Mu Tiyan’um Ko Tin Ke Rin’ Got Ni Yima Ngat Ngay

“O Jehovah ni Got rog, pire’ ban’en ni yira ngat ngay ni kam ngongliy ni fan ngomad, nge rogon e lem rom ngomad, dariy be’ ni bod gur.”​—PSALM 40:5, New World Translation.

1, 2. Mang mich ni bay rodad ni be dag ni ke ngongliy Got e tin ni yira ngat ngay, ma ra k’aringdad e re n’ey ni ngada rin’ed e mang?

NAP’AN nra um beeg e Bible, ma mmom ni ga ra guy ni i rin’ Got boch ban’en ni un ngat ngay ni fan ko girdi’ rok kakrom, ni aram piyu Israel. (Joshua 3:5; Psalm 106:7, 21, 22) Yugu aram rogon ni daki rrin’ Jehovah e chiney e tin ni i rin’ ngak piyu Israel, ma gad ma guy u toobdad boor ban’en ni ir e mich riy ni tin ni ke rin’ e yima ngat ngay. Ere bay fan ngodad ni ngada uned i yog ni bod fare psalmist ni be gaar: “Somol, rib pire’ ban’en ni kam sunumeg! Ri gab gonop nga rogon ni mu sunumeg ni gubin! Ke sug e fayleng nga urngin e tin ni kam sunumeg.”​—Psalm 104:24; 148:1-5.

² Boor e girdi’ e ngiyal’ ney ni be dariyfannag e tin ni be micheg nib tamilang e tin ni ma rin’ e en Tasunmiy. (Roma 1:20) Machane, gad e rib fel’ ni ngada fal’eged i lemnag e pi n’ey ma ngada turguyed ban’en nrogon nib m’ag ko tin ni ke mil fan ngodad ni fan ko en ni ke Sunmiydad. Job guruy ni 38 nge mada’ ko 41 e ri bay rogon nra pow’iyey u rogon ni ngan rin’ e re n’ey, ya bochan e ke pining Jehovah Job ni nge tiyan’ nga boch i yang ko tin Ke rin’ ni yira ngat ngay. Mu lemnag boch e deer nib puluw ni Got e i deeriy.

Tin ni Ke Rin’ ni Bay Gelngin Ma Yira Ngat Ngay

3. Rogon e thin ni bay ko Job 38:22, 23, 25-29, i fith Got murung’agen e mang?

³ Bay ba ngiyal’, ni i fith Got Job ni gaar: “Kaa mu un ko pi singgil ni kug chaariy e ayis nib munguy nge ayis ni ke el ngay ni ma mul u lan e lang nga but’? Kug tay be par ni fan ko yu ngiyal’ ni nggu pi’ e gafgow, nge fan ko fare rran ni ngan cham ara ni mahl?” Boor yang ko re fayleng rodad ney, ni fare snow nge ayis ni ke el e aram bang ko yafas ko girdi’. Me ulul Got ngay ni gaar: “I mini’ e ke fuog wol’ e ran ni fan ko n’uw ni ba ga’, ma ke fal’eg kanawoen e dirra’? Mini’ e be gagiyegnag e n’uw be aw ko gin nder par be’ riy? Mini’ e ma tarannag e but’ nib melik’ ni ke yim’ ko belel, ni bochan e nge tugul e pan riy? Gur ba’ e chitamangin e n’uw nge waangachol fa? Mini’ e chitiningin e garbeb nge waangchol ni be ngal’ ni ayis?”​—Job 38:22, 23, 25-29.

4-6. Uwrogon ma rayog ni nga nog ni de gaman e tamilangan’ ko girdi’ u murung’agen e snow?

⁴ Boch e girdi’ ni ma par ko binaw ni girdi’ riy e kaygi yoor pa’ nga puluwrad ma yad ma milekag ni sana yad ma lemnag ni snow e ke mus ni reb e magawon rorad. Machane, boor e girdi’ ni ma lemnag ni fare snow e ir ban’en ni ma k’aring e falfalan’ ngorad, ni be sunmiy e winter ni ba garbeb ni be bing a kanawo’ ni ngan rin’ ban’en ni yugub thil. Rani lemnag e deer rok Got ni gaar, ri ga manang fare snow, nge rogon yaan? Gad manang yaan e snow ni boor, sana bochan e kada guyed e sasing ko snow ni bod e pi burey nib achichig ara bochan e riyul’ ni kada guyed e snow ni boor. Machane mang fapi snowflake ni nochi yang i ban’en ko snow nib achichig? Ga manang rogon yaan, ya sana kam guy e gin ni yib riy?

⁵ Boch e girdi’ e kar filed murungagen e snowflakes ma kar feked e sasing riy u lan boor e duw. Ra reb e snowflake ma bay raay e ice crystals riy nib ngunguy ma boor yaan nib thilthil mab fel’ usun. Fare babyor ni Atmosphere e be gaar: “Ke n’uw nap’an ni kan nang ni ba yoor yaan e pi snowflake, ma yugu aram rogon ni pi scientist e ka rogned ndariy e motochiyel ni be yog ni dariy l’agruw e snowflake taareb yaan, machane dawor ni pirieg l’agruw e flakes ni ri taareb yaan. Be’ ni ma fal’eg i gay murung’agen ban’en e . . . Wilson A. Bentley, ni ir be’ ni be fil ma ma fek yaan e snowflakes u tan e microscope ni ke pag 40 e duw e de pirieg l’agruw ni ri taareb rogon yaan.” Ma yugu aram rogon nfaan manga bay l’agruw ni be m’ug ni taab rogon, ma rayog ni dabkun ngat ngay ya kaygi yoor e snowflake nib thil thil yaan?

⁶ Mu lemnag fare deer ni deeriy Got ni gaar: “Kaa mu un ko pi singgil ni kug chaariy e ayis ngay?” Boor e girdi’ e ma lemnag ni manileng e ir e gin ni yima chaariy e ayis riy. Rayog ni ngam susunnag ni gur e kam man ni ngam yaliy e pi tafen nem ni fan ni ngam nang murung’agen e snowflakes ni kaygi yoor mit nib thil thil ma ngam fil rogon ni ma yib? Reb e science encyclopedia e be gaar: “Rarogon nge gin be sum e nuclei ko ice riy ni ir e baga’ fan ko nge elnag e waangchol ni be yib ko manileng nge garbebnag ngeni taw e garbeb riy ko-40°F ma (-40°C) e kaba’ ni dariy be’ ni kari nang fan.”​—Psalm 147:16, 17; Isaiah 55:9, 10.

7. Uw feni mo’maw’ ni nge tamilangan’ e girdi’ u murung’agen e n’uw?

⁷ Ma uwrogon e n’uw? I fith Got Job ni gaar: “Gur ba’ e chitamangin e n’uw, ara mini’ e gargeleg e waangachol?” Bod ni yog e re science encyclopedia nem ni gaar: “Bochan feni yo’-o yoor rogon e mith mith ko nifeng u toobdad nib liyegdad nge feni pey ni ma thil rogon e aybeb nge pi n’en ni bay u fithik’ e nifeng, e ba dake dabiyog ni ngan taarebnag ngan nang nib fel’ rogon murung’agen rogon ni ma sum e manileng nge ran.” Ngan weliy ko thin nib mom, ma pi scientist e kara weliyed boch e thin ni goo yad be sananag ban’en, machane dabiyog rorad ni ngar weliyed murung’agen e n’uw nrib tamilang. Yugu aram rogon, ga manang ni ma aw e n’uw, ni ma tarannag e fayleng, ma be ayuweg e pi woldug, ma rayog ni nge par e tin nib fas riy ma bay e falfalan’ riy.

8. Mang fan nib puluw e thin rok Paul ni bay ko Acts 14:17?

⁸ Dawori taareban’um ko thin ni ke yog Paul ni apostal? Be yog ngak boch e girdi’ ni ngar sapgad ko tin ni ke sum ni yira ngat ngay ni ir e be micheg murung’agen e En ni ir e ke sunmiyrad. I yog Paul murung’agen Jehovah Got ni gaar: “Machane gubin ngiyal’ ni be micheg ir u daken urngin e tin nib fel’ ni be rin’, ya ma pi’ e n’uw ngomed u lang nge galwog u ngal’an; me ir e ma pi’ e ggan ngomed ma ma fal’eg lanin’med.”​—Acts 14:17; Psalm 147:8.

9. Uwrogon e tin ni ke rin’ Got ni yira ngat ngay ni be dag gelngin nib gel?

⁹ Dariy e maruwar riy ni ani Marin’ e tin yira ngat ngay ma baga’fan e bay e tamilangan’ rok ni dabi m’ay ma bay gelngin ni rib gel. Ma murung’agen gelngin, am lemnag e tin ni baaray: Ka nog ni bay 45,000 e dirra’ nge uluch u gubin e rran, boor ko 16 milyon u reb e duw. Be yip fan e re n’ey ni sogonapan 2,000 e dirra’ nge uluch ni be yib e chi ngiyal’ ney. Ra taareb e dirra’ nge uluch nra yib ko fare manileng nib mo’maw’ ni ngan nang fan gelngin e taabrogon ara ke pag ragag yay ko fare donmach ni nuclear ni kan pag u nap’an e bin 11 e Mahl ko Fayleng. Ga ma guy boch ko re gelngin nem ni aram e uluch. Fare uluch e gathi ban’en ni kemus ni yira ngat ngay, ya re n’ey e ma ayuweg ni nge sum mmit e nitrogen nra taw nga but’, ma ra yan nga fithik’ e woldug ni aram yangolen. Ere fare uluch e ir e be dag gelngin, machane riyul’ ni bay angin.​—Psalm 104:14, 15.

Mang e Ke Rin’ Ngom?

10. Uwrogon ni ngam pi’ e fulweg ko pi deer ni bay ko Job 38:33-38?

¹⁰ Ngam susunnag ni gur Job, ni be fithem Got ni Gubin Ma Rayog Rok. Sana ba puluw u wan’um ni girdi’ e boor i yad ni gathi ri ma tiyan’ ko tin ni ke rin’ Got ni yira ngat ngay. Be fith Jehovah e pi deer ni bay ko Job 38:33-38 ni gaar. “Ga manang e pi motochiyel u tharmiy, fa rayog rom ni ngam tay mat’awun nga fayleng? Rayog ni ngam tolul nge taw lamam ko manileng, me mat’annigem ko ran ni boor ma be yan nib papey? Gur rayog ni ngam l’og e uluch mi yad yan me lungurad ngom, ‘Gamad aaray!’? Mini’ e ke pi’ e gonop ko yu thal i manileng, ara mini’ e ke pi’ e tamilangan’ ni ngan nang e tin ni yira ngat ngay u tharmiy? Mini’ e rayog rok ni nge theeg e manileng u fithik’ e gonop, ara fapi rume u tharmiy​—i mini’ e rayog rok ni nge ngololeg e re n’em nga but’, u nap’an ni ngan puog e fiyath nga but’ ni wod e n’en ni kan ranrannag, ma fapi n’en ni ke el e ke peth nga taabang?”

11, 12. Mang boch ban’en ni be micheg ni Got e ir e ma ngongliy e tin ni yira ngat ngay?

¹¹ Kemus ni buchuw e kada weliyed ko pi n’en ni ke yog Elihu ngak Job, ma kada guyed ni ke pining Jehovah Job ni nge pi’ e fulweg u boch e deer “ni bod e pumoon nib yargel.” (Job 38:3) Gad be yog ni “boch” ya bochan u guruy ni 38 nge 39, i weliy Got murung’agen bochi yang ko tin ni kan sunmiy ni baga’ fan. Ni bod e yu ulung i t’uf u tharmiy. Mini’ e manang urngin e motochiyel rorad? (Job 38:31-33) I weliy Jehovah ngak Job murung’agen yugu boch e gamanman​—fare layon nge fare raven, nge fare kaming nge fare zebra, nge fare bull ni maloboch nge fare ostrich, nge fare os nib gel gelngin nge eagle. Be dag e binem, ni i fith Got Job ko ir e ke pi’ gelngin ngak e pi gamanman nib thilthil rogon ni ma mithmith, me pi’ e yafas ngorad me sum pi fakrad. Sana ga ra adag ni ngam fil e pi guruy ney, ni baga’ ni faanra ga baadag e os ara yugu boch e gamanman.​—Psalm 50:10, 11.

¹² Maku rayog ni ngam yaliy e Job guruy ni 40 nge 41, ni ki yog Jehovah biyay ngak Job ni nge pi’ e fulweg ko pi deer u murung’agen l’agruw e gamanman. Gad manang ni aram fare hippopotamus (Behemoth), nib pag ga’ngin mab yargel, nge fare crocodile (Leviathan) u nile ni ma rus e girdi’ ngay. Ra bagayow ma rarogon ni kan sunmiy ni yira ngat ngay ma ngan fal’eg i tiyan’uy ngay. Ngada guyed ko mang e gad ra pirieg ko tomur.

13. Mang e ku ra rin’ ngak Job e pi deer ni ke deeriy Got ngak, ma susun mang e ku ra rin’ e pi n’ey ngodad?

¹³ Job guruy ni 42 e be dag ngodad ko mang e ke rin’ ngak Job e deer ni i fith Got ngak. U m’on riy, ma kaygi pag rogon ni be tiyan’ Job ngak nge yugu boch e girdi’. Machane tomren ni kan llowannag nni dag ko pi deer ni ke pi’ Got ngak, ma aram me thiliyeg Job e lem rok. I yog ni gaar: “Kari gu nang ni gubin ma rayog rom [Jehovah], ni gubin e tin ni ga ra finey ma rayog ni ngam rin’. ‘Mini’ e cha’ n’ey ni be magawonnag e fonow ma dariy ban’en ni manang?’ Arfan ni kug non, machane da gu nangfan e tin ni ba pag fene fel’ ni fan ngog ni dagur nang.” (Job 42:2, 3, NW) Arrogon, tomren ni ke tiyan’ Job ko pi n’en ni ke rin’ Got, ma aram me yog ni gaar ni pi n’en ney e kaygi pag fene fel’ ngak. Tomren ni kada weliyed e tin ni kan sunmiy ni yira ngat ngay, maku susun ni kan pug e tafinay rodad ko gonop rok Got nge gelngin. Mang e tomuren? Kemus ni kan pug e tafinay rodad ko gelngin Jehovah nib gel nge salap? Ara susun ni ngada rin’ed e tin ni kab palog ko re n’em?

14. Uwrogon u wan’ David e tin ni ke rin’ Got ni yira ngat ngay?

¹⁴ U Psalm 86, ma gad ra guy boch e thin ni ke yog David ni ku taabrogon ngay, ya i yog u bang u tabolngin ko psalm ni gaar: “Lan e lang e rib gagiyel ni be gilnag buguwan Got! Rib gagiyel ni be dag e n’en ni ke sunumeg! Bin ni ba’ e rran e be weliy murung’agen ngak e bin ni bay yib e rran; bin ni ba’ e nep’ e be weliy murung’agen ngak e bin ni bay yib e nep’.” (Psalm 19:1, 2) Machane ki weliy David boch. Thin ni bay ko Psalm 86:10, 11, e be gaar: “Ba gel gelngim ma ga be ngongliy e tin ni yira ngat ngay; yi gur e Got, ni goo gur. O Jehovah, ngam fil ngog murung’agen e birom e kanawo’. Gu ra yan ko kanawo’ rom ni aram e tin riyul’. Ngam ayuweg gum’ercha’eg ni ngeb madgun Fithingam u wan’ug.” Tayfan ni dag David ngak e ani Tasunmiy nbochan e tin ni ke rin’ ni urngin ni yira ngat ngay e ba muun ngay madgun Got u wan’. Ga ra nang ko mang fan. Dubun David ni nge k’aring e damumuw ngak e En ni ir e ke rin’ e pi n’en ni yira ngat ngay. Ku arrogon gadad.

15. Mang fan ni rogon ni dag David ni bay madgun Got u wan’ e ba puluw?

¹⁵ Sana yan ni nang yib ngan’ David ni Got e bay gelngin ni rib gel, ma rayog ni nge gagiyegnag nge togopuluw ko piin ni ke dabuy dakenrad. Ma aram e pow nra k’aring e marus ngorad: I fith Got Job ni gaar: “Kaa mu un ko pi singgil ni kug chaariy e ayis nib munguy nge ayis ni ke el ngay ni ma mul u lan e lang nga but’? Kug tay be par ni fan ko yu ngiyal’ ni nggu pi’ e gafgow, nge fan ko pi rran ni fan ko cham nge mahl?” Snow, nge hail, nge yoko’, nge nifeng, nge uluch e yima yog ni talin e cham rok. Ma aram gelngin ni ri ma k’aring e marus!​—Job 38:22, 23.

16, 17. Mang e n’en ni yira taarebnag nga feni gel gelngin Got, ma uwrogon ni i fanay Got e re gelngin nem kakrom?

¹⁶ Sana keb ngan’um boch e magawon ni ke yib ko binaw rom nbochan e​—hurricane, ara yoko’, ara cyclone, ara hailstorm, ara ran ni boor ni keb nib tomgin. Ni bod u nap’an ni ke chuchugur ni nge m’ay fare duw ni 1999, ma bayang i yoko’ nib gel e ke magawonnag e yimuch ni ngal u Europe. Mus ko piin ni ri yad manang rogon e yafang e kara gingad ngay. Fare nifeng nib gel e ke taw gelngin ko 125 miles reb e awa, me l’uf bokum biyu’ e chigiy, me be thikiy nga but’ e pi yu ley i ren ni fan ko gamig, ma be tafalngeg boor e karro. Mu guy rogon ni ngam lemnag e re n’ey: Re nifeng nem e ke pug ma be t’et’ar sagonap’an 270 milyon e gek’iy, ma 10,000 ken e kemus ni goo lan fare park nu Versailles, u wuru’ yu Paris. Bokum milyon e naun ndakuriy e gamig riy. Ke chuchugur ko 100 e girdi’ ni ke yim’. Ma ke buch e re n’em u lan bochi ngiyal’ nib ngoch nap’an. Feni gel e re gelngin nem!

¹⁷ Sana yima yog nib mit rogon e re yoko’ nem, ma de mudugil ma dabiyog i gagiyegnag, ya ban’en ni ma buch ndabiyog ni ngan taleg. Machane, mang e ra buch nfaanra En th’abi gel e ra rin’ boch ban’en ni yira ngat ngay ma rayog ni nge fanay e re gelngin nem ni ir e ra gagiyegnag ngay ma ra pow’iy? I rin’ ban’en ni aram rogon kakrom u nap’an Abraham, ya ke fil murung’agen fare Tapuf Oloboch u ga’ngin e fayleng e ke thabthabelnag feni kireb fa gali mach, ni Sodom nge Gomorrah. Kaygi gel e kireb ni kar rin’ew ma arfan ni thin ni yima yog nib togopuluw ngorad e ke taw ngak Got, ni ir e ke ayuweg urngin e piin nib mat’aw ni ngar milgad ngar paloggad ko gali mach ni kan dugliy ban’en ni ngan rin’ ngay. Boch e thin e be weliy ni gaar: “Me pag Somol e sulfur ni be yik’ nge mul u lan e lang nga daken yu Sodom nge yu Gomorrah”. Aram e maruwel ni yira ngat ngay, kan ayuweg e piin nib mat’aw me kirebnag e piin nib kireb.​—Genesis 19:24.

18. Mang e tin ni yira ngat ngay nrogon ni weliy ko Isaiah guruy ni 25?

¹⁸ Ma boch nga tomur riy, me turguy Got ban’en nib togopuluw ko fare mach ni Babylon kakrom, ma sana ir fare mach ni i weliy Isaiah ko guruy ni 25 murung’agen. I yiiynag Got ni yira kirebnag reb e mach ni gaar: “Kam ngongliy reb e mach ni ke mang ba ulung i malang ni kan ulunguy, reb e mach ni kan yororiy faram min buthug, reb e wulyang ni ma par e girdi’ nu bang riy e daki mang mach, ma ra par ni dabkun fal’eg biyay ndariy n’umngin nap’an.” (Isaiah 25:2) Girdi’ e chiney ni ma yib ni ngar guyed e gin ni imoy yu Babylon kakrom riy e ma yog ni keb i m’ug nib riyul’ e pi thin ney. Kan thang fare Babylon ni dan lemnag fa? Dangay. Machane, rayog ni ngada folgad ko tin ni i sananag Isaiah ni gaar: “O Jehovah, ni gur e Got rog. Nggu tolang nigem, ma nggu pining e sorok nga fithingam, ya kam rin’ e tin ni yira ngat ngay, nge boch e fonow ni kab kakrom i yib, ma gab yul’yul’, ma yima pagan’uy ngom.”​—Isaiah 25:1.

Tin ni Bay Nga M’on ni Yira Ngat Ngay

19, 20. Mang e gad be lemnag nra buch u nap’an nra lebug e thin ni bay ko Isaiah 25:6-8?

¹⁹ Ke lebuguy Got fare yiiy kakrom, ma bayki rin’ ban’en ni yira ngat ngay nga m’on. U lan e pi thin ney, ni be weliy Isaiah murung’agen e “tin ni yira ngat ngay” ni i rin’ Got, ma gad ra pirieg e yiiy nib riyul’ ni yira lebuguy nga m’on, ni bod ni ke riyul’ e gechig ni ka nog ni fan ko Babylon. Mang e ‘tin ni yira ngat ngay’ ni kan micheg? Isaiah 25:6 e be gaar: “Ba mudugil ni ra fal’eg Jehovah reb e mur ni fan ko urngin e girdi’ ko re burey ney, ni yira fal’eg e ggan ni kan tay boor e oil riy, ma bayni fal’eg wine ni kan chaariy nib n’uw nap’an, ma bayni fal’eg e ggan ni bay boor oil riy ma kan suguy ko marrow, nge wine ni kan chaariy nib n’uw nap’an ma dan pag ni nge un e tin nib alit ngay.”

²⁰ Mmutrug ni re yiiy nem e ra lebug u lan fare fayleng nib biech ni Got e ke micheg, ni bay yib boch nga m’on. Ma ngiyal’ nem, e yira chuweg e pi magawon ni be gafgownag e girdi’ e chiney ngar pogofangad. Ba riyul’, ni fare yiiy ni bay ko Isaiah 25:7, 8 e be micheg ni ra fanay Got gelngin ni fan ni nge rin’ e tin ni ri yira ngat ngay ni ir fare gelngin ni sunmiy urngin ban’en ngay, me gaar: “Bayi ful’ e yam’ ndariy n’umngin nap’an, ma Jehovah ni ir e Somol nth’abi tolang e ra chuweg e lu’ u owchen urngin e girdi’. Ma yira chuweg e tamra’ ni kan ta’ ngak e girdi’ rok u ga’ngin e fayleng, ya bochan Jehovah e ir e ke yog e pi thin ney.” Boch nga tomren me weliy Paul ni apostal boch ban’en ni be fanay e pi thin ney u nap’an ni be weliy rogon ni nge faseg Got e piin ni kar m’ad. Aram e maruwel ni ri yira ngat ngay!​—1 Korinth 15:51-54.

21. Mang e ra rin’ Got ni fan ko piin ni kar m’ad ni yira ngat ngay?

²¹ Rreb i tapgin ni dabki yib e lu’ u owchey ma dabki kireban’uy e bochan dabki yib e m’ar ngak e girdi’. Nap’an ni immoy Jesus u fayleng, me golnag boor e girdi’​—me golnag lan mit e piin nib malmit, me golnag e piin nib biling, me pi’ gelngin e piin ni ke marwoth. John 5:5-9 e be weliy ni i golnag reb e pumoon ni ke kireb ay ni ke yan 38 e duw. Piin ni ur moyed u rom e kara lemnaged ni reb e maangang eram, ara maruwel ni yira ngat ngay. Ma riyul’ ni aram rogon! Machane, i yog Jesus ngorad ni ra gel ni ra ngat e girdi’ ko ngiyal’ ni ra faseg e piin ni kar m’ad me gaar: “Dab mu gingad ko re bugithin ney; ya ba’ ba ngiyal’ ni be yib ni bayi taw ngay ma gubin e yam’ ni bay u lan e low ni bayi rung’ag laman, mi yad yib u lan e low rorad nga wuru’, ma piin nib fel’ e tin ni ur ngongliyed e bay ni fasegrad mu ur pired ni yad ba fos.”​—John 5:28, 29.

22. Mang fan ni piin nib gafgow nge piin ni yibe gafgownagrad e ka bay e athap rorad nga m’on?

²² Ba mudugil nra buch e re n’ey ya bochan Jehovah e ir e ke micheg. Faanra fanay gelngin nib gel ni fan ni ngan sulweg ban’en nga rogon ma rayog ni nge mudugil lanin’um ni ra yib angin nrogon ni yira ngat ngay. Psalm ni namba 72 e be weliy e n’en ni bayi rin’ u daken Fak ni Pilung. Ngemu’ ma ra yoor e piin nib mat’aw. Ma ra yoor e gapas u fithik’rad. Ra ayuweg Got e piin nib gafgow. Me micheg ni gaar: “Me par e nam nib sug ko grain; me sug daken yungi ted ko woldug, nge pire’ ni bod e woldug ni bay u Lebanon [ni kakrom]. Me par e pi binaw ni ke sug e girdi’ u lan ni bod e pan u daken e ted.”​—Psalm 72:16.

23. Tin ni ke rin’ Got ni yira ngat ngay e susun ni ra k’aringdad ni ngada rin’ed e mang?

²³ Ba tamilang, ni boor i tapgin ni ngad tiyan’dad nga urngin ban’en ni ke rin’ Jehovah ni yira ngat ngay​—ni pi n’en ni i rin’ kakrom, nge pi n’en ni be rin’ e ngiyal’ ney, nge n’en nra rin’ boch nga m’on. “Ke sorok Jehovah, ni Got nu Israel, ni go ir e be ngongliy e pi n’ey nrib fel’. Fithingam nib gilbuguwan e nguun pining e sorok ngay ndariy n’umngin nap’an, ma feni gilbuguwan e nge sugnag e fayleng! Amen! Amen!.” (Psalm 72:18, 19, NW) Aram e n’en ni thingarda weliyed ngak girdien e tabinaw rodad nge yugu boch e girdi’ u fithik’ e pasig u gubin ngiyal’. Arrogon, ngada “weliyed ngak e pi nam murung’agen gelngin, mi gimed weliy ngak urngin e pi nam e pi maang’ang ni ke ngongliy.”​—Psalm 78:3, 4; 96:3, 4.

Uwrogon ni Ngam Pi’ e Fulweg?

• Uwrogon ni fapi deer ni kan deeriy ngak Job ni be tamilangnag ni de gaman e tamilangan’ ko girdi’?

• Mang e tin ni i rin’ Got ni yira ngat ngay nrogon ni weliy ko Job guruy ni 37-41 ni ke pi’ e athamgil nga lanin’um?

• Mang e susun ngada weliyed ya kada fal’eged i lemnag murung’agen boch ban’en ni ke rin’ Got ni yira ngat ngay?

[Pictures on page 10]

Mang e ga ra yog u murung’agen e pi snowflake ni ba yoor mit nge fare gelngin e uluch nib tatamdag?

[Credit Line]

snowcrystals.net

[Pictures on page 13]

Um weliy ngak be’ murung’agen e tin ni ke rin’ Got ni yira ngat ngay ni nge mang thin rom