Ga Be Fol u Rogon ni Be Pow’iydad e Ulung rok Jehovah, Fa?

1. Mang e re ulung ni yan nga lon fare nam nu Israel kakrom mar feked fithingan Jehovah? (Mu guy e sasing ni bay u tabolngin e re article ney.)

JEHOVAH e ir e sunmiy e ulung ni Kristiano u nap’an e bin som’on e chibog, maku ir e ke ayuweg e bin riyul’ e liyor ni nge sul nga rogon. Kad weliyed ko fa binem e article ni ulung ko tin som’on i gachalpen Kristus e ir e yan nga lon fare nam nu Israel ni bochan e kar chelgad kar togopuluwgad ko bin riyul’ e liyor, maku aram e re ulung ni fek fithingan Jehovah. Biney e ulung nib beech mab fel’ u wan’ Got e ir e magey u nap’an nni gothey yu Jerusalem ko duw ni 70 C.E. (Luke 21:20, 21) Pi n’em ni buch ko bin som’on e chibog e bay rogon ko pi n’en nra buch ko pi tapigpig rok Jehovah e ngiyal’ ney. Dabki n’uw nap’an min thang e m’ag rok Satan, machane ulung rok Got e ra magey u tungun e tin tomuren e rran. (2 Tim. 3:1) Uw rogon nrayog ni nge pagan’dad ko re n’ey?

2. Mang e yog Jesus u murung’agen fare “gafgow” nib ga’, ma uw rogon nra tabab?

² I weliy Jesus murung’agen e ngiyal’ ni bay riy nge ngiyal’ ni ke chugur nga tungun e re m’ag ney ni gaar: “Ya gafgow ko re ngiyal’ nem e ri kab mal’af ni kab gel e gafgow riy nga reb e gafgow ni kaa yib, ni ka nap’an ni sum e fayleng nge mada’ ko bin daba’ e rran, fa ki yib reb e gafgow ntaareb rogon ngay.” (Matt. 24:3, 21) Ra tabab e re gafgow nib ga’ ney u nap’an nra fanay Jehovah e pi am ni nge thang “fare Babylon nib Gilbuguwan” ara pi yurba’ i teliw ni googsur u fayleng. (Rev. 17:3-5, 16) Mang e migid nra buch?

CHAM NRA TAY SATAN E IR E RA K’ARING NI NGE TABAB E ARMAGEDDON

3. Tomuren ni kan thang e pi yurba’ i teliw ni googsur, ma mang e yira guy rogon ni ngan rin’ ko girdi’ rok Jehovah?

³ Tomuren ni kan thang e pi yurba’ i teliw ni googsur, ma aram e ngiyal’ nra cham Satan nge re fayleng rok ney ko pi tapigpig rok Jehovah. Bod ni ke yiiynag e Bible murung’agen “Gog . . . u daken e but’ nu Magog” ni gaar: “Ir nge salthaw rok nge boch e nam nib yoor ni yad muun ngak e bay ra chamgad ni bod bangi yoko’ ngar upunguyed fare binaw ni bod bang i manileng.” Bochan ndariy e salthaw ko Pi Mich Rok Jehovah ma yad boch e girdi’ u roy u fayleng ni yad ma par ni yad ba gapas, ma ra m’ug ni gowa ba mom ni ngan cham ngorad. Machane, rib oloboch e piin ni yad ra cham ngorad!​—Ezek. 38:1, 2, 9-12, BT.

4, 5. Mang e ra rin’ Jehovah u nap’an nra guy Satan rogon ni nge thang owchen e pi tapigpig rok?

⁴ Mang e ra rin’ Got u nap’an nra guy Satan rogon ni nge thang owchen e girdi’ rok? Ra cham Jehovah ni pa’rad, me maruwel nga mat’awun ni ir e Th’abi Tolang u Ga’ngin e Palpalth’ib. Rogon u wan’ Jehovah e faan yira cham ko pi tapigpig rok ma gowa ir e kan cham ngak. (Mu beeg e Zekariah 2:8.) Ere, ra rin’ e Chitamangidad ni bay u tharmiy boch ban’en ni nge ayuwegdad. Ma aram e ngiyal’ ni yira thang e re fayleng rok Satan ney u nap’an fare mahl ni Armageddon, ni aram fare “mahl ni fan ko fare rran ni ba ga’ fan, ni Rran rok Got ni Gubin ma Rayog Rok.”​—Rev. 16:14, 16.

⁵ Be yiiynag e Bible murung’agen e Armageddon ni gaar: “‘Ma Somol e bay e n’en ni nge pufthinnag ko pi nam. Ra fek gubin e girdi’ ko pufthin ma thang mit e piin kireb. I Somol e be non.’ I Somol ni Gubin ma Rayog Rok e be yog ni riya’ ni nge yib nge aw nga reb e nam nge reb, nge bang i yoko’ nib gel e ke kunuy ir u gubin yang u taban e fayleng. Ra yan i rofen nem ma downgin e piin ni ke li’rad Somol e ba wer u daken e fayleng ni tabab u baley nge mus nga baley. Dariy be’ nra tayam’nagrad, ma dab ni k’eyagrad. Bay ra pired u daken e but’ ni bod ba ulung i t’ay e gamanman.” (Jer. 25:31-33, BT) Armageddon e aram e n’en nra chuweg e re m’ag nib kireb ney. Yira chuweg e fayleng rok Satan, machane ra magey e ulung rok Jehovah u fayleng.

FAN NI BE MON’OG E ULUNG ROK JEHOVAH E NGIYAL’ NEY

6, 7. (a) Uw e ra yib fapi girdi’ riy ni ke “muulung ni pire’ ni pire’”? (b) Uw rogon ni ke ga’ e ulung rok Got u lan fapi duw ni ka fini yan?

⁶ Be mon’og e ulung rok Got e ngiyal’ ney ni bochan e girdi’ riy e yad be par ni yad ba fel’ u wan’ Got. Be micheg e Bible ngodad ni gaar: “Somol e ke yiluy e changar rok ngak e piin ni yad mmat’aw ma gubin ngiyal’ ni ma rung’ag e meybil rodad.” (1 Pet. 3:12) Piin ni yad ba mat’aw e ba muun ngay e “girdi’ ni ke muulung ni pire’ ni pire’” ni “kar thapgad ngaray u fithik’ fare gafgow ni ba ga’.” (Rev. 7:9, 14) Pi girdi’ ney e gathi kemus ni yad bogi ‘girdi’ ni kar muulunggad’ nga taabang, ya yad e “girdi’ ni ke muulung ni pire’ ni pire’.” Ere gur, rayog ni ngam susunnagem ni ga bay rorad ma kam mageygad ni gimed ba fas u nap’an “fare gafgow ni ba ga’”?

⁷ Ere, uw e ra yib girdien fare ulung nib ga’ riy? Kar bad nga taabang ni bochan e n’en ni ke yiiynag Jesus ni aram bang ko pow ko ngiyal’ ni bay riy. I yog ni gaar: “Re Thin rok Got ney Nib Fel’ ni murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matt. 24:14) Ireray e re maruwel nth’abi ga’ ni be rin’ e ulung rok Got e ngiyal’ ney ko tin tomuren e rran. Bochan e machib ni be tay e Pi Mich Rok Jehovah u ga’ngin yang e fayleng ma bokum milyon e girdi’ ni kar filed rogon ni ngar pigpiggad ngak Got u daken gelngin nib thothup “ngu fithik’ e yul’yul’.” (John 4:23, 24) Bod ni nap’an e duw ni 2003 nge yan i mada’ ko duw ni 2012 ma ba pag 2,707,000 e girdi’ ni kan taufenagrad ni be m’ug riy ni kar ognaged yad ngak Got. Chiney e ke pag 7,900,000 e Pi Mich Rok Jehovah u ga’ngin yang e fayleng, maku bokum milyon e girdi’ ni yad ma chag ngorad nib ga’ nu nap’an fare Puguran ni yima tay u gubin e duw. Darud ufgad ni bochan urngidad, ya “Got e be pi’ gelngin [urngin ban’en] be ga’.” (1 Kor. 3:5-7) Machane, be m’ug ni be yoor i yan girdien e re ulung ney u gubin e duw.

8. Mang fan nib papey ni be ga’ e ulung rok Jehovah e ngiyal’ ney?

⁸ Ba papey ni be yoor e pi tapigpig rok Got ni bochan e be ayuwegrad Jehovah. (Mu beeg e Isaiah 43:10-12.) Ireray e n’en ni kan yiiynag ko pi thin ni baaray ni gaar: “Mus ko re tabinaw nib th’abi lich e girdi’ riy ma ba sobut’ ni bay ra pired ni bod ba nam ni ba ga’ ma ba gel.” (Isa. 60:22) Immoy ba ngiyal’ ni yan i par e piin ni ke magey ko girdien fachi ulung ni kar boded bochi “tabinaw nib th’abi lich e girdi’ riy,” machane faani munmun mu kur yoorgad bayay ni bochan e ke yib boch e girdi’ nga lan e ulung rok Got ni yad ba muun ko re ulung ney. (Gal. 6:16) U lan e pi duw ni ke yan ma ke yoor i yan e girdi’ ni kar manged girdien fare ulung nib ga’ ni bochan e be tow’athnagrad Jehovah.

N’EN NI BAADAG JEHOVAH NI NGAD RIN’ED

9. Mang e thingar da rin’ed ni faanra gad baadag ni nge yag ngodad e pi n’en ni kan micheg ko Thin rok Got?

⁹ Demtrug ko gad ba muun ko pi Kristiano ni kan dugliyrad ara gad bang ko fare ulung nib ga’, ma rayog ni nge yag ngodad e pi n’en ni kan micheg ko Thin rok Got. Machane, faanra nge yag e pi tow’ath ney ngodad mab t’uf ni ngad folgad ko pi motochiyel rok Jehovah. (Isa. 48:17, 18) Mu lemnag fare Motochiyel ni pi’ Got ngak piyu Israel. Reb i fan ni pi Got e re Motochiyel nem ngorad e bochan ni nge ayuwegrad ni nge par e tabinaw rorad nib felfelan’ me yag e fager nib fel’ ngorad, miki ayuwegrad ni ngar yul’yul’gad ko siyobay rorad, mar golgad ko girdi’. (Ex. 20:14; Lev. 19:18, 35-37; Deut. 6:6-9) Ku arrogodad ni faan gad ra fol ko pi motochiyel rok Got ma ra yib angin ngodad, ma gad manang nde mo’maw’ ni ngad rin’ed e tin nib m’agan’ ngay. (Mu beeg e 1 John 5:3.) Bin riyul’ riy e, faanra ud folgad ko pi motochiyel nge pi kenggin e motochiyel rok Jehovah Got ma gathi kemus nra ayuwegdad ndabi buch ban’en rodad, ya ku ra ayuwegdad ni ‘nge mich Kristus u wun’dad nib fel’ rogon’ ni bod rogon fare Motochiyel ni i ayuweg piyu Israel kakrom.​—Titus 1:13.

10. Mang fan ni ngaud ted e tayim ni fan ko fol Bible ni goo gadad nge Fol Bible ni Tabinaw u gubin e wik?

¹⁰ Boor kanawoen ni be mithmith e ulung rok Jehovah u fayleng i yan nga m’on. Reb e kanawo’ e be ga’ i yan e tamilangan’ rodad ko tin riyul’ u Bible. Ma gad manang nra buch e re n’ey ni bochan e “fare pa’ i kanawo’ ni ma yan e girdi’ nib mat’aw u daken e bod e yal’ ni nge m’ug, ni be ga’ raen i yan nge mada’ ko ngiyal’ ni kari rran.” (Prov. 4:18, BT) Machane, rayog ni ngad fithed gadad ni nge lungudad: ‘Gu manang e pi n’en ni kan thilyeg u rogon ni kad nanged fan boch e thin nu Bible, fa? Gu ma beeg e Bible ni gubin e rran, fa? Gu ma athamgil ni nggu beeg e pi babyor rodad ni ka fin nni ngongliy, fa? Gamad ma tay chon e tabinaw rog e Fol Bible ni Tabinaw u gubin e wik, fa?’ Pi n’ey e gathi bogi ban’en nib mo’maw’ ni ngan rin’, machane ba t’uf ni ngan tay e tayim ni ngan rin’ riy. Kub ga’ fan ni ngad ululgad i fil e thin rok Got ni bay u lan e Bible, ma gad fol riy, ma gad mon’og ko tirok Got ban’en. Ma rib ga’ fan ni ngad rin’ed e re n’ey e chiney ni be chugur i yib fare gafgow nib ga’!

11. Mang boch e kanawo’ ni ma ayuweg e pi muulung, nge pi assembly, nge convention e pi tapigpig rok Got e ngiyal’ ney ni bod rogon e pi madnom ni i tay e girdi’ rok Got kakrom?

¹¹ Be pi’ e ulung rok Jehovah e athamgil nga lanin’dad ni ngad folgad ko fare fonow rok apostal Paul ni gaar: “Nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad, ngari gel ni fan e gimed be guy ni Chirofen ni bay yib Somol riy e be chugur.” (Heb. 10:24, 25) Pi madnom nge muulung ni i tay piyu Israel u gubin e duw ni fan ko liyor rorad ngak Got e i ayuwegrad ni ngar pared ni yad ba gel ko tirok Got ban’en. Fare Madnom ko Nochi Naun ni un tay u nap’an Nehemiah e aram reb e madnom nib gel e felfelan’ ni un tay riy kakrom. (Ex. 23:15, 16; Neh. 8:9-18) Ku ireray e n’en ni gad ma rin’ u nap’an e pi muulung, nge pi assembly, nge convention ni gad ma tay e ngiyal’ ney. Ere, ngad athamgilgad ni ngaud uned ko pi muulung ney ya nge yag ni ayuwegdad ni ngad pared ni gad ba gel ko tirok Got ban’en ma gad ba felfelan’.​—Titus 2:2.

12. Susun ni nge uw rogon u wan’dad fare maruwel ni ngan machibnag fare thin nib fel’ u murung’agen Gil’ilungun Got?

¹² Bochan ni gadad girdien e ulung rok Got, ma gad ba felfelan’ ni ngad uned i rin’ fare ‘maruwel . . . ni gad be machibnag e Thin Nib Fel’ ni yib rok Got.’ (Rom. 15:16) Bochan ni gad be un ko re “maruwel” ney ma gad be ‘maruwel Got u taabang’ ni ir Faen nib “thothup.” (1 Kor. 3:9; 1 Pet. 1:15) Gad ra machibnag fare thin nib fel’ ma aram e ku gad be tayfan fithingan Jehovah nib thothup. Ma ri gad ba tow’ath ni ngad uned i machibnag fare Thin Nib Fel’ ni yib rok fare Got nib felfelan’.​—1 Tim. 1:11.

13. Ra nge par e yafas rodad nib fel’ ma gad par ni gad ba gel ko tirok Got ban’en, ma mang e thingar da rin’ed?

¹³ Baadag Jehovah ni ngad pared ni gad ba chugur ngak nge ulung rok ni bochan e nge yag nda pared ni gad ba gel ko tirok ban’en. I yog Moses ngak piyu Israel ni gaar: “Chiney e kug taymed ni ngam dugliyed ko yafos e nge yib ngomed fa yam’, fa nge fal’eg Got waathmed fa nge bucheg waathmed. Nggu non ko tharmiy nge fayleng ni ngar mangew mich ko bin ni bay mu turguyed ni ngeb ngomed. Mu turguyed e yafos ni ir e nge yib ngomed. Nge t’uf romed Somol ni Got romed, um folgad rok ma gimed be par ni gimed ba yul’yul’ ngak, ni fan e gimed nge piin ni owchemed e nge yog ni mpired nib n’uw nap’med u lan e re nam ni baaram ni micheg ngak pi chitamangimed ni kakrom ni bayi pi’ ngorad, ni aram Abraham nge Isak nge Jakob.” (Deut. 30:19, 20) Ra par e yafas rodad nib fel’ ni faan gad ra rin’ e tin nib m’agan’ Jehovah ngay, me t’uf rodad, ma gad fol rok, ma gad par ni gad ba chugur ngak.

14. Uw rogon e ulung rok Got u fayleng u wan’ reb e walag ni pumoon?

¹⁴ Brother Pryce Hughes ni i par nib yul’yul’ ko ulung rok Got ma i fol u rogon ni be pow’iy e yoloy ni gaar: “Ri gub felfelan’ ni kug fil murung’agen e tin nib m’agan’ Jehovah ngay u m’on ko duw ni 1914 . . . Ban’en nrib ga’ fan ni kug fil e aram e thingar gu par ni gub chugur ko ulung rok Jehovah. Pi n’en ni ke buch rog u m’on riy e kug fil riy nde puluw ni nggu taga’ ko pi n’en ni ma lemnag e girdi’. Ere, kug dugliy u wan’ug ni nggu par ko ulung rok Got, ya kemus rogon nrayog ni nge par be’ nib fel’ u wan’ Jehovah min tow’athnag.”

NGAUM FOL U ROGON NI BE POW’IYEM E ULUNG ROK GOT

15. Mu weliy ban’en ni ke buch ni bay u Bible ni be dag rogon nsusun e ngad lemnaged e pi n’en ni kan thilyeg u boch e machib rodad.

¹⁵ Faanra ngad fel’gad u wan’ Jehovah me tow’athnagdad, ma thingar da ayuweged e ulung rok ma gad fol ko pi n’en ni kan thilyeg u boch e machib rodad. Am lemnag e re n’ey: Tomuren ni yim’ Jesus, ma bokum biyu’ e pi Kristiano ni Jew ni yad ma fol ko fare Motochiyel mab mo’maw’ ni ngar paged. (Acts 21:17-20) Machane, bochan bangi babyor ni pi’ Paul ngak piyu Hebrew ma aram e n’en ni ayuwegrad ni nge tamilang u wan’rad ni gathi kar thothupgad ni bochan e maligach ni “yibe pi’ nrogon ni be yog e Motochiyel” ya kar thothupgad ni “bochan fare maligach ni pi’ [Jesus] ni aram downgin, nri taab yay ma aram e ke mus.” (Heb. 10:5-10) Dariy e maruwar riy ni yooren e pi Kristiano nem e kar folgad ko re fonow ney mar thilyeged rogon ni yad be lem. Ku arrogodad nib t’uf ni ngad filed e thin rok Got nib fel’ rogon me m’agan’dad ko pi n’en ni kan thilyeg u boch e machib rodad nge rogon e machib ni gad be tay.

16. (a) Mang boch e tow’ath nrib manigil nra yag ngodad u lan e bin nib beech e fayleng? (b) Mang reb e tow’ath ni ga be athapeg ni nge yag ngom u lan e bin nib beech e fayleng?

¹⁶ Gubin e piin ni yad ra par ni yad ba yul’yul’ ngak Jehovah nge ulung rok e yira tow’athnagrad. Piin ni kan dugliyrad e yad ra un ngak Kristus ko gagiyeg u tharmiy. (Rom. 8:16, 17) Ma faanra gad be athapeg e par u fayleng, ma ri gad ra felfelan’ ko par ni gad ra tay u Paradis. Bochan ni gad bang ko ulung rok Jehovah e ngiyal’ ney ma rib gel e felfelan’ ni gad be tay ni gad be un i weliy ko girdi’ murung’agen e bin nib beech e fayleng rok Got. (2 Pet. 3:13) Be gaar e Psalm 37:11: “Piin ni yad mmunguy e bay ra pired u daken e nam u fithik’ e gapas, mu ur pired u fithik’ e gapas ni yad ba felfelan’.” Ra toy e girdi’ e “naun mi yad par u lan” mar felfelan’gad ko “pi n’en ni kar muruwliyed.” (Isa. 65:21, 22) Ra chuw e gafgow, ma dabki yim’ e girdi’ ko bilig, ma dab kun gafgownag e girdi’. (Ps. 72:13-16) Ra taw ko ngiyal’ nem ma dabkiyog ni nge bannag fare Babylon nib Gilbuguwan e girdi’, ya kan thang. (Rev. 18:8, 21) Yira faseg e piin ni kar m’ad mar pared ndariy n’umngin nap’an. (Isa. 25:8; Acts 24:15) Rib manigil e pi tow’ath ni bay ni fan ngak bokum milyon e girdi’ ni kar ognaged yad ngak Jehovah! Faanra nge yag e pi tow’ath ney ngodad ni ke micheg e Bible, ma thingar da athamgilgad ni ngad mon’oggad i yan ko tirok Got ban’en, ma gad fol u rogon ni be pow’iydad e ulung rok, mu kud folgad ko pi n’en ni yibe thilyeg riy.

17. Susun ni nge uw rogon e ulung rok Jehovah u wan’dad nge liyor ni gad be tay ngak?

¹⁷ Chiney ni be chugur e tomur i yib e thingar da pared nib mudugil e michan’ rodad ma gad dag nib ga’ fan u wan’dad e pi n’en ni be pi’ Got ni fan ko liyor ni gad be tay ngak. Aram rogon e lem rok David ni ir e yoloy e Psalm ni faani gaar: “Kug wenignag taa ban’en ngak Somol; taa ban’en e gub adag, ni aram e nggu par u lan e naun rok Somol u n’umngin nap’an e yafos rog, me felan’ug nga feni fel’ Somol, mu gu wenig ngak u rom ni ngi i pow’iyeg.” (Ps. 27:4) Manga yugu da pared ni gad ba chugur ngak Got, ma gad be fol u rogon ni be pow’iydad e ulung rok.