Maligach Ni Ma Pining E Sorok Ngak Jehovah Nib M’agan’ Ngay

“Ngam pied gimed ngak Got, ngam manged maligach nib fos ngak, ni kam pied gimed ko maruwel rok ma gimed ba fel’ u wan’.”​—ROMA 12:1.

1. Mang e be weliy fare Bible murung’agen puluwon e pi maligach u tan fare Motochiyel ni kan pi’ ngak Moses?

“FARE Motochiyel rok piyu Israel e gathi ri yaan ni polo’ e tin nri ir ban’en, kemus ni yaan e pi n’en nib fel’ ni bay fini yib ni kab samathmath. Taab mit e maligach ni yibe pi’ riy u reb e duw nge reb.” (Hebrews 10:1) Pi thin rok apostal Paul nem nib tamilang, e be dag ni urngin e maligach ni kan pi’ u tan fare Motochiyel ni kan pi’ ngak Moses e dabi par ni bay gelngin ni ra ayuweg be’ ni nge thap ngak Got.​—Kolose 2:16, 17.

2. Mang fan ni gathi tin dariy fan e ngan guy rogon ni ngan nang fan urngin ban’en u lan fare Bible u murung’agen e pi maligach u tan fare Motochiyel?

² Be dag e re n’ey ni fapi thin ni bay ko Pentateuch u murung’agen e pi maligach e dariy fel’ngin ko piin Kristiano e ngiyal’ n’ey? Riyul’, ni tomren ni ke yan boch e tayim ni ke pag boch ko taareb e duw, ma piin ni ma un ko fare Theocratic Ministry School u lan e ulung ko Pi Mich rok Jehovah u ga’ngin yang u fayleng e kafin ra mu’gad i beeg fa lal ke babyor nsomm’on u lan e Bible. Boch i yad e kara athamgilgad ni ngar bieged mar nanged fan urngin ban’en riy. Ere ke aw nib m’ay fan e maruwel ni kar ted riy, fa? Ri danga’, ya gathi aram rogon, ya “urngin ban’en nni yoloy nga lan e babyor nib thothup e ni yoloy ni nge fonownagdad, ni bochan e nge yog e l’agan’ ngodad u fithik’ e gum’an’ nge athamgil laniyan’ ni be pi’ e thin ko babyor nib thothup ngodad.” (Roma 15:4) Ere reb e deer e baaray, mang “thin e ra pow’iyey” nge “fal’eg lanin’uy” nrayog ni ngada filed ko pi thin ni bay ko fare Motochiyel u murung’agen e pi maligach?

Thin nra Fil Ban’en ma Ma Fal’eg Lanin’uy

3. Mang e n’en ni rib t’uf rodad?

³ Yugu aram rogon ni da nog ngodad ni thingar da pied e pi maligach nib puluw ko thin ni bay ko fare Motochiyel, ma ri ba t’uf rodad e n’en nra ayuwegdad ntaab rogon ko maligach ni i ayuweg boch piyu Israel, ni bod e n’en ni baaray ni, ngan n’agfan e denen rodad ma gad fel’ u wan’ Got. Bochan ni dabkuuda pied e pi maligach e chiney nib riyul’, ere uw rogon ni nge yib angin ngodad? Tomren ni i weliy Paul murung’agen e maligach ni gamanman ni gathi ban’en ni rib ga’ fan, i yog Paul ni gaar: “Ereray fan ni faani chugur ni nge yib [Jesus] nga fayleng me non ngak Got ni gaar: ‘Dabum e maligach ni yibe pi’ ngom, machane kam ngongliy rogon ba dowef ni fanag. Ya de fel’ u wun’um e gamanman ni yibe pi’ ngom u daken e altar ni kan urfiy ni ka reb, ara pi maligach ni ir e nge fek e denen nge chuweg.’ Ma aram me lungug, Got, gub aray ni (nggu rin’ e tin ni gab adag ni nggu rin’​—⁠ni bod rogon murung’ageg ni kan yoloy u lan e babyor ko Motochiyel).” ’​—Hebrews 10:5-7.

4. Uw rogon ni weliy Paul e thin ni bay ko Psalm 40:​6-8 ni ba m’ag ku Jesus Kristus?

⁴ I fanay Paul e thin ni bay ko Psalm 40:6-8, ma aram i weliy ni de yib Jesus ngaray ni fan ni nge ulul i pi’ “fapi maligach,” ni bod fare “maligach ni yima urfiy nge fare maligach ni fan ko denen,” ni urngin e pi n’en ney e i dabuy Got ko ngiyal’ ni yoloy Paul e re n’ey. Machane, i yib Jesus nga fayleng ni bay downgin ni Chitamangin u tharmiy e ke sunmiy, ni ri taab rogon nga downgin Adam u nap’an nni sunmiy. (Genesis 2:7; Luke 1:35; 1 Korinth 15:22, 45) Jesus e ir Fak Got nib flont, ma ir fare “owchen” fare pin, rogon ni yog ko Genesis 3:15. Bayi guy rogon ni nge ‘pirdiiy lolugen Satan,’ nyugu aram rogon ni Jesus e yira ‘maadadnag wurilen ay.’ Ma aray rogon, ni Jesus e ke mang ban’en ni pi’ Jehovah ni fan ni nge thap e girdi’ riy ngak, ni ereray e n’en ni be sonnag e piin ni ke michan’rad ni ka nap’an Abel.

5, 6. Mang e kanawo’ nrib manigil u rogon ni ngan chuchugur ku Got nrayog ni nge fanay e piin Kristiano?

⁵ Nap’an ni be weliy Paul murung’agen e n’en ni i rin’ Jesus, me yog ni gaar: “Kristus e dariy e denen ni ngongliy, machane me fek [Got] e denen rodad nge ta’ nga daken, ni fan e ngad taab girdi’gad ngak nge yog nda mat’awgad ni bod rogon Got.” (2 Korinth 5:21) Fare bugithin ni “kan tay e denen rodad nga daken” e ku rayog ni ngan thiliyeg ni ‘kan ngongliy ni ngan pi’ ni maligach.’ I yog John ni apostal ni gaar: “Yu daken Kristus e ir e be n’ag Got fan e denen rodad riy, ni gathi kemus ni denen rodad, ya ku er rogon e denen rok urngin e girdi’.” (1 John 2:2) Arfan, nyugu aram rogon ni piyu Israel e yad ma fanay e pi maligach rorad ni fan ni ngar chuchugurgad ku Got, ma piin Kristiano e bay e kanawo’ rorad ni ngar chuchugurgad ku Got ni th’abi fel’​—ni ir fare maligach ni pi’ Jesus Kristus. (John 14:6; 1 Peter 3:18) Faanra ngari michan’dad ko fare maligach ni i pi’ Got ngodad ma ngad folgad Rok, maku ra n’ag Got fan e denen rodad ma gad ra fel’ u wan’ ma ra taw’athnagdad Got. (John 3:17, 18) Gathi ereray e n’en ni ma yib e falfalan’ riy, fa? Ere uw rogon ni ngada daged ni ke mich fare maligach u wan’dad?

⁶ Tomren me weliy Paul ni piin Kristiano e kari manigil e ayuw ni bay rorad u rogon ni ngar chuchugurgad ku Got, miki weliy fan ban’en, ni rayog ni ngada bieged ko Hebrews 10:22-25, u murung’agen dalip ban’en nrayog ni ngada daged e michan’ nge falfalan’ ko n’en ni pi’ Got ngak e girdi’. Yugu aram ni thin rok Paul e kan pi’ ni somm’on ni fan ko piin ni “kari mab e kanawo’ ngorad ni nga ranod nga lan fa Gin’en nib Th’abi Thothup”​—ni ereram e piin Kristiano ni kan dugliyrad ma yad ra yan nga tharmiy—​mab riyul’ ni urngin e girdi’ e ba t’uf ni ngar tiyan’rad ko thin rok Paul nib thothup nfaanra yad ba adag ni nge fel’ rogorad ko maligach ni pi’ Jesus.​—Hebrews 10:19.

Ngan Pi’ e Pi Maligach nib Biech ma De Alit

7. (a) Uw rogon ni be dag e thin ni bay ko Hebrews 10:22 ko tin ni kan rin’ u nap’an ni kan pi’ e maligach? (b) Mang e n’en ni thingar ni rin’ nra mudugil ni ra fel’ fare maligach u wan’ Got?

⁷ Somm’on, ma ke fonownag Paul e piin Kristiano ni gaar: “Ere ngada chuchugurgad ngak Got ni gadad ba yul’yul’ u lanin’dad ngak ma mmich u wan’dad nder maruwaran’dad rok, nge lanin’dad ni kan klinnag ndakir yog ngodad ban’en nib kireb ni kad rin’ed, nge dowef ni kan maluknag ko ran nib machalbog.” (Hebrews 10:22) Fare thin ni kan fanay uroy e ba tamilang ni be dag ko mang e yima rin’ kakrom u nap’an ni yira pi’ e maligach nib puluw ko fare Motochiyel. Mab puluw e re n’em ya susun ni ngan pi’ e maligach u fithik’ e lem nib mat’aw ma ngan fanay ban’en nib klin ma dan alitnag, ma aram rogon ni ra fel’ e maligach u wan’uy. Fare maligach ni gamanman e yima fek u fithik’ ba ran’ e gamanman, ni aram e pi gamanman nib klin, mab “fel’,” ndariy thibngin. Faanra ni fek e maligach u fithik’ e pi arche’, ma thingar ni mel’eg e bin tha’bi fel’ u fithik’ e pi bulogol ara fak e bulogol. Faanra kan rin’ e n’en ni aram rogon, “ma [ngani] fek e re maligach nem u fithik’ e tayfan ma aram rogon e rayog ni nge fel’ e biyul ni fan ngak.” (Leviticus 1:2-4, 10, 14; 22:19-25) Fare maligach ni grain e dan tay e is ngay, ni re n’ey e be yip fan ban’en nib tagan’; maku denir ma tay e t’ay e ngul ngay, ni baga’ ni aram logowen’ i woomngin mit e gek’iy, ni baga’ nra muguninnag. Nap’an ni ngan pi’ e maligach ni​—gamanman ara grain—​ma ngan ta’ nga daken e altar, ma yima tay e sol ngay ni nge dabi kireb.​—Leviticus 2:11-13.

8. (a) Mang e ba t’uf ni nge rin’ e en ni ke pi’ e maligach? (b) Uw rogon ni nge mudugil lanin’dad nra fel’ e pigpig ni gad ra ta’ u wan’ Jehovah?

⁸ Ma uw rogon e girdi’ ni ir e ke pi’ e maligach? Rogon ni yog fare Motochiyel e urngin e girdi’ ni ngara bad nga pe’owchen Jehovah e nge par nib klin ma de alit. Be’ ni ke alitnag ir nbochan ni ke rin’ ban’en nib kireb ma som’mon e thingari pi’ e maligach ni fan ko denen ara maligach ni fan nib buch e rok ni fan ni nge fel’ e cha’ nem biyay u wan’ Jehovah ma aram rogon ni ra fel’ e maligach rok ni yima urfiy ara communion ni maligach u wan’ Got. (Leviticus 5:1-6, 15, 17) Ere gad gubin, mab fel’ u wan’dad feni ga’ fan ni gubin ngiyal’ ma gadad ba biech u pe’owchen Jehovah, fa? Faanra gad baadag ni nge fel’ e pigpig rodad u wan’ Got, ma thingar da yal’uweg nib papey urngin ban’en nib togopuluw ko motochiyel rok. Thingarda fanayed nib papey e ayuw ni ke pi’ ngodad ni yad e​—“piin ni piilal u lan e ulung” nge fare “maligach ni fan ko denen rodad,” ni aram Jesus Kristus.​—James 5:14; 1 John 2:1, 2.

9. Mang e n’en nib thil riy u thilin e maligach ni fan ku Jehovah nge pi n’en ni kan pi’ ngak e pi got ni googsur?

⁹ Bochan ni kan weliy nib tamilang murung’agen e maligach nib klin ko urngin ban’en, ma riyul’ ni ereray e n’en nib thil u thilin e maligach ni kan pi’ ngak Jehovah nge pi maligach ni kan pi’ ngak e pi got ko girdi’ ni ma par ko pi nam u tooben yu Israel. Reb e babyor e ke weliy murung’agen e n’en nib thil ko fapi maligach ni yima rin’ nib puluw ko Fare Motochiyel, me gaar: “Kada guyed ni fapi maligach e de m’ag ko pig; ma dariy fare n’en ni yima rin’ ko teliw nbod be’ ni ke aliliy, ma der ma kirebnag downgin, ara fre ngongol ni ma pi’ ir nchuway, nge fare n’en ni ma k’aring e arar ko ngongol ni darngal nrib kireb; dariy e maligach ni girdi’; ma dariy e maligach ni yima pi’ ni fan ko yam’.” Urngin e pi n’en ney e be micheg ni: Jehovah e ba thothup, ma dubun e denen nge urngin e tin nib tagan’. (Habakkuk 1:13) Liyor nge fapi maligach ni ngan pi’ ngak e thingar ni par nib klin ma dabni alitnag​—e dowef, nge gafarig, nge lanin’uy.​—Leviticus 19:2; 1 Peter 1:14-16.

10. Ba puluw ko thin ni ke yog Paul ko Roma 12:1, 2, ma mang e susun ngad rin’ed ni ngad yaliyed?

¹⁰ Arfan, ni ba t’uf ni ngada yaliyed gadad ni urngin yang ko yafas rodad ni fan ni nge mudugil lanin’dad ni pigpig ku Jehovah ni gad ma tay e ba fel’ u wan’. Dabda lemnaged ni faan gad ra un ko pi muulung rodad nge gad ra un ko machib, ma yugu demtrug e pi n’en ra ud rin’ed ko yafas rodad. Maku thingar dabda lemnaged nbochan ni gad ma un ko boch e maruwel rodad u lan e ulung ma de t’uf ni ngada folgad ko yugu boch e motochiyel rok Got u yu yang ko yafas rodad. (Roma 2:21, 22) Dabi taw’athnagdad Got ma dabi par ni gad ba fel’ u wan’ nfaan gad ra pag ni tin nib alit e ra kirebnag e lem nge ngongol rodad. Dabmu pagtalin e thin rok Paul ni gaar: “Ere pi walag, bochan e ri be runguydad Got, ma aram fan ni nggu wenig ngomed ni ngam pied gimed ngak Got, ngam mmanged maligach nib fas ngak, ni kam pied gimed ko maruwel rok ma gimed ba fel’ u wan’. Ereray e bin riyul’ e liyor ni susun e ngam pied ngak Got. Dabmu folgad ko ngongol ni yibe rin’ u roy u fayleng, machane mpied gimed ngak Got nge piliyegmed, ni aram e kari piliyeg lanin’med ni polo’. Ma aram e rayog ni ngam nanged e tin nib m’agan’ Got ngay​—⁠ni tin nib fel’, nib fel’ u wan’ Got ma rib yal’uw.”​—Roma 12:1, 2.

Ngan Pi’ e Pi Maligach u Fithik’ e Yul’yul’

11. Mang e ba muun ngay ko fare bugithin ni “gadad be weliy” ni bay ko Hebrews 10:23?

¹¹ Nap’an ni yoloy Paul e babyor ni fan ko piin ni Hebrews, me athamgil ni nge weliy ban’en nib m’ag ko liyor nib riyul’ nib ga’ fan, me gaar: “Ere ngad chichiiyed pa’dad ko re n’en ni ir e ke l’agan’dad ngay ni ir e gadad be weliy murung’agen, ya ba pagan’dad ngak Got nra rin’ e tin ni ke yog.” (Hebrews 10:23) Fare bugithin ni “gadad be weliy” e ba sorfan ko “nganog ban’en,” maku ke weliy Paul murung’agen e “maligach ni fan ni ngan pining e sorok.” (Hebrews 13:15, NW) Re n’ey e be ayuwegdad ni nge yib nga lanin’dad fare maligach ni i pi’ Abel, Noah, nge Abraham.

12, 13. Mang e be dag e en ni ir be’ nu Israel u nap’an ni be pi’ e maligach ni yima urfiy, ma mang e rayog ni ngad rin’ed ma aram e ke bung rogon ni ngada daged e ngongol ni aram rogon?

¹² Ngiyal’ nra pi’ be’ nu Israel e maligach ni yima urfiy, ma ra “pi’ e re n’em ngak Jehovah ni lem rok.” (Leviticus 1:3) U daken e re maligach nem, me dag nga fithik’ e yoor e pi taw’ath ni boor nge runguy ni i pi’ Jehovah ngak girdien. Dabmu pagtalin ni n’en nib thil ko fare maligach ni yima urfiy e aram fare maligach ni kan tay nga altar ni yira urfiy me m’ay​—ni re n’ey e be yip fan e pigpig nge ognagey u polo’ i lanin’uy. Taab rogon, ya gad be dag ni ke mich e biyul’ u wan’dad ma gad be falfalan’ ko re taw’ath ney nfaan gad ra pi’ e “maligach ni biyul’ ni fan ni ngan pining e sorok, ni aram e thin ni gad ra yog,” ni fan ku Jehovah.

¹³ Yugu aram rogon ni piin Kristiano e dab kuura pied e maligach ni bod e​—gamanman ara yasay—​ma mil fan ngorad ni ngar machibnaged e thin nib fel’ ko Gil’ilungun ma ngar pingeged e girdi’ ngar manged pi gachalpen Jesus Kristus. (Matthew 24:14; 28:19, 20) Kam fanay e tayim rom ni ngam machibnag e thin nib fel’ ko Gil’ilungun Got nga fithik’ e yoor ma aram rogon ni ra nang boor e girdi’ e pi’ n’en ney nib fel’ ni ke chaariy Got ni fan ko girdi’ ni ma fol? Ga baadag ni ngam fanay e tayim rom nge gelngim ni fan ni ngam fil ban’en ngak e piin ni baadag e machib ma ngam ayuwegrad ni ngar manged pi gachalpen Jesus Kristus? Bochan ni gad ma un ko machib u fithik’ e pasig, ni bod fare maligach ni yima urfiy nib fel’ bon, ni ra falfalan’ Got ngay.​—1 Korinth 15:58.

Ngam Chag Ngak Got nge Girdi’ u Fithik’ e Falfalan’

14. Uw rogon ni thin rok Paul ni bay ko Hebrews 10:24, 25 e taareb rogon ko fare communion sacrifice?

¹⁴ Tomur riy, ma i weliy Paul u murung’agen thildad e pi walag u lan e ulung ni bochan ni gad be pigpig ku Got. “Ere nge bagadad ma nge i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndab da paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad, ngari gel ni fan e gimed be guy ni Chirofen ni bay yib Somol riy e be chugur.” (Hebrews 10:24, 25) Fare bugithin ni “nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak,” nge “dabda paged e muulung rodad,” ya “nge bagadad mi i pi’ e athamgil nga laniyan’ bagadad” ma urngin e pi n’en n’ey e ra ayuwegdad ni nge yib nga lanin’dad fare maligach ni communion u Israel ni fan ko girdi’ rok Got.

15. Mang e n’en ni taab rogon ko fare communion sacrifice nge pi muulung ni ma tay e piin Kristiano?

¹⁵ Fare bugithin ni “communion offerings” e yu ngiyal’ e kan thiliyeg ni “maligach ni fan ni nge aw e gapas.” U roy ma fare bugithin ni Hebrew ko “gapas” e ba sorfan nga boor ban’en, sana fan e re n’ey e aram e ngan un ko pi maligach nem ma ra yibnag e gapas u thilin Got nge girdi’ ngu fithik’ e pi walag. Reb e scholar e ke yog u murung’agen e communion sacrifice ni be gaar: “Riyul’ ni aram e tayim ni ngan chag ku Got ko m’ag u fithik’ e falfalan’, me sobut’nag Ir ni nge mang Guest ara bod ni keb ngak piyu Israel u nap’an e abich ko maligach, yugu aram rogon ni baga’ ni Ir e host rorad.” Bochan e re n’ey, ma ra yib nga lanin’dad e thin ni ke micheg Jesus’ ni gaar: “Ya gin nra gak l’agruw fa dalip ni’ ngay u fithingag, e aram e gu ba’ rorad ko gin’em.” (Matthew 18:20) Gubin ngiyal’ ni gad ra un ko muulung, ma ra fel’ rogodad riy ni ngada chaggad ngak e pi walag, nge bochan e pi thin ni yima fil riy, nge fare lem rodad ni Jesus Kristus ni Somol rodad e bay rodad. Aram e n’en ni ra ayuweg ni nge yib e falfalan’ ni ngan un ko muulung ma rayog ni nge gel e michan’.

16. Ngan ta’ fare communion sacrifice nga lanin’uy, ma mang e ra ayuweg e muulung ni ma tay e piin Kristiano ni ngari yib e falfalan’ riy?

¹⁶ Fare maligach ni communion, e urngin e mam​—ni bay ko fare chew, nge fare buoy, nge appendage u daken e ad, nge fare loins, ku arrogon fare mam ni bay u pochon e saf—​e ngan urfiy ma ra yib e ath riy nga daken e altar ni fan ku Jehovah. (Leviticus 3:3-16) Yima lemnag ni fare mam e ir bang ko gamanman ni rib fel’. Ngan tay e re nem nga daken fare altar e be yip fan e ngan pi’ ngak Jehovah e tin th’abi fel’. Ereray tapgin ni pi muulung ko piin Kristiano e bay e falfalan’ riy ya gathi kemus ni gad ra fil boch ban’en riy ya ku gad ma pining e sorok ngak Jehovah nbochan. Gad ra rin’ e re n’en ney u daken e tang​—u fithik’ e sobut’an machane n’en tha’bi fel’ ni ngan rin’—​e ngan motoyil nib fel’ rogon, ma ngan pi’ e fulweg nfaanra rayog. “Gimed e girdi’ e ngam pininged e sorok ngak Jah!” I yog fare psalmist, me ulul ngay ni gaar, “Ngam mon’ed reb e tang ni fan ku Jehovah nib biech, ni fan ni ngan pining e sorok ngak u lan e ulung ko piin nib yul’yul’.”​—Psalm 149:1.

Pi Taw‘ath ni Boor ni Yib Rok Jehovah e Be Sonnagdad

17, 18. (a) Mang maligach ni i ngongliy Solomon u nap’an e madenom ko dimow tempel u Jerusalem? (b) Mang e pi taw’ath ni ke yib ngak e girdi’ ko pi n’en ni kan rin’ u nap’an e madenom ni ngan toy e tempel?

¹⁷ Nap’an ni yibe madenomnag fare tempel ni kan toy u Jerusalem, ni ereram e pul ni bin medlip ko duw ni 1026 B.C.E., ma ke pi’ Solomon ni Pilung e “maligach ni baga’ u pe’owchen Jehovah,” ni immoy “fare maligach ni yima urfiy nge maligach ni grain nge boch e mam ni fan ko fare com­munion sacrifices.” Tin ni kan uneg ko fare maligach ni grain ni kan pi’, ma immoy 22,000 e garbaw ma 120,000 e saf ni kan pi’ ni maligach ko re ngiyal’ i n’em.​—1 Kings 8:62-65.

¹⁸ Rayog ni ngam sananag feni yoor e salpiy ni kan pi’ riy nge feni gel e maruwel nni tay ni fan ko re madenom nem ni baga’? Yugu aram rogon, ma kab ga’ fare taw’ath ni i yib ngak piyu Israel mab tamilang ni kab tolang puluwon ko salpiy ni kan pi’. Ma nap’an ni ke m’ay e re madenom nem, “me pag Solomon e girdi’ ngar sulod nga taferad. Ma yad gubin nra pininged e magar ngak, mi yad sul nga taferad ni kar falfalan’gad ni bochan urngin e pi n’en nib fel’ ni ke pi’ Somol ngak e tapigpig rok i David nge yu Israel ni girdi’ rok.” (1 Kings 8:66) Riyul’, rogon ni yog Solomon ni gaar, “fare taw’ath ni yib rok Jehovah​—e ir e ra fel’ rogon be’ riy, ma dabi puthuy e amith ngay.”​—Proverbs 10:22.

19. Mang e rayog ni ngada rin’ed ma aram rogon nra yib ngodad e pi taw’ath nib tolang puluwon ni yib rok Jehovah e chiney ma dabi m’ay?

¹⁹ Gad be par e chiney ko ngiyal’ ni fare “yaan e pi n’en nib fel’ ni bay fini yib” e kan thiliyeg ko “fare n’en ni ir e bin riyul’.” (Hebrews 10:1) Jesus Kristus, ni ir fare Prist nib Tolang, e ke yan nga tharmiy me pi’ rachaen ni puluwon e nge upunguy e denen ko urngin e girdi’ ni ke mich e maligach ni i pi’ u wan’rad. (Hebrews 9:10, 11, 24-26) Bochan e re maligach nem nib ga’ ngu daken e maligach ni ngada pied ngak Got nib klin ni aram e ngad pininged e sorok ngak u fithik’ e yul’yul’, ma ku rayog ni ngadarod iyan nga mon ni gad ba “falfalan’ u gum’ercha’dad,” ni gad be sap nga m’on ko ngiyal’ ni ra yib e pi taw’ath nra pi’ Jehovah ngodad.​—Malachi 3:10.

Uw Rogon ni Ngam Pi’ e Fulweg?

• Mang thin nge fal’eg lanin’uy e gad ra fil ko thin ni bay ko fare Motochiyel u murung’agen e pi maligach?

• Mang e n’en nib t’uf ma aram rogon e ra fel’ e maligach u wan’uy, ma mang fan e re n’ey ngodad?

• Mang e rayog ni ngada pied ni taab rogon ko maligach ni yima urfiy?

• Uw rogon ni ngan taarebnag e pi muulung ni ma tay e piin Kristiano ko fare communion offering?

[Picture on page 12]

Ke pi’ Jehovah Jesus’ ni maligach ni fan ni nge thap e girdi’ ngak