“Ke Taareban’um Ngog?”

“Darow mu guy ni dabgu pag ni ngan tagening ngak Jehovah.”​—2KINGS 10:16.

1, 2. (a) Uw rogon me kireb iyan e liyor ni be tay piyu Israel? (b) Nap’an e 905 B.C.E., ma mang boch ban’en nib baga’ fan ni be n’en ni nge buch u Israel?

DUW ni 905 B.C.E. e aram ba ngiyal’ ni baga’ fan ko piyu Israel ya boor ban’en ni kan thiliyeg. Ke chugur ko 100 e duw u m’on riy ma ke n’igin Jehovah ni nge ruw raba’ fare nam nu Israel ni bochan ni ke mang Solomon reb e apostate. (1 Kings 11:9-13) Ma aram me gagiyegnag Rehobam ni fak Solomon Judah ni aram fare nam u ba’ ni yimuch ma Jeroboam ni Pilung ni ir be’ ni Efraimite e ke gagiyegnag fare nam nu Israel u ba’ ni north. Ma de fel’ rogon tabolngin fa bin le’luch e nam. Ya ke dabuy Jeroboam ni nge yan e girdi’ ko re nam nem nga yimuch ko fa binem e nam ni ngar liyorgad u tempel, ya ke rus ni yad ra lemnag ni ngar sulod ko tabinaw rok David. Ere ke n’igin ni ngan liyor ko liyos ni yaan e garbaw u Israel ma aram e yalen ko piyu Israel ko nam ni le’luch n’umngin nap’an e chep rorad.​—1 Kings 12:26-33.

² Ma ke gel e kireb riy u nap’an ni mang Ahab ni fak Omri pilung. Ke leengiy Jezebel ni be’ nu bang, me mon’ognag e liyor ku Baal me li’ e pi profet rok Jehovah kar m’ad. Yugu aram rogon ni ke ginang Elijah ni profet Ahab, ma de rin’ ban’en ni nge taleg e ppin rok. Ma nap’an e 905 B.C.E., me yim’ Ahab ma Jehoram, ni fak, e ke mang pilung. Ere ke taw ko ngiyal’ ni ngan biechnag fare nam. Yib Elijah u tomren Elisha me yog ko Jehu ni ir e ga’ ko salthaw ni ke dugliy Jehovah ni nge mang pilung nu Israel. Ma mang e kan dugliy ni nge rin’? Nge li’ urngin e girdi’ rok Ahab me fulweg taban rachaen e pi profet ni li’ Jezebel kar m’ad!​—2 Kings 9:1-10.

3, 4. Uw rogon ni dag Jehonadab ni ‘ke taareban’ ngak Jehu’?

³ I fol Jehhu ku Got me guy rogon ni ngan li’ Jezebel ngem’ ni ir be’ nib kireb, nge mu’ me yan ni nge biechnag fare nam nu Israel me li’ e girdi’ ko tabinaw rok Ahab. (2 Kings 9:15-10:14, 17) Ma aram me mada’nag be’ ni be tay tanggin. “Ke mada’nag Jehonadab ni fak Rekab ni be bibiy iyib. Faani pining e sorok ngak, me gaar ngak: ‘Ke taareban’um ngog ni bod rogon e lem rog ngom?’ Ma aram me yog Jehonadab ni gaar: ‘Ri arrogon.’ ‘Ere faanra er rogon, ma ga pi’ paam ngog.’ Me ere pi’ pa’ ngak. Me girngiy nga lan fare karro ni ma girngiy e os ngar ranow. Ma aram me gaar: ‘Darow mu guy ni dab gu pag ni ngan tagenging ngak Jehovah.’ Me un e cha’ nem ngak yad be yan ko karro rok ni ma girngiy e os.”​—2 Kings 10:15, 16.

⁴ Jehonadab (ara, Jonadab) e gathi ir be’ nu Israel. Machane fan e ngochol rok (“Ba adag Jehovah,” ara “Ba Sorok Jehovah,” ara “Ba Gol Jehovah”) e be tamilangnag ni ir be’ ni ma liyor ku Jehovah. (Jeremiah 35:6) Ma dabi siy ni ba adag ni nge guy ni dabni “pag ni nga un tagenging ngak Jehovah.” Uw rogon ni gad manang? Ya gathi yugu ra mada’gow. Ya Jehonadab e “be bibiy i yib,” ma aram e ngiyal’ ni kayigi mu’ Jehu i li’ Jezebel nge yugu boch e girdi’ ko tabinaw rok Ahab. Ere i nang Jehonadab e n’en ni be buch u nap’an ni ke un ko karro rok ni be girngiy e os. Dariy e maruwar riy ni ke m’agan’ ngay ni nge un ko ba’ rok Jehu​—nge Jehovah​—ko fare magawon u thilin e bin googsur nge bin riyul’ e liyor.

Piin ni Bod Jehu ko Ngiyal’ Ney nge Piin ni Bod Jehonadab

5. (a) Mang boch ban’en nra buch ndabki n’uw nap’an nga m’on ni fan ko urngin e girdi’? (b) Mini’ e Bin ni Baga’ e Jehu, ma mini’ e yad owchen u fayleng?

⁵ Ngiyal’ ney ma ma thil boch ban’en nib tomgin ni bod rogon ni buch ko piyu Israel u nap’an e 905 B.C.E. Ke chugur ko ngiyal’ ni ra biechnag Jehovah e fayleng ko urngin ban’en ni wenegan e pi n’en ni n’igin Satan, nib muun ngay e pi yuraba’ i teliw ni googsur. Mini’ e be yip’ fan Jehu ko ngiyal’ ney? Aram Jesus Kristus ma pi thin ko profet ney ni baara’ e bpuluw ngak: “Mm’ag e sayden rom nga daken em, ni gur be’ nib gel, mab sorom ma gab rir. Ma ga yan u fithik’ e rir me yib angin ngom; mman ni fan ko tin riyul’ ban’en nge sobutan’, ma ga rin’ e tin mat’aw ban’en.” (Psalm 45:3, 4) “Fare Israel rok Got” aram owchen Jesus u fayleng ni yad e pi Kristiano ni kan dugliyrad ko kan ni thothup mi yad “ba yul’yul’ ko fare thin nib riyul’ ni yib i yog Jesus ngan nang.” (Galatia 6:16; Revelation 12:17) Ka nap’an e 1922 ma pi walagen Jesus ney ni kan dugliyrad e dar rusgad ni ngar ginanged e girdi’ ko fare pufthin rok Jehovah ni bay yib.​—Isaiah 61:1, 2; Revelation 8:7-9:21; 16:2-21.

6. Pi mini’ e kar bad u pi nam ni ngar ted tanggin e pi Kristiano ni kan dugliyrad, ma uw rogon ni kar ranod nga lan fare karro ni ma girngiy e os ko fa Bin ni Baga’ e Jehu??

⁶ Pi Kristiano ni kan dugliyrad e gathi yigoo yad. Bod rogon Jehonadab ni ke yib ni nge mada’nag Jehu, ma boor e girdi’ ko pi nam e kar bad ni ngar ted tanggin Jesus, ni ir fa Bin Baga’ e Jehu, nge piin ni owchen u fayleng ni yad ba mudugil ko bin riyul’ e liyor. (Zekariah 8:23) Ke piningrad Jesus ni yad “yugu boch e saf” rok ma nap’an e 1932 ma kan tamilangnag ni yad bpuluw ko Jehonadab ko ngiyal’ ney min piningrad ngar uned ko ‘fare karro ni ma girngiy e os’ rok Jehu ko ngiyal’ ney. (John 10:16) Uw rogon? Yad ma ‘fol ko pi motochiyel rok Got’ ma yad ma un ko pi girdi’ ni kan dugliyrad ni ngar “yul’yul’gad ko fare thin nib riyul’ ni yib i yog Jesus ngan nang.” Ngiyal’ ney ma re n’em e ba muun ngay ni ngan wereg fare thin nib fel’ ko Gil’ilungun Got ni ke tabab ko gagiyeg ma Jesus e ir e Pilung riy. (Mark 13:10) Nap’an e 1935 ma kan tamilangnag ni pi girdi’ ney ni yad bod “Jonadab” e aram fare “ulung ni baga’” ni bay ko Revelation 7:9-17.

7. Uw rogon ni dag e pi Kristiano ko ngiyal’ ney ni ke ‘taareban’rad ’ ngak Jesus?

⁷ Ka nap’an e 1930 iyib ma girdien fare ulung ni baga’ nge pi walagrad ni yad girdien fachi ulung e kar micheged ni yad ba yul’yul’ ko bin riyul’ e liyor. U boch e binaw u Europe ko Ngek nge Ngal, nge fapi binaw ni Far East, nge Africa, ma boor iyad e kar m’ad ni bochan e michan’ rorad. (Luke 9:23, 24) U yugu boch e binaw ma kan nin’rad nga kalbus, kan muulung u taabang nib togopuluw ngorad, ma kan gafgownagrad. (2 Timothy 3:12) Rib fel’ rogon ni kar micheged ni yad ba yul’yul’! Ma fare report ko 1997 Service Year e be dag ni kab mudugil lanin’rad ni ngar pigpiggad ku Got, ndemtrug ko mang e ra buch ngorad. Ke ‘taareban’rad’ ngak Jesus. Re n’ey e ke m’ug u nap’an e 1997, ya 5,599,931 e piin ni publisher ko Gil’ilungun Got ni baga’ ni yad e piin ni bod “Jonadab,” e ke gaman 1,179,735,841 e awa ni ur ted ni ngar wereged e thin u morngaagen Jesus.

Ka Yad be Machib u Fithik’ e Passig

8. Uw rogon ni ma dag e Pi Mich Rok Jehovah ni yad ba passig ko bin riyul’ e liyor?

⁸ Goo kan nang ni ma yan Jehu nib pay ko karro rok ni ma girngiy e os​—ni aram e mich riy ni ke passig i rin’ e maruwel rok. (2 Kings 9:20) Kan weliy u morngaagen Jesus, ni ir ba Bin Baga’ e Jehu, ni rogon fene passigan’ e ‘be gak’ u lan ngorongoren ni bod ba nifiy.’ (Psalm 69:9) Ere dabni gin ngay ni tin riyul’ e Kristiano ko ngiyal’ ney e gowa yad be yan u lan e karro ni be girngiy e os ma yad ba lingaggil ni bochan ni yad ba passig. U lan e ulung ngu fithik’ e yoor ma yad ma “machibnag e thin rok Got ko girdi’ . . . u fithik’ e passig ndemtrug ko kari mab e kanawo’ ngorad fa dawor.” (2 Timothy 4:2) Kari m’ug ni yad ba passig u tabolngin e duw ni 1997 u tomren ni kan yoloy e thin u lan fare babyor ni Machib Rodad ni fan ko Gil’ilungun Got ni be pining urngin e girdi’ ni ngar uned ko pioneer ni ayuw. Ra reb e binaw ma kan nameg ko in e girdi’ ni ra un ko pioneer ni ayuw. Ma mang wenegan riy? Rib fel’! Ya boor e branch ma ke pag oren e girdi’ ni kar nameged ni ngar uned ngay. Kan nameg u Ecuador ni 4,000 e girdi’ e ra un machane ke un 6,936 ko pioneer ni ayuw. U Meriken ma kan nameg 100,000, e girdi’ ma 116,335 e kar uned ko re maruwel ney ko pul ni March. U Sapan ma 104,215 e kar uned ngay u lan dalip e pul. U Zambia, ma kan nameg ni 6,000 e ra un ma 6,414 e girdi’ e kar uned ko pioneer ni ayuw ko pul ni March; ma 6,532 ko April; ma 7,695 u nap’an e May.​—Roma 10:10.

9. Ku mang boch e kanawo’ ni ma gayiy e Pi Mich Rok Jehovah e girdi’ riy ni ngar wereged fare thin nib fel’ ngorad ma gathi ke mus ni go’ machib u mit e tabinaw iyan?

⁹ Yog apostal Paul ngak e pi piilal u Efesus ni gaar: “Gimed manang ndariy ban’en ni gu tel romed ni gomanga ban’en nra ayuwegmed nnap’an ni gu be machibnagmed ma gu be sukulnagmed u fithik’ e girdi’ ni yoor ngu lan e tabinaw romed i yan.” (Acts 20:20) Pi Mich Rok Jehovah ko ngiyal’ ney e yad ma folwok rok Paul mi yad passig i machibnag fare thin nib fel’ u mit e tabinaw iyan. Machane, sana baga’ ni dariy e girdi’ u tabinaw. Ere “fare tapigpig nib yul’yul’ mab gonop” e be pining e pi publisher ko Gil’ilungun Got ni ngar machibnaged e girdi’ u tabon e maruwel rorad, ngu kanawo’, ngu dap’e lay, ngu park ni fene yoor​—nge urngin yang ni bay e girdi’ riy. (Matthew 24:45-47) Ma wenegan ni yib riy e rib fel’.

10, 11. Uw rogon ni dag e piin publisher u lan l’agruw e nam ni yad be guy rogon ni ngar pirieged e piin ni ba adag e machib ma mo’maw ni ngan piriegrad?

¹⁰ U Copenhagen, Denmark, ma bay boch e publisher ni be machibnag e girdi’ ko gin ni railway station. Nap’an e January nge mada’ ko June, ma 4,733 e babyor ni kar wereged, ma boor e girdi’ ni ur machibnaged u fithik’ e sabethin, ma boor e return visit rorad. Boch e publisher ko re binaw nem e bay e magazine route ara call ko boch e kantin ara pi tafen e shiyobay. Bay reb e mach ni ba achig ni gubin e Biernes ma bay e market rorad, ma bokum biyu’ e girdi’ ni ma un ngay. Ere ke yarmiy e ulung ni ran machib u rom u gubin ngiyal’. Mu yugu bang ma yibe yan ko urngin e skul ma yibe pi’ boch e babyor nib puluw ko piin ni yad e sensey.

¹¹ U Hawaii ma yibe athamgil ni ngan non ngak urngin e girdi’ ni dabiyog ni ngan pategrad u tabinaw rorad. Bay e territory ni kan nog e special territory nib muun ngay e yu gin ni fene yoor (pi kanawo’, nge park, nge gin ni yima tay e karro riy, nge bus stop), nge yu gin ni downtown, nge gin ni boor e kantin riy nge skojo, ma yima machib ko telefon, ngu lan e pi karro ni fene yoor (machib u bus), ngu college ara skul. Yibe ayuw riy ni dabi yoor e Pi Mich ni ra machib u taareb e territory ma piin ni ra un ngay e kan fil rogon ngorad ko re smit e machib ney. Boor e binaw ni yad be reportnag ni yad be rin’ e pi n’en ney ni kan yarmiy nib fel’ rogon. Ma wenegan riy e yibe thaw ngak e girdi’ ni ba adag e machib ni faram ni de yog ni ngan piriegrad ko machib u mit e tabinaw iyan.

Yibe Par nib Mudugil

12, 13. (a) Mang e rin’ Satan nib togopuluw ko Pi Mich Rok Jehovah u nap’an e 1997? (b) Uw rogon ma de yib angin nib kireb ko thin nib googsur ni kan wereg iyan u lan reb e binaw?

¹² U boch e binaw u nap’an e 1997, ma kan gafgownag e Pi Mich Rok Jehovah nib elmirin, ma kan wereg e thin nib kireb u morngaagrad min guy rogon ni ngan courtnagrad. Machane dar yoyowolgad! (Psalm 112:7, 8) Ya kar ted nga lanin’rad e n’en ni yibilay e en ni yoloy e Psalm ni gaar: “Piin nib tolangan’rad e kar gathibthibnaged gag. Machane gu ra fol ko urngin e motochiyel rom u polo’ i gumerchaeg.” (Psalm 119:69) Machane pi thin ni googsur e aram e mich riy ni yibe fanenikay e tin riyul’ e Kristiano u rogon ni yiiynag Jesus. (Matthew 24:9) Ma bay yu ngiyal’ ma ke yib angin riy. Immoy reb e pumoon u Belgium ni ke poy e thin nib kireb ni kan nog u morngaagen e Pi Mich Rok Jehovah u lan reb e simbung nib gilbuguwan. Ke gin ngay ko pi n’en nib kireb ni kan nog u morngaagrad ma aram me un ko reb e muulung ko Kingdom Hall ko Sunday. Ma ke fil e Bible u taabang ko Pi Mich ma ke mon’og iyan nib pay. Kafram ma re moon ney e reb e girdi’ ko gang ara ba ulung i girdi’ ni ma rin’ boch ban’en nib kireb. En ni ke fil e Bible ngak e ke ayuweg ni nge biechnag e yafas rok nge puluw ko Bible ma ke guy e girdi’ e re n’em. Dabi siy ni fa en ni ke yoloy e pi thin nem ko simbung e de lemnag ni ra yib angin riy!

¹³ Boch e girdi’ u Belgium ni yad ba yul’yul’ e kar togopuluwgad ko pi thin ngoogsur ni yibe wereg. Reb e girdi’ ni aram rogon e be’ ni faram ma ir e prime minister ara ga’ ko am ni ke pining e sorok ko Pi Mich Rok Jehovah ko pi n’en ni yad ma rin’. Ma be’ ni ir e deputy e ke yoloy ni gaar: “Ba math keru’ e [Pi Mich Rok Jehovah] ko pi n’en nib kireb ni yibe yog u morngaagrad ya rogon u wan’ug ma gathi bay e riya’ riy ni yad ra togopuluw ko am. Ya yad e piin ni ba adag e gapas, ma yad ba yul’yul’, ma yad ma tay fan e piin ni baga’ lungurad.” Ba gonop e pi thin ni yog apostal Peter ni gaar: “Ma susun e ngar um pired u fithik’ e piin ndar nanged Got nib fel’ pangimed, ya nga rogned nib kireb e ngongol romed, me Chirofen ni sul Kristus riy mi yad nang nib fel’ e ngongol romed, ma aram mi yad yog e sorok ngak Got.”​—1 Peter 2:12.

Rib Fel’ fare Puguran ni Kan Madenomnag

14. Mang boch e report nib fel’ u morngaagen oren e girdi’ ni kar uned ko fare Puguran ko duw ni 1997?

¹⁴ Bpuluw ni nge lemnag e girdi’ ni ma pi’ e mich u morngaagen Jesus ni fare Puguran ko yam’ ni tay e aram e n’en nth’abi ga’ fan u lan e duw. Nap’an e 1997, ma 14,322,226 e girdi’ e kar uned ko re madenom nem ko March 23. (Luke 22:14-20) U boor e binaw ma kab boor e girdi’ ni kar uned ko fare Puguran ko urngin e girdi’ ni publisher ko Gil’ilungun Got ko re binaw nem, ni aram e be dag ni rayog ni nge yoor iyan nga m’on. U Haiti, ma nap’an e 1997 ma tin th’abi yoor e publisher e 10,621 ma 67,259 e kar uned ko fare Puguran. Ma tin th’abi yoor e publisher u Zambia e 96,686 ma kar falfalan’gad ya ke un 428,697 e girdi’ ko fare Puguran. Rayog ni ngam guy fare report ni bay ko page 18 nge mada’ ko 21 mag guy yugu boch e nam ni kab boor e girdi’ ni kar uned ko fare Puguran ko piin ni yad e publisher.

15. U boch e binaw, am uw rogon ni ke gel boch e pi walagdad ko boch e magawon ni ngar madenomnaged fare Puguran?

¹⁵ Boch e girdi’ e de mom ni ngar uned ko fare Puguran. U Albania ma immoy e motochiyel ni dabi yan be’ nga wen ko ngiyal’ ni ke pag e 7:00 p.m. ni bochan ni be togopuluw e girdi’ ko am. Kan tababnag fare Puguran ko  5:45  ni balayal’ u lan 115 e yu ulung ni ba achig ko re binaw nem. Ke aw e yal’ ko  6:08 ni balayal’ ma aram tabolngin e Nisan 14. Ke abab u pa’ e girdi’ fare wain nge flowa ko ngiyal’ ni 6:15 ni balayal’. Ma baga’ ni kan pi’ e bin tomur e meybil u m’on ko 6:30 ni balayal’, ma piin ni kar uned ngay e kar gurgad ni ngar sulod nga tabinaw rorad u m’on ko ngiyal’ ni kan tay chilen ndabkun yan nga wen. Ma ke un 3,154 e girdi’ ko fare Puguran ma tin th’abi yoor e publisher e 1,090. U reb e nam u Africa ma be wagey e girdi’ riy ere dabiyog ni ngan yan ko Kingdom Hall ma aram me turguy l’agruw e piilal ni ngar ranow nga tabinaw ko yugu reb e piilal ni ngan yarmiy ni ngan madenomnag fare Puguran u yu ulung ni baachig. Ni ngan taw ko re tabinaw nem ma fagali piilal e kar th’abew reb e ra’ ni drainage ditch. Machane yibe cham riy ma bay e girdi’ ni be boyochnag e girdi’ ni be guy rogon ni ngar th’abew fare ra’. Bagayow fagali piilal e ke mil nga baraba’ ndariy ban’en ni buch. Ma nap’an ni be yan fa binem e piilal nga baraba’ ma ke rung’ag lingan e boyoch. Me ere ke pag ir nga but’ me gararaw nga baraba’ ma bay e bullet ni be yan nga lang. Kar puruygad fapi piilal, ma kan ayuweg e ulung ko tin nib t’uf rorad.

“Nra Bad u Gubin e Nam nge Ganong . . . ngu Gubin e Thin”

16. Uw rogon ni ke yarmiy fare tapigpig nib yul’yul’ mab gonop ni ngan wereg fare thin nib fel’ ko pi girdi’ ni yad buch uw ni ma non ni yugu mmit e thin?

¹⁶ Yog apostal John ni ra yib fare ulung ni baga’ u “gubin e nam, nge ganong, nge gubin mit e girdi’, ngu gubin e thin.” (Revelation 7:9) Ere ke yarmiy fare Governing Body ni ngan fl’eg boch e babyor u boor mit e thin​—nib muun ngay e pi thin ko boch e ganong nge ulung ko girdi’ ni yad buch uw. Ni bod, u Mozambique, ni kan fl’eg fare tract ni Life in a Peaceful New World ko lal mit e thin. U Nicaragua, ma kan fl’eg fare babyor ni Mu Falfalan’ ni Ngam Par u Paradis u Fayleng! ko thin ni Miskito​—ni aram e bin som’on e babyor ni fl’eg fare Watch Tower Society ko re thin nem. Fare branch ofis ko Watch Tower Society e ke yog ni boor e girdi’ ni Miskito Indian e kar falfalan’gad ko re ke babyor nem ya kan fl’eg ko thin rorad. Nap’an e duw ni 1997 ma ke fl’eg fare Society boch e babyor ko 25 mit e thin nib biech.

17. Chon mini’ ni kan ayuwegrad u Korea, ma uw rogon ni ke ayuweg e pi videotape e girdi’ ni aram rogon?

¹⁷ U Korea ma kan ayuweg e girdi’ ni ma non ni yugu reb e thin. Nap’an e 1997 ma kan tay e bin som’on e convention ni bay e sign language ko piyu Korea ni yad e baling. Bay 15 e ulung ni fan ko piin ni ma fanay e sign language u Korea ma bay 543 e publisher riy ma 1,174 e girdi’ e kar uned ko fare convention, ma 21 e kar uned ko taufe. Ni ngan ayuweg e piin biling ndabiyog ni ngar nanged fan e thin ni yima yog ara thin ni kan yoloy nga but’, ma kan fl’eg boch ban’en ko videotape ko 13 mmit e sign language. Ere yibe ayuweg e piin biling ni ngar “bieged” e babyor mar filed e thin nib fel’, ma be yib angin. U Meriken faram ma ra yan lal e duw mfini mon’og be’ nib biling ni nge bung rogon ni nge un ko taufe. Ma chiney ma boor e video ko American Sign Language, me ere bay boch e girdi’ nib biling ni ke yog ni ngar uned ko taufe u tomren reb e duw.

‘Ngan Par u lan fare Karro ni ma Girngiy e Os’

18. Mang e rin’ Jehu u tomren ni i mada’nag Jehonadab?

¹⁸ Nap’an e duw ni 905 B.C.E., mu tomren ni un Jehonadab ngak Jehu, me yan Jehu ni nge thang e liyor ni googsur. I yog ko urngin e piin ni ma liyor ku Baal ni gaar: “Ngan tay reb e muulung nib thothup ni fan ku Baal.” Ma aram me pi’ e thin nge yan nga gangin e binaw ni nge guy rogon ndariy reb e girdi’ ni ma liyor ku Baal ni nge siy riy. Nap’an ni yib e girdi’ ni pire’ nga lan e tempel ko re got ngoogsur nem, ma kan ayuw ni dariy be’ riy ni ma liyor ku Jehovah. Tomur riy, me li’ Jehu nge pi salthaw rok e piin ni ma liyor ku Baal kar m’ad. “Ma aram me thang Jehu mit e girdi’ ku Baal u Israel.”​—2 Kings 10:20-28.

19. Bochan e n’en ni bay nga m’on rodad, ma susun uw rogon e lem rodad, ma susun mang maruwel e ngad passiggad i rin’?

¹⁹ Ngiyal’ ney ma dabki n’uw nap’an ma ra moy e bin tomur e pufthin ko pi yuraba’ i teliw ni googsur. Pi engel e be pow’iy e pi Kristiano ni ngar wereged fare thin nib fel’ ngak urngin e girdi’, min pi’ e athamgil nga laniyan’rad ni nge madgun Got u wan’rad mi yad chuw ko pi yuraba’ i teliw ni googsur. (Revelation 14:6-8; 18:2, 4) Yibe pining e piin nib sobut’an’rad ni ngar pared u tan pa’ Jesus Kristus ni ir e Pilung ni ke dugliy Jehovah ko Gil’ilungun. (Revelation 12:10) Ngiyal’ ney ma thingari dabi war e passig rodad ma gad par nib mudugil ko bin riyul’ e liyor.

20. Mang e nge mudugil lanin’um ngay ni ngam rin’ u nap’an e duw ni 1998?

²⁰ Bay biyay ni i par David ni Pilung nib tomal laniyan’ ma aram me meybil ni gaar: “O Got, ba mudugil gumerchaeg. Gu ra yon’ e tang. Gu ra pining e sorok ngom u fithik’ urngin e girdi’, O Jehovah.” (Psalm 57:7, 9) Ku arrogon gadad ni ngad pared nib mudugil. Nap’an e duw ni 1997 ma yugu aram rogon ni immoy e gafgow machane kan pining e sorok ngak Jehovah Got nib rir. Ere ngii gel e sorok ni ngan pining u nap’an e re duw ney. Ma nge yodorom ni yugu demtrug ko mang e ra rin’ Satan ni nge gafgowngadad ara nge togopuluw ngodad. Ere gad ra dag ni ba mudugil gumercha’dad u taabang ko fa Bin ni Baga’ e Jehu ni Jesus Kristus, ma aram e rayog ni ngad fulweged u polo’ i gelngidad e pi thin ney ni be gaar: “Gimed urngin e piin ni gimed mmat’aw, e nge felan’med mi gimed felfelan’ ni bochan e n’en ni ke rin’ Jehovah! Gimed urngin e piin ni gimed be fol rok, e ngam tolulniged e felfelan’.”​—Psalm 32:11.

Rayog ni Mu Weliy?

◻ Mang boch ban’en ni kan thiliyeg u Israel ko duw ni 905 B.C.E.?

◻ Mini’ e be yip’ fan Jehu ko ngiyal’ ney, ma uw rogon ni dag fare “ulung ni baga’” ni ke ‘taareban’rad’ ngak?

◻ Mang boch e mathaeg ko report e be dag rogon fene passig e machib ni i tay e Pi Mich Rok Jehovah u nap’an e duw ni 1997?

◻ Demtrug ko mang e ra rin’ Satan ngodad ma mang e gad ra rin’ ko duw ni 1998?

[Chart ko page 18-21]

1997 SERVICE YEAR REPORT OF JEHOVAH’S WITNESSES WORLDWIDE

(Mu guy e re ke babyor ney)

[Sasing ko page 15]

Rogon fene yoor e girdi’ ni kar uned ko fare Puguran e be dag ni ku rayog ni nge yoor e ulung

[Sasing ko page 16]

Bod rogon ni tay Jehonadab tanggin Jehu, maku arrogon fare “ulung ni baga’” ko ngiyal’ ney ni yad ma tay tanggin fa Bin ni Baga’ e Jehu ni aram Jesus Kristus nge pi walagen ni kan dugliyrad