Riyul’ Ni Kari Mich Fare Thin Nib Fel’ U Wan’um?

“Gil’ilungun Got e ke chugur. Mpied keru’med ko denen ni gimed be rin’, nge mich u wun’med fare thin nib fel’.”​—MARK 1:15, NW.

1, 2. Uw rogon ni ngam weliy e thin ni bay ko Mark 1:14, 15?

DUW ni 30 C.E. eram. I tababnag Jesus Kristus e maruwel rok nrib fel’ ni i machib u Galilee. I par ni yug be machibnag “fare thin nib fel’ rok Got,” ma boor e girdi’ ni piyu Galilee ni kan pug laniyan’rad ko thin ni yog ni gaar: “Ngal’an ni kan dugliy e ke taw, ma gil’ilungun Got e ke chugur! Mpied keru’med ko denen ni gimed be rin’ nge mich u wun’med fare Thin Nib Fel’.”​—Mark 1:14, 15.

² “Ngal’an ni kan dugliy e ke taw” ni nge tabab Jesus ko maruwel rok ni nge wereg e machib ma ku ke taw ko ngiyal’ ni nge dugliy e girdi’ ban’en ni ngar fel’gad u wan’ Got. (Luke 12:54-56) Ka nog ni ‘gil’ilungun Got e ke chuchugur’ ko ngiyal’ nem ya bochan ni immoy Jesus ni ir e Kan Dugliy ni nge Mang Pilung. Maruwel rok ni ngan wereg e machib e ke k’aring e girdi’ ni ba fel’ laniyan’rad ni ngar kalgadngan’rad ko denen rorad. Machane uw rogon ni ur daged ni “ke mich fare thin nib fel’ u wan’rad”, ma gadad uw rogon ni nga kuuda daged?

3. Nge rin’ e girdi’ e mang ma rayog ni ngar daged ni ke mich fare thin nib fel’ u wan’dad?

³ Taab rogon ko n’en ni rin’ Jesus, Peter ni apostal e i pi’ e athamgil nga laniyan’ e girdi’ ni ngar kalgadngan’rad. Peter ni be non ngak piyu Jew u Jerusalem u nap’an e Pentekost 33 C.E., me yog ni gaar: “Nge bigimed me pi’ keru’ ko denen ni be rin’, min taufenag nga fithingan Jesus Kristus, ma aram me n’ag Got fan e denen romed; me yog e tow’ath rok Got ngomed, ni aram e Kan ni Thothup.” Bokum biyu’ e girdi’ e kar kalgadngan’rad, min taufenagrad, ma kar manged pi gachalpen Jesus. (Acts 2:38, 41; 4:4) U lan e duw ni 36 C.E., ma girdi’ ni gathi yad piyu Israel e ka ra rin’ed e tin ni aram rogon. (Acts 10:1-48) Ngiyal’ ney, ma michan’ ko fare thin nib fel’ e ke k’aring bokum biyu’ e girdi’ ni ngar kalgadngan’rad ko denen rorad, mi yad ognag e yafas rorad ku Got, min taufenagrad. Kar chaariyed fare thin nib fel’ u murung’agen e yafas ma yad be dag e michan’ rorad ko maligach ni pi’ Jesus ko ngongol rorad. Ma reb, yad ma rin’ e tin nib mat’aw mi yad par u tan Gil’ilungun Got.

4. Be mang e michan’?

⁴ Machane be mang e michan’? Paul ni apostal e yoloy ni gaar: “Ra nge michan’dad ma aram e ke pagan’dad ko pi n’en ni ir e ke l’agan’dad ngay, ma ke michan’dad ko pi n’en ndarid guyed nga owchedad.” (Hebrews 11:1) Bochan e michan’ rodad ma kari mudugil urngin ban’en ni ke micheg Got ngodad ni bay ko Thin rok ni bod ni ke yib i m’ug nib riyul’. Ni bod ni ke yog ngodad reb e babyor ni be dag riy ni reb e binaw ara chugum e ke mang birodad. Maku michan’ e eram “fare ngongol ni yima dag,” ara mich riy ni kari mich ban’en u wan’uy, ni tin daworni guy. Rogon ni ke tamilang ban’en u wan’dad nge gum’irchadad ni ri be pining e magar e ra k’aringdad nge mich u wan’dad ni rib riyul’ e pi n’en nem, nyugu aram rogon ni darid guyed nga owchedad.​—2 Korinth 5:7; Efesus 1:18.

Bat’uf Rodad e Michan’!

5. Mang fan ni ri baga’ fan e michan’?

⁵ Kan gargelnagdad nib t’uf rodad e tirok Got machane gathi kan gargelnagdad ni bay e michan’ rorad. Tin riyul’ riy, e “gathi urngin e girdi’ ni bay e michan’ rorad.” (2 Thessalonika 3:2) Machane, piin Kristiano e susun bay e michan’ rorad ni fan ni nge yog ngorad e tin ke micheg Got. (Hebrews 6:12) Tomren ni ke weliy Paul murung’agen boor e girdi’ ni kar daged e michan’ rorad, miki yoloy ni gaar: “Bochan ni bay boor e Pi Mich u toobedad ni bod e manileng, ma ku ngada chuweged urngin ban’en ni be tomalnagan’dad nge denen nib mom nke m’agdad, ma ngada uned ko mil u fithik’ e gum’an’ ko fare sagreng ni kan ta’ nga p’eowchadad, ni ri gad be sap ngak Jesus ni ir fare Pilung ma ku ir e Ani ma ayuweg ni ngari gel e michan’ rodad.” (Hebrews 12:1, 2, NW) Mang “fare denen nib mom ni ke m’agdad”? Ireray e michan’ ni de gaman ara ba war, ara fare michan’ ni immoy kafram ma chiney e dakuriy. Rogon ni ngan ayuweg nge par nib gel e michan’ rodad, e thingarda ‘sapgad ngak Jesus ni rib fel’ rogon’ ma ngad folgad ko tin ni i rin’. Ma kub t’uf ni ngad siyeged e ngongol ni darngal, ma ngad togopuluwgad ko tin baadag e dowef rodad ni tadenen, ma ngad paloggad ko chogowen e chugum, nge llowan’ nu fayleng, nge boch e yalen ni de puluw ko thin nu Bible. (Galatia 5:19-21; Kolose 2:8; 1 Timothy 6:9, 10; Jude 3, 4) Ma reb, e susun ni ngari michan’dad ni Got e bay rodad ma fonow ni bay ko Thin rok e ri baga’ angin.

6, 7. Mang fan nib puluw ni ngan meybil ni fan ni nge gel boch e michan’?

⁶ Dabiyog ni ngad sunmiyed e michan’ nga fithik’dad u daken gelngin e lem rodad. Michan’ e ir bang ko wom’engin e kan ni thothup, ara gelngin nib gel. (Galatia 5:22, 23) Ere, uw rogon ni faanra ba t’uf ni ngan gelnag e michan’ rodad? I yog Jesus ni gaar: “Faanra . . . gimed manang rogon ni ngam pied e taw’ath nib fel’ ngak e pi bitir romed, me ere en Chitamangiy ni bay u tharmiy e ri rayog rok ni nge pi’ fare kan ni thothup ngak e piin ni yad ra ning ngak!” (Luke 11:13, NW) Arrogon, ngad meybilgad nge yog ngodad fare kan ni thothup, ya ireray e n’en nra sunmiy e michan’ u fithik’dad ma rayog nib t’uf rodad ni nge yog ni ngad rin’ed e tin nib m’agan’ Got ngay nyugu aram rogon ni gad bay u tan e magawon ni rib mo’maw’.​—Efesus 3:20.

⁷ Ba puluw ni ngan meybil ni nge gel boch e michan’. Nap’an ni ke chuchugur ni nge chuweg Jesus fare demon ni ke ying ko fare pagal, me wenig e chitamangin fare pagal ngak ni gaar: “Ba pagan’ug ngak Got, machane de gaman, ere mu ayuwegneg!” (Mark 9:24) “Mu gelnag e michan’ romad ngak Got,” ireray rogon ni yog fapi gachalpen Jesus. (Luke 17:5) Ere, ngad meybilgad ni nge yog ngodad e michan’, ya ba mudugil u wan’dad nra fulweg Got taban e meybil ni aram rogon.​—1 John 5:14.

Michan’ ko Thin Rok Got e Baga’fan

8. Uw rogon ma michan’ ko Thin rok Got e ra ayuwegdad?

⁸ De n’uw nap’an u m’on ni ke yim’ Jesus, me yog ngak pi gachalpen ni gaar: “Dabi magafan’med ma dabi wagagey lanin’med. Mpagedan’med ngak Got, mi ki gimed pagan’med ngog.” (John 14:1) Bay e michan’ rodad ku Got nge Fak ya gadad e Kristiano. Machane uw rogon e Thin rok Got? Rayog ni nge ayuwegey nge fel’ boch e yafas rodad nfaanra ngad filed ma gad fol riy ni kari pagan’dad ngay nra pi’ ngodad e fonow nth’abi fel’ nge thin nra pow’iydad nrayog ni ngad fanayed.​—Hebrews 4:12.

9, 10. Uw rogon ni ngam weliy e thin u murung’agen e michan’ ni bay ko James 1:5-8?

⁹ Yafas rodad nde flont e rib wagey. Machane, michan’ ko Thin rok Got e riyul’ nra ayuwegdad. (Job 14:1) Ni bod ni, susun ngad ted ni dada nanged rogon ni ngad mada’naged reb e skeng. Thin rok Got e be fonownagdad ni be gaar: “Machane faanra dariy e gonop rok bigimed, ma nge wenignag ngak Got, yi Got e ba gol ngak urngin e girdi’. Machane thingari pagan’med ngak Got ko ngiyal’ ni gimed ra wenignag ban’en ngak, ma dabi maruwaran’med rok; ya cha’ nra maruwaran’ rok e bod ba ley i n’ew u maday nnifeng e be mithmitheg ma be yannag. Be’ ni aram rogon e thingari dabi lemnag nra pi’ Somol ban’en ngak, ya dawori mudugil laniyan’ ko tin ni be rin’.”​—James 1:5-8.

¹⁰ Dabi thibthibnagdad Jehovah Got ya dariy e gonop ma gad ma meybil ngak ni nge yog boch ngodad. Tin ra rin’, e ra ayuwegdad nrayog ni ngad guyed e skeng nrogon. Rayog ni ngad pirieged e thin u Bible ni ra ayuwegdad nbochan e pi walagdad ni be ayuwegdad ara nap’an ni gad be fil fare Bible. Ara ra pow’iydad e kan ni thothup rok Jehovah u yugu boch e kanawo’. Chitamangidad u tharmiy e ra pi’ e gonop ngodad ma rayog ni ngad gelgad ko boch e skeng ni faanra “nguuda yibilayed ban’en u fithik’ e pagan’, ni ri dariy e maruwar riy.” Faanra gadad bod ba ley e n’ew u maday nnifeng e be mithmitheg ma be yannag, ma dabda lemnaged nra pi’ Got ban’en ngodad. Mang fan? Ya bochan ni biney e be dag ni de mudugil lanin’dad ma gathi gubin ngiyal’ ni gad ma meybil ngak ara yugu boch ban’en ni aram rogon​—arrogon, ma kub muun ngay rogon ni gad ma dag e michan’ rodad ku Got. Ere ba t’uf ni ngari pagan’dad ko Thin rok Got nge fapi kenggin e motochiyel ni bay riy. Gad ra weliy boch ban’en ni be dag ko uw rogon ni be pi’ e ayuw ma be pow’iyey.

Michan’ nge Ggan

11. Michan’ ko Thin rok Got e be micheg ngodad e mang u murung’agen e tin nib t’uf rodad u gubin e rran?

¹¹ Uw rogon ni faanra gad ba magawon e chiney ya de gaman e ggan rodad ma dariy e naun rodad ara gad ba gafgow? Michan’ ko Thin rok Got e ra ayuwegdad ni ngari pagan’dan nra pi’ Jehovah ngodad e tin nib t’uf rodad u gubin e rran ma ra pi’ urngin ban’en nib t’uf rok urngin e girdi’ nib t’uf Got rorad boch nga m’on. (Psalm 72:16; Luke 11:2, 3) Sana ra pi’ e athamgil nga lanin’dad ni ngad fal’eged i lemnag ko uw rogon ni i pi’ Jehovah e ggan ngak Elijah ni profet u nap’an e uyungol. Tomur riy, ma daken e maangang me pi’ Got e merikengko nge gapgep ni ke ayuweg reb e ppin, nge fak ni pumoon, nge Elijah ndar m’ad. (1 Kings 17:2-16) Maku i pi’ Jehovah e tin nib t’uf rok Jeremiah ni profet u nap’an nib piyu Babylon ra longobiyed yu Jerusalem. (Jeremiah 37:21) Yugu aram rogon ni buchuw e ggan rok Jeremiah nge Elijah ko ngiyal’ nem, machane ke ayuwegrow Jehovah. Maku ireray e n’en ni ke rin’ ngak e piin ni kar maruweliyed e michan’ rorad ngak e chiney.​—Matthew 6:11, 25-34.

12. Uw rogon ma michan’ e ra ayuwegdad ni nge yog ngodad e tin nib t’uf rodad?

¹² Michan’ nge ngan fol ko kenggin e motochiyel u Bible e dabi ayuwegdad ni ngari yoor e chugum rodad, machane ra ayuwegdad ni nge yog ngodad e tin nib t’uf rodad. Ra ngan dag rogon: Ma Bible e be fonownagdad ni ngad yul’yul’gad, ma ngad salapgad ko maruwel, ma ngad manged girdi’ ni tamaruwel. (Proverbs 22:29; Eklesiastes 5:18, 19; 2 Korinth 8:21) Ri dabda lemnaged ni dariyfan ni ngan nang ni gadad e tamaruwel ni rib fel’. Mus ko fapi binaw ni mo’maw’ ni ngan pirieg e maruwel nib fel’ riy ma piin nib yul’yul’, mab salap ko maruwel, ma ma maruwel nib elmirin’ e kab mom boch e par rorad ko boch e girdi’. Yugu aram rogon ni pi cha’ nem e sana de yoor e chugum rorad, ma baga’ ni bay rorad e tin nib t’uf rorad ma yad ba felfelan’ ni yad be kay e ggan ni ke yog ngorad ni bochan e maruwel ni kar ted.​—2 Thessalonika 3:11, 12.

Michan’ e Ra Ayuwegdad ni Ngad K’adedan’dad ko Kireban’

13, 14. Uw rogon ni nge ayuwegdad e michan’ ni ngad k’adedan’dad ko kireban’?

¹³ Thin rok Got e be dag ni rib fel’rogon ni yima kireban’ u nap’an ni ke yim’ be’ nib t’uf. Abraham ni patriarch mab yul’yul’ e kari kireban’ u nap’an ni ke yim’ Sarah, nib t’uf rok. (Genesis 23:2) Kari kireban’ David u tomren ni ke rung’ag ni ke yim’ Absalom ni fak. (2 Samuel 18:33) Mus ngak Jesus ni ir be’ nib flont ma i yor ni bochan’ nke yim’ e fager rok i Lazarus. (John 11:35, 36) Nap’an ni ra yim’ be’ nib t’uf rodad, ma rayog ni nge kireban’dad nib gel, machane michan’ ko tin ni kan micheg u lan e Thin rok Got e ra ayuwegdad ni ngad k’adedan’dad.

¹⁴ ‘Bay e l’agan rog ngak Got,’ ireray e n’en ni yog Paul, me ulul ngay ni gaar, ‘ni bay e fas ko yam’ ni fan ko piin nib mat’aw nge piin ni de mat’aw.’ (Acts 24:15, NW) Ba t’uf ni nge michan’dad ko yaram rok Got ni ri boor e girdi’ e yira faseg ko yam’. (John 5:28, 29) Ba muun ngorad i Abraham nge Sarah, nge Isak nge Rebekah, nge Jakob nge Leah​—ni yad urngin e kar m’ad yad be sonnag e fas ko yam’ u lan e fayleng rok Got nib biech. (Genesis 49:29-32) Uw feni gel e felfelan’ ko ngiyal’ ni piin ni yad ba t’uf rok e girdi’ e yira fasegrad ko yam’ ni ngar pared uroy u fayleng! (Revelation 20:11-15) Ngiyal’ ney, michan’ e dabi chuweg urngin e kireban’ rodad, machane ra ayuwegdad ni ngad pared nib chuchugur ku Got, ni ir e ra ayuwegdad ni ngad k’adedan’dad ko kireban’ ni bochan e yam’.​—Psalm 121:1-3; 2 Korinth 1:3.

Michan’ e Ra Gelnag e En Ke Mochuch

15, 16. (a) Mang fan ni rayog ni ngad dogned ni mochuch e aram e n’en ni ma buch ko piin ni ma maruweliy e michan’ rorad? (b) Mang e rayog ni ngan rin’ ni ngan gel ko mochuch?

¹⁵ Maku be dag e Thin rok Got ni mus ko girdi’ ni ma dag e michan’ rorad e ku rayog ni nge mochuch. Nap’an ni keb ngak Job e skeng nib gel, me lemnag ni ke digey Got. (Job 29:2-5) Kari kireban’ Nehemiah ni bochan kan gothey Jerusalem nge yoror riy. (Nehemiah 2:1-3) Kari kireban’ Peter u tomren ni i mithag ni manang Jesus ma aram ke “yor nib elmirin.” (Luke 22:62, NW) Me ta’ Paul ir ko pi walag u lan e ulung nu Thessalonika ni ngar “fal’eged laniyan’ e piin kar mochuchgad.” (1 Thessalonika 5:14, NW) Ere, mochuch ni ra yib ngak e piin ni ma dag e michan’ rorad e ban’en ni ka ma buch. Ere, mang e rayog ni ngad rin’ed ni fan ni ngad gelgad ko mochuch?

¹⁶ Sana kad mochuchgad ya bochan keb ngodad boch e magawon nib gel. Dabda lemnaged ni ireray reb e magawon ni rib gel, ya faan gad ra fol ko kenggin e motochiyel u Bible ma rayog ni ngad pithiged e pi magawon nem reb nge reb. Rayog ni nge ayuwegdad e re n’ey nge war e mochuch rodad. Maruwel ni kan yarmiy nib fel’ rogon nge ngan ta’ e tayim ni ngan toffan riy e ku rayog ni nge ayuwegey. Reb ni ba mudugil: Michan’ ku Got nge Thin rok e ra ayuwegdad ko tirok ya bochan ra gelnag e pagan’ rodad ni riyul’ ni ri ma lemnag rogodad.

17. Uw rogon ni ngad nanged ni ma lemnagdad Jehovah?

¹⁷ I micheg Peter ban’en nra fal’eg lanin’dad ni gaar: “Ere mu sobut’niged lanin’med u tan pa’ Got nib gel gelngin, me fal’eg lanin’med ko ngiyal’ ni be finey. Mpaged fan urngin e magafan’ romed ngak, ya be lemnag rogomed.” (1 Peter 5:6, 7) I yon’ fare psalmist e tang ni gaar: “Ma ayuweg urngin e piin ni ke yib e gafgow ngorad; ma pi’ e athamgil nga laniyan’ e piin ni ke mulan’rad. (Psalm 145:14) Thingarda pagedan’dad ko pi thin ney, ya yira pirieg e pi n’ey u lan e Thin rok Got. Yugu aram rogon ni sana gad be par ni kad mochuchgad, ma bochan ni gad manang ni rayog ni ngad pied ngak e Chitamangidad nu tharmiy ni ta runguyey urngin e magafan’ rodad ma aram e ra gelnag e michan’ rodad!

Michan’ nge Yugu Boch e Skeng

18, 19. Uw rogon ni ma ayuwegdad e michan’ ni ngad athamgilgad u fithik’ e liliy ma uw rogon ni ngad fal’eged laniyan’ pi walagdad nib m’ar?

¹⁸ Rayog ni ngeb ngodad e skeng ko michan’ rodad nib gel ko ngiyal’ ni gadad ara piin nib t’uf rodad e keb e m’ar ngak bagayad nib gel. Yugu aram rogon ni Bible e de yog ni kan golnag boch e Kristiano u fithik’ e maangang ni bod Epafroditus, nge Timothy, nge Trophimus, dariy e maruwar riy ni ke ayuwegrad Jehovah ni nguur kadedan’rad. (Filippi 2:25-30; 1 Timothy 5:23; 2 Timothy 4:20) Ma reb, murung’agen e “en ni ma rin’ ban’en ni ma lemnag be’ nib sobut’,” fare psalmist e i yon’ e tang ni gaar: “Ra gelnag Jehovah fa cha’ nib m’ar u daken e bet rok; ma ri ngam biechnag urngin e bet rok u nap’an ni keb e m’ar ngak.” (Psalm 41:1-3, NW) Uw rogon ni nge ayuwegdad fare thin ko fare psalmist ni ngad fal’eged laniyan’ e pi walagdad?

¹⁹ Reb e kanawo’ ni ngan pi’ e ayuw ko tirok Got ngak piin ni keb e m’ar ngorad e ngan meybil ni fan ngorad ni yad be un ngay. Yugu aram rogon ni dabda ninged ni ngan golnag e m’ar rorad u fithik’ e maangang e ngiyal’ ney, ma rayog ni ngad ninged ngak Got ni nge gelnagan’rad ma aram rayog ni ngar athamgilgad ko m’ar rorad ma ra pi’ Got gelngirad ko tirok nib t’uf rorad ko ngiyal’ nem ni kar meewargad. Ra gelnagrad Jehovah, ma ra gel e michan’ rorad ya nguura sapgad ko tin ni bay nga m’on ko ngiyal’ ni “dakuriy be’ ni ra yog ni gaar: ‘Gub m’ar.’” (Isaiah 33:24) Uw feni gel e felfelan’ riy ni ngan nang nu daken Jesus Kristus ni kan faseg ko yam’ ngu daken Gil’ilungun Got, ma dabki par e girdi’ u tan gelngin e denen, nge liliy, nge yam’! Bochan e re athap ni rib fel’ ney, e ngad pininged e magar ngak Jehovah, ‘ni ir e bayi golnag urngin e liliy rodad.’​—Psalm 103:1-3; Revelation 21:1-5.

20. Mang fan ni rayog ni nga dogned ni michan’ e ra ayuwegdad ni rayog ni ngad k’adedan’dad ko “pi rran nib mo’maw’” ya kad pillibthirgad?

²⁰ Michan’ e ku rayog ni nge ayuwegdad ni ngad k’adedan’dad u nap’an e “pi rran nib mo’maw’” ya kad pillibthirgad, ma be war e dowef rodad nge gelngidad i yan. (Eklesiastes 12:1-7) Ere piin pillibthir u fithik’dad e rayog ni ngar meybilgad ni bod rogon fare psalmist ni ke pillibthir me yon’ e tang ni gaar: “I gur e athap rog, O Jehovah ni gur e Somol ni Th’abi Tolang . . . Dab mu n’ageg u nap’an ni kug pillibthir; ma nap’an ni dakuriy gelngig, e dab mu pageg.” (Psalm 71:5, 9, NW) Fare psalmist e ke thamiy nib t’uf rok e ayuw rok Jehovah, ni taab rogon ko pi walagdad ni Kristiano ni kar pigpiggad ku Got nib n’uw nap’an ma kar pillibthirgad e chiney. Bochan e michan’ rorad ma ke mudugilan’rad ni bay Jehovah ni be ayuwegrad u gubin ngiyal’.​—Deuteronomy 33:27.

Mu Par nib Mich e Thin Rok Got u Wan’um

21, 22. Faanra bay e michan’ rodad, ma mang e ra rin’ e re n’ey ko tha’ u thildad Got?

²¹ Michan’ ko fare thin nib fel’ nge Thin rok Got ni polo’ e ra ayuwegdad ni ngarda chugurgad ngak Jehovah. (James 4:8) Riyul’ ni ir e Somol ni Th’abi Tolang, machane ku ir e en ke Sunmiydad ma Chitamangidad. (Isaiah 64:8; Matthew 6:9; Acts 4:24) “I gur e Chitamag, nge Got rog nge ba Malang ni be yororiyeg,” ireray e tang rok fare psalmist. (Psalm 89:26) Faanra gad be dag e michan’ rodad ku Jehovah nge Thin rok ni Kan thagthagnag, ma ku rayog ni nga dogned ni ir e bod ‘ba Malang ni be yororiydad.’ Uw feni fel’ e re taw’ath ney!

²² Jehovah e ir e Chitamangin e Kristiano ni kan ni thothup e ke fakayrad nge piin ni ba chag ngorad ni bay athap rorad ni ngar pared u fayleng. (Roma 8:15) Ma michan’ rodad ko Chitamangidad nu tharmiy e dabi pag nge mulan’dad. I yog David ni gaar: “Ra n’igeg e chitamag nge chitinag, machane Somol e ra ayuwegneg.” (Psalm 27:10) Ma reb, kan micheg ngodad ni gaar: “Dabi n’ag Jehovah e girdi’ rok nbochan ngocholen nib ga’.”​—1 Samuel 12:22, NW.

23. Mang e ba t’uf ni ngad rin’ed ma ra yog ni nge fel’ thildad Jehovah ni dariy n’umngin nap’an?

²³ Ma rogon ni ngi i par nib fel’ thildad Jehovah, ma thingari mich e thin nib fel’ u wan’dad ma ngarda folgad ko Thin nu Bible​—ni aram e Thin rok Got. (1 Thessalonika 2:13) Ri thingari mich Jehovah u wan’dad ma ngad paged ni Thin rok e ra pi’ e tamilang ko kanawo’ rodad. (Psalm 119:105; Proverbs 3:5, 6) Ra gel e michan’ rodad ni faan gad ra meybil ngak ni be pagan’dad ko ngongol rok nib ta runguyey ma ba wurengan’ ma ma ayuwegey.

24. Mang tafinay ni ra fal’eg lanin’uy ni bay ko Roma 14:8?

²⁴ Michan’ e ra k’aringdad ni ngad ognaged gadad ku Got ndariy n’umngin nap’an. Bochan ni bay e michan’ rodad nib gel, ma yugu demtrug ko gad ra yim’, ma gadad e pi tapigpig rok ni kad ognaged gadad ngak ni bay e athap rodad ni ra fas e yam’. Arrogon, “demtrug ko gad ba fas ara gadad ba yam’ machane mmil fadad ngak Got.” (Roma 14:8) Ngad chaariyed e re lem nem nib fel’ nga lan gum’irchadad nib pagan’dad ko Thin Rok Got ma be par nib mich fare thin nib fel’ u wan’dad.

Uw Rogon ni Ngam Pi’ e Fulweg?

• Mang e michan’, ma mang fan nib t’uf rodad e re felngin ney?

• Mang fan ni baga’ fan ni bay e michan’ rodad ko thin nib fel’ nge Thin rok Got ni polo’?

• Uw rogon ma michan’ e ra ayuwegdad u nap’an ni gad ra mada’nag e skeng nib thilthil?

• Mang e ra ayuwegdad nge par nib gel e michan’ rodad?

[Pictures on page 10]

I ayuweg Jehovah Jeremiah nge Elijah ya bochan bay e michan’ rorad

[Pictures on page 11]

Job, Peter, nge Nehemiah e immoy e michan’ rorad nib gel

[Pictures on page 13]

Rogon ni nge fel’ e tha’ u thildad Jehovah, e thingari mich fare thin nib fel’ u wan’dad