. Faanra kad yodoromgad, ma susun ni ngad yibilayed e ayuw rok Jehovah nge talegdad ni dabda nonad ni aram rogon.—Psalm 39:1.
Mu Maruweliy e Gonop ni Yib u Tharmiy
19. Faanra bay e gonop rodad ni yib u tharmiy, mang wenegan nib fel’ nra yib ngak yugu boch e girdi’?
19 Ba t’uf e gonop rodad ni nga dogned e thin nib fel’ ma ngad rin’ed e pi n’en ni bpuluw ko girdi’ ni mmich Got u wan’rad. (James 3:13-18) Faanra bay madgun Got u wan’dad, ma ra pi’ Got e gonop ni yib u tharmiy ngodad ngad fanayed e tamilang ni rogon. (Proverbs 9:10; Hebrews 5:14) Ma Thin Rok e be fil rogon ngodad ni ngad ngongolgad “u fithik’ e sobut’an’ nge gonop.” Ma bochan ni gad ma ngongol u fithik’ e sobut’an’, ma aram ma gad ma mon’ognag e gapas u lan e congregation. (1 Korinth 8:1, 2) Girdi’ ni ma uf ni yad e pi tamachib nib salap u fithik’ e pi walag e yad be “lifith l’ugunrad nib togopuluw ko tin nib riyul’ e thin.” (Galatia 5:26) “Gonop” rorad e yib u “fayleng”—ni aram rarogon e girdi’ nib denen ni dar nanged Got. Gonop rorad e bod ba “gamanman” ya aram wenegan e ar’ar’ rok e girdi’. Mus ko gonop rorad e “moonyan’ e yib rok,” ya ba ufanthin e pi kan nib kireb! (1 Timothy 3:6) Ere nguud maruweliyed e gonop ma nge sobut’an’dad ni fan e nge dabda k’aringed e ‘kireb’ ni ngad t’ared e thin nga daken be’ ara ngad pired ni be yib lanin’dad ngak boch e girdi’.
20. Ba uw rogon e gonop ni yib u tharmiy?
20 “Bin som’on e fare gonop ni yib u tharmiy e mmachalbog,” ere ra biechnag lanin’dad ma ra ayuwegdad ko tirok Got ban’en. (2 Korinth 7:11) Maku ra “aw e gapas riy,” ya ra mithmithegdad ngad nameged e gapas. (Hebrews 12:14) Gonop ni yib u tharmiy e ma n’igin ni nge “sumunguynigey,” ma dabda laniyan’dad ngak e girdi’. (Filippi 4:5) Gonop ni yib u tharmiy e “ma fl’eg owchey,” ya baadag ni nge fol ko machib ni yib rok Got ma baadag ni nge fol ko ulung rok Jehovah. (Roma 6:17) Maku gonop ni yib u tharmiy e “ba sug ko runguy ma ma k’uf ni ngongol nib fel’.” (Jude 22, 23) Faanra arrogodad ni gad ba sug ko “ngongol nib fel’,” ma ra k’aringdad ngad lemnaged yugu boch e girdi’ ma gad ra ngongliy e ngongol nib manigil, mab mat’aw, mab riyul’. (Efesus 5:9) Bochan ni gad be nameg e gapas, ma ra falfalan’dad ko “tin nib mat’aw e ngongol ni aram e wom’engin” ni bay u fithik’ e gapas.
21. Be weliy ko James 2:1–3:18 miti mang e ngongol ni gad ra ngongliy ni faanra mmich Got u wan’dad?
21 Ere ba tamilang, michan’ e ma mithmithegdad ngad maruwelgad ngay. Ya ma n’igindad ni dabda pired ni be yib lanin’dad nga ban’en, ma ma ayuwegdad ngad daged e runguy, ma ngad ngongliyed e ngongol nib fel’. Michan’ e ma ayuwegdad ngad gagiyegnaged blowthedad ma nge yog e gonop ni yib u tharmiy ngodad. Machane gathi ke mus e pi n’en ni ke tamilang u wan’dad ko re babyor ney. Ya i pi’ James boch e thin nrayog ni nge ayuwegdad ngad ngongolgad nrogon ni bpuluw ko piin nib mich Jehovah u wan’rad.
Uw Rogon e Fulweg Rom?
◻ Mang fan nib kireb ni ngam taareb rogonnag be’ nib fel’ rogon nge be’ nib gafgow?
◻ Uw rogon ni ma maruwel e michan’ nge ngongol u taabang?
◻ Mang ni baga’fan ni ngan gagiyegnag blowthey?
◻ Ba uw rogon e gonop ni yib u tharmiy?