Nguum Par Ni Ba’ Madgun Jehovah U Wan’um Ma Ga Be Fol Ko Motochiyel Rok

“Nguum par ni ba’ madgun e bin riyul’ e Got u wan’um ma ga be fol ko motochiyel rok. Ya aram e n’en ni rib mil fan ngak e girdi’ ni nge rin’.”​—EKLESIASTES 12:13, New World Translation.

1, 2. (a) Uw rogon ma marus e ra ayuweg e dowef rodad? (b) Mang fan ni gallabthir nib gonop e yad ra athamgil ni ngar filed rogon e marus nib fel’ ngak pi fakrad?

“BOD ni lem nib gel e rayog ni nge kirebnag e yafas, ma marus e ra ayuweg,” aram e n’en ni yog Leonardo da Vinci. Tin ni baaray ni ngan dag ni kan damumuw, ara ngan damumuw ndariyfan e aram ban’en nra malmitnag be’ ko riya’ ni susun ni ngan ayuw riy, ma marus e ir e n’en nra puguran ngak ni susun ni nge kol ayuwngin. Ni bod ni, faanra kad chugurgad nga tabon e rech ma gad be guy feni toar e gin ni rayog ni ngada mulgad ngay, ma baga’ ni gadad gubin e ni gadad ra sul nga tomur. Ba taareb rogon ko re n’eney, marus nib fel’ e gathi kemus nra mon’eg thildad Got nge fel’, nrogon e thin ni kada filed ko fa binem article, machane ku ra ayuwegdad ni dabi yib e riya’ ngodad.

² Machane susun ni ngan fil rogon ni ngan rus nga boch ban’en ko ngiyal’ ney ni bay e riya’ riy. Bochan ni piin bitir e dar nanged ni fare gamig ara fare traffic u reb e mach e bay e riya’ riy, ma papey ni nge buch ban’en rorad nrib kireb.a Fapi gallabthir nib gonop e ma guy rogon ni ngara filed rogon ni ngeb e marus nib fel’ ngak e pi bitir rorad, ma yad ma ginangrad ni biyay nge biyay ko tin ni bay e riya’ riy ni ba liyegrad. Manang fapi llabthir ni re marus ney e ra ayuweg e yafas ko pi bitir rorad.

3. Mang fan ma uw rogon ni be ginangdad Jehovah u murung’agen ni ngan ayuweg e tin ni ba spiritual ban’en?

³ Aram rogon Jehovah ni ma lemnag rogon ni nge ayuwegdad. Bochan ni ir e Chitamangiy ni ma t’ufegey, ma aram e ke fil ngodad boch ban’en u daken e Thin rok ngu daken e ulung rok ni nge fel’ rogodad riy. (Isaiah 48:17) Bang ko re skul ney ni yib rok Got e ba l’ag ngay ni ma ginangdad “biyay nge biyay” u murung’agen boch e wup ma tin spiritual ban’en e ra ayuwegdad ni fan ni ngada gelnaged e marus rodad ngad paloggad ko re n’eney ni bay e riya’ riy. (2 Chronicles 36:15; 2 Peter 3:1) Kab kakrom i yib ma boor e gafgow nib gel ni keb ni susun rayog ni ngan pilo’ riy ma boor e gafgow ni rayog ni ngan taleg ‘nfaan manga yugu ra ayuweged gum’ircharad ni nge par ni bay madgun Got rorad ma yad be fol ko motochiyel rok.’ (Deuteronomy 5:29) Ngiyal’ ney ni ireray e “ngiyal’ ni ma k’aring e marus ya ba mo’maw’ e par riy,” ma uw rogon ni ngad ayuwgad ni nge par ni bay madgun Got u wan’dad ma rayog ni ngad paloggad ko riya’ ban’en?​—2 Timothy 3:1, NW.

Mu Pilo’ ko Tin Kireb

4. (a) Mang fanenikan ni ba t’uf ni nge palog e piin Kristiano riy? (b) Uw rogon u wan’ Jehovah e ngongol nib kireb? (Mu guy fare footnote.)

⁴ Fare Bible e be weliy ni “ra nga ni par ni bay madgun Somol u wan’uy, ma aram e ngani fanenikay e tin nib kireb.” (Proverbs 8:13) Reb e lexicon ko Bible e ke weliy murung’agen e re fanenikan ney ni “aram e lem nib gel ni fan ko girdi’ nge chugum ni yibe chamnag, nge n’en ni kan dabuy, min fek owchey riy ma ke dabuy be’ ni nge guy ara ke dabuy ni ngar rin’ew be’ ban’en u taabang.” Ere ra ngani par ni bay madgun Got u wan’uy ma ba l’ag ngay ni ngan dabuy ban’en u fithik’ey ara kan dabuy urngin ban’en nib kireb u owchen Jehovah.b (Psalm 97:10) Ma ra k’aringdad e re n’ey ni ngada paloggad ko tin kireb, ni bod ni ngada sulod nga tomur ngad paloggad ko gin ni rib chuchugur nga tabon e rech u nap’an ni ke ginangdad e tafinay rodad ni ke rus. “Bochan ni be par be’ ni bay madgun Jehovah u wan’ ma aram ra pilo’ ko tin nib kireb,” aram e n’en ni be yog fare Bible.​—Proverbs 16:6, NW.

5. (a) Uw rogon ni ngada gelnaged madgun Got u wan’dad nge fanenikan rodad ko tin nib kireb? (b) Rogon nib l’ag ko re n’en ney ma mang e be skulnagdad ko tin ke buch ko fare nam nu Israel?

⁵ Rayog ni ngada gelnaged e mit ney e marus nge fanenikan ko tin kireb nfaan gad ra lemnag e n’en ni mmutrug nra buch riy nra kirebnigey ni bochan e denen. Fare Bible e be micheg ni gad ra t’ar woomngin e n’en ni kada yunged​—ndemtrug ko kada yunged ban’en ni fan ko dowef rodad ni tadenen ara fan ko fare kan ni thothup. (Galatia 6:7, 8) Bochan e re n’en ney ma ke weliy Jehovah nib tamilang e n’en ni mmutrug nra buch nbochan kan dariy fannag e motochiyel rok min pi’ keruuy ko liyor nib riyul’. Ra dabi ayuweg Got fare nam nu Israel nib achichig, ma mom ni ngeb e toogor rorad ngorad ma susun ra gel ngorad e pi nam nib damumuw mab gel gelngirad. (Deuteronomy 28:15, 45-48) Fare n’en ni ke buch rok piyu Israel ni ri ma k’aring e kireban’ nbochan kar togopuluwgad ku Got e kan yoloy nga Bible nib tamilang ni “nge ginangey” ma aram e rayog ni ngada filed ban’en riy ma rayog ni nge par ni bay madgun Got u wan’dad.​—1 Korinth 10:11.

6. Mang e tin ke buch ni kan ta’ nga Bible nrayog ni ngada fal’eged i lemnag ni fan ni gad ra fil rogon madgun Got? (Mu guy fare footnote.)

⁶ Gathi kemus ni n’en ni ke buch ko fare nam nu Israel e bay u Bible, ya ku bay e thin riy u murung’agen e n’en ni ke buch rok e piin ni ke gel ngorad fare lem ni awan’, nge ngongol ni darngal, nge chogow, ara tolangan’.c Boch i yad e kara pigpiggad ku Jehovah u lan boor e duw, machane reb e tayim ni keb ko yafas rorad e par nib mo’maw’, ma ke wer madgun Got rorad ko ngiyal’ nem, ma aram kara t’ared woomngin nib kireb. Ra ngani fal’eg i lemnag e tin ke buch kakrom ni bay u Bible ma rayog ni nge gel e tin ni kada dugliyed u lanin’dad ni dabda rin’ed e oloboch ni aram rogon. Uw feni gel e kireban’ riy nfaan gad ra sonnag nge buch ban’en nib kireb rodad ma fin da folgad ko fonow rok Got! N’en nib togopuluw ko n’en ni ba mich u wan’ boor e girdi’, ni tin ke buch rok e girdi’​—e baga’ nbochan de gagiyegnag laniyan’—​ma gathi ir e sensey ni th’bi fel’.​—Psalm 19:7.

7. Mini’ e be pining Jehovah ni nge yan nga lan e tento rok ni be yip’ fan ban’en?

⁷ Yugu reb i fan nib gel ni ngada maruweliyed ni ngari yib madgun Got u wan’dad e aram e tafinay rodad ni ngad ayuweged nge par nib fel’ thildad Got. Gad be rus ni nge damumuw Jehovah ngodad ya bochan gad be tayfan thildad Got. Mini’ e be lemnag Got ni fager rok, ni ir e en ni ra pining nge yan nga lan fare tento rok ni be yip’ fan ban’en? Ke mus ni “cha’ ni ma fol rok Got u fithik’ urngin ban’en, ma gubin ngiyal’ ni ma rin’ e tin nib mat’aw.” (Psalm 15:1, 2) Faanra gad be tayfan thildad e en ni ke Sunmiydad, ma aram ngada koled ayuwngidad ni gad ra yan nrogon ni gad ra fel’ u p’eowchen.

8. Uw rogon piyu Israel u nap’an Malaki ni kara dariyfannaged thilrad Got?

⁸ Bay e kireban’ riy, ya boch piyu Israel u nap’an Malaki e kara dariyfannaged thilrad Got ko ngiyal’ nem. Susun ni nge par ni ba’ madgun Jehovah u wan’rad mi yad tayfan, machane kar pied e gamanman nib m’ar mab mugutgut ni maligach ma kar ted nga daken e altar rok. Maku kan guy ni de par ni ba’ madgun Got u wan’rad ni ke m’ug ko ngongol rorad u lan e mabgol. N’en ni kara rin’ed e kar leengiyed boch e rugod, ma kar n’aged pi leengirad ni ra mabgolgad u nap’an ni ka yad ba pagal ni kemus nbochan e magawon nib achichig. Me yog Malaki ngorad ni be fanenikay Jehovah e “mabgol ni ke wer” ma ngongol rorad nde yul’yul’ e ke fekrad kar paloggad ko Got rorad. Uw rogon ni nge fel’ e maligach rorad u wan’ Got ya bod ni kan upunguy fare altar ko lu’​—ni aram e lu’ u owchen e piin leengirad ni kar n’aged yad ma kaygi gel e kireban’ rorad? Bochan rib tamilang ni dar ted fan e motochiyel rok Jehovah ma aram e n’en ni ke k’aring ni nge fith reb e deer ngorad ni gaar: “Bay u uw fare marus romed ngog?”​—Malaki 1:6-8, NW; 2:13-16.

9, 10. Uw rogon ni ngada daged nib ga’ fan u wan’dad ni ke mang Jehovah e fager rodad?

⁹ Ngiyal’ ney, maku ke guy Jehovah e kireban’ ni be ta’ e ppin nge fapi bitir ni kar gafgowgad nbochan e figirngiy nge chitamangiy ma kub muun ngay e piin leengiy nge chitiningiy ni bochan e fel’ngak min un ko ngongol ni darngal. Mmutrug ni bay e kireban’ riy. En ni fager rok Got e rayog ni nge guy ban’en nrogon ni ma guy Got ban’en ma ra maruweliy nib elmirin ni fan ni nge gelnag e mabgol rok, ma ra n’ag e lem ko fayleng u rogon ni ma lemnag e girdi’ e mabgol ni yad be dariyfannag, ma yad ra “palog ko ngongol ni darngal.”​—1 Korinth 6:18.

¹⁰ U lan e mabgol ma ku arrogon u yu yang ko yafas rodad, ma ngan fanenikay urngin ban’en nib kireb u owchen Jehovah, nib muun ngay ni ngaun tayfan e tha’ u thilin e girdi’ nge Got, ma ra aw ni ngad fel’ gad u wan’ Jehovah. Peter ni apostal e i weliy ni kari mudugil laniyan’ ni gaar: “Ka fin gu nang e chiney nriyul’ ni gubin e girdi’ ma taareb rogorad u wan’ Got. En ni ba’ madgun Got u wan’ ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam.” (Acts 10:34, 35) Boor e thin u Bible ni be dag rogon ni nga un par ni bay madgun Got u wan’uy e ke k’aring boch e girdi’ ni ngara rin’ed e tin nib mat’aw u nap’an ni ke yib e skeng ngorad nib thil thil.

Dalip e Girdi’ ni I Par ni Bay Madgun Got u Wan’rad

11. U tan e mang e pi n’en ni be buch ni kan weliy riy ni Abraham e ir be’ ni bay “madgun Got u wan’”?

¹¹ U lan fare Bible ma bay reb e pumoon ni ke yog Jehovah ni yow fager​—ni aram Abraham ni patriarch. (Isaiah 41:8) Rogon ni be par ni bay madgun Got u wan’ Abraham e kan skengnag ko ngiyal’ ni ning Got ngak ni nge pi’ Isak ni fak ni kari maagirag rok nge mang maligach, ma ra lebuguy Got e tin ni ke micheg ni pi fak Abraham e ra mang ba nam nib ga’. (Genesis 12:2, 3; 17:19) Cha’ nem ni “fager rok Jehovah” e rayog rok ni nge gel ko fare skeng nib gel? (James 2:23, NW) Chingiyal’ nem ni fek Abraham fa gi yar nge furuy ni nge li’ Isak ngay, i non fare engel rok Jehovah ni gaar: “Dab mu maadad ngak e cha’ nir ara mrin’ ban’en ngak. Kug nang e chiney nib m’agan’um ngay ni ngam fol rok Got, ya fakam ni kari maagirag rom e da mu tel rok.”​—Genesis 22:10-12.

12. Mang e ke k’aring Abraham ni nge par ni ba’ madgun Got u wan’, ma uw rogon ni ngada daged e ngongol ni aram rogon?

¹² Yugu aram rogon ni ke yog rok Abraham kafram ni nge dag ni ir be’ ni bay madgun Jehovah u wan’, ma ngiyal’ nem ma ke dag madgun Got u reb e kanawo’ ni yira ngat ngay. Tin ni baaray ni ba m’agan’ ngay ni nge pi’ Isak ni maligach e gathi ke mus ni be dag ni be fol nbochan be tayfan Got. N’en ni ke k’aring Abraham ni nge rin’ ban’en ni aram rogon e aram e kari pagan’ ni ra lebuguy e Chitamangin nu tharmiy e tin ni Ke micheg ngak ma ra faseg Isak ko yam’. Rogon e thin ni yoloy Paul u murung’agen Abraham ni “rib mich u wan’ nrayog rok Got e tin ni ke yog [Got] ngak ni bayi rin’.” (Roma 4:16-21) M’agan’dad ngay ni ngada rin’ed e tin nib m’agan’ Got ngay ko ngiyal’ nib t’uf ni ngada rin’ed e tin nrib mo’maw’ fa? Ri ba pagan’dad ni faan gadra fol rok Got ma ra fel’ rogodad riy nib n’uw nap’an, ya gad manang ni Jehovah e ir e “ma taw’athnag e piin ni yad be gayiy Got”? (Hebrews 11:6) Ireram e marus ku Got nib riyul’.​—Psalm 115:11.

13. Mang fan ni bay rogon Joseph ni nge weliy murung’agen ni ir be’ ni ‘bay madgun Got’ u wan’?

¹³ Gad ra yaliy e n’en ni rin’ yugu be’ ni ba’ madgun’ Got u wan’ ni be maruwel​—ni aram e n’en ni rin’ Joseph. Joseph ni ir reb e sib ko tabinaw rok Potiphar, gubin e rran e ri mada’nag e towasar ni nge un ko ngongol ni darngal. Ba tamilang ni dariy e kanawo’ nrayog rok ni nge siyeg leengin e masta rok ni dabkura mada’gow, ma cha’ nem e be gay rogon ni nge k’aring ngar rin’ew e ngongol ni darngal. Ma tomur riy, faani yib fare pin i “kol,” me “mil Joseph rok nga wen.” Mang e ke k’aring ni nge mil nib papey nge palog ko tin kireb? Dariy e maruwar riy, ni bin som’mon i fan e bochan ke par ni ba’ madgun Got u wan’, ni aram e ri ma lemnag rogon ni nge siyeg i rin’ e tin ni “rib kireb ma aram e n’en nib togopuluw ku Got.” (Genesis 39:7-12) Bay rogon Joseph ni nge yog murung’agen ni ir ba moon ni ‘bay madgun e bin riyul’ e Got u wan’.’​—Genesis 42:18.

14. Uw rogon e wurengan’ rok Joseph ni be dag ni riyul’ ni ba’ madgun Got u wan’?

¹⁴ Ke yan boch e duw nga tomren me yog rok Joseph ni nge sabaliy fapi walagen, ni yad e piin dar runguyed faram mi yad pi’ ni chuway nge mang sib ku be’. Mom rok ni nge sulweg taban e tin kireb ni kara rin’ed ngak ya ngiyal’ nem e rib t’uf rorad e ggan. Machane ngani magawonnag yugu boch e girdi’ e ra aw ni dariy madgun Got u wan’uy. (Leviticus 25:43) Ere, nap’an ni guy Joseph ni ke gaman e mich riy ni kari thil e lem rok fapi walagen, me n’ag fan rorad u fithik’ e yul’yul’. Ba taareb rogon ko n’en ni rin’ Joseph, ma madgun Got u wan’dad e ra k’aringdad ni ngada gelgad ngak e kireb u daken e ngongol nib fel’, ma ku ra ayuwegdad ni dabi gel ngodad e n’en ni be wawliy lanin’dad.​—Genesis 45:1-11; Psalm 130:3, 4; Roma 12:17-21.

15. Mang fan ni ngongol rok Job e ke falan’nag gum’irchaen Jehovah?

¹⁵ Job e ir yugu be’ ni kari dag ni bay madgun Got u wan’. I non Jehovah ngak fare Moonyan’ ni gaar: “Mog, kam guy fare tapigpig rog i Job? Dariy be’ u fayleng nib yul’yul’ ni bod ir. Ba’ madgug u wan’ ma ma ayuw ni nge dabi ngongliy e kireb?” (Job 1:8) U lan boor e duw, ma ngongol rok Job nib fel’ e ke falfalan’nag gum’irchaen e Chitamangin u tharmiy. I par Job ni bay madgun Got u wan’ ya manang ni aram e n’en nib puluw ni ngan rin’ nge aram e par ni th’abi fel’. I tolul Job ni gaar: “Am sap! Ngan par ni ba’ madgun Jehovah u wan’uy​—e aram e gonop,” me ulul ngay ni gaar, “ma ngan pilo’ ko tin kireb e bay e llowan’ riy.” (Job 28:28, NW) Job e ke un ko mabgol, ma dar ma sap ngak fapi rugod u fithik’ e lem ni de machalbog, ma de pag ni nge ar’arnag gum’irchaen e ngongol ni darngal. Yugu aram rogon ni ir be’ nib fel’ rogon, ke dabuy ni nge pagan’ ko chugum, maku ke n’ag urngin mit e pigpig ko liyos.​—Job 31:1, 9-11, 24-28.

16. (a) Uw rogon ni dag Job e t’ufeg nge gol? (b) Uw rogon ni dag Job nde taleg i n’agfan e kireb u wan’?

¹⁶ Machane, ngan par ni bay madgun Got u wan’uy, e be yip’ fan ni ngan rin’ e tin nib fel’ min pi’ keru’uy ko tin nib kireb. Ere, i dag Job ni ri be runguy e piin nib malmit, nge piin ni mmugutgut, nge piin nib gafgow. (Leviticus 19:14; Job 29:15, 16) Manang Job ni “urngin e girdi’ ni dabi dag e t’ufeg nge gol ngak yugu boch e girdi’, e ku ra pag ni nge war madgun e en ni Th’abi Tolang u wan’.” (Job 6:14) Ngan dabuy i dag e t’ufeg nge gol e ba l’ag ngay ni ngan dabuy i n’agfan e kireb ara ngan chaariy e fanenikan. I fol Job ko thin ni ke yog Got ngak, ma aram ke meybil ni fan ko fa dalip e girdi’ ni ur chaggad, ni yad e piin ni kar gelnaged e kireban’ rok. (Job 42:7-10) Rayog ni ngad daged e ngongol ni aram rogon ni gad ra n’ag fan rok walagdad ni ke kirebnag lanin’dad u boch e kanawo’? Reb e meybil u fithik’ e yul’yul’ ni fan ko fa cha’ ni ke k’aring e damumuw ngodad e ri ra ayuwegdad nrayog ni ngada gelgad ko fanenikan. Tin nib fel’ ni ke yog ngak Job ya bochan ke par ni ba’ madgun Got u wan’ e be ayuwegdad ni rayog ni ngada guyed e ‘ngongol nib fel’ rok Jehovah ni rib yoor ni i chaariy ni fan ko piin ni bay madgun u wan’rad.’​—Psalm 31:19; James 5:11.

Ngan Par ni Bay Madgun Got u Wan’uy ko Bin Ngan Rus ko Girdi’

17. Mang e ra rin’ e marus ko girdi’ ngodad, machane mang fan ni re marus ney e ba ngoch e changar riy?

¹⁷ Ngan par ni ba’ madgun Got u wan’uy e ra k’aringdad ni ngada rin’ed e tin nib mat’aw, ma marus ko girdi’ e ra warnag e michan’ rodad. Ma bochan e re n’ey, nap’an ni pi’ Jesus e athamgil nga laniyan’ fapi apostal ni ngar manged tamachib ko tin nib fel’ nib pasig, ma aram me yog ngorad ni gaar: “Dabmu tamdaggad ngak e piin ni yad ra li’ dowef machane dabiyog ni ngar lied fare yaal; machane mu tamdaggad ngak e en ni rayog rok ni thang e yaal nge dowef u Gehenna.” (Matthew 10:28, NW) Ngan rus ko girdi’ e aram e changar nib ngoch, rogon ni yog Jesus, e girdi’ e dabiyog rorad ni ngara thanged e athap ko yafas rodad nga m’on. Maku, be par ni ba’ madgun Got u wan’dad ya gad manang ni bay gelngin ni ma k’aring e marus, ma dariy fan e gelngin fapi nam nfaanra ngan taarebnag ko gelngin Got. (Isaiah 40:15) Bod rogon Abraham ma kari pagan’dad nga gelngin Jehovah ni nge faseg e pi tapigpig rok nib yul’yul’. (Revelation 2:10) Ere, rayog ni nga dogned u fithik’ e pagan’ ni gaar: “Faanra ba’ Got u ba’ rodad, me mini’ e rayog rok ni nge togopuluw ngodad?”​—Roma 8:31.

18. Mang kanawo’ nra taw’athnag Jehovah e piin ni ba’ madgun u wan’?

¹⁸ Demtrug ko girdi’ ko tabinaw rodad e ir e en ni be togopuluw ngodad ara en ni ta cham u skul, e rayog ni ngada pirieged nrogon ni “ngan par ni ba’ madgun Jehovah u wan’uy e bay e pagan’ riy nib gel.” (Proverbs 14:26, NW) Rayog ni ngada meybilgad ngak Got ni nge pi’ gelngidad, ya gad manang ni ra motoyil ngodad. (Psalm 145:19) Der ma pagtalin Jehovah e piin ni ba’ madgun u wan’rad. U daken Malaki ni profet rok Got, i micheg ngodad ni gaar: “Ngiyal’ nem ma piin ni bay madgun Jehovah u wan’rad e ur welthingad rorad, nra be’ e be non ngak e en ni be un ngak, ma be par Jehovah ni be tiyan’ ngorad ma be motoyil ngorad. Ma kan tababnag i yoloy reb e babyor ko puguran u p’eowchen ni fan ko piin ni bay madgun Jehovah u wan’rad nge piin ni be lemnag fithingan.”​—Malaki 3:16, NW.

19. Miti mang e marus nra m’ay, machane mit i mang e marus e ra par ndariy n’umngin nap’an?

¹⁹ Ke chuchugur e tayim ni urngin e girdi’ nu fayleng e yad ra liyor ku Jehovah ma marus ko girdi’ e dakuriy. (Isaiah 11:9) Marus ko bilig, nge m’ar, nge bugel, nga mahl e ra chuw. Machane fare marus ku Got nib fel’ e ra par ndariy n’umngin nap’an ya pi tapigpig rok u tharmiy ngu roy u fayleng e yad ra ulul i dag e tayfan ngak, ma yad ra fol rok, ma yad ra pining e magar ngak. (Revelation 15:4) Chiney, e yibe athapeg ni gadad gubin e gadra motoyil ko fonow rok Solomon ni kan thagthagnag ni gaar: “Dabmu pag ni nge awan’um ngak e piin tadenen, machane mu par ni bay madgun Jehovah u wan’um ni polo’ e rran. Ya faanra aram rogon ma ka bay e athap boch nga m’on, ma dabi aw nib m’ay fan e athap rom.”​—Proverbs 23:17, 18, NW.

[Footnotes]

Ka Ga Manang?

• Uw rogon ni ngada filed rogon ni ngada fanenikayed e tin nib kireb?

• Uw rogon ma piyu Israel u nap’an Malaki e kara dariyfannaged e fager rorad ni Jehovah?

• Mang e n’en ni gad ra fil rok Abraham, nge Joseph, nge Job u murung’agen nge rogon ni ngan par ni ba’ madgun Got u wan’uy?

• Miti mang e marus e dabi m’ay, ma mang fan?

[Picture on page 25]

Gallabthir nib gonop e ra fil ngak fapi bitir rorad e marus nib fel’

[Picture on page 26]

Rogon ni marus e ra ayuwegdad ni ngada paloggad ko gin ni bay e riya’ riy, ma madgun Got u wan’uy e ra ayuwegdad ni ngada paloggad ko tin nib kireb

[Picture on page 29]

I par Job ni ba’ madgun Got u wan’ ni mus nga nap’an ni keb fa dalip e fager ni googsur ngak

[Credit Line]

From the Bible translation Vulgata Latina, 1795