PI DEER NI BAY E FULWEG RIY U BIBLE

Mini’ e riyul’ ni be gagiyegnag e fayleng?

Boor e girdi’ e yad ma lemnag ni bin riyul’ e Got e be gagiyegnag e fayleng. Machane, faanra riyul’ e re n’ey, ma mang fan ni ke yoor e kireb u fayleng? (Deuteronomy 32:4, 5) Rogon ni be tamilangnag e Bible, e be’ nib kireb e ir e be gagiyegnag e fayleng.​—Mu beeg e 1 John 5:19.

Uw rogon ni ke yag rok be’ nib kireb ni nge gagiyegnag urngin e girdi’? Som’on ko tabolngin ni sunmiy Got e girdi’, ma immoy reb e engel ni togopuluw ngak Got miki n’igin e gal som’on e girdi’ ni ngkur togopuluwgow ngak Got. (Genesis 3:1-6) Ma aram mar dugliyew ni ngar folgow ko n’en ni yog e re engel nem ni aram Satan, ma aram me par ni ke gagiyegnagrow. Got ni Gubin Ma Rayog Rok e ir e en ni bay mat’awun ni nge Gagiyeg, machane baadag Got ni nge mel’eg e girdi’ e birok e gagiyeg ya bochan nib t’uf rorad. (Deuteronomy 6:6; 30:16, 19) Machane, rib gel e kireban’ riy ya ki bannag Satan yooren e girdi’ ni ngkur togopuluwgad ngak Got ni bod e gal som’on e girdi’.​—Mu beeg e Revelation 12:9.

Mini’ e rayog ni nge chuweg e pi magawon ko girdi’?

Gur, ra pag Got Satan ni nge ulul ko gagiyeg? Danga’! Ya ra fanay Got Jesus ni nge chuweg e girdi’ u tan e gagiyeg rok Satan.​—Mu beeg e 1 John 3:8.

Ra pi’ Got gelngin Jesus ni nge thang Satan. (Roma 16:20) Ma aram e ra gagiyegnag Got e girdi’ ni ngkur felfelan’gad me gapas e yafas rorad ni bod e n’en ni lemnag ko som’on.​—Mu beeg e Revelation 21:3-5.