Mang Fan ni Gathi Gubin e Meybil ni Ma Fulweg Got Taban?

Jehovah Got ni Chitamangidad ni bay u tharmiy e ba m’agan’ ngay ma kub felfelan’ ngay ni nge motoyil ko meybil ni gad ma tay ni keb u gum’ircha’dad. Machane bay boch ban’en ni ma taleg ndabi fulweg taban e meybil rodad. Mang e pi n’ey, ma mang boch ban’en nsusun e dab da paged talin u nap’an ni gad be meybil? Baaray boch ban’en ni be yog e Bible nrayog ni nge ayuwegdad.

Ba ulung i girdi’ ni yad bay u ba galesiya ni yad be beeg e meybil rorad u lan ba ke babyor ni kan yoloy e meybil ngay.

“Faanra mmeybilgad ma dab um sulod u daken taab bugithin ni pire’ yay.”—Matthew 6:7.

Dabun Jehovah ni ngaud sulod u daken boch e meybil ni kad filed ke mit ngodad ara ud beeged boch e meybil ni kan yoloy nga lan yu ken e babyor. Ya baadag ni ngad nonad ngak nrogon ni keb u gum’ircha’dad. Am lemnag rogon lanin’um ni faanra bay reb e fager rom ni taab n’en e yug ma yog ngom ni gubin e rran. Fager nib manigil e ba pufpuf e thin u thilrad maku yad ma non ngorad nrogon ni keb u gum’ircha’rad. Faan gad ra meybil ngak e Chitamangidad ni bay u tharmiy nrogon ni keb u gum’ircha’dad, ma aram e gad be dag ngak ni ir e fager rodad.

Be’ nib pumoon ni be sap nga lang ma be ker bangi lottery ticket ni nge m’ug e n’en bay u daken.

“Faan gimed ra ning [ban’en] ngak ma der pi’ ngomed ni bochan e ba kireb e tin ni gimed be finey ngay.”—James 4:3.

Gad manang ndabi fulweg Got taban e meybil rodad ni faanra gad be yog boch ban’en ngak ndabun ni ngad rin’ed ara gad be ning boch ban’en ngak ndabun ni nge yag ngodad. Bod ni, faanra be un be’ ngab mit e gosgos ni nge yag e salpiy riy, ma aram me meybil ngak Got ni nge fel’ e wol rok nge gel ko gosgos ni be un ngay me yag boor e salpiy ngak, ma gur, ra fulweg Jehovah taban e meybil ni aram rogon, fa? Rib tamilang e n’en ke yog ngodad u murung’agen e chogow, ma kki yog ngodad ndabi mich u wan’dad boch ban’en nde riyul’ ni bod rogon boch ban’en ni yima yog nra fal’eg e wol ko girdi’. (Isaiah 65:11; Luke 12:15) Rib mudugil ni gad manang ndabi fulweg Jehovah taban e meybil ni aram rogon! Faanra nge fulweg Got taban e meybil rodad, ma thingar da guyed rogon ni nge puluw e meybil rodad ko n’en be yog e Bible.

Reb e tayugang’ ko teliw ni be yibilay ba ulung i salthaw.

“Faanra damur fol ko motochiyel, ma Got e ra dabuy ni nge motoyil ko pi meybil rom.”—Proverbs 28:9, BT.

Kakrom e da i fulweg Got taban e meybil rok e piin nda ur folgad ko pi motochiyel rok nib mat’aw. (Isaiah 1:15, 16) Ka dawori thil e lem rok Got. (Malaki 3:6) Faanra gad baadag ni nge fulweg taban e meybil rodad, ma thingar da athamgilgad u rogon nrayog rodad ni ngad folgad ko pi motochiyel rok. Ere uw rogon ni faanra ud rin’ed boch ban’en nib kireb kafram? Gur, aram e be yip’ fan ndabi motoyil Jehovah ngodad? Danga’! Ra n’ag Got fan e kireb rodad ni faanra da kalgadngan’dad ko kireb rodad ma gad athamgil ni ngad rin’ed e tin nib m’agan’ ngay.—Acts 3:19.

“En nra yib ngak Got e thingari mich u wan’ ni ba’ Got ma ra tow’athnag e piin ni yad be gayiy Got.”—Hebrews 11:6.

Meybil e gathi kemus ni ban’en ni gad ma rin’ ni nge fal’eg lanin’dad u nap’an ni gad be mochuch. Ya aram reb e kanawo’ ni gad ma dag ngak Got nib mich u wan’dad, ma gad be tayfan, mab t’uf rodad. I yog James nreb i gachalpen Jesus ni faanra darud ‘wenignaged ban’en ngak’ Jehovah u fithik’ e michan’, ma aram e dab da lemnaged nra “pi’” ngodad e tin gad be ning ngak. (James 1:6, 7) Ere faanra ngari mich Got u wan’dad, ma aram e thingar da ted e tayim mu kud guyed rogon ni ngad nanged boch ban’en u murung’agen u daken e fol Bible. Faan gad ra rin’ ni aray rogon, ma aram e gad ra nang e n’en nib m’agan’ ngay miki yag ni ngad meybilgad u fithik’ e pagan’ ni bochan e gad manang ni be motoyil ko meybil rodad.