Rayog ni Nge Rin’ e Meybil Ban’en nib Fel’?

BA dake urngin e girdi’ ma bay ba ngiyal’ ni ra taw ngay me t’uf rok ni nge meybil. Riyul’, ni ba chugur i urngin raba’ e teliw ni ma meybil e girdi’ riy nib elmerin. Ni bod rogon, ra reb e rran ma bokum e biyu’ yay, ni ke meybil reb e Buddhist ni be sul u daken taaba meybil ni be gaar “Kugu tay e mich rog nga daken Amida Buddha.”

Rogon ni gadad be guy e pi magawon ni baaray ni be yan u fayleng iyan, ma aram e rayog ni ngad deeriyed ni nge lungudad: Mang e n’en ni be lemnag e girdi’ ni nge yog ngorad ko meybil? Mog gubin e pi meybil ney ma be yib angin nib fel’?

Mang Fan ni Ma Meybil e Girdi’?

Boor e girdi’ nu Orientals e yad ma meybil ngak pi be’ rorad ni kar m’ad nge ngak fapi got ko Shinto fa Tao. Yad ma rin’ ni aram rogon ni yad be athapeg ni nge yog e skeng rorad u skul, fa ngeb woomngin e woldug rorad, fa nge palognag e m’ar rorad. Bochan gelngin e maruwel rorad, ma pi Buddhist e yad ma athapeg ni nge yog e tamilangan’ ngorad. Hindus e yad ma meybil nib elmerin ko tin ni ri yad baadag e got ni pumoon nge got ni ppin ni nge yog e llowan’ nge salpiy ara chugum ni boor nge fel’ rogorad, ma nge ayuwegrad ko riya’ nge magawon.

Ma boch e Katolik e yad ma athapeg ni nge fel’ rogon e girdi’ u puluwrad ni ngar pied yad ngar manged monks nge sebester nga uri pired u lan e monasteries fa convents, nga yugu uri pired ni yad be meybil. Boor e Milyon e Katolik ni yad ma guy rogon ni nge falan’ Maria ngorad ni aram e yad ma meybil ni yad ma fek bogi meybil ni kan tunguy kar filed ke mit ngorad, ni sana ku ma ayuwegrad yu kiy i rosario. Pi yungi nam nu Oriental, e boor e girdi’ riy ni ma meybil ni be fanay e prayer wheels. Piin ni Protestant e yad ma sul u daken e thin ko fare meybil rok Somol, sana rogon ni bay ko lem rorad. Boor e Jews ni ma milekag nib palog ngar bad ra meybilgad nga dow e yoror u baani Ngal u Jerusalem, ni yad be athapeg ni ngan fulweg e tempel nga rogon mi ni pi’ reb e mfen nib biech mab fel’ rogon ma ba gapas.

Yugu aram rogon ni bokum e milyon e girdi’ ni kar kaded gelngirad ko meybil, ma girdi’ u ga’ngin yang e ka ba gel e magawon rorad ko gafgow, nge falay ni kireb ni yibe fanay, tabinaw ni be wer, cham, nge mahl. Ere uw rogon urngin e pi girdi’ ney e de m’ataw rogon e meybil ni yad be tay? Maku, reb e bay be’ ni ri be rungaag e meybil?

Bay Be’ ni Ma Rungaag e Meybil?

Meybil e dabi yib e fel’ riy ni faanra danir rungaag. Faanra meybil be’, ma ba mudugil u wan’ ni bay be’ ko bin baaram e giyow ko kan ni danir guy ni be motoyil ngak. Ma, meybil e gathi ma yan ni bod lamay ni ma yan min rungaag. Boor e girdi’ nib mich u wan’rad ni bay be’ ni ku rayog ni nang laniyan’ e ani be meybil. Ere susun mini’ e cha’ nem?

Rri rogon ni sum e lem u fithik’ fapi bilyon ni neurons ni cerebral cortex ko man’ey rodad e ri ka bay ni dariy reb e llowan’ ara piin ni yad ma gay murung’agen ban’en ni manga ke tamilangan’ riy nib fel’ rogon. Ma rayog, ni yugu aram rogon, ma Cha’ ni ngongliy rogon e man’ey rodad e rayog rok ni nge poy ara nang e lem. Ni cha’ nem e dariy be’ ya ani Sunmiydad ni Jehovah Got. (Psalm 83:18; Revelation 4:11) Pi meybil e ir e thingari sor ngak. Machane gur ma tayan Jehovah ko urngin e pi meybil nem?

Gur Urngin e Meybil ni Yima Rungaag?

David ni pilung ko Israel ni kakrom e be’ nib moon nib ta meybil. Ir be’ nib mat’aw ni ma thogthognag Got e tang nga i yon’, ere i tang ni gaar: “Bochan e ga be fulweg taban e meybil, urngin e girdi’ e ngar bad ngom.” (Psalm 65:2) Jehovah e rayog rok ni nge nang fan e meybil ni yibe tay ni demtrug reb e thin ko fa piyu biyu’ mit e thin ni ma yog e girdi’. Bochan ni dariy reb e girdi’ ni rayog ni nge maruweliy lolugen urngin ban’en ni aram oren ma be yip fan ni gathi ku dabiyog ku Got ni nge rungaag urngin e meybil ni ma yan ngak ni rogon nib magan’ ngay.

Maku arrogon, Jesus Kristus​—ni ku ir reb e moon nib ta meybil—​me tamilangeg ni gathi gubin e meybil ni ma falan’ Got ngay. Amu changar ko mang e yog Jesus rogon ni uni rin’ e ngiyal’ nem ni yima sul u daken e meybil ni kan fil ke mit nga lolugey. Rogon ni ba ko Bible ko Katolik ni Jerusalem Bible, e i yog riy ni gaar: “Gimed ra meybil ma dab umu ngulngulgad ni dariy be’ ni ra nang fan ni bod rogon e n’en ma rin e piin ni dar nanged Got, ni bochan e yad ma lemnag ni faan yira yog e thin ni boor ma aram e yira motoyil ngorad.” (Matthew 6:7, New World Translation) Dabiyog ni ngad lemnaged ni ra motoyil Jehovah ko meybil ni danir yog e tin riyul’ ni yibe lemnag.

Rogon fan ni boch e meybil e der ma falan’ Got ngay, e reb e fonow ko Bible e gaar: “Ani be fek tel ara der motoyil ko fare motochiyel​—e ku arrogon e meybil rok ni ku ban’en ni dabni adag.” (Proverbs 28:9, NW.) Maku reb e machib nib fel’ e: “Jehovah e ba malaf nga orel ko ani de mat’aw, ma ma rungaag e meybil ko piin ni yad ba mat’aw.” (Proverbs 15:29, NW) Ba ngiyal’ kakrom ma piin ni yad ma yog e thin rok yu Judah e ri tomalgad nga tomalngin e kireb, me tamilangnag Jehovah ni gaar: “Nap’an ni ga ra k’iyag paam, mu gu mithag owcheg rom. Ni yugu aram rogon ni boor e meybil ni kam pi’, ma dabgu motoyil; ya pi racha ni ke map e ri paam e kari sug riy.”​—Isaiah 1:1, 15, NW.

Apostal Peter e ki yog reb e ban’en ni ku rayog ni nge maruwliy e meybil nge dabi m’agan’ Got ngay. I yoloy Peter ni gaar: “Maku er rogomed e piin ni pumoon ni nguum pired e pi leengimed ma thingar um nanged ni yad mmeewar ko pumoon, ere thingar um tiyed farad; ya ku er rogorad nra pi’ Got e taw’ath rorad ni yafas ni bod gimed. Mu rin’ed ni ara rogon nge dabi magawon ban’en ko meybil ni gimed be pi’ ngak Got.” (1 Peter 3:7) Meybil rok be’ ni be fek ya thin e pi fonow ney e rayog ni nge dabni rung’ag!

Ere rib tamilang, ni ba mudugil ni bay boch ban’en ni thingar ni rin’ ni faanra nge motoyil Got ko meybil. Machane, boor e piin ni yad ma meybil ni yad be dag ni gathi ri baga’ fan u wan’rad ni ngar rin’ed e tin ba t’uf ni ke yog Got ni ngad rin’ed. Arfan ni boor e meybil nib elmirin ni yibe tay ma dawori yib angin ni nge fel’ boch e fayleng.

Ere mang, e n’en, ni ke yog Got nib t’uf ni ngad rin’ed ni bochan e nge motoyil Got ko meybil rodad? Fulweg riy e ri ba l’ag rogon nga fan ni gadad be meybil. Bin riyul’ riy, e faanra gad baadag ni ngad nanged ko be yib felngin e meybil fa danga’ ma thingar da nanged ko mang fan e meybil. Mang fan ni ke ta’ Jehovah ni rayog ni ngada nonad ngak?

[Picture Credit Line on page 3]

G.P.O., Jerusalem