Uw Feni Gel E Michan’ Romed?

“Gimed be par nbochan e michan’ romed.”​—2 KORINTH 1:24, NW.

1, 2. Mang fan ni thingari yog ngodad e michan’, ma uw rogon ni nge gel i yan?

PI TAPIGPIG rok Jehovah e yad manang ni thingari mich Got u wan’rad. Tin riyul’ riy, e ‘dariy be’ nra fel’ u wan’ Got ni faanra de mich Got u wan’.’ (Hebrews 11:6) Ere, ffel’ ni ngad yibilayed ni nge yog ngodad fare kan ni thothup nge michan’, ni ir bang ko wom’engin nib fel’. (Luke 11:13; Galatia 5:22, 23) Maku ngan folwok rok e pi walag nrogon ni yad ma dag e michan’ rorad e ra gelnag e re felngin ney ni bay u fithik’dad.​—2 Timothy 1:5; Hebrews 13:7.

² Ra gel e michan’ rodad i yan nfaanra ngad ululgad i lek e kanawo’ ni be dag e Thin rok Got ni fan ko urngin e Kristiano. Nge mon’og e michan’ nbochan e bieg Bible ni gubin e rran ma ngan fil nib elmirin e Thin nu Bible ni yibe fanay fapi babyor ni kan pi’ u daken fare “tapigpig nib yul’yul’ mab gonop”. (Luke 12:42-44; Joshua 1:7, 8) Michan’ rok yugu boch e girdi’ e ra gelnagdad nfaanra ngad uned ko muulung ko Kristiano, nge fapi assemblies, nge convention. (Roma 1:11, 12; Hebrews 10:24, 25) Ma ra gel e michan’ rodad ko ngiyal’ ni gad be non ngak yugu boch e girdi’ u nap’an ni yibe machib.​—Psalm 145:10-13; Roma 10:11-15.

3. Murung’agen e michan’, ma mang ayuw e rayog ni nge pi’ e piin piilal ni Kristiano nib tarunguyey ngodad?

³ Piin ni piilal ni Kristiano ni ma t’ufegey ma ma ayuwegdad ni nge gel e michan’ rodad ko ngiyal’ ni yad be pi’ e fonow ni kan fek u Bible ma ngar pied e athamgil nga lanin’dad. Bay e tafinay rorad ni bod Paul ni apostal, ni yog ngak piyu Korinth ni gaar: “Gamad be un ngomed ko maruwel ni fan ni ngeb e felfelan’ ngomed riy, ya gimed be par nbochan e michan’ romed.” (2 Korinth 1:23, 24) Maku yugu reb e kan thiliyeg e re thin ney ni gaar: “Gamad be un ngomed ko maruwel ni fan ni nggu felfelan’naged gimed, ya bochan ba gel e michan’ romed.” (Contemporary English Version) Be’ nib mat’aw e ra fas nbochan e michan’ rok. Riyul’, dariy be’ nrayog ni nge dag e michan’ rok ni fan ngodad ara nge maruweliy ni ngarda pared nib yul’yul’. Murung’agen e re n’ey, e ‘ra be’ ma ba’ gilban ni be fek.’​—Galatia 3:11; 6:5.

4. Uw rogon ma chepin e Bible u murung’agen e pi tapigpig rok Got nib yul’yul’ e ra gelnag e michan’ rodad?

⁴ Bible e ke sug ko thin ni be weliy murung’agen e piin immoy e michan’ rorad. Sana gad manang e tin ka ra rin’ed nib fel’, machane uw rogon e michan’ ni ur daged ni gubin e rran, ni sana ba n’uw nap’an? Ngan fal’eg i lemnag ko uw rogon ni ur daged e re felngin ney ko ngiyal’ ni kar mada’naged e magawon ni taab rogon ko tin keb ngodad ni ra ayuweg ni nge gelnag e michan’ rodad.

Michan’ e Ra Pi’ e Athamgil nga Lanin’dad

5. Mang e mich riy u Bible ni be dag ni michan’ e ra gelnagdad muuda wereged e thin rok Got ni dabda rusgad?

⁵ Michan’ e ra gelnagdad ni ngad machibnaged e thin rok Got ni dabda rusgad. De rus Enoch ni nge weliy murung’agen e pufthin ni yib rok Got. “Mu sapgad!” ireray e thin ni yog, me ulul ngay ni gaar, “I Somol e bay yib ni ke un boor e biyu’ e engel rok nib thothup ngak, ni nge pufthinnag e girdi’ ni urngin, me gechignag urngin e girdi’ ntadenen ndariy fan Got u wun’rad, min gechignagrad nbochan urngin e ngongol ni ur ngongliyed ndariy Got u lanin’rad nge urngin e thin nib kireb ni ke yog e pi girdi’ nem nib togopuluw ngak Got.” (Jude 14, 15) Nap’an ni ke rung’ag e piin ni toogor rok Enoch ndariy fan Got u wan’rad mab mudugil ni ra adaged ni ngar lied ngem’. Yugu aram rogon, ni i non ngorad nde rus ngu fithik’ e michan, me “fek” Got u nap’an ni kan piliyed e changar rok, nib tamilang ni de pag ni nge thamiy amith ko yam’. (Genesis 5:24; Hebrews 11:5) Dabi buch rodad e re maangang nem, machane ra fulweg Jehovah taban e meybil rodad ma aram rayog ni ngad machibnaged e thin rok u fithik’ e michan’ ma dabda rusgad.​—Acts 4:24-31.

6. Uw rogon ma michan’ ni Got e ke pi’ ngak Noah nge lem ni der rus e ke ayuweg?

⁶ Bochan e michan’ rok Noah “me toy fare barkow ni ark fithingan, ni re ark nem e ir e faseg Noah nge girdi’ nu tabinaw rok.” (Hebrews 11:7; Genesis 6:13-22) Ma ku Noah e ir e tamachib ko “tin nib mat’aw” ma de rus ni nge machibnag e thin rok Got ni be ginang e girdi’ ko ngiyal’ nem. (2 Peter 2:5) Baga’ ni kar moningniged e thin ni be yog u murung’agen e n’uw nib ga’ ni bay yib, ni bod ni ku yima moningnagdad u nap’an ni ngad daged e mich riy u lan e Bible ni fare m’ag ni bay e chiney e yira gothey ndabki n’uw nap’an. (2 Peter 3:3-12) Machane, ni bod Enoch nge Noah, rayog ni ngad wereged e re machib ney nbochan e michan’ nge lem nib gel ni ke pi’ Got ngodad ni dabni rus.

Michan’ e Ra Ayuwegdad ni Ngad Guman’gad

7. Uw rogon ni dag Abraham nge yugu boch e girdi’ e michan’ nge gum’an’ rorad?

⁷ Ba t’uf rodad e michan’ nge gum’an’, ni baga’ ni gad be sonnag e tomur ko re m’ag ney nib kireb. Bagayad e piin ‘ke yog ngorad e tin ni ke micheg Got nra pi’ nbochan e michan’ nge gum’an’ rorad’ e Abraham ni patriarch ni bay madgun Got u wan’. (Hebrews 6:11, 12) Bochan e michan’ me pag fare mach nu Ur, ni rib fel’ e par rok u rom, me yan i par nga reb e binaw ni i micheg Got ni nge pi’ ngak. Isak nge Jakob e ku ra yog ngorow e re n’en ney. Machane, “yad urngin e kar m’ad u fithik’ e michan’, ni yugu aram rogon ni de lebug e tin ni kan micheg ngorad ko ngiyal’ ni ka yad ba fas.” U daken e michan’ ma kar ‘maruweliyed ni ngar pared ko gin nib fel’ boch, ni yib u tharmiy.’ Bochan e re ne’y, me ngongliy Got “reb e mach ni fan ngorad.” (Hebrews 11:8-16) Arrogon, Abraham, nge Isak, nge Jakob​—nge piin leengirad ni bay madgun Got u wan’rad—​e kar sonnaged Gil’ilungun Got u tharmiy u fithik’ e gum’an’, nu tan e yira fasegrad ko yam’ u fayleng.

8. Yugu aram rogon, ma Abraham, nge Isak, nge Jakob e kara daged e gum’an’ ko mang?

⁸ De war e michan’ rok Abraham, nge Isak, nge Jakob. De yog rorad ni ngar gagiyegnaged fare Binaw ni kan Micheg, ma dar guyed ni kan fal’eg waathan urngin e nam u daken e en ni owchen Abraham. (Genesis 15:5-7; 22:15-18) Yugu aram rogon ni fare ‘mach ni Got e nge ngongliy’ e dabi sum nge yan bokum miriay e duw, ma pi cha’ nem e kar daged e michan’ nge gum’an’ rorad u polo’ e yafas rorad. Ma aram e thingarda rin’ed e n’en ni aram rogon e chiney ni fare Gil’ilungun Kristus e be gagiyeg u tharmiy.​—Psalm 42:5, 11; 43:5.

Michan’ e Be Pi’ Ngodad e Tin Th’abi Fel’ ni Gad Ma Nameg

9. Uw rogon nib peth e michan’ ko tin ni yibe nameg?

⁹ Piin patriarch nib yul’yul’ e dar folgad u rogon e par ko piyu Canaan ni yima tamra’ ngay, ya bochan yad be nameg ban’en nib th’abi fel’. Maku michan’ e ra ayuwegdad ni ngad nameged boch ban’en nib spiritual nra ayuwegdad ni dabda manged bang ko fayleng ni faanem nib kireb e be gagiyegnag, i Satan ni fare Moonyan’.​—1 John 2:15-17; 5:19.

10. Uw rogon ni kad nanged ni Joseph e i tafinaynag ni nge nameg ban’en ni kab fel’ ndabi chuchugur ko tin baaray ni nge mang be’ nib gilbuguwan u fayleng?

¹⁰ Bochan e ayuw ni pi’ Got, ma Joseph ni fak Jakob e ke mang ga’ ko ggan nu Egypt, machane de nameg ni nge tolang e liw rok ko re fayleng ney. Ke pagan’ ni nge yib i m’ug nib riyul’ e tin ni ke micheg Jehovah, me Joseph ni ke 110 e duw rok e i yog ngak pi walagen ni gaar: “Ke chugur ni bay gum’, machane Got e rib mudugil ni bay i ayuwegmed, me fekmed nga wuru e re nam ney me pow’iymed ko fare nam ni faani micheg ngak Abraham nge ngak Isak nge Jakob ni bayi pi’ ngorad.” I wenig Joseph ni ngan k’eyag ko fare binaw ni kan micheg. Nap’an ni yim’, ma kan ta’ e falay ngak ni dabi kireb nga lan e kahol rok u Egypt. Machane nap’an ni kan pag piyu Israel kar chuwgad u Egypt, me Moses ni profet e i fek e yil rok Joseph ni fan ni ngan k’eyag ko fare Binaw ni kan Micheg. (Genesis 50:22-26; Exodus 13:19) Michan’ ni bod rogon e n’en ni dag Joseph e susun ni nge k’aringdad ni ngad nameged e tin ni kab fel’ ko tin baaray ni ngan mang be’ nib gilbuguwan u fayleng.​—1 Korinth 7:29-31.

11. Uw rogon ni dag Moses ni ir be’ ni be nameg e tirok Got ban’en?

¹¹ Moses e ‘ka ba adag ni nge un ngak girdien Got ko gafgow ko bin ni nge felfelan’ nib ngoch nap’an ni be ngongliy e denen’ ni ir bang ko tabinaw ko pilung nu Egypt ni rib tolang e skul rorad. (Hebrews 11:23-26; Acts 7:20-22) Ke pag ni nge dabi mang be’ nib gilbuguwan u fayleng nge sana reb e gum’eyag ni rib fel’ ni ngan fanay e kahol ni kan nunuwnag nib fel’ rogon u bang u Egypt ni ri yima nang. Machane bin ngan e kab tolang puluwon ni ra ngan taarebnag ko tin baaray ni ngan mang “girdi’ rok Got,” min mang en ni ir e nge weliy fare m’ag ko Motochiyel ngak e girdi’, nge reb e profet rok Jehovah, nge tayoloy e thin nu Bible? (Ezra 3:2) Ga be nameg ni nge yog ngom e maruwel u fayleng ni yima tayfan, ara bochan e michan’ rom ma aram e ga be nameg ni ngam mon’og ko tirok Got ban’en?

Michan’ e Ra Yibnag e Yafas ni Ri Bay Fan

12. Mang e ke rin’ e michan’ rok Rahab ko yafas rok?

¹² Michan’ e ma pi’ ngak e girdi’ ni gathi kemus ni tin th’abi tolang ni ngan nameg ya ku ma pi’ e yafas ni ri bay fan. Rahab ni be’ nu Jericho e baga’ ni ke thamiy ni yafas rok e ir be’ ni ma pi’ ir ni chuway e dariyfan. Arrogon, kari thiliyeg e re par rok nem u nap’an ni ke maruweliy e michan’ rok! I “mat’aw ngak Got ni bochan e ngongol rok ni faani fek fapi cha’ nu Israel nga naun rok, ni fapi cha’ nra bad ni mol’og me ayuwegrad ngar chuwgad ngar sulod u yugub pa’ e kanawo’,” ere kar pilo’gad ko toogor rorad ni piyu Canaan. (James 2:24-26) Ke nang Rahab murung’agen Jehovah ni ir e bin riyul’ e Got, ma ku ke dag e michan’ rok ma aram ke pag e ngongol rok ni ma chuway ngak. (Joshua 2:9-11; Hebrews 11:30, 31) I mel’eg be’ ni tapigpig rok Jehovah ngar mabgolgow, gathi be’ nu Canaan nde michan’. (Deuteronomy 7:3, 4; 1 Korinth 7:39) Ke taw’ath Rahab ma ke mang ga’ rok Kristus. (1 Chronicles 2:3-15; Ruth 4:20-22; Matthew 1:5, 6) Taareb rogon ngak yugu boch e girdi’, ni boch i yad e kar paged e ngongol ko darngal, rayog ni nge yog ngak yugu reb e taw’ath​—ni aram e fas ko yam’ u paradis u fayleng.

13. Uw rogon ni ke rin’ David e denen ngak Bath-sheba, ma mang ngongol e ke dag?

¹³ Tomren ni ke pag Rahab e yafas rok ni tadenen, me fol ko kanawo’ nib mat’aw. Machane, boch e girdi’ ni ka ra ognaged yad ngak Got nib n’uw nap’an e ka ra denengad nib ubchiya. David ni Pilung e ke darngalnag Bath-sheba, me gagiyegnag ni ngem’ figirngin ko mahl, me leengiy e cha’ nem. (2 Samuel 11:1-27) Kari kalngan’ nib gel ni kari kireban’, me wenignag David ngak Jehovah ni gaar: “Dabmu chuweg rog fare Kan ni Thothup rom.” De pag David ni nge chuw rok fare kan ni thothup rok Got. I pagan’ ngak Jehovah, nbochan e runguy rok, ni dabi n’ag “ba gum’ircha’ ni kari kireban’ nbochan e denen. (Psalm 51:11, 17; 103:10-14, NW) Bochan e michan’ rorow, ma David nge Bath-sheba e kan taw’athnagrow ma kar mangew bang ko piin ga’ rok fare Messiah.​—1 Chronicles 3:5; Matthew 1:6, 16; Luke 3:23, 31.

Michan’ e Kan Gelnag ko Tin Kan Micheg

14. Mang e mich riy ni ke yog ngak Gideon, ma mang e ra rin’ e re chep ney ko michan’ rodad?

¹⁴ Yugu aram rogon ni gad be yan u fithik’ e michan’, yu ngiyal’ mab t’uf rodad e thin rok Got ni be micheg nra ayuwegdad. Riyul’ ni aram e n’en ni buch rok Gideon ni Tapuf Oloboch, ni bagayad e piin ni “michan’ rorad ngak Got e ir e ra mahlgad riy ngak e pi nam ngar gelgad.” (Hebrews 11:32, 33) Nap’an piyu Midian nge yugu boch e girdi’ ni kar uned ngorad e ka ranod ra chamgad piyu Israel, ma kan upunguy Gideon nga gelngin Got. Bochan ni baadag ni nge guy e mich riy ni Jehovah e bay u ba’ rok, me rin’ boch ban’en ni fan ni nge nang ko riyul’ ni aram rogon ma aram e fanay bunuen e saf min tay nga daken e but’ ko gin ni yima gunugunuy e wheat riy ni reb e nep’ ni polo’. Yay ni somm’on ni rin’ ni aram rogon, e kemus ni waangachol e bay u daken e pi bunuen e saf nem, ma but’ u tooben e be par ni ba melik. Bin l’agruw yay ni rin’ e re n’em nib thil. Bochan n’en ni buch e ke gelnag Gideon, me yan u fithik’ e michan’ nge gel ko fapi toogor rok piyu Israel. (Judges 6:33-40; 7:19-25) Faanra gad baadag ni ngan micheg ban’en ngodad u nap’an ni susun ni ngad dugliyed ban’en, ma da gathi be yip’ fan ni ke war e michan’ rodad. Tin riyul’ riy e gad be dag e michan’ rodad nfaan gad ra bieg e Bible nge boch e babyor ni fan ko Kristiano ma ngad meybilgad ni nge pow’iydad fare kan ni thothup u nap’an ni ngad dugliyed ban’en.​—Roma 8:26, 27.

15. Ra ngad fal’eged i lemnag e michan’ ni dag Barak, ma uw rogon ni nge ayuwegdad?

¹⁵ Michan’ rok Barak ni Tapuf Oloboch e kan gelnag u daken e ngan pi’ e athamgil nga lanin’uy. Deborah ni reb e profet ni ppin e kan pi’ athamgil nga laniyan’ ni nge k’aring yugu boch e girdi’ nga ranod ngar ayuweged piyu Israel ni Jabin ni Pilung nu Canaan e be magawonnagrad. U fithik’ e michan’ mini micheg ngak nra ayuweg Got, i pow’iy Barak 10,000 e pumoon nga ranod ko mahl ni de gaman e talin e cham rorad mi yad gel ko pi salthaw rok Jabin ni Sisera e ani ga’ rorad ma kab gel gelngirad ngorad. Karin dag e re gel nem ni kar ted u daken e tang rok Deborah nge Barak. (Judges 4:1–5:31) Ke pi’ Deborah e athamgil nga laniyan’ Barak ni nge rin’ ban’en ya ir e ke dugliy Got ni nge mang en ni ga’ rok piyu Israel, me ir bagayad e pi tapigpig rok Jehovah mu daken e michan’ mi yad “li’ e salthaw rok e pi nam.” (Hebrews 11:34) Ra ngan fal’eg i lemang rogon ni ke fal’eg Got waathan Barak ya ke dag e michan’ rok ma ra k’aringdad nfaanra be maruwaran’dad ni ngad lebguyed e maruwel rodad nib mo’maw’ ni gad be pigpig ku Jehovah.

Michan’ e Ra Mon’ognag e Gapas

16. Mang e i rin’ Abraham ni be dag rogon ni be maruweliy ni nge aw e gapas u thilrow Lot?

¹⁶ Ni bod ni michan’ e ra ayuwegdad ni ngad lebguyed e maruwel nib mo’maw’ ni fan ku Got, me mon’ognag e gapas. Abraham ni ke pillibthir e ke pag Lot ni fak walagen ni nge mel’eg e gin ni th’abi fel’ e binaw ma boor e pan riy ni fan ko gamanman ya nap’an ni piin ma gafaliy e gamanman e kar chamgad mab t’uf ni ngar dargad. (Genesis 13:7-12) Baga’ ni ke meybil Abraham u fithik’ e michan’ ni fan ni ngan pithig e re magawon ney. De tay nib m’on u wan e tin ni nge fel’rogon riy, ma aram ke pithig e re magawon nem u fithik’ e gapas. Faanra bay reb e walagdad ni Kristiano ni kad maluagthingad, ma ngad meybilgad u fithik’ e michan’ ma “ngad gayed e gapas”, ni gad be lemnag e tin ni rin’ Abraham u fithik’ e t’ufeg.​—1 Peter 3:10-12.

17. Mang fan ni rayog ni nga dogned ni fare magawon ni sum nib muun Paul ngay, nge Barnabas, nge Mark e kan pithig u fithik’ e gapas?

¹⁷ Mu lemnag rogon ni nge ayuwegdad ni ngad mon’ogniged e gapas nfaanra ngad folgad ko kenggin e motochiyel ko Kristiano u fithik’ e michan’. Nap’an ni ke chugur ni nge tabab Paul ko fa bin l’agruw e milekag ni fan ko maruwel rok ni ir reb e missionary, i fol Barnabas ko thin ni un nog ni nga ranod biyay ngar guyed e pi ulung u Cyprus ngu Asia Minor. Machane, baadag Barnabas ni nge fek Mark ni fak walagen e chitamangin ara chitingin. Dabun Paul ya bochan ke digeyrow Mark u Pamphylia. Mi “yow luagthin nib elmirin”, ma kar dargow nbochan e re n’em. Me fek Barnabas Mark nga ranow nga Cyprus, me dugliy Paul Silas ni nge un ngak mi “yow yan u lan yu Syria ngu Cilicia, ni be pi’ e athamgil nga laniyan’ girdien e pi ulung ni ba’ riy.” (Acts 15:36-41) Mab tamilang ni boch nga ram ma kan pithig e re magawon rorow nem, ya Mark nge Paul e ur moyew u Roma, me yog Paul ni apostal e thin nib fel’ u murung’agen. (Kolose 4:10; Philemon 23, 24) Nap’an ni kan kalbusnag Paul u Roma ni sogonapan 65 C.E., ma yog ngak Timothy ni gaar: “Mu non ngak Mark nge un ngom ngam bow, ya rayog rok ni nge ayuwegeg ko maruwel.” (2 Timothy 4:11) Ba tamilang nu fithik’ e michan’ me meybilnag Paul murung’agen e tha’ u thilrow Barnabas nge Mark, ma aram me aw e gapas u thilrad nib peth ko “gapas rok Got.”​—Filippi 4:6, 7.

18. Baga’ ni mang e ke buch ko magawon rok Euodia nge Sintike?

¹⁸ Riyul’,ni bochan ndaworda flontgad, ma aram “ba ga’ ni gad ma oloboch.” (James 3:2) I sum e magawon u thilin l’agruw i ppin ni Kristiano, me yoloy Paul murung’agrow ni gaar: “Baygu fonownag Euodia nge Sintike ni nge taareban’row ngak Somol. . . . Nguum ayuweg e gali ppin nem ya kug wereged fare thin nib fel’ nra bagamad ma be ayuweg bagamad.” (Filippi 4:1-3, NW) Baga’ ni gali ppin nem ni bay madgun Got u wan’row e ka ra pithigew e magawon rorow u fithik’ e gapas ni ur folgow ko fonow ni bay ko Matthew 5:23, 24. Ngan fol ko kenggin e motochiyel u Bible u fithik’ e michan’ e ngarin mon’ognag e gapas ko ngiyal’ ney.

Michan’ e Ra Ayuwegdad ni Ngad Kadedan’gad

19. Mang e skeng ni de kirebnag e michan’ rok Isak nge Rebekah?

¹⁹ Bochan e michan’ ma ku rayog ni ngad kadedan’dad ko ngiyal’ ni keb e gafgow ngodad. Sana ke kireban’dad ya bochan be’ ni bang ko tabinaw rodad ni kan taufenag e ke th’ab e motochiyel rok Got ya ke leengiy e en de michan’. (1 Korinth 7:39) Isak nge Rebekah e kar gafgowgow ya bochan Esau ni fakrow e ke leengiy boch e ppin ni de mich Got u wan’rad. Fapiin leengin ni Hittite e “kari amithnag lanin’row”​—ma arfan ni yog Rebekah ni gaar: “Kari gu fanenikay e re yafas rog ney ya bochan fapi ppin rok Esau ni bogi ppin u boch e nam. Faan ku ra leay Jakob reb e ppin ni girdien e re nam ney ni ka nog e Hittite ngorad, ma gathi kab fel’ ni nggum’?” (Genesis 26:34, 35; 27:46, NW) Yugu aram rogon, ere skeng ney ma de kirebnag e michan’ rok Isak nge Rebekah. Yibe athapeg ni rayog ni nge par nib gel e michan’ rodad u nap’an ra yib e magawon ngodad ni rib mo’maw’ ni ngan pithig.

20. Uw rogon ni dag Naomi nge Ruth e michan’ rorow nib fel’ ni ngad folgad riy?

²⁰ Naomi ni be’ ni ke pillibthir nu Juda ni kem’ figirngin e manang ni boch e ppin nu Judah e rayog ni ngar gargelnaged e bitir ni pumoon ni rayog ni nge mang ga’ rok fare Messiah. Machane bochan gali fak ni pumoon e kar mow’ ni dariy e bitir rorow ma dabkiyog ni nge diyen ya ke pillibthir ma arfan ni kaygi war e athap rok ni ngeb fare Messiah u tabinaw rok. Yugu aram rogon, me Ruth ni leengin fak kafram e ke mang leengin Boaz, me yog reb e bitir ngorow, me mang ga’ rok Jesus, ni fare Messiah! (Genesis 49:10, 33; Ruth 1:3-5; 4:13-22; Matthew 1:1, 5) Michan’ rok Naomi nge Ruth e ke gel ko magawon me yibnag e felfelan’ ngorow. Felfelan’ nib gel e ku rayog ni ngeb ngodad nfaanra ngad ayuweged e michan’ ni nge par nib mudugil u nap’an ni keb e gafgow ngodad.

21. Mang e ra rin’ e michan’ ni fan ngodad, ma mang e ke mudugil u lanin’dad ni ngad rin’ed?

²¹ Yugu aram rogon ni dada nanged ko mang e ra buch rodad gabul ni be’ nge be’, ma bochan e michan’ ma rayog ni ngad mada’naged boch e skeng. Michan’ e ra ayuwegdad ni nguud pared ni dabda rusgad ma nguuda gum’an’gad. Ma ra pi’ ngodad e tin th’abi fel’ ni ngad nameged nge yafas ni bay e felfelan’ riy. Michan’ e ra rin’ ban’en ni fan ni nge fel’ thildad yugu boch e girdi’ ma rayog ni ngad kadedan’dad ko magawon. Ere yibe athapeg ni ngad “manged girdi’ ni bay e michan’ rok nrayog ni nge ayuweg nge par nib fas.” (Hebrews 10:39) Bochan gelngin e Got rodad nib tarunguyey, ni Jehovah, ma yira pining e sorok ngak riy, ere nguuda ululgad ni ngad maruweliyed e michan’ nib gel.

Uw Rogon ni Ngam Pi’ e Fulweg?

• Mang e mich riy u Bible ni michan’ e rayog ni nge ayuwegdad ni ngad rin’ed ban’en ni dabda rusgad?

• Mang fan ni nga dogned ni michan’ e ra pi’ ngodad e yafas ni bay e felfelan’ riy?

• Uw rogon ma michan’ e ra mon’ognag e gapas?

• Mang e mich riy ni be dag ni michan’ e ra ayuwegdad ni ngad kadedan’dad u nap’an ni keb e gafgow ngodad?

[Pictures on page 14]

Michan’ e ke ayuweg Noah nge Enoch ni dabra rusgow ni ngar machibnagew e thin rok Jehovah

[Pictures on page 15]

Michan’ ni bod rogon e n’en ni dag Moses e ra k’aringdad ni ngad nameged boch ban’en nib spiritual

[Pictures on page 16]

Bochan kan dag ni bayi pi’ Got e ayuw e ke gelnag e michan’ rok Barak, nge Deborah, nge Gideon