Ra Lebug e N’en nib M’agan’ Jehovah Ngay!

1, 2. (a) Mang e ke tamilangnag Jehovah ngodad? (b) Mang e be yog e Isaiah 46:10, 11 nge 55:11 nrayog ni nge pagan’dad ngay?

BAARAY e n’en nth’abi som’on ni be yog e Bible nrib ga’ fan. Be gaar: “Aram ko tabolngin [me] tabab Got i sunmiy e fayleng nge urngin ban’en ni bay u lan e lang.” (Gen. 1:1, BT) Riyul’ nri buchuuw ban’en ni gad manang u murung’agen e pi n’en ni ke sunmiy Got ni bod rogon lan e lang, nge pi n’en ni ma pi’ ramaen e tamilang, nge gravity ara ban’en ni bod e gamig. Mus ko palpalth’ib ni kemus nri bochi yang riy e ir e kad guyed. (Ekl. 3:11) Yugu aram rogon ma ke mu’ Jehovah i yog ngodad e n’en nib m’agan’ ngay ni fan ko fayleng nge girdi’. Ke sunmiy e girdi’ ni yad bod yaan ma ke tayrad ni ngar tafnayed e re fayleng ney. (Gen. 1:26) Yad ra mang pi fak, ma ir e ra mang Chitamangirad.

² Kan weliy ko guruy ni dalip ko Genesis ni kan togopuluw ko n’en nib m’agan’ Jehovah ngay. (Gen. 3:1-7) Machane, yugu aram rogon ma rayog ni nge gel Jehovah ko re togopuluw nem. Ya gad manang ndariy be’ nrayog ni nge taleg ndabi lebguy e n’en nib m’agan’ ngay. (Isa. 46:10, 11; 55:11) Ere, rayog ni nge pagan’dad nra lebguy Jehovah e n’en nib m’agan’ ngay ko ngiyal’ ni ke dugliy!

3. (a) Faanra nge tamilang u wan’dad e n’en ni be yog e Bible, ma mang boch e machib nriyul’ nib t’uf ni ngad nanged? (b) Mang fan ni ngad weliyed e pi n’em e chiney? (c) Mang boch e deer ni gad ra weliy e fulweg riy?

³ Dariy e maruwar riy ni gad manang e tin riyul’ ni be yog e Bible u murung’agen e n’en nib m’agan’ Got ngay ni fan ko fayleng nge girdi’ nge rogon nra un Jesus Kristus i lebguy e n’en nib m’agan’ Got ngay. Rib ga’ fan e gali n’ey, ma rayog nsana aram boch ban’en nsom’on nda filed u nap’an nda tababgad i fil e Thin rok Got. Bochan e re n’ey, ma aram fan ni gad baadag ni ngad ayuweged e piin nriyul’ ni yad baadag ni ngar nanged e tin riyul’ ya nge yag nra nanged e pi machib ney. Chiney ni gad be fil e re article ney e gad be gay rogon ni ngad pininged urngin e girdi’ nrayog ni ngad pininged ni ngar bad ko fare Puguran ko yam’ ni tay Kristus. (Luke 22:19, 20) Piin ni yad ra un ko re muulung nem e yad ra fil boor ban’en u murung’agen e n’en nib m’agan’ Got ngay. Ere, nap’an e re in i rran ney u m’on ni ngad ted fare Puguran mab puluw ni ngad lemnaged boch e deer nrayog ni ngad fithed ngak e piin ni gad be fil e Bible ngorad nge boch e girdi’ ni yad baadag e machib, ya nge yag nra adaged ni ngar uned ko re madnom ney. Ku gad ra weliy e fulweg u dalip e deer ni be gaar: Mang e n’en nib m’agan’ Got ngay aram ko tabolngin ni fan ko fayleng nge girdi’? Mang e buch ma de yag ni nge lebug e re n’em? Ma mang fan ni fare biyul ni pi’ Jesus e aram e n’en ni ke bing e kanawo’ ni nge lebug e n’en nib m’agan’ Got ngay?

MANG E BA M’AGAN’ E EN TASUNMIY NGAY ARAM KO TABOLNGIN?

4. Uw rogon ma pi n’en ni kan sunmiy e be gilnag buguwan Jehovah?

⁴ Jehovah ni ir e En Tasunmiy e ir reb e Got ni yira ngat ko pi n’en ni ma rin’. Ba pag feni fel’ urngin ban’en ni ke sunmiy. (Gen. 1:31; Jer. 10:12) Ere, mang e rayog ni ngad filed u rogon feni yaram nge feni fel’ yaan urngin ban’en ni ke sunmiy? Gad ra fal’eg i yaliy e pi n’en ni ke sunmiy Jehovah ni tabab ko tin nib achig nge yan i mada’ ko tin nib ga’ ban’en, ma gad ra ngat nga rogon ni yad ma maruwel, maku gubin e pi n’em ni bay fan ni kan sunmiy. Ba mudugil ni gad gubin ni gad ra ngat nga rogon e cell u fithik’ i dow e girdi’ ni boor nochi ban’en u fithik’, nge rarogon bochi tir ni ka fin nni gargeleg, nge rogon feni fel’ yaan e yal’ u nap’an ni be yan ni nge aw. Ri gad ma ngat ko pi n’ey ni bochan e kan sunmiydad nrayog ni ngad guyed boch ban’en ma gad nang rogon feni fel’ yaan.​—Mu beeg e Psalm 19:1; 104:24.

5. Uw rogon ni ke sunmiy Jehovah urngin ban’en ni ngar maruwelgad u taabang nib fel’ rogon ma yad ba taareb?

⁵ Machane, bay e motochiyel ni ke tay Jehovah ni ma gagiyegnag e pi n’en ni ke sunmiy. Ke ngongliy e motochiyel ni ma gagiyegnag rogon e pi n’en ni ke sunmiy nge motochiyel ni ma gagiyegnag rogon ni ngaud ngongolgad ni bochan e nge yag ni i maruwel urngin ban’en ni ke sunmiy u taabang nib fel’ rogon ma yad ba taareb. (Ps. 19:7-9) Ere aram fan ni urngin ban’en u palpalth’ib ma bay e gin ni kan dugliy ni nge par riy nge n’en ni nga i rin’ nrogon nib puluw ko n’en nib m’agan’ Got ngay. Ke ngongliy Jehovah rogon e motochiyel ke tay u rogon ni nga i maruwel e pi n’en ni ke sunmiy u taabang. Ere, gravity ara ban’en ni bod e gamig e ir e ma tay fare thal i nifeng nib liyeg e fayleng u gil’ ndabi mithmith, maku ir e ma gagiyegnag rogon e yilu’ nge ey nge rogon ni ma mithmith e day, nge rogon boch ban’en ni bay u fayleng ni ir e ma tay urngin ban’en u fayleng nib fos. Urngin ban’en ni kan sunmiy nib muun e girdi’ ngay e yad ma maruwel ko pi motochiyel ney. Ere, ba tamilang ni rogon feni yaram e pi n’en ni kan sunmiy e be micheg ni bay ban’en nib m’agan’ Got ngay ni fan ko fayleng nge girdi’. Ere gur, rayog ni ngad weliyed ko girdi’ murung’agen e En ni ke ngongliy rogon e pi n’ey ke tay u nap’an e machib, fa?​—Rev. 4:11.

6, 7. Mang boch e tow’ath ni pi’ Jehovah ngak Adam nge Efa?

⁶ Ba m’agan’ Jehovah ngay aram ko tabolngin ni nge par e girdi’ u fayleng ndariy n’umngin nap’an. (Gen. 1:28; Ps. 37:29) Boor e tow’ath ni pi’ ngak Adam nge Efa ni bochan e nge yag nra felfelan’gow ko par rorow u fayleng. (Mu beeg e James 1:17.) I pi’ e puf rogon ngorow, miki sunmiyrow nrayog ni ngaur fal’egew i lemnag boch ban’en mar dugliyew e n’en ni ngar rin’ew, maku rayog ni ngaur dagew e t’ufeg me yag boch e fager nib manigil ngorow. I non Got ngak Adam me yog ngak rogon ni nge fol rok. Ki fil Adam rogon ni nge yognag e tin nib t’uf ko par rok nge rogon ni nge ayuweg e gamanman nge binaw ni be par u daken. (Gen. 2:15-17, 19, 20) Ki sunmiy Jehovah Adam nge Efa nrayog ni ngar riew lamen ban’en, mar nangew rarogon ban’en ni kar mathgow ngay, mar rung’agew lingan ban’en, mar farayew bon ban’en. Ere, aram fan nrayog ni ngar felfelan’gow nga feni fel’ yaan nge feni yoor ban’en ni bay ko fare Paradis nni pi’ ni ngar tafnayew. Arrogon, immoy e athap ko gal nsom’on e girdi’ ni ngar rin’ew boch e maruwel nra par angin ndariy n’umngin nap’an, mu kur nangew murung’agen boch ban’en ni boor.

⁷ Mang e kub m’agan’ Jehovah ngay? I sunmiy Adam nge Efa nrayog ni ngar fakayew boch e bitir nib flont. Kub m’agan’ ngay ni nge diyen pi fakrow ngkur fakayed yugu boch e bitir nge mada’ ko ngiyal’ ni ke sug e girdi’ u fayleng. Baadag ni nge t’ufeg Adam nge Efa pi fakrow, miki t’ufeg gubin e gallabthir ni yad ra yib nga tomurrow pi fakrad ni bod rogon ni t’ufeg e gal nsom’on e girdi’ ni sunmiyrow ni fak, ma fayleng e nge mang taferad ndariy n’umngin nap’an, mar suweyed e pi n’en ni bay riy.​—Ps. 115:16.

MANG E BUCH MA DE YAG NI NGE LEBUG E RE N’EM?

8. Mang fan fare motochiyel ni pi’ Got ni bay ko Genesis 2:16, 17?

⁸ Machane, de buch urngin ban’en nrogon nib m’agan’ Got ngay. Mang fan? I pi’ Jehovah ngak Adam nge Efa reb e motochiyel nde mo’maw’ ni ngar folgow riy, ma re motochiyel nem e ra dag ko yow manang e gin ni ngar musgow riy ko puf rogon ni kan pi’ ngorow fa danga’. I gaar ngorow: ‘Ra um kew wom’engin urngin e gek’iy ni ba’ ko re gi woldug ney, ma ke mus ni fare ke gek’iy ni ma tamilangnag an’uy ko tin nib fel’ nge tin nib kireb e dab mu kew. Thingar dab mu kew wom’engin. Ya rofen ni gimew ra kay e gimew ra yim’.’ (Gen. 2:16, 17) De mo’maw’ ni nge nang Adam nge Efa fan e re motochiyel ney; maku de mo’maw’ ni ngar folgow riy. Bin riyul’ riy e, boor ni boor e ggan ni bay nrayog ni ngar kew.

9, 10. (a) Mang e yog Satan nib togopuluw ngak Jehovah? (b) Mang e dugliy Adam nge Efa ni ngar rin’ew? (Mu guy e sasing ni bay u tabolngin e re article ney.)

⁹ I fanay Satan ni Moonyan’ ba porchoyog ni nge bannag Efa ni nge dabki fol rok Jehovah ni Chitamangin. (Mu beeg e Genesis 3:1-5; Rev. 12:9) I n’igin Satan ni nge yan i aw ni ke yog Got ngak Adam nge Efa ni ‘dab ra kew wom’engin urngin e gek’iy ni ba’ ko gi woldug nem.’ Ere, gowa be gaar Satan: ‘N’en ni ga be yog e dabiyog ni ngam rin’ew e n’en ni gimew baadag ni ngam rin’ew?’ Me migid ma aram me ban nge gaar: “Gathi gimew ra yim’.” Tomuren e re n’ey, ma aram me guy rogon ni nge micheg nga laniyan’ Efa nde t’uf ni nge motoyil ngak Got. I gaar ngak: “Manang ni gimew ra kay . . , me tamilangan’mew.” I yog Satan ndabun Jehovah ni nge kay Adam nge Efa wom’engin e re ke gek’iy nem ni bochan e faan yow ra rin’ ma ra tamilangan’row. Tomuren e re n’ey, ma aram me micheg Satan ban’en ngorow ni yigoo ban. I gaar: “Gimew [ra] bod Got, me tamilangan’mew ngam nangew e n’en nib fel’ nge n’en nib kireb ni bod ir.”

¹⁰ Ere, thingari dugliy Adam nge Efa e n’en ni ngar rin’ew. Gur, yow ra fol rok Jehovah, fa yow ra motoyil ko n’en ni ke yog fare porchoyog ngorow? N’en nrin’ew e ra dugliyew ni nge dab kur folgow rok Got. Ere, bochan e n’en nra dugliyew, ma aram mar unew ngak Satan ko togopuluw ni tay. Ra togopuluwgow ngak Jehovah ni Chitamangirow mar chuwegew yow u tan e ayuw nge gagiyeg rok.​—Gen. 3:6-13.

11. Mang fan nde pag Jehovah e togopuluw nni tay ngak nde rin’ ban’en ngay?

¹¹ Nap’an ni togopuluw Adam nge Efa ngak Jehovah ma aram e daki yag ni ngar parew ni yow ba flont. Maku reb e, ki kireb e tha’ u thilrad Jehovah ni bochan e Jehovah e yugu ba thothup ndabiyog ‘ni nga i guy e kireb ni yibe rin’.’ Ere, aram fan ni ‘dabiyog ni nga i par nga i guy e girdi’ ni yad be ngongliy e tin nde yal’uw.’ (Hab. 1:13) Faan gomanga pag e kireb ni nge par nde rin’ ban’en ngay, ma aram e rayog ni nge magawonnag e re n’ey e pi engel u tharmiy nge tin ni ka bay e girdi’ u fayleng. Bin riyul’ riy e, faan gomanga de rin’ Got ban’en ko denen ni rin’ Adam nge Efa u Eden, ma aram e ra yan i aw ndabiyog ni ngan pagan’uy ngak. Machane, Jehovah e der ma thilyeg e pi motochiyel rok; maku dariy e ngiyal’ nra togopuluw ngay. (Ps. 119:142) Yugu aram rogon ni pi’ e puf rogon ngak Adam nge Efa, machane gathi aram e ke pi’ mat’awrow ni ngar th’abew e motochiyel rok. Ere, bochan nra togopuluwgow ngak Jehovah, ma aram fan nra m’ow ngar sulow ko but’ ni aram e n’en nni sunmiyrow ngay.​—Gen. 3:19.

12. Mang e buch rok pi fak Adam?

¹² Nap’an ni kay Adam nge Efa wom’engin fare ke gek’iy, ma aram mar tew yow nga reb e dodow ndabkiyog ni ngar mangew reb i girdien e tabinaw rok Got ni bay u ga’ngin e palpalth’ib. I chuwegrow Got u Eden ndakuriy e rofen nrayog ni ngar sulow e ngaram. (Gen. 3:23, 24) Re n’ey ni rin’ Jehovah e aram e gechig ni tay ngorow ni bochan e n’en nra dugliyew ni ngar rin’ew. (Mu beeg e Deuteronomy 32:4, 5.) Bochan ndaki flont e girdi’ ma aram fan ndabkiyog ni nge m’ug pi fel’ngin Got rorad nrib fel’ rogon. Ere, gathi kemus ni mul e athap rok Adam u pa’, ya bochan e n’en ni rin’ ma aram me af e denen nge yam’ ngak pi fak, ma da kur flontgad. (Rom. 5:12) I chuweg e athap ko yafos ni manemus u pa’ pi fak. Maku reb e, tomuren nra denengow Efa ma aram e dakiyog ni ngar fakayew reb e bitir nib flont, maku arrogon pi fakrow nra bad nga tomuren. Tomuren ni k’aring Satan ni Moonyan’ Adam nge Efa ni ngar togopuluwgow ngak Got, ma aram miki ulul i bannag urngin e girdi’ u fayleng keb i mada’ ko ngiyal’ ney.​—John 8:44.

FARE BIYUL E ARAM E N’EN NI KE BING E KANAWO’ KO GIRDI’ NI NGKI FEL’ THILRAD GOT BAYAY

13. Mang e baadag Jehovah ni fan ngak e girdi’?

¹³ Machane, ka be par e girdi’ ni yad ba t’uf rok Got. Yugu aram rogon ni ke togopuluw Adam nge Efa ngak Jehovah, machane ka baadag ni nge fel’ e tha’ u thilrad e tin ni ka bay e girdi’. Dabun ni nge guy be’ ni ke yim’. (2 Pet. 3:9) Ere, aram fan nu tomuren e togopuluw ni tay Adam nge Efa, ma aram me rin’ Got ban’en ya nge yag ni bing e kanawo’ ko girdi’ ni ngki fel’ e tha’ u thilrad bayay. Machane i rin’ e re n’em u reb e kanawo’ ndabi togopuluw ko pi motochiyel rok nib mat’aw. Uw rogon ni rin’ Jehovah e re n’ey?

14. (a) Mang e rin’ Got ya nge yag ni ngki sul e girdi’ nga rogorad aram ko som’on nrogon ni bay ko John 3:16? (b) Mang deer e rayog ni ngad weliyed e piin ni yad baadag e machib u taabang?

¹⁴ Mu beeg e John 3:16. Boor e girdi’ ni gad ra piningrad ko fare Puguran e yad manang e re thin nu Bible ney. Machane deer ni bay e, Uw rogon ni ke mab e kanawo’ ni nge yag e yafos ndariy n’umngin nap’an ngodad u daken e maligach ni pi’ Jesus? Nap’an ni gad be pining e girdi’ ko fare Puguran, ngu nap’an ni gad ra un ko re muulung nem, ngu nap’an ni kad sulod ni ngad guyed e piin ni kar uned ko re muulung nem, ma aram e ngiyal’ nrayog ni ngad ayuweged e piin ni yad baadag ni ngar nanged e tin riyul’ ni nge tamilang u wan’rad e fulweg ko re deer ney nrib ga’ fan. Nap’an nra tabab ni nge tamilang u wan’ e pi girdi’ ney rogon ni ke dag Jehovah e t’ufeg nge gonop rok u daken e re biyul nem, ma aram e n’en nra k’aringrad ni ngar ngatgad nga rogon e n’en ni ke rin’ ni fan ngodad. Ere, mang boch ban’en u rarogon fare biyul nrayog ni ngad tamilangnaged ngorad?

15. Uw rogon nib thil Jesus ngak Adam?

¹⁵ I pi’ Jehovah be’ nib flont nrayog ni nge biyuliy urngin e girdi’. Re moon nem nib flont e thingari par nib yul’yul’ ngak Jehovah me m’agan’ ngay ni nge pi’ e yafos rok ni nge biyuliy urngin e girdi’ ngay. (Rom. 5:17-19) N’en ni rin’ Jehovah e aram e pilyeg e yafos rok e en nth’abi som’on ni sunmiy u tharmiy me pi’ nge yib nga fayleng. (John 1:14) Ere, Jesus e ni gargeleg nga fayleng ni ir be’ nib flont ni bod rogon Adam. Machane, i yag rok ni nge rin’ e n’en nib m’agan’ Jehovah ngay ni nge rin’ be’ nib flont. Mus ko ngiyal’ ni mada’nag boch e skeng nrib mo’maw’, ma de denen ara th’ab reb e motochiyel rok Got.

16. Mang fan ni fare biyul e aram reb e tow’ath nrib manigil?

¹⁶ Bochan nib flont Jesus, ma aram fan nrayog ni nge yim’ ni fan ngak urngin e girdi’ me chuwegrad u tan gelngin e denen nge yam’. Jesus e ir be’ nib flont, mab yul’yul’ ngak Got. Ere, faan gomanga de denen Adam ma ra yan i par nri taareb rogorow Jesus. (1 Tim. 2:6) Maku reb e, biyul ni pi’ Jesus e aram e n’en ni ke bing e kanawo’ ngak “boor” e girdi’ ni nge yag e yafos ni manemus ngorad. (Matt. 20:28) Arrogon, fare biyul e aram e n’en nra bing e kanawo’ ni nge lebug e n’en nib m’agan’ Got ngay aram ko som’on. (2 Kor. 1:19, 20) Maku aram e n’en ni ke pi’ e athap ngak e piin ni yad ba yul’yul’ ni nge yag e yafos ndariy n’umngin nap’an ngorad.

KE BING JEHOVAH E KANAWO’ NGODAD NI NGKUD MANGED BANG KO TABINAW ROK BAYAY

17. Mang e rayog ni nge yag ko girdi’ ni bochan fare biyul?

¹⁷ Ri boor ban’en ni ke pag Jehovah fan ya nge yag ni pi’ fare biyul. (1 Pet. 1:19) Bochan nrib ga’ fan e girdi’ u wan’ ma aram fan nib m’agan’ ngay ni nge pag Fak ni kari maagirag rok ni nge yim’ ni fan ngodad. (1 John 4:9, 10) Ere, rayog ni nga nog ni ke fek Jesus lon Adam ni ir e en nsom’on ni mang chitamangin e girdi’. (1 Kor. 15:45) N’en ni ke rin’ Jesus e gathi kemus nra yognag e yafos ngodad bayay ya kki bing e kanawo’ ngodad ni ngkud manged boch i girdien e tabinaw rok Got. Arrogon, bochan fare biyul ni pi’ Jesus, ma aram fan nrayog ni ngki pag Jehovah e girdi’ ni ngar sulod ngak bayay mar manged boch i girdien e tabinaw rok u reb e kanawo’ ndabi togopuluw nga rarogon ni ir reb e Got nib mat’aw. Gathi ri gad ra felfelan’ ni ngad lemnaged e ngiyal’ nra sul urngin e piin ni yad ba yul’yul’ ngkur flontgad bayay? Ra taw ko ngiyal’ nem ma urngin e piin ni yad be par u tharmiy ngu fayleng e yad ra par ni ke taareban’rad. Ku aram e ngiyal’ nrayog ni ngar nog ni kad manged pi fak Got.​—Rom. 8:21.

18. Wuin e ra sul Jehovah ngki “gagiyegnag urngin ban’en” bayay?

¹⁸ Togopuluw ni tay Satan e de taleg Jehovah ni nge dab ki t’ufeg e girdi’, maku dabiyog ni nge taleg e girdi’ ndawor ra flontgad ni nge dab ra pared ni yad ba yul’yul’ ngak Jehovah. Bochan fare biyul ni ke pi’ Jehovah ma aram e n’en nra ayuweg pi fak ni ngar mat’awgad nib polo’. Am lemnag rarogon e par rodad u nap’an nra yag e yafos ndariy n’umngin nap’an ngak urngin e piin ni “yad ra guy e en ni Fak me mich u wun’rad.” (John 6:40) Bochan nib ga’ e t’ufeg nge gonop rok Jehovah ma aram fan nra ayuweg e girdi’ ni ngkur flontgad bayay nrogon nib m’agan’ ngay aram ko tabolngin. Ra taw ko ngiyal’ nem ma aram e ra sul Jehovah ni Chitamangidad ngki “gagiyegnag urngin ban’en” bayay.​—1 Kor. 15:28.

19. (a) Faanra rib ga’ fan fare biyul u wan’dad, ma mang e ra k’aringdad ni ngad rin’ed? (Mu guy fare thin ni kenggin e, “Ngad Ululgad i Gay e Piin ni Yad ‘Ba Adag’ e Tin Riyul’.”) (b) Mang boch ban’en u rarogon fare biyul ni gad ra weliy ko bin migid e article?

¹⁹ Faanra rib ga’ fan fare biyul u wan’dad ma ra k’aringdad ni ngad athamgilgad u rogon nrayog rodad ni ngad ayuweged yugu boch e girdi’ ni ngar nanged nrayog ni nge yib angin e re tow’ath ney ngorad nrib manigil. Ba t’uf ni nge nang e girdi’ nre biyul nem e aram e n’en ni ke fanay Jehovah ni nge pi’ e athap ngak urngin e girdi’ ni nge yag e yafos ndariy n’umngin nap’an ngorad. Machane, gathi kemus chi rogon angin e re biyul nem, ya ku boor angin ni bay. Bin migid e article e ra weliy rogon ni ke tamilangnag fare biyul ni pi’ Jesus e fulweg ko fapi deer ni k’aring Satan ni nge sum u lan fare milay’ nu Eden.