Nap’an ni be gagiyeg Got ma urngin e tin ke sunmiy e ur pared nib taareban’rad ma yad ba gapas

Mang Fan nib T’uf Gil’ilungun Got Rodad?

Nap’an nni sunmiy e gal nsom’on e girdi’, ma yigoo Jehovah ni ir e En ni Sunmiydad e Ir e Be Gagiyeg. I gagiyeg u fithik’ e t’ufeg. I ngongliy rogon ba milay’ nrib fel’ yaan ni ka nog yu Eden ngay ni nge par e girdi’ riy, me pi’ e ggan ni boor ni ngar ked. Ngemu’ miki pi’ e maruwel ni ngar rin’ed nra yib angin. (Genesis 1:28, 29; 2:8, 15) Faan gomanga fol e girdi’ u rogon ni i gagiyegnagrad Got u fithik’ e t’ufeg, ma ka yad be par u fithik’ e gapas ke mada’ ko chiney.

Yaan Adam ni be kol wom’engin fare ke gek’iy ni ke pi’ Efa ngak ni ka nog ngorow ndab ra kew. — Ke togopuluw e gal nsom’on e girdi’ ngak Got ni Ir e i Gagiyegnagrow

Be yog e Bible ni bay reb e engel ni chel nge togopuluw nga mat’awun e gagiyeg rok Got. Boch nga tomuren mu unog Satan ni Moonyan’ ngak. I yog nra felfelan’ e girdi’ ni faanra gathi Got e be pow’iyrad maku gathi ir e be gagiyegnagrad. Ba gel e kireban’ riy, ya gal ga’ rodad ni Adam nge Efa e ra awgow ko ban rok Satan, mar unew ngak ngar togopuluwgad ngak Got.—Genesis 3:1-6; Revelation 12:9.

Bochan ni togopuluw Adam nge Efa ngak Got ni Ir e Be Gagiyegnagrow, ma aram me mul fare Paradis u pa’row ni aram taferow ni kan pi’ nge athap rorow ni ngar parew ni yow ba flont ndariy n’umngin nap’an. (Genesis 3:17-19) N’en nra dugliyew e ki yib wenegan ko bitir nra fakayew boch nga tomuren. Be yog e Bible ni bochan ni denen Adam, ma aram me ‘yib e denen nga fayleng ma denen ni ngongliy e fek e yam’ i yib.’ (Roma 5:12) Ku bay reb i wenegan e denen ni aram e: “Fayleng [e par] ni bay boch e girdi’ riy nib gel gelngirad ma boch e be gafgow u tan pa’rad.” (Eklesiastes 8:9, BT) Re n’ey e be yip’ fan ni faanra girdi’ e yad be gagiyegnaged yad, ma aram e boor e magawon nra i sum.

KE TABAB E GIRDI’ KO GAGIYEG

Yaan Nimrod ni ke sak’iy nib tolangan’ e changar rok. Bay yaan e girdi’ u fiti keru’ ni yad be toy reb e naun nib ga’. — Ke togopuluw Nimrod ngak Jehovah

En som’on ni tabab ko gagiyeg u fayleng ni bay murung’agen u Bible e aram Nimrod. I togopuluw ma be dag ndabun ni nge gagiyegnag Jehovah e girdi’. Ka nap’an Nimrod ni girdi’ nib ga’ lungurad e yad ma fanay mat’awrad u boch e kanawo’ nib kireb. Sogonap’an 3,000 e duw ni ke yan, me yoloy Solomon ni Pilung ni gaar: “Piin ka ni gafgownagrad e yad be yor, ma dariy be’ nra ayuwegrad. Dariy be’ nra ayuwegrad ni bochan e piin ni be gafgownagrad e yad e bay gelngirad.”—Eklesiastes 4:1, BT.

Ka taab n’en e gad be guy ni be buch e ngiyal’ ney. Nap’an e duw ni 2009, me yog ba ken e babyor ko fare ulung ni ka nog e United Nations ngay ni be munmun ma be tamilang i yan ni “boor e pi magawon u fayleng e ngiyal’ ney ni be sum” ni bochan e gagiyeg ni yibe tay nib kireb rogon.

KE TAW NGA NAP’AN NI NGAN RIN’ BAN’EN!

Ba t’uf boch e pilung nge reb e am ni kab fel’ boch ni nge gagiyegnag e re fayleng ney. Ma ireray e n’en ke micheg e En Ke Sunmiydad!

Bogi sasing ni bay u taabang: Wenegan e gagiyeg ni be tay e am ko girdi’. 1. Reb e ppin u Asia ni ke par nga but’ u lan ba kanawo’ nib alit ni ke dibey fak ni be yor. 2. Be’ nib pumoon ni ke pilibthir ni bay u daken bangi bet u aspital nib m’ar. 3. Pi salthaw ni yad be chubeg e boyoch rorad u nap’an e mahl. 4. Boch e girdi’ ni kar damumuwgad ma yad be togopuluw ko am e yad be meyngar ma yad be kol yungi babyor ni bay e thin riy. 5. Be’ nib pin nge bochi pin ni fak ni yow ba sak’iy u wuru’ e naun rorow ma yow be guy e winda rorow ni ke bilig be’. 6. Reb e mach ni ke paath’ath daken ma bay e seng ko gamig ni yan u baley nga baley. — Mus ko tin th’abi fel’ e am ko girdi’ nder yag rorad ni ngar pithiged boch e magawon nib ga’ ni be mada’nag e girdi’

Ke sunmiy Got Gil’ilungun ara reb e am ni ir e ra yan nga lon e gagiyeg ni be tay e girdi’, ma ra “par ndariy n’umngin nap’an.” (Daniel 2:44) Ireray e re Am ni be yibilay bokum milyon e girdi’ ni nge yib. (Matthew 6:9, 10) Machane, gathi yigoo Got e ra gagiyeg ko re am ney. Ya ke mel’eg be’ ni immoy ba ngiyal’ nib girdi’ ni ir e nge mang Pilung riy. Mini’ e cha’nem ni ke mel’eg Got?