Uw Rogon Me Yog Ni Fare Gapas Rok Kristus E Nge Gagiyegnag Lan Gum’erchadad?

“Mu pag e gapas rok Kristus nge gagiyegnag gum’erchamed, ya gimed, e ba riyul’,ni kan piningmed nga taareb e dowef.”​—KOLOSE 3:15, New World Translation.

1, 2. Uw rogon ma “fare gapas rok Kristus” e be gagiyegnag gum’erchaen e Kristiano?

GAGIYEG e bbugithin ni de adag boor e girdi’, ya ma yib ngan’uy e towasar nge gel fen. N’en ni i tay Paul chilen ngak e pi Kristiano nu Kolose e gaar, “Mu paged e gapas rok Kristus ngi i gagiyegnag gum’erchamed,” rayog ni nge lemnag boch e girdi’ni de fel’ e re n’enem. (Kolose 3:15, NW) Gathi da sumgad nib puf mat’awdad? Ere mang fan ni ngad paged ban’en fa be’ nge gagiyegnag gum’erchadad?

² Paul e der yog ngak e girdi’ nu Kolose ni ngar paged mat’awrad. Fare bugithin ni Greek ni piliyeg ni “gagiyeg” ko Kolose 3:15 e ba chuchugur fan ko fare bugithin ni umpire ni be’ ni ma pi’ puluwon e piin ni kar gelgad ko gosgos ko ngiyal’ nem. Piin yad be un ko gosgos e ba puf rogorad ni bay e gin ni mus riy ni ka be yan u lan e motochiyel ko fare gosgos, ma tomur riy, ma fare umpire e ir e be turguy ko mini’ e ki i fol ko motochiyel ma aram e eni ke gel ko fare gosgos. Ku bod, ni bay mat’awdad ni boor ni nga udi lemnaged boch ban’en u nap’an e yafas, machane nap’an ni gadad be yodorom, ma fare gapas rok Kristus e thingari i par ni bod e “umpire”​—fa, bod rogon ni yog Edgar J. Goodspeed, ni be’ ni ma abuweg e thin ni gaar “gelngin ni be gagiyeg” u lan gum’erchadad.

3. Mang “fare gapas rok Kristus”?

³ Mang “fare gapas rok Kristus”? Ireram fare gapas laniyan’ nge mocha’ u fithik’dad, ni ma yog ngodad u nap’an ni gad ra mang gachalpen Jesus, ma gad ra nang ni ke t’ufegdad ma ke m’agan’ Jehovah Got nge fak ngodad. Nap’an ni be n’en Jesus ni nge pag pi gachalpen, me yog ngorad ni gaar: “Nggu pi’ e gapas rog ngomed. . . . Dabi maga fan’med ma dabi wagagey lanin’med ma dabmu tamdag gad.” (John 14:27, NW) Ke chugur i gaman 2,000 e duw, ni re gapas nem e ka be falfalan’nag e piin ni ba yul’yul’ ni kan dugliyrad ni yad bang ko fare dowef ku Kristus, ma chiney bochi girdi’rad, ni “yugu boch e saf,” e kar uned ngorad. (John 10:16) Re gapas nem e thingari gagiyeg lan i gum’ercha’dad. Nap’an ni gadad ra aw ko skeng nib gel, ma ra ayuwegdad ni nge dabi m’ay gelngidad ko marus fa kireban’ nib gel. Ngad guyed ko uw rogon ni ke riyul’ e re n’eney u nap’an ni gad ra ma da’nag e tin de mat’aw ma de puluw, fa ngiyal’ ni ke liyegdad e magafan’ nge marus, fa ngiyal’ ni ke mulan’dad kad lemnaged ni dakuriy e n’en gad ba fel’ ngay.

Ngiyal’ ni Kad Mada’naged e Tin ni De Mat’aw

4. (a) Uw rogon ni pirieg Jesus e ngongol ni de mat’aw? (b) Mang e be rin’ e pi Kristiano ko ngongol ni de mat’aw ni be yib ngorad?

⁴ Solomon ni Pilung e gu’ ni: “Girdi’ e ke gagiyegnag e girdi’ i yan ko maadad.” (Eklesiastes 8:9, NW) Jesus e manang ni riyul’ e pi thin nem. Nap’an ni bay u tharmiy, ma ke guy gelngin e ngongol ni de mat’aw ni yibe rin’ ngak be’ nge be’. Immoy u fayleng, maku ir rok mi ri ki gafgow ni bochan e ngongol ni de mat’aw, ni ir be’ ni dariy e denen rok, mi nog ni ba buch e rok ya be dariyfannag Got ma aram min li’ ngem ni bod be’ nib kireb nib ba tacham. (Matthew 26:63-66; Mark 15:27) Ngiyal’ ney, ma kireb e ka be gel i yan ke pag rogon, ma tin riyul’ e Kristiano e kar gafgowgad nib elmerin, “kar pared ni yad e girdi’ ni yibe fanenikayrad u gubin e nam.” (Matthew 24:9) Machane, dariy fan gelngin e gafgow nge marus ni ra tayed ko fapi kalbus ko Nazi ni u nim’ riy nge fare Soviet Gulag, dariy fan ni u ni li’rad ma be gafgownagrad yu ulung i girdi’ ni kireb ni ta cham, nge thin ni un i t’ar nga dakenrad, ma yibe gafgownagrad ni dariy nap’an, ma fare gapas rok Kristus e ke tayrad ni yad ba mudugil. Yad be rin’ ni bod ni i rin’ Jesus, ni gad ra bieg rogon ni gaar: “Ma faan nog e thin nib kireb ngak ma de ta’ puluwon ni thin nib kireb; ma faan nni gafgownag ma de gaar bayi fulweg taban ngak e piin ni yad be gafgownag, machane me pag fan urngin ban’en ngak Got, ni ir fare Tapufthin nib mat’aw.”​—1 Peter 2:23.

5. Nap’an ni gad ra rungaag ban’en ni de mat’aw ni ke buch u lan e ulung, ma mang e n’en ni som’mon ni ngad lemnaged?

⁵ Ku bay yochi ngiyal’, ni bay yi n’en me lungudad de puluw e n’en kan rin’ ku be’ u lan e ulung ko Kristiano. Ra buch ni aram rogon, ma rayog ni ngad lemgad ni bod ni lem Paul, ni faani gaar: “Mini’ e ke meewar, ni dagu damuwmuw?” (2 Korinth 11:29, NW) Ere mang e rayog ni ngada rin’ed? Thingarda fithed gadad, ‘Ko rriyul’ nib ban’en ni de puluw e re n’enem fa?’ Baga’, ni bayi n’en ma boor fan fare n’enem ni kan rin’ e dada nanged. Rayog ni nga yugu da rin’ed ban’en nib elmerin u tomuren ni kad motoyilgad ngak be’ ni be gaar ir e manang gubin ni murung’agen fare n’en. Arfan ni rib fel’ rogon fan, ni yog e Bible ni gaar: “Be’ nib balyang e ma michan’ nga urngin bugithin.” (Proverbs 14:15, NW) Ere rib t’uf ni nga ud kol ayuwgad.

6. Uw rogon ni ngad ngongolgad ma gad nang fan e tini der mat’aw u lan e ulung?

⁶ Susuna, faanra, gadad rodad e gadad be lemnag ni de puluw e n’en ni kan rin’ ngodad. Ma mang e ra rin’ be’ ni bay fare gapas rok Kristus u lan i gum’erchaen? Rayog ni ngad lemnaged nib t’uf ni ngad nonad faanem ni gad be lemnag ni ir e be rin’ e kireb ngodad. Ma tomuren, ma baaray ni ngam weliy fare n’en ku be’ ni ngari motoyil, ma mang fan ni dabmu pag fare magawon ngak Jehovah u fithik’ e meybil ma ga pagan’um ngak ni ngan pithig fare magawon nrogon? (Psalm 9:10; Proverbs 3:5) Ra fel’ ni faan gad ra rin’ ni aram rogon, ma rayog ni ngad nanged fan me fel’ u wan’dad ma gad par “ni dab kuda nonod.” (Psalm 4:4) Boor yay, ni rayog ni ngan rin’ e n’en ni yog Paul ni gaar: “Nge bigimed mi i ayuweg bigimed ko meewar rok u fithik’ e runguy, mu um n’iged fan u wan’med e n’en ni manga ke kirebnag bigimed u laniyan’ bigimed ko re ngiyal’ i n’en ni ba’ ban’en ni ke dabuy bigimed ni ke rin’ bigimed ngak. Thingar um niged fan u wan’med e n’en ni ke rin’ bigimed ngak bigimed ni bod rogon ni ke n’ag Jehovah fan u wan’ e tin ni kam rin’ed nib togopuluw ngak.”​—Kolose 3:13, NW.

7. Mang e n’en ni thingar u da lemnaged ko ngongol rodad ngak pi walagdad?

⁷ Demtrug e n’en gad be rin’, ma ba t’uf, ni nga ud lemnaged ni yu ngiyal’ ma dabiyog ni ngad gagiyegnaged e n’en ni ke buch, machane rayog ni da gagiyegnaged e ngongol rodad. Faan gad ra ngongol ni de fel’ rogon ni fan e n’en ni gad be lemnag ni de puluw ma rayog ni ngeb angin nib gel e kireb riy ko gapas rodad ko bin ni ngeb ko fare n’en ni kan rin’ ni de puluw. (Proverbs 18:14) Maku rayog ni ngada olobochgad ngad talgad ni dab kuda chag gad ko ulung nge mada’ ko ngiyal’ ni kad lemnaged ni tin kan rin’ ko fare n’en e ke puluw ni ke fel’ u wan’dad. Fare psalmist e yoloy ni piin ni baadag e pi motochiyel rok Jehovah e “dariy ban’en ni ra k’aringrad ngar wargad.” (Psalm 119:165, NW) Ma riyul’, ni urngin e girdi’ ma kar pirieged e ngongol ni de puluw yu ngiyal’. Ri dab mu pag e magawon ni ga ma pirieg nge magawonnag e pigpig rom ku Jehovah. N’en ni ngam rin’, e ngam pag e gapas rok Kristus nge gagiyeg u lan i gum’erchaem.

Ngiyal’ Ni Ke Yoor e Magafan’ Rodad

8. Mang boch ban’en ni ra k’aring e magafan’, ma mang angin nra yib?

⁸ Magafan’ e rriyul’ ni bayang ko yafas rodad ko pi rran ney ni tin “tomuren e rran.” (2 Timothy 3:1) Rriyul’, ni yog Jesus ni gaar: “Dabi magafan’med ko ggan ni nge yog ngomed ni fan e nge dab mm’ad ara magafan’med ko mad ni nge yog ngomed ni fan nga dowmed.” (Luke 12:22) Machane gathi urngin e magafan’ ni yima tay ma fan ko chugum ara tin u fayleng ban’en. Lot e “magafan’ ni rib gel” ni bochan e ngongol ni kireb u Sodom. (2 Peter 2:7) Paul e boor e “magafan’ ni tay ni fan ko urngin e ulung”.” (2 Korinth 11:28) Jesus e ri magafan’ nib gel ko fare nep’ u m’on ni nge yim’ nib baaram ni “athuw u dow e i waangchal nga but’ ni racha’.” (Luke 22:44 NW) Ere rib tamilang, ni gathi gubin e magafan’ ma be micheg ni ke war e michan’. Demtrug e n’en ni ke k’aring, machane, faanra fare magafan’ e rib gel ma ke n’uw nap’an ni par, ma rayog ni nge chuweg e gapas rodad. Magafan’ e kaygi gel ngak boch e girdi’, ke k’aringrad kar lemnaged ni dabkiyog rorad ni ngar ululgad i ngongliy fapi maruwel ni ba muun ngay e pigpig ku Jehovah. Fare Bible e gaar: “Magafan’ u lan i gum’erchaen be’ e ir e ra k’aring faanem nge simormor’.” (Proverbs 12:25, NW) Mang e gadad ra rin’, ko ngiyal’, ni ke gafgownagdad e magafan’?

9. Mang boch ban’en ni rayog ni ngad rin’ed me baudeg e magafan’ rodad, ma mang boch ban’en ni ma k’aring e magafan’ ni dabiyog i chuweg?

⁹ Yu ngiyal’, ma rayog ni ngad rin’ed e tin nib ga’ ni yima rin’. Faanra magawon ko m’ar e ir e likngin e gini ke taw e magafan’ rodad ngay, ma ba fel’ ni ngan lemnag rogon, ni yugu aram rogon ni faanem e ir e nge dugliy.a (Matthew 9:12) Ma faan ma nga ka ri da tomalgad ko maruwel ni kaygi yoor, ma sana rayog ni ngad pied boch ngak boch e girdi’ ngar rin’ed. (Exodus 18:13-23) Ma, uw rogon e piin ni bod e​—gallabthir—​ni bay e maruwel rorad nib gel ma dabiyog ni ngan pi’ boch ku be’. Ma uw rogon ba Kristiano ni ani mabgol rok e ba togopuluw ko tin riyul’? Ma uw rogon ba tabinaw ni yad be par ni rib gel e gafgow rorad ni bochan e magawon ko par ko girdi’ nge chugum nge salpiy ara yad be par ko gini yibe mahl riy? Rib tamilang, ni dabiyog ni ngad chuwegned urngin e pi n’en ni ma sum e magafan’ riy ko biney e m’ag. Machane, ku rayog ni ngad ted e gapas rok Kristus nge par u lan i gum’erchadad. Uw rogon?

10. Mang l’agruw e kanawo’ ni rayog ni nge gay e Kristiano ni nge baudeg e magafan’?

¹⁰ Ngan ni gay e pagan’ u fithik’ e Thin rok Got e reb e kanawo’. David ni Pilung e yoloy ni gaar: “Nap’an ni ra wagagey me yooyoor lanin’ug, ma thin rom e ra gapasnag lanin’ug.” (Psalm 94:19, NW) Pi “fanow” rok Jehovah e rayog i pirieg u lan e Bible. Faan yugu ra un i poy e re ke babyoren e yiiy nem ma ra ayuwegey nge par e gapas rok Kristus u lan i gum’erchadad. Fare Bible e gaar: “Mu paged e pi n’en ni ke tomalnagmed nga daken Jehovah, me ir e bayi ayuwegmed. Ya ri dabi pag e piin nib mat’aw nga u ra dol’dol’gad.” (Psalm 55:22, NW) Maku arrogon ni, yoloy Paul ni gaar: “Ma dariy ban’en ni nge magafan’med ngay, machane faan gimed ra meybil ngak Got mi gimed ning ngak e tin ni nge yog ngomed ma gubin ngiyal’ ni nguum ninged ngak gimed be pining e magar ngak u lanin’med. Ma gapas rok Got ndabi chuchugur ni nge nang e girdi’ fan e ra yororiy gum’erchamed nge tafinay romed ngi i par rok Kristus Jesus.” (Filippi 4:6, 7) Athamgil nge meybil e ra ayuwegdad nge par e gapas rodad.

11. (a) Uw rogon kanawoen e meybil nib fel’ ni dag Jesus? (b) Uw rogon ni nga udi lemnaged e meybil?

¹¹ Jesus e ir e th’abi fel’ e wok ni dag ko re n’eney. Ba ngiyal’, ma i meybil nib elmerin ni be non ko Chitamangin nu tharmiy ni ra bayay ni meybil ma boor e awa. (Matthew 14:23; Luke 6:12) Meybil e ayuweg nge yog ni kadan’ u fithik’ fapi skeng ni rib gel. Ma fare nep’ u m’on ni yim’, mi ri elmerin e mochuch ni tay. Mang e rin’? I meybil “ni rib elmerin.” (Luke 22:44) Arrogon, fa cha’ nib flont ni Fak Got e be’ nib tameybil. Ere uw gelngin, ni thingari guy rogon, pi gachalpen ni dar flontgad nge yog ni me cham ngorad ni nga ur meybilgad ni aram rogon! I fil Jesus ngak pi gachalpen “ni gubin ngiyal’ ma nga ur i meybilgad ma dabi ngochan’rad.” (Luke 18:1) Meybil e rib riyul’ ma ri baga’ fan ni gad be non ngak e Ani manangdad ni fel’ rogon nga rogon ni gadad manang rarogodad. (Psalm 103:14) Faanra nge yog ni par e gapas rok Kristus u lan i gum’erchadad, ma nga ud “meybilgad ni gubin ngiyal’.”​—1 Thessalonika 5:17.

Ngad Gelgad Nge Fel’ U Wan’dad e Tin Dabiyog Rodad

12. Mang bochi fan ni bayi n’en ma boch e girdi’ e ma lemnag ni pigpig rorad e de gaman?

¹² Jehovah e be changar ngak urngin e pi tapigpig rok ni gowa ban’en nib tolang puluwon. (Haggai 2:7, footnote) Machane, boor e girdi’ ni kar pirieged e re n’eney nib mo’maw ni ngar adged. Boch e girdi’ e bayi n’en ma ke mulan’rad ni bochan ni kar pillibthirgad, ma boch e maruwel ni thingar ni rin’ u tabinaw, e ke war ni bochan e m’ar. Ma boch e ke mulan’rad ni bochan e ra bad u boch e tabinaw ni ba wagagey ni de fel’ rogorad. Maku bay boch ni be kireban’rad ko kireb ni ku ur rin’ed ko som’mon, be maruwar u wan’rad ko ra n’ag Jehovah fan e kireb ni ku ur rin’ed fa danga’. (Psalm 51:3) Mang e rayog ni ngan rin’ ko mit i lem nem?

13. Mang thin nu Bible e bay ni ra gapaseg me fal’eg laniyan’ e piin ni kar lemnaged ni pigpig rorad e de gaman?

¹³ Fare gapas rok Kristus e ra micheg ngodad rogon e t’ufeg rok Jehovah. Rayog ni ngad fulwegned ere gapas nem nga lan i gum’echadad ni nga ud fal’eged i lemnag ni de yog Jesus ni rogon felngidad e yibe taarebnag ko tin be rin’ bochi gadad. (Matthew 25:14, 15; Mark 12:41-44) N’en ni ri ta’ chilen e yul’yul’. I yog ngak pi gachalpen ni gaar: “En nra athamgil nge mada’ ko tomur e rayog e yafas ngak.” (Matthew 24:13) Jesus e ir ma kuun “dariyfannag”, machane ri de maruwar u wan’ feni t’uf ko Chitamangin. (Isaiah 53:3; John 10:17) Miki yog ngak pi gachalpen ni ku er rogorad ni ku yad ba t’uf. (John 14:21) Rogon mi rin’ nang fan, e ki gaar Jesus: “Rayog ni ngan chuw’iy l’agruw chi arche’ ni sparrow fithingan nga ba salpiy nrow; machane dariy taa bagayad nra mul nga but’ nde nang e Chitamangimed. Mus nga piyan lolugmed ni ke m’ay i theeg. Ere dab mu tamdag gad; ya ka baga’ famed ngak fa nochi arche’ ni sparrow fithingan.” (Matthew 10:29-31) Aram fene fel’ e t’ufeg rok Jehovah!

14. Mang pagan’ e bay rodad ni fan ni gad gubin ma bay fedad u wan’ Jehovah?

¹⁴ Maki gaar Jesus: “Dariy be’ nrayog ni nge yib ngog ni faanra gathi en chitamangiy e pow’iy.” (John 6:44) Ere Jehovah e ke wawliydad ni ngad leked Jesus, ma ke lemnag ni ngad thapgad. I yog Jesus ngak pi gachalpen ni gaar: “Gathi ban’en nib fel’ u wan’ e Chitamag ni bay u tharmiy ni nge yim’ reb e nochi tir ney.” (Matthew 18:14, NW) Arfan, ni faanra gimed be pigpig ni polo’ i gum’erchamed, ma rayog ni ngam falfalan’gad ko maruwel romed nib fel’. (Galatia 6:4) Faanra be kireban’med nib gel ni bochan e kireb ni ku u mu rin’ed ko som’mon, ma ngari pagan’med ya Jehovah e “ri” ma n’ag fan e kireb ko piin ni riyul’ ni kam kalgadngan’rad. (Isaiah 43:25; 55:7) Ma faanra magafan’ romed e fan nga yugu boch e ban’en, ma dab mu pagtalin ni “Jehovah e ba chuchugur ngak e piin ni ke kireban’rad nge piin ni ke mingan’rad ra ayuwegrad.”​—Psalm 34:18, NW.

15. (a) Uw rogon ni be guy rogon Satan ni nge chuweg e gapas rodad? (b) Ma mang e pagan’ ni rayog ni ngada ted ku Jehovah?

¹⁵ Dariy ban’en nib adag Satan nge migid ni nge chuweg e gapas rom. I ir tabolngin ma ir tapgin me af e denen nib aray ni gadad be cham. (Roma 7:21-24) Rib adag ni ngan lemnag ni bochan ni da mu flont ma aram e pigpig rom e dabi adag Got. Ri dab mu pag Moonyan’ nge muleg lanin’um ko urngin e ngongol! Gur e ngam nang rogon e n’en ma rin’, ma ga pag ere nangan’ nem nge dugliy lanin’um ni ngam guman’. (2 Korinth 2:11; Efesus 6:11-13) Nga u mu lemnag ni, “Got e baga’ nga gum’erchadad ma manang urngin ban’en.” (1 John 3:20, NW) Jehovah e boor ban’en ni ma guy gathi kemus ni tini der yog rodad. Ku ma guy e lem rodad nge tin ni kada turguyed ni ngad rin’ed. Ere mu pag nge fal’eg lanin’um fare thin ni yog fare psalmist ni gaar: “Jehovah e dabi pag ni dabki ayuweg e girdi’ rok, maku dabi digey e pi n’en ni ke thognag.”​—Psalm 94:14, NW.

Ngan Taareb u Fithik’ e Gapas Rok Kristus

16. Mang e kanawo’ ni be m’ug riy ni gathi goo gadad e gadad be athamgil ni ngad pired ni gadad ba gel?

¹⁶ I yoloy Paul ni thingarda paged e gapas rok Kristus nge gagiyegnag lan i gum’erchadad ni “kan piningdad ngay nga taab dowef.” Pi Kristiano ni kan dugliyrad ni aram e piin ni yol Paul ngorad e kan piningrad ni ngar taab girdi’ gad Kristus, ni ku arrogon e piin ni kan dugliyrad ni ka yad bay e chiney. Ma yugu “boch e saf” ni yad nga bang e kan puthuy ngorad ni kar manged “taab ulung” u tan “taareb e tachugol saf,” i Jesus Kristus. (John 10:16) Bay ba “ulung”, nib chag nga taabang mab taareb u gaangin yang e fayleng ni bokum milyon e girdi’ riy ni kar paged fare gapas rok Kristus be gagiyegnag gum’ercha’rad. Gad ra nang ni gathi goo gad e yira ayuwegdad ni ngad pired ni gad ba gel. Yoloy Peter ni gaar: “Mu sak’iygad ngam togopuluwgad ngak [Satan], ni gimed ba mudugil u fithik’ e michan’, ya gimed manang ni pi gafgow ni be yib ngomed e ir e ku be yib ko ulung rok pi walagmed u fayleng.”​—1 Peter 5:9, NW.

17. Mang e n’en ni be k’aringdad ni ngad paged fare gapas rok Kristus nge gagiyegnag lan i gum’erchadad?

¹⁷ Ere gimed gubin, mu u mu, ululgad i maruweliy e gapas, ni aram fare waamngin e kan ni thothup rok Got ni baga’ fan. (Galatia 5:22, 23) Piin ni ra piriegrad Jehovah ni yad ba machalbog, ma dariy ban’en ni yad ba kireb riy, ma yad bay u fithik’ e gapas e ra munmun mini towathnagrad ko yafas ni manemus u paradis u fayleng, ko gin bayi par e piin ni ba mat’aw riy. (2 Peter 3:13, 14) Arfan ni ngad paged fare gapas rok Kristus nge gagiyeg u lan i gum’erchadad.

[Footnote]

Mang Ka Bay U Wan’um?

• Mang fare gapas rok Kristus?

• Uw rogon ni ra gagiyegnag fare gapas rok Kristus nge gum’erchadad ko ngiyal’ ni kad pirieged e tin ni de mat’aw?

• Uw rogon ma fare gapas rok Kristus e rayog ni nge ayuwegdad nge yog ni da gagiyeg niged e magafan’?

• Uw rogon ni ra fal’eg fare gapas rok Kristus lanin’dad ko ngiyal’ ni kad lemnaged ni ke m’ay fadad?

[Picture on page 13]

U p’eowchen e piin yad be togopuluw ngak, me pi’ Jesus ir ngak Jehovah

[Picture on page 14]

Bod rogon ni ke fek ba matam fak be sa fel’fel’ ngak, e aram rogon e fonow rok Jehovah ni ra achignag e magafan’ rodad