Rib T’uf Rom E Fonow Ni Ma Pi’ Jehovah?

“Gag, e gu ma fol ko pi fonow rom, ma rib t’uf rog.”​—PSALM 119:167, New World Translation.

1. U uw e rayog ni ngad guyed e fonow rok Jehovah riy?

BAADAG Jehovah nra falfalan’ e girdi’ rok. Thingarda folgad ko motochiyel rok Got ma ngada rin’ed e n’en ni be yog, ma aram e rayog ni ngari falfalan’dad. Bochan e re n’em, ma aram ke pi’ boch e fonow ngodad. Thin u Bible e ma weliy murung’agen biyay nge biyay, ma baga’ ni thin ni bay ko Psalm 119, ni sana Hezekiah ni fak e pilung nu Juda ni kab pagal e ir e ke yoloy. Re tang ney nib fel’ e ke tabab ko fapi thin ni be gaar: “Ba falan’ e piin ni dar ma rin’ e tin ni de mat’aw, ni yad e piin ni ma fol ko motochiyel rok Jehovah. Ba falan’ e piin ni ma fol ko pi fonow rok; ma yad ma gay Got u fithik’ e yul’yul’.”​—Psalm 119:1, 2, NW.

2. Uw rogon ni pi fonow rok Got e bay rogon ko falfalan’?

² Gad ma ‘fol ko motochiyel rok Jehovah’ u daken e fol Bible ni aram e thin rok ma gad fanay ko par rodad. Machane, bochan ni daworda flontgad, ma ba t’uf rodad boch e fonow. Fare bugithin ni Hebrew ni kan thiliyeg ni “boch e fonow” e be dag ni baadag Got ni nge taw nga gum’ercha’dad e motochiyel rok, nge boch ban’en ni ke tay chilen ni nge puguran ngodad. (Matthew 10:18-20) Gad ra par ni gad ba falfalan’ nfaan gad ra ulul i fol ko pi fonow ney, ya aram e pi n’en nra ayuwegdad nrayog ni nge siy da awgad ko wup nib spiritual ni angin ni ra yib riy e gafgow nge kireban’.

Ngan Chichiiy Pa’ey ko Pi Fonow rok Jehovah

3. Rogon ni yog ko Psalm 119:60, 61, ma mang nra par nib mudugil e pagan’ rodad?

³ Rib ga’ fan ngak fare psalmist e pi fonow rok Got ma aram fan ni yon’ e tang ni be gaar: “Gu ma papey nguug fol ko motochiyel rom ni dagu sagaal. Fapi gaf ko piin kireb e ke liyegeg. Ma dawor gu pagtalin e motochiyel rom.” (Psalm 119:60, 61, NW) Fapi n’en ni ma puguran Jehovah e ra ayuwegdad ni ngada guman’gad u nap’an ni ke yib e togopuluw ngodad ni bochan e ke l’agan’dad ngay nrayog rok e Chitamangidad nu tharmiy ni nge th’ab fare gaf ni ke m’ag e pi toogor rodad ngodad. Nap’an ni ra taw nga nap’an, ma yira pithigdad u boch ban’en ni be magawonnagdad ma aram e rayog ni ngada lebguyed e maruwel rodad ni ngan machibnag e thin ko Gil’ilungun.​—Mark 13:10.

4. Susun uw rogon e pi fonow rok Got u wan’dad?

⁴ Yu ngiyal’, ma fapi fonow rok Jehovah e ma yal’uwegdad. Ma nga yigiyog ni ngada ted fan e pi fonow ni kan pi’ ngodad, ni taab rogon ko n’en ni i rin’ fare psalmist. I yog ngak Got u fithik’ e meybil ni gaar: “Gu be par ni gub falfalan’ ko pi fonow rom . . . Ba t’uf rog e pi fonow rom.” (Psalm 119:24, 119) Ka boor e pi fonow ni bay rodad ko pi fonow ni kan pi’ ngak fare psalmist. Bay bokum miriay e thin u Bible ni bay ko Hebrew Scriptures ni ke m’ug ko Greek Scriptures ni be fil ngodad ni gathi kemus ni n’en nib m’ag ko pi thin ni i yog Jehovah ngak girdien ni thingara rin’ed machane ku ba muun ngay e tin nib m’agan’ ngay ni fan ko ulung ko Kristiano. Nap’an ni ke guy Got ni ba puluw ni ngan puguran ngodad murung’agen e motochiyel rok, ma ngada ted fan e re ayuw nem. Ma faanra ngada ‘chichiiyed pa’dad ko fonow rok Jehovah,’ ma rayog ni ngada paloggad ko n’en ni ma wawliy lanin’dad ni aram e n’en ni dubun e ani Sunmiydad ma ra chuweg e falfalan’ rodad.​—Psalm 119:31.

5. Uw me yog ni ngari t’uf e pi fonow rok Jehovah rodad?

⁵ Susun u rogon feni gel e t’ufeg rodad ko pi fonow rok Jehovah? I yon’ fare psalmist e tang ni gaar, “Gag, e gu ma fol ko pi fonow rom, ma rib t’uf rog ni urngin”. (Psalm 119:167) Ra par ni rib t’uf rodad e pi fonow rok Jehovah nfaanra ngada ted nga lanin’dad ni aram e thin rok e Chitamangiy ni riyul’ ni gadad ba t’uf rok. (1 Peter 5:6, 7) Ba t’uf rodad e pi fonow rok, ma ra gel i yan e t’ufeg rodad u nap’an ni kada guyed fene gel angin ni ke yib ngodad.

Mang fan nib T’uf Rodad e Pi Fonow

6. Mang reb i fan nib t’uf rodad e pi fonow rok Jehovah, ma mang e ra ayuwegdad ni ngeb ngan’dad e pi n’en nem?

⁶ Reb i tapgin nib t’uf rodad e pi fonow rok Jehovah e bochan ni gad ma pagtalin boch ban’en. Fare babyor ni The World Book Encyclopedia e be gaar: “Baga’ ni, girdi’ e ri yad ma pagtalin boor ban’en u nap’an ni be yan e tayim. . . . Sana ke buch rom e tin ni baaray ni dabki yib ngan’um boch e ngochol ara boch ban’en ni ga manang faram. . . . Fare magawon ni aram rogon ni kam pagtalin ban’en ndabi par nib n’uw nap’an, ma ma buch e re n’ey ni gubin ngiyal’, ma yima yog e magawon ko lem ngay. Pi Scientist e yad be taarebnag e re n’ey ko tin ni baaray ni yibe gay ban’en u lan e singgil nib wagagey. . . . Reb e kanawo’ nib fel’ ni nge dabmu pagtalin ban’en e aram e ngam mu fil e re n’ey biyay nib n’uw nap’an nge mada’ ko ngiyal’ ni kari tamilang u wan’um ma dabkum pagtalin.” Fol ban’en u fithik’ e yul’yul’ nge ngan sul nga daken e aram e n’en ni ra ayuwegdad ni ngeb nga lanin’dad e pi fonow rok Got ma ngada folgad riy ni ngeb angin ngodad.

7. Mang fan ni nge t’uf rok e girdi’ e pi fonow rok Got e chiney ni kab gel boch ko kakrom?

⁷ Rib t’uf rodad e pi fonow rok Jehovah ko ngiyal’ ney ni kab gel boch ko kafram ya ke gel e kireb e chiney. Faanra ngada motoyilgad ko pi fonow rok Got, ma rayog ni nge yog ngodad e llowan’ ni aram e n’en nib t’uf rodad ma aram e dabiyog ni nge giringiydad e fayleng ni ma rin’ e tin nib kireb. I yog fare psalmist ni gaar, “Ba gel e tamilangan’ rog ngak urngin e piin ni ur machibnaged gag, ya gu ma lemnag e fonow ni ga be tay ngog. Ka baga’ e gonop rog ngak e piin ni kar pumoongad, ya gu be fol ko tin ni ka mog ni ngan rin’. Kug liyeg u urngin e ngongol nib kireb, ya gub adag ni nggu fol ko thin rom.” (Psalm 119:99-101) Ra gad ra fol ko pi fonow rok Got ney, ma aram e rayog ni ngada paloggad ko “urngin e kanawo’ nib kireb” ma dabda rin’ed e tin ni ma rin’ e girdi’, ni be par “lanin’rad u fithik’ e lumor, ma yad be par nib palog ko yafas nib fel’ u wan’ Got.”​—Efesus 4:17-19.

8. Mang e ra ayuwegdad ni ngari mudugil lanin’dad ma aram e rayog ni ngada gelgad ko skeng nra yib ngodad?

⁸ Pi fonow rok Got e kub t’uf rodad ya bochan e ir e ma gelnagdad ma aram e rayog ni ngada gum’an’gad ko pi skeng ni ma yib ngodad ko ngiyal’ ney ni “tin tomren e rran.” (Daniel 12:4) Faanra dabni fonownagdad ma gad ra mang e piin ni ‘kemus ni ma motoyil me pagtalin’. (James 1:25) Machane faanra ngada filed e Thin u Bible u daken e pi babyor ni ke ngongliy “fare tapigpig nib yul’yul’ mab gonop” u fithik’ e yul’yul’ ni goo gadad nge lan e ulung ma aram e n’en nra ayuwegdad ni nge par nib mudugil lanin’dad u nap’an ni ra yib e skeng ngodad. (Matthew 24:45-47) Re ayuw ney nib spiritual e ra ayuwegdad ni ngada guyed e n’en ni thingarda rin’ed nra falfalan’nag Jehovah u nap’an ni keb e magawon ngodad.

Ban’en ni Baga’ Fan ko Pi Muulung Rodad

9. Mini’ e “pi taw’ath ni girdi’,” ma uw rogon ni yad be ayuweg e pi walag?

⁹ Reb e kanawo’ ni rayog ni ngan pi’ ngodad boch e fonow riy e n’en nib t’uf rodad u nap’an ni yibe muulung, ya ma pi’ e pi walag ni pumoon ni kan dugliyrad e welthin ni ra ayuweg e ulung. I yoloy Paul ni apostal ni gaar, “faani yan nga lang ko gin ni th’abi tolang ma boor e girdi’ ni fekrad ni ngar uned ngak ni bod rogon e girdi’ nni kol ko mahl; ke taw’athnag e girdi’.” Me ulul Paul ngay ni gaar: “I [Kristus] e ir e i turguy ni boch e girdi’ e ra mang apostal, ma boch e ra mang profet, ma boch i yad e ra mang tamachib, nge boch e yad ra mang tachugol saf nge sensey, ni fan e ngan sulweg e piin nib thothup nga rogon, nge fan ni ngan pigpig, ni nganni gelnag fare dowef rok Kristus.” (Efesus 4:8, 11, 12) Kari falfalan’dad ya pi “pumoon nem nib taw’ath”​—ni yad e piin ni piilal—​e kara ayuweged gadad ni ngada tiyan’dad ko pi fonow rok Jehovah u nap’an ni gad be muulung ni fan ko liyor ngak!

10. Mang e kenggin fare thin u Bible ni bay ko Hebrews 10:24, 25?

¹⁰ Falfalan’ ni keb ngodad nbochan e pi n’en ni ke pi’ Got ngodad e ra k’aringdad ni ngada uned ko lal e muulung rodad u gubin e wik. Paul e ir e ke weliy fene ga’ fan ni nganni un ko muulung u gubin ngiyal’. I yol ni gaar: “Ere nge bagadad ma ngi i lemnag bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak, ma ngad guyed rogon ndabda paged e muulung rodad, ni bod rogon ni be rin’ boch e girdi’. ma nge bagadad me pi’ e athamgil nga laniyan’ bagadad, ngari gel ni fan e gimed be guy ni Chirofen ni bay yib Somol riy e be chugur.”​—Hebrews 10:24, 25.

11. Uw rogon ni be ayuwegdad e pi muulung rodad u gubin e wik?

¹¹ Baga’ fan u wan’um e ayuw ni ma yib ngodad nbochan e muulung, fa? Fare fol Wulyang Ntagil’ e Damit u gubin e wik e ma gelnag e michan’ rodad, ma ma ayuwegdad nrayog ni ngada folgad ko pi fonow rok Jehovah, ma ma pi’ gelngidad ma aram e rayog ni ngada togopuluwgad ko “nifengin e fayleng.” (1 Korinth 2:12; Acts 15:31) Nap’an e Welthin ni fan ko Yoor, ma piin ni be welthin e ra weliy boch e thin ni yib ko Thin rok Got, mab muun ngay e pi fonow rok Jehovah nge thin rok Jesus ni “ir e ma pi’ e yafas ni manemus.” (John 6:68; 7:46; Matthew 5:1–7:29) Fare Theocratic Ministry School rodad e ra ayuwegdad ni ngada salapgad ko fil ban’en ngak e girdi’. Fare Service Meeting rodad e ri baga’ fan ya ma ayuwegdad ni ngada salapgad ni ngada weliyed e thin nib fel’ u nap’an e machib u mit e tabinaw i yan, nge u nap’an ni ngan sul ngak e girdi’, nge u nap’an ni yibe fil e Bible ngak be’ u tabinaw rok, nge yugu boch e kanawo’ nrogon ni yima wereg e machib. Bochan ni nap’an e fol babyor ko ulung e kemus ni buchuw e girdi’, ma aram e bay boor e tayim rodad ni nga dogned boch e thin nib muun ngay e pi fonow rok Got.

12, 13. Uw rogon ni dag girdien Got u reb e binaw u Asia nri yad ma tayfan e pi muulung ni ma ta’ e Kristiano?

¹² Rani un ko muulung u gubin ngiyal’ ma ra ayuwegdad ni ngeb nga lanin’dad e pi motochiyel rok Got ma ma ayuwegdad ni ngada pared nib mudugil ko tirok Got u nap’an e mahl, nge gafgow ko salpiy, nge yugu boch ban’en ni ma skengnag e michan’ rodad. Fa 70 e Kristiano u reb e binaw u Asia e kara thamiyed feni ga’ fan e muulung u nap’an ni kan tulufrad u tabinaw rorad ma ranod ra pared nga fithik’ e gerger. Bochan ni ba mudugil lanin’rad ni ngara muulunggad u taabang u gubin ngiyal’, ma kar sulod ko binaw rorad ni ke wagagaynag e mahl, ma kar lufed e tin ni ka bay ko Kingdom Hall rorad, ma kara toyed yugu reb u fithik’ e gerger.

¹³ Tomren ni ke yan e pi duw ni yibe mahl u yu yang ko re nam nem, ma girdi’ rok Jehovah e ka yad be par ni yad be pigpig ngak u fithik’ e pasig. Reb u fithik’ e piin ni piilal e kan fith ngak ni gaar: “Mang e kari ayuweg ni be par e pi walag u taabang?” Mang e fulweg rok? I yog ni gaar, “U lan 19 e duw, ma dariy ba ngiyal’ ni kug paged e muulung. Yu ngiyal’, ma bochan ni ke pil e donmach ara yugu boch e magawon, ma boch e walag e dabiyog ni ngara uned ko muulung, machane dariy ba ngiyal’ ni kug thanged e muulung.” Pi walag ney nib t’uf rodad e ba mudugil ni kar guyed feni ga’ fan ni ‘dabra paged e muulung u taabang.’

14. Mang e gad ra fil ko ngongol ni i rin’ Anna ni ke pillibthir?

¹⁴ Anna ni ke taw ko 84 e duw rok ni kem’ figirngin e “der pag e tempel.” Ma angin nib riy, e immoy u nap’an ni kan fek nga ram bochi madway ni aram Jesus ndawori n’uw nap’an u tomren ni kan gargelnag. (Luke 2:36-38) Ke mudugil lanin’um ni dabmu pag e muulung, fa? Ga ma athamgil ni ga bay ko urngin e program ko pi assembly nge convention rodad fa? Fapi welthin ni rib fel’ ni yima pi’ u nap’an e re muulung ney e be micheg nib tamilang ni Chitamangidad u tharmiy e be ayuweg e girdi’ rok. (Isaiah 40:11) Maku pi muulung ney e ma yib e falfalan’ riy ngodad, ma faanra gad ma un ngay ma aram e gad be dag ni gad be tay fan e pi fonow ni be pi’ Jehovah ngodad.​—Nehemiah 8:5-8, 12.

Kan Ta’ nib Thil ni Bochan e Fonow rok Jehovah

15, 16. Uw rogon ni ra thil e ngongol rodad nfaan gad ra fol ko fonow ni be tay Jehovah ngodad?

¹⁵ Ran fol ko fonow rok Got ma ra ayuwegdad ni nguud pared nib dar ko re fayleng ney nib kireb. Ni bod ni, ran fol ko fonow rok Got ma ra ayuwegdad ni dabda uned ko ngongol ni darngal. (Deuteronomy 5:18; Proverbs 6:29-35; Hebrews 13:4) Tin ma wawliyey ni ngan lifith l’uguney, nge dab kun yul’yul’, ara ngan iring boch ban’en e rayog ni ngan taleg nfaan rani fol ko fonow ni be tay Got ngak e girdi’. (Exodus 20:15, 16; Leviticus 19:11; Proverbs 30:7-9; Efusus 4:25, 28; Hebrews 13:18) Maku rayog ni ngada gagiyegnaged lanin’dad ni dabda fulweged taban e kireb ngak be’, nge fanenikan, ara ngan t’ar e thin nga daken be’.​—Leviticus 19:16, 18; Psalm 15:1, 3.

¹⁶ Bochan ni gad be tiyan’dad ko fonow rok Got, ma gad be par ni gad ba thothup, ara kad pared nib dar ko girdi’ nu fayleng, ni fan e ngada pigpiggad ngak. Ma uw fene ga’ fan ni ngan par nib dar ko re fayleng ney! Nap’an ni be meybil Jesus ngak Jehovah ko re nep’ i n’en ni tomur ko yafas rok u fayleng, ma aram me yog boch e thin ni fan ngak pi gachalpen ni gaar: “Ku gog ngorad e thin rom ni mpi’ ngog ma ke fanenikayrad e girdi’ nu fayleng, ya gathi yad girdien e fayleng, ni bod gag ni gathi gag e girdi’ nu fayleng. Ma gathi gu be wenignag ngom ni ngam fekrad ngar chuwgad u fayleng, machane gu be wenignag ngom ni ngam ayuwegrad rok Faanem nib kireb. Gathi yad e girdi’ nu roy u fayleng ni bod gag ni gathi gag e girdi’ nu fayleng. Mu fil ngorad e tin nib riyul’, ni er e thin rom ngam pingegrad ngay ngar pired ni girdiem.” (John 17:14-17) Ngad maruweliyed ni nge par nib t’uf e Thin rok Got rodad, ya ir e be ayuwegdad ni ngada pared nib dar ko fayleng ni fan e ngada pigpiggad ngak.

17. Mang e ra buch nfaanra dabda folgad ko pi fonow rok Got, ere mang e thingarda rin’ed?

¹⁷ Gadad e pi tapigpig rok Jehovah, ma gad baadag ni ngad pared ni gad be pigpig ngak. Machane, faanra dabda folgad ko fonow rok Got, ma rayog ni nge gel ngodad nifengin e re fayleng ney, ni yibe dag ko thin ni ma yog e girdi’, nge pi babyor, nge fafel, nge ngongol. Ma rib mudugil ni dubdad ni ngada manged e piin nib chogow, nge piin nib tolang e lem rorad, nge piin ni dar ma pining e magar, ma dar yul’yul’gad, nge piin ni ta damumuw, nge piin ni ba gelan’rad, ma yad ba ufanthin, mab m’on e fafel u wan’rad ma de t’uf Got rorad​—ni aram boch e ngongol ni ma rin’ e piin ni yad be par nib dar ku Got. (2 Timothy 3:1-5) Bochan ni gad be par ko tayim ni kari chuchugur ko tomur ko re m’ag ney nib kireb, ma ngada yibilayed ku Got u gubin ngiyal’ ni nge ayuwegdad ma aram e rayog ni ngada ululgad i fol ko fonow rok Jehovah ma rayog ni ‘ngad pared ni gad be rin’ e tin nib puluw ko thin rok.’​—Psalm 119:9.

18. Faan gad ra fol ko pi fonow rok Got ma ra k’aringdad e re n’ey ni ngad rin’ed e mang?

¹⁸ Pi fonow rok Jehovah e gathi kemus ni be ayuwegdad ni ngad paloggad ko tin ni thingar dabda rin’ed. Faan gad ra fol ko fonow rok Got, ma aram e rayog ni ngada rin’ed e tin nib fel’, ma ra k’aringdad ni ngari pagan’dad ngak Jehovah ma rayog ni ngari t’uf rodad u polo’ i gum’ercha’dad, nge yafas rodad, nge lem rodad, nge gelngidad. (Deuteronomy 6:5; Psalm 4:5; Proverbs 3:5, 6; Matthew 22:37; Mark 12:30) Pi fonow rok Got ney e ku ra k’aringdad ni ngad t’ufeged e piin ni buguli yoror rodad. (Leviticus 19:18; Matthew 22:39) Ri gad ma dag e t’ufeg rodad ku Got nge ngak e piin ni buguli yoror rodad ya gad be rin’ e tin nib m’agan’ ngay ma gad be wereg e “tamilangan’ rok” ni ma pi’ e yafas.”​—Proverbs 2:1-5.

Fan ni Ngan Fol ko Fonow rok Jehovah e Ra Yog e Yafas!

19. Uw rogon ni ngada daged ngak yugu boch e girdi’ ni rib fel’ ma bay angin ni ma yib nfaan gad ra fol ko pi fonow rok Jehovah?

¹⁹ Faan gad ra fol ko fonow rok Jehovah ngada ayuweged yugu boch e girdi’ ni ngar folgad riy, ma aram e gad be ayuwegdad nge piin ni ma motoyil ngodad ngar thapgad ngak Got. (1 Timothy 4:16) Uw rogon ni ngada daged ngak yugu boch e girdi’ ni ra ngan tiyan’uy ko fonow rok Jehovah ma riyul’ nib fel’ ma ra yib angin? Ngada folgad ko kenggin e motochiyel u Bible. Ma piin ni “nib fel’ e yafas ni manemus u wan’rad” e rayog ni nga rogned ni fare kanawo’ ni be weliy e Thin rok Got murung’agen e riyul’ ni ir e kanawo’ nib fel’ ni nga un yan riy. (Acts 13:48) Maku rayog ni ngara guyed ni ‘Got e riyul’ ni bay rodad’ ma yira k’aringrad ni ngara uned ngodad ko pigpig ngak Jehovah ni Somol rodad ni tha’bi tolang.​—1 Korinth 14:24, 25.

20, 21. Pi fonow rok Got nge gelngin e ra ayuwegdad ni ngada rin’ed e mang?

²⁰ Ra ngada ululgad ko fol Bible, ma da folgad ko n’en ni kada filed riy, ma gad maruweliy ni nge yog ngodad e tin nib spiritual ni ma pi’ Jehovah ngodad, ma ra gel feni t’uf e fonow rok rodad. Ran tiyan’uy ngay, ma pi fonow rok Got ney e ra ayuwegdad ni nga don’ed nga dakendad “e bin nib biech i gadad ni bod rogon e munmad, ni bin nib biech i gadad ni Got e sunumeg ni bod ir, ma ke gagiyel u daken e bin riyul’ e wok nib yal’uw ma mmataw ni ke yog ngodad.” (Efesus 4:20-24) Pi fonow rok Jehovah nge kan ni thothup rok e ra ayuwegdad ni ngada daged e t’ufeg, nge falfalan’, nge gapas laniyan’, nge gum’an’, nge gol, nge fel’ ngak e girdi’, nge yul’yul’, nge sobut’an, nge t’ar laniyan’​—ni aram e pi ngongol ni rib thil ko ngongol nu fayleng ni Satan e be gagiyegnag! (Galatia 5:22, 23; 1 John 5:19) Arfan, ni gad ra falfalan’ ko ngiyal’ ni yima puguran ngodad murung’agen e tin ni baadag Jehovah ni ngada rin’ed u nap’an e fol Bible ni goo gadad, ngu daken e piin ni piilal, ngu daken e pi muulung rodad, nge pi assembly, nge pi convention.

²¹ Bochan ni gad be fol ko fonow rok Jehovah, ma aram fan ni ku rayog ni nge par ni gad ba falfalan’ ko ngiyal’ ni kad gafgowgad nbochan ni gad be rin’ e tin nib mat’aw. (Luke 6:22, 23) Gad ma sap ngak Got ni ra ayuwegdad ko ngiyal’ ni keb ngodad e magawon ni rib mo’maw’. Rib ga’ fan e re n’ey e chiney ya urngin e pi nam e yibe kunuyrad ni fan “ko mahl ni fan ko fare rran ni ba ga’ fan, ni Rran rok Got ni Gubin ma Rayog Rok” u nap’an Har–Magedon.​—Revelation 16:14-16.

22. Susun mang e gad ra rin’ nib l’ag ko pi fonow ni ke pi’ Jehovah ngodad?

²² Faanra nge yog e taw’ath ko yafas ni manemus ngodad ma thingar da adaged e fonow rok Jehovah u polo’ i gum’ercha’dad muud folgad riy. Yibe athapeg ni bay e lem rodad ni bod rogon fare psalmist ni i yon’ e tang ni gaar: “Fonow rom e bay i par nib mat’aw ndariy n’umngin nap’an; mu tamilangnigeg, mu ug par ni gub fos.” (Psalm 119:144) Ma yibe athapeg ni gad ra dag ko ngongol rodad e thin ni yog fare psalmist ni gaar: “Kug piningem [Jehovah]. Ngam ayuwegeg! Ma nggu fol ko fonow ni ga be tay ngog.” (Psalm 119:146, NW) Arrogon, ngada daged ko thin nge ngongol rodad ni riyul’ ni rib t’uf e fonow ni be tay Jehovah ngodad rodad.

Uw rogon ni Ngam Pi’ e Fulweg?

• Uw rogon e pi fonow ni ke pi’ Jehovah u wan’ fare psalmist?

• Mang fan nib t’uf rodad e pi fonow ni yib rok Got?

• Uw rogon ni be ayuwegdad e pi muulung rodad nrogon nib l’ag ko pi fonow ni yib rok Got?

• Uw rogon ni pi fonow ni yib rok Jehovah e ke taydad ni gad ba dar ko re fayleng ney?

[Picture on page 27]

Rib t’uf e fonow ni ke pi’ Jehovah rok e psalmist

[Pictures on page 28, 29]

Ran fol ko n’en ni rin’ Anna, ma kam dugliy ban’en ma dabiyog ni ngam pag e muulung, fa?

[Picture on page 30]

Bochan ni gad be fol ko pi fonow rok Jehovah ma aram kan taydad ni gadad e girdi’ ni ke biech ma bay rogodad ni ngada pigpiggad ngak