Ga Ma Tay Fan E Ulung Rok Jehovah?
“Be gaar [Jehovah]: ‘Tharmiy e tagil’ig, ma fayleng e gu ma gifeg e rifrif u eg ngay.’”—ISAIAH 66:1.
1, 2. (a) Mang boch ban’en ni yima guy ni be micheg e ulung rok Jehovah? (b) Ma par Jehovah u uw?
KE MICH u wan’um ni bay e ulung rok Jehovah fa? Faanra er rogon, ma mang fan nib mich u wan’um? Sana ga ra fulweg ni ga ra gaar: ‘Ya bay e Kingdom Hall romad. Ma ba yaram e ulung romad ya bay e piin piilal. Ma bay e circuit overseer romad ni ma yib ko ngiyal’ ni kan dugliy. Gamad ma un ko pi assembly nge convention ni kan yarmiy nib fel’ rogon. Ma bay e branch ofis ko fare Watch Tower Society romad. Urngin e pi n’ey nge ku boch ban’en e ma micheg ni bay e ulung rok Jehovah ni be maruwel.’
2 Pi n’en nem e be micheg ni bay e ulung. Machane faanra kari mus ni pi n’en ni bay u fayleng e gad be guy ma gad be tay fan me ere dawori tamilang u wan’dad ko uw rogon e ulung rok Jehovah. Yog Jehovah ku Isaiah ni fare fayleng e ke mus e n’en ni ma gifeg e rifrif u ay ngay, ma tharmiy e tagil’. (Isaiah 66:1) Fare “tharmiy” ni weliy Jehovah morngaagen e ba sor fan ko mang? Tagil’ e nifeng u lan e lang ni atmosphere? Fa be sor fan ko palpal th’ib? Fa be sor fan ko yugub thal e yafas? Ma weliy Isaiah u morngaagen “tagil’ Jehovah nib thothup mab gamog,” ma be weliy ko Psalm ni tharmiy e “gin ni ma par riy nib mudugil.” Ere be weliy Isaiah 66:1 u morngaagen e “tharmiy” ni ma sor fan ko giyow ko kan ni aram e gin ni ma par Jehovah riy ni ir e an th’abi tolang.—Isaiah 63:15; Psalm 33:13, 14.
3. Uw rogon nrayog ni ngad gelgad ko maruwaran’uy?
3 Ere faanra gad ba adag ni nge tamilang u wan’dad e ulung rok Jehovah ma gad tay fan ma thingarda lemnaged e tharmiy. Ma aram e magawon ko boch e girdi’. Ya dabiyog ni ngan guy e ulung rok Jehovah u tharmiy ere uw rogon ni gad manang ni riyul’ ni ba’? Boch e girdi’ e ra toruruw mi yad lemnag ni gaar, ‘Uw rogon nrayog ni nge mudugilan’dad?’ Uw rogon nrayog ni nge gel e michan’uy ko maruwaran’uy? L’agruw e kanawo’ ni baga’ fan e ngan fil e Thin Rok Got ma ngan un ko muulung u gubin ngiyal’ ma ngan un ko pi n’en ni yima rin’ riy. Ma aram e gad ra guy e tamilang ko thin riyul’ u tungun ba kanawo’ u tan e but’. Ku immoy boch e tapigpig rok Got ni ki maruwaran’rad boch e ngiyal’. Ngad lemnaged fare tapigpig rok Elisha u nap’an ni ke togopuluw fare pilung nu Syria ngak yu Israel.—Mu taarebnag John 20:24-29; James 1:5-8.
Be’ ni Ke Guy e Pi Salthaw nu Tharmiy
4, 5. (a) Mang e magawon ko tapigpig rok Elisha? (b) Uw rogon ni ke fulweg Jehovah taban e meybil ku Elisha?
4 Reb e nep’ me l’og fare pilung nu Syria e pi salthaw ni boor nga Dothan ni ngan kol Elisha. Ma faani od fare tapigpig rok Elisha nkakadabul me yan nga wen nga daken e chigiy ko naun rorow u Middle East ni nge tanifeng, me guy ban’en ni kari gin ngay! Ya ba’ ba ulung i salthaw nu Syria ni ke un e os nge pi karrow ni ma girngiy e os ngorad ni kar longobiyed fare mach ni ngar koled e profet rok Got. Ke tolul fare tapigpig ngak Elisha ni gaar: “Masta, kad gafgowgad, mang e ngad rin’ed?” Ke mocha’ Elisha ma kari mudugil e thin ni yog ni gaar: “Dab mu rus, ya kab pire’ e piin ni bay u ba’ rodad ko piin ni bay u ba’ rorad.” Ma sana ke lemnag fare tapigpig ni gaar, ‘Yad bay u uw? Dawor gguyrad!’ Ma sana aram e magawon rodad—dabda guyed u fithik’ e tamilangan’uy e pi pi salthaw nu tharmiy.—2 Kings 6:8-16; Efesus 1:18.
5 I meybil Elisha ni ngan bing owchen fare tapigpig rok. Mang e buch ni migid? “Me pingeg [Jehovah] e changar rok fare tapigpig me guy fare burey nib sug ko os nge karrow nnifiy nib liyeg e gin’en ni bay Elisha riy.” (2 Kings 6:17) Arrogon, ke guy e pi salthaw nu tharmiy ni yad e pi engel, ni yad be n’en ni ngar ayuweged e tapigpig rok Got. Ere ke yog ni nge nang ko mang fan ni kari mudugilan’ Elisha.
6. Uw rogon nrayog ni ngad nanged morngaagen e ulung rok Jehovah u tharmiy?
6 Yu ngiyal’ ma mmo’maw ni ngad guyed ban’en ni bod fare tapigpig ku Elisha fa? Ke mus ni n’en ni gad ma guy e pi n’en ni bay u p’eowchedad ni be magawonnagdad ara pi n’en ni be togopuluw ko maruwel ko Kristiano u boch e binaw fa? Faanra arrogon ma rayog ni ngad lemnaged ni ra pig e changar rodad ni ngad guyed ban’en nge tamilangnagan’dad fa? Danga’ ya bay ban’en rodad ni dariy ko fare tapigpig rok Elisha—ba ke babyor ni boor e thin riy u morngaagen e pi n’en ni kan guy u nap’an ni pig e changar rok e girdi’ ma re ke babyor nem e Bible ma rayog ni nge tamilangnag ngodad u morngaagen fare ulung u tharmiy. Ma pi Thin nem ni thagthagnag Got e ku bay e pi motochiyel rok Got riy ni rayog ni nge yal’uweg e lem rodad nge yafas rodad. Machane, thingarda athamgilgad ngad gayed e gonop nge tamilangan’ ma ngad ted fan rogon e pi n’ey ni ke yarmiy Jehovah. Ma rayog ni ngad rin’ed e re n’em u nap’an ni ngad filed e Bible nib muun ngay e meybil ni gad be tay nge nap’an ni gad be fl’eg i lemnag boch ban’en.—Roma 12:12; Filippi 4:6; 2 Timothy 3:15-17.
Ngan Fil Ban’en Min Nang Fan
7. (a) Mang fan nib mo’maw rok boch e girdi’ ni ngar filed e Bible? (b) Mang fan ni baga’ fan ni ngan athamgil ni ngan fil e babyor?
7 Boor e girdi’ ni gathi ri yad ba adag ni ngar poyed e babyor, ya dar adaged ni ngar filed e babyor u nap’an ni kar uned ko skul, fa boch e girdi’ e dar nanged e yol. Machane faanra gad ba adag ni ngad nanged ma ngad ted fan e ulung rok Jehovah u fithik’ e tamilangan’ rok, ma thingarda athamgilgad ni ngad adaged ni ngad filed e babyor. Rayog ni ngam falfalan’ ko abich nfaanra dan fl’eg rogon e ggan? Be’ ni talum e ra yog ngom ni boor e maruwel ni ba t’uf ni ngan rin’ ni ngan fl’eg e ggan nib fel’ lamen. Machane, rayog ni ngan kay u lan baley e awa ara papey boch. Ma angin ni ra yib ko fol babyor e rayog ni nge par ndariy n’umngin nap’an. Rayog ni ngan n’igin ni ngan adag ni ngan fil e babyor nfaanra ngan guy ni rayog ni ngan mon’og iyan. Yog apostal Paul ni susun ni ngad tedan’dad ngodad nge tin ni gad be fil ma nguud athamgilgad u rogon ni gad ma poy e babyor u fithik’ e yoor. Ba t’uf e athamgil nib gel u gubin ngiyal’, machane angin ni ra yib riy e dabi m’ay biid.—1 Timothy 4:13-16.
8. Rogon ni be yog ko Proverbs ma susun uw rogon e lem rodad?
8 Kakrom e yog be’ nib gonop ni gaar: “Fakag, faanra ga ra motoyil ko thin rog, ma ga chaariy e pi motochiyel rog u lanin’um, ma ngam tay telim ko gonop, ma nge taga’ gum’ercha’em nga daken e tamilangan’; ma faanra ga ra ning ni ngam nang fan ban’en ma ga pining e tamilangan’ nge yib ngom, ma faanra ga ra gay ni bod be’ ni be gay e silber, ma ga gay ni bod be’ ni be gay e machaf ni kan mithag nga bang ma aram e ga ra nang fan rogon ni nge yib madgun Jehovah ngom, ma ga ra pirieg e tamilangan’ rok Got.”—Proverbs 2:1-5.
9. (a) Uw rogon ni kan taarebnag e gol ko “tamilangan’ rok Got”? (b) Mang boch ban’en nib t’uf nge yog ngodad ni faanra nge yog e tamilangan’ ngodad?
9 Ga manang ko mini’ e mil fan ngak ni nge athamgil? Boor yay ni kan nog e pi thin ney ni ‘Faanra ga ra.’ Ma amu lemnag fapi thin ni be gaar, ‘Faanra ga ra gay ni bod be’ ni be gay e machaf ni kan mithag nga bang.’ Mu lemnag e piin ni yad e miner u lan in e chibog ni kar fuoged e but’ mar gayed e silber nge gol u Bolivia, Mexico, South Africa, nge yugu boch e nam. Kar maruwelgad nib elmirin, mar fanayed e talin e maruwel ni kuwa nge shovel, ni fan ni ngan kerker e war ni bay e pi wasey ni baga’ fan riy. Ri baga’ fan e gol u wan’rad ma reb e mine u California, U.S.A., e kan kerker e war ni 367 e mayal n’umngin e kanawo’ ni kan fl’eg u tan e but’, ni ke yan reb e mayal nga but’—ni fan ni ngan pirieg e gol. Machane, rayog ni ngan kay e gol? Ara ngan unum e gol? Ma ra ayuweg e yafas rom nfaanra ga bay ko gin ni dariy e ran nge ggan riy? Danga’, ya bin riyul’ riy e gol e gathi baga’ fan, ma rogon tolngin puluwon e ma thil u reb e rran nge reb u rogon nib puluw ko international market. Machane boor e girdi’ ni kar m’ad ni bochan. Ma susun uw rogon e athamgil ni ngad ted ni nge yog e gol nib spiritual ngodad, ni aram e “tamilangan’ rok Got”? Mu lem, aram e tamilangan’ rok fare Somol nth’abi ga’ u palpal th’ib, nge morngaagen e ulung rok, nge tin nib m’agan’ ngay! Ma bay e pi talin e maruwel nib spiritual ni rayog ni ngad fanayed ni bod e kuwa nge shovel. Aram e pi babyor ni be weliy morngaagen e Bible ma ma ayuwegdad ngad fuoged e Thin Rok Jehovah nib toar ma ngan nang fan e thin ni bay riy.—Job 28:12-19.
Ngan Fuog Ban’en Nga But’ nib Toar ni Ngan Pirieg e Gonop
10. Mang e ke guy Daniel u nap’an ni kan piliyeg e changar rok?
10 Ngad fuoged boch ban’en nib spiritual ni nge yog e tamilangan’ ngodad u morngaagen e ulung rok Jehovah u tharmiy. Ngad lemnaged e n’en ni guy Daniel faani pig e changar rok me guy Faanem ni Kab Kakrom ni be par u tagil’. I yoloy Daniel ni gaar: “Nap’an ni ku gu be changar, min tay e pi chiya ni nge yan i par e piin ni pilung ngay. Faanem ni kab kakrom i yib ni immoy e yan i par nga daken reb. Ma mad rok e bod feni wechwech e ayis ni ma mul u lang nga but’, ma piyan lolugen e bod e tin th’abi klin bunuen e gamanman ni saf. Ma chiya rok ni kan tay nga daken e tayapyap nnifiy e be daramram ni be yib ba yil’ i daramram riy. Ma pire’ ni pire’ i biyu’ e yad bay u rom ni ngar pigpiggad ngak, ma raay e milyon e kar bad ra sak’iygad nga p’eowchen. Me tabab fare puf oloboch min pithig yu ke babyor.” (Daniel 7:9, 10) Mini’ fa pire’ ni pire’ i biyu’ ni be pigpig ku Jehovah? Fare marginal reference ko fare ke Bible ni New World Translation, ni fan ko gali thin ni “kuwa” nge “shovel,” e be puluwnag ko pi thin ko Psalm 68:17 nge Hebrews 1:14. Arrogon, fapi tapigpig e yad e pi engel!
11. Uw rogon nrayog ni ngad nanged fan e n’en ni yog Elisha u daken e n’en ni guy Daniel?
11 De yog Daniel ni ke guy urngin e pi engel nib yul’yul’ ni bay rok Got. Sana ka bay pire’ i pire’ i milyon. Ma dabi siy ni rayog ni ngad nanged fan e n’en ni yog Elisha ni gaar: “Kab pire’ e piin ni bay u ba’ rodad ko piin ni bay u ba’ rorad.” Kab pire’ e pi salthaw rok Jehovah ni yad bay u tharmiy ko pi salthaw rok fare pilung nu Syria, ni yugu aram rogon ni ku be un ngorad e pi engel ndar yul’yul’gad ni yad e pi moonyan’!—Psalm 34:7; 91:11.
12. Uw rogon nrayog ni ngkum fil boch morngaagen e pi engel?
12 Sana ga ba adag ni ngkum nang boch u morngaagen e pi engel ney nge rogon ni yad ma pigpig ku Jehovah. Fare bugithin ni Greek ni engel e be tamilangnag ni yad e pi ta mol’og ya re bugithin nem e ku ma sor fan ko “mol’og.” Machane ka bay boor ban’en ni yad ma rin’. Ma faanra ngam nang, ma thingar mu fuog nib toar. Faanra bay rom fare babyor ni Insight on the Scriptures, ma rayog ni ngam fil e pi thin ni baaray ni “Angels,” ara rayog ni ngam sul nga daken boch e thin u lan e pi Watchtower u morngaagen e pi engel. Ga ra gin ngay ko uw urngin ban’en nrayog ni ngam fil u morngaagen e pi tapigpig rok Got ney nu tharmiy ma ga ra tay fan e ayuw ni yad be pi’ ngodad. (Revelation 14:6, 7) Ma boch e pi tapigpig rok Got u tharmiy ney e bay yugu boch ban’en nib mil fan ngorad u lan e ulung rok Got u tharmiy.
N’en ni Guy Isaiah
13, 14. Mang e ke guy Isaiah u nap’an ni ke pig e changar rok, ma uw rogon u wan’?
13 Chiney ma ngad susunaged ni gad be fuog e but’ ni fan ko n’en ni guy Isaiah faani pig e changar rok. Nap’an ni ngam bieg guruy ni 6, verse 1 nge mada’ ko 7, ma ga ra ngat ngay. Ya be yog Isaiah ni ke “guy [Jehovah], ni ke par nga tagil’ nib tolang nga lang,” ma “bogi serafim ni kar sak’iygad u lang.” Ma yad be non ni yad be weliy rogon feni sorok Jehovah, ma ir e ba thothup. Susun ni ngari taw nga gum’ercha’em e pi thin nem u nap’an ni ga be poy. Ma mang e rin’ Isaiah? “Me lungug: ‘Kug gafgow! Ya ke mutrug ni ngeb e gechig ngog! Urngin bugithin nra yib u l’ugunag nga but’ e ba sug ko denen, ma gu be par u fithik’ girdien ba nam ni urngin bugithin ni yad be yog e ba sug ko denen ma de machalbog. Ma chiney e kug guy nga owcheg fare Pilung, ni [Jehovah] ni Gubin ma Rayog Rok!’” Kari ngat nga rogon e n’en ni ke guy! Ku arrogon gur fa?
14 Uw rogon ni ke yog ni nge par Isaiah ni be guy e pi n’en nem? Ke weliy ni ke yib reb e serafim ngak ni nge ayuweg me gaar: “Chiney e ke chuw e kireb rom, ma denen rom e ke n’ag Somol fan.” (Isaiah 6:7) Rayog ni nge pagan’ Isaiah ku Got ni ra runguy ma aram e rayog ni nge tiyan’ ko n’en ni yog Jehovah. Ere gathi ga ba adag ni ngkum nang boch u morngaagen e pi kan ney u tharmiy nib tolang e liw rorad? Me ere mang e thingar mu rin’? Susun bod ni ngam fuog e but’ ni ngam gay boch e thin. Reb e talin e maruwel ni rayog ni ngam fanay e fare ke babyor ni Watch Tower Publications Index, ma ga sap ko pi reference ni be yog yugu boch e babyor ni be weliy u morngaagen e re n’en nem.
Mang e Ke Guy Ezekiel?
15. Mang e ma micheg nib riyul’ e n’en ni guy Ezekiel?
15 Bin migid ma ngad lemnaged yugu mit e kan ni kan sunumeg. Ke taw’ath Ezekiel ya ke pig e changar rok me guy ban’en u nap’an ni bay u kalbus u Babylon. Mu pithig e Bible ko Ezekiel guruy ni 1, ko fa dalip e verse ni tin som’on. Uw rogon e tin som’on e thin riy? Be gaar, ‘Immoy ba ngiyal’ u lan reb e binaw nib palog u bang . . .’? Danga’, gathi ereray ba yat ni be weliy u morngaagen ba ngiyal’ nde riyul’. Verse 1 e be gaar: “Rofen ni lal ko pul ni aningeg ko duw ni guyey e ug pired e girdi’ nu Israel ni kan fekmad u Israel nga Babylonia ni kug manged kalbus, ma gamad be par u tooben e lul’ ni Chebar. Me mab lan e lang me piliyeg Got e changar rog me dag ban’en ngog.” Mang e kam fil ko re verse ney? Be yog e ngiyal’ nge gin ni ke buch e re n’en nem riy. Aram e be tamilangnag ni bpuluw ko fa bin lal e duw ni kan kalbusnag Jehoiachin ni Pilung ko duw ni 613 B.C.E.
16. Mang e ke guy Ezekiel?
16 Ke tay Jehovah pa’ nga daken Ezekiel, me pig e changar rok me guy Jehovah ni bay u tagil’ u daken ba karro ni baga’ u tharmiy ma aningeg ay e re karro nem nib lulubuy ma boor lan mit. N’en ni be pug e tafinay rodad e bay aningeg i ban’en nib fos ni ra bagayad ma be par u tooben ra reb i ay e pi karrow nem. “Mu gguy aningeg i ban’en nib fos ni bod yaan e girdi’ u lukngun fa gi manileng, machane ra bagayad ma aningeg owchen ni ba’ ma aningeg raba’ i pon. . . . Nra bagayad ma aningeg owchen ni bay. Bin nib sap nga m’on i owchen e bod owchen e girdi’, ma ba’ ni mat’aw e ba’ owchen riy ni bod owchen e layon, ma gilay’ e ba’ owchen riy ni bod owchen e garbaw, ma wurilen chugen e ba’ reb i owchen riy ni bod owchen ba arche’ ni eagle.”—Ezekiel 1:5, 6, 10.
17. Mang e be yip’ fan fa aningeg i owchen fapi kerubim?
17 Mang fa aningeg i n’en nib fos? Yog Ezekiel ni yad e kerubim. (Ezekiel 10:1-3, 14) Mang fan ni ra bagayad ma aningeg i owchen ni ba’? Ya ma sor fan ko fa aningeg i felngin Jehovah ni Somol Nth’abi Ga’. Owchen fare arche’ ni eagle e be yip’ fan e gonop ni be guy ban’en nib palog nga orel. (Job 39:27-29) Ma mang e be yip’ fan owchen fare garbaw? Bay gelngin nib gel u k’angan nge pon, ma ba garbaw ni pumoon ni ma cham e rayog ni nge chibiy ba os nge be’ u daken nga lang. Dabi siy ni fare garbaw e be yip’ fan gelngin Jehovah ni der ma mus. Ma fare layon e be yip’ fan e ngongol nib mat’aw nder rus. Ma owchen e girdi’ e ma sor fan ko t’ufeg rok Got, ya yigoo girdi’ e rayog ni nge m’ug e re felngin nem rok u fithik’ e tamilangan’.—Matthew 22:37, 39; 1 John 4:8.
18. Uw rogon ni ma ayuwegdad apostal John nge tamilang u wan’dad fare ulung nu tharmiy?
18 Ka bay boch ban’en ni kan guy ni ra ayuwegdad ngad nanged fan e pi n’en ney. Ba muun ngay e pi n’en ni guy John ni bay ko fare babyor ni Revelation. Bod Ezekiel, ma ke guy John Jehovah ni be par u tagil’ ma bay e pi kerubim u tooben. Mang e be rin’ e pi kerubim? Yad ma yog e n’en ni yog e pi serafim u Isaiah guruy ni 6, ni gaar: “Ba thothup, ba thothup, ba thothup [Jehovah] ni Got ni Gubin ma Rayog Rok, ni ir e immoy, me ir e ba’, me ir e bay yib.” (Revelation 4:6-8) Miki guy John ba fak e saf u tooben Got. Mini’ e be yip’ fan? Fare Fak e Saf rok Got ni Jesus Kristus.—Revelation 5:13, 14.
19. U daken e pi thin ney ma mang e kam fil u morngaagen e ulung rok Jehovah?
19 Ere mang e ke tamilangnag ngodad e dalip i ney ni kan guy? Kad guyed ni Jehovah Got e ir e en th’abi tolang u lan e ulung nu tharmiy ma bay fare Fak e Saf u tooben ni ir Jesus Kristus, ni fare Thin ara Logos. Ma kad guyed e pi engel u tharmiy nib muun ngay e pi seraf nge pi kerubim. Yad bang ko taab e ulung ni yad be maruwel u taabang ma yad be rin’ e tin nib m’agan’ Jehovah ngay. Ma ban’en ni ke m’agan’ ngay e ngan machibnag fare thin nib fel’ u ga’ngin e fayleng ko ngiyal’ ney ko tomur.—Mark 13:10; John 1:1-3; Revelation 14:6, 7.
20. Mang deer ni ran weliy ko bin migid e article?
20 Ma Pi Mich Rok Jehovah u fayleng e yad ma muulung u lan e pi Kingdom Hall ni ngar filed rogon ni ngar rin’ed e tin nib m’agan’ fare Somol ni Ga’ ngay. Dabi siy ni chiney ma rayog ni ngad ted fan ni kab boor ni bay ko ba’ rodad ko pi n’en ni bay ku Satan nge pi toogor ko thin riyul’. Ma ka bay reb e deer, Uw rogon ma fare ulung nu tharmiy e bay rogon ko fare thin nib fel’ ni yibe machibnag? Bin migid e thin e ra weliy u morngaagen e re n’em nge yugu boch ban’en.
Boch e Deer ni Ngan Sul Nga Daken
◻ Mang e thingari tamilang u wan’dad ma aram e rayog ni ngad ted fan e ulung rok Jehovah?
◻ Mang e buch ngak fare tapigpig rok Elisha, ma uw rogon ni ke pi’ fare profet e athamgil nga laniyan’?
◻ Susun uw rogon u wan’dad e fol babyor?
◻ Mang e weliy Daniel, nge Isaiah, nge Ezekiel u morngaagen fare ulung nu tharmiy?
[Sasing ko page 5]
Angin ni ra yib ko fol babyor e kab ga’ fan ko angin ni ra yib ko ggan ni kan fl’eg nib fel’ rogon kan kay
[Sasing ko page 7]
I fulweg Jehovah taban e meybil ku Elisha kan guy yaan e pi salthaw nu tharmiy