“Ereray Rogon Ni Gadad Ba T’uf Rok Got”

“Faanra ereray rogon ni gadad ba t’uf rok Got, me ere susun e nge bagadad me t’uf rok bagadad.”​—1 JOHN 4:11.

1. Mang fan nra muulung bokum milyon e girdi’ u gangin e fayleng ko pi Kingdom Hall nge yu yang u nap’an e March 23 u tomren ni ke lingeyal’?

TOMREN ni ra aw e yal’ ko rofen ni Madenom ko March 23, 1997, ma boor ko 13,000,000 e girdi’ u gangin e fayleng e ra muulung u lan e pi Kingdom Hall nge yu yang ni ma fanay e Pi Mich Rok Jehovah ko muulung. Ko mang fan? Ya yad ma tay fan rogon fadad t’uf rok Got ni ke dag ko n’en ni rin’ ni fan ko girdi’. I tamilangnag Jesus Kristus e re n’em ni rin’ Got ni bochan ni gadad ba t’uf rok ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib, ni fan e nge urngin e piin ni michan’rad ngak e aram e dab kur m’ad, ya ke yog e yafas ndariy n’umngin nap’an ngorad.”​—John 3:16.

2. Mang boch e deer nib fel’ ni ngad fithed gadad riy u morngaagen rogon ni gad ma tay fan rogon fadad t’uf rok Got?

² Gad ra lemnag rogon fedad t’uf rok Got, ma ffel’ ni ngad fithed gadad ni aray rogon, ‘Ri gu ma tay fan e n’en ni rin’ Got fa? Be m’ug ko yafas rog ni gu be tay fan fa?’

“Got e T’ufeg”

3. (a) Mang fan ni dabni gin ngay ni ma dag Got e t’ufeg? (b) Uw rogon ni be m’ug riy gelngin Got nge gonop rok ko tin ni ke sunumiy?

³ “Got e t’ufeg” me ere dabni gin ngay ni ma dag e t’ufeg. (1 John 4:8) T’ufeg e bin th’abi ga’ felngin Got. Nap’an ni be fl’eg rogon e fayleng ni nge par e girdi’ riy me sunumiy e pi burey me kunuy e ran nga taabang ko lipath nge day ma aram e be dag fene gel gelngin. (Genesis 1:9, 10) Ma ke dag Got rogon fene gonop ya ke n’igin e water cycle nge oxygen cycle, me fl’eg bokun e pi n’en ni bachichig ni microorganisms nge boor mit e woldug ni fan ni ngan thiliyeg e pi n’en u but’ nge mang ggan ni nge kay e girdi’ mar pared nib fas, miki dugliy u fithik’dad e biological clock ni nge puluw ko n’umngin nap’an e pi rran nge pul ko fayleng. (Psalm 104:24; Jeremiah 10:12) Machane n’en ni kab lingagil ko tin ni sunumiy e rogon ni dag Got e t’ufeg.

4. Ran yaliy e pi n’en ni sunumiy Got ma mang e mich riy ni gad ba t’uf rok Got me ere susun ni ngad nanged ma gad tay fan?

⁴ Gad manang ni gad ba t’uf rok Got u nap’an ni gad ra kay e waamngin ni ke el ma gathi ke mus ni ma pi’ gelngidad ya kub fel’ lamen. Ma lan owchedad e ma micheg e t’ufeg rok ya gad ma guy e pi n’en nib fel’ yaan ni bod yaan lan e lang u nap’an ni ke ganowrug, ma gad ma sap nga lan e lang ko nep’ ni bokun e t’uf riy, ma gad ma guy e pi floras ni boor raen, ma gad ma guy e pi gamanman ni bitir ni be fafel, ma gad ma guy e pi fager rodad ni yad ma siminmin. Ma pethngudad e ma tamilangnag e re n’em u nap’an ni gad ma fray bon e pi floras. Ma teldad e ma micheg e re n’em u nap’an ni gad ma rung’ag lingan e thangol, ma gad rung’ag e pi arche’ ni be tang, nge laman e piin nib t’uf rodad. Gad manang ni gad ba t’uf rok Got u nap’an ni kad gumuchmuchgad be’ nib t’uf rodad. Boch e gamanman e rayog ni ngar guyed ara rung’aged ara farayed bon e pi n’en ni dabiyog ko girdi’. Machane kan sunumiy e girdi’ ni bod yaan Got, me ere rayog ni ngad nanged e t’ufeg rok Got nrogon ndabiyog ko pi gamanman.​—Genesis 1:27.

5. Uw rogon ni dag Jehovah e t’ufeg ngak Adam nge Efa?

⁵ Nap’an ni sunumiy Jehovah Got e gal nsom’on e girdi’ ni Adam nge Efa, me pi’ boor ban’en ngorow ni be micheg ni yow ba t’uf rok. Ke fl’eg reb e milay’ ni paradis, ma ke n’igin ni nge sum urngin mit e gek’iy riy. Ke pi’ e lul’ ni nge yan riy ni nge ayuweg e woldug ma ke tay boor mit e arche’ nge gamanman ngay. Urngin e pi n’ey e ke pi’ ku Adam nge Efa ni ferow. (Genesis 2:8-10, 19) I ngongol Jehovah ngorow ni yow pi fak, ni yow bang ko tabinaw rok u palpal th’ib. (Luke 3:38) Ma Chitamangin e gal nsom’on e girdi’ e ke fl’eg fare milay’ ni Eden ni nge dag ngorow ko uw rogon ni ngar weregew fare Paradis nga gangin yang e fayleng. Ma ra munmun ma ra sug e fayleng ko pi fakrow.​—Genesis 1:28.

6. (a) Uw rogon u wan’um e togopuluw ni tay Adam nge Efa? (b) Mang e ra dag ni kad filed ban’en ko n’en ni buch u Eden ma ke yib angin ngodad ni bochan e re tamilangan’ nem?

⁶ Machane de n’uw nap’an nga tomren ma kan skengnag Adam nge Efa ko yow ra fol mi yow par nib yul’yul’ ku Got fa danga’. Som’on ma bagayow nge migid bagayow ma dar tew fan e t’ufeg ni kan dag ngorow. N’en ni ur rin’ew e kari kireb. Ma dariy e tawey rorow! Ma wenegan riy e daki fel’ thilrad Got, me tharbogrow ko tabinaw rok, ma kan chuwegrow u Eden. Ma wenegan e denen rorow e ke af ngodad. (Genesis 2:16, 17; 3:1-6, 16-19, 24; Roma 5:12) Machane mang e gad be fil ko n’en ni ke buch? Uw rogon ni gad be fulweg e t’ufeg rok Got? Gad be dag ko pi n’en ni gad ma turguy u gubin e rran ni gad ma tay fan rogon fedad t’uf rok fa?​—1 John 5:3.

7. Yug demtrug e n’en ni rin’ Adam nge Efa machane uw rogon ni dag Jehovah ni ke t’uf rok pi fakrow?

⁷ Yugu demtrug ni de tay fan e gal nsom’on e gallabthir rodad urngin ban’en ni rin’ Got ni fan ngorow machane dawori m’ay e t’ufeg rok Got. Ke runguy e piin ndaworni gargelnagrad​—nge ku gadad ko ngiyal’ ney​—me ere pag Got Adam nge Efa ngar diyennagew e bitir u m’on ni kar m’ow. (Genesis 5:1-5; Matthew 5:44, 45) Faan go manga de yodorom, ma dan gargelnagdad. Buch uw iyan me tamilangnag Jehovah e tin nib m’agan’ ngay miki pi’ e athap ko pi fak Adam ni ra michan’rad ngak. (Genesis 3:15; 22:18; Isaiah 9:6, 7) Ma ke fl’eg rogon e girdi’ u gubin e nam nrayog ngorad e n’en ni mul u pa’ Adam, ni aram e yafas nib flont nge par ko tabinaw rok Got u palpal th’ib. Rogon ni ke n’igin e re n’ey e ke pi’ e biyul’.

Mang Fan nib T’uf e Biyul’?

8. Mang fan ndabiyog ni nge yog Got ni yugu aram rogon ni thingari yim’ Adam nge Efa machane de t’uf ni nge yim’ pi fakrow?

⁸ Ri ba t’uf ni ngan pi’ reb e yafas ko girdi’ ni biyul’ ni ngan pi’ puluwon fa? De puluw ni nge yog Got ni yugu aram rogon ni thingari yim’ Adam nge Efa ya kar togopuluwgow ngak, machane rayog ni nge par pi fakrow nib fas ndariy n’umngin nap’an ni faanra yad ra fol rok fa? Sana be lemnag e girdi’ ni ffel’ ni aram rogon. Machane Jehovah e “ba t’uf rok e tin nib mat’aw ma ba yal’uw.” (Psalm 33:5) Ma bochan ni ke diyennag Adam nge Efa e bitir u tomren ni kar denengow; ere dariy bagayad e kan gargelnag nib flont. (Psalm 51:5) Yad gubin e goo ke af e denen ngorad, ma puluwon e denen e yam’. Faan manga ke siyeg Jehovah e re n’em ma ra uw rogon e kanawo’ ni be tay ko chonggin e tabinaw rok u palpal th’ib? Dabiyog ni nge siyeg e pi motochiyel rok nib mat’aw. Ke tay fan e motochiyel ko tin nib mat’aw ban’en. Dariy be’ nrayog ni nge yog nib kireb rogon ni ke pithig Got e re magawon nem.​—Roma 3:21-23.

9. Rogon e motochiyel rok Got nib mat’aw, ma miti mang biyul’ e ba t’uf?

⁹ Ere uw rogon nrayog ni ngan pi’ e biyul’ ni ra thapeg e piin nib t’uf Jehovah rorad ngak? Faanra yim’ e girdi’ nib flont ni fan ko maligach, ma aram ma ba mat’aw ni yafas rok e ra yan nga puluwon e denen ko piin ni ke michan’rad ngay me fel’ u wan’rad fare biyul’ ni kan pi’. Ya denen ku taabe’ ni Adam e ke afuweg e denen ngak urngin e girdi’, me ere rachaen taabe’ nib flont ni aram puluwon Adam, e rayog ni nge taab tomalngin u daken e thabthabel ko tin nib mat’aw ban’en. (1 Timothy 2:5, 6) Machane ba uw e girdi’ nib flont ni aram rogon?

Uw Fene Tolang Puluwon ni Kan Pi’?

10. Mang fan nde yog ko pi fak Adam ni ngar pied fare biyul’?

¹⁰ Dariy be’ ni fak Adam nrayog ni nge pi’ e n’en nib t’uf ni puluwon e yafas ni mul u pa’ Adam. “Girdi’ e dabiyog ni nge biyuliy ir ngak Got, dabiyog ni nge pi’ puluwon e pogofan rok ngak Got, ya puluwon e pogofan rok be’ e yugub pag fene tolang. Ya n’en ni nge pi’ ni puluwon ni fan e nge dab ki yim’ nge yan nga low me par nib fos ndariy n’umgnin nap’an e dabi gaman puluwon rok.” (Psalm 49:7-9) Ke runguy Jehovah e girdi’ ere ke pi’ ban’en nra ayuwegrad nde t’uf ni ngar pared ni ke math e liyab rorad.

11. Uw rogon ni ke pi’ Jehovah fare yafas nib flont nib girdi’ nib t’uf ni ngan biyuliy e girdi’ ngay?

¹¹ De l’og Jehovah reb e engel nga fayleng ni gowa ke yim’ machane be par nib fas nib kan. Danga’ ya ke fl’eg Got reb e maangang ni goo ir e rayog rok ya ir e An Tasunumiy urngin ban’en, me afuweg e yafas nge rarogon bagayad nga yin reb e ppin ni Maria ni fak Heli, ko ganong rok Judah. Ma gelngin Got ni kan ni thothup e ke ayuweg fare tir u yin chitingin, min gargelnag ni be’ nib flont. (Luke 1:35; 1 Peter 2:22) Ma cha’ ney e rayog ni nge pi’ puluwon fare biyul’ nib t’uf ni ngan mat’awnagey.​—Hebrews 10:5.

12. (a) Uw rogon ma Jesus e ir “Fak ni maagirag” rok Got? (b) Uw rogon ni kan tamilangnag rogon fedad t’uf rok Got ya ke pi’ Fak ni nge biyuliydad?

¹² Bin ngan u fithik’ pi fak Jehovah u tharmiy ni ke pi’ e re maruwel ney ngak? Ke pi’ ko fa en ni be yog e Bible ni ir “Fak ni maagirag rok.” (1 John 4:9) Re n’em e gathi ma sor fan ko fa ngiyal’ ni kan gargelnag nib girdi’ ya ma sor fan ko yafas rok u m’on riy u tharmiy. Ke mus ni ir e sunumiy Jehovah ma kari mus. Ir e bin Nganni’ i Fak ko urngin ban’en ni kan sunumiy. Ma ke fanay Got e cha’ nem ni nge sunumiy urngin e tin ni ka bay ban’en. Pi engel e yad pi fak Got ni bod Adam ni immoy ni fak Got. Machane goo Jesus e yibe weliy morngaagen ni bay “felngin ni pi’ e Chitamangin ngak, ya kari maagirag rok.” Ma kan nog ni be par u “tooben e en ni Chitamangiy.” (John 1:14, 18) Kari fel’ thilrow e Chitamangin, ma ra bagayow e ma t’ufeg bagayow. Ma bod e Chitamangin ma ba t’uf e girdi’ rok. Be weliy ko Proverbs 8:30, 31 ko uw rogon Fak u wan’ e Chitamangin nge uw rogon e girdi’ u wan’ fa en ni Fak ni gaar: “Ug par ni gubin e rran ni be falfalan’ [Jehovah] ngog, ma gubin ngiyal’ ni gu be par rok ni gub falfalan’, . . . ni gub [Jesus, ni ir e Ta Maruwel rok Jehovah, ma be yip’ fan ko gonop] falfalan’ ko fayleng ma ba fel’ u wan’ug e girdi’ ni ba’ riy.” Ireray fa en ni Fak ni l’og Got nga fayleng ni nge pi’ fare biyul’. Ere rib baga’ fan e n’en ni yog Jesus ni gaar: “Yi Got e rib t’uf e girdi’ nu fayleng rok, ma aram me pi’ Fak ni kari maagirag rok nge yib”!​—John 3:16.

13, 14. Uw rogon ni ma ayuwegdad ngad ted fan e n’en ni rin’ Jehovah u nap’an ni gad ra lemnag fare thin ko Bible u morngaagen Abraham ni ke m’agan’ ngay ni nge pi’ Isak ni maligach? (1 John 4:10)

¹³ Ra ngad nanged fan e re n’ey ma u m’on ni yib Jesus nga fayleng ma 3,890 e duw faram me yog Got ku Abraham ni gaar: “Mu fek fare pagal ni fakam ni Isak, ni kari maagirag rom, ma ba t’uf rom, ngam marow ko fa gi binaw ni Moriah. U daken bburey ni bay fini gu dag ngom u rom e ir e thingar mu li’ riy ma ga urfiy ngam pi’ ni maligach.” (Genesis 22:1, 2) Ke michan’ Abraham ku Got me fol rok. Amu susunnagem ku Abraham. Faan manga aram fakam, ni kari maagirag rom ni rib t’uf rom? Ra uw rogon u wan’um u nap’an ni ga be th’ab e l’ud ni fan ko fare maligach, ma in e rran ni kam milekag iyan nga Moriah, ma ga tay fakam nga daken fare altar?

¹⁴ Mang fan ni bay e runguy ko gallabthir ni aram rogon? Be weliy ko Genesis 1:27 ni ke sunumiy Got e girdi’ ni bod Yaan. T’ufeg nge runguy rodad e bod rogon e t’ufeg nge runguy rok Jehovah. Ke taleg Got Abraham ma aram e dan pi’ Isak ni maligach. (Genesis 22:12, 13; Hebrews 11:17-19) Machane de tel Jehovah rok ni nge pi’ fare biyul’, ni yugu aram rogon nib tolang puluwon ni kar piew Fak. Ma gathi aram ban’en nthingari rin’ Got ya aram e n’en ni rin’ ni bochan e runguy. Ri gad ma tay fan e re n’em fa?​—Hebrews 2:9.

N’en ni Ke Yognag

15. Mang angin ni yib ko girdi’ u lan e re m’ag ney ni bochan fare biyul’?

¹⁵ Re n’em ni ke pi’ Got e ri ma thiliyeg e yafas ko piin ni ke michan’rad ngay. Kafram ma yad ba palog nga orel rok Got ni bochan e denen. Bod ni be yog e Thin Rok Got ni yad e ‘pi toogor rok ni bochan e tin nib kireb ban’en ni ur rin’ed ma yad be lemnag.’ (Kolose 1:21-23) Machane “ngongliyrad Got kar manged pi tafager rok u daken e yam’ ni ke ta’ Fak.” (Roma 5:8-10) Kar thiliyeged e kanawo’ rorad me n’ag Got fan e denen rorad u daken e maligach ni pi’ Kristus ni ke michan’rad ngay, ma aram me biech lanin’rad.​—Hebrews 9:14; 1 Peter 3:21.

16. Uw rogon ni kan flaabnag girdien fachi ulung ni bochan ni ke mich u wan’rad fare biyul’?

¹⁶ Boch e pi girdi’ ney ni yad bochi ulung e ke taw’athnagrad Jehovah ngar uned ngak Jesus u tharmiy ko Gil’ilungun, mi yad lebuguy e n’en ke m’agan’ Got ngay ko re fayleng ney nsom’on ko tabolngin. (Luke 12:32) Kan mel’egrad u fithik’ “urngin e ganong, nge thin, nge gubin mit e girdi’ nge nam . . . kar manged ba nam i prist ni nguur pigpiggad ngak e Got rodad; ma bay ra gagiyegnaged e fayleng.” (Revelation 5:9, 10) Yoloy apostal Paul ko pi girdi’ ney ni gaar: “Kan ni thothup e ke ngongliymed kam manged pi fak Got, ma gelngin e kan ni thothup e gadad ma non riy ngak Got ni ma lungudad: ‘Abba, Chitamangidad!’ Fare kan ni thothup e ir e be micheg nga lanin’dad ni gadad pi fak Got. Ere faanra kad manged pi fak, ma rayog ngodad e flaab ni ke tay ni fan ko girdi’ rok, ma ku ra da uned ngak Kristus ngad fanayed e tin ni ke tay Got ni fen.” (Roma 8:15-17) Ke pofrad Got ni yad pi fak, me ere bay mat’awrad ko n’en ni mul u pa’ Adam ni aram e fel’ u thiliy nge Got, maku ran pi’ e taw’ath ngak e pi fak ney ni ngar pigpiggad u tharmiy​—aram ban’en ni de yog rok Adam. Ar fan ni yog apostal John ni gaar: “A mu guyed nga rogon fadad t’uf rok e en ni Chitamangiy! Rogon ni gadad ba t’uf rok e ri baga’, ni aram tapgin ma ka nog ni gadad pi fak Got”! (1 John 3:1) Rogon ni yad ba t’uf rok Got e gathi ke mus ni t’ufeg ni kan tay chilen (a·gaʹpe) ya ku ma dag ngorad fare t’ufeg ni yi ba adag daken (phi·liʹa), ni aram ba mit e t’ufeg u thilin e piin ni yad fager.​—John 16:27.

17. (a) Mang e rayog ni nge un ngay urngin e piin ni ke michan’rad ko fare biyul’? (b) Uw rogon ni “yad ra un ko flaab rok pi fak Got”?

¹⁷ Miki pithig Jehovah e kanawo’ ngak yugu boch e girdi’​—ni urngin e piin ni ke mich u wan’rad ko n’en ni pi’ Got ni nge yog e yafas ni manemus ngodad u daken Jesus Kristus​—ma rayog ni nge fel’ thilrad Jehovah ni aram e n’en ni thay u pa’ Adam. Weliy apostal Paul ni gaar: “Urngin e pi n’en ni sunumiy Got [girdi’ ni yad pi fak Adam] e ri yad be sonnag e chirofen ni bayi tamilangnag Got pi fak [ni aram e yad be sonnag e ngiyal’ ni ra gagiyel riy ni ke tabab ko maruwel e piin ni yad pi fak Got ni yad ra un ku Kristus ko Gil’ilungun Got u tharmiy. Ya tin ni sunumeg Got e turguy Got ni nge m’ay fan [kan gargelnagrad ni yad e tadenen ma yad ra yim’, ma dabiyog ni ngar pithiged yad riy] ni gathi yad e ra lemniged, machane bochan e Got e lemnag ni nge yodorom. Machane yad be son u fithik’ e l’agan’ [ni pi’ Got] ni aram e reb e rran e bay ra pired ni gathi yad e sib rok e wod, mi yad un ko flaab rok pi fak Got.” (Roma 8:19-21) Ma ra uw rogon e re puf rogoy nem? Ran pithigrad ndabkura pared ni ke m’agrad e denen nge yam’. Ra flont fithik’ i lanin’rad ngu dowrad, ma taferad e Paradis, ma yad ra par ndariy n’umngin nap’an ma aram e rayog ni ngar pared nib falfalan’ ni yad ba flont mi yad pining e magar riy ku Jehovah, ni bin riyul’ e Got. Ma uw rogon nrayog urngin e pi n’ey? U daken e maligach ni biyul’ ni pi’ Fak ni maagirag rok Got.

18. Mang e gad ra rin’ ko March 23 u tomren ni ke aw e yal’ ma mang fan?

¹⁸ Ke tababnag Jesus e Puguran ko yam’ ni tay ko Nisan 14, 33 C.E., u lan reb e singgil ko thal ni lang u reb e naun u Jerusalem. Urngin e tin riyul’ e Kristiano e yad ma tay fan e rofen nem ni yim’ mi yad madenomnag. Tay Jesus chilen ni gaar: “Um rin’ed e re n’ey ngi i pugurag ngomed.” (Luke 22:19) Yira madenomnag fare Puguran ko duw ni 1997 u tomren ni aw e yal’ ko March 23 (ya aram e ngiyal’ ni ma tabab e rofen ni Nisan 14). Dakuriy ban’en ni kab baga’ fan ko ngan un i madenomnag fare Puguran ko rofen nem.

◻ Uw rogon ni dag Got rogon nib t’uf e girdi’ rok?

◻ Mang fan nib t’uf e yafas ko girdi’ nib flont ni nge biyuliy pi fak Adam?

◻ Uw rogon ni ke pag Jehovah fan ir ni nge pi’ fare biyul’?

◻ Mang e rayog ngodad ni bochan fare biyul’?

[Deer ni Ngan Pi’ e Fulweg Riy]

[Sasing ko page 22]

Ke pi’ Got Fak ni maagirag rok