Dabmu Pag Nge Gel e Magafan’ Rom Ngom

“DABI magafan’med nga rogomed gabul; ya ba gaman e tin nra magafan’uy ngay ni ba’ riy. Dariy fan ni ngku ni puthuy boch e magafan’ ko magafan’ ni be fek e yu rran i yib.” (Matthew 6:34) Re nem ni yog Jesus Kristus e ba puluw ngodad ko ngiyal ney ya gad be par u bangiyal ni ba gel e magafan’ riy.

Ere, riyul, ni rayog ni ngad pired ni dabi magafan’dad ko pi magawon rodad, n’en ni gad ra dugliy, n’en nib mil fan ngodad, nge pi n’en ni thingar da rin’ed? Pire’ e girdi’ ni ke mulan’rad ma ke magafan’rad ma ke tomal lanin’rad. Aram fan ni pi falay ni ma n’igin nge gapas lanin’uy e aram reb e business ni bokum biyu’ e dolla puluwon.

Ngan Nang e Gin ni Nge Mus Riy

Thingar da fl’eged rogodadd ko pi n’en nib mil fan ngodad, nge n’en ni ngad rin’ed, nge n’en ni gad ra turguy, nge pi magawon ni bay yib ngodad ndemtrug ko ba tomgin fa dangay. Be pi’ e Bible e athamgil nga lanin’dad ni “ngad pired nga but’ ngad tafinaynaged niged puluwon” u mon ni ngad ngongliyed ban’en. (Luke 14:28-30) Re ney e ba muun ngay ni ngan gonopiy e n’en ni rayog ni ngan rin’, nge wenegan ni ra yib riy, ma ngan sumarnag rogon e tayim, maruwel, nge salpiy.

Bpuluw ni nge tafinaynag be’ e pi n’en ni ra buch, machane dabiyog ni nge fl’eg i lemnag urngin ban’en ni ra yib i buch nrogon ni ke lemnag. Ni bod ni sana, ba t’uf ni nge par e tabinaw rom ni dab ra maadadgad, ere ga ra lemnag ko mang e ga ra rin’ faanra yik’ e naun rom. Sana ga ra chuw’iy e smoke detector ara n’en ni ma thang e nifiy. Sana ga ra gay e gin ni ga ra yan riy nga wen ko naun rom nap’an ni ra yik’. Ra diin ma ke pag rogon e lem rom ke magafan’um ngay ma dabki par nib thabthabel e lem rom u murungagen e re n’em? Ma tabab e pi magafan’ ney u nap’an ni ra tabab ni nge magafan’um ko n’en ni gabe lemnag ni ra buch machane daani buch ya ke mus ni lem rom. Lem ni ma wagey e rayog ni nge gel ngom, nge n’iginem ni ngam lemnag ni kam pag talin ban’en ni dam rin’ ni ngam ayuweg e tabinaw rom. Bochan ni gabe lemnag ni daan mu rin’ e n’en ni thingar mu rin’ ma ra tomalnag lanin’um ni ra mo’maw’ rogon ni ngam mol.

Moses u P’eowchen Farao

Ke pi’ Jehovah Got reb e maruwel nib mo’maw ngak Moses ni profet rok. Som’mon, ma thingari yan Moses nga p’eowchen piyu Israel ni nge micheg ngorad ni ke l’og Jehovah ni nge pow’iyrad nga wuru’ yu Egypt. Bin migid, ma thingari yan Moses nga p’eowchen Farao ni nge yog ngak ni nge pag piyu Israel nga ranod. Bin tomur, ma thingari pow’iy Moses bokum milyon e girdi’ u daken e ted ni der tugul ban’en riy nga ba binaw ni ma par e girdi nib kireb riy. (Exodus 3:1-10) Urngin e pi n’en ney ma bay e marus ni ba gel riy, machane i pag Moses ni nge magafan’ ko pi n’en ney nib mil fan ngak ni nge rin’ fa?

Rriyul’ ni, boor ban’en ni thingari lemnag Moses. Ke fith Jehovah ni gaar: “Gu ra yan gu weliy ngak piyu Israel ni lungug ngorad, ‘Got rok pi chitamangimed e ke l’ugeg ni nggub ngomed,’ ma yad ra fitheg ni lungurad, ‘I mini’ fithingan?’ Ma aram e mang e gu ra yog ngorad?” Ke pi’ Jehovah e fulweg riy ngak. (Exodus 3:13, 14) Maku ke magafan’ Moses ko mang e ra buch nfaanra dabi mich u wan’ Farao e n’en ni ke yog ngak. Ku biyay, ke pi’ Jehovah e fulweg ngak fre profet. Bin tomur e magawon e yog Moses ni “da’ni cheg ko welthin.” Uw rogon ni ngan yal’uweg ere n’ey? Ke dugliy Jehovah Aaron ni nge non ni fan ku Moses.​—Exodus 4:1-5, 10-16.

Kan fl’eg rogon Moses ko fulweg ko pi deer ni ke fith ma ke michan’ ngak Got, me rin’ Moses e n’en ni ke motochiyelnag Jehovah ngak. Daani gafgownag ir ni be lemnag ko mang e ra buch u nap’an ni ra yan i sakiy nga p’eowchen Farao, “me rin’ Moses” e n’en ni ka nog ngak.” (Exodus 7:6) Faan mang e pag nge gel e magafan’ rok ngak, ma ra warnag e michan’ rok nge gelngin ni nge rin’ e tin ka nog ngak ni nge rin’.

Rogon ni ke thabthabelnag Moses ni nge maruwliy e maruwel ni kan pi’ ngak e bod rogon e n’en ni ke yog apostal Paul ni “lem nib yal’uw.” (2 Timothy 1:7; Titus 2:2-6) Faan mang e de yal’uw e lem rok Moses, ma sana ra lemnag ni kaygi gel e maruwel ni kan pi’ ngak ma dabi rin’.

Ngam Gagiyegnag e Lem Rom

Mang e ga ma rin’ u gubin e rran nap’an ni yira skengnag e michan’ rom? Ma magafan’um ni ngam lemnag e pi skeng ni ra yib ngom nga m’on? Fa ga ma lemnag rogon ni nge thabthabel? Boch e girdi’ e ra gaar, ‘Ra mub ko wethal fin man nga baraba’.’ Sana de t’uf ni ngam man nga baraba’ e re wethal nem ni be yip’ fan e pi n’en ni ga be lemnag! Ere mang ni nge magafan’um nga ban’en nsana dabi buch? Be gaar e Bible: “Ra magafan’ be’ nga ban’en ma aram e ra k’aring ni nge mulan’.” (Proverbs 12:25, NW) Ma wenegan nra yib riy e ra par be’ ndabiyog ni nge turguy ko mang e nge rin’ ma ra son nge mada’ ko ngiyal’ ni ke yan nap’an.

Ma ban’en ni kab ubchiya’ ko re n’em e aram e rayog ni nge kireb be’ ko tirok Got ban’en ni bochan e magafan’uy. I tamilangnag Jesus Kristus ni rayog ni nge dabki tay be’ fan e ‘thin rok Got ni murung’agen e gagiyeg rok” ni bochan e ke suwey laniyan’ chogowen e fel’ rogon nge “magafan’ ko re par rodad ney u fayleng.” (Matthew 13:19, 22) Bod rogon e rachangel ni rayog ni nge kirebnag e awoch ndabki tugul nge yib wom’engin, ma magafan’ nib pag rogon e rayog ni nge n’igin ndabda mon’oggad ko tirok Got ban’en ma dabi yib wom’engin ni ra n’uf Got. Ma boch e girdi’ e dar ognaged yad ku Jehovah ni bochan e ke magafan’rad ni bochan e lem rorad. Yad ma gaar, ‘Nge diin ndabiyog ni nggu lubeg e n’en nib mil fan ngog ni bochan e kug ognageg ku Got?’

Yog apostal Paul ngodad ni bay e cham rodad nib spiritual, ma gad be “fek urngin e lem ni bod ni yima kol e girdi’ ko mahl ngad pingeged nge fol rok Kristus.” (2 Korinth 10:5) Satan ni Moonyan ni toogor rodad e ra falfalan’ ni nge gel ngodad ni bochan e pi n’en ni gad be magafan’ ngay me n’igin nge m’ingan’dad ma da wargad ko tirok Got ban’en. Ya ba chag ni nge n’igin nge maruwaran’ e girdi’ nga boch ban’en mi yad aw ko wup. Aram fan ni ginang apostal Paul e pi Kristiano ni dabra “binged e kanawo’ ngak moonyan’.” (Efesus 4:27) Satan e ir “fare got ko re m’ag ney” ma ke “n’igin e girdi’ ndariy e michan’ rorad ni nge par lanin’rad u fithik’ e lumor.” (2 Korinth 4:4, NW) Ere dabda paged ni nge suwey lanin’dad!

Bay e Ayuw Rodad

Nap’an ni ke magawon reb e bitir ma rayog ni nge yan ngak e chitamangin nib t’uf rok ma ra pow’iy me fl’eg laniyan’. Ku arrogon gadad ni rayog ni ngad weliyed e magawon rodad ku Jehovah ni Chitamangidad nu tharmiy. Ma rriyul’, ni ma piningdad Jehovah ni ngad paged ngak e pi n’en ni be tomalnag lanin’dad ma ke magafan’dad ngay. (Psalm 55:22) Bod e bitir ni dabki magafan’ ko magawon rok u tomren ni ke pi’ e chitamangin e athamgil nga laniyan’, ma gathi ke mus ni ngad paged e pi n’en ni be tomalnag lanin’dad ngak Jehovah ya ku ngad paged nge par rok.​—James 1:6.

Uw rogon ni ngada paged fan ngak Jehovah e pi n’en ni ke magafan’dad ngay? Filippi 4:6, 7 e be gaar: “Ma dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed, ma gubin ngiyal’ ni nguum ninged ngak ni gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’ircha’med nge tafinay romed ngi i par rok Kristus Jesus.” Arrogon, faanra nguuda yibilayed ku Jehovah ni nge ayuwegdad, ma rayog ni nge pi’ e gapas nga lanin’dad ma ra yororiy ma dabi magafan’dad ko tin ndariy fan.​—Jeremiah 17:7, 8; Matthew 6:25-34.

Machane susun ngad ngongolgad nib puluw ko meybil rodad ere dabda pared u bang ni goo gadad u gubin ngiyal’, ni dabda fl’eged thildad e girdi’. (Proverbs 18:1) Yab fel’ ni ngad lemnaged e pi thin ko Bible nib sor fan ko magawon rodad, ma aram e dabkuda taga’gad nga daken e lem rodad. (Proverbs 3:5, 6) Pagal nge pillibthir e yad gubin ma rayog ni ngar sapgad ko Bible nge boch e babyor ko Watch Tower ya boor e thin riy ni murung’agen rogon ni ngan turguy ban’en min pithig e magawon. Maku u lan e ulung ko Kristiano ma gad ba flaab ya bay e piin piilal ni yad ba gonop ma bay e pi Kristiano nib ilal ni yad ba adag ni ngar ayuweged gadad. (Proverbs 11:14; 15:22) Piin de l’ag ko magawon rodad ma bpuluw e lem rorad ngak Got e rayog ni ngar lemnaged e magawon rodad u yugu reb e kanawo’. Ma dabra turguyed e n’en ni ngad rin’ed, machane rayog ni ngar pied e athamgil nga lanin’dad mar ayweged gadad.

“Bay mu Par ni Got e be L’agan’um Ngak”

Dariy be’ nra yog ni dabi gaman e pi n’en ni be magafan’ ngay ko pi magawon rok me uneg boch ban’en ngay ni goo lem rok. Faanra ke magafan’dad ko n’en nrayog ni nge buch ngodad, ma ngad meybilgad ku Jehovah nge ayuwegdad. Ngad sapgad ko Thin Rok nge ulung rok ni nge pow’iydad, me pi’ e gonop ngodad, me puluw lanin’dad. Ma gad ra pirieg ni demtrug e magawon nra yib ngodad, ma yira ayuwegdad riy.

Fa en ni ke yoloy e thin ko Psalm e ke tomal laniyan’ me yin’ e tang ni gaar: “Mang ni kari taganan’ug? Mang ndakir gapas lanin’ug? Bay ug par ni Got e be l’agan’ug ngak, ma aram e bay ku gu pining e sorok ngak, yi ir e Taayuw rog mi ir e Got rog.” (Psalm 42:11) Susun ku aram rogon e lem rodad.

Arrogon, mu fl’eg rogom ko tin nib puluw ni ngan lemnag, ma ga pag fan e tin ndamu nang ngak Jehovah. “Mpaged fan urngin e magafan’ romed ngak, ya be lemnag rogomed.”​—1 Peter 5:7.

[Sasing ko page 20]

Ga bod David ni ga ma pag fan e pi n’en ni be tomalnag lanin’um nge pi n’en ni ke magafan’um ngay ngak Jehovah?