Yan U Taabang Rok Got—Som’on Ko Yan
“Mu chugurgad ngak Got, me chugur ngomed.”—JAMES 4:8.
1, 2. Mang fan ni pigpig ku Jehovah aram ba taw’ath?
KE gafgow fre moon u kalbus u lan in e duw. Ma aram min fek i yib nga p’eowchen fre pilung ko re binaw nem. Ma boor ban’en ni buch nib pay. Rib tomgin ni ke mang fre kalbus reb e tapigpig ko fre pilung ni ir e th’abi ga’ u fayleng ko ngiyal’ nem. Ke yan e re kalbus nem ko liw nib tolang ma boor ban’en ni kan tay nib mil fan ngak. Ir Josef—ni fre moon ni kan m’ag ay faram ko gaf—ma chiney e be yan u taabang ko fre pilung!—Genesis 41:14, 39-43; Psalm 105:17, 18.
2 Ngiyal’ ney ma boor e girdi’ e rayog ni ngar uned ko pigpig ku be’ ni kab tolang ngak Farao ni pilung nu Egypt. Fa An Th’abi Ga’ u palpal th’ib e be piningdad ni ngad pigpiggad ngak. Aram ba taw’ath ni rib manigil maku rayog ni ngan chugur ngak Jehovah nge fel’ thildad fre Got Nth’abi Ga’! Be weliy e Bible ni rib ba gel gelngin, mab rir, mab gamog, mab gapas laniyan’. (Ezekiel 1:26-28; Revelation 4:1-3) Urngin ban’en e ma rin’ u fithik’ e t’ufeg. (1 John 4:8) Ma der ma ban. (Numbers 23:19) Ma ma ayuweg Jehovah e piin nib yul’yul’ ngak. (Psalm 18:25) Faanra gad ra fol ko pi motochiyel rok nib mat’aw ma rayog ni ngad pared nib falfalan’ e chiney ni bay fan e yafas rodad ma rayog ni nge l’agan’dad ko yafas ni manemus nga m’on. (John 17:3) Dariy reb e pilung u fayleng nrayog ni nge pi’ e flaab ni aram rogon.
3. Uw rogon ni ‘par Noah ni ba’ Got rok’?
3 Ke n’uw nap’an faram me dugliy Noah ni nge par ni be fol ko tin nib m’agan’ Got ngay. Be weliy e Bible u murung’agen ni gaar: “Noah e be’ nib moon nib fel’ ni ke mus ni ir e immoy ni kab fel’ u wan’ Got e ngiyal’ nem; i par ni ba’ Got rok.” (Genesis 6:9) Ma gathi rriyul’ ni ka ranow Jehovah u taabang, ya “dariy be’ ni kaa guy owchen Got.” (John 1:18) Machane i yan Noah u taabang rok Got ya ke fol ko n’en ni yog Got ngak ni nge rin’. I ognag Noah ir ni nge rin’ e n’en nib m’agan’ Jehovah ngay, ma aram e ke fel’ thilrow Got Nth’abi Ga’. Bod Noah ma bokum milyon e girdi’ ko ngiyal’ ney e yad be ‘yan Got u taabang’ ya yad be par ni yad be fol ko pi motochiyel rok. Uw rogon nrayog ni nge tabab be’ ni nge un ko re kanawo’ nem?
Ba T’uf e Tamilangan’ nib Puluw
4. Uw rogon ni ma fonownag Jehovah e girdi’ rok?
4 Ra ngan yan u taabang rok Jehovah ma som’on ma thingarda nanged ko ir mini’. I yiiynag Isaiah ni profet ni gaar: “Tin ni bay yib e rran nga m’on e re burey ni bay e tempel riy e bayi par ni ir e ba th’abi tolang. Pire’ e nam ni bay ra bad ngay, ma girdi’ ko pi nam nem e bayi lungurad, ‘Nga darod ko fare burey rok [Jehovah], ko tempel rok fare Got nu Israel. Ya ngad filed e n’en ni ba adag ni ngad rin’ed; mu udarod ko yu pa’ i kanawo’ ni ke turguy ni nga darod riy.’ Machib rok [Jehovah] e yib u Jerusalem; ke par u Zion be non ngak e tirok e girdi’.” (Isaiah 2:2, 3) Arrogon, rayog ni ngad pagedan’dad ngak Jehovah ni nge fil e kanawo’ rok ngak urngin e girdi’ ni be gayiy. Ke pi’ Jehovah e Thin Rok ni bay ko Bible, ma ma ayuwegdad ngad nanged fan. Reb e kanawo’ ni ma rin’ e re n’ey e ma rin’ u daken “fare tapigpig nib yul’yul’ mab gonop.” (Matthew 24:45-47) Ma fanay Jehovah ‘fare tapigpig nib yul’yul’’ ni nge pi’ e fonow nib spiritual ni bay ko pi babyor ni ma tamilangnag e thin ko Bible, nge pi muulung ko Kristiano, nge fare yaram ni ngan fil e Bible ngak be’. Ku ma ayuweg Got e girdi’ rok ngar nanged fan e Thin Rok u daken e kan ni thothup rok.—1 Korinth 2:10-16.
5. Mang fan ni ngan chaariy e thin riyul’ ni bay ko Bible?
5 Yugu aram rogon ni dariy puluwon e thin riyul’ ko Bible, machane ri baga’ fan. Nap’an ni gad ma fil e Thin Rok Got ma gad ma fil u murung’agen Got—ni fithingan, nge pangin, nge tin m’agan’ ngay, nge rogon ni ma ngongol ngak e girdi’. Ku gad ma fil e fulweg ko boch e deer ni baga’ fan ko par ni: Mang fan ni gad bay? Mang fan ni ma pag Got e kireb? Mang e bay nga m’on rodad? Mang fan ni gad ma pillibthir iyan ma gad yim’? Bay e yafas u tomren e yam’ fa? Maku, gad ma fil e tin nib m’agan’ Got ngay ni fan ngodad, nge uw rogon ni nga darod ni nge felan’ Got ngodad. Gad ma fil ni pi n’en nib t’uf ku Got ni ngad rin’ed e ba manigil ma gathi mo’maw ma ra yib angin ngodad ni ngad folgad riy. Faan mang e de fil Got e pi n’em ngodad, ma dabda nanged fan e pi n’en nem.
6. Mang kanawo’ ni ma ayuwegdad e tamilangan’ ko Bible ni ngada leked?
6 Thin riyul’ ko Bible e ba gel gelngin ma ma k’aringdad ngad thiliyeged boch ban’en ko yafas rodad. (Hebrews 4:12) U m’on ni kad filed e tamilangan’ ko Bible ma u darod u “kanawoen e kireb nu fayleng.” (Efesus 2:2) Machane tamilangan’ ko Thin Rok Got e ma yog yugu reb e kanawo’ ni aram e rayog ni nga darod “nrogon ni ba adag [Jehovah], mu u[d] rin’ed e tin nib m’agan’ ngay ni gubin ngiyal’.” (Kolose 1:10) Rib gel e falfalan’ riy ni kad tababgad ni nguu darod Jehovah u taabang, ni ir fa An nth’abi fel’ u palpal th’ib!—Luke 11:28.
L’agruw Ban’en ni Baga’ Fan—Ognagey ku Got nge Taufe
7. Nap’an ni gad be fil e Thin Rok Got, ma mang thin riyul’ u murung’agen e gagiyeg ko girdi’ e ra gagiyel?
7 Nap’an ni ke tamilangan’dad ko Bible, ma gad ra guy e pi n’en ni be buch u fayleng, nge yafas rodad u rogon nib puluw ko tamilangan’ nib spiritual ni bay ko Thin Rok Got. Ma aram me gagiyel reb e thin nriyul’ ni baga’ fan. Aram e thin nriyul’ ni weliy Jeremiah ni profet murung’agen ni gaar: “Gu manang, O Jehovah, ni dariy rogon ngak e girdi’ ni nge turguy e kanawo’ rok. De mil fan ngak e girdi’ ni be yan ni nge gagiyegnag e yan rok.” (Jeremiah 10:23, New World Translation) Ba t’uf ko girdi’—ni gad gubin—ni nge pow’iydad Got.
8. (a) Mang e ma k’aring e girdi’ ni ngar ognaged yad ku Got? (b) Mang fan e ognagey ko Kristiano?
8 Gad ra nang fan e re n’ey ma aram e ra ayuwegdad ni ngad gayed e ayuw rok Jehovah ni nge pow’iydad. Ma rogon nib t’uf Got rodad e ma ayuwegdad ni ngad ognaged e yafas rodad ngak. Rogon ni ngad ognaged gadad ngak Got e ngan non ngak u fithik’ e meybil min micheg ngak ni gad ra fanay e yafas rodad ni ngad pigpiggad ngak nga u darod u kanawo’ rok u fithik’ e yul’yul’. Faanra gad ra rin’ ni aram rogon, ma gad be folwok rok Jesus, ya ke pi’ ir ngak Jehovah me mudugilan’ ngay ni nge rin’ e tin nib m’agan’ Got ngay.—Hebrews 10:7.
9. Mang fan ni ma ognag e girdi’ e yafas rorad ku Jehovah?
9 Der ma towasariy Jehovah Got be’ ni nge ognag ir ngak. (Mu taarebnag ko 2 Korinth 9:7.) Maku, der ma lemnag Got ni nge ognag be’ ir Ngak ni bochan ni aram e n’en ni ba adag ko chi ngiyal’ nem ma ke mus. U m’on ni nge un be’ ko taufe, ma thingari mang reb e gachalpen Jesus, me ere ba t’uf ni nge athamgil ni nge fil e tamilangan’ rok Got. (Matthew 28:19, 20) I wenig Paul ko piin ni kar uned ko taufe ni ‘nga[r] pied [yad] ngak Got, nga[r] manged maligach nib fos ngak, ni ka[r] pied [yad] ko maruwel rok ma [yad] ba fel’ u wan’. Ereray e bin riyul’ e liyor ni susun e nga[r] pied ngak Got.’ (Roma 12:1) Ku aram rogon ni gad ma ognagdad ngak Jehovah Got. Tomren ni kad filed e n’en nib t’uf ni ngad rin’ed ma gad fl’eg i lemnag, ma ke m’agan’dad ngay ma kad falfalan’gad ni ngad ognaged gadad ku Got.—Psalm 110:3.
10. Uw rogon nib peth e ognagey ku Got nge taufe?
10 Tomren ni kad meybilgad ku Got ni ka dogned ngak ni gad ba adag ni nga darod ko kanawo’ rok, ma gad ra yan ko thal ni migid. Gad ra tamilangnag ngak e girdi’ ni kad ognaged gadad ku Got ya gad ra un ko taufe u fithik’ e ran. Aram e kad tamilangnaged u fithik’ e yoor ni kad micheged ni gad ra rin’ e tin nib m’agan’ Got ngay. I dag Jesus e kanawo’ ngodad ya u tabolngin e machib ni tay u fayleng, me yog ku John ni ngan taufenag. (Matthew 3:13-17) Ma boch nga tomren me tay Jesus chilen ko pi gachalpen ni ngar pingeged e girdi’ ngar manged pi gachalpen min taufenagrad. Ere piin nib t’uf ni nga ranod Jehovah u taabang e ba t’uf ni ngar ognaged yad ngak mar uned ko taufe.
11, 12. (a) Uw rogon ma taareb rogon e taufe nge m’agpa’? (b) Uw rogon ma rogon thildad Jehovah e bod rogon e tha’ u thilin ba wu’ i mabgol?
11 Be’ ni ke ognag ir ngak Got me mang reb e gachalpen Jesus Kristus e bod ni ke un ko mabgol. U boor e binaw ma u m’on ko rofen ni m’agpa’ ma bay boch ban’en ni ngan rin’. Ya ra mada’ fre pumoon nge fre ppin, ma yow ra nangew yow, ma aram me t’uf bagayow rok bagayow. Mara migid, ma yow ra micheg ni yow ra mabgol. Fre m’ag pa’ e ma tamilangnag u fithik’ e yoor e n’en ni kar turguyew ni goo yow—ni ngar mabolgow mi yow par u taabang ni figirngiy nge leengiy. Ngiyal’ ni kan m’agpa’ e be tamilangnag u fithik’ e yoor tabolngin e re tha’ nib biech nem. Rofen nem e tabolngin e mabgol. Ku arrogon e taufe ni aram tabolngin e yafas ni kan ognag ku Jehovah min micheg ni ngan yan u taabang u reb e tha’ nib biech.
12 Mu lemnag yugu reb e ban’en ni taareb rogon ngay. Tomren e rofen ko m’agpa’ ma susun ni nge gel iyan rogon nib t’uf bagayow rok bagayow fa wu’ i mabgol. Ra ngar chuchugurgow ngorow, ma yow l’agruw ma ba t’uf ni ngar athamgilgow ni ngar gelnagew e tha’ u thilrow. Yugu demtrug ni gathi kad mabgolgad Got, machane tomren ni kad uned ko taufe ma thingarda athamgilgad ni ngad pared nib chuchugur ngak Jehovah. Ma ma guydad ma ma tay fan e athamgil ni gad ma tay ni ngad rin’ed e tin nib m’agan’ ngay, ma ma chugur ngodad. I yoloy James ni gaar: “Mu chugurgad ngak Got, me chugur ngomed.”—James 4:8.
Ngan Lek Luwan Ay Jesus
13. Nap’an ni gad ra yan Got u taabang, ma susun mini’ e ngad folwokgad rok?
13 Ra nga darod Jehovah u taabang ma thingarda folwokgad rok Jesus Kristus. I yoloy apostal Peter ni gaar: “Ereray e re n’en ni ir e ke piningmed Got ngay; yi Kristus e ir e gafgow ni bochmed me dag ngomed rogon ni ngam folwokgad rok, ni aram e nguum leked luwan ay.” (1 Peter 2:21) Jesus e be’ nib flont, ma gathi gad ba flont, ere dabiyog ni ngad folwokgad rok nri rogon. Machane, ba adag Jehovah ni ngad rin’ed nge mus rogodad riy. Ngada lemnaged lal ban’en ko yafas rok Jesus nge machib ni i tay ni susun nge athamgil e pi Kristiano ni kar ognaged yad ku Got ni ngar folgad riy.
14. Mang e ba l’ag ngay ni ngan nang e Thin Rok Got?
14 Kari tamilang u wan’ Jesus e Thin Rok Got. Nap’an e machib ni i tay, me weliy e thin ni bay ko Bin ni Hebrew e M’ag ko Bible. (Luke 4:4, 8) Machane ki weliy e pi tayugang ko teliw ko ngiyal’ nem e thin ko Bible. (Matthew 22:23, 24) N’en nib thil riy e ma nang Jesus e thin ko Bible, ma ma folwok riy ko yafas rok. Ma gathi ke mus ni ke nang fre Motochiyel, ya ki nang ko mang fan e pi motochiyel nem. Nap’an ni gad be lek Kristus, ma susun ni ngad athamgilgad ni ngad nanged fan e Thin Rok Got. Faan gad ra rin’ ni aram rogon ma ra felan’ Got ngodad ni gad e pi ta maruwel ni gad be ‘machibnag e thin rok Got nrogon.’—2 Timothy 2:15.
15. Mang kanawo’ ni dag Jesus rogon ni ngan weliy murung’agen Got?
15 I weliy Kristus Jesus murung’agen e Chitamangin nu tharmiy ngak e girdi’. De par Jesus ni yigoo ir e bay e tamilangan’ ko Thin Rok Got rok. Mus ni pi toogor rok ma ur pininged “Tamachib” ngak, ya gubin yang ni ke yan ngay e ke weliy ngak e girdi’ u murung’agen Jehovah nge tin nib m’agan’ ngay. (Matthew 12:38) I machib Jesus u fithik’ e yoor u lan e tempel, nge pi tafen e muulung, ngu lan e pi mach nge binaw. (Mark 1:39; Luke 8:1; John 18:20) Ke machibnag e girdi’ u fithik’ e runguy nge gol, me t’ufeg e piin ni ke ayuwegrad. (Matthew 4:23) Piin ni ma lek luwan ay Jesus e ku yad ma machibnag e girdi’ u boor yang, nge boor e kanawo’ ni ngar filed ngak e girdi’ murung’agen Jehovah Got nge tin nib m’agan’ ngay.
16. Uw rogon thilin Jesus nge piin ni ma liyor ku Jehovah?
16 Kari fel’ thilin Jesus nge piin ni ur liyorgad ku Jehovah. Bay biyay ni be non Jesus ko girdi’ ma ke yib e chitingin nge pi walagen ni ngar nonad ngak. Be weliy e Bible ni gaar: “Ma aram me gaar be’ u rom ngak Jesus, ‘Amu sap, baaram e chitinam nge pi walagem ni pumoon ni yad ba sak’iy u wen ni yad ba adag ni ngam nonod.’ Me fulweg Jesus ni gaar: ‘I mini’ e chitinag? Me mini’ e piin ni walageg ni pumoon?’ Me yip’ pa’ ngak pi gachalpen me gaar, ‘Mu sapgad! U roy e baaray e girdi’ riy ni chitinag nge piin ni walageg ni pumoon! Ya en nra rin’ e tin nib m’agan’ e Chitamag nu tharmiy ngay e ir e walageg ni pumoon, ma walageg ni ppin, ma chitinag.’” (Matthew 12:47-50) Gathi be yog ni ke n’ag Jesus e tabinaw rok, ya boch ban’en ni buch u tomren e re n’em e be micheg ni de yodorom. (John 19:25-27) Machane re thin ney e be tamilangnag rogon fene gel ni ma t’ufeg Jesus e piin ni ke michan’rad ngak. Ku arrogon e ngiyal’ ney ma piin ni ma yan u taabang rok Got e ma chag ko pi tapigpig rok Jehovah ma be gel iyan rogon yad ma t’ufegrad.—1 Peter 4:8.
17. Uw rogon u wan’ Jesus ni nge rin’ e tin nib m’agan’ e Chitamangin nu tharmiy ngay, ma susun nge uw rogon u wan’dad?
17 I dag Jesus ni ba t’uf rok e Chitamangin nu tharmiy ya ke rin’ e tin nib m’agan’ ngay. I fol Jesus ku Jehovah ko urngin ban’en. I gaar: “Ggan rog e nggu fol ko tin ni be finey e en ni l’ugeg ku gub, ma nggu mu’nag e maruwel ni ke pi’ ngog ni nggu muruwliy.” (John 4:34) Ki yog Kristus ni gaar: “Gubin ngiyal’ ma gu be rin’ e tin nib m’agan’ [Got] ngay.” (John 8:29) Rib t’uf e Chitamangin nu tharmiy rok Jesus ma aram me “par nib sobut’an’ ma be fol rok Got nge yan i mada’ ko ngiyal’ ni yim’ riy—ni yam’ ni tay u daken [baley i gek’iy].” (Filippi 2:8) Ma aram me taw’athnag Jehovah Jesus, me tay ko liw nib tolang ni goo Jehovah e kab tolang ngak. (Filippi 2:9-11) Bod Jesus ma gad ma dag nib t’uf Got rodad nfaanra gad ra fol ko pi motochiyel rok ma gad rin’ e tin nib m’agan’ ngay.—1 John 5:3.
18. Mang kanawo’ ni dag Jesus ni fan ko meybil?
18 Jesus e ir be’ ni ma meybil. I meybil u nap’an ni kan taufenag. (Luke 3:21) U m’on ni ke mel’eg fa 12 e apostal rok, me meybil u polo’ reb e nep’. (Luke 6:12, 13) I fil Jesus ko pi gachalpen ko uw rogon ni ngan meybil. (Luke 11:1-4) Fa rofen u m’on ni yim’, me yibilay e pi gachalpen mar meybilgad u taabang. (John 17:1-26) Meybil e ri baga’ fan ko yafas rok Jesus, ma ku arrogon gadad, ya gad pi gachalpen. Rib fel’ ni ngan non ku fa An Th’abi Ga’ u palpal th’ib u fithik’ e meybil! Ma ma fulweg Jehovah taban e meybil ya ke yoloy John ni gaar: “Aram fan nib pagan’dad u p’eowchen Got; mmudugil u wun’dad nra rung’ag e tin ni gadad be yog ni faan gadad ra ning ban’en ngak ni ban’en nib m’agan’ ngay. Demtrug e ngiyal’ ni gadad ra ning ban’en ngak ma be rung’ag e n’en ni gadad be yog; ere faanra gadad manang nib riyul’ e re bugithin ney me ere ka gadad manang ni gadad ra ning ban’en ngak ma ra pi’ ngodad.”—1 John 5:14, 15.
19. (a) Mang felngin Jesus ni susun ngad folwokgad riy? (b) Mang angin ni ma yib ngodad ni ngad filed murung’agen e yafas nge machib ni tay Jesus?
19 Ri boor ban’en nrayog ni ngad filed rok Jesus Kristus ko ngiyal’ ni immoy u fayleng me un ko machib! Mu lemnag e pi felngin ni m’ug rok: t’ufeg, runguy, gol, gelngin nib gel, lem nib thabthabel, sobut’an’, de rus, de siin. Rogon fene yoor e n’en ni gad ra fil u murung’agen Jesus, ma ra gel rogon ni gad ba adag ni ngad manged pi gachalpen nib yul’yul’. Tamilangan’ u murung’agen Jesus e ku ma chugurnagdad ngak Jehovah. Ya Jesus e ri bod e Chitamangin nu tharmiy. Rib fel’ thilrow Jehovah ma aram e ke gaar: “Cha’ ni ke guyeg e ke guy e en ni Chitamangiy.”—John 14:9.
Got e ra Tay Tanggin e Pagan’ Rom Ngak
20. Uw rogon nrayog ni nge mudugilan’dad ni nga darod Jehovah u taabang?
20 Nap’an ni be tabab e bitir ko yan, ma ba thigthig e yan rorad. Uw rogon ni yad ma nang rogon ni nga ranod nib mudugil? Bochan e kan athamgil ni nguun yan ma kan rin’ ni boor yay. Aram rogon e piin ni yad be yan Jehovah u taabang, e yad ma athamgil ni nga ranod u rogon nib mudugil. Ma re n’ey e ba t’uf ni ngan tay e tayim ngan athamgiliy. I tamilangnag Paul rogon fene ga’ fan e athamgil ni nga darod Got u taabang me yoloy ni gaar: “Pi walagmad ni girdien Kristus, ka ba’ ara’ taa ban’en, kam filed romad rogon ni nguum pired nib m’agan’ Got ko n’en ni gimed be rin’ ma mmudugil ni ara’ rogon ni gimed be par. Ere chiney e gamad be wenig ngomed ma gamad be ta’mad ngomed u fithingan Somol ni Jesus ni ngam athamgilgad boch.”—1 Thessalonika 4:1.
21. Nap’an ni gad ra yan Jehovah u taabang ma mang boch e flaab nra yib riy ngodad?
21 Faanra kad ognaged gadad ku Got nib mus rogon, ma ra ayuwegdad ni nguud darod u taabang. (Isaiah 40:29-31) Dariy ban’en ko re fayleng ney ni kab fel’ ko pi flaab ni ma pi’ ko piin ni ma yan ko kanawo’ rok. Ir e ‘An ma fil ngodad rogon nge yib angin ngodad, ma ir fa An ma pow’iydad ko kanawo’ ni susun ni gad be yan ngay. Ma faan gad ra fol ko pi motochiyel rok, ma ra yoor e gapas rodad ni bod e lul’, ma rogon ni gad ra par nib mat’aw e ra bod e n’ew u maday.’ (Isaiah 48:17, 18, NW) Faanra gad ra yan Got u taabang ma gad rin’ u fithik’ e yul’yul’, ma rayog ni nge gapas thildad Got ni dariy n’umngin nap’an.
Uw Rogon ni Ga Ra Fulweg?
◻ Mang fan ni rib ba taw’ath ni ngam marow Got u taabang?
◻ Mang fan ni fol babyor, nge ognagey ku Got, nge taufe aram tabolngin ni ngam marow Jehovah u taabang?
◻ Uw rogon nrayog ni ngad leked luwan’ ay Jesus?
◻ Uw rogon ni gad manang ni ra tay Jehovah tanggin e yan rodad u taabang?
[Sasing ko page 11]
Fol babyor, nge ognagey ku Got, nge taufe, aram e tin som’on e n’en ni ngan rin’ ma darod Got u taabang