Uw Fene Gel Nib T’uf Rom E Thin Rok Got?
“Rib t’uf rog e motochiyel rom! Gu ma par ni gu ma lemnag ni polo’ e rran.”—PSALM 119:97.
1. Mang reb e kanawo’ ni be dag e girdi’ ni bay madgun Got u wan’rad ni ba t’uf rorad e Thin Rok Got?
BOKUM milyon e pumoon nge ppin ni bay e Bible rorad. Machane gathi aram e ba t’uf rorad e Thin Rok Got. Bay rogon ni nge yog be’ nib t’uf rok e Thin Rok Got ma fin munmun me bieg? Ri danga’! Ma boch e girdi’ ni dar bieged e Bible faram e yad ma poy u gubin e rran e chiney. Ya kar filed rogon ni nge t’uf rorad e Thin Rok Got, ma bod ni yog ko Psalm ma yad ma par ni yad ma lemnag ni “polo’ e rran.”—Psalm 119:97.
2. Uw rogon ni kan ayuweg e michan’ ko reb e Mich Rok Jehovah u fithik’ e gafgow?
2 Ke fil rogon Nasho Dori ni nge t’uf rok e Thin Rok Got. Boor e duw ni ke athamgil ko pigpig ku Jehovah u taabang rok e pi walag nu Albania. Boor e duw ni kan taleg e machib ko Pi Mich Rok Jehovah u rom, ma ri buch uw e babyor ni ke yog ko pi Kristiano nem. Machane i par Brother Dori nib gel e michan’ rok. Uw rogon? Ke gaar, “Gu be nameg ni nggu poy e Bible reb e awa u gubin e rran, ma 60 e duw ni kug rin’ e re n’em nge mada’ ko ngiyal’ ni dabkiyog ni nggu guy ban’en.” Ka fin chiney ma bay e Bible ni polo’ nthin nu Albania, ma nap’an ni kab bitir me fil Brother Dori e thin nu Greek, me ere rayog ni nge bieg e Bible ko re thin nem. Ke poy Brother Dori e Bible u gubin ngiyal’ ma aram e ke ayuweg ni nge athamgil u fithik’ e magawon, maku rayog ni nge ayuwegdad.
“Mpired ni Gubin Ngiyal’ ma be Yib Lamen” e Thin Rok Got Ngomed
3. Susun uw rogon e Thin Rok Got u wan’ e pi Kristiano?
3 I yoloy apostal Peter ni gaar, “Mpired ni gimed bod e bitir ni ka fin nni gargeleg, ni gubin ngiyal’ ma be yib lamen e milik ngomed, ni milik nib machalbog ni fan nga lanin’med.” (1 Peter 2:2) Bod rogon ni ra ba adag e bitir ni nge unum e thuth ko chitingin, ma pi Kristiano nib t’uf rorad e tirok Got ban’en e ri yad ba adag ni ngar poyed e Thin Rok Got. Aram rogom fa? Faanra danga’, ma dabi mulan’um. Ya rayog ni nge yib lamen e Thin Rok Got ngom.
4. Mang e ba l’ag ngay ni ngan mecham i bieg e Bible u gubin e rran?
4 Som’on ma thingar mu dugliy lanin’um ni ngam poy e Bible u gubin ngiyal’, ngu gubin e rran nfaanra rayog. (Acts 17:11) Sana dabiyog ni ngam poy e Bible reb e awa u gubin e rran ni bod Nasho Dori, machane dabi siy ni rayog ni ngam dugliy bangiyal’ ni ngam poy e Thin Rok Got. Boch e Kristiano ni yad ma od ni kakadabul ni fan ni ngar fl’eged i lemnag e thin ko Bible. Bay ban’en ni kab fel’ ko binem ni ngam rin’ u tabolngin e rran fa? Ma boch e girdi’ e ma poy e Bible u m’on ni ngar molod. Ma boch e girdi’ e ma poy e Bible ko ngiyal’ nra m’ag. N’en nib ga’ fan e ngam poy e Bible u gubin ngiyal’. Nge mu ma ga fl’eg i lemnag e n’en ni kam bieg. Ngad lemnaged boch e girdi’ ni ke yib angin ngorad ya kar poyed mar fl’eged i lemnag e Thin Rok Got.
An ni ke Yoloy e Thin ko Psalm ni Ba T’uf Rok e Thin Rok Got
5, 6. Yugu aram rogon ni dad nanged fithingan e en ni ke yoloy e bin 119 e Psalm, ma mang e rayog ni ngad nanged u murung’agen e cha’ nem u nap’an ni gad ra poy ma gad fl’eg i lemnag e n’en ni ke yoloy?
5 Fa en ni ke yoloy e thin ko bin 119 guruy ko Psalm e ke tay fan e Thin Rok Got. Mini’ e ke yoloy e pi thin nem? Der yog e Bible. Machane gad ra bieg e pi thin nem ma rayog ni ngad filed boch ban’en u murung’agen e cha’ nem, ma gad manang ni gathi dariy e magawon rok. Ma boch e girdi’ ni kar chaggad ngak ma susun ni yad ma liyor ku Jehovah, machane dar t’ufeged e pi motochiyel ko Bible. Machane de pag e en ni ke yoloy e Psalm ni ngar taleged i rin’ e tin nib mat’aw. (Psalm 119:23) Faanra gad ma maruwel be’ u taabang ni der ma tay fan e pi motochiyel ko Bible ara ga ma par ku be’ ni aram rogon, ma rayog ni ngam guy nib taareb rarogomew fa en ni ke yoloy e thin ko Psalm.
6 Fa en ni ke yoloy e thin ko Psalm e bay madgun Got u wan’, machane gathi ir be’ ni ta dake moding. Ya ke tamilangnag thibngin. (Psalm 119:5, 6, 67) Machane de pag e denen nge gagiyegnag. I fith ni gaar, “Uw rogon nra biechnag be’ nib pagal e kanawo’ rok?” Me fulweg ni gaar: “Ya ra par u fithik’ e ayuw ko thin rom.” (Psalm 119:9, New World Translation) Miki ga’nag fan e Thin Rok Got ni nge pi’ gelngin ni ngan rin’ e tin nib fel’ me gaar: “Kug tay e thin rom u lanin’ug, ni aram e dab gu denen nib togopuluw ngom.” (Psalm 119:11, NW) Rriyul’ ni aram ba gelngin nib gel ya rayog ni nge ayuwegdad ngad paloggad ko denen nib togopuluw ngak Got!
7. Mang fan ni susun ni nge lemnag e piin fel’ yangarrad ni baga’ fan ni ngar poyed e Bible u gubin e rran?
7 Bm’ag ko pi Kristiano nib fel’ yangarrad ni ngar lemnaged e pi thin ko Psalm ney. Ya yibe togopuluw ngak e pi fel’ yangaren ni Kristiano ko ngiyal’ ney. Ri ba adag Moonyan’ ni nge kirebnag e pi fel’ yangaren ni yad be liyor ku Jehovah. Be nameg Satan ni nge wawliy e pi Kristiano nib fel’ yangarrad ni ngar th’abed e motochiyel rok Got mar rin’ed e tin ni be ar’ar’nag dowrad. Pi n’en ni yibe pag ko kachido nge tv e be dag yaan e lem rok Moonyan’. Ma fapi girdi’ ni bay ko pi kachido nem e ba fel’ yaanrad ma yiba adag dakenrad; ma yima dag ni yad be un ko ngongol ndarngal ma dariy e kireb riy. Mang e yibe fil ko girdi’? ‘Dariy e kireb riy ni ngan un ko par ko pumoon nge ppin ndan mabgol ni faanra ka yow ba adag yow.’ Bay e kireban’ riy ya gubin e duw ma ma aw e pi fel’ yangaren ni Kristiano ko re wup nem. Boch i yad e kan kirebnag e michan’ rorad ni bochan. Ere rib gel e towasar! Machane kayigi gel e towasar ma dabiyog ko pi fel’ yangaren ni ngar athamgilgad riy? Ri danga’! Ya ke pi’ Jehovah e kanawo’ nrayog ko pi fel’ yangaren ni Kristiano ni ngar gelgad ko ar’ar’ nib kireb. Rayog ni ngar togopuluwgad ko pi talin e cham rok Moonyan’ ya ngar ‘pared u fithik’ e ayuw ko thin rok Got, mi yad tay nga lanin’rad.’ Uw urngin e tayim ni ga ma tay ni ngam poy e Bible mag fl’eg i lemnag?
8. Uw rogon ma pi thin ko re paragraph ney e ra ayuwegem ngam tay fan fare Motochiyel rok Moses?
8 Fa en ni ke yoloy e bin 119 e guruy ko Psalm e ke gaar: “Rib t’uf rog e motochiyel rom!” (Psalm 119:97) Bin ngan e motochiyel ni be yog? Pi thin ni yog Jehovah nib muun ngay fare Motochiyel rok Moses. Sana ra lemnag be’ ni ke kakrom fare Motochiyel rok Moses me ere uw rogon nrayog ni nge t’uf rok be’. Machane gad ra fl’eg i lemnag boch e thin ko Motochiyel rok Moses ni bod rogon ni rin’ fa en ni ke yoloy e Psalm, ma aram e gad ra tay fan e re Motochiyel nem ya bay e gonop riy. Ya gathi ke mus ni bay e thin ko profet riy, ya boor e motochiyel ni fan ko par nib biech nge ggan ni ngan kay, ni be mon’ognag e par nib klin nge fel’ fithik’ i dowey. (Levitikus 7:23, 24, 26; 11:2-8) Ma be yog fare Motochiyel ni ngan yul’yul’ ko shiyobay ma kan nog ko piyu Israel ni ngar runguyed e piin nib gafgow. (Exodus 22:26, 27; 23:6; Levitikus 19:35, 36; Deuteronomy 24:17-21) Ma kan tay chilen ni ngan pufthinnag e girdi’ u rogon nib mat’aw. (Deuteronomy 16:19; 19:15) Ma nap’an ni ke ilal iyan fa en ni ke yoloy e thin ko Psalm, ma dabi siy ni ke guy ni ke fel’ rogon e girdi’ ni kar folgad ko Motochiyel rok Got, ma aram me gel rogon nib t’uf rok. Ku arrogon e ngiyal’ ney ni ke yib angin ko pi Kristiano ya kar folgad ko thin ko Bible, ma aram ma ke gel rogon ni yad ma tay fan e Thin Rok Got.
Be’ ni Fak e Pilung ni De Rus ni Nge Rin’ Ban’en nib Thil
9. Uw rogon e Thin Rok Got u wan’ Hezekiah ni Pilung?
9 N’en ni bay ko bin 119 e guruy ko Psalm e ba puluw ko yafos rok Hezekiah u nap’an ni kab pagal. Boch e girdi’ ni Bible scholar e yad ma yog ni Hezekiah e ke yoloy e re guruy nem ko Psalm. De mudugil e re n’em, machane gad manang ni i tay Hezekiah fan e Thin Rok Got. Rogon e yafos rok e dag riy ni taareb rogon e lem rok ko pi thin ko Psalm 119:97. Be weliy e Bible u murung’agen Hezekiah ni gaar: “Yugu be pacheg ir ngak Jehovah. Ma de pi’ keru’ ngak, ya ke ul’ul’ ni be fol ko pi motochiyel ni ke pi’ Jehovah ngak Moses.”—2 Kings 18:6, NW.
10. Uw rogon ma kanawo’ ni tay Hezekiah e ma pi’ e athamgil nga laniyan’ e pi Kristiano ni gallabthir rorad e gathi yad e Kristiano?
10 Ma de ilal Hezekiah u lan e tabinaw ni ma fol rok Got. Ya chitamangin ni Ahaz ni Pilung e ke liyor ko liyos ma ke pi’ reb e bitir rok ni pumoon—ni walagen Hezekiah—ni maligach ngak e got ni googsur min urfeg ni kab fas! (2 Kings 16:3) Yugu aram rogon e re kanawo’ nem nib kireb, machane ke “biechnag Hezekiah e kanawo’ rok” ma de un ko liyor ni googsur ya ke par ni be fol ko Thin Rok Got.—2 Kronikles 29:2, NW.
11. Nap’an ni be yaliy Hezekiah e tin ni be rin’ e chitamangin, ma mang wenegan ni yib ngak ni bochan e de yul’yul’?
11 Ma nap’an ni be ilal Hezekiah ma be guy rogon e gagiyeg ni be tay e chitamangin. Ma pi toogor rok yu Judah e goo ba liyegrad. Ya bay Rezin, ni pilung nu Syria, me un ngak Pekah ni Pilung nu Israel ngar bad ra chamgad ngak yu Jerusalem. (2 Kings 16:5, 6) Ma bay piyu Edom nge yu Filistia, ni kar chamgad ngak yu Judah mar gelgad ngorad ma kar koled boch e binaw rorad. (2 Kronikles 28:16-19) Mang e rin Ahaz u fithik’ e pi magawon nem? De ning e ayuw rok Jehovah ni nge gel ngak yu Syria, ya ke chel ngak fare pilung nu Assyria, me pi’ e gol nge silber ngak, nge boch e machaf ni immoy ko fare tempel. Machane de yib e gapas ngak yu Judah.—2 Kings 16:6, 8.
12. Mang e i rin’ Hezekiah me palog ko pi oloboch ni i rin’ e chitamangin?
12 Munmun me yim’ Ahaz me mang Hezekiah pilung u nap’an ni ke 25 e duw rok. (2 Kronikles 29:1) Ir be’ ni kab pagal, machane gathi de mang reb e pilung nib manigil. Ya de fol rok e chitamangin ni be’ nde yul’yul’, ya ke fol ko Motochiyel rok Jehovah. Ma aram e ba muun ngay reb e motochiyel ni fan ko piin pilung ni be gaar: “Nap’an ni ra par [fare pilung] nga tagil’ e pilung me tabab ko gagiyeg, ma thingari yoloy nga but’ e pi motochiyel ni bay ko pi prist ni yu Levi. Ma thingari par rok, ma thingari bieg ni gubin e rran nnap’an e yafos rok, ni fan ni nge fil rogon ni nge yib madgun Jehovah Got u wan’ mi i fol u urngin e pi motochiyel ney.” (Deuteronomy 17:18, 19) Ra poy Hezekiah e Thin Rok Got u gubin e rran, ma aram e ra fil rogon ni nge yib madgun Jehovah u wan’, ma ra siyeg i rin’ e pi oloboch ni ma rin’ e chitamangin.
13. Uw rogon nrayog ni nge mudugilan’ e Kristiano ni ra yib angin ngak urngin ban’en ni ra rin’ ni fan ko tirok Got ban’en?
13 Gathi ke mus ni pi pilung nu Israel e ka nog ngorad ni ngar filed e Thin Rok Got ya ku arrogon urngin e girdi’ nu Israel ni bay madgun Got u wan’rad. Bin som’on e guruy ko Psalm e be tamilangnag ni be’ nib riyul’ ni be par nib falfalan’ e be’ ni “ra beeg e motochiyel rok [Jehovah] ma ma yib e felfelan’ riy ngak, ma ku aram rogon ni ra beeg ni rran nge nep’ ni bochan e nge nang fan.” (Psalm 1:1, 2) Be weliy ko Psalm u murung’agen be’ ni aram rogon ni gaar: “Urngin e tin ni ma ngongliy e ma yan i aw nib fel’.” (Psalm 1:3) N’en nib math’ keru’ ko re n’em e be’ ni de mich Jehovah Got u wan’ ma be weliy e Bible u murng’agen ni gaar: “Dawori mudugil laniyan’ ko tin ni be rin’.” (James 1:8) Gad gubin ma gad ba adag ni ngad pared nib falfalan’ ma nge yib fan e yafos rodad. Gad ra bieg e Bible ma ra yognag e falfalan’ ngodad.
Thin Rok Got e ke Ayuweg Jesus
14. Uw rogon ni dag Jesus nib t’uf rok e Thin Rok Got?
14 Bay biyay ni gallabthir rok Jesus e kar piriegew u lan e tempel u Jerusalem ni ke par rok e pi tamachib. Ma pi tamachib ney ni yad ba cheg ko motochiyel Rok Got e “ra gingad nga feni llowan’ ko thin ni ur fithed ngak ngi i fulweg”! (Luke 2:46, 47) Aram e n’en ni buch u nap’an ni ke 12 e duw rok Jesus. Arrogon, mus ni kab pagal ma ba tamilang ni ri ba t’uf e Thin Rok Got rok. Ma munmun, me fanay Jesus e Thin ko Bible ni nge puwan’ ngak Moonyan’ faani gaar: “Girdi’ e dabiyog ni yigoo flowa e ra i kay mi i par nib fos, machane urngin bug e thin ni be yog Got e ir e ra i tay e girdi’ nib fos ndabi yim’.” (Matthew 4:3-10) De n’uw nap’an nga tomren e re n’em ma i machibnag Jesus e girdi’ u lan e binaw rok ni Nazareth, ni i fanay e thin ko Bible.—Luke 4:16-21.
15. Mang kanawo’ ni tay Jesus u nap’an ni i machibnag e girdi’?
15 Boor yay ni i weliy Jesus e Thin Rok Got u nap’an ni be machibnag e girdi’. Ma piin ni ur motoyilgad ngak e ur gingad “nga rogon e machib ni ke tay.” (Matthew 7:28) Ma dabni gin ngay ya—machib ni weliy Jesus e sum rok Jehovah! I gaar Jesus: “N’en ni gu be machibnag e gathi gag e yib rog, yi yib rok Got, ni ir e ke l’ugeg ku gub. Ya en ni thin rok e be weliy e be guy rogon ni nge mang ir e yog e girdi’ e sorok ngak. Machane en ni be guy rogon ni nga nog e sorok ngak e en ni l’og nge yib e ba yul’yul’, ma tin riyul’ e be yog.”—John 7:16, 18.
16. Be mang e rin’ Jesus me dag ni rib t’uf rok e thin rok Got?
16 Jesus e be’ nib “mat’aw” ma gathi bod fa en ni ke yoloy e bin 119 e guruy ko Psalm. Dariy e denen rok, ya ir Fak Got ma ke “par nib sobut’an’ ma be fol rok Got nge yan i mada’ ko ngiyal’ ni yim’ riy.” (Filippi 2:8; Hebrews 7:26) Ma yugu aram rogon ni ir be’ nib flont, ma i fil Jesus e Motochiyel Rok Got ma be fol riy. Aram e n’en ni ke ayuweg ni nge par nib yul’yul’. Nap’an ni ke fanay Peter e sayden ni nge ayuweg e Masta rok, ndabni kol, me puwan’ Jesus ngak e re apostal nem me fith ni gaar: “Da mu nang nrayog ni gu non ngak e Chitamag ni nge ayuwegeg ma ka chiney me l’og e engel ngar bad nib pag ragag nge l’agruw ulung? Machane faanra gu rin’ ni aray rogon, ma ra diin me m’ug nib riyul’ e tin ni ke yog e babyor nib thothup nthingari m’ug ni aray rogon?” (Matthew 26:53, 54) Arrogon, kab baga’ fan u wan’ Jesus ni nge lebug e thin ko Bible ko bin ni nge siy i yim’ u rogon nib gel e amith nge tamra’ riy. Rib gel rogon fene t’uf e Thin Rok Got rok!
Boch e Girdi’ ni Kar Folwokgad rok Kristus
17. Uw fene ga’ fan e Thin Rok Got u wan’ apostal Paul?
17 I yoloy apostal Paul ngak e pi Kristiano ni gaar: “Um folwokgad rog, ni bod rogon ni gu be folwok rok Kristus.” (1 Korinth 11:1) Bod rogon e Masta rok, ma t’ufeg Paul e thin ko Bible. I gaar: “Lanin’ug e ri ba t’uf rok fare motochiyel rok Got.” (Roma 7:22, The Jerusalem Bible) Boor yay ni i weliy Paul e Thin ko Bible. (Acts 13:32-41; 17:2, 3; 28:23) Ma nap’an ni ke weliy e tin tomur e thin ngak Timothy me tamilangnag Paul ngak u rogon fene ga’ fan e Thin Rok Got u gubin e rran ko yafos rok urngin e girdi’ ni be “pigpig ngak Got.”—2 Timothy 3:15-17.
18. Mu weliy u murung’agen reb e girdi’ ko ngiyal’ ney ni ri ma tay fan e Thin Rok Got.
18 Boor e girdi’ nib yul’yul’ ku Jehovah ko ngiyal’ ney e kar folwokgad rok Jesus u rogon fene t’uf rok e Thin Rok Got. U lan e tin som’on e duw ko re chibog ney ma ke pi’ be’ e Bible ngak reb e fager rok ni be’ nib pagal. Me weliy ko uw rogon e re taw’ath ney u wan’ ni gaar: “Kug turguy u wun’ug ni nggu poy boch e thin riy u gubin e rran.” Re pagal nem e ir Frederick Franz, ma bochan nib t’uf rok e Thin ko Bible ma aram e kan ayuweg ni nge par ni be pigpig ku Jehovah nib n’uw nap’an ma ke yib angin ngak. Yima nang murung’agen e cha’ nem ni rayog ni nge yog reb e guruy ko Bible nge reb ya kari mit ngak.
19. Mang e ma rin’ boch e girdi’ nge yog ni ngar bieged e thin ko Bible u gubin e wik ni fan ko fare Theocratic Ministry School?
19 Rib ga’ fan u wan’ e Pi Mich Rok Jehovah ni ngar poyed e thin ko Bible u gubin ngiyal’. Gubin e wik, ma yad ma poy boch e guruy ko Bible ni fan ko reb e muulung rorad ni Theocratic Ministry School. Ma nap’an fare muulung ma yibe tamilangnag boch e thin ko pi guruy nem ni kan bieg. Boch e Pi Mich e yad ba adag ni ngar yu guruynaged e pi thin ko Bible ni medlip yang nib achig ni ka nog ni ngan bieg u lan reb e wik ma ra reb e rran mara bieged reb e guruy. Ma nap’an ni yad be bieg, ma yad be fl’eg i lemnag e pi thin nem. Ma nap’an nrayog rorad, ma yad ma fl’eg i gayiy boch ban’en u lan yugu boch e babyor.
20. Mang e ba t’uf ni ngan rin’ nge yog ni ngan bieg e Bible u gubin ngiyal’?
20 Sana ba t’uf ni ngam ‘gayiy e kanawo’ ni ngam poy e Bible u gubin ngiyal’ ma ga siy i rin’ yugu boch ban’en. (Efesus 5:16) Machane, ra yib wenegan ngom ni kab fel’ ko tin ni kam digey. Ma nap’an ni ra mecham ngom ni ngam bieg e Bible u gubin e rran, ma ra gel rogon fene t’uf e Thin Rok Got rom. Ma dabi n’uw nap’an, ma ga ra yog e pi thin ni bay ko Psalm ni be gaar: “Rib t’uf rog e motochiyel rom! Gu ma par ni gu ma lemnag ni polo’ e rran.” (Psalm 119:97) Faanra arrogon e lem rom, ma ra yib angin ngom e chiney iyan ngaram, ma aram e n’en nran weliy ko bin migid e thin.
Ka Ga Manang?
◻ Uw rogon ni dag e en ni ke yoloy e bin 119 e guruy ko Psalm ni ba t’uf rok e Thin Rok Got?
◻ Mang e rayog ni ngad filed rok Jesus nge Paul?
◻ Uw rogon nrayog ni nge gel rogon fene t’uf rodad e Thin Rok Got?
[Pictures on page 20]
Kan tay chilen ko pi pilung nib yul’yul’ ni ngar bieged e Thin Rok Got u gubin ngiyal’. Ga ma rin’ fa?
[Picture on page 22]
Mus ni kab bitir Jesus, ma ba t’uf rok e Thin Rok Got