Ngam Par Ni Ga Be Fol Ko Ulung Rok Jehovah

“I Got ni ir e Got ko gapas e nge pi’ ngomed urngin e tin nib fel’ ni nge yog ngomed nge yog ni mu rin’ed e tin nib m’agan’ ngay.”​—HEBREWS 13:20, 21.

1. Uw urngin e girdi’ u fayleng, ma in e kan theegrad ni yad bang ko pi yuraba i teliw?

ULAN fare duw ni 1999, ma ke taw ko nel’ bilyon oren e girdi’ u fayleng! Ke dag fare babyor ni The World Almanac ni sogonapan 1,165,000,000 riy e yad e Muslim; ma 1,030,000,000 riy e yad e Roman Katolik; ma 762,000,000 riy e yad e Hindu; ma 354,000,000 riy e yad e Buddhist; ma 316,000,000 e yad e Protestant; ma 214,000,000 e yad e Orthodox.

2. Mang e rayog ni nga nog u murung’agen rarogon e pi yuraba i teliw e chiney?

² Bochan ni be par ni de taareban’rad ma ke wagey e pi yuraba i teliw e chiney, gur rayog ni nge taareban’ e pi girdi’ ney ni bokum milyon ni ngar rin’ed e tin nib m’agan’ Got ngay? Danga’, “ya Got, e gathi ir ba Got ni de yaram, machane ba gapas.” (1 Korinth 14:33, New World Translation) Machane, uw ra rogon e pi tapigpig rok Jehovah u ga’ngin yang e fayleng ni yad walag? (1 Peter 2:17) Ran yaliy nib fel’ rogon ma rayog ni ngan gu’ ni ‘Got ni ir e Got ko gapas e nge pi’ ngorad urngin e tin nib fel’ ni nge yog ni ngar rin’ed e tin nib m’agan’ ngay.’​—Hebrews 13:20, 21.

3. Mang e ke buch u Jerusalem u nap’an e Pentecost 33 C.E., ma mang fan?

³ Riyul’, ni gathi bochan oren e girdi’ ni ma un ko Pi Mich rok Jehovah e yira turguy riy ni yad ba fel’ u wan’ Got; ara fan ni yad be yoor i yan e ra falfalan’ag Got. De mel’eg Got piyu Israel nbochan e “yad e th’abi pire’ ” ko girdien yugu boch e nam. Tin nib riyul riy, e “yad e th’abi achig” u fithik’ urngin e nam. (Deuteronomy 7:7) Machane bochan ni de par piyu Israel nib yul’yul’ ku Got, ma nap’an e Pentekost 33 C.E. me pagrad Jehovah me tababnag fare ulung nib biech ni pi gachalpen Kristus e ma un ngay ni kar fel’gad u wan’. Yad e piin ni kan dugliyrad ko kan ni thothup rok Jehovah ma yad ma machibnag fare thin riyul’ u murung’agen Got nge Kristus ngak yugu boch e girdi’ ni yad ba pasig.​—Acts 2:41, 42.

Yibe Mon’og Iyan

4. Mang fan ni nga mog ni fare ulung ni Kristiano kakrom e be mon’og iyan?

⁴ Nap’an e bin som’mon e chibog, ma be mon’og iyan e ulung ko Kristiano, ma ur binged boch e territory nib biech, ma yad ma pingeg e girdi’ nib biech ni ngar manged pi gachalpen Jesus, ma be mon’og i yan e tamilangan’ rorad u murung’agen e tin nib m’agan’ Got ngay. Piin Kristiano kakrom e yad be par ni yad be fol ko fare tamilang nib spiritual ni yima pi’ ngorad u daken e pi babyor ni Got e i thagthagnag. Ke gel e michan’ rorad nbochan e ke yib e pi apostal nge yugu boch e girdi’ i guyrad, ma aram e ka ra lebguyed e maruwel rorad ko machib. Rib tamilang e thin ni Christian Greek Scriptures ni be weliy murung’agen.​—Acts 10:21, 22; 13:46, 47; 2 Timothy 1:13; 4:5; Hebrews 6:1-3; 2 Peter 3:17, 18.

5. Mang fan ni be mon’og e ulung rok Got e chiney, ma mang fan ni thingarda folgad riy?

⁵ Taab rogon ko Kristiano kakrom, ya Pi Mich rok Jehovah ko ngiyal’ ney e yad buchuw ko tabolngin. (Zekariah 4:8-10) Bang u tomuren fa bin 19 e chibog, ma bay ban’en ni be micheg ni gelngin Got e be par u lan e ulung rok. Bochan ni gad ma tor nga daken e ayuw ko kan ni thothup, ma gathi daken gelngin e girdi’, ma arfan ni ke yoor e tamilangan’ rodad ko Thin rok Got nge rogon ni gad be rin’ e tin nib m’agan’ Got ngay. (Zekariah 4:6) Chiney ni gad be par ko “tin tomren e rran,” ma rib ga’ fan ni ra par ni gad be fol ko ulung rok Jehovah ni be mon’og iyan. (2 Timothy 3:1-5) Ra ngad yodoromgad ma rayog ni nge par nib fas e athap rodad ma rayog ni ngada machibnaged murung’agen Gil’ilungun Got u m’on ni ngeb e tomur ko re m’ag ney.​—Matthew 24:3-14.

6, 7. Gad ra fal’eg i lemnag ma mang dalip ban’en ni be mon’og e ulung rok Jehovah riy?

⁶ Ba’ u fithik’dad e piin ni kafin ra tababgad i chag ko ulung rok Jehovah ko pi duw ni 1920, nge ‘30, nge ‘40. Nap’an e pi duw nem, ma mini’ e arodad e ke yog rok ni nge sananag rogon nra mon’og e ulung rodad nge mada’ ko ngiyal’ ney? Am lemnag e tin ni ke buch nib ga’ fan ko ngiyal’ ney! Riyul’, ni bay angin e tirok Got, nfaan gad ra fal’eg i lemnag e n’en ni ke rin’ Jehovah u daken e ulung rok ni kan yarmiy nrogon nib theocratic.

⁷ Kari falfalan’ David u nap’an ni ke fal’eg i lemnag e tin ni rib fel’ ni ke rin’ Jehovah. I yog ni gaar, “Boor ban’en nib fel’ ni ke m’ay i lemnag rom ni fan ngomad. Ra nggu weliy murung’agen ni gubin, ma ra yan i aw ndabiyog rog ya kaygi pire’.” (Psalm 40:5) Aram rogon e magawon rodad, ya ku dabiyog ni ngada weliyed murung’agen e tin ni ke rin’ Jehovah e ngiyal’ ney ni boor ma yima pining e sorok ngak riy. Yugu aram rogon, ma gad ra weliy dalip ban’en ni be mon’og e ulung rok Jehovah riy: (1) be mon’og iyan ni buchuw e tamilang ko tirok Got ban’en, (2) ke mon’og ma kari gel fare maruwel ni ngan wereg e machib, ma (3) kan thiliyeg boch e yaram u lan e ulung ko tayim nib m’ag ngay.

Yibe Falfalan’ Ya Bochan e Keb e Tamilang ko Tirok Got

8. Ba puluw ko Proverbs 4:18, ma fare tamilang nib spiritual e ke ayuwegdad ni ngad nanged e n’en nib m’ag ko Gil’ilungun, fa?

⁸ Ke m’ug nib riyul’ e thin ni bay ko Proverbs 4:18 ni be weliy murung’agen e tamilang nib spiritual ni be gel iyan. Be yog ni gaar: “Fare kanawo’ ko piin nib mat’aw e bod rogon ramaen e yal’ ni be gel i yan nge mada’ ko ngiyal’ ni kari tamilang urngin ban’en.” Ri gad be pining e magar ya kada guyed rogon ni be mon’og e tamilang ko tirok Got ban’en iyan! Nap’an e convention u Cedar Point, Ohio, ko duw ni 1919, ma kan weliy murung’agen Gil’ilungun Got. Ma fanay Jehovah Gil’ilungun ni fan e nge thothupnag fithingan ma ra tamilang u wan’ e girdi’ e gagiyeg rok. Riyul’, ni fare tamilang ko tirok Got ban’en e ir e ke ayuwegdad ni ngad nanged fan ni ra thothupnag Got fithingan u daken Gil’ilungun ni Fak e be gagiyegnag. Ma aram e n’en ni fare athap ko piin nib t’uf rorad e tin nib mat’aw ban’en e ma tor nga daken.​—Matthew 12:18, 21.

9, 10. Nap’an e pi duw ni 1920, ma mang e kan nang u murung’agen Gil’ilungun nge murung’agen l’agruw e ulung nib togopuluw reb nga reb, ma u rogon ni ke ayuwegey e re n’em?

⁹ Nap’an fare convention u Cedar Point ko duw ni 1922, me J. F. Rutherford e ir fare principal speaker ko re muulung nem, me yog ngak e pi girdi’ rok Got ko welthin rok ni gaar, “ngani wereg, ngani wereg, ngani wereg, murung’agen fare Pilung nge gil’ilungun.” Reb e article ni “Birth of the Nation,” ni kan yoloy u reb e babyor ni The Watch Tower ko pul ni March 1, 1925, ma guy rogon ni nge tiyan’ e girdi’ ko tamilangan’ u murung’agen e pi yiiy ni yibe weliy ni Gil’ilungun Got e ra tabab ko duw ni 1914. Maku nap’an e pi duw ni 1920’s ma kan nang ni bay l’agruw e ulung nib togopuluw reb nga reb​—ni aram e ulung rok Jehovah nge ulung rok Satan. Kar par ni yow be cham, ma rayog ni ngada gelgad ko re cham ney nfaan gad ra un ku ulung rok Jehovah.

¹⁰ Uw rogon ni ke ayuwegdad fare tamilangan’ nib spiritual? Bochan ni Gil’ilungun Got nge fare Pilung ni Jesus Kristus e gathi bang ko fayleng, ma ku aram rogon gadad. Faan gad ra par nib dar ko fayleng, ma aram e gad be dag ni gad bay u baan riyul’. (John 17:16; 18:37) Nap’an ni gad ra guy e magawon ni boor ni be magawonnag e re m’ag ney nib kireb, ma ri gad be pining e magar ni gathi gadad bang ko ulung rok Satan! Ma kari fal’eg waathdad ya gad bay ko gin nib mudugil ko tirok Got ban’en ni aram e ulung rok Jehovah!

11. Mang ngochol nib puluw ko thin u Bible ni ke fanay e girdi’ rok Got ko duw ni 1931?

¹¹ Nap’an e Covention u Columbus, Ohio, ko 1931, ma kan weliy fan e thin ni bay ko Isaiah 43:10-12. Ma piin ni yima yog e Bible Students ngorad faram e ka ra fanayed fare ngochol nib thil ni aram e Pi Mich rok Jehovah. Rib gel e taw’ath riy ni ngan nang fithingan Got ma aram rogon ma rayog ni yugu boch e girdi’ e ku yad ra pining e re ngochol ney ma ra thapgad ngak Got!​—Psalm 83:18; Roma 10:13.

12. Mang tamilang nib spiritual u murung’agen fare ulung ni baga’ ni kan wereg ko 1935?

¹² U m’on ko pi duw ni 1930, ma boor e girdi’ rok Got ni dawori tamilang u wan’rad murung’agen e athap rorad nga m’on. Boch i yad e yad ma lemnag e yafas u tharmiy machane kar falfalan’gad ni kar nanged fare machib u murung’agen e paradis u fayleng. Nap’an e convention u Washington, D.C. ko duw ni 1935, ma kar falfalan’gad ni kar nanged ni girdi’ ni yad pire’, ara ulung ni baga’, nrogon ni yog ko Revelation guruy ni 7 e aram reb e ulung ni bay e athap rorad u roy u fayleng. Ka nap’an e ngiyal’ nem, ma fare maruwel ni ngan ulunguy e piin ni yad bang ko ulung ni baga’ e ke gel i yan. Gathi gad ba falfalan’ e chiney ya kan dag ngodad ko mini’ fare ulung ni baga’? Bochan ni gad manang ni girdi’ ni yoor ko pi nam, nge ganong, nge thin ni yibe ulunguyrad e ke k’aringdad ni ngada maruwelgad nib elmerin ya gad be fol ko ulung rok.

13. Mang magawon nib ga’ e kan weliy ko convention ni kan ta’ u St. Louis ko duw ni 1941?

¹³ Fare magawon ni baga’ ni susun urngin e girdi’ e ba l’ag ngay e kan weliy u nap’an e convention ni kan ta’ u St. Louis, Missouri, ko duw ni 1941. Ereray e gagiyeg u palpalthib, ara gagiyeg ni th’abi gel. I ir fare magawon ni thingar ni pithig ndabki n’uw nap’an, ma fare rran ni baga’ ni ereray e tayim ni ngan rin’ e re n’ey ma ra gin e girdi’ ngay e be yib nib pay! Maku duw ni 1941 e kan weliy murung’agen e yul’yul’, min bing e kanawo’ ngodad ni ngada daged ko uw e gin ni gad ra par riy nib m’ag ko gagiyeg rok Got.

14. Nap’an e international convention ko 1950, ma mang e kan fil u murung’agen pi fak e pilung nrogon ni yog ko Isaiah 32:1, 2?

¹⁴ Nap’an e international convention ko duw ko 1950 u New York City, ma fapi fak e pilung nrogon ni bay ko Isaiah 32:1, 2 e kan poyrad nib tamilang. Ma nap’an ni ke weliy Brother Frederick Franz murung’agen me tamilangnag ni fapi fak e pilung ko fayleng nib biech e bay u fithik’rad ma ke ngat e girdi’ ngay. Nap’an e re convention nem nge yugu boch e convention nga tomren, ma boor e tamilangan’ nib spiritual e kan weliy. (Psalm 97:11) Ri gad ba falfalan’ ya tirodad e kanawo’ e “bod e tamilang ko yal’ ni be gel i yan”!

Ngam Mon’og ko Maruwel Rodad i Wereg e Machib

15, 16. (a) Uw rogon ni kada mon’oggad i wereg e machib u nap’an e pi duw ni 1920 nge mada’ ko 1930? (b) Mang e babyor ni ke gelnag e maruwel ko Kristiano ni ngan wereg e machib ni kan fanay ko pi duw nem ni dawori n’uw nap’an faram?

¹⁵ Bin l’agruw e kanawo’ ni be mon’og i yan e ulung rok Jehovah riy e ba peth ko maruwel rodad nrib ga’ fan​—ni aram e maruwel ni ngan machibnag Gil’ilungun nge ngan pingeg e girdi’ ngar manged pi gachalpen Jesus. (Matthew 28:19, 20; Mark 13:10) Fare ulung rodad e ir e ma pi’ e athamgil nga lanin’dad ni ngada ga’naged e re maruwel n’ey ma aram e rayog ni ngada mu’naged e maruwel rodad. U lan e 1922 ma urngin e Kristiano e kan fonownagrad ni ngara uned i wereg e machib. Ra bagayad ma susun ni nge nang nib mil fan ngak ni nge maruwel ni nge gal ramen e tamilang ni bay rok ma aram e rayog ni nge micheg e thin riyul’. (Matthew 5:14-16) U lan e 1927 ma kan yarmiy ni rorran ni Madenom e ngan tay ni fan ko machib u mit e tabinaw i yan. Pul ni February, ko duw ni 1940, e ke tabab ni ngan guy e Pi Mich u kanawo’ ko gin ni yima fol chuway riy ni yibe wereg fare babyor ni The Watchtower nge Consolation (Awake! e chiney).

¹⁶ Duw ni 1937 ma kan wereg fare booklet ni Model Study, ni be dag nib t’uf ni ngan sul ngak e girdi’ ma aram e rayog ni ngan fil e thin riyul’ nu Bible ngak yugu boch e girdi’. Tomren ni ke yan in e duw, ma kan weliy nrib ga’ fan e fol Bible. Ma kan gelnag e re maruwel n’ey ya kan ngongliy fare babyor ni “Let God Be True” ko duw ni 1946 nge The Truth That Leads to Eternal Life ko 1968. Chiney, ma gad be fanay fare babyor ni Knowledge That Leads to Everlasting Life. Ra ngan fil e pi babyor ney ngak e girdi’ ma yibe fal’eg e def ko Thin u Bible ngorad ni fan e ngar manged pi gachalpen Jesus.

Ngan Mon’og Iyan u Nap’an ni Yibe Machalbognag Boch Ban’en u Lan e Ulung

17. Rogon ni be lebug e thin ko Isaiah 60:17, ma uw rogon ni be mon’og iyan e ulung rok Jehovah?

¹⁷ Bin dalip e kanawo’ ni ulung rok Jehovah e be mon’og iyan e ba peth nga rogon ni yibe machalbognag boch ban’en u lan e ulung. Rogon e thin ni bay ko Isaiah 60:17, e i micheg Jehovah ni gaar: “Bay gu fek e gol i yib ngom ma gathi bronze, ma silber e bay yan nga luwan e wasey, ma bronze e bay yan nga luwan e ren; bay yog e wasey ngom ma gathi malang. Pi pilung rom e dab kur gafgowniged gur; bay gu tayeg ngorad nguur gagiyeggad u fithik’ e yal’uw nge gapas.” Min lebuguy e re yiiy ney, ma aram kan rin’ boch ban’en ni nge fel’ boch rogon ni ngan ayuweg e maruwel ni ngan machibnag e thin ko Gil’ilungun Got nge rogon ni ngan ayuweg e yu ran’ i saf.

18, 19. Nap’an e pi duw ni ke yan faram ma mang boch ban’en ni kan machalbognag e ulung riy?

¹⁸ U lan e 1919 ma kan dugliy e service director ko urngin e ulung min nog ni ra reb ma nge ayuweg ni nge yarmiy e maruwel ni ngan wereg e machib. Ma ke ayuwegdad e re n’em ni ngad machibgad. Ma nap’an e 1932 min museg fare towal ko piin ni piilal nge piin ni deacon, ni aram e pow ni kar paged fare yaram ni democratic. U lan e 1938 ma reb e ban’en ni i buch nib thil e kan tabab ni ngan mel’eg urngin e piin ni ra yog ni ngar ayuweged e ulung nrogon nib theocratic ni bod fare yaram kakrom ko ulung ni kristiano. (Acts 14:23; 1 Timothy 4:14) Nap’an e duw ni 1972 ma piin ni piilal nge piin ni ministerial servants e kan mel’egrad ni ngar ayuweged e ulung ni bod ni i rin’ boch e pumoon ni kristiano kakrom. Dan pag ni kemus ni taareb e pumoon ni ra ayuweg e ulung, ya thin ni bay ko Filippi 1:1 nge yugu boch e thin u Bible e be dag ni piin ni ur folgad ko thin u Bible ma kar manged piin ni ma ayuweg e ulung e yad e piin ni piilal ara ba ulung i piilal.​—Acts 20:28; Efesus 4:11, 12.

¹⁹ U lan e duw ni 1975 me tabab fare yaram ni fapi committee ko Governing Body ko Pi Mich rok Jehovah e yad e ngara ayuweged urngin e maruwel ni ma ta’ e ulung rok Got u ga’ngin e fayleng. Fapi Branch Committee e kan tayrad ni ngara ayuweged e maruwel ni yima ta’ nrogon e binaw ni yad ma par riy nib thil thil. Ka aram nap’an, min guy rogon ni ngani lichnag e maruwel ko pi headquarter nge fapi branch ko fare Watch Tower Society ma aram e rayog ni ngar “mel’eged e tin ni ir e th’abi fel’.” (Filippi 1:9, 10) Fapi maruwel ni ke mil fan ngak e pi tachugol saf ni yad be par u tan pa’ Kristus e ba muun ngay ni ngara ayuweged fare maruwel ni ngan wereg e machib, nge ngan fil ban’en ngak girdien e ulung, ma ngan chuguliy fare ran’ i saf rok Got.​—1 Timothy 4:16; Hebrews 13:7, 17; 1 Peter 5:2, 3.

Be Pow’iyey Jesus nib Pasig

20. Ran fol ko ulung rok Jehovah ma mang e ba t’uf ni ngada nanged u murung’agen e liw rok Jesus?

²⁰ Rogon ni ngani un ko ulung rok Jehovah ni be mon’og i yan e thingarda ted fan Jesus Kristus ni ir e ke dugliy Got ni nge mang “lolugen e ulung.” (Efesus 5:22, 23, NW) Maku bay fan ni ngan tiyan’uy ko thin ni bay ko Isaiah 55:4, ya ka nog ngodad u roy ni gaar: “Mu sap! Bochan ni gag e mich ngak e pi nam ma aram e gag [Jehovah] e kug ta’ ni nge mang ga’ ko pi nam ma ir e ra yog e thin rorad.” Ba mudugil ni manang Jesus rogon ni nge pow’iyey. Maku manang ko mini’ e pi saf rok nge pi n’en ni yad ma rin’. Mab riyul’, ni nap’an ni ke yan nge gu’ fa medlip i ulung u Asia Minor, ma lal yay ni ke yog ni gaar: “Gu manang e tin ni kam rin’.” (Revelation 2:2, 19; 3:1, 8, 15) Maku manang Jesus e tin nib t’uf rodad, ni bod rogon Jehovah ni Chitamangin. U m’on ni ke fil Jesus fare Meybil ni ke yog ni ngar folgad riy, i yog ngorad ni gaar: “Got ni Chitamangimed e manang e n’en nthingari yog ngomed u m’on ndawor mu ninged ngak.”​—Matthew 6:8-13.

21. Uw rogon ni kan dag e liw rok Jesus ni ir e be ayuweg e ulung ko Kristiano?

²¹ Uw rogon ni i dag Jesus ni ir e ga’ rorad? Reb e kanawo’ ni ma dag e re liw rok ney e daken e piin Kristiano ni kan tayrad ni ngara ayuweged e ulung, ni yad e “pi pumoon ni taw’ath.” (Efesus 4:8) Revelation 1:16 e be dag ni piin ni piilal ni kan dugliyrad ni yad bay u lan e ba’ ni mat’aw i pa’ Kristus, ma ir e be gagiyegnagrad. Chiney, e Jesus e be powiyrad u nap’an ni ngan dugliy e girdi’ ni ngar manged piin piilal, nyugu demtrug ko bay e athap rorad ko yan nga tharmiy fa yad ra par u roy u fayleng. Rogon ni kan weliy ko fare article ni ke yan, ni kan ni thothup e ke dugliyrad nrogon nib puluw e ngongol rorad ko thin ni be yog e Bible. (1 Timothy 3:1-7; Titus 1:5-9) Nap’an e bin som’mon e chibog, ma immoy reb e ulung ko piin ni piilal u Jerusalem ni ka nog e governing body ngorad ni yad e nguur yaliyed e pi ulung nge fare maruwel rorad ni urngin nib m’ag ko ngan wereg e machib u murung’agen Gil’ilungun. Ma ulung rok Jehovah e chiney e ka be fol ko tin ni un rin’ kakrom.

Mu Par ni Ga Be Fol!

22. Mang ayuw ni ma pi’ fare Governing Body?

²² Boch ban’en nib m’ag ko Gil’ilungun ni bay u fayleng e kan pag fan ngak “fare tapigpig nib yul’yul’ mab gonop,” ni fare Governing Body ko Pi Mich rok Jehovah e kan tayrad ni ngar manged owcherad. (Matthew 24:45-47) Fare Governing Body e ri yad ma tiyan’rad ko maruwel rorad i wereg e thin nib m’ag ko tirok Got ban’en ma yad be pow’iy e ulung ko piin Kristiano. (Acts 6:1-6) Machane, nap’an ni ra yib e gafgow ngak e pi walagrad, ma ra pininged fare Governing Body taareb ara boor ko taareb e legal entities ni ngara pied boch e chugum ma ngara fal’eged ara ngar sulweged boch e naun nge pi Kingdom Hall nga rogon. Faanra bay boch e Kristiano ni kan magawonnagrad ara kan togopuluw ngorad, ma yira rin’ boch ban’en ni ngan gelnagrad ko tirok Got. Nap’an ni “ke wagagey boch ban’en,” ma kan athamgil ni ngan gay kanawoen ma rayog ni ngara ululgad ko maruwel rorad ndabi tal e machib.​—2 Timothy 4:1, 2.

23, 24. Yug demtrug ko mang e ra buch rok girdien Jehovah, ma mang e ma pi’ Jehovah, ma susun mang e gad ra dugliy ni ngad rin’ed?

²³ Yugu demtrug rogon ko mang e ra buch rok girdien Jehovah, ma ra pi’ ngorad e ggan nib spiritual nge boch e thin ni nge pow’iyrad. Maku ma pi’ Got e gonop nge tamilangan’ ngak e pi walag ni pumoon ni kar ilalgad ko tirok ni ngan fal’eg rogon boch ban’en ni fan e nge mon’og boch e ulung ma ngan machalbognag boch ban’en u lan e ulung rok nib theocratic. (Deuteronomy 34:9; Efesus 1:16, 17) Ba mudugil, ni ra pi’ Jehovah e n’en nib t’uf rodad ma aram e rayog ni ngada lebguyed e maruwel rodad ni ngada pingeged e girdi’ ni ngar manged pi gachalpen ma ngada mu’naged i wereg e machib u ga’ngin yang u fayleng.​—2 Timothy 4:5.

²⁴ Rib pagan’dad ni dabi pag Jehovah e girdi’ rok nib yul’yul’; ma ra ayuwegrad ni ngara magaygad nib fas u nap’an ni ra yib fare “gafgow ni baga’.” (Revelation 7:9-14; Psalm 94:14; 2 Peter 2:9) Ri bay tapgin ni ngada ayuweged e pagan’ rodad ko tabolngin nge par nib mudugil nge ni mada’ ko tomur. (Hebrews 3:14) Ere, ngada dugliyed ni nguud folgad ko ulung rok Jehovah.

Uw Rogon ni Ngam Pi’ e Fulweg?

• Mang fan nrayog ni nga dogned ni ulung rok Jehovah e be mon’og iyan?

• Mang e mich riy ni be falfalan’ girdien Got ko tamilang nib spiritual ni be gal ramen?

• Uw rogon ni ke mon’og fare maruwel ko Kristiano ni ngan wereg e machib?

• Mang boch e yaram u fithik’ e piin ni tapigpig rok Jehovah u lan e ulung rok ni kan thiliyeg nrogon nib m’ag ko tayim?

[Picture on page 13]

Bod rogon David, ni dabiyog ni ngada theeged urngin e maruwel rok Jehovah nib fel’

[Picture on page 14]

Ke yib angin ngak e girdi’ rok Got boch e yaram u lan e ulung ni kan thiliyeg nrogon nib m’ag ko tayim