Ke Bung Rogom ni Ngam Ognagem Ngak Jehovah, Fa?

1-2. Mang e thingari rin’ be’ u m’on ni nge un ko taufe?

U LAN fa lal i duw ni ke yan mab pag reb e milyon e girdi’ ni kan taufenagrad kar manged boch e Pi Mich Rok Jehovah. Boor i yad e ni fil e tin riyul’ ngak u nap’an ni ‘kab bitir’ ni bod Timothy nreb i gachalpen Jesus ni immoy ko bin som’on e chibog. (2 Tim. 3:​14, 15) Ma boch i yad e ka fini fil murung’agen Jehovah u nap’an ni ke ilal ara ke pilibthir. Bay be’ nib pin ni kar filed e Pi Mich Rok Jehovah e Bible nni taufenag u nap’an ni ke gaman 97 e duw rok!

² Faanra ga be fil e Bible fa gallabthir rom e yow l’agruw e Pi Mich, ma ga be lemnag ni ngam un ko taufe, fa? Ireray reb e ban’en nrib manigil ni ngan nameg! Machane u m’on ni ngam un ko taufe, mab t’uf ni ngam ognagem ngak Jehovah. Re article ney e ra weliy e n’en nib muun ko re n’ey. Ku ra ayuwegem ni ngam nang fan ndariy rogon ni ngam rus ni ngam ognagem ngak Got ngam un ko taufe u nap’an ni ke bung rogom.

MANG E BE YIP’ FAN NI NGAM OGNAGEM?

3. Mu weliy murung’agen boch e girdi’ u Bible ni kan ognagrad ngak Jehovah.

³ Re n’ey ni ngan ognagey nrogon ni be yog e Bible e be yip’ fan ni ngan faley nga bang ni fan nga ban’en nib thothup. Fare nam nu Israel e kan ognag ngak Jehovah. Machane bay boch e girdi’ ko re nam nem ni kan ognagrad ngak Jehovah u yugu reb e kanawo’ nib thil. Bod ni Aron e ma tay ba turban ni “pow riy ni ke mang tirok Got” ni bay ba madalia riy nib gol. Re madalia nem e pow riy ni kan fal nga bang ni nge pigpig u reb e kanawo’ nib thil ni aram e nge mang prist nth’abi tolang u Israel. (Lev. 8:​9, BT) Pi Nazirite e kun ognagrad ngak Jehovah u reb e kanawo’ ni kub thil. Fare bugithin ni Nazirite e ke yib ko fare bugithin ni Hebrew ni nazirʹ ni be yip’ fan “Be’ ni Kan Fal Nga Bang” ara “Be’ ni Kan Ognag.” Pi Nazirite e thingar ra folgad ko pi motochiyel ni fan ngorad ni bay u lan fare Motochiyel rok Moses.​—Num. 6:​2-8.

4. (a) Uw rogon ni piin kar ognaged yad ngak Jehovah e kan falrad nga bang ni fan nga ban’en nib thothup? (b) Mang e be yip’ fan ni nge ‘pag be’ talin ir’? (Kum guy e sasing.)

⁴ Nap’an ni ga ra ognagem ngak Jehovah, ma aram e kam mel’eg ni ngam mang reb i gachalpen Jesus Kristus ma nge par e n’en nib m’agan’ Got ngay ni aram e n’en th’abi ga’ fan u lan e yafos rom. Mang e ba muun ko re n’ey? I gaar Jesus: “Faanra ba adag be’ ni nge un ngog, ma thingari pag talin ir.” (Matt. 16:24) Fare thin ni Greek ni kan pilyeg ni “thingari pag talin ir” e ku rayog ni ngan pilyeg ni “thingar dabki yan nga tabon laniyan’.” Nap’an ni ga ra ognagem ngam mang reb e tapigpig rok Jehovah, ma aram e ba t’uf ni ngam siyeg urngin ban’en nde m’agan’ ngay. (2 Kor. 5:​14, 15) Re n’ey e ba muun ngay ni ngam siyeg e “tin nib kireb ni yima ar’arnag” ni bod e ngongol ndarngal. (Gal. 5:​19-21; 1 Kor. 6:18) Faan ga ra fol ko pi motochiyel ney, ma gur, ra mo’maw’ rogon e par rom? Dabi mo’maw’ ni faanra ba t’uf Jehovah rom mab mich u wan’um ni pi motochiyel ni ke ngongliy e gur e fan ngom. (Ps. 119:97; Isa. 48:​17, 18) I yog reb e walag ni pumoon ni ka nog Nicholas ngak ni gaar, “Rayog ni ngam lemnag e pi motochiyel rok Jehovah ni bod e yoror ko kalbus ni be talegem ndab mu rin’ e n’en ga baadag ara yoror u ba tafen e layon ni be ayuwegem ndabi buch ban’en rom.”

5. (a) Uw rogon ni ngam ognagem ngak Jehovah? (b) Uw rogon nib thil e bin ngam ognagem ngak Got ko bin ngam un ko taufe? (Kum guy e sasing.)

⁵ Uw rogon ni ngam ognagem ngak Jehovah? Aram e ngam micheg ngak u daken e meybil ni kemus ni yigoo ir e ngam liyor ngak mag m’oneg e n’en nib m’agan’ ngay u lan e yafos rom. Nap’an ni ga ra rin’ e re n’ey, ma aram e ga be micheg ngak Jehovah ni ga ra ulul ni ngam t’ufeg “u polo’ i gum’irchaem, ngu polo’ i lanin’um, ngu polo’ i lem rom, ngu polo’ i gelngim.” (Mark 12:30) Re n’ey ni ngam ognagem e ban’en ni kam rin’ ni yigoo gur, ma kemus nu thilmew Jehovah. Machane taufe e ban’en ni ngam rin’ u p’eowchen e girdi’ ni yoor ni be m’ug riy ni kam ognagem. Nap’an ni ga ra ognagem ma aram e kam micheg ban’en nrib ga’ fan. Susun e ngam nameg ni ngam tay u gil’ e n’en kam micheg, maku aram e n’en baadag Jehovah ni ngam rin’.​—Ekl. 5:​4, 5.

MANG FAN NI NGAM OGNAGEM NGAK JEHOVAH?

6. Mang e ma k’aring be’ ni nge ognag ir ngak Jehovah?

⁶ Bin th’abi ga’ i fan ni ngam ognagem ngak Jehovah e bochan nib t’uf rom. Re t’ufeg ney e gathi kemus ni ban’en ni ga be thamiy. Ya ke t’uf Jehovah rom ni bochan e ke yag e bin riyul’ e ‘tamilangan’’ ngom u murung’agen nge n’en nib m’agan’ ngay. (Kol. 1:9) Pi n’en kam fil u Bible e ke micheg ngom (1) nib riyul’ Jehovah, (2) Bible e aram e Thin rok ni kan thagthagnag, ma (3) ma fanay e ulung rok ni nge lebguy e n’en nib m’agan’ ngay.

7. Mang e susun ni ngad rin’ed u m’on ni ngad ognaged gadad ngak Got?

⁷ Piin kar ognaged yad ngak Jehovah e susun e kar nanged e pi kenggin e machib u lan e Thin rok Got ma yad be fol ko pi motochiyel rok. Yad ma weliy e michan’ rorad ngak yugu boch e girdi’ u rogon nrayog rorad. (Matt. 28:​19, 20) Kari t’uf Jehovah rorad ma ri yad baadag ni yigoo ir e ngar liyorgad ngak. Arrogom, fa? Ra bay e re t’ufeg ney rom, ma aram e dab mu lemnag ni ngam ognagem ngam un ko taufe ni bochan e ngam felfelan’nag e en ma fil e Bible ngom ara gallabthir rom, ara mu lemnag ni ngam rin’ ni bochan e aram e n’en be rin’ e pi fager rom.

8. Faanra ga be pining e magar ko n’en ke rin’ Jehovah ni fan ngom, ma uw rogon nra ayuwegem ni ngam dugliy ni ngam ognagem ngak? (Psalm 116:​12-14)

⁸ Nap’an ni ga ra lemnag urngin ban’en ni ke rin’ Jehovah ni fan ngom, ma aram e ga ra adag ni ngam ognagem ngak. (Mu beeg e Psalm 116:​12-14.) Be yog e Bible ni Jehovah e Ir e Ma Pi’ “urngin e tin nib fel’ . . . ngodad nge urngin e tow’ath nrib manigil.” (Jas. 1:17) Bin th’abi fel’ ko pi tow’ath nem e aram fare maligach ni pi’ Jesus ni Fak. Aygum lemnag e re n’ey! Fare biyul e ke bing e kanawo’ ngom ni nge chugur e tha’ u thilmew Jehovah. Ma kki yognag e athap ngom ko yafos ni manemus. (1 John 4:​9, 10, 19) Ga ra ognagem ngak Jehovah ma aram reb e kanawo’ nib manigil ni ngam dag riy ni ga be pining e magar ko bin th’abi fel’ e kanawo’ ni kan dag e t’ufeg riy ngom nge tin ka bay e tow’ath ni ke pi’ Jehovah ngom. (Deut. 16:​16, 17; 2 Kor. 5:15) Ireray e n’en kan tamilangnag u lan fare ke babyor ni Mu Par Ndariy N’umngin Nap’an ni Gab Felfelan’! ko guruy ni 46 ko bin 4 ni kub muun ngay fare video ni dalip e minit n’umngin nap’an ni kenggin e Presenting Your Gifts to God.

KE BUNG ROGOM NI NGAM OGNAGEM NGAM UN KO TAUFE, FA?

9. Mang fan nsusun e dabi lemnag be’ nthingari ognag ir ni yugu aram rogon ndawori bung rogon?

⁹ Sana rayog ni ga be lemnag ndawori bung rogom ni ngam ognagem ngam un ko taufe. Sana rayog ni kab t’uf ni ngam thilyeg boch ban’en u lan e yafos rom ya nge yag nim fol ko pi motochiyel rok Jehovah, fa reb e rayog ni kab t’uf e tayim ni ngam gelnag e michan’ rom. (Kol. 2:​6, 7) Gathi gubin e piin yad ma fil e Bible ni taareb payngin e mon’og ni yad ma tay, maku gathi gubin e bitir ni taareb e yangar ni yad ma taw ngay me bung rogorad ni ngar ognaged yad ngar uned ko taufe. Ere mu guy rogon ni ngam nang rogon e mon’og ni ga be tay ni fan ko tirok Got ban’en ni be yan u rogon e tin nrayog rom ma gathi tin nrayog rok be’.​—Gal. 6:​4, 5.

10. Mang e rayog ni ngam rin’ ni faanra kam nang ndawori bung rogom ni ngam ognagem ngam un ko taufe? (Kum guy fare kahol ni kenggin e “Fan ko Piin Yibe Chuguliyrad ko Tin Riyul’.”)

¹⁰ Mus ni faanra kam nang ndawori bung rogom ni ngam ognagem ngak Jehovah, ma dab mu tal i nameg e re n’ey. Mmeybil ni nge tow’athnagem Jehovah ko athamgil ni ga be tay ni ngam thilyeg e pi n’en nib t’uf ni ngam thilyeg u rarogom. (Fil. 2:13; 3:16) Rayog ni nge pagan’um ngay nra rung’ag e meybil rom me fulweg taban.​—1 John 5:14.

FAN NI MA TUNTUN BOCH E GIRDI’ NI NGAR OGNAGED YAD NGAR UNED KO TAUFE

11. Uw rogon nra ayuwegdad Jehovah ni ngad pared ni gad ba yul’yul’ ngak?

¹¹ Bay boch e girdi’ ni ke bung rogorad ni ngar ognaged yad ngar uned ko taufe ni ka yad be tuntun ni ngar rin’ed e re n’ey. Sana rayog ni nge lungurad u wan’rad, ‘Uw rogon ni faanra yan i boch nga tomuren mug rin’ reb e denen nib ubchiya’ min chuwegeg ko ulung?’ Faanra ireray e n’en ga be rusnag, ma nge pagan’um ngay nra pi’ Jehovah urngin ban’en nib t’uf rom ya nge yag ni ‘um ngongol nrogon ni ba adag, mu um rin’ e tin nib m’agan’ ngay ni gubin ngiyal’.’ (Kol. 1:10) Ku ra pi’ gelngim ni ngam rin’ e tin nib fel’. Boor e girdi’ ni ke yag ni nge ayuwegrad ni ngar rin’ed e re n’ey. (1 Kor. 10:13) Aram reb i fan nri in e girdi’ ni yima tharbograd ko ulung ni Kristiano. Ma ayuweg Jehovah e girdi’ rok ni ngar pared ni yad ba yul’yul’.

12. Uw rogon ni nge dab da rin’ed reb e denen nib ubchiya’?

¹² Gubin e girdi’ ndawor ra flontgad ni ma yib e lumel ngorad ni ngar rin’ed e tin nib kireb ban’en. (Jas. 1:14) Machane gur e ga ra dugliy ko ngam pagem ko lumel ni ke yib ngom fa danga’. Bin riyul’ riy e gur e ga be gagiyegnag rogon e par rom. Yugu aram rogon ni bay boch e girdi’ ni yad ma yog ndabiyog ni ngad gagiyegnaged rogon e lem ni gad ma tay nge n’en gad ma rin’, machane de riyul’ e re n’ey, ya rayog ni ngam fil rogon ni ngam gagiyegnag e pi ar’ar nib kireb ni ma yib ngom. Ma mus ni faanra kam ar’arnag boch ban’en nib kireb, ma rayog ni ngam mel’eg ndab mu pagem ngay. Ere um meybil ni gubin e rran, ma ga be tiyan’um ko fol Bible ni ga ma tay ni yigoo gur. Mu un ko muulung, ma ga be weliy e michan’ rom ngak yugu boch e girdi’. Faanra um par ni ga be rin’ e pi n’ey ma ra pi’ gelngim ni ngam tay u gil’ e n’en kam micheg u nap’an nim ognagem ngak Got. Ku dab mu pagtalin nra ayuwegem Jehovah ni ngam rin’ e re n’ey.​—Gal. 5:16.

13. Mang e rin’ Josef nrayog ni ngad folwokgad riy?

¹³ Ra mom ni ngam tay u gil’ e n’en kam micheg u nap’an nim ognagem ni faan ga ra dugliy u m’on riy e n’en ngam rin’ u nap’an ni ke yib e lumel ngom. Be weliy e Bible murung’agen boch e girdi’ nrin’ed e re n’ey ni yugu aram rogon ni ku yad boch e girdi’ ndawor ra flontgad. Bod ni boor yay ni i guy leengin Potifar rogon ni ngar parew Josef. Machane manang Josef e n’en nge rin’. Be yog e Bible ni “siyeg” me gaar: “Uw rogon ni nggu ngongliy e binir e ngongol nib kireb ni aram e kug denen nib togopluw ngak Got?” (Gen. 39:​8-10) Ere ba tamilang ni manang Josef e n’en nge rin’ u m’on ni nge guy fare pin rogon ni nge waliy ni nge rin’ ban’en nib kireb. Aram e n’en ni momnag ngak ni nge rin’ e n’en nib fel’ ni nge rin’ u nap’an ni yib e lumel ngak.

14. Uw rogon nrayog ni ngad filed rogon ni ngad siyeged e kireb?

¹⁴ Uw rogon nrayog ni ngam folwok rok Josef? Ka chiney e rayog ni ngam dugliy e n’en ngam rin’ u nap’an ni ke yib e lumel ngom. Mu fil rogon ni ngam siyeg e pi n’en nib fanenikan Jehovah ni ka chingiyal’ nem ma dab kum lemnag. (Ps. 97:10; 119:165) Ga ra rin’ e re n’ey ma aram e dab mu denen u nap’an ni ke yib e lumel ngom, ya ga manang e n’en ngam rin’.

15. Uw rogon nrayog ni nge dag be’ ni be “gayiy” Jehovah? (Hebrews 11:6)

¹⁵ Sana rayog ni ga manang ni ireray e tin riyul’ ma ga baadag ni ngam pigpig ngak Jehovah u polo’ i gum’irchaem, machane ka bay ban’en ni be talegem ndamur ognagem ngam un ko taufe. Ere rayog ni ngam rin’ e n’en ni rin’ David ni Pilung. Rayog ni ngam wenig ngak Jehovah ni nge lungum: “Got, mu guy lanin’ug ngam nang; mu sikengnigeg ngam nang e lem rog. Ma gguy ko bay e sabanban riy fa dariy, ma ga pow’iyeg u daken fa bin dabi m’ay e kanawo’.” (Ps. 139:​23, 24) Ma tow’athnag Jehovah e piin yad ma “gayiy.” Ere ga ra guy rogon ni ngam ognagem ngam un ko taufe ma aram e ga be dag ngak ni ireray e n’en ga be rin’.​—Mu beeg e Hebrews 11:6.

UM CHUGURNAGEM NGAK JEHOVAH

16-17. Uw rogon ni ma pow’iy Jehovah e piin yibe chuguliyrad ko tin riyul’ ngak? (John 6:44)

¹⁶ I yog Jesus ni Jehovah e ir e ma pow’iy pi gachalpen ngak. (Mu beeg e John 6:44.) Am lemnag feni manigil e re thin ney nge rogon nib l’ag ngom. Gubin e piin ma pow’iyrad Jehovah ngak ni ma guy ban’en nib manigil rorad ni be’ nge be’. Nap’an nra pow’iy bagayad ngak, ma ma tay ni ir reb i “girdien.” (Deut. 7:6) Ere arrogom u wan’.

¹⁷ Machane sana rayog ni gur reb e fel’ yangaren ni yibe chuguliyem ko tin riyul’. Ere rayog ni ngam lemnag ni ga be pigpig ngak Jehovah ni bochan e gallabthir rom, ma gathi bochan e ir e ke pow’iyem ngak. Machane be gaar e Bible: “Mu chugurgad ngak Got, me chugur ngomed.” (Jas. 4:8; 1 Kron. 28:9) Ga ra guy rogon ni ngam chugur ngak Jehovah, ma aram e ku ra chugur ngom. Der ma tem Jehovah ni kemus ni gur bang u reb e ulung, ya ma pow’iydad ngak ni be’ nge be’ nib muun ngay e piin yibe chuguliyrad ko tin riyul’. Ere nap’an nra guy be’ ni yibe chuguliy ko tin riyul’ rogon ni nge chugur ngak Jehovah, ma aram e ku ra chugur Jehovah ngak nrogon ni kad guyed ko James 4:8.​—Mu taarebrogonnag ko 2 Thessalonika 2:13.

18. Mang e gad ra weliy ko bin migid e article? (Psalm 40:8)

¹⁸ Nap’an ni ga ra ognagem ngak Jehovah ngam un ko taufe, ma aram e ga be lem ni bod Jesus. Ba m’agan’ ngay ni nge pi’ ir ngak e Chitamangin ni nge rin’ urngin e tin ka nog ngak. (Mu beeg e Psalm 40:8; Heb. 10:7) Bin migid e article e gad ra weliy riy e n’en nra ayuwegem ni ngam ulul ko pigpig ngak Jehovah u fithik’ e yul’yul’ u tomuren ni kam un ko taufe.