‘Ngaum Lek’ Jesus u Tomuren ni Kam Un ko Taufe

1-2. Mang tow’ath e ra yag ngak be’ u tomuren nra un ko taufe?

BA GEL e felfelan’ ni ma tay be’ u nap’an nra un ko taufe nge mang bang ko tabinaw rok Jehovah. Piin kar uned ko taufe e ba puluw u wan’rad fapi thin ni yog David ni ir e yoloy e Psalm ni faani gaar: “[Jehovah] ba felan’ e piin ni kam mel’egrad, ni kam fekrad ni ngar pired u lan e naun rom nib thothup!”​—Ps. 65:4.

² Gathi yugu demtrug be’ ni ma fek Jehovah ni nge mang bang ko tabinaw rok. Ya kad weliyed ko fa binem e article ni ke yan ni ma mel’eg ni nge chugur ngak e piin yad ma micheg ni yad baadag ni nge chugur e tha’ u thilrad. (Jas. 4:8) Nap’an ni ga ra ognagem ngak Jehovah ngam un ko taufe, ma aram e kam chugur ngak u reb e kanawo’ ni yugu ba thil. Rayog ni nge pagan’um ngay nu tomuren ni ga ra un ko taufe, ma ra ‘puog nga dakenam e pi n’en nib fel’ nge pag e fol riy.’​—Mal. 3:10; Jer. 17:​7, 8.

3. Mang reb e ban’en nib ga’ fan nib milfan ngak e pi Kristiano ni kar ognaged yad kar uned ko taufe? (Eklesiastes 5:​4, 5)

³ Machane taufe ni ga ra un ngay e aram tabolngin e pigpig rom ngak Jehovah. Tomuren ni ga ra un ko taufe, ma aram e ga ra athamgil u rogon nrayog rom ni ngam tay u gil’ e n’en ni kam micheg u nap’an nim ognagem ngak ngki mada’ ko ngiyal’ ni ke yib e lumel ngom ara ga be mada’nag e skeng. (Mu beeg e Eklesiastes 5:​4, 5.) Bochan ni gur reb i gachalpen Jesus, ma aram e ga ra folwok rok mu kum rin’ e pi n’en ke tay chilen u rogon feni chugur nrayog rom. (Matt. 28:​19, 20; 1 Pet. 2:21) Re article ney e ra ayuwegem ni ngam rin’ e re n’ey.

‘NGAUM LEK’ JESUS NI YUGU ARAM ROGON NI BE YIB E SKENG NGE LUMEL NGOM

4. Uw rogon ni be fek pi gachalpen Jesus ba ley i “gek’iy ko gafgow”? (Luke 9:23)

⁴ Tomuren ni ga ra un ko taufe, ma ka ga ra mada’nag e magawon. Bin riyul’ riy e tamilangnag Jesus nra reb i gachalpen ma bay e “kuruth rok [“ley rok e gek’iy ko gafgow,” NW]” nra i fek ni “gubin e rran.” (Mu beeg e Luke 9:23.) Ere gur, be yog Jesus ni gubin ngiyal’ nra i gafgow pi gachalpen? Danga’. Ya kemus ni be tamilangnag ni yugu aram rogon ni bay e tow’ath nra yag ngorad, machane ku yad ra mada’nag e magawon. Ma bay boch ko pi magawon ney nrayog nrib gel e mo’maw’ riy.​—2 Tim. 3:12.

5. Mang boch e tow’ath ni micheg Jesus nra yag ngak e piin yad ra pag fan boch ban’en?

⁵ Sana rayog ni ke togopuluw chon e tabinaw rom ngom ara kam pag fan e chugum nge boch ban’en ya nge yag nim m’oneg Gil’ilungun Got u wan’um. (Matt. 6:33) Faanra arrogon, ma rayog ni nge pagan’um ngay ni manang Jehovah urngin ban’en ni kam rin’ ni fan ngak. (Heb. 6:10) Dabisiy ni kam guy nriyul’ fapi thin ni yog Jesus ni be gaar: “En nra pag e tabinaw rok, ara pi walagen ni pumoon, ara pi walagen ni ppin, ara chitiningin, ara chitamangin, ara pi fak, ara yungi binaw ntafen ni bochag nge bochan e Thin Nib Fel’ ni yib rok Got, e ka boor e tin nrayog ngak ko biney e tamilang nra reb ma raay yay e ke mun ngay ni naun, nge pi walagen ni pumoon, nge pi walagen ni ppin, nge pi chitiningin, nge pi fak, nge yungi binaw ntafen, ma ku er rogon e togopluw ni bay i tay e girdi’ ngak; ma bin ni bay yib e tamilang e bay yog e yafos riy ngak ndariy n’umngin nap’an.” (Mark 10:​29, 30) Ere ka boor e tow’ath ni ke yag ngom ko pi n’en kam pag fan.​—Ps. 37:4.

6. Mang fan nra t’uf ni ngam ulul i guy rogon ni ngaum cham ko “tin nib tagan ban’en ni yima ar’arnag” u tomuren ni ga ra un ko taufe?

⁶ Machane tomuren ni ga ra un ko taufe, ma ka ra t’uf ni ngaum cham ko “tin nib tagan ban’en ni yima ar’arnag.” (1 John 2:16) Fan nib t’uf ni ngam rin’ e re n’ey e bochan ndawor mu flont. Ere bay yu ngiyal’ nrayog ni ngaum lem ni bod apostal Paul. I yoloy ni gaar: “Lanin’ug e ri ba adag fare motochiyel rok Got. Machane reb e motochiyel nib thil ko biney e gu be guy ni be maruwel u fithik’ i dowag​—reb e motochiyel ni be togopluw ko bin baaram e motochiyel ni ba adag lanin’ug. Ir e ke tiyeg ni gag e kalbus ko tin ni ba adag e denen ni ir e be maruwel u fithik’ i dowag.” (Rom. 7:​22, 23) Rayog ni nga i mulan’um ni bochan e thingar mu cham ko pi ar’ar nib kireb ni ma yib ngom. Machane faanra um lemnag e n’en nim micheg ngak Jehovah u nap’an nim ognagem ngak, ma ra ayuwegem ni ngam dugliy u wan’um ni ngam gel ko pi lumel ni ma yib ngom. Bin riyul’ riy e n’en nim micheg u nap’an nim ognagem ngak Got e ra momnag boch ban’en ngom u nap’an nra yib e lumel ngom. Ni uw rogon?

7. Nap’an ni ga ra ognagem ngak Jehovah, ma uw rogon nra ayuwegem ni ngam par ni gab yul’yul’ ngak?

⁷ Nap’an ni ga ra ognagem ngak Jehovah ma aram e kam pag fam. Re n’ey e be yip’ fan ni aram e kam mel’eg ni ngam siyeg boch ban’en nde m’agan’ Jehovah ngay. (Matt. 16:24) Ere nap’an ni ga ra mada’nag reb e skeng, ma de t’uf ni ngam par ngam lemnag ko mang e ngam rin’. Ya kam mu’ i dugliy e n’en ga ra rin’ ni aram e ngam par ni gab yul’yul’ ngak Jehovah. Kam dugliy u wan’um ni ngam rin’ e tin nib m’agan’ ngay. Ga ra rin’ e re n’ey ma aram e kam bod Job ni yugu aram rogon nrib gel e mo’maw’ ko skeng ni yib ngak, machane me yog ni gaar: “Gu ra par ni gub yul’yul’ nge mada’ ko ngiyal’ ni ku gum’!”​—Job 27:​5, NW.

8. Faanra um lemnag e meybil nim tay u nap’an nim ognagem, ma uw rogon nra ayuwegem ni ngam siyeg e pi lumel ni ma yib ngom?

⁸ Ra um lemnag e meybil nim tay u nap’an nim ognagem ngak Jehovah, ma ra pi’ gelngim ni ngam siyeg e pi lumel ni ma yib ngom. Bod ni gur, ra um ngongol ara um thin i gosgos ngak e en mabgol rok be’ u reb e kanawo’ nrayog ni nge m’ug riy ni ga baadag facha’, fa? Ba mudugil ni danga’! Kam mu’ i micheg ngak Jehovah ndab mu rin’ ban’en ni aray rogon. Faanra dab mu pag boch e lem nde puluw ni nge sum u lanin’um, ma aram e dabi t’uf ni ngam guy rogon ni ngam siyeg e pi lem nem boch nga tomuren. Ga ra “siyeg” “kanawoen e girdi’ ni kireb.”​—Prov. 4:​14, 15, BT.

9. Faanra um lemnag e meybil nim tay u nap’an nim ognagem, ma uw rogon nra ayuwegem ni ngam m’oneg e tirok Got ban’en u wan’um?

⁹ Uw rogon ni faanra kan ognag reb e maruwel ngom nra mo’maw’nag ngom ni ngaum un ko muulung ni gubin ngiyal’? Ga manang e n’en ngam rin’. U m’on ni ngan ognag e re maruwel nem ngom, ma kam mu’ i dugliy u wan’um ndab mu fek reb e maruwel nra mo’maw’nag ngom ni ngaum un ko muulung. Ere ba mudugil ndab mu guy rogon ni ngam fek fare maruwel ngemu’ mu kum guy rogon ni ngam m’oneg e n’en nib m’agan’ Jehovah ngay. Ga ra fal’eg i lemnag rogon ni dugliy Jesus u wan’ ni nge rin’ e n’en nib m’agan’ e Chitamangin ngay, ma aram mag dugliy u wan’um ni ngam siyeg urngin ban’en ni ga manang nde m’agan’ fare Got ngay ni kam ognagem ngak.​—Matt. 4:10; John 8:29.

10. Uw rogon nra ayuwegem Jehovah ni ‘ngaum lek’ Jesus u tomuren ni kam un ko taufe?

¹⁰ Bin riyul’ riy e pi skeng nge lumel ni ma yib ngom e ma bing e kanawo’ ngom ni ngam dag ni kam dugliy u wan’um ni ‘ngaum lek’ Jesus. Nap’an ni ga ra rin’ e re n’ey, ma aram e rayog ni nge pagan’um ngay nra ayuwegem Jehovah. Be gaar e Bible: “Got e dabi thiliyeg e tin ni ke yog nra rin’ ngodad, ma dabiyog ni nge pagmed nge yib ngomed e pi n’en ni ma waliy e girdi’ nge denen nge pag rogon ndabiyog romed ni ngam taleged gimed riy; machane re ngiyal’ i n’em e ra pi’ gelngimed ngam k’adedan’med riy, ni aram e ke pi’ e kanawo’ ngomed ni ngam bad riy nga wuru’ e pi n’em.”​—1 Kor. 10:13.

ROGON NI NGAUM LEK JESUS

11. Mang reb e kanawo’ nrib manigil nrayog ni ngaum lek Jesus riy? (Kum guy e sasing.)

¹¹ Ba pasig Jesus ma i par nib chugur ngak Jehovah u daken e meybil ni i tay. (Luke 6:12) Bin riyul’ riy e reb e ban’en nrib manigil nra ayuwegem ni ngaum lek Jesus u tomuren ni kam un ko taufe e aram e ngam ulul i rin’ e pi n’en nra i chugurnagem ngak Jehovah. Be gaar e Bible: “Nga darod i yan nga m’on ni bod rogon fapi motochiyel ni ud folgad riy ke yan i mada’ ko chiney.” (Fil. 3:16) Bay yu ngiyal’ nra um rung’ag murung’agen boch e walag ni kar dugliyed ni ngar yoornaged e tin yad be rin’ ni fan ko pigpig rorad. Sana rayog ni kar uned ko fare School for Kingdom Evangelizers ara ka ranod nga bang nib t’uf e ayuw ko machib riy. Faanra rayog ni ngam nameg boch ban’en ni aray rogom, mag athamgil ngam rin’. Girdi’ rok Jehovah e ri yad baadag ni ngar yoornaged e tin yad ma rin’ ni fan ngak. (Acts 16:9) Machane uw rogon ni faanra dabiyog ni ngam rin’ e re n’ey e chiney? Faanra aray rogon, ma dab mu lemnag ni piin nrayog rorad e ka yad ba fel’ ngom. Ya athamgil ni ga be tay e aram e n’en nib ga’ fan. (Matt. 10:22) Dab mu pagtalin nri ma felfelan’ Jehovah u nap’an nra guyem ni ga be rin’ e tin nrayog rom ni fan ko pigpig ni ga be tay ngak. Aram reb e kanawo’ nib ga’ fan nrayog ni ngam ulul i lek Jesus riy u tomuren ni kam un ko taufe.​—Ps. 26:1.

12-13. Mang e rayog ni ngam rin’ ni faanra gathi ri ka gab pasig? (1 Korinth 9:​16, 17) (Kum guy fare kahol ni kenggin e “Mu Ulul ko Fare Sagreng.”)

¹² Uw rogon ni faanra ga be lemnag ndakumur meybil nrogon ni ke yib u gum’irchaem ara gathi ri ka gab felfelan’ ko machib ni ga ma tay ni bod kafram? Fa reb uw rogon ni faanra gathi ri ka ga baadag ni ga ma beeg e Bible rom ni bod kafram? Faanra buch e pi n’ey rom u tomuren ni kam un ko taufe, ma dab mu lemnag ndakuriy gelngin Jehovah nib thothup rom. Bochan ndawor mu flont, ma aram fan nrayog ni nga i thilthil rogon lanin’um u boch ban’en. Faanra kam tabab ni ngam malmal ko pigpig ni ga be tay, mag lemnag e n’en ni rin’ apostal Paul. Yugu aram rogon ni i guy rogon ni nge folwok rok Jesus, machane manang ni bay yu ngiyal’ nsana dab ri adag ni nge rin’ e n’en nib t’uf ni nge rin’. (Mu beeg e 1 Korinth 9:​16, 17.) I yog ni gaar: “Gu be ngongliy ni bochan e ri maruwel rog ni ke pi’ Got ngog ni nggu rin’, ma aram fan ni nggu muruwliy nib maruwel ni ka ni pi’ ngog.” N’en be yip’ Paul fan u roy e ke dugliy u wan’ ni nge rin’ urngin e maruwel ni kan pi’ ngak ni fan ko machib ni yugu aram rogon e lem ni be tay e ngiyal’ nem.

¹³ Ku arrogom ndab um dugliy boch ban’en ni be yan u rogon e n’en baadag lanin’um. Mu dugliy u wan’um ni ngam rin’ e tin nib fel’ ni yugu aram rogon ni gathi rib m’agan’um ngay. Faanra um rin’ e tin nib fel’ ma ra munmun ma ra thil e lem rom. Demtrug rogon ma faanra um rin’ e tin nib t’uf ni ngam rin’ ni fan ko tirok Got ban’en ma ra ayuwegem ni ngaum lek Jesus u tomuren ni kam un ko taufe. Ra um rin’ e re n’ey maku ra pi’ e athamgil nga laniyan’ e pi walag.​—1 Thess. 5:11.

“MU CHANGARGAD NGOMED”

14. Mang e susun ni ngaum yaliy u rarogom ni gubin ngiyal’, ma mang fan? (2 Korinth 13:5)

¹⁴ Tomuren ni kam un ko taufe ma kub fel’ ni ngaum par ma ga be yaliy boch ban’en u rarogom. (Mu beeg e 2 Korinth 13:5.) Ba fel’ ni nge ba ngiyal’ mag lemnag ko ka ga be meybil ni gubin e rran, ma ga be beeg ma ga be fil e Bible rom, ma ga be un ko muulung nge machib fa danga’. Mu guy rogon ni ngam gay boch e kanawo’ nrayog ni ngam adag ni ngam rin’ e pi n’ey riy miki yib angin ngom. Bod nrayog ni ngam fithem ni nge lungum: ‘Rayog ni nggu weliy e pi kenggin e machib u Bible ngak yugu boch e girdi’, fa? Bay boch e kanawo’ nrayog ni nggu felfelan’ riy ko machib nug be tay, fa? Uw feni tamilang e pi n’en nug ma weliy u lan e meybil rog? Ma gur, be m’ug riy nrug be taga’ ngak Jehovah, fa? Gu ma un ko muulung ni gubin ngiyal’, fa? Uw rogon ni nggu mon’og u rogon e motoyil nug ma tay u nap’an e muulung nge rogon nug ma un ko pi n’en yima rin’ riy?’

15-16. Mang e kam fil ko n’en ni buch rok reb e walag ni pumoon u murung’agen rogon ni gad ma siyeg e pi lumel ni ma yib ngodad?

¹⁵ Kub ga’ fan ni ngam nang e n’en gab meewar riy. Bay reb e walag ni pumoon ni ka nog Robert ngak ni weliy ban’en ni buch rok ni be tamilangnag feni ga’ fan e re n’ey. I yog ni gaar: “Nap’an ni ke gaman sogonap’an 20 e duw rog, mug un nga reb e maruwel ni gathi ba polo’ e tayim rog. Ere yan i borran ma bay be’ nib pin ni gamow nga maruwel ni piningeg nga tafen. I yog ngog ni gamow ra yan ngaram me de moy be’ u rom ma rayog ni ‘nggu felfelan’gow u taabang.’ Som’on e yug gu tawey nga in ban’en ni bochan e nge dab gu un ngak, machane me yan i tomur riy mu gog ngak ndab gu un ngak mug weliy fan.” I siyeg Robert e lumel ni yib ngak, mab manigil e n’en ni rin’. Machane nap’an ni sul nge lemnag e re n’em boch nga tomuren, me yan i nang ni gathi aram e n’en nsusun e nge rin’. I yog ni gaar: “Dag gurnageg nggu siyeg e n’en ni yog ngog ni bod rogon ni siyeg Josef e n’en ni ognag leengin Potifar ngak. (Gen. 39:7-9) Bin riyul’ riy e kug gin nga feni mo’maw’ nug siyeg e re n’em. Re n’ey ni buch e ayuwegeg ni nggu nang nib t’uf ni nggu gelnag e tha’ u thilmow Jehovah.”

¹⁶ Faan ga ra fal’eg i yaliy boch ban’en u rarogom ni bod e n’en ni rin’ Robert, ma sana ku ra yib angin ngom. Mus ni faanra ke yag ni ngam siyeg reb e lumel ni ke yib ngom, ma ngkum fithem ni nge lungum, ‘Uw n’umngin nap’an mfini yag ni nggu siyeg e re n’em?’ Dabi mulan’um ni faanra kam guy ni bay boch ban’en nib t’uf ni ngam mon’og riy. Mu felfelan’ ngay ni ke yag ni ngam nang e meewar rom. Mag meybil mag rin’ boch ban’en ya nge yag ni ngarim dugliy u wan’um ni ngaum fol ko pi motochiyel rok Jehovah.​—Ps. 139:​23, 24.

17. Mang rogon fithingan Jehovah ko n’en ni buch rok Robert?

¹⁷ Ku bay ban’en ni gad ra fil ko n’en ni buch rok Robert. I ulul ngay ni gaar: “Tomuren nug siyeg e n’en ni yog fare pin ni gamow nga maruwel, me gaar gog, ‘Kam gel ko skeng ni kug pi’ ngom!’ Ere gog ngak ni nge weliy ngog fan e n’en ke yog, ma aram me yog ni bay reb e fager rok ni immoy ni ir reb e Pi Mich ni yog ngak ni gubin e Pi Mich ni kab fel’ yangarrad ni yad ma mith ngaur rin’ed boch ban’en nib kireb ni faanra ke mab e kanawo’ ngorad. Ere ke yog ko re fager rok nem ni bayi skengnageg ya nge guy ko aram rogog fa danga’. Nap’an ni yog e re n’ey ma rug felfelan’ ndag kirebnag fithingan Jehovah.”

18. Mang e kam dugliy u wan’um ni ngam rin’ u tomuren ni kam un ko taufe? (Kum guy fare kahol ni kenggin e “L’agruw i Article ni Ga Ra Adag.”)

¹⁸ Nap’an ni ga ra ognagem ngak Jehovah ngam un ko taufe, ma aram e ga be dag ni ga baadag ni ngam thothupnag fithingan ni yugu demtrug e n’en nra buch rom. Rayog ni nge pagan’um ngay ni manang Jehovah e pi skeng nge lumel ni ma yib ngom. Ma ra tow’athnagem ko athamgil ni ga ra tay ni ngam par ni gab yul’yul’. Nge pagan’um ngay nra fanay gelngin nib thothup ni nge pi’ gelngim ni ngam par ni gab yul’yul’. (Luke 11:​11-13) Ra ayuwegem Jehovah ni ngaum lek Jesus u tomuren ni kam un ko taufe.