Report Ko Piin Ni Ma Wereg E Thin Murung’agen Gil’ilungun Got

Ke Motoyil Yu Latvia ko fare Thin Nib Fel’

FARE Bible e magagiyelnag ni be dag ni aram mat’awun Got ni “urngin e girdi’ ni ngar thapgad ngak ma ngar nanged e tin nib riyul’.” (1 Timothy 2:4) Pi cha’ ni boor e duw ni ke yan ni ur siyeged ni ngar motoyilgad e ke bung rogon ni ngar rungaaged e thin riyul’ e ngiyal’ ney! U Latvia, ni bod yu yang u fayleng, e girdi’ ni urngin yangar mab thil thil e salap rorad e yad be motoyil ko fare thin nib fel’, tin ke rin’ boch e girdi’ e ra dag ko bin migid.

• U Rēzekne, reb e binaw ni bay u eastern Latvia, e immoy reb e matin riy nge reb e rugod ni kar ningew e ayuw ngak fare pin u kanawo’ ni nge dag ngorow e gin ni susun nga ranow ngay. Ere tomren ni ke weliy boch ban’en ngorow, ma fare ppin, ni ir reb e Mich Rok Jehovah, e ke piningrow ni ngar unew ko pi muulung ni ma ta’ e Pi Mich.

Ma bochan e michan’ ko fare pin nge fare rugod ni fak ko pi teliw, ma kar duguliyew ni ngar unew ko muulung. Nap’an ni yow be yan ko muulung, ma kar weliyew ni faan yow ra guy ban’en ni de fel’ u rom, ma yow ra chuw nib papey. Machane, fare muulung e kari fel’ u wan’row ma dakura lemnagew ni ngar chuwgow. Kar duguliyew ni ngar filew e Bible ma kar tababgow i un ko pi muulung ni gubin ngiyal’. U lan ri dalip e pul, ma kar dagew feni ri yow baadag ni ngar unew ko fare maruwel ni ngan machib ma yow be sap nga m’on ko ngiyal’ ni yow ra taufe.

• U lan reb e donguch u western Latvia, ma reb e Mich nib pumoon e mad’eg Anna ni 85 e duw rok, ke dag ni baadag ni nge motoyil ma ke turguy ni nge fil e Bible. Reb e ppin ni fak nge boch e girdi’ ko tabinaw rok e rib elmerin ni ur togopluwgad ngak. Machane de digey Anna e togopluw rorad nge feni ke pilibthir nge m’ar rok ni nge taleg ko fol Bible.

Reb e rran, me yog Anna ko fare pin ni fak ni ke duguliy ni nge un ko taufe. I gaar fare pin ni fak ngak, “Faanra gara taufe, ma ra gu fekem nggu tem nga tafen e m’ar.” Ma re n’em ni yog, e de taleg Anna. Ma bochan e magawon u downgin, ma kan taufenag u tabinaw rok.

Mang e ke rin’ fare pin ni fak ko re n’ey? Ke yog ni nge thil boch e lem rok, ma ke yarmiy bochi reb e abich u tomren e taufe. Ma aram me fith ko nina’ rok ni gaar, “Chiney ni kan taufenagem, ma ba u rogon lanin’um?” Ma mang e fulweg ku Anna? “Bod reb e bitir ni kafin ni gargeleg!”

• U lan e December ko 1998, ma l’agruw e Pi Mich e kar mada’nagew reb e pumoon ni ke tal ni immoy ni ir reb e ga’ ko salthaw ko nam ni ka nog e Soviet Union ngay. Ma bochan ni bay e michan’ rok ko an Tasunmiy, ma ke pag ni nge un ko fol Bible, ma tomren ma ke un e ppin rok ngak. Rib machreg ni kar mon’og gow ma aram e kar mangew e unbaptized publisher. Nap’an e bin migid e summer ni yib, ma fare pumoon e ke un ko taufe. Gelngin e t’ufeg ko gali mabgol ney ko tirok Got ban’en e ke mang tapgin e gelngin urngin e girdi u lan e ulung. Maku, kar ga’nigew e tayim rorow ma kar unew ko maruwel ni ngan toy reb e naun ni nge par e girdi’ riy ni nge mang reb e Kingdom Hall.