Ayuw Ni Ngan Nang Fan e Bible

BIBLE e bake babyor ni yugub thil u fithik’ e yuke babyor. Piin ni ra yoliyed e rogned ni Got e yib i thagthagnag nga lanin’rad ngar yoliyed, ma pi n’en bay riy e kari micheg ni n’en karogned e rriyul’. (2 Timothy 3:16) U fithik’ e pi n’en bay u Bible e ku be dag e gin da bad riy, nge mang fan ni gad bay u roy, nge gin nga darod ngay. Ere rib mudugil nib ke babyor nib ga’ fan ni ngada fal’eged i lemnag!

Sana ga ma gay rogon ni nga umu poy e Bible ma kam pirieg nib mo’maw’ ni ngam nang fan. Ya sana damur nang ko uw e ga ra pirieg e fulweg ko deer rom riy. Faanra aray rogon, ma aram e gathi googur. N’en ni gab ma rin’ e taareb rogom ngak be’ nib moon ni immoy ko bin som’mon e chibog. Re moon nem e i milekag u daken ba karo ni magiringiy e os, ni be yan u Jerusalem ni nge yan ko gin be’ riy ni aram e yu, Ethiopia. Re tayugang nu Ethiopia nem e be yan ma be bieg nib ga’ laman fare yiiy nu Bible ko babyor ku Isaiah, nni yoloy ni ke pag medlip miriay e duw ni ke yan u nap’an e ngiyal’ nem.

Faan yigi gin, ma ke non be’ nib moon ngak ni be mil u tooben fare karo. Re moon nem e Philip, reb i gachalpen Jesus, me fith fa cha’ nu Ethiopia ni gaar: “Ri ga be nang fan e pi n’en ni ga be bieg?” Me fulweg fa cha’ nu Ethiopia ni gaar: “Bin riyul’, e ra diin mu gu nang, ni faanra dabi weliy be’ fan ngog?” Ma aram me pining Philip nga lan fare karo. Me weliy Philip fan fare gi n’en ni ki i bieg fare moon “fare thin nib fel’ ni murung’agen Jesus.”​—Acts 8:30-35.

Rogon ni ayuweg Philip e cha’ nu Ethiopia nem kakrom nge nang fan e Thin Rok Got, e ku aram rogon ni be ayuweg e Pi Mich rok Jehovah girdi’ e chiney ngar nanged fan e Bible. Ku yad ra falfalan’ ni ngar ayuweged gur. Baga’, nib fel’ ni nguun fol Bible nib ulul iyan, yira tabab ko tin kenggin e machib ko Bible. (Hebrews 6:1) Ma nap’an ni ga ra mon’og i yan, ma aram e rayog ni ngam fil e tin baaray ni yog apostal Paul e “ggan nib el ngay”​—ni aram, e tin nib toar. (Hebrews 5:14) Yugu aram rogon ni Bible e ga be fil, maku bay boch ban’en ni kan yoloy​—ni nge ayuweg i fil e Bible—​ni rayog ni nge ayuwegem ni nge yog nim pirieg ma ga nang fan yu yang u Bible ni boor ban’en ni bay murung’agen riy.

Fol Bible e rayog ni ngan tay ko ngiyal’ nge gin nib puf rogom riy. Boch e girdi’ e yad ma fol Bible ko dengwa. Re skul ney e gathi bathal i skul; ya yira yarmiy ni rogon ni gur e ba m’ag ngom, nib muun ngay rogon e tin ni ga manang nge rogon e skul rom. Dab mu pi’ puluwon e re fol Bible ney. (Matthew 10:8) Dariy e skeng ni ra un tay riy, ma dab un k’aring e tamra ngom. Pi deer rom e yira fulweg, ma ga ra fil rogon ni ngam chuchugur ku Got. Mang, ni thingar mu fil e Bible? Amu fal’eg i lemnag boch i fan ni ga ra fil e Bible ma ra puthuy e falfalan’ ko yafas rom.