Mu Par Ndabi Yib E Riya’ Ngom Ya Gur Bang Ko Ulung Rok Got

“Ngochol rok Jehovah e bod ba wulyang nib gel. Ra mil e piin nib mat’aw ngay min pi’ e ayuw ngorad.”​—PROVERBS 18:10, New World Translation.

1. Rogon ni yog Jesus ko meybil ma mang magawon ni bay ko piin Kristiano?

U M’ON ni yim’ Jesus me meybil ngak e Chitamangin nu tharmiy ni fan ko pi gachalpen. U fithik’ e t’ufeg e gaar: “Ku gog ngorad e thin rom ni mpi’ ngog ma ke fanenikayrad e girdi’ nu fayleng, ya gathi yad girdien e fayleng, ni bod gag ni gathi gag e girdi’ nu fayleng. Ma gathi gu be wenignag ngom ni ngam fekrad ngar chuwgad u fayleng, machane gu be wenignag ngom ni ngam ayuwegrad rok faanem nib kireb.” (John 17:14, 15) I nang Jesus ni bay e riya’ ko pi Kristiano u fayleng. Ya yira fanenikayrad ma yira yog e thin ngoogsur u morngaagrad ma ra gafgownagrad. (Matthew 5:11, 12; 10:16, 17) Ku aram e gin nra moy boor e sasalap riy.​—2 Timothy 4:10; 1 John 2:15, 16.

2. U uw e rayog ni nge pirieg e pi Kristiano e gin ni yira ayuwegrad riy ko riya’?

² Fare fayleng ni be fanenikay e pi Kristiano e aram e piin ni be par nib dar ku Got ma yad bay u tan pa’ Satan. (1 John 5:19) Re fayleng ney e kab baga’ ko ulung ko Kristiano, ma Satan e kab gel ko girdi’. Ere, rriyul’ ni fanenikan ko fayleng e aram e riya’. U uw e rayog ni nge pateg pi gachalpen Jesus e ayuw riy? Kan weliy ban’en u lan fare The Watchtower ko December 1, 1922 ni gaar: “Gad bay ko ngiyal’ nib kireb. Bay e cham u thilin e ulung rok Satan nge ulung rok Got. Ma ereram ba cham nib gel.” Mu fithik’ e re cham ney ma ulung rok Got e aram e gin ni bay e ayuw riy ko tirok Got ban’en. Fare bugithin ni “ulung” e dariy ko Bible, ma nap’an e 1920 ma fare bugithin ni “ulung rok Got” aram bbugithin nib biech. Ere mang e re ulung ney? Ma uw rogon nrayog ni ngad pirieged e ayuw riy?

Ulung Rok Jehovah

3, 4. (a) Rogon ni yog reb e jibikiy nge fare Wulyang Ntagil’ e Damit, ma mang fan fare bugithin ni ulung? (b) Mang fan nrayog ni ngan pining e ulung ko Pi Mich Rok Jehovah ni yad e pi walag u ga’ngin e fayleng?

³ Rogon ni yog fare Concise Oxford Dictionary ma ulung e “ban’en ni kan yarmiy kan tay nga taabang.” Ere rayog ni ngan pining e ulung ngak e “pi walag” ya pi apostal e kar yarmiyed e pi Kristiano u nap’an e bin som’on e chibog ni yu ulung ni bay u tan pa’ fare governing body u Jerusalem. (1 Peter 2:17) Ku arrogon e Pi Mich Rok Jehovah ko ngiyal’ ney ma aram rogon ni kan yarmiy e ulung rorad. Kan gelnag e ulung ngar pared nib taareb lanin’rad ni bochan e “pi pumoon ni yad e taw’ath” ni aram e “pi tachugol saf nge piin sensey.” Boch i yad e ur milekaggad iyan nga reb e ulung nge reb, ma boch i yad e ur pared ni yad e piilal u boch e ulung. (Efesus 4:8, 11, 12; Acts 20:28) Ku arrogon e ngiyal’ ney ma bay e “pi taw’ath” nem ni ma gelnag e ulung ko Pi Mich Rok Jehovah yad be par nib taareb lanin’rad.

⁴ Fare The Watchtower ko November 1, 1922 e be weliy morngaagen fare bugithin ni “ulung” ni gaar: “Ulung e aram boch e girdi’ ni ke taareb lanin’rad ni ngar lebguyed e tin ni ke m’agan’rad ngay.” Ki weliy fare The Watchtower ni bochan ni kan pining ba ulung ngak e Pi Mich Rok Jehovah ma gathi aram e yad “ba sect, ya yad reb e ulung ni Bible Student [Pi Mich Rok Jehovah] ma yad be athamgil ni ngar rin’ed e tin nib m’agan’ Got ngay ma yad be rin’ u rogon ni ma rin’ Somol urngin ban’en, ni rogon nib yaram (1 Korinth 14:33) I dag apostal Paul ni pi Kristiano ko ngiyal’ nem e kur ngongolgad ni aram rogon. Ya ke yog ni pi Kristiano ni kan dugliyrad ko kan ni thothup ni yad taab girdi’ ni bod ba dowef ko girdi’, ni boor yu yang riy, ma ra reb ma bay ban’en ni be rin’ ni nge ayuweg fare dowef nrogon. (1 Korinth 12:12-26) Aram ba fanathin ni rib puluw ko ba ulung i ban’en! Mang fan ni kan yarmiy e pi Kristiano ni yad ba ulung? Ya ngar pigpiggad ni fan ko “tirok Got ban’en” mar rin’ed e tin m’agan’ Jehovah ngay.

5. Be mang fare ulung rok Got u fayleng?

⁵ Kan yiiynag ko Bible ni tin riyul’ e Kristiano ko ngiyal’ ney e yad ra par ni kar taab girdi’gad, u lan reb e “binaw” ni yad reb e “nam” ni aram e gin ni ra “gal ramaenrad riy ni yad e tamilang ko fayleng.” (Isaiah 66:8; Filippi 2:15) Re “nam” ney ni ba yaram e ke yoor ko lal nge baley i milyon e girdi’ riy. (Isaiah 60:8-10, 22) Machane, ku gathi ke mus ni aram e tin ni bay ko ulung rok Got. Ya ku bay e pi engel riy.

6. Mini’ e yad bang ko fare ulung rok Got?

⁶ Boor yay ni ke maruwel e pi engel u taabang ko girdi’ ni yad e pi tapigpig rok Got. (Genesis 28:12; Daniel 10:12-14; 12:1; Hebrews 1:13, 14; Revelation 14:14-16) Ma fare The Watchtower ko May 15, 1925 e ke weliy ni gaar: “Urngin e pi engel nib thothup e yad bang ko ulung rok Got.” Miki yog ni: “Somol Jesus Kristus e ir e llug ko ulung rok Got, ni kan pi’ gelngin nge mat’awun ni nge gagiyeg.” (Matthew 28:18) Ere ulung rok Got e mmuun ngay urngin ban’en u tharmiy nge fayleng ni yad be maruwel u taabang ni ngar rin’ed e tin m’agan’ Got ngay. (Mu guy fare kahol.) Rib taw’ath ni ngan mang bang ko re ulung ney! Ma rib ga’ e falfalan’ riy ni ngan sap nga m’on ko ngiyal’ ni ran yarmiy urngin e tin nib fas ban’en u tharmiy ngu fayleng u taabang mi yad pining e sorok ngak Jehovah Got! (Revelation 5:13, 14) Machane mang ayuw ni ma pi’ e ulung rok Got ko ngiyal’ ney?

Yibe Ayuweg e Piin ni Bay ko Ulung Rok Got​—Uw Rogon?

7. Uw rogon ni ma ayuwegdad e ulung rok Got ko riya’?

⁷ Ulung rok Got e rayog ni nge ayuwegdad rok Satan nge tin ni ma rin’ ni nge waliydad. (Efesus 6:11) Satan e ma diliiy laniyan’ e piin ni ma liyor ku Jehovah ma ma gafgownagrad ma ma waliyrad ya taa ban’en ni be nameg: be guy rogon ni nge girngiyrad ngar paloggad ko ‘kanawo’ ni susun ni nga ranod riy.’ (Isaiah 48:17; mu taarebnag ko Matthew 4:1-11.) Dabiyog ni ngad siyeged e pi n’en ni be togopuluw ngodad u lan e re m’ag ney. Machane, rogon fene fel’ u thildad Got nge ulung rok e ra gelnagdad ma ra ayuwegdad ma rayog ni ngad pared ko “fare kanawo’.” Ma aram e dabi mul u pa’dad e n’en ni ke l’agan’dad ngay.

8. Uw rogon ni ma ayuweg e ulung rok Jehovah u tharmiy e pi tapigpig rok u fayleng?

⁸ Uw rogon ni ma ayuwegdad e ulung rok Got ko pi n’ey? Som’on ma pi tapigpig rok Jehovah ni yad e kan e yad ma ayuwegdad. Nap’an ni ke tomal laniyan’ Jesus nib elmirin ma reb e engel e ke ayuweg. (Luke 22:43) Nap’an ni ke chugur ni nge yim’ Peter ma reb e engel e ke ayuweg. (Acts 12:6-11) Dariy e pi maangang ni aram rogon ko ngiyal’ ney machane pi engel e be ayuweg e girdi’ rok Jehovah ko machib ni yad ma tay. (Revelation 14:6, 7) Yibe pi’ gelngirad u nap’an ni kar magawongad. (2 Korinth 4:7) Maku yad manang ni “engel rok [Jehovah] e ma matangiy e piin ni bay madgun [Jehovah] u wan’rad, me chuwegrad ko riya’.”​—Psalm 34:7.

9, 10. Mang fan nrayog ni ngan nog ni “ngochol rok Jehovah e bod ba wulyang nib gel” ma uw rogon nib puluw e re n’ey ko ulung rok Got?

⁹ Ulung rok Jehovah e ku ma pi’ e ayuw. Uw rogon? Be weliy u Proverbs 18:10 ni gaar: “Ngochol rok Jehovah e bod ba wulyang nib gel. Ra mil e piin nib mat’aw ngay min pi’ e ayuw ngorad ko riya’.” Gathi aram e ke mus ni ngan nog fithingan Got ma aram e yira ayuwegey ko riya’. Dangay ya rogon ni gad ra yan ngay e be yip’ fan ni ke pagan’dad ku Jehovah. (Psalm 20:1; 122:4) Ma sor fan ko ngan tay tanggin mat’awun ni nge gagiyeg, ma ngan fol ko pi motochiyel rok, ma ngan michan’ ngak ko tin ni ke yog nra rin’. (Psalm 8:1-9; Isaiah 50:10; Hebrews 11:6) Ba muun ngay ni ngan liyor ku Jehovah ni kari mus ni goo ir. Ke mus ni piin ni ma liyor ku Jehovah ni aram rogon e rayog ni nga rogned u taabang fare thin ko Psalm ni gaar: “Ke felan’dad ni bochan [Jehovah]; ya ke pagan’dad nga fithingan nib thothup.”​—Psalm 33:21; 124:8.

¹⁰ Urngin e piin ni bay ko ulung rok Got u fayleng e rayog ni nga rogned u taabang ku Mikah ni gaar: “Gadad e bay ud meybilgad ngak [Jehovah] ni Got rodad ma gadad be fol rok ndariy n’umngin nap’an.” (Mikah 4:5) Fare ulung ko ngiyal’ ney e ba peth ko “fare Israel rok Got” ma kan piningrad u lan e Bible ni yad e “girdi’ ni fan ko ngochol rok.” (Galatia 6:16; Acts 15:14; Isaiah 43:6, 7; 1 Peter 2:17) Ere girdi’ ni yad bang ko ulung rok Jehovah e yad ba ulung i girdi’ ni ma gay e ayuw u fithingan Got ma yibe ayuwegrad ko riya’.

11. Uw rogon ni ma ayuweg fare ulung rok Jehovah e girdi’ rok ko riya’?

¹¹ Maku fare ulung rok Got u fayleng e aram ba ulung i walag ni bay e michan’ rorad ma ra bagayad ma be gelnag bagayad ma be pi’ e athamgil nga laniyan’ bagayad. (Proverbs 13:20; Roma 1:12) Aram rogon e pi tachugol saf ko Kristiano ni yad ma ayuweg e yu ran’ i saf, mi yad pi’ e athamgil nga laniyan’ e piin nib m’ar ara ke mulan’rad, ma yad ma guy rogon ni ngar ayuweged e piin ni kar mulgad. (Isaiah 32:1, 2; 1 Peter 5:2-4) “Fare tapigpig nib yul’yul’ mab gonop” e ma pi’ e “ggan ko ngiyal’ nib puluw” u daken fare ulung. (Matthew 24:45) Re “tapigpig” nem e yad e pi Kristiano ni kan dugliyrad ma yad ma pi’ e tin th’abi fel’ ko tirok Got ban’en​—thin ni riyul’ ni bay ko Bible ni ma pow’iyey iyan ko yafas ni manemus. (John 17:3) Yibe pining e magar ko fare “tapigpig” ya yad ma pow’iy e pi Kristiano ma yad ma ayuwegrad ngar pared nib fel’ e gafarig rorad mar “ayuwgad ni bod rogon e porchoyog mi yad sumunguy ni bod rogon e bulogol” u fithik’ fare fayleng ni bay e riya’ riy. (Matthew 10:16) Ma yibe ayuwegrad ni “nguur pared ni gubin ngiyal’ ma yad be maruwel ni fan ngak Somol,” ma aram ban’en nra ayuwegrad ko riya’.​—1 Korinth 15:58.

Mini’ e Yad Bang ko Ulung Rok Got?

12. Mini’ e yad bang ko ulung rok Got u tharmiy?

¹² Re ayuw ney e fan ko piin ni yad bang ko ulung rok Got, me ere mini’ e mmuun ngay? Dariy e maruwar riy ko fulweg ko re deer nem ni fan ko fare ulung u tharmiy. Satan nge pi engel rok e dakura moyed u tharmiy. Ma pi engel nib yul’yul’ e yad bay u rom ni kar “muulunggad” u taabang. I guy apostal John ni nap’an e tin tomren e rran ma “fare Fak e Saf” nge pi kerubim (“fa aningeg i n’em ni yad ba fos”), nge “boor e engel” e yad be par ko gin nib chugur ko chiya’ rok Got. Maku be un ngorad fa 24 e piilal​—ni be yip’ fan e pi Kristiano ni kan dugliyrad ni ka ranod nga tharmiy. (Hebrews 12:22, 23; Revelation 5:6, 11; 12:7-12) Yad gubin e yad bang ko ulung rok Got. Machane gathi rib gagiyel ni aram rogon ko girdi’.

13. Uw rogon ni ke tamilangnag Jesus ko mini’ e yad bang ko ulung rok Got ma mini’ e danga’?

¹³ Yog Jesus u morngaagen e piin ni yad ma yog ni yad pi gachalpen ni gaar: “Ma ra yan i taw ko Chirofen nem ma boor e girdi’ e ra gaar ngog, ‘Somol, Somol, u daken fithingam e ug weliyed e thin rok Got riy ngak e girdi’, ma fithingam e ug tulufed boor e moonyan’ ngay, ma fithingam e ug ngongliyed boor e maang’ang ngay!’ Ma aram e bay lungug ngorad: Ri da gu nangmed. Mu chuwgad rog, gimed e piin ni gimed ma rin’ e kireb!” (Matthew 7:22, 23) Faanra rin’ be’ e pi n’en nib kireb ma aram e gathi ir bang ko ulung rok Got, ndemtrug ko mang e ra yog, ni yugu aram rogon ni ma un ko liyor. Miki dag Jesus ko uw rogon ni ngan nang ko ri mini’ e ir bang ko ulung rok Got. Ye gaar: “Gathi gubin e girdi’ ni ma piningeg ni ma lungurad, ‘Somol, Somol,’ e yad ra yan nga suwon Got u tharmiy, ya ke mus ni piin ni yad ma rin’ e n’en ni ba adag e Chitamag nu tharmiy ni ngar rin’ed e yad ra yan ngay.”​—Matthew 7:21.

14. Mang boch ban’en nib m’agan’ Got ngay ni ba t’uf ni nge rin’ e piin ni yad bang ko ulung rok?

¹⁴ Ere thingari rin’ be’ e tin nib m’agan’ Got ngay ni nge mang bang ko ulung rok Got​—ni “fare gagiyeg nu tharmiy” aram kenggin. Ma mang e mm’agan’ Got ngay? I weliy Paul ban’en nib baga’ fan ni gaar: “Ba adag [Got] urngin e girdi’ ni ngar thapgad ngak ma ngar nanged e tin nib riyul’.” (1 Timothy 2:4) Faanra be guy rogon be’ ni nge fil e thin riyul’ ni bay ko Bible ma be puluwnag ko yafas rok, ma be wereg ngak “urngin e girdi’,” ma aram e be rin’ e tin nib m’agan’ Got ngay. (Matthew 28:19, 20; Roma 10:13-15) Ku ba adag Got ni ngan duruw’iy e yu ran’ i saf ku Jehovah min ayuwegrad. (John 21:15-17) Baga’ fan e pi muulung ko Kristiano ko re n’ey. Ya be’ ni ke puf rogon nrayog ni nge un ko pi muulung nem machane der ma un e aram e be dag ni dariy fan u wan’ ni ir bang ko ulung rok Got.​—Hebrews 10:23-25.

Ngan M’ag Fager ko Fayleng

15. Mang ni ke ginang James e pi ulung ko ngiyal’ nem?

¹⁵ Gonapan 30 e duw u tomren ni yim’ Jesus ma James ni walagen e ke tamilangnag boch ban’en ni ra kirebnag e liw ku be’ u lan e ulung rok Got. Ke yoloy ni gaar: “Gimed e piin nda myul’yul’gad ngak Got! Da mu nanged ni faanra mfagergad ko fayleng ma aram e kam manged toogor rok Got? Cha’ nra finey ni nge mang fager rok e fayleng e aram e ke tay ir ni ir e toogor rok Got.” (James 4:4) Be’ ni ir e toogor rok Got e dabi siy ni gathi ir bang ko ulung rok. Ere uw rogon e m’ag fager ko fayleng? Kan weliy ni bay boor rogon, ni reb e ngan chag ko piin nib kireb. Miki tamilangnag James ban’en​—lem nde yal’uw e rayog ni nge n’igin be’ nge un ko ngongol nde yalen.

16. Mang e be tamilangnag James morngaagen faanra ngan fager ko fayleng ma kan mang toogor rok Got?

¹⁶ James 4:1-3 e be gaar: “U uw e ma yib urngin e cham nge tugthin u fithik’med riy? Ra bad ko tin ni be ar’arnag fithik’ i dowmed ni gubin ngiyal’ ma be cham ko tin ni manang lanin’med ni ir e ba fel’. Gimed ba adag bogi ban’en, machane dabiyog ni nge yog ngomed, ma aram mi gimed ngongliy rogomed ni ngam thanged e pogofan ku be’, ma gimed be chogownag bogi ban’en, machane dabiyog ni nge yog ngomed, ma aram mi gimed luluag e thin ngam chamgad.” Ma faan gimed ra ning ngak ma der pi’ ngomed ni bochan e ba kireb e tin ni gimed be finey ngay; ma gimed be ning bogi n’en ngak ni ngam fanayed ko tin nib kireb ni ir e gimed be yim’ ni bochan.

17. Uw rogon ma immoy e “cham” nge “magawon” u lan e ulung ko Kristiano u nap’an e bin som’on e chibog?

¹⁷ In e chibog u tomren ni yim’ James, ma pi Kristiano ni googsur e kar m’aged e mahl ngorad mar lied yad ngar m’ad. Machane ke yol James ngak e girdi’ u nap’an e bin som’on e chibog ni yad “fare Israel rok Got,” ni ke l’agan’rad ni ngar manged ‘pi prist nge pilung’ u tharmiy. (Revelation 20:6) Dar lied yad ngar m’ad ko cham ara mahl nriyul’. Ere mang fan ni weliy James morngaagen e pi n’en nem ko pi Kristiano? Ya yog apostal John ni en ni be fanenikay walagen e ir be’ ni ma thang e fan ko girdi’. Ma Paul e ke weliy u morngaagen e magawon u thilin e girdi’ u lan e ulung ni aram bod e “cham” nge “magawon.” (Titus 3:9; 2 Timothy 2:14; 1 John 3:15-17) Ere n’en ni yog James e taareb rogon yab sor fan ko t’ufeg ni dariy u thilin e pi Kristiano. Ya pi Kristiano nem e ur ngongolgad ni bod e girdi’ nu fayleng u rogon e ngongol rorad ngorad.

18. Mang e rayog ni nge sor iyan ko ngongol nge lem ndariy e t’ufeg riy ko pi Kristiano?

¹⁸ Mang fan ni ke buch e pi n’en ni aram rogon u lan e ulung ko Kristiano? Ya bochan e lem nde yal’uw, ni bod e chogow nge “ar’ar ko tin nde yalen.” Tolangan’ nge awan’ nge ufanthin e rayog ni nge ruw raba’nag fare ulung i walag ko Kristiano me kirebnag e t’ufeg riy. (James 3:6, 14) Lem ni aram rogon e ra n’igin ngan m’ag fager ko fayleng, ma aram min mang toogor rok Got. Dariy be’ ni bay e lem rok ni aram rogon ni rayog ni nge par ni ir bang ko ulung rok Got.

19. (a) Mini’ e kireb rok nfaanra pirieg reb e Kristiano ni be sum e lem nde yal’uw u laniyan’? (b) Uw rogon nrayog ni nge gel e Kristiano ko lem nde yal’uw?

¹⁹ Mini’ e rayog ni ngad dogned ni ir e ke n’igin ni nge kireb e lem rodad? Satan? Arrogon boch. Ya ir “e pilung rok e pi kan nu lan e lang” ko re fayleng ney, ma goo ke garer iyan e lem ni aram rogon. (Efesus 2:1, 2; Titus 2:12) Machane baga’ ni sum e lem nib kireb u fithik’ i dowdad ni de flont. Tomren ni ke ginangey James u morngaagen e m’ag fager ko fayleng e yoloy ni gaar: “Dab mfineyed ndariy fan e re bugithin ni baaray ni bay u lan e babyor nib thothup ni be gaar, ‘Re lem ni bay u fithik’dad e yug be yim’ ni bochan e awan’?” (James 4:5, NW) Gad gubin ma gad be taga’ ko tin nib kireb ban’en. (Genesis 8:21; Roma 7:18-20) Machane rayog ni ngad togopuluwgad ngay nfaanra gad ra nang u wan’dad ni gad mmeewar ma gad taga’ nga daken Jehovah ni nge ayuwegdad ngad gelgad ngay. I gaar James: “Ya ayuw ni ma pi’ Got ngodad e rib gel [ko awan’].” (James 4:6) Ke magar Got ye pi’ e kan ni thothup rok miki pi’ e pi walag ni Kristiano, nge fare biyul ni pi’ Jesus, ma aram rogon ma tin ni be meewar e pi Kristiano nib yul’yul’ riy e de gel ngorad. (Roma 7:24, 25) Yibe ayuwegrad ko riya’ u lan e ulung rok Got, ko pi fager rok Got ma gathi fayleng.

20. Mang boch e taw’ath ni bay ko piin ni yad bang ko ulung rok Got?

²⁰ I micheg e Bible ni gaar: “Ra pi’ Jehovah gelngin ngak e girdi’ rok. Ra flaabnag Jehovah e girdi’ rok mar pared u fithik’ e gapas.” (Psalm 29:11) Faanra rriyul’ ni gad bang ko “nam” rok Jehovah ko ngiyal’ ney, ni ulung rok u fayleng, ma aram e ra yib gelngin ngodad ma gad ra par nib gapas lanin’dad ya aram e taw’ath rok ngak e girdi’ rok. Rriyul’ ni fayleng rok Satan e kab baga’ ko ulung rok Jehovah u fayleng, ma kab gel ngodad. Machane Jehovah e ir e An Th’abi Gel Gelngin. Dabiyog ni ngan gel nga gelngin. Maku bay e pi engel rok nib yargel ni gad be pigpig u taabang ku Got. Ere, yugu demtrug ni yibe fanenikaydad, ma rayog ni ngad pared nib mudugil. Bod Jesus, ma rayog ni ngad gelgad ko fayleng.​—John 16:33; 1 John 4:4.

Rayog ni Ngam Weliy?

◻ Be mang fare ulung rok Got u fayleng?

◻ Uw rogon ni ma ayuweg e ulung rok Got e girdi’ ko riya’?

◻ Chon mini’ e yad bang ko ulung rok Got?

◻ Uw rogon nrayog ni ngad siyeged i m’ag fager ko fayleng?

[Kahol ko page 19]

Mang e Ulung Rok Got?

U lan e pi babyor ko Pi Mich Rok Jehovah ma fare thin ni “ulung rok Got” e yibe fanay u dalip e kanawo’.

1 Ulung rok Jehovah u tharmiy e aram e pi kan nib yul’yul’. Kan pining “Jerusalem nu lang” ngay u lan e Bible.​—Galatia 4:26.

2 Ulung rok Jehovah u fayleng. Ngiyal’ ney ma aram e tin ni ka bay girdien fachi ulung nge fare ulung ni baga’.

3 Ulung rok Jehovah u palpal th’ib. Ngiyal’ ney ma aram e ulung rok Jehovah u tharmiy nge girdi’ u fayleng ni kan dugliyrad ni yad pi fak Got ma be l’agan’rad ko par u tharmiy. Munmun ma ku ra un ngay e pi girdi’ u fayleng ni yad ba flont.

[Sasing ko page 20]

Fa bin th’abi fel’ e ggan nib spiritual e be yib rok fare ulung rok Jehovah