Mu Par Ni Kam Fl’eg Rogom Ma Ga Par Nib Pasig!

“Ere mfal’eged rogomed ngam pired, ya da mu nanged e re rran fa re awa.”​—MATTHEW 25:13.

1. Mang e ke l’agan’ apostal John ngay?

TIN tomur e thin u lan e Bible, ma i micheg Jesus ni gaar: “Dab ki n’uw nap’an mu gub.” Me fulweg apostal John ngak ni gaar: “Amen! Moy, Somol Jesus.” De maruwaran’ fare apostal ni ra yib Jesus. John e ir bagayad e pi apostal ni ur fithed ku Jesus ni gaar: “Wuin e ra yib urngin fapi n’en ni ka mog, nge n’en nra yib ni nge dag ni ke taw ko ngiyal’ ni bay mub riy [Greek, pa·rou·siʹa] nge ngiyal’ ni tomren e fayleng?” Arrogon, ke l’agan’ John ko ngiyal’ nga m’on nra moy Jesus.​—Revelation 22:20; Matthew 24:3.

2. Uw rogon e ngiyal’ nra sul Jesus u wan’ girdien e galesiya?

² Buch uw e girdi’ ni bay e michan’ rorad ni aram rogon ko ngiyal’ ney. Boor e galesiya ma bay e machib rorad u murung’agen e “wub” rok Jesus machane gathi ri yad be sonnag. Rogon e par rorad ma da ur lemnaged nra yib Jesus. Fare babyor ni The Parousia in the New Testament e be gaar: “Fare athap ko fare Parousia e dariy ko yafos, nge lem, nge maruwel ko galesiya. . . . Susun ni ba gel e athamgil ni be tay e galesiya ni nge ayuweg e girdi’ ngar kalgadngan’rad, ma ngar wereged e thin ko gospel, machane kar wargad.” Machane gathi gubin e girdi’!

3. (a) Uw rogon fare pa·rou·siʹa u wan’ e tin riyul’ e Kristiano? (b) Mang e gad ra weliy u murung’agen e chiney?

³ Tin riyul’ i gachalpen Jesus e yad be sonnag e ngiyal’ ko tomur ko re m’ag nib kireb ney. Gad ra yul’yul’ i rin’ e re n’em ma ba t’uf ni nge par nib puluw e lem rodad u murung’agen urngin ban’en nib l’ag ko ngiyal’ nra moy Jesus ma ngad ngongolgad nrogon. Aram e ra ayuwegdad ‘ngad athamgilgad nge mada’ ko tomur ma ra yog e yafos ngodad.’ (Matthew 24:13) Nap’an ni pi’ Jesus fare yiiy ni bay ko Matthew guruy ni 24 nge 25, me pi’ e thin ni rayog ni ngad folgad riy ma ra yib angin ngodad ndariy n’umngin nap’an. Guruy ni 25 e bay boch e fanathin riy ni goo ga manang, ma reb e murung’agen fa ragag e ppin nib machalbog (fa tin nib gonop nge tin nib balyang) ma fare fanathin u murung’agen e salpiy ni talent. (Matthew 25:1-30) Uw rogon nrayog ni nge yib angin ngodad ko pi fanathin ney?

Mu Par ni Kam Fl’eg Rogom ni Bod fa Lal e Ppin nib Machalbog!

4. Mang fan fare fanathin u murung’agen e pi ppin nib machalbog?

⁴ Sana ga ba adag ni ngam sul nga daken fare fanathin ko fapi ppin nib machalbog ni bay ko Matthew 25:1-13. N’en ni be buch e bay e mabgol u rogon e yalen ko piyu Jew ma fare pumoon ni ra un ko mabgol e ra yan nga tabinaw rok chitamangin fare ppin ni nge fek me un ngak nga ranow nga tafen fare pumoon (fa yow ra yan nga tafen chitamangin fare pumoon). Ma piin nra un ngay e piin ni be chubeg e talin e musik, ma piin ni be tang, ma de mudugil e ngiyal’ ni yad ra taw. U lan fare fanathin ma i son fa ragag e ppin nib machalbog me aw e lumor ma ka yad be sonnag fare pumoon. Ma lal i yad e bbalyang ya dar feked rorad e gapgep nib gaman ko magal rorad, ma aram e thingar ranod ngar chuw’iyed boch. Ma fa tinef e ppin ni yad ba gonop ya kar feked e gapgep ni boor boch ni rayog ni ngar puoged nga lan e magal rorad u nap’an ni yad be son. Kari mus ni fa lal e ppin ney e yad bay u nap’an ni ke yib fare pumoon. Ere kari mus ni yad e kan pag ni ngar uned ko fare mur ko mabgol. Ma fa lal e ppin nib balyang e kar sowathgad ma nap’an ni kar sulod ma dakiyog ni ngar uned ngay.

5. Mang thin ko Bible ni ma tamilangnag fare fananthin u murung’agen fapi ppin nib machalbog?

⁵ Bay boor ban’en ko re fanathin ney ni be yip’ fan ban’en. Susun, be weliy e Bible u murung’agen Jesus ni ir e pumoon ni ra un ko mabgol. (John 3:28-30) I yog Jesus ni ir ba taareb rogon ku be’ ni fak e pilung ni kan fl’eg rogon e mur ko mabgol ni fan ngak. (Matthew 22:1-14) Ma be weliy e Bible ni Kristus e bod be’ ni figirngiy. (Efesus 5:23) Ma pi Kristiano ni kan dugliyrad e kan nog ni yad “leengin” Kristus, machane dariy e re thin nem u lan fare fanathin. (John 3:29; Revelation 19:7; 21:2, 9) Machane be weliy u murung’agen ragag e ppin nib machalbog, ma kan nog u murung’agen girdien fachi ulung ni yad bod e ppin nib machalbog ni ra mang leengin Kristus.​—2 Korinth 11:2.a

6. Mang e tin tomur e thin ni yog Jesus u murung’agen fare fanathin ko fapi ppin nib machalbog?

⁶ Boor ban’en nrayog ni ngad filed ko re fanathin ney ni gathi ke mus e pi n’en ni be yip’ fan ban’en nge thin ko profet riy. Ya mu tiyan’um ko pi n’en ni yog Jesus ko tomur ni gaar: “Ere mfal’eged rogomed ngam pired, ya da mu nanged e re rran fa re awa.” Ere be tamilangnag fare fanathin nib t’uf ni ngad pared ni kad fl’eged rogodad ya be chugur iyib e ngiyal’ nra m’ay e re m’ag nib kireb ney. Dariy e maruwar riy ni ra yib e tomur, ni yugu aram rogon ndabiyog ni nga dogned ko ri wuin. Me ere mu tiyan’um nga rogon e tafinay ko fa gali ulung ko ppin.

7. Mang fan nib balyang lal e pi ppin nem nib machalbog?

⁷ I yog Jesus: “Lal i yad e bbalyang.” Aram bochan ni de mich u wan’rad ni bay yib fare pumoon? Ma ka ranod nga bayang mi yad lek e fafel? Fa kan bannagrad? Danga’. Yog Jesus ni “ka ranod ni ngar mada’niged be’ nib moon ni ir e nge mabgol.” Kar nanged ni bay yib, mar adaged ni ngar uned ngay ma ngar uned ko fare “madnom ko mabgol.” Machane, kar fal’eged rogorad fa? Kar songad boch, me “lukngun e nep’” machane dar fal’eged rogorad ni fan ko ngiyal’ nra yib ndemtrug e ngiyal​—ni papey boch fa sagaal ko ngiyal’ ni kar lemnaged.

8. Mang e rin’ lal e ppin nib machalbog u lan fare fanathin mi yad dag ni yad ba gonop?

⁸ Ma fa tinef e ppin​—ni ke yog Jesus ni yad ba gonop​—e ku yad e ka ranod mar feked e magal rorad, mi yad sonnag fare pumoon. Ku yad e thingara songad, machane yad ba “gonop.”. Fare bugithin ni Greek nni piliyeg ni “gonop” e rayog ni nge sor fan ko “llowan’, nge lem nib thabthabel, mab gonop ko tin nib puluw.” Ma fa lal e ppin ney e yad ba gonop ya kar feked bogi ban’en ni kan suguy e gapgep ngay ngar chagiyed ko magal rorad. Ma rriyul’ ni ri yad be tiyan’ ko ngiyal’ nra yib fare pumoon ma aram e dabra pied boch e gapgep rorad. Ma kan taw’athnagrad ya ur moyed ko ngiyal’ ni yib fare moon. Ma fa tin ni “kar fal’eged rogorad kar pired e ra uned ngak nga ranod nga lan fare naun ni ngan ngongliy e madnom ko mabgol riy, min ning e mab.”

9, 10. Mang fan fare fanathin u murung’agen e pi ppin nib machalbog, ma mang boch e deer ni ngad fithed gadad riy?

⁹ Gathi be fil Jesus u murung’agen e yalen ko mabgol, ma gathi be pi’ e fonow u murung’agen e ngan pi’ ban’en ku be’. Ya n’en ni be tamilangnag e baaray: “Mfal’eged rogomed ngam pired, ya da mu nanged e re rran fa re awa.” Mu fithem, ‘Rriyul’ ni gu be tiyan’ ko ngiyal’ nra yib Jesus?’ Ke mich u wan’dad ni be gagiyeg Jesus u tharmiy, machane ba riyul’ u wan’dad ni ra yib ‘e en ni Fak e Girdi’ ni be yib nga but’ u daken e manileng ni bay gelngin ma rib galgal ramaen’? (Matthew 24:30) Ma faani “lukngun e nep’” ma aram e ke chugur boch e ngiyal’ nra yib fare pumoon ko ngiyal’ u m’on riy ni ka ranod ngar mada’niged. Ku aram rogon e ngiyal’ nra yib fa en ni Fak e girdi’ ni nge thang e re m’ag nib kireb ney e kab chugur e chiney ko ngiyal’ kafram u nap’an ni kad tababgad i sap nga m’on ko ngiyal’ ni bay yib. (Roma 13:11-14) Ere gad be par ni kad fl’eged rogodad riy, ma be gel iyan rogon ni gad be tiyan’ ya be chugur i yib ko re ngiyal’ i n’em fa?

¹⁰ Ba t’uf ni ngam par ni ga be tiyan’ ngay ni fan ni “ngam par ni kam fal’eg rogom. Lal e pi ppin nem e ke m’ay e gapgep rorad me ere ka ranod ngar chuw’iyed boch. Ku aram rogon nrayog ni nge buch ko Kristiano e ngiyal’ ney ya daki par ni be tiyan’ ma aram e de fal’eg rogon ko ngiyal’ nra yib Jesus. Aram e n’en ni ke buch ko pi Kristiano u nap’an e bin som’on e chibog. Ma rayog ni nge buch ko girdi’ e ngiyal’ ney. Ere ngad fithed gadad ni, ‘Aram rogog fa?’​—1 Thessalonika 5:6-8; Hebrews 2:1; 3:12; 12:3; Revelation 16:15.

Mu Par nib Pasig ya be Chugur Iyib e Tomur

11. Mang e bin migid e fanathin ni weliy Jesus, ma ba taareb rogon nga mang?

¹¹ U lan e bin migid e fanathin ni i weliy Jesus ma gathi ke mus ni ke yog ko pi gachalpen ni ngar fl’eged rogorad. Ya tomren ni ke weliy u murung’agen e pi ppin nib gonop nge pi ppin nib balyang, me weliy u murung’agen fapi salpiy ni talent. (Mu bieg Matthew 25:14-30.) Boor ban’en riy nib taareb rogon ko fare fanathin u murung’agen e pi mina, ni ke pi’ Jesus ya boor e girdi’ e “yad be finey ni gagiyeg rok Got e kari chugur ni nge m’ug.”​—Luke 19:11-27.

12. Mang fan fare fanathin u murung’agen e pi salpiy ni talent?

¹² U lan fare fanathin u murung’agen e salpiy ni talent me weliy Jesus u murung’agen be’ nib moon ni ra yan ko milekag me ere ke weliy boch ban’en ngak e pi tapigpig rok ni yad dalip. I pi’ lal e salpiy ni talent ngak bagayad, ma bagayad e pi’ l’agruw e talent, ma bagayad e pi’ taareb e talent​—“ra bagayad me pi’ e salpiy ngak nrogon e maruwel nrayog rok.” Be m’ug riy ni aram ba talent ni silber ni aram puluwon e maruwel ku be’ u lan ragag nge aningeg e duw​—aram e salpiy ni boor! Nap’an ni sul fare moon, me pining e pi tapigpig rok ngar weliyed e n’en ni kar rin’ed ko salpiy rok ko fa ngiyal’ nib “n’uw nap’an” ni da immoy. Fa gal nsom’on e tapigpig e ke mun l’agruw yay e salpiy ni kar yognigew ko salpiy ni kan pi’ ngorow. Me gaar fare masta ngorow: “Ri gimew ba manigil,” me yog ni bayi tayrow ni yow e nge mil fan pire’ ban’en ngorow, ma aram me gaar: “Ere mirew ngam unew ngog ko felfelan.” Ma fa binem e tapigig nni pi’ taareb e talent ngak e ke yog ni fa ani masta rok e ir reb e girdi’ nder ma runguy be’, me ere de yognag e salpiy ngak ko fa binem ni kan pi’ ngak. Ya ke mithag fare salpiy nga fithik’ e but’, ma de tay nga lan e bank ni nge yib e win riy. Ere ke yog fare masta ni ir be’ nib “kireb mab malmal” ya de ayuweg e tirok e masta ban’en. Ma aram min fek e salpiy rok ma kan nin’ nga wen “ya bayi yor ma be chachafin nguwelen” u rom.

13. Uw rogon ma Jesus e bod fare masta ko fare fanathin?

¹³ Rayog ni ngan nang fan e re fanathin ney u rogon ni be yip’ fan ban’en. Fare moon ni ke yan ko milekag e be yip’ fan Jesus, ya ra chuw rok pi gachalpen ma ra yan nga tharmiy, ma ra son nib n’uw boch nap’an nfini mang Pilung.b (Psalm 110:1-4; Acts 2:34-36; Roma 8:34; Hebrews 10:12, 13) Machane ka bay ban’en ni rayog ni ngad filed ko re n’ey ma ngad folgad riy. Mang e re n’em?

14. Fare fanathin u murung’agen fapi talent e be tamilangnag ni ba t’uf e mang?

¹⁴ Demtrug ko gad be athapeg e yafos ndariy n’umngin nap’an u tharmiy ara yafos ni manemus u fayleng, ma be tamilangnag fare fanathin ku Jesus ngodad ni susun ni gad be athamgil nib elmirin ko maruwel ko Kristiano. Ma riyul’, kenggin e re fanathin ney e taab bugithin ni baaray: pasig. Pi apostal e ur ted e kanawo’ ko re n’em ka nap’an e Pentekost 33 C.E. iyan. Gad be bieg: “Me wenig Peter ngorad ma boor yu bugithin ni yog ngorad ni be tay ir ngorad ni be gaar: ‘Mu lufed gimed ko gechig ni bay yib ngak e girdi’ nib kireb ko biney e mfen.’” (Acts 2:40-42) Ma ke yib angin e athamgil ni ke tay! Ya ke un boch e girdi’ ko pi apostal ko maruwel ko machib ko Kristiano, ma ku yad e kar pasiggad ko machib ya ke wer fare thin nib fel’ “u fayleng i yan.”​—Kolose 1:3-6, 23; 1 Korinth 3:5-9.

15. Susun uw rogon ni gad be fol ko fare fanathin u murung’agen e pi talent?

¹⁵ Mu lemnag e re fanathin ney​—ni aram ba thin ko profet u murung’agen e ngiyal’ ni ra moy Jesus. Bay e mich riy ni ke tabab e pa·rou·siʹa ku Jesus ma dabi n’uw nap’an ma ra buch ban’en nib maluplup. Mu lemnag e n’en ni yog Jesus u murung’agen e “ngiyal’ ko tomur” nge fare maruwel ni ra rin’ e pi Kristiano: “Ma re thin ney nib fel’ u murung’agen e gagiyeg rok Got e bay ni machibnag u gubin yang u fayleng ni nge urngin e girdi’ me nang, ma aram mfini taw nga tomren e fayleng.” (Matthew 24:14) Ere miti mang tapigpig gadad? Mu fithem: ‘Bay rogon ni ngan nog ni gu bod fa binem e tapigpig ni ke mithag e n’en ni kan pi’ nib mil fan ngak, ma goo be rin’ e tirok ban’en? Fa ba tamilang ni gu bod fa gali tapigpig nib manigil mab yul’yul’? Ke mudugilan’ug ni nggu yoornag e tirok fare Masta ban’en u gubin ngiyal’ fa?’

Mu Par ni Kam Fl’eg Rogom ma Ga Par nib Pasig Ko Ngiyal’ ni Ba’ Jesus

16. Mang fan ngom fagali fanathin ni kad filed u murung’agen?

¹⁶ Arrogon, fagali fanathin ney e gathi ke mus ni ma sor fan ko yiiy nge n’en ni be yip’ fan, ya ku be pi’ Jesus e athamgil nga lanin’dad. Baaray e n’en ni be yog: Mu par ni kam fl’eg rogom; ma ga par nib pasig, ma kam fl’eg rogom ko ngiyal’ nra m’ug fare pow ko pa·rou·siʹa rok Kristus. Aram e chiney. Ere rriyul’ ni kad fl’eged rogodad riy ma gad ba pasig fa?

17, 18. Mang fonow ni ke pi’ James u murung’agen e ngiyal’ nra moy Jesus?

¹⁷ De moy James ni walagen Jesus u daken fare burey ni Olives u nap’an ni pi’ Jesus e yiiy; machane kan weliy ngak, me tamilang u wan’ ko uw fene ga’ fan. I yoloy ni gaar: “Pi walageg ni girdien Kristus, mpired ni gimed ba gum’an’ nge mada’ ko ngiyal’ ni bayi sul Somol riy. Mu guyed feni gum’an’ e en ni ma woldug nga rogon ni ma sonnag e woldug rok ni nge yib limngun ara wom’engin nri ba ga’ fan ngak. Ma sonnag e ngiyal’ ni som’on ko n’uw nge ngiyal’ ni tomren e n’uw u fithik’ e gum’an. Ere ku er rogomed nthingar mpired ni gimed ba gum’an. Mpired nib mudugilan’med ko n’en ni ke l’agan’med ngay, ya chirofen ni nge sul Somol riy e ke chugur.”​—James 5:7, 8.

¹⁸ Ke weliy James ni ra gechignag Got e piin ni der ma fanay e salpiy nge tirorad ban’en nrogon, ma aram me pining ko pi Kristiano ni dabi ngochngochan’rad u nap’an ni yad be sonnag Jehovah ni nge rin’ ban’en. Ya rayog ni nge aw ni ra ngochngochan’ e Kristiano me lemnag ni bay rogon ngak ni nge fulweg taban e kireb ni yibe rin’. Machane susun gathi aram rogon, yab mudugil ni ra taw ko ngiyal’ ko pufthin. Aram e n’en ni tamilangnag fare fanathin ni weliy James u murung’agen e en ni ma woldug.

19. Uw rogon e gum’an’ nra tay e girdi’ nu Israel ni ma woldug?

¹⁹ Be’ nu Israel ni ma woldug ma ke yung e awoch e thingari son, ni som’om me tugul fare woldug, ma aram me ga’, ma tomur riy, min t’ar wom’engin. (Luke 8:5-8; John 4:35) Ma nap’an e pi pul nem ni be son, ma bay fan ni nge maga’fan boch. Ya ra aw e n’uw ma ra gaman fa? Ma uw rogon e n’uw ni ra aw u tomur? Ma ra yib e gamanman ni ba achig mi yad li’ fare woldug fa ra yib e yoko’? (Mu taarebnag ko Joel 1:4; 2:23-25.) Machane yugu demtrug ma girdi’ nu Israel ni ma woldug e ra pagan’ ku Jehovah nge yafang nge yu ngalan’ ni ke tay. (Deuteronomy 11:14; Jeremiah 5:24) Ere gum’an’ ni be tay fa en ni ma woldug e ke mudugilan’ ngay ma be sonnag ban’en. U daken e michan’ rok ma manang ni n’en ni be sonnag e ra yib. Rriyul’ nra yib!

20. Uw rogon nrayog ni ngad gum’an’gad nib puluw ko n’en ni yog James?

²⁰ Be’ ni ma woldug e manang e ngiyal’ ko mokun woldug, ma pi Kristiano u nap’an e bin som’on e chibog e de yog ni ngar sumarnaged ko wuin nra taw ko ngiyal’ nra moy Jesus. Machane rib mutrug ni ra yib. I yoloy James ni gaar: “Chirofen ni nge sul [Greek, pa·rou·siʹa] Somol riy e ke chugur.” Ngiyal’ ni ke yoloy James e pi thin nem ma dawori m’ug fare pow ni ba’ Kristus u rogon nib lingagil u ga’ngin e fayleng. Machane ke m’ug e chiney! Ere susun uw rogon e lem rodad ko ngiyal’ ney? Rayog ni ngan guy fare pow nga owchey. Gad be guy. Rayog ni nga dogned nib mudugil, ‘Gu be guy fare pow ni be lebug.’ Rayog ni nga dogned nib mudugilan’dad ni gaar, ‘Ke taw e ngiyal’ ni ba’ Somol, ma ke chugur ko ngiyal’ nra buch ban’en nib maluplup.’

21. Mang e ke mudugilan’dad ngay ni ngad rin’ed?

²¹ Me ere bay fan ni ngad ted nga gum’ercha’dad ma ngad folgad rok fagali fanathin rok Jesus ni kad filed u murung’agen. I gaar: “Ere mfal’eged rogomed ngam pired, ya da mu nanged e re rran fa re awa.” (Matthew 25:13) Ereray e ngiyal’ ni ngad pasiggad ko maruwel ko Kristiano. Ngad daged ko yafos rodad u gubin e rran ni gad manang fan e n’en ni yog Jesus. Ngad tedan’dad ngay! Ma ngad pasiggad!

[Boch e Thin nra Tamilangnag Murung’agen]

Ka Ga Manang?

◻ Mang kenggin e thin ko fare fanathin u murung’agen e pi ppin nib gonop nge pi ppin nib balyang?

◻ U daken fare fanathin ko fapi salpiy ni talent, ma mang e be’ yognag Jesus ngom?

◻ Uw rogon ma gum’an’ ni ga ra tay ni fan ko fare pa·rou·siʹa e bod rogon e girdi’ nu Israel ni ma woldug?

◻ Mang fan ma ereray e ngiyal’ ni baga’ fan mab gel e mo’maw riy?

[Sasing ko page 29]

Mang e kam fil u murung’agen fagali fanathin ko fapi ppin nib machalbog nge fapi salpiy ni talent?