Ga Baadag Ni Nga Kum Nang Boch Murung’aagen e Bible?

Mang Fan Ni Ngan Bieg e Bible?

BIBLE e yu gub thil nga yu ken e babyor—bay e thin riy ni be dag e runguy ni yib rok Got. (1 Thessalonika 2:13) Faan ga ra fanay ma ga rin’ e pi n’en ni be fil e Bible, ma rib ga’ angin ni ra yib ngom. Ra gel e t’ufeg rom ngak Got ma ga ra chuchugur ngak, ni cha’ ni ma pi’ “urngin mit e taw’ath nib manigil nge urngin e taw’ath nib flont.” (James 1:17, New World Translation) Ga ra nang rogon ni nga u mu non ngak u fithik’ e meybil. Ngiyal’ ni ra yib e magawon ngom, ma rayog ni ngam thamiy e ayuw rok Got. Faan ga ra taarebnag e yafas rom nga rogon e pi n’en ni kan ta’ u lan e Bible, ma ra pi’ Got e yafas ni manemus ngom.—Roma 6:23.

Fare Bible e bay e tin riyul’ riy ni ma pi’ e tamilangan’. Piin ni ke yog e tamilangan’ nu Bible ngorad e kar chuwgad ko tini de puluw ni ir e be gagiyegnag e yafas rok bokum e milyon e girdi’. Ni bod rogon, ni yira nang e tin riyul’ ni ra buch u tomuren ni kad m’ad ma ra chuweg e tamdag rodad ko yam’ ni rayog ni nge gafgownagdad fa kireban’ ni be kireban’dad ngak be’ rodad fa fager rodad ni ke yim’ ma yad be gafgow. (Ezekiel 18:4) N’en ma fil e Bible ni murung’agen e fas ko yam’ e ma fal’eg laniyan’ e piin ni kem’ be’ ni rib t’uf rorad. (John 11:25) Yira nang e tin riyul’ u murung’agen e tin kireb e engel ma ra ayuwegdad ngada magargad ko riya’ ko pig ma ma ayuwegdad ngad nanged fan ni ke yoor i yoor e kireb u fayleng.

Kenggin e thin ni yib rok Got ni bay u Bible e be dag ngodad rogon kanawoen e par nra fel’ rogodad riy. Ni bod rogon, ni nga i par “nib fel’ rogon pangiy” ma ra ayuweg nge par fithik’ i dowdad nib manigil. (1 Timothy 3:2) Gadad ra ‘biech nagdad ko urngin ban’en nib alit ko dowef nge tafinay,’ ma gad ra palog ko tin ra kirebnag dowdad. (2 Korinth 7:1, NW) Yira fanay ni ara’ rogon min rin’ e pi fonow rok Got ni ba’ u lan e Bible ma ku ra mon’ognag e falfalan’ ko mabgol nge ta’ fan.—1 Korinth 6:18.

Faan ga ra fanay e thin rok Got, ma ra gel boch e falfalan’ rom. Tamilangan’ ko Bible e ra ayuwegdad ngad pirieged e gapas laniyan’ me pagan’dad me pi’ e athap ngodad. Ma ra ayuwegdad nge bung rogon ni da fal’eged rogodad ma gad mon’og ko pi fel’ngin nib fel’ ni aram e ra i kireban’uy ko girdi’, nge t’ufeg, nge falfalan’, nge gapas, nge gol, nge michan’. (Galatia 5:22, 23; Efesus 4:24, 32) Pi fel’ngin ney e ra ayuwegdad ngad manged figirngiy nib fel’ nge leengiy, nge matam nge matin, nge fakey ni pumoon nge fakey ni ppin.

Kaa yugu mu lemnag ko mang e ba’ gabul nge langleth? Pi yiiy nu Bible e be dag ngodad ni gadad be par e chiney ko ngiyal’ ni rib ga’ fan ko nap’an chepin e girdi’ ni sum. Gathi kemus ni pi yiiy ney e be weliy rarogon e fayleng e chiney ya ku be dag ni Got dabki n’uw nap’an me piliyeg e re fayleng ney nge ngal’ ni paradis.—Revelation 21:3, 4.

Ayuw ni Ngan Nang Fan e Bible

Sana ga ma gay rogon ni ngam poy e Bible ma ga ma pirieg nib mo’maw’ ni ngam nang fan. Ma sana da mu nang e gin ngam sap ngay u lan e Bible ni ngam pirieg e fulweg ko deer rom. Faanra aram rogom, ma aram e gathi goo gur. Gadad gubin ma ba t’uf e ayuw rodad u rogon ni ngad nanged fan e thin rok Got. Pi Mich rok Jehovah, u lan 235 e nam e yad ma pi’ e ayuw ni dariy puluwon ko rogon e fol Bible ngak bokum milyon e girdi’. Ma ku yad ra falfalan’ ni nga ku ra ayuweged gur.

Baga’ nib fel’ ni ngan fil e Bible ni ngan mon’og i yan, ni yira tabab i fil e ti nib mom ni som’mon. (Hebrews 6:1) Ma nap’an ni ga be ulul ngay i yan, ma aram e rayog rom ni ngam koy e “ggan nib el”—ni aram, e ti nib toar e thin ni riyul’. (Hebrews 5:14) Bible e ir e ba’ murung’agen urngin ban’en riy. Pi babyor ni yibe yoloy ni thin ko Bible, ni bod rogon fa ken nem ni Mang e Ba T’uf ni Ngad Rin’ed ku Got?, e ra ayuwegem ngam nang fan urngin mit e pi n’en ni be yog e Bible murung’agen.

Ra M’agan’um Ngay ni Ngam Pi’ e Tayim Rom U Reb e Wik Ngam Fil e Bible?

Fol Bible e rayog ni ngan puruy’nag ngan tay nga ba ngiyal’ nge bayang nib puf rogom riy. Boor e girdi’ ni ma fil e Bible u tabinaw rok. Ma ku ba’ boch ni ma fol Bible ko telefon. Re fol Bible nem, e gathi barba’ i skul ni boor e girdi’ riy, ya kan fal’eg rogon ni rogon nib m’agan’um ngay nge gin ni ga bay riy, nib muun ngay rogon e tin ga manang nge rogon e skul rom ko ba’ fa dariy. Dariy e skeng fa mang ni ra un i pi’, ma dabiyog ni nga umu tamra’. Pi deer rom u murung’agen e Bible e goo yira pi’ e fulweg riy, ma ga ra fil rogon ni ngam chuchugur ku Got.

Dab mu pi’ puluwon e fol Bible ni ga be tay. (Matthew 10:8) Yima pi’ ni dariy puluwon ngak urngin e girdi’ ko yuraba’ i teliw nge ku tini dariy e teliw ni yad ma un ngay, machane ri yad baadag ni ngar nanged boch e thin ku Got.

Mini’ e rayog ni i un ko motoyil nge numon u nap’an e fol Bible? Urngin e girdi’ nu tabinaw rom. Fager rom ni goma nga ga baadag ni ngam pining maku rayog ni nge un ngay. Ma faanra ga baadag ni goo gur, maku rayog ni goo gur.

Boor e girdi’ ni ma tay taareb e awa u reb e wik ni nge fol Bible. Ma faanra yog rom ni nge n’uw boch nap’an fa nge ngoch boch nap’an ma rayog rok e Pi Mich rok Jehovah ni ngar fal’eged rogorad ngar pied e ayuw ngom.

Pong Ni Ngan Fil Ban’en

Gamad be piningem ni ngam mada’gad e Pi Mich Rok Jehovah. Reb e kanawo’ ni rayog nim rin’ riy e ngam yol nga reb e pi address ni beer u but’. Ma aram mini guy rogon be’ ngeb ngam fol Bible gow u tabinaw rom.

□ Mu pied baken fare babyor ngog ni Mang e Ba T’uf ni Ngad Rin’ed ku Got? Mog ko thin nu ‘uw.

□ Wenig mu non ngog ni bochan e fol Bible u tabinaw.