Dab Mu Sagaal ni Ngam Un ko Taufe

1. Mang boch i fan nib fel’ ni ngam un ko taufe?

BA T’UF Jehovah Got rom ni ir e ke pi’ urngin e tow’ath nib manigil ngom nib muun ngay e yafos rom, fa? Ga baadag ni ngam dag ngak nib t’uf rom, fa? Bin th’abi fel’ e kanawo’ ni ngam rin’ e re n’ey riy e aram e ngam ognagem ngak mag un ko taufe. Ga ra rin’ e re n’ey, ma aram e kam mang bang ko tabinaw rok. Angin nra yib riy e ra pow’iyem e Chitamam nge Fager rom me ayuwegem ni bochan e ke milfam ngak. (Ps. 73:24; Isa. 43:​1, 2) Maku reb e nap’an ni ga ra ognag e yafos rom ngak ngam un ko taufe, ma aram e ke yag e athap ngom ko yafos ni manemus.​—1 Pet. 3:21.

2. Mang e gad ra weliy ko re article ney?

² Bay ban’en ni be talegem ndamur un ko taufe, fa? Faanra bay, ma gathi yigoo gur e ke buch e re n’ey rom. Bay bokum milyon e girdi’ ni kar uned ko taufe nib t’uf ni ngar thilyeged e ngongol nge lem rorad ya nge yag ni bung rogorad ni ngar uned ko taufe. Ma chiney e yad be pigpig ngak Jehovah u fithik’ e felfelan’ nge pasig. Ere mang e rayog ni ngam fil rok boch e girdi’ nra uned ko taufe u nap’an e bin som’on e chibog? Ngad weliyed murung’agen boch e magawon nra mada’naged nge n’en nrayog ni ngad filed rorad.

KAN TAUFENAG PIYU SAMARIA

3. Mang boch ban’en nrayog nib t’uf ni nge rin’ boch e girdi’ nu Samaria ya nge yag nra uned ko taufe?

³ Piyu Samaria u nap’an Jesus e yad bang u reb e ulung ko teliw, ma boor i yad e i par u tooben fare mach nu Shekem ngu lan yu Samaria ni bay ko lel’uch u Judea. Ba t’uf ni ngki ga’ boch e tamilangan’ rorad ko Thin rok Got u m’on ni nge yag nra uned ko taufe. Kemus ni yigoo fa lal nsom’on e babyor ko Bible ni Genesis nge mada’ ko Deuteronomy nge sana fare babyor rok Joshua e ba mich u wan’rad. Machane ur sonnaged fare Messiah ni nge yib nrogon nib puluw ko n’en ni micheg Got ni bay ko Deuteronomy 18:​18, 19. (John 4:25) Ba t’uf ni nge m’agan’rad ngay ni Jesus e ir fare Messiah ni kan micheg ya nge yag nra uned ko taufe. Ma “boor e girdi’ nu Samaria” nrin’ed e re n’ey. (John 4:39) Ku bay boch i yad nib t’uf ni nge tal ndab ki laniyan’ ngak e pi Jew.​—Luke 9:​52-54.

4. Mang e rin’ boch e girdi’ nu Samaria u nap’an ni machibnagrad Filip nrogon ni be yog e Acts 8:​5, 6, 14?

⁴ Mang e ayuweg piyu Samaria ni ngar uned ko taufe? Nap’an ni machibnag Filip ni tamachib “murung’agen fare Messiah” ngak piyu Samaria, ma boch i yad e “thap e thin rok Got ngak [“m’agan’rad ko thin rok Got,” NW].” (Mu beeg e Acts 8:​5, 6, 14.) Ra motoyilgad ngak Filip ni yugu aram rogon ni ir reb e Jew. Sana rayog ni yib ngan’rad boch e thin ni bay u lan e Babyor nib Thothup ni be yog nde laniyan’ Got. (Deut. 10:​17-19) Ra “uthumed telrad ko n’en ni i weliy Filip” ngorad u murung’agen fare Messiah, mar guyed e mich riy ni Got e ir e ke l’og Filip. Ku boor e maang’ang ni i ngongliy Filip nib muun ngay e piin nib m’ar ni i golnagrad nge piin ni i tuluf e moonyan’ ni ke ying ngorad.​—Acts 8:7.

5. Mang e rayog ni ngam fil rok piyu Samaria?

⁵ Rayog ni nge pag fapi girdi’ nu Samaria e laniyan’ ara pi n’en ndawori tamilang u wan’rad ni nge talegrad ndab ra mon’oggad. Machane dar paged ni nge buch e re n’ey. Nap’an ni mich u wan’rad nriyul’ e n’en be fil Filip ngorad, ma aram mar uned ko taufe ni ka chingiyal’ nem. Be gaar e Bible: “Faani mich u wan’rad e Thin Nib Fel’ ni yog Filip ngorad ni murung’agen e gagiyeg rok Got nge ngachalen Jesus Kristus, ma aram min taufenagrad, ni ppin nge pumoon.” (Acts 8:12) Ba mich u wan’um nriyul’ e Thin rok Got, ma der ma laniyan’ e Pi Mich Rok Jehovah, ma yad ma guy rogon ni ngar t’ufeged yad ni aram e pow ko tin riyul’ e Kristiano, fa? (John 13:35) Faanra arrogon, ma ngam rin’ e n’en nib t’uf ni ngam rin’ ya rayog ni nge pagan’um ngay nra tow’athnagem Jehovah.

6. Uw rogon nrayog ni nge yib angin ngom e n’en ni rin’ Ruben?

⁶ Ruben ni be’ nu Chiyamen e ilal u reb e tabinaw ni yad boch e Pi Mich. Machane nap’an ni kab fel’ yangaren ma i maruwar Jehovah u wan’. Ere mang e ayuweg ni nge dabki maruwar boch ban’en u wan’? I nang ni bay boch ban’en ndawori tamilang u wan’, ere dugliy ni nge rin’ ban’en ngay. I yog ni gaar: “Nap’an nug be fil e Bible rog ni yigoo gag, mab t’uf ni nggu nang ko mang e ba riyul’ ma mang e de riyul’. Ba t’uf ni nggu fil fare machib ni ke sum e girdi’ ko gamanman in yay.” I beeg fare ke babyor ni kenggin e Is There a Creator Who Cares About You? Rib gel e ayuw ni pi’ e re ke babyor ney ngak Ruben. I gaar u wan’: ‘Riyul’ ni bay Jehovah!’ Ma nap’an ni yan ko tochuch rodad, mar ki ga’ fan u wan’ ni bay e pi walag u ga’ngin yang e fayleng nib taareban’rad. Nap’an ni sul nga Chiyamen, me un ko taufe u nap’an ni ke gaman 17 e duw rok. Faanra bay boch ban’en ni kam fil ni be maruwar u wan’um, mag gay murung’agen u lan e pi babyor rodad. Faanra yag e “bin nib puluw e tamilangan’” ngom, ma rayog ni nge dabki maruwar boch ban’en u wan’um. (Efe. 4:​13, 14, NW) Ma nap’an ni ga ra rung’ag murung’agen e t’ufeg nge taareban’ ni bay u thilin e girdi’ rok Jehovah u yugu boch e nam u fayleng ma ka ga be guy u lan e ulung rom, ma aram e ra gel feni t’uf rom e pi walag u ga’ngin yang e fayleng.

KAN TAUFENAG SAUL NU TARSUS

7. Mang e ba t’uf ni nge thilyeg Saul u rogon ni i lem?

⁷ Am lemnag e n’en ni rin’ Saul nu Tarsus. Ke skulnag murung’agen e Motochiyel rok e pi Jew, mab gilbuguwan u fithik’rad. (Gal. 1:​13, 14; Fil. 3:5) Ngiyal’ nem e boor e Jew ni ur lemnaged nde riyul’ e pi n’en ni i machibnag e piin Kristiano. Ere i gafgownagrad Saul. I lemnag ni be rin’ e n’en nib m’agan’ Got ngay. (Acts 8:3; 9:​1, 2; 26:​9-11) Faanra nge mich Jesus u wan’ me un ko taufe nge mang reb e Kristiano, ma aram e ba t’uf ni nge m’agan’ ngay ni ngaun gafgownag.

8. (a) Mang e ayuweg Saul ni nge un ko taufe? (b) Uw rogon ni ayuweg Ananias Saul nrogon ni be yog e Acts 22:​12-16? (Kum guy e sasing.)

⁸ Mang e ayuweg Saul ni nge un ko taufe? Nap’an ni non Jesus ngak u tharmiy, me mat ramaen ban’en nga daken ni malmitnag. (Acts 9:​3-9) Dalip e rran ni par nde abich ma de garbod ma dariy e maruwar riy ni i fal’eg i lemnag e n’en ni buch rok. Arrogon, i mich u wan’ Saul ni Jesus e ir fare Messiah, ma be un pi gachalpen ko baan nriyul’ e teliw. Dariy e maruwar riy nri kireban’ ngay ni ke un i thang e fan rok Stephen! (Acts 22:20) Tomuren dalip e rran me yib Ananias nreb i gachalpen Jesus i guy, me ayuweg ni ngki guy ban’en bayay, me pi’ e athamgil nga laniyan’ ni nge un ko taufe ni ka chingiyal’ nem. (Mu beeg e Acts 22:​12-16.) I sobut’nag Saul laniyan’, nge m’agan’ ngay ni ngan ayuweg, me un ko taufe.​—Acts 9:​17, 18.

9. Mang boch ban’en nrayog ni ngam fil rok Saul?

⁹ Bay boch ban’en nrayog ni ngad filed rok Saul. Rayog ni nge pag e tolangan’ ara marus rok ko girdi’ ni nge taleg ndabi un ko taufe. Machane de pag e re n’ey ni nge buch. Nap’an ni fil e tin riyul’ u murung’agen Kristus, ma aram me sobut’nag laniyan’ nge thilyeg e ngongol rok. (Acts 26:​14, 19) I m’agan’ ngay ni nge mang reb e Kristiano ni yugu aram rogon ni manang ni yira gafgownag. (Acts 9:​15, 16; 20:​22, 23) Tomuren ni un ko taufe me ulul ni nge taga’ ngak Jehovah ni nge ayuweg ni nge athamgil u fithik’ e pi magawon nra mada’nag nib thilthil. (2 Kor. 4:​7-10) Nap’an ni ga ra un ko taufe ngam mang reb e Pi Mich Rok Jehovah, ma rayog ni ngam mada’nag boch e magawon ara skeng, machane yira ayuwegem. Rayog ni nge pagan’um ngay ni gubin ngiyal’ nra ayuwegem Got nge Kristus.

10. Uw rogon nrayog ni nge yib angin ngom e n’en ni rin’ Anna?

¹⁰ Anna e ilal u bangi ban’en ni bay ko Ngek u Europe. Tomuren ni un e chitiningin ko taufe, me m’agan’ e chitamangin ngay ni nge un ko fol Bible u nap’an ni ke gaman 9 e duw rok. Machane re n’ey e k’aring e magawon nga thilrad e girdi’ rok ni yad ma par u taab tabinaw. Rogon u wan’rad e faanra chuw bagayad ko teliw rok e pi ga’ rorad, ma aram e be darifannag chon e tabinaw rorad. Nap’an ni gaman 12 e duw rok Anna, me yog ngak e chitamangin ni baadag ni nge un ko taufe. Ere baadag e chitamangin ni nge nang ko ir rok e ke dugliy e re n’ey, fa bay be’ ni be towasariy ni nge un ko taufe. I fulweg ni gaar, “Ba t’uf Jehovah rog.” Ere m’agan’ e chitamangin ngay ni nge un ko taufe. Tomuren mab gel e moning nge gafgow ni i tay e girdi’ rok ngak. I gaar bagayad ngak, “Kab fel’ ni ngaum un ko ngongol nib kireb ma ga be tamagow ko bin ni ngam mang reb e Pi Mich Rok Jehovah.” Uw rogon ni i athamgil Anna? I gaar, “I ayuwegeg Jehovah ni nggu par ni gub gel, ma ri kub ga’ e ayuw ni pi’ e chitinag nge chitamag ngog.” Ma yoloy Anna nga but’ urngin yay ni ke ayuweg Jehovah, ma ma sul nga i yaliy e pi n’em ya nge dabi pagtalin rogon ni ke ayuweg. Faanra ga be rus ni yira gafgownagem, ma dab mu pagtalin ni ku ra ayuwegem Jehovah.​—Heb. 13:6.

KAN TAUFENAG KORNELIUS

11. Mang fan nrayog ni nge sagaal Kornelius ni nge un ko taufe?

¹¹ Ku be weliy e Bible murung’agen e n’en ni rin’ Kornelius. Ir reb e ga’ ko salthaw ni ma yog e thin u sogonap’an 100 e salthaw nu Roma. (Acts 10:1) Bochan e re n’ey, ma rayog ni ir be’ nib ga’ fan u lan binaw ma kub tolang e liw rok ko salthaw. Ir be’ ni ma “ayuweg piyu Israel ni piin ni gafgow.” (Acts 10:2) I l’og Jehovah apostal Peter ni nge yan i weliy fare thin nib fel’ ngak. Ere gur, de un Kornelius ko taufe ni ka chingiyal’ nem ni bochan e ba tolang e liw rok?

12. Mang e ayuweg Kornelius ni nge un ko taufe?

¹² Mang e ayuweg Kornelius ni nge un ko taufe? Be yog e Bible ni ir be’ ni ‘ma liyor ngak Got u wan’ ni ir nge urngin e girdi’ nu tabinaw rok.’ Ma gubin ngiyal’ ni ma meybil ngak Got. (Acts 10:2) Nap’an ni machibnag Peter Kornelius, ma aram me mich Kristus u wan’rad chon e tabinaw rok, mar uned ko taufe ni ka chingiyal’ nem. (Acts 10:​47, 48) Dariy e maruwar riy nib m’agan’ Kornelius ngay ni nge thilyeg e n’en nib t’uf ni nge thilyeg u rarogon, ya nge yag nra liyorgad chon e tabinaw rok ngak Jehovah u taabang.​—Josh. 24:15; Acts 10:​24, 33.

13. Mang boch ban’en nrayog ni ngam fil rok Kornelius?

¹³ Kornelius e ku bod Saul nrayog ni nge pag e liw rok ni nge taleg ndabi mang reb e Kristiano. Machane de pag e re n’ey ni nge buch. Bay boch ban’en nib mo’maw’ nib t’uf ni ngam thilyeg u rarogom ya nge yag nim un ko taufe, fa? Faanra bay, ma ra ayuwegem Jehovah. Ga ra dugliy u wan’um ni ngam pigpig ngak nrogon nib puluw ko pi kenggin e motochiyel u Bible, ma ra tow’athnagem.

14. Uw rogon nrayog ni nge yib angin ngom e n’en ni rin’ Tsuyoshi?

¹⁴ Tsuyoshi ni be’ nu Sapan e t’uf ni nge thilyeg e maruwel rok ya nge yag ni bung rogon ni nge un ko taufe. Ir e taayuw rok e en nib ga’ u reb e skul ni yigoo yimanang ni yima fil riy rogon ni ngan ngongliy e floras. Faanra dabiyog ni nge un e en nib ga’ ko fare skul nga reb e tayam’ ni yira tay, mab ga’ ni Tsuyoshi e ir e ma yan ni owchen miki un i rin’ boch ban’en ni bay rogon ko teliw ni Buddhist ni pa’. Machane nap’an ni nang e tin riyul’ u murung’agen e yam’, me nang ndabiyog ni nge un ko taufe ni faanra ka be un ko pi n’ey ni yima rin’ ni bay rogon ko teliw ni Buddhist. Ere dugliy ndab ki un ko pi n’ey. (2 Kor. 6:​15, 16) I weliy Tsuyoshi ngak faen nib ga’ ko skul murung’agen e re n’ey. Mang angin ni yib riy? I yag ni nge ulul ko maruwel rok ndaki t’uf ni nge un ko fapi n’em ni yima rin’ ni bay rogon ko teliw ni Buddhist. Sogonap’an reb e duw nga tomuren ni tabab ko fol Bible, ma aram me un ko taufe.a Faanra ba t’uf ni ngam thilyeg e maruwel rom ya nge yag nim felfelan’nag Got, ma nge pagan’um ngay nra pi’ e tin nib t’uf romed chon e tabinaw rom.​—Ps. 127:2; Matt. 6:33.

KAN TAUFENAG PIYU KORINTH

15. Mang e rayog ni nge taleg piyu Korinth ndab ra uned ko taufe?

¹⁵ Piyu Korinth kakrom e ba m’on e salpiy nge chugum u wan’rad, mab kireb e ngongol rorad. Boor e girdi’ ni yad ma par u rom ni yad ma rin’ boch e ngongol nde m’agan’ Got ngay. Ere dabisiy nra mo’maw’ ngak be’ ni ma par u reb e mach ni aray rogon ni nge tabab ni nge pigpig ngak Jehovah. Yugu aram rogon, ma nap’an ni yan apostal Paul ko re mach nem ni nge machibnag fare thin nib fel’ ni murung’agen Kristus, ma “boor e girdi’ u lan yu Korinth ni rung’ag e re thin nem ni murung’agen Jesus, me mich Jesus u wun’rad min taufenagrad.” (Acts 18:​7-11) Ma nap’an nni pilyeg e changar rok Paul nge guy Somol Jesus Kristus, me gaar ngak: “Boor e girdi’ u lan e re binaw ney ni yad e tirog e girdi’.” Ere ulul Paul ni nge machib u rom u lan reb e duw nge baley.

16. Mang e ayuweg boch e girdi’ u Korinth ni ngar uned ko taufe? (2 Korinth 10:​4, 5)

¹⁶ Mang e ayuweg piyu Korinth ni ngar uned ko taufe? (Mu beeg e 2 Korinth 10:​4, 5.) Thin rok Got nge gelngin nib thothup e ayuwegrad ni ngar thilyeged boch ban’en u lan e yafos rorad. (Heb. 4:12) Piin yad ma par u rom ni m’agan’rad ko fare thin nib fel’ ni murung’agen Kristus e yag ni ngar talgad i rin’ boch e ngongol nib kireb ni bod e chingaw, nge moro’ro’, nge pumoon ni ma darngalnag e pumoon nge ppin ni ma darngalnag e ppin.​—1 Kor. 6:​9-11.b

17. Mang e rayog ni ngam fil rok piyu Korinth?

¹⁷ Mu tay fanam i yan riy ni yugu aram rogon ni bay boch e girdi’ u Korinth ni kar mechamgad nga boch e ngongol nib mo’maw’ ni ngar digeyed, machane dar lemnaged ni kaygi mo’maw’ ngorad ni ngar manged boch e Kristiano. Ba gel e athamgil nra ted ya nge yag nranod ko fare pa’ i kanawo’ nib wen’in ni be sor ko yafos ni manemus. (Matt. 7:​13, 14) Bay ba mit e ngongol nib kireb ni kam mecham ngay nib mo’maw’ ni ngam digey ya nge yag nim un ko taufe, fa? Dab mu tal i guy rogon ni ngam thilyeg e ngongol rom! Mu wenig ngak Jehovah ni nge pi’ gelngin nib thothup ni nge ayuwegem ni ngam gel ko ar’ar ni ma yib ngom ni ngam rin’ e ngongol nib kireb.

18. Uw rogon nrayog ni nge yib angin ngom e n’en ni rin’ Monika?

¹⁸ Monika ni be’ nu Georgia e ba gel e athamgil ni tay ni nge tal i yog e thin nib kireb ma dabki chuweg e chalban rok nga boch ban’en nib kireb ya nge yag ni mon’og nge un ko taufe. I yog ni gaar: “Nap’an ni kab fel’ yangareg ma meybil e aram e n’en ma pi’ gelngig. Manang Jehovah nug baadag ni nggu rin’ e tin nib fel’, ma kab kafram i yib ni ma ayuwegeg ma be pow’iyeg.” Nni taufenag Monika u nap’an ni ke gaman 16 e duw rok. Bay boch e ngongol nib t’uf ni ngam taleg ya nge yag nim pigpig ngak Jehovah, fa? Mu ulul ni ngam wenig ngak ni nge pi’ gelngim ni ngam thilyeg e ngongol rom. Der ma tel Jehovah gelngin nib thothup rok e piin ke t’uf rorad.​—John 3:34.

MICHAN’ ROM E RAYOG NI NGE MITHMITHEG E BUREY

19. Mang e rayog ni nge ayuwegem ni ngam gel nga boch e magawon nib ga’? (Kum guy e sasing.)

¹⁹ Nge pagan’um ngay ni gab t’uf rok Jehovah ma baadag ni ngam mang bang ko tabinaw rok. Yugu demtrug e n’en be mo’maw’nag ngom ni ngam un ko taufe, ma riyul’ e re thin ney. I yog Jesus ngak boch i gachalpen ni gaar: “Faanra ba’ e michan’ romed ngak Got ni bod mam’ungun ba awochngin e mustard, ma rayog ni nge lungumed ko re burey ney, Mman u roy i iram! ma ra yan. Ma demturug ban’en ma rayog romed!” (Matt. 17:20) Piin ur moyed u rom e ka fini gaman in e duw ni kar uned ngak Jesus, ere kab t’uf ni nge gel boch e michan’ rorad. Machane i micheg Jesus ngorad ni faanra ba gaman e michan’ rorad, ma ra ayuwegrad Jehovah ni ngar gelgad nga boch e magawon nib ga’. Ku ra ayuwegem Jehovah ni ngam rin’ e re n’ey!

20. Uw rogon ni n’en ni rin’ e pi Kristiano ko bin som’on e chibog nge ngiyal’ ney ni kan weliy ko re article ney e ke pi’ e athamgil nga lanin’um?

²⁰ Faanra ga manang ni bay ban’en ni be talegem ndamur un ko taufe, mag rin’ ban’en ngay nib papey. N’en ni rin’ e pi Kristiano ko bin som’on e chibog nge ngiyal’ ney e ra fal’eg lanin’um me pi’ gelngim. Manga yigi pi’ e n’en nrin’ed e athamgil nga lanin’um me k’aringem ni ngam ognagem ngak Jehovah ngam un ko taufe. Aram e n’en th’abi fel’ ni ga ra dugliy ni ngam rin’!