Nge Falan’um Ya Kam Nang Jehovah

“Ri kab falan’ e piin ni kar rung’aged e thin rok Got ma kar pired ni yad be fol riy!”​—LUKE 11:28.

1. Wuin ni i tabab Jehovah ni nge non ngak e girdi’?

RIB T’UF rok Jehovah e girdi’ ma ri ma lemnag ni nge fel’ rogorad. Aram fan ni ma non ngorad. I tabab ni nge non ngak e girdi’ ni ka nap’an e milay’ nu Eden. Rogon e thin u Genesis 3:8 e bay biyay ni i rung’ag Adam nge Efa “laman Jehovah Got” ni “ke gonowrug.” Boch e girdi’ e ma lemnag ni sana ma non Jehovah ngak Adam ko ngiyal’ i n’em ni gubin e rran. Yugu demutrug rogon ma ba tamilang u Bible ni ma non Got ngak e bin somm’on e girdi’ ya nge fonownag ma nge fil ngak e tin ni thingari nang ya nge rin’ e maruwel rok ni kan pi’ ngak ni nge rin’.​—Genesis 1:28-30.

2. Ke diin ma daki pow’iy Jehovah e gal nsomm’on e girdi’, ma mang wenegan?

² I pi’ Jehovah e yafas ngak Adam nge Efa ma ngar suweyew e pi gamanman ma nge mil fan ga’ngin yang e fayleng ngorow. Ke mus ni taa ban’en ni kan tay chilen ngorow​−thingar dab ra kayew waamngin fare ke gek’iy ni gekiyen e tamilangan’ ko tin nib fel’ nge tin nib kireb. Bochan e thin rok Satan ma de fol Adam nge Efa ko motochiyel rok Got. (Genesis 2:16, 17; 3:1-6) Kar mel’egew ni ngar rin’ew e tin ni yow ba adag ma ngar turguyew e tin nib fel’ nge tin nib kireb. Ma aram rogon ni kar thaygow ko gagiyeg rok e Ani Tasunmiy. Wenegan riy e kar gafgowgow me gafgow pi fakrow ni dawori diyennagrad. I pilibthir Adam nge Efa me munmun kar m’ow ma dab ni fasegrow ko yam’. Me af e denen ngak pi fakrow miki af wenegan e denen ni yam’ ngorad.​—Roma 5:12.

3. Mang fan ni i non Jehovah ngak Cain, ma mang e rin’ Cain?

³ Yugu aram rogon ni un togopuluw ngak u Eden, ki non Jehovah ngak e girdi’. Cain ni ir e bin nganni’ u pi fak Adam nge Efa, e ke aw ko riya’ ya be n’en ni nge un ko denen. I ginang Jehovah Cain me yog ngak ni be sor ko kireb ere nge “ngongliy e tin nib fel’.” I pi’ Cain keru’ ko fonow rok Got me thang e fan rok walagen. (Genesis 4:3-8) Ere fa dalip nsomm’on e girdi’ nu fayleng e ur pied keru’rad ko gagiyeg rok e ani ke pi’ e yafas ngorad, ni ir Got ni ma pi’ e fonow ngak e girdi’ rok ya nge fel’ rogorad riy. (Isaiah 48:17) Dabi siy ni kari kireban’ Jehovah riy!

I Tamilangnag Jehovah Ir Ngak E Piin Ni Kakrom

4. Mang e ke pagan’ Jehovah ngay ni ra rin’ e piin ni owchen Adam, ere mang athap ni i pi’ ngak e piin ni owchen Adam?

⁴ Yugu aram rogon ni bay mat’awen Jehovah ni nge dab ki non ngak e girdi’, ki non ngorad. Ya ri pagan’ ngay ni boch pi fak Adam e ra fol ko thin rok. Nap’an ni weliy Jehovah e gechig nra yib ngak Adam nge Efa, i yog ni ra yib be’ ni “owchen” ni ra togopuluw ngak fare Porchoyog ni Satan ni Moonyan’. Ma ra taw nga ba ngiyal’ ni ran pirdiiy Satan u lolgen. (Genesis 3:15) Re thin ney e ke pi’ e athap ngak e “piin ni kar rung’aged e thin rok Got ma kar folgad riy.”​—Luke 11:28.

5, 6. Uw rogon ni i non Jehovah ngak e girdi’ rok u m’on ko bin somm’on e chibog ko C.E., ma uw rogon ni ke fel’ rogorad riy?

⁵ I tamilangnag Jehovah e tin nib m’agan’ ngay ngak e girdi’ rok kakrom ni yad Noah, Abraham, Isaac, Jacob nge Job. (Genesis 6:13; Exodus 33:1; Job 38:1-3) Boch nga tomren ma boor e motochiyel ni i pi’ ngak e nam nu Israel u daken Moses. I fel’ rogon e nam u boor e kanawo’. Bochan ni kar folgad riy, kar manged e girdi’ rok Got ni yad ba dar ko tin ni ka bay e nam. Ke micheg Got ngak piyu Israel ni faan yad ra fol ko fare Motochiyel ma ra flaabnagrad ko tin nib t’uf rorad maku ra flaabnagrad ko machib mi yad mang ba nam i prist ni yad reb e nam nib thothup. Bay e thin ko fare motochiyel u morngaagen e tin ni ngan kay nge rogon ni ngan par nib biech ya nge fel’ fithik’ i dowef rorad. Machane i ginangrad Jehovah ko gafgow nra yib ngorad ni faan manga dar folgad.​—Exodus 19:5, 6; Deuteronomy 28:1-68.

⁶ Munmun min yoloy yugu boch e babyor ni kan uneg ko Bible. Bay riy e chep ko tin ni rin’ Jehovah ngak boch e nam. Bay riy babyoren e tang ni be weliy pi felngin Jehovah. Maku bay riy e thin ko profet ni be weliy e tin ni ka bay nga m’on nge rogon ni ra lebug e tin nib m’agan’ Jehovah ngay. Piin nib yul’yul’ kakrom e ur filed ma ur folgad ko pi babyor ney. I yol bagayad ni gaar: “Thin rom e ba magal ni be pow’iyeg, me ir e tamilang ko kanawo’ ni gu be yan riy.” (Psalm 119:105) I pi’ Jehovah e tamilangan’ ngak e piin ni yad ba adag ni nge motoyilgad ngak.

Fare Tamilang E Ke Tamilang I Yan

7. Yugu aram rogon ni i fl’eg Jesus e maang’ang, ke gilbuguwan ni bochan e mang, ma mang fan ni aram rogon?

⁷ Faani taw ko bin somm’on e chibog ma boor yalen e girdi’ ni ke puthuy e pi yurba’ i teliw rok yu Jew ko fare Motochiyel. Dani fol ko fare Motochiyel nrogon, ere gathi ir ban’en ni ma pi’ e tamilang ya ke mang ban’en nib tomal ni bochan yalen e girdi’. (Matthew 23:2-4) Machane nap’an fare duw ni 29 C.E. ke mang Jesus fare Messiah. Ke yib ya nge pi’ e yafas rok ni fan ko girdi’ nu fayleng ma nge “machibnag e tin nib riyul’.” Yugu aram rogon ni boor e maang’ang ni i fl’eg, ke gilbuguwan ni bochan ir “fare Sensey.” Machib rok e bod ba magal ni be gal’ u fithik’ e lumor ni bay u laniyan’ e girdi’. I weliy Jesus u morngaagen ir ni gaar: “I gag e tamilang ko girdi’ nu fayleng.”​—John 8:12; 11:28; 18:37.

8. Mang boch e babyor ni i thagthagnag Got ni ngan yoloy nga but’ u m’on ko bin somm’on e chibog ko C.E., ma uw rogon ni ke fel’ rogon e tin somm’on e Kristiano riy?

⁸ Boch nga tomren min yoloy e Gospel ni aram aningeg e babyor u morngaagen e yafas rok Jesus, ma kun yoloy e babyor ni Acts, ni aram e chep u rogon ni I garer e Kristiano u tomren ni yim’ Jesus. Ma bay boch e babyor ni i yoloy pi gachalpen Jesus nge fare babyor ni Revelation ni bay e thin ko profet riy. Pi babyor ney e kan uneg ko fapi babyor nyoloy nthin nu Hebrew me gaman ga’ngin e Bible. Pi babyor ney ni yib rok Got e ra ayuweg e pi Kristiano ni ngar “nanged fan feni ga’ radan nge feni n’uw nge feni tolang nge feni toar” e machib nriyul’.” (Efesus 3:14-18) Ma aram e rayog ni ngar nanged “laniyan’ Kristus.” (1 Korinth 2:16) Machane tin somm’on e Kristiano e gathi ri yad manang fan urngin ban’en ni ke m’agan’ Jehovah ngay. I yol apostal Paul ngak e piin ni ke mich u wan’rad ni gaar: “N’en ni gadad be guy e chiney e bod ban’en ni gadad be guy nga thirek ni kab mathmath yaan.” (1 Korinth 13:12) Tin nib gagiyel e rayog ni ngan guy ko reb e thirek ni aram rogon machane dabiyog ni ngan guy e tin nib achichig. Boch nga tomren me ri ra tamilang e Thin Rok Got.

9. Mang tamilang ni ke yog ko “tin tomren e rran”?

⁹ Ngiyal’ ney e gad be par ko ba ngiyal’ ni ka nog e “tin tomren e rran ngay” ni “mo’maw’ e par riy.” (2 Timothy 3:1) I yog Daniel ni profet ni ra taw ko ngiyal’ ney ma “ra ga’ e llowan’ iyan.” (Daniel 12:4) Ere Jehovah ni ir e Ani Ma Non ngak e girdi’ e ke ayuweg e piin nib yul’yul’ ni ngar nanged fan e Thin rok. Chiney boor e girdi’ ni yad manang ni ke mang Kristus Jesus e pilung u tharmiy ni ka nap’an e 1914. Ku yad manang ni dabi n’uw nap’an ma ra thang urngin e kireb me mang fayleng ba paradis. Re thin nib fel’ ney u morngaagen Gil’ilungun Got e yibe machibnag u fayleng iyan.​—Matthew 24:14.

10. Kab kakrom iyib ma mang e rin’ e girdi’ ko fonow ni yib rok Jehovah?

¹⁰ Arrogon, kab kakrom iyib ma i tamilangnag Jehovah ngak e girdi’ nu fayleng e tin nib m’agan’ ngay. Bay ko Bible morngaagen e piin ni kar folgad ma kar maruweliyed e gonop ni yib rok Got mi yad flaab ni bochan. Maku bay ko Bible morngaagen e piin ni kar pied keru’rad ko thin rok Got, mi yad fol ko kanawo’ rok Adam nge Efa mi yad gafgow riy. I weliy Jesus ba fanathin u morngaagen l’agruw e kanawo’. Reb e ke sor iyan ko yam’. Baga’ ma baga’ radan e re kanawo’ nem, ma boor e girdi’ ni be yan riy ni dubrad e Thin Rok Got. Ma yugu reb e kanawo’ e be sor iyan ko yafas ni manemus. Ma yugu aram rogon nib mo’maw’ fare kanawo’, ereram fare kanawo’ ni be yan e girdi’ riy ni yad be tay ni Bible e Thin Rok Got mi yad fol riy.​—Matthew 7:13, 14.

Ngada Ted Fan E N’en Ni Bay Rodad

11. Bochan e ke tamilangan’dad ma ke mich u wan’dad e thin ko Bible, ma aram e mich ko mang?

¹¹ Ga bay u fithik’ e piin ni kar mel’eged fare kanawoen e yafas,fa? Faanra ga bay riy, dabi siy ni ga ba adag ni nguum par riy. Uw rogon? Gubin ngiyal’ ma ngam fl’eg i lemnag e flaab ni ke yog ngom ni bochan e ke tamilang e machib nu Bible u wan’um ma kam tay fan e machib nu Bible. Bochan ni kam fol ko fare thin nib fel’ e aram e mich riy ni be flaabnagem Got. I tamilangnag Jesus ni aram rogon u nap’an ni i meybil ngak e Chitamangin ni gaar: “Chitamag ni gur e Somol nu tharmiy ngu fayleng. Kari mmagar ya kam dag ngak e piin ndar sukulgad e n’en ni kam mithag rok e piin ni yad ba llowan’ nge pin ni yad ba sukul.” (Matthew 11:25) Piin ni tafita’ nge piin ni tamokun tax e kar nanged fan e machib rok Jesus, ma pi tamachib ni baga’ e sukul rorad e dar nanged fan. Ki gaar Jesus: “Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog.” (John 6:44) Faanra kam nang fan e Bible ma ke mich u wan’um e machib riy, ma aram e mich riy ni be pow’iyem Jehovah. Ma aram reb i fan ni ngan falfalan’.

12. Uw boch e kanawo’ ni ma pi’ e Bible e tamilang?

¹² Bay e machib ko Thin Rok Got ni ra pithig be’ ma ra pi’ e tamilangan’. Piin ni ma fol ko tamilangan’ ni yib ko Bible e ke puf rogorad ya kan pithigrad ko malulfith nge machib ni yugu ban’en, nge sasalap ni be fol bokum million e girdi’ riy. Bochan ni gad manang e machib nriyul’ u morngaagen e yaal ko girdi’ ma ke pithigdad ko tamdag ni ra rin’ e piin ni kar m’ad ban’en ngodad ara ngan lemnag ni yad ba gafgow. (Ezekiel 18:4) Bochan ni gad manang e machib nriyul’ u morngaagen e pi engel ni kar kirebgad ma rayog ni ngada paloggad ko ngongolen e pi kan. Fare machib u morngaagen e fas ko yam’ e ma fl’eg laniyan’ e piin ni ke yim’ e piin nib t’uf rorad. (John 11:25) Thin ko profet ni bay ko Bible e ma ayuwegdad ni ngada nanged e ngiyal’ ni gad bay riy, me pi’ e pagan’ ngodad ni ra lebug e tin ni ke micheg Got ni bay fini rin’. Miki gel e athap rodad ni gad ra par nib fas ni manemus.

13. Uw rogon ni ke fel’ rogon fithik’ i dowef rodad ni bochan e gad ma fol ko Thin Rok Got?

¹³ Fapi machib nu Bible e ma fil ngodad rogon ni ngada pared ya nge fel’ fithik’ i dowef rodad. Kada filed rogon ni ngada paloggad ko pi ngongol ni ma alitnag e dowef rodad, ni bod e tamagow nge drugs. Gad ma palog ko chingaw. (2 Korinth 7:1) Bochan ni gad ma fol ko pi motochiyel rok Got u morngaagen e ngongol ni darngal ma de af e m’ar ni tomal ngodad. (1 Korinth 6:18) Bochan ni gad ma fol ko thin rok Got u morngaagen chogowen e salpiy, ma kab gapas lanin’dad, ya boor e girdi’ ni ke wagey lanin’rad ni bochan chogowen e chugum. (1 Timothy 6:10) Uw rogon ni ke fel’ rogom ni bochan e kam fol ko Thin Rok Got?

14. Mang ayuw ni ma pi’ e kan ni thothup ngodad?

¹⁴ Faan gad ra par nrogon ni bay ko Thin Rok Got, ma ra yog e kan ni thothup rok Jehovah ngodad. Gad ra folwok rok Kristus, ma ra m’ug felngin Kristus ni bod e runguy nge wurengan’. (Efesus 4:24, 32) Ra yog waamngin gelngin Got ngodad−ni aram e t’ufeg, nge falfalan’, nge gapas laniyan’, nge gum’an’ nge gol, nge fel’ ngak e girdi’, nge michan’, nge sobut’an’, nge t’ar laniyan’. (Galatia 5:22, 23) Pi felngin ney e ra ayuweg ni nge fel’ thilin e girdi’ ma nge fel’ thilin girdien e tabinaw. Ra yog riy e gel u fithik’ i lanin’dad ni ra ayuwegdad ni dab da rusgad u fithik’ e gafgow. Ga manang fan rogon ni ke ayuwegem fare kan ni thothup?

15. Uw rogon ni ra fel’ rogodad u nap’an ni nge puluw e yafas rodad ko tin ni ke m’agan’ Got ngay?

¹⁵ Nap’an ni ra puluw e yafas rodad ko tin nib m’agan’ Got ngay ma ra fel’ thildad Jehovah. Ra gel e michan’ rodad ni gad ba t’uf rok. Gad ra fil ma gad ra guy ko yafas rodad ni ma ayuwegdad Got u fithik’ e gafgow. (Psalm 18:18) Gad ra nang ni ri ma motoyil ko pi meybil rodad. (Psalm 65:2) Ke pagan’dad ngay ni ra pow’iydad mab mich u wan’dad ni ra fel’ rogodad riy. Ma ke l’agan’dad ngay ni ra taw ko ngiyal’ nib m’ag ngay ma ra ayuweg Got e piin nib yul’yul’ ni ngar flontgad ma nge taw’athnagrad ko yafas ni manemus. (Roma 6:23) Be gaar James: “Mu chugurgad ngak Got me chugur ngomed.” (James 4:8) Kam thamiy ni ke fel’ thilmow Jehovah ni bochan e kam chugur ngak?

Reb E Taw’ath Ni Dariy Ban’en Ni Taareb Rogon Ngay

16. Mang boch ban’en ni ke thil e tin somm’on e Kristiano riy?

¹⁶ I puguran Paul ngak e pi Kristiano ni kan duguliyrad ko kan ni thothup ni ur moyed ni yad e piin ni kar uned ko ngongol ndarngal, nge moro’ro’, nge chogow, ni yad e piin ni tacham, nge piin ni ma fek ban’en u fithik’ e yargel. (1 Korinth 6:9-11) Bochan e machib nu Bible e kar thilgad; “kan biechnagrad.” Amu lemnag rogon e yafas rom ni faan manga dam fil e machib nu Bible ni ke pithigem ko kireb. Fare machib nriyul’ e reb e taw’ath ni dariy ban’en nrayog ni ngan taarebnag ngay. Ri gad ba falfalan’ ni bochan e ma non Jehovah ngodad!

17. Uw rogon ni ka nog e ggan ni machib ngak e Pi Mich Rok Jehovah u lan pi muulung ko Kristiano?

¹⁷ Ku mu lemnag e flaab ni bay rodad ni gad ba ulung i walag u boor e nam! “Fare tapigpig nib yul’yul’ mab gonop” e ma pi’ e ggan ni machib ko ngiyal’ ni ngan pi’ riy ma bay e re machib ney u lan e Bible, nge magazine, nge yugu boch e babyor u boor miti thin. (Matthew 24:45-47) U nap’an e pi muulung ni kan taw ko duw ni 2000 e ke fil e Pi Mich Rok Jehovah u fayleng iyan e thin ko meruk e babyor ko Bible nyoloy ko thin nu Hebrew. Ke pag 40 e girdi’ nu Bible ni kar filed morngaagen u lan fare ke babyor ni Insight on the Scriptures. Kar filed ba ga’ yang fare ke babyor ni The Greatest Man Who Ever Lived ma ke chugur ni ga’ngin yang fare ke babyor ni Pay Attention to Daniel’s Prophecy! Kan fil guyey nge nel’ e thin ko fare ke Watchtower ma 52 e thin ni kan fil ko Watchtower study. Maku 12 e Our Kingdom Ministry e ke ayuwegrad ma gubin e wik ma bay e public talk ni be weliy boor e machib. Rib fel’ ma boor e machib ni ke yog ngodad!

18. Uw boch e kanawo’ ni ka yog e ayuw ngodad riy u lan e ulung ni Kristiano?

¹⁸ Ke pag 91,000 e ulung ni bay u fayleng iyan ni ma pi’ e ayuw nge pasig laniyan’ u lan e pi muulung nge pi walag. Ku bay e ayuw rodad rok e pi Kristiano ni yad ba ilal ni yad ma ayuwegdad ko machib. (Efesus 4:11-13) Arrogon, ke fel’ rogodad ni bochan e ke yog e tamilangan’ ngodad. Baga’ e falan’ ni ngan nang ma ngan pigpig ngak Jehovah. Rib puluw e thin rok e ani yoloy e psalm ni gaar: “Ba falan’ e girdi’ ni Got rorad e Jehovah!”​—Psalm 144:15.

Ka Ga Manang?

• I non Jehovah ngak chon mini’ u m’on ko pi Kristiano?

• Uw rogon ni ke gel e tamilang u m’on ko bin somm’on e chibog? Ko ngiyal’ ney?

• Mang boch e flaab ni ke yog ngodad ni bochan e gad ma ngongol nrogon e pi thin rok Jehovah ni ke tamilangan’dad ngay?

• Mang fan ni ke falfalan’dad ni bochan e ke tamilangan’dad u morngaagen Got?

[Pictures on page 8, 9]

I non Jehovah ngak Moses, nge Noah, nge Abraham ya ngar nanged e tin nib m’agan’ ngay

[Picture on page 9]

Ke tamilangnag Jehovah e Thin Rok ko ngiyal’ ney

[Pictures on page 10]

Amu lemnag e pi flaab ni ke yog ngodad u lan e ulung i walag rodad ni yib u boor e nam!