Michan’​—Reb e Fel’ngin Nra Pi’ Gelngiy

BA GEL gelngin e michan’. Satan e ma guy rogon ni nge kirebnag e tha’ u thildad Jehovah, machane michan’ rodad e ma ayuwegdad ni ngad ‘piliged urngin gan e gat’ing ni be yik’ ni be pag Faanem nib Kireb ngodad.’ (Efe. 6:16) Ra bay e michan’ rodad, ma aram e rayog ni ngad athamgilgad u fithik’ boch e magawon nib ga’ ni ma yib ngodad. Pi magawon ney e rayog ni ngan taarebrogonnag ko burey nib tolang. I yog Jesus ngak pi gachalpen ni gaar: “Faanra ba’ e michan’ romed ngak Got ni bod mam’ungun ba awochngin e mustard, ma rayog ni nge lungumed ko re burey ney, Mman u roy i iram! ma ra yan. Ma demturug ban’en ma rayog romed!” (Matt. 17:20) Bochan ni gad manang ni michan’ e rayog ni nge gelnag e tha’ u thildad Jehovah, ma aram fan nthingar da lemnaged e pi deer ni baaray ni be gaar: Mang e michan’? Mang rogon e pi n’en ni bay u gum’ircha’dad ko michan’ rodad? Uw rogon ni ngad gelnaged e michan’ rodad? Ma mini’ e thingari michan’dad ngak?​—Rom. 4:3.

MANG E MICHAN’?

Ra nge michan’uy ma gathi kemus ni be yip’ fan ni nge mich u wan’uy e n’en ni be yog e Bible, ya mus ngak e “pi moonyan’ nib mich u wun’rad [ni bay Got] ma yad ma da’da’ ko marus.” (Jas. 2:19) Ere mang e michan’?

L’agruw ban’en ni be weliy e Bible u murung’agen e michan’. Bin som’on, “ra nge michan’dad ma aram e ke pagan’dad ko pi n’en ni ir e ke l’agan’dad ngay.” (Heb. 11:1a) Faanra bay e michan’ rom, ma aram e rib pagan’um ni gubin ban’en ni ke yog Jehovah mab riyul’ ma ra lebug. Bod ni yog Jehovah ngak piyu Israel ni gaar: “Kug ngongliy ba m’ag ko rran nge nep’, ya nge yag ni ur m’uggow ko ngalan’ nni dugliy; ma re m’ag nem e dabi math biid. Maku aram rogon e tapigpig rog i David ni kug ngongliy e m’ag u thilmow ni . . . dabi math.” (Jer. 33:20, 21, BT) Bay ba ngiyal’ ni kam magarnag nri chey ma de for e yal’ nga lang fa aw e yal’ u reb e rran, ma dabkiyog ni nge rran maku dabkiyog ni nge nep’, fa? Faanra der maruwar u wan’um rogon ni ma maruwel e pi motochiyel ni ma ayuweg e fayleng ni nge chel nib fel’ rogon nge liyeg e yal’, me ere gur, ba puluw ni nge maruwar u wan’um ni En Ke Sunmiy e pi motochiyel ney e ra thilyeg e tin ke micheg? Mmudugil ni danga’!​—Isa. 55:10, 11; Matt. 5:18.

Bin l’agruw, ra nge yag e michan’ ngodad ma aram e “ke michan’dad ko pi n’en ndarid guyed nga owchedad.” (Heb. 11:1b) Uw rogon e re n’ey? Mu susunnag ni ke fithem reb e bitir ni ke gaar, ‘Uw rogon ni kam nang ni bay e nifeng?’ Yugu aram rogon ndariy biid ni kam guy e nifeng, machane rayog ni ngam weliy ngak fare tir murung’agen boch ban’en ni be micheg ni bay e nifeng. Bod nrayog ni ngam weliy ngak rogon ni gad ma pogofan, nge pi n’en nrayog ni nge rin’ e nifeng, nge ku boch ban’en. Nap’an nra mich u wan’ fare tir nib riyul’ e pi n’ey, ma aram e ra nang nrayog ni nge michan’uy nga ban’en ndanir guy. Ere michan’ e be tor nga daken boch ban’en ni bay e mich riy.​—Rom. 1:20.

PI N’EN NI BAY U GUM’IRCHA’DAD E BAY ROGON KO MICHAN’ RODAD

Bochan ni michan’ e be tor nga daken boch ban’en ni bay e mich riy, ma aram fan ni faanra nge yag e michan’ ngak be’ ma thingari ‘nang e tin nib riyul’.’ (1 Tim. 2:4) Machane de gaman ni kemus ni nge nang be’ e tin riyul’. I yoloy apostal Paul ni gaar: “Michan’ e ma sum u gum’irchaey.” (Rom. 10:10, NW) Gathi kemus ni nge mich u wan’ be’ e tin riyul’, ya kub t’uf ni nge ga’ fan u wan’. Nap’an nra ga’ fan u wan’ ma aram e n’en nra k’aring ni nge maruweliy e michan’ rok ni aram e nge rin’ e tin nib m’agan’ Got ngay. (Jas. 2:20) Be’ nde ga’ fan e tin riyul’ u wan’ e rayog ni nge siyeg boch ban’en ni bay e mich riy ni bochan e dabun ni nge thilyeg e tin ni immoy nib riyul’ u wan’ kafram ara bochan ni baadag ni nge rin’ e tin ni baadag. (2 Pet. 3:3, 4; Jude 18) Aram fan ni gathi gubin e girdi’ kakrom nra guyed e pi maang’ang nni ngongliy e gel e michan’ rorad. (Num. 14:11; John 12:37) Yigoo piin riyul’ nib ga’ fan e tin riyul’ u wan’rad e ra ayuwegrad gelngin Got nib thothup ni nge yag e michan’ ngorad.​—Gal. 5:22, NW; 2 Thess. 2:10, 11.

ROGON NI GEL E MICHAN’ ROK DAVID

David ni Pilung e ir bagayad e piin ni immoy nib gel e michan’ rok. (Heb. 11:32, 33) Machane gathi gubin e girdi’ u lan e tabinaw rok David nib gel e michan’ rorad. Bagayad e pi girdi’ ney e aram Eliab ni ir e th’abi ilal u walagen David. Bay bayay ni dag Eliab nib war e michan’ rok u nap’an ni puwan’ ngak David ni ke weliy rogon laniyan’ ko n’en ni be rin’ Goliath. (1 Sam. 17:26-28) Dariy be’ ni yira gargeleg ma bay e michan’ rok, ara ban’en ni ke af ko gallabthir rok ngak. Ere ba gel e michan’ rok David ni bochan e ba fel’ e tha’ u thilrow Got.

I tamilangnag David rogon ni ke gel e michan’ rok ko Psalm 27. (Vs. 1) I fal’eg i lemnag e pi n’en ni ke buch rok nge rogon ni ke ayuweg Jehovah ke gel ko pi toogor rok. (Vss. 2, 3) Rib ga’ fan u wan’ rogon e yaram ni ke ngongliy Jehovah u rogon ni ngan liyor ngak. (Vs. 4) I un ngak boch e girdi’ ngaur liyorgad ngak Got u lan e tabernacle. (Vs. 6) I meybil nib gel ngak Jehovah ni nge ayuweg. (Vss. 7, 8) Ku baadag ni ngan fil ngak e tin ni baadag Got. (Vs. 11) Rib ga’ fan e michan’ u wan’. Ere aram fan ni gaar: “Ra uw rogog ni faan gomanga dariy e michan’ rog?”​—Vs. 13, NW.

ROGON NI NGAM GELNAG E MICHAN’ ROM

Rayog ni nge gel e michan’ rom ni bod David ni faan ga ra guy rogon ni nge puluw e lem rom nge pi n’en ni ga ma rin’ ko n’en ni bay ko Psalm 27. Bochan ni michan’ e be tor nga daken e tin riyul’ ni kan fil, ma aram fan ni faanra yoor e tayim ni gad ma fil e Thin rok Got riy nge pi babyor nib puluw e thin riy ko Bible, ma aram e ra mom ni nge yag e re fel’ngin ney ngodad ni aram bang u wom’engin gelngin Got nib thothup. (Ps. 1:2, 3) Nap’an ni ga be fol Bible, mag tay e tayim ni ngam fal’eg i lemnag e tin ni ga be fil. Faan ga ra rin’ ni aray rogon, ma aram e ra ga’ fan Jehovah u wan’um. Faanra ga’ fan Jehovah u wan’um, ma aram e ga ra adag ni ngam maruweliy e michan’ rom ni aram e ngaum liyor ngak u nap’an e muulung ma ga be weliy murung’agen e athap rom ko girdi’. (Heb. 10:23-25) Ku gad ma dag ni bay e michan’ rodad u nap’an ni gad ra ‘meybil ma dabi ngochngochan’dad.’ (Luke 18:1-8) Ere aram fan ni ngaum ‘meybil’ ngak Jehovah ni gubin ngiyal’ me pagan’um ni ‘be lemnag rogom.’ (1 Thess. 5:17; 1 Pet. 5:7) Michan’ e ma k’aringdad ni ngad rin’ed e tin nib mat’aw. Ma nap’an ni gad ra rin’ e tin nib mat’aw, ma aram e ra gel e michan’ rodad.​—Jas. 2:22.

MMARUWELIY E MICHAN’ ROM NGAK JESUS

Fare nep’ u m’on ni nge yim’ Jesus me gaar ngak pi gachalpen: “Mpagedan’med [“mmaruweliyed e michan’ romed,” NW] ngak Got, mi ki gimed pagan’med [“mmaruweliyed e michan’ romed,” NW] ngog.” (John 14:1) Ere gathi kemus nib t’uf ni ngad maruweliyed e michan’ rodad ngak Jehovah ya kub muun Jesus ngay. Uw rogon ni ngam maruweliy e michan’ rom ngak Jesus? Ngad weliyed dalip e kanawo’.

Bin som’on, ngam nang ni fare biyul e ba tow’ath ni ke pi’ Got ni fan ngom. I yog apostal Paul ni gaar: “Re pangin ni gu be par riy e chiney e kug par riy ni bochan e ke michan’ug ngak e en ni Fak Got, ni ir e gub t’uf rok ma ke pi’ e pogofan rok ni fan ngog.” (Gal. 2:20) Faanra ngam maruweliy e michan’ rom ngak Jesus ma aram e be yip’ fan ni nge mich u wan’um ni fare biyul e kan pi’ ni fan ngom, ma aram e n’en nra bing e kanawo’ ni ngan n’ag fan e denen rom, me yag e athap ko yafos ni manemus ngom, maku ireray e bin th’abi ga’ e mich riy ni gab t’uf rok Got. (Rom. 8:32, 38, 39; Efe. 1:7) Re n’ey e ra ayuwegem ni nge dab um lemnag boch ban’en nib kireb u murung’agem.​—2 Thess. 2:16, 17.

Bin l’agruw, mu chugur ngak Jehovah u daken e meybil. Rayog ni ngam rin’ e re n’ey ni bochan fare maligach rok Jesus. Re biyul ney e ku ra ayuwegdad ni ngad meybilgad ngak Jehovah ni “dab kud tamdaggad ngad bad nga tagil’ Got, ko gin ni bay e ayuw riy. Ya ereram e gin ni yira runguydad riy min ayuwegdad ko ngiyal’ ndabi siy ni ngar ni ayuwegdad.” (Heb. 4:15, 16; 10:19-22) Meybil e ra pi’ gelngidad ya nge yag nda dugliyed ni ngad siyeged e pi n’en ni ma waliydad ko denen.​—Luke 22:40.

Bin dalip, mu fol rok Jesus. I yoloy apostal John ni gaar: “En nra mich u wan’ [“maruweliy e michan’ rok ngak,” NW] e en ni Fak Got e aram e ke yog e yafos ndariy n’umngin nap’an ngak; ma en ndabi fol rok e en ni Fak Got e dabiyog e yafos ngak, machane be par e damumuw rok Got u daken ndariy n’umngin nap’an.” (John 3:36) Mu tay fanam i yan riy ni be weliy John e n’en nib thil u thilin be’ ni be maruweliy e michan’ rok nge be’ nder fol. Ere nap’an ni ga ra fol rok Jesus, ma aram e ga be maruweliy e michan’ rom ngak. Ra m’ug ni ga be fol rok Jesus ni faan ga ra fol ko fare “motochiyel ni pi’ Kristus” ni aram e tin ni i fil nge tin ni tay chilen ni ngan rin’. (Gal. 6:2) Maku reb e, ra m’ug ni ga be fol rok Jesus ni faan ga ra fol ko fonow ni be pi’ u daken “fare tapigpig nib yul’yul’ ma ba gonop.” (Matt. 24:45) Ga ra fol rok Jesus ma aram e ra yib gelngim ni ngam athamgil u fithik’ boch e magawon nib ga’ ni ga be mada’nag nrayog ni ngan taarebrogonnag nga bangi lang nib gel e riya’ riy ma yira rus ngay.​—Luke 6:47, 48.

“NGUUM GELNIGED GIMED KO MICH ROMED NIB TH’ABI THOTHUP”

Bay bayay ni non be’ nib moon nib ga’ laman ngak Jesus ni be gaar: “Bay e michan’ rog, machane de gaman, ere mu ayuwegneg nge gel e michan’ rog!” (Mark 9:24, BT) Re moon ney e bay e michan’ rok machane manang nib t’uf ni ngki gel boch. Gad gubin nra taw nga ba ngiyal’ ma ra t’uf ni nge gel e michan’ rodad ni bod rogon e re moon ney. Gad gubin nrayog ni ngad gelnaged e michan’ rodad e chiney. Kad weliyed faram nra nge gel e michan’ rodad ma aram e ngaud filed e Thin rok Got, ma gad be fal’eg i lemnag. Re n’ey e ra k’aringdad ni nge ga’ fan Jehovah u wan’dad. Ku ra gel e michan’ rodad ni faan gad ra liyor pi walagdad ngak Jehovah u taabang, ma gad be weliy murung’agen e athap rodad ko girdi’, ma gad be meybil ni gubin ngiyal’. Maku reb e, faan gad ra gelnag e michan’ rodad, ma aram e ra yag e bin th’abi fel’ e tow’ath ngodad. Be pi’ e Thin rok Got e athamgil nga lanin’dad ni be gaar: “Gimed e pi tafager rog, e nguum gelniged gimed ko mich romed nib th’abi thothup . . . [mu] um pired ni gimed ba t’uf rok Got.”​—Jude 20, 21.