Mang Fan Ni Ngan Fil e Bible?

BILL e immoy nib pagal, nib fel’fel’ rogon ma ba pasig, ma bay e skul rok, ma kub gaman ko salpiy. Machane, de pagan’ ya der gaman u wan’. Yafas rok e der mudugil e gin be sor ngay, ma aram e ri be gelnag e magafan’ rok. Ere i gay ko mang fan e yafas, ere i skengnag e yuraba’ i teliw, ma de pirieg e n’en ni be changarnag. Me yan i 1991 me mada’nag reb e Pi Mich rok Jehovah me tay baken e babyor rok ni be weliy ko mang e n’en ni be yog e Bible u fan e yafas. Me tababnag e fol Bible ma aram me bung rogon Bill ni nge weliy murung’agen e re n’em ni bod boch e girdi’.

Mi i lem Bill me gaar: “Yay ni som’mon ni gu skulgow, ma bochan ni yi gamow be pithig e Bible nga u gu biegew mu gu nang ni aray e n’en ni ku u gu changarnag. Pi fulweg ni bay u Bible e rib fel’. Tomuren e re yay i fol Bible nem, mu gu af nga karo nga gu wan nga burey, mu gu og nga but’ u karo rog nga u gu tolul ni rib ga’ lungug ni kar gu falfalan’. Kari gel e falfalan’ rog ni kugu pirieg e pi fulweg ko pi deer rog.”

Riyul’, ni gathi gubin e girdi’ ni ra pirieg e tin riyul’ u Bible ma riyul’ ni ri i tolul nga lang ko falafalan’. Machane, faan yira fil e fulweg ko pi deer nib ga’ fan ko yafas ma rib ga’ e falfalan’ ngak boor e girdi’. Taareb rogorad ngak fare moon ni bay ko fanathin rok Jesus’ ni faani pirieg ba machaf nib ga’ ni kan mithag u bangi falang. Ni faani gaar Jesus: “Me ri gel e falfalan’ ngak me yan nge pi’ ni chuway’ urngin ban’en ni ba’ rok, me sul nge chuw’iy fa gi milay’.”​—Matthew 13:44.

Kiy ko Yafas nib Ga’ Fan

Bill e be par be fal’eg i lemnag reb e deer ni kub ga’ fan ni aram e, Mang e n’en fan e yafas? Piin yad ma gay e llowan’, nge piin ni yad ma fil murung’agen Got, nge pi scientist e ke bokum biyu e duw ni ki yad be magawon u fan e re deer nem. Ke bokum ken e babyor ni ke yoloy boch e girdi’ ni yibe gay rogon ni ngan fulweg e re deer nem. Ma maruwel rorad e ke aw nib m’ay fan, ma boor i yad e ke turguy u wan’ ni dabiyog i fulweg e re deer nem. Machane, bay e fulweg riy. Yugu ba toar, machane de mo’maw’. Bay ni kan weliy u lan e Bible. Fare kiy ko falfalan’, nge yafas ni bay rogon e baaray: Thingari yibe tha’ u thildad Jehovah nib fel’ rogon, ni ir e sunmiydad ma chitamangidad ni bay u tharmiy. Uw rogon me yog e re n’em rodad?

Bay l’agruw i ban’en nib dake yow bathil ni ma chugurnagdad ku Got. Piin ni yad ma rin’ ni l’agruw e aram e yad marus ngak ma ba t’uf rorad. Ngada lemnaged l’agruw e thin u Bible ni be uni micheg e re thin nem. Kakrom, me Solomon ni Pilung ni ba llowan’ e i fal’eg i fil murung’agen e girdi’ me yoloy e tini pirieg nga lan e Bible ko Eklesiastes. I puthputhuy e pi n’en ni ke pirieg, me yoloy ni gaar: “Tomuren e ke mudugil ni urngin ban’en ma kan rungaag, ni aram e: Ngan rus ko bin riyul’ e Got min ayuweg e pi motochiyel rok. Ya aray e n’en ni thingari rin’ e girdi’.” (Eklesiastes 12:13, New World Translation) Bokum miriay e duw nga tomur riy, nap’an nni fith ko bin ngan e motochiyel ni pi’ Moses e ir e tha’bi ga’, me fulweg Jesus ni gaar: “Thingari t’uf rom Jehovah ni Got rom u polo’ i gum’ercha’em ngu polo’ i lanin’um ngo polo’ e lem rom.” (Matthew 22:37) Ba manigil u wan’um e re n’en ney ni thingarda rusgad ku Got ma ngada t’ufeged? Ngad fal’eged i guy feni ga’ fan e marus nge t’ufeg ney nge rogon ni yow ma maruwel u taabang ni nge yog ni yibe tha’ u thildad Got ni rib fel’ rogon.

Mang e Be Yip Fan Madgun Jehovah

Ta’fan ni bochan e marus e baga’ fan ni faanra ngad liyor gad ngak Got ni rogon nib adag. Fare Bible e gaar: “Madgun Jehovah e aram tabolngin e gonop.” (Psalm 111:10, NW) I yoloy apostal Paul ni gaar: “Nguud pired ni ba t’uf rodad, ya aram e nge bung rogodad ko pigpig nib thothup ni ba’ madgun Got u wan’dad.” (Hebrews 12:28, NW) Ku ba chuchugur rogon, nga ba engel ni faan nni piliyeg e changar rok apostal John me guy ni be th’ab lukngun e lang me tabab i wereg fare thin nib fel’ ni baaray e thin ni yog: “Nge yib madgun Got ngomed mi gimed ta’ fan nga feni sorok.”​—Revelation 14:6, 7.

Re madgun Got ney, e rib ga’ fan ko yafas ni ba’ fan, de taareb rogon ko tamdag. Rayog ni ngad tatamdaggad ngak be’ nib kireb nib tacham ni be yog ni nge rin’ ban’en nib kireb ngodad. Ma tamdag ku Got​—ara madgun Got—​e ba tamdag ni ba toar nib muun e t’ufeg nge ta’ fan ngay ni fan ko an Tasunmiy. Kub muun ngay e tamdag nib fel’ nga fithik’ i dowey ya ga be magar ni rim kirebnag laniyan’ Got ni ir e An Th’abi ga’ ko ta puf oloboch me ir e Th’abi gel gelngin, ni bay rok ni l’agruw ni aram gelngin nib th’abi gel nge mat’awun ni nge gechignag e piin ni der ma fol.

Tamdag nge T’ufeg e Ma Maruwel u Taabang

Demtrug rogon machane, Jehovah e dabun e girdi’ ni nguur pigpiggad ngak ni kemus ni fan e yad be tatamdag ngak. Jehovah e rib lingagil nib Got ko t’ufeg. Apostal John e ir e yoloy ni gaar: “Got e t’ufeg.” (1 John 4:8) Jehovah Got e ki i ngongol ni rib gel e t’ufeg riy ngak e girdi’, baadag ni n’en nge rin’ e girdi’ e nga kur fulweged ngak ni nga kura t’ufeged. Me ere, uw rogon, ni re t’ufeg nem nge tatamdag ku Got e rayog ni u ranow u taabang? Gali n’en nem e ri yow ba chagil nga taabang. Facha’ ni ba tayoloy e tang e yoloy ni gaar: “Piin ni ma yog Jehovah e tin ba mith ngorad e aram e n’en ba mil fan ngak nge piin ni bay madgun rorad.”​—Psalm 25:14, NW.

Ayugu mu lemnag rogon laniyan’ bbitir ni ma ta’ fan ma ma tamdag ngak ba matam nib gel ma ba gonop. Maku arrogon, ni re tir nem e ki sulweg e t’ufeg ni ma tay fare matam ngak. Re tir nem e ri pagan’ ko re matam nem me be sap ngak ni nga i pow’iy, ya rib pagan’ ngay ni re fonow nem e ra fel’ rogon riy. Ere ku er rogodad, faan gadad ra t’ufeg ma gadad tamdag ku Jehovah, ma gadad fol u rogon ni be pow’iydad ma ra fel’ rogodad riy. Amu sap ko n’en ni yog Jehovah ni murung’agen piyu Israel: “Faanra karimus nra fal’eged rogon e re gum’mercha’ rorad ney nge yib madagug uwan’rad, muur folgad ko pi motochiyel rog ni gubin ngiyal’ ma aram e rra fel’ rogorad riy nge pi fakrad ni dariy numngin nap’an!”​—Deuteronomy 5:29, NW.

Arrogon, madgun Got e gathi nge fekemiyan ko sib, ya puf rogon ma gathi nge fekemiyan ko kireban’ ya falfalan’. I yiiynag Isaiah murung’agen Jesus ni gaar: “Bay e falfalan’ rok u fithik’ i madgun Jehovah.” (Isaiah 11:3, NW.) Facha’ ni ma yoloy e tang e yoloy ni gaar: “Ba falan’ e cha’ ni ba’ madgun Jehovah rok, ma ri ma falfalan’ ko pi motochiyel rok.”​—Psalm 112:1, NW.

Rib gagiyel, ni dabiyog ni ngeb madgun Got ngodad fe t’uf rodad ni faanra dada nanged. Arfan ni fol Bible e rib ga’ fan. Re fol Bible nem e ra ayuwegdad ngad nanged rarogon Got ma rayog ni ngad adaged fare tamilangan’ ko rogon ni be pow’iydad. Nap’an ni gadad ra chuchugur ku Got, ma kad adaged ni ngada rin’ed e tin nib m’agan’ ngay ma aram e ra k’aringdad nguud folgad ko pi motochiyel rok, ya kad nanged ni ra fel’ rogodad riy.​—1 John 5:3.

Reb e falfalan’ ni yira nang be’ ni be yan ko kanawo’ nib mat’aw u nap’an e yafas. Re n’ey e ba riyul’ u murung’agen Bill, ni faan kan weliy aram ko som’mon. Kafini yog ni ke gaar: “U nap’an fa mereb i duw ni ke yan ni ka nap’an e yay ni som’mon e fol Bible ni gu tay, ma tha’ u thilmow Jehovah e ke ga’ i yan. Fare ngi falfalan’ ni yib ngog nib tomgin ko som’mon e ke ga’ ke ngalweg ko bin riyul’ e falfalan’ ko kanawoen e yafas. Ke ga’ ni gu be guy felngin e yafas. Pi rran rog e ke sug nga bogi n’en ni gu be rin’ ni ba’ fan, ma gathi yug magow falfalan’ ni dariy rogon. Jehovah e kari mang be’ nib riyul’ ngog, ma gumanang ni manang e tin th’abi fel u wan’ug.”

Bin migid e article, e gad ra lemnag ko uw rogon ni tamilangan’ rok Jehovah e ma yibnag e falfalan’ ma ma fel’ rogon e piin yad ma fol riy u nap’an e yafas.

[Blurb on page 5]

FAN E NGANI CHUCHUGUR KU GOT E ARAM E NGADA T’UFEGED MEB MADGUN NGODAD

[Picture on page 6]

Jesus e i falfalan’ u fithik’ i madgun Jehovah