Mini’ E Pi Tapigpig Rok Got Ko Ngiyal’ N’ey?

“Ya gelngimad ni nggu maruweliyed ngay e Got e ke pi’ ngomad: ya ir e ke pi’ gelngimad ni nggu pigpiggad ko fa bin nib biech e m’ag.”​—2 KORINTH 3:5, 6.

1, 2. Mang e maruwel ni urngin e Kristiano ko fa bin som’mon e chibog e kara uned ngay, machane uw rogon ni kan thiliyeg boch ban’en?

NAP’AN e bin som’mon e chibog ni Common Era, ma urngin e Kristiano e kara uned nga reb e maruwel ni baga’ fan​—ni aram e n’en ni ke mil fan ngorad e nguur wereged e thin nib fel’. Yad gubin e kan dugliyrad ni ngar manged pi tapigpig ko fa bin nib biech e m’ag. Boch i yad e ka bay boch e maruwel ni kan pi’ ngak, ni aram e ngar filed ban’en ngak e girdi’ u lan e ulung. (1 Korinth 12:27-29; Efesus 4:11) Piin ni gallabthir e bay e maruwel rorad nib tomal u tabinaw. (Kolose 3:18-21) Machane yad urngin e kara uned ko maruwel nib ga’ fan ni ngar machibgad. U thin ni Greek u Bible, ni ka nog Christian Scriptures ngay, ma re maruwel ney e kan tay ni di·a·ko·niʹa​—ni aram e ngan pigpig, ara ngan wereg e machib.​—Kolose 4:17.

² Ma tomren ni ke yan e tayim, ma kan thiliyeg boch ban’en. Ke sum e girdi’ ni yima yog clergy ngorad, ma kar ted yad ni ngar manged e pi tamachib. (Acts 20:30) Piin ni yima yog e clergy ngorad e yad buchuw ma yad bang ko piin ni ma yog ni yad e Kristiano. Boor i yad e yima yog laity ngorad. Yugu aram rogon ni piin ni ka nog laity ngorad e kan fil ngorad ni bay boch ban’en ni ke mil fan ngorad, mab muun ngay ni ngar pied boch e salpiy ni ngan ayuweg e piin ni clergy, ma ka boor i yad e kemus ni ma motoyil ko machib ni yima ta’.

3, 4. (a) Uw rogon ni boch e girdi’ ko piin ni yima yog Kristiano ngorad e kara manged e pi tapigpig ara minister? (b) Mini’ e ma yog ni tapigpig ara minister ko piin ni yima yog Kristiano ngorad, ma mang fan ni yad ba thil e Pi Mich rok Jehovah?

³ Piin ni clergy e ma yog ni yad e pi tapigpig (i yib ko fare bugithin ni minister, ereray e thin ni Latin ko fare thin ni di·aʹko·nos, “tapigpig”).a Ba t’uf ni ngar mu’niged e college ara seminaries ma fin ni ra duguliyrad ngar manged e minister. The International Standard Bible Encyclopedia e be gaar: “ ‘Fare bugithin ni Ordain’ nge ‘ordination’ e baga’ nib m’ag ko liw nib tolang ni kan pi’ ngak e piin ni ka nog minister ara prist ngorad nib puluw ko motochiyel ko galesiya, ni be weliy ni bay mat’awrad ni ngar machibnaged fare Thin ara ngar ayuweged e pi sacraments, ara ngara rin’ed ni urngin.” Mini’ e ra dugliyrad ni ngar manged e pi minister? Fare babyor ni The New Encyclopædia Britannica e be gaar: “U lan e galesiya ni ka bay e piin ni ka nog episcopate ngorad, ma en ni bishop e ir e ra duguliy. U Presbyterian churches, e en ni minister ni ka nog presbytery ngak e ir e ra dugliy.”

⁴ Arfan, ni u lan e galesiya ko piin ni ka nog Kristiano ngorad, e kemus ni yad buchuw e rayog ni ngar manged e tapigpig ara minister. Machane, gathi aram rogon e Pi Mich rok Jehovah. Mang fan ni danga’? Ya bochan ni piin Kristiano kakrom u nap’an fa bin som’mon e chibog e gathi aram rogon e n’en ni un rin’ed riy.

Mini’ e Riyul’ ni Pi Tapigpig rok Got?

5. Rogon ni yog e Bible, mini’ e piin ni tapigpig ara minister?

⁵ Rogon ni yog e Bible, e urngin e piin ni ma liyor ngak Jehovah​—u tharmiy ngu roy u fayleng—​e yad e pi tapigpig ara minister. Pi engel e kar pigpiggad ngak Jesus. (Matthew 4:11; 26:53; Luke 22:43) Pi engel e ku “yad ma pigpig ngak Got ni ma l’ograd ngar ayuweged e piin ni ngar thapgad ngak.” (Hebrews 1:14; Matthew 18:10) Jesus e ir reb e tapigpig kakrom. I yog ni gaar: “Ni bod e en ni Fak e Girdi’ nde yib ni ngan pigpig ngak, machane yib ni nge pigpig me pi’ e pogofan rok nge biyuliy boor e girdi’ ngay.” (Matthew 20:28; Roma 15:8) Ere, bochan ni pi gachalpen Jesus e thingara “leked luwan ay,” ere der ma gin e girdi’ ngay ni ku thingara manged e pi tapigpig.​—1 Peter 2:21.

6. Uw rogon ni i dag Jesus ni pi gachalpen e thingara manged e pi tapigpig ara minister rok?

⁶ De n’uw nap’an nga tomren ni ke yan Jesus nga tharmiy, me non ngak pi gachalpen ni gaar: “Ere mmarod ngak girdien e pi nam u gubin yang ngam pingeged yad ngar manged pi gachalpeg, mi gimed taufenagrad nga fithingan e Chitamangiy nge Fak nge fare Kan ni Thothup, mi gimed fil ngorad rogon ni nguur folgad u gubin e tin ni ku gog ngomed ni nguum rin’ed. Ma dab mpaged talin ni gubin ngiyal’ ma gu bay romed, nge yan i mada’ nga tomren e fayleng.” (Matthew 28:19, 20) Pi gachalpen Jesus e ke tay chilen ngorad ni ngar pingeged e girdi’ ngar manged pi gachalpen’​—ere yad e pi tapigpig. Piin ni kafini mang pi gachalpen Jesus e ngara filed rogon ni ngara folgad ko urngin ban’en ni i tay Jesus chilen, mab muun ngay e motochiyel rok ni ngan yan ngan pingeg e girdi’ ngar manged pi gachalpen. Pumoon nge ppin, nge piin ni ke ilal ara ka ba bitir, ma pi gachalpen Jesus nib riyul’ e rayog ni nge mang reb e tapigpig ara minister.​—Joel 2:28, 29.

7, 8. (a) Mang thin u Bible ni be dag ni urngin e Kristiano nib riyul’ e yad e pi tapigpig ara minister? (b) Mang boch e deer ni ke m’ug u murung’agen rogon ni ngan duguliy be’ ni nge mang tapigpig ara minister?

⁷ N’en ni buch ko Pentekost 33 C.E. e ba m’ag ngay ya urngin e pi gachalpen Jesus ni ur moyed u rom, ni pumoon nge ppin, e ka ra uned i weliy murung’agen e “pi n’en ni ke ngongliy Got.” (Acts 2:1-11) Maku, i yoloy Paul ni apostal ni gaar: “Ya ra mich u wan’dad me mat’awnagdad Got ngak; ma gadad ra yog nga dap’ i l’ugundad, ma aram e kad thapgad.” (Roma 10:10) I yog Paul e pi thin nem, ni gathi goo fan ko piin ni clergy ni yad buchuw, ya fan “ko urngin e girdi’ ni [ur moyed] u Roma ni yad ba t’uf rok Got.” (Roma 1:1, 7) Maku, urngin e ‘piin girdien Got nib yul’yul’ u Efesus u fithik’ Kristus Jesus e thingara “weliyed e Thin Nib Fel’ ni murung’agen e gapas e nge mang sus rorad.” (Efesus 1:1; 6:15) Ma urngin i yad ni kar rung’aged fare babyor ni kan pi’ ngak e piin ni Hebrew e ka nog ngorad ni ngar ‘chichiiyed pa’rad ko re n’en ni ir e ke l’agan’rad ngay ni ir e yad be weliy murung’agen e athap rorad nib mudugil.’​—Hebrews 10:23.

⁸ Ere, wuin e ra mang be’ reb e tapigpig ara minister? Fan e re thin ney e mang ngiyal’ e yira duguliy be’ nge mang tapigpig? Ma mini’ e ra duguliy?

Wuin ni Ngan Duguliy ni Nge Mang Tapigpig

9. Wuin e kan duguliy Jesus ni nge mang tapigpig ara minister, me mini’ e ke duguliy?

⁹ Ngan nang ko wuin nge mini’ e ra duguliy be’ nge mang tapigpig ara minister, ma ngam lemnag e n’en ni rin’ Jesus kristus. Dariy e babyor ko girdien e seminary ni kan pi’ ngak nra dag ni ir reb e minister, ma gathi girdi’ e ke dugliy ni nge un ko re maruwel nem. Ere, mang fan nrayog ni nga dogned ni ir reb e minister kakrom? Ya bochan e ke lebug e thin rok Isaiah ni kan thagthagnag ni gaar: “Fare Kan ni Thothup rok Somol e ke yib nga dakenag. Ke liyfeg ni nggu machibnag e Thin Nib Fel’ ni yib rok Got.” (Luke 4:17-19; Isaiah 61:1) Pi thin ney e be dag nib tamilang ni kan tay chilen ngak Jesus ni nge machibnag e thin nib fel’. Mini’ e ke duguliy? Bochan ni kan ni thothup rok Jehovah e ir e ke duguliy ni fan ni nge un nga reb e maruwel, mab tamilang ni Jehovah Got e ir e i dugliy Jesus. Wuin ni i buch e re ney? Nap’an ni kan taufenag Jesus ma aram e tayim ni ke yib e kan ni thothup rok Jehovah nga daken. (Luke 3:21, 22) Ere, nap’an ni un Jesus ko taufe ma aram e tayim ni kan dugliy ni nge mang tapigpig ara minister.

10. Mini’ e ke pi’ “gelngin” ngak e piin tapigpig ni Kristiano”?

¹⁰ Ma uw rarogon e pi gachalpen Jesus ko fa bin som’mon e chibog? Maku Jehovah e ke dugliyrad ngar manged e pi tapigpig ara minister. I yog Paul ni gaar: “Ya gelngimad ni nggu muruweliyed ngay e Got e ke pi’ ngomad: ya ir e ke pi’ gelngimad ni nggu pigpiggad ko fa bin nib biech e m’ag.” (2 Korinth 3:5, 6) Mang e i rin’ Jehovah ni piin ni ma liyor ngak e kar manged pi tapigpig rok? Mu lemnag e n’en ni ke buch rok Timothy, me yog Paul ni “be machibnag e Thin Nib Fel’ ni murung’agen Kristus.”​—1 Thessalonika 3:2.

11, 12. Uw rogon ni ke mon’og Timothy ko tirok Got me mang reb e tapigpig ara minister?

¹¹ Pi thin ni baaray ni kan yoloy ni fan ku Timothy e ra ayuwegdad ni nge tamilang u wan’dad rogon ni ke mang tapigpig ni gaar: “Machane gur e nguum par ko tin nib riyul’ e thin ni kan fil ngom, ni ir e kari mich u wan’um. I gur e ga manang ko mini’ e piin ni ur machibnaged gur, ma ga manang nnap’an ni ka gab bitir ma ga manang e thin ni bay u lan fare babyor nib thothup, ni ir e rayog ni nge tamilangnigem u rogon ni yima thap ngak Got, ni ma yog u daken e michan’ ngak Jesus Kristus.” (2 Timothy 3:14, 15) Tamilangan’ ko Thin u Bible e ir fare def ko michan’ rok Timothy, ma ir e ke k’aring ni nge un ko machib. Kemus ni bieg ni goo ir e aram e n’en nib t’uf rok? Danga’. Ba t’uf rok Timothy e ayuw ni nge yog ngak e tamilangan’ nib puluw ma kub t’uf rok e ayuw ni nge nang fan e thin ni be bieg. (Kolose 1:9) Arfan ni “kari mich Got u wan’” Timothy. Bochan ni ke nang e Thin nu Bible ni “ka nap’an ni kab bitir”, mab tamilang ni bin som’mon e sensey rok e aram e chitiningin nge titaw rok, ma chitamangin e de mich u wan’.​—2 Timothy 1:5.

¹² Machane, boor ban’en ni ke ayuweg Timothy uw rogon ni ke mang minister ara tapigpig. Reb, e aram ke gel e michan’ rok nbochan i chag ngak e piin Kristiano ko pi ulung nib chuchugur ngorad. Uw rogon ni gad ra nang? Bochan nap’an ni ke mada’nag Paul Timothy ko yay ni som’mon, ma ka nog ni “urngin e walag ni girdien Kristus ni yad ma par u lan yu Lystra ngu lan yu Ikunium e ra weliyed murung’agen Timothy ni be’ nib Fel’.” (Acts 16:2) Maku, ngiyal’ i nem ma bay boch e walag ni kara yoloyed e babyor ngar pied ngak e pi ulung ni fan ni ngar pied e athamgil nga lanin’rad. Ma ma yib e piin ni piilal ngorad ni ngar pied e athamgil nga lanin’rad. Pi n’en nem e ke ayuweg e piin Kristiano ni bod Timothy ni nge mon’og ko tirok Got.​—Acts 15:22-32; 1 Peter 1:1.

13. Wuin ni kan duguliy Timothy nge mang tapigpig ara minister, ma mang fan ni ga ra yog ni dawori tal ko mon’og ko tirok Got e ngiyal’ i nem?

¹³ Bochan e thin ni ke yog Jesus ni bay ko Matthew 28:19, 20, ma ke mudugil lanin’dad ni immoy ba ngiyal’ ni michan’ rok Timothy e ke k’aring ni nge folwok rok Jesus me un ko taufe. (Matthew 3:15-17; Hebrews 10:5-9) Ma re n’em e be yip’ fan ni ognag Timothy ir u polo’ e yafas rok ngak Got. Ngiyal’ ni ke un Timothy ko taufe ma ke mang reb e minister ara tapigpig. Ka nap’an e ngiyal’ nem, ma yafas rok, nge gelngin, nge urngin ban’en ni bay rok e ke mang tirok Got. Re n’em e ir bang ko liyor rok nib ga’ fan, ni aram e “pigpig nib thothup.” Machane, dawori gaman u wan’ Timothy ni nge mang reb e minister ara tapigpig. I ulul iyan ni nge ilal ko tirok Got me mang reb e Kristiano ni ke ilal kemus rogon ko tirok Got ban’en. Aram e n’en ni ke buch rok Timothy ya bochan ni ke chag ngak e Kristiano ni ke ilal ko tirok Got ni bod Paul, ma fil ban’en ni goo ir, ma ma machibnag e thin u fithik’ e pasig.​—1 Timothy 4:14; 2 Timothy 2:2; Hebrews 6:1.

14. Ngiyal’ ney, ma uw rogon nra mon’og e piin ni “nib fel’ e yafas ni manemus u wan’rad” ni ngar manged e pi tapigpig ara minister?

¹⁴ Ngan duguliy ni be’ e ra mang tapigpig ara minister ko ngiyal’ ney e taab rogon ko kakrom. En ni “ba fel’ e yafas ni manemus u wan’” e yira fil e Bible ngak ni nge nang murung’agen Got nge tin nib m’agan’ ngay. (Acts 13:48) Ma rayog rok be’ ni nge fol ko kenggin e motochiyel u Bible ma rayog ni nge meybil ku Got u fithik’ e yul’yul’. (Psalm 1:1-3; Proverbs 2:1-9; 1 Thessalonika 5:17, 18) Ma chag ngak e pi walag ma ma un ko boch e taw’ath nge pi yaram ni ke ta’ “fare tapigpig nib yul’yul’ mab gonop.” (Matthew 24:45-47; Proverbs 13:20; Hebrews 10:23-25) Ere ra mon’og nbochan ni be un ko reb e yaram nib fel’ ni kan ta’ ni fan ni ngan skulnag e girdi’ riy.

15. Mang e ra buch u nap’an nra un be’ ko taufe? (Ku mu guy e footnote.)

¹⁵ Munmun, ma fa cha’ ni be fil e Bible, e ra gel e t’ufeg rok ngak Got ni Jehovah ma ke gel e michan’ rok ko biyul, ma arfan ni ke adag ni nge ognag ir ngak e Chitamangin u tharmiy u polo’ i laniyan’. (John 14:1) Ma ra meybil ni goo ir ni fan e nge ognag ir ngak Got ma fini un ko taufe ni nge dag ngak e girdi’ ni ke ognag ir ku Got. Nap’an ni kan taufenag ma aram e tayim ni kan duguliy ni nge mang tapigpig ya bochan ni kan nang ni ke ognag ir ku Got, ni reb e di·aʹko·nos, rok Got. Thingari par nib dar ko fayleng. (John 17:16; James 4:4) Ke pi’ ir ngak Got u polo’ i yafas rok nge mang “maligach nib fos ngak, ma ba fel’ u wan”. (Roma 12:1)b Ke mang reb e tapigpig ara minister rok Got, ni be folwok rok Kristus.

Mang e Pigpig ni Ma Ta’ e Kristiano?

16. Mang boch e maruwel ni kan pi’ ngak Timothy ni ir reb e tapigpig ara minister?

¹⁶ Mang e n’en nib l’ag ko pigpig ni i tay Timothy? Bochan ni ma un ngak Paul ko milekag ma arfan ni immoy e maruwel rok nib thil. Ma tomren ni kan duguliy ni nge mang piilal me athamgil ni nge fil ban’en ngak e pi walag me gelnag e michan’ rorad. Machane bang ko pigpig ni tay ni th’abi ga’ fan, e nge machibnag e thin nib fel’ ma ma pingeg e girdi’ ngar manged pi gachalpen Jesus ni taab rogon ko maruwel ni tay Jesus nge Paul. (Matthew 4:23; 1 Korinth 3:5) I yog Paul ngak Timothy ni gaar: “Machane thingar mu par ni ga be filmunguyan’um u fithik’ urngin ban’en; mu um athamgiliy e gafgow ni beb ngom, ma ga rin’ e maruwel rok e tamachib ko Thin Nib Fel’ ni yib rok Got, ma ga ngongliy urngin e maruwel ni kan pi’ ngom nrogon e tapigpig rok Got.”​—2 Timothy 4:5.

17, 18. (a) Mang pigpig ni ma un e piin Kristiano ngay? (b) Uw feni ga’ fan e maruwel ko machib ngak e en ni tapigpig ara minister?

¹⁷ Ma aram rogon e pi tamachib ni Kristiano ko ngiyal’ ney. Yad ma machibnag e thin ngak e girdi’, ni aram e maruwel ko en tamachib, ni ma ayuweg e girdi’ ngar nanged e kanawo’ ni ngar thapgad riy ngak Got nbochan e maligach ni ke pi’ Jesus ma ra filed ko piin nib sumunguy ni ngara pininged fithingan Jehovah. (Acts 2:21; 4:10-12; Roma 10:13) Yad ma micheg e thin u Bible ni kemus ni Gil’ilungun Got e aram e athap ko girdi’ nib gafgow maku yad ma dag ni mus ko chiney ma ra fel’ boch e par rodad nfaan gad ra fol ko kenggin e motochiyel rok Got. (Psalm 15:1-5; Mark 13:10) Machane en ta machib ni Kristiano e der ma wereg fare machib ni ka nog social gospel ngay. Machane, ma machibnag ni ‘pigpig ku Got e baga’ fan ko biney e tamilang nge bin bay fini yib.’​—1 Timothy 4:8.

¹⁸ Riyul’, ni boor u fithik’ e piin tapigpig e bay yugu boch e kanawo’ ko pigpig ni yad ma un ngay, nib thil reb nga reb. Boor i yad e bay e tabinaw rorad nib t’uf e ayuw riy. (Efesus 5:21–6:4) Piin piilal nge ministerial servants e bay e maruwel rorad u lan e ulung. (1 Timothy 3:1, 12, 13; Titus 1:5; Hebrews 13:7) Boor e Kristiano ni ma ayuweg e dimow Kingdom Hall. Ma boch e bay e maruwel rorad nrib fel’ ya yad be par u reb e naun ni ka nog Bethel ngay ni fare Watch Tower Society e ke fal’eg. Machane, urngin e pi tapigpig ni Kristiano e yad ma machibnag e thin nib fel’. Thingara uned ngay ni yad gubin. Rani un ko re maruwel ney ma yira nang ni ir be’ ni reb e tapigpig ni Kristiano nib riyul’.

Rogon e Lem Rok Reb e Tapigpig ni Kristiano

19, 20. Mang lem ni ba t’uf ni nge yog ngak e en ni tapigpig ara minister ni Kritiano?

¹⁹ Boor u fithik’ e pi tamachib ni yima yog Kristiano ngorad e yad be lemnag ni nga rin’ tayfarad, ma liw rorad e “reverend” nge “father.” Machane, en tapigpig ni Kristiano e manang ni kemus ni goo Jehovah e bay rogon ni ngan liyor ngak. (1 Timothy 2:9, 10) Dariy e tapigpig ni Kristiano ni be lemnag ni nganni tay fan ni aram rogon ara be tafinaynag ni nge yog ngak e liw nib tolang. (Matthew 23:8-12) Manang ni fan fare bugithin ni di·a·ko·niʹa e “ngan pigpig.” Fare verb nib l’ag ko re thin ney e yu ngiyal’ u Bible e yima fanay ni be sor fan ko pigpig ni yima tay ngak yugu boch e girdi’, ni bod fare maruwel ko en ma wereg e ggan ara waiter. (Luke 4:39; 17:8; John 2:5) Yugu aram rogon ni yima fanay e re n’ey nib l’ag ko pigpig ni ma tay e Kristiano, ni aram e maruwel nib fel’, ma ka be par ni fan e di·aʹko·nos e aram e tapigpig.

²⁰ Ere en Kristiano e dariy tapgin ni nge lemnag ni ir be’ nib ga’fan. Piin tapigpig ni Kristiano​—nyugu aram rogon ni kan pi’ ngorad reb e maruwel nib thil u lan e ulung—​ma ka yad bogi tapigpig nib sobut’ ya sib. I yog Jesus ni gaar: Faanra ba adag bigimed ni nge mang ir e ba tolang, ma ir e thingari mang tapigpig romed ni gimed gubin; ma faanra ba adag bigimed ni ir e nge m’on, me ir e thingari mang sib romed.” (Matthew 20:26, 27) Nap’an ni be dag Jesus e lem nib mat’aw nib t’uf ni ngan maruweliy, ma aram me luknag Jesus ayrad, ni aram e maruwel ko sib ni th’abi sobut’. (John 13:1-15) Aram e pigpig ni th’abi sobut! Arfan, ni piin tapigpig ni Kristiano e yad ma pigpig ku Got ni Jehovah nge Jesus Kristus. (2 Korinth 6:4; 11:23) Yad be dag nib sobut’ lanin’rad ma arfan ni bagayad e ma pigpig ngak bagayad. Ma nap’an ni yad ra machibnag e thin nib fel’, ma yad be pigpig ngak be’ nde michan’ ndariy e lem nib siin riy.​—Roma 1:14, 15; Efesus 3:1-7.

Ngani K’adan’uy ko Pigpig

21. Uw rogon ni ke yib angin ngak Paul nbochan ni i k’adan’ ko pigpig ni i tay?

²¹ Rogon e lem rok Paul, ni en ni tapigpig e ba t’uf ni nge k’adan’. Ke yog ngak piyu Kolose ni ke un ko gafgow nib gel ni fan e nge machibnag fare thin nib fel’ ngorad. (Kolose 1:24, 25) Machane, bochan ni ke k’adan’, ma arfan ni boor e girdi’ ni kar folgad ko thin nib fel’ ma kar manged pi tapigpig. Kani fakayrad kar manged pifak Got nge pi walagen Jesus Kristus, ma yad be athapeg ni yad ra mang boch e kan ma ra chaggad ngak Jesus u tharmiy. Aram e taw’ath nib tolang puluwon nbochan e k’adan’!

22, 23. (a) Mang fan ni ba t’uf ni nge k’adan’ e piin ni tapigpig ara minister ko ngiyal’ ney? (b) Mang wom’ngin nib fel’ ni ra yib ngak e Kristiano ni be k’adan’?

²² Pi tapigpig rok Got nib riyul’ e ba t’uf ni ngara k’adedan’rad. Gubin e rran ma boor i yad ni kar magawongad nbochan e m’ar nge gafgow nge amith ko pillibthir. Boor e llabthir ni ma maruwel nib elmirin​—ni dariy e ani mabgol rorad—​ni fan ni ngar ayuweged e pi bitir rorad. Pi bitir ni ma un ko skul e dar rusgad ni ngara togopuluwgad ko tin kireb ni bay u toobrad. Boor e Kristiano ni kaygi gel e gafgow rorad ko salpiy. Ma boor i yad ni keb e togopuluw ngorad ara ke mo’maw’ e par rorad nbochan ni gad bay ko tayim ni “ri bay mo’maw’ ni ngan par riy”! (2 Timothy 3:1) Arrogon, pi tapigpig rok Jehovah e chiney ni ke chuchugur ko nel’ i milyon e rayog ni nga rogned ni bod rogon Paul ni apostal ni gaar: “Machane urngin ni gamad be rin’ e gamad be dag riy ni gamad bogi tapigpig rok Got, ni fan e gamad be k’adan’mad ko gafgow ni yibe tay ngomad.” (2 Korinth 6:4) Pi tapigpig ni Kristiano e dabi mulan’rad. Riyul’ ni bay rogorad ni ngan pining e magar ngorad nbochan ni yad be k’adan’rad.

²³ Maku, bod rogon e n’en ni i buch rok Paul, ma k’adan’ e ra yibnag e wom’ngin nib fel’. Faanra ngada gum’an’gad ma gad be ayuweg nra par nib fel’ thildad Jehovah ma gad be falfalan’ag gum’ercha’en. (Proverbs 27:11) Gad be ayuweg ni nge par nib gel e michan’ rodad ma ngada pingeged e girdi’ ni ngar manged pi gachalpen Jesus, ni fan e nge gel e falfalan’ u fithik’dad ni gadad walag. (1 Timothy 4:16) Jehovah e be gelnag e pi tapigpig rok ma be taw’athnag e pigpig ni yad ma ta’ ko ngiyal’ ney ni tin tomren e rran. Ma angin ni ke yib riy, e tin ka ba’ ko fa 144,000 e girdi’ e kan ulunguyrad, ma ka bay bokum milyon e girdi’ ni ri yad be athapeg ni nrayog ni nge yog ngorad e yafas ni manemus u paradis u fayleng. (Luke 23:43; Revelation 14:1) Riyul’, ni pigpig ni ma tay e Kristiano e be m’ug e runguy rok Jehovah riy. (2 Korinth 4:1) Yibe athapeg ni gad gubin e ngada ted fan e re n’ey ma ra falfalan’dad ya wom’ngin e ra par ndariy n’umngin nap’an.​—1 John 2:17.

[Footnotes]

Rayog ni Ngam Weliy?

• Mang e maruwel ni urngin e Kristiano ko fa bin som’mon e chibog e kara uned ngay?

• Wuin ma mini’ e ra duguliy be’ ni nge mang tapigpig ara minister ni Kristiano?

• Mang lem ni ba t’uf ni nge yog ngak e en ni tapigpig ni Kristiano?

• Mang fan ni en ni tapigpig ara minister ni Kristiano e thingari k’adan’ u nap’an ni keb e magawon ngak?

[Pictures on page 14, 15]

Kan fil e Thin rok Got ngak Timothy ni ka nap’an ni kab bitir. Kan duguliy ni nge mang tapigpig ara minister u nap’an ni kan taufenag

[Picture on page 16]

Taufe e be yip fan e ognagey ngak Got ma aram e pow ni kan duguliy be’ ni nge mang tapigpig ara minister

[Picture on page 18]

Pi tapigpig ni Kristiano e yad ba adag ni ngar pigpiggad