Jehovah Ir E Manaf Rodad

“Bochan ni ka mog ni: ‘Jehovah ir e manaf rog,’ . . . ma dabi buch watham.”​—PSALM 91:9, 10, New World Translation.

1. Mang fan ni rayog ni nga dogned ni Jehovah e ir e manaf rodad?

JEHOVAH ir e bin riyul’ e manaf ko girdi’ rok. Faanra riyul’ ni gad ba yul’yul’ ngak, ma sana yira ‘diliiy lanin’dad u gubin e kanawo’, machane gathi kan diliiy ni ri dabkiyog ni ngada mithmitheged’; kan athukuy lanin’dad, machane gathi ban’en ni dabkiyog ni ngan pithig; min gafgownagdad, machane gathi kan pagdad ni polo’; ma kanon’dad nga but’, machane dan gotheydad.’ Mang fan? Ya bochan ra pi’ Jehovah “gelngidad ni rib gel.” (2 Korinth 4:7-9, NW) Arrogon, Chitamangidad u tharmiy e ra ayuwegdad ni nge par nib fel’ e ngongol rodad u wan’, me yog ni taw nga gum’ircha’dad e thin ko fare psalmist ni gaar: “Bochan ni ka mog ni: ‘Jehovah ir e manaf rog,’ ma kam ta’ ni En Th’abi Tolang e ke mang tagil’ rom; ere dariy e buch waathan nra yib ngom.”​—Psalm 91:9, 10, NW.

2. Mang e rayog ni nga nog u murung’agen e Psalm 91 ma mang e be micheg?

² Sana Moses e ke yoloy fapi thin ni bay ko Psalm 91. Ma Thin ni kan tay u lang e be yog ni ir e ke fal’eg fare Psalm 90, ma kan ta’ fare Psalm 91 u tomren ni dariy e thin u lukngun ni be yog murung’agen yugu reb e ta yol. Sana kanin’ e Psalm 91 nrogon nib ki’; ni som’mon ma taabe’ e be m’on riy (91:1, 2), ma ra sulweg boch e girdi’ (91:3-8). Ma sana bin migid ma kan rung’ag taareb e lam (91:9a) ma ke fulweg buulung e girdi’ (91:9b-13). Ngemu’ ma bagayad fa piin be tang e ra yon’ e yil’ ni tomur. (91:14-16). Yugu demtrug rogon, ma fare Psalm 91 e be micheg ni piin Kristiano ni kan dugliyrad e kar mudugilgad ko tirok Got ni yad reb e ulung maku kan micheg e tin ni aray rogon ngak e piin ni kar ognaged e yafas rorad ni ku yad reb e ulung ni ba chag ngorad.a Ngada fal’eged i guy e re psalm ney nrogon ni be changar urngin e pi tapigpig rok Jehovah ngay.

Pagan’ u ‘Tagil’ Got nib Mith’

3. (a) Mang “fare tabinaw rok e en ni Th’abi Tolang nib mith”? (b) Mang e gad ra thamiy ni ra ngada “pared u tan fare tagalul’ ko en ni Gubin ma Rayog Rok”?

³ Be yon’ fare psalmist e tang ni gaar: “Urngin e girdi’ ni be mith u tabinaw rok e en Th’abi Tolang e rayog ni nge toffan u tan pa’ e en ni Gubin Ban’en ma Rayog Rok. Baygog ngak Jehovah ni: ‘Gur e gin’en ni ma ayuwegey nge manaf rog, nge Got rog, ni nggu pagan’ug ngom.’” (Psalm 91:1, 2, NW) “Fare binaw rok e en Th’bi Tolang nib mith” e aram e gin’en ni be yip’ fan ban’en ni ma pi’ e ayuw ngodad, ma aram e ayuw ni baga’ ni yima pi’ ngak e piin kan dugliyrad, ni piin ni ri ma cham fare Moonyan’ ngorad. (Revelation 12:15-17) Faanra dariy rodad fare ayuw e ngiyal’ ney, ni bochan e re n’eney ma bod ni gadad e piin milekag nib spiritual ni gad be par rok Got ma ra kirebnagdad fare Moonyan’. Ngan “par u tan e tagalul’ rok e en ni Gubin Ma Rayog Rok,” ma gad ra thamiy e tagalul’ rok Got ni be ayuwegdad. (Psalm 15:1, 2; 121:5) Dariy bang ni ra ayuwegey ngan nab ngay ara bang nib gel ma ba mo’maw’ ni nge kirebnag e piin toogor ni kab fel’ ko Somol rodad ni Th’abi Tolang, i Jehovah.​—Proverbs 18:10.

4. Mang talin e maruwel ni ma fanay e en “ma kol arche’,” ni Satan, ma uw rogon ni ngada thaygad riy?

⁴ Me ulul ngay fare psalmist ni gaar: “Ra ayuwegem [ Jehovah] ni dabmu aw ko wup rok e en ni ma kol e arche, nge liliy nib machreg ni ma af ko girdi’ ni ma k’aring e kireban’ nib gel.” (Psalm 91:3, NW) En mamkol arche u Israel kakrom e ma fanay e wup ara tafich. U fithik’ fapi wup ni ma fanay e “en mamkol arche’” e Satan, nge ulung rok nib kireb nge “pi ban rok.” (Efesus 6:11, footnote) Boch e wup nib mith e kan ta’ ko gin gad ma yan riy ni nge giringiydad ko tin nib kireb me kirebnag e tirok Got rodad. (Psalm 142:3) Machane, bocham kada paged e tin ni de mat’aw ban’en, ma ‘dowef rodad e bod ba arche’ ni ke thay ko fare wup.’ (Psalm 124:7, 8) Uw feni falan’dad ya ke ayuwegdad Jehovah ma kad milgad rok e en nib kireb ni “mamkol arche’”!​—Matthew 6:13.

5, 6. Mang e “liliy nib machreg ni ma af ni ma k’aring e kireban’ nib gel,” machane mang fan ni dabi pag Jehovah e girdi’ rok nge yim’ riy?

⁵ Be weliy fare psalmist murung’agen “e liliy nib machreg ni ma af ko girdi’ ni ma k’aring e kireban’ nib gel.” Bod e m’ar ni ke wer ni ma af, ma bay ban’en ni ma k’aring e “kireban’ ” ngak girdien e tabinaw nge girdi’ ni be ta’ tanggin e gagiyeg rok Jehovah ni Th’abi Tolang. Murung’agen e re n’eney, ma Arnold Toynbee ni reb e tayoloy e chep e ke yoloy ni gaar: “Ka nap’an ni m’ay e Bin II e Mahl ko Fayleng ma ke yoor ko l’agruw yay e am ni ka nog e independent states ngay nbochan e ngar ni adag e am . . . Ngongol ko girdi’ e chiney e be gelnag e wagay.”

⁶ U lan fapi chibog ni ke yan, ma boch e pilung e ke gelnag e cham ko fayleng ni be yoor raba’nag e girdi’. Maku kara ngongliyed e motochiyel ni be tay chilen ngak e girdi’ ni ngar liyorgad ngorad nge nga boch e sasing ara yaan ban’en ni bay fan ara symbols. Machane de pag Jehovah girdi’ rok nib yul’yul’ ni nge gel e “re magawon ney ngorad nra kirebnagrad.” (Daniel 3:1, 2, 20-27; 6:7-10, 16-22) Gadad ni gadad walag u ga’ngin yang e fayleng ni bay e t’ufeg u fithik’dad, e goo Jehovah e gad be pigpig ngak, ma gad be par u mathil nrogon ni yog e Bible, ma gad manang ni “ en ni ba’ madgun Got u wan’rad ma be rin’ e tin nib mat’aw e ra i par nib fel’ u wan’ Got ndemtrug ko be’ u kun nam” ma arfan ndariy e lem ni ba laniyan’ rodad. Acts 10:34, 35; Exodus 20:4-6; John 13:34, 35; 17:16; 1 Peter 5:8, 9) Yugu aram rogon ni keb ngodad e “tin ma k’aring e gafgow nib gel” u daken e togopuluw ya gadad e piin Kristiano, ma gad ba falfalan’ ya ke mudugil lanin’dad “u tagil’ e en ni Th’abi Tolang nib mith.”

7. Uw rogon ni ma ayuwegdad Jehovah “nga pon”?

⁷ Bochan e ba’ Jehovah ni manaf rodad, ma ke falan’dad nbochan fapi thin ni gaar: “Ra upunguyem nga pon; mu um par ni be guyem ndabi buch ban’en rom; feni yul’yul’ e re manaf nge yoror rom.” (Psalm 91:4) Be ayuwegdad Got, ni bod ba chitiningin e arche’ ni be changeg u daken e pi fak ni be ayuweg. (Isaiah 31:5) ‘Ma tabon pon e ma taleg e pi n’en ni ma yib ngodad ndabi kirebnagdad.’ Ma ma fanay e arche’ pon ni nge upunguy e bitir rok, ni be ayuwegrad ma dariy ban’en ni nge longuyrad. Gad bod rogon pi fak e arche’, ni gadad ba pagan’ u tan pon Jehovah ni be yip’ fan ban’en ya bochan e ulung rok ni Kristiano ma riyul’ ni be ayuwegdad.​—Ruth 2:12; Psalm 5:1, 11.

8. Uw rogon ma “tin riyul’” ku Jehovah e ir fa gin’en ni yima mith nga fon ma ba rungrung ko cham?

⁸ Be pagan’dad ko “tin ni riyul’,” ara tin nib yul’yul’. Re n’ey e ba taareb rogon ko fa gin’en ni yima mith nga fon ko cham kakrom, ni baga’ ni bod yaan e mab nge ga’ngin nib gaman ni nge upunguy downgin be’ ni polo’. (Psalm 5:12) Ra ba pagan’dad ko re ayuw ney ma ra ayuwegdad ndabkuuda rusgad. (Genesis 15:1; Psalm 84:11) Bod rogon e michan’ rodad, ma Got rodad nib yul’yul’ e ir e gin’en ni baga’ ni yima mith nga fon ko cham ni ra taleg e gan e gat’ing rok Satan ni bay e nifiy riy ku ra taleg e tin ni be pag e toogor be yib. (Efesus 6:16) Ku aram e gin ni yima mith ngay, nge ban’en nib tolang boch mab gel ni rayog ni ngada pared nib mudugil u barba’.

‘Dabda Rusgad’

9. Mang fan ni nep’ e aram e ngiyal’ ni ngan rus riy, machane mang fan ni dabda rusgad?

⁹ Bochan e ayuw ni ma pi’ Got, me yog fare psalmist ni gaar: “Ma dabiyog ni ngam tamdag nnep’ nga ban’en ni gomanga ra yibi maad’ad ngom, ara rran ma ga da’da’ ko cham ni ke yib ngom, nge pi liliy ni yima riya’ riy ni ma yib ngak e girdi’ nnep’, ara pi kireb ni ma thang e fan ko girdi’ ni misiw.” (Psalm 91:5, 6, NW) Bochan ni yima rin’ e tin nib kireb u fithik’ e lumor, ma arfan ni nep’ e ir e tayim ni ma k’aring e marus. U fithik’ e lumor nib spiritual ni be upunguy e fayleng e chiney, ma baga’ ni pi toogor rodad e ma rin’ ban’en u fithik’ e sasalap ni be athamgil ni nge kirebnagdad ma dabkuuda adaged e tirok Got ban’en ma ra talegdad i wereg e machib. Machane ‘dabda rusgad ko urngin ban’en ni ma k’aring e marus ni nep’ ya bochan ni Jehovah e be matanagiydad.​—Psalm 64:1, 2; 121:4; Isaiah 60:2.

10. (a) Gowa mang e be yip’ fan “fare gan e gat’ing ni kanin’ ni rran”, ma bochan e re n’eney ma mang e ngada rin’ed? (b) Uw rarogon “fare liliy nib machreg ni ma af ko girdi’ ni be yan u fithik’ e lumor,” ma mang fan ni dabda rusgad?

¹⁰ “Fare gan e gat’ing ni kan nin’ ni misiw’” e be yip’ fan e cham ni welthin. (Psalm 64:3-5; 94:20) Nap’an ni gad be wereg e thin ni riyul’, ma fare togopuluw ni yima ta’ ko maruwel rodad nib thothup e ra aw ndariy fan. Maku, dabda rusgad ko “fare liliy nib machreg ni ma af ko girdi’ iyan ni bay ni be yan u fithik’ e lumor.” Ireray e liliy nib machreg ni be yip fan ban’en ni m’ug u fithik e lumor ko re fayleng ney ni ke sug ko m’ar ko gafarig ko pi yuraba i teliw ni ma be u tan gelngin Satan. (1 John 5:19) Re n’ey e ra sunmiy e lem nge gum’ircha’ ni yira yim’ riy, ni be pag e girdi’ u fithik’ e lumor ni nge dabra nanged murung’agen Jehovah, nge tin nib m’agan’ ngay, nge tin ni ma pi’ u fithik’ e t’ufeg. (1 Timothy 6:4) Dabda rusgad, u fithik’ e re lumor ney, ya bochan ni gad be falfalan’ ya keb ngodad e tamilang’ nib gel.​—Psalm 43:3.

11. Mang e ra buch ko piin ‘ma thang e fan e misiw’?

¹¹ Fare n’en ni “ngan thang e fan ko girdi’ ni rran” e ku der ma faatalnagdad. “Misiw” e be yip’ fan e tamilangnag e fayleng ngay. Piin ni ke gel e chogow ngorad ko pi n’en nu fayleng e kar kirebgad ko tirok Got. (1 Timothy 6:20, 21) Nap’an ni gad ra weliy e thin ko Gil’ilungun ma dabda rusgad, dabda rusgad ngak reb fapi toogor rodad, ya bochan ni Jehovah e ir e ma Ayuwegdad.​—Psalm 64:1; Proverbs 3:25, 26.

12. Ba’ rok mini’ e bokum biyu’ e girdi’ e ra “thig nga but” riy, ma uw rogon?

¹² Me ulul ngay fare psalmist ni gaar: “Rayog ni nge aw bbiyu’ i girdi’ u toobem nga but’, fa ragag i biyu’ u gubin u ba’ ni mat’aw rom; ma gur e dabi chuchugur ngom. Ma kemus ni ngam changar ma gguy rogon ni yibe gechignag e piin kireb.” (Psalm 91:7, 8, NW) Bochan ni boor e piin ni de yog rorad ni ngar maruweliyed ni nge mang Jehovah e manaf rorad, ma kar “thiggad nga but’ ” ni kar mad ko tirok Got ban’en u “toobdad.” Ma wenegen, e “ragag e biyu’” e kar thiggad nga but’ u “ba’ nib mat’aw” rok piyu Israel nib spiritual ko ngiyal’ ney. (Galatia 6:16) Machane yugu demtrug ko gadad e Kristiano ni kan dugliydad ara piin ni ba chag ngorad, ma ba pagan’dad u tagil’ Got “nib mith.” Ke mus ni gad ra ‘changar ma gad guy rogon ni ngan gechignag e piin kireb,’ ya yad be pirieg e wagey ni bochan e teliw nge tafol chuway nge yugu boch ban’en.​—Galatia 6:7.

‘Dariy e Buch Waathan nra Yib Ngodad’

13. Mang gafgow nib gel e dabi aw ngodad, ma mang fan?

¹³ Yugu aram rogon ni pagan’ ko re fayleng ney e be buchuw iyan, ma gadad e gad be m’oneg Got ko yafas rodad ma der yib e marus ngodad nbochan e thin ko fare psalmist ni gaar: “Bochan ka mog ni: ‘Jehovah e ir be’ nrayog ni nggu wan ngak nggu ning e ayuw,’ Kam maruweliy ni en Th’abi Tolang e ra mang tabinaw rom; ma dariy e gafgow nib gel ni ra yib ngom, ma dariy e gechig nra yib ni nge chugur ko tento rom.” (Psalm 91:9, 10, NW) Arrogon, ir e en nrayog ni nga darod ngak ngada ninged e ayuw. Machane, ku ngada maruweliyed ni Got ni ir e Th’abi Tolang e ra mang ‘tabinaw rodad,’ ni ma ayuwegdad. Ngada pininged e sorok ngak Jehovah ni ir e Pilung ni Th’abi Tolang u Palpalth’ib, ma ‘gad be par’ rok ni ir e Tabolngin e pagan’, ma nguuda wereged fare thin nib fel’ ni murung’agen Gil’ilungun. (Matthew 24:14) Bochan e re n’ey, ma ‘dariy e gafgow nib gel nra aw ngodad’​—dariy reb ko fapi gafgow nib gel ni kan weliy u m’on ko re psalm ney. Ni mus nga nap’an ni gad be un ku boch e girdi’ ko gafgow ya keb e durru’, nge hurricanes, nge ran ni boor, nge uyungol, nge gafgow ni ma yib nbochan e mahl, ma dariy reb ko pi n’en ney ni kirebnag e michan’ rodad ara feni mudugil e pagan’ rodad ko tirok Got ban’en.

14. Gadad ni gadad e pi tapigpig ku Jehovah, mang fan ni de af ngodad fare m’ar ni yima yim’ riy?

¹⁴ Piin Kristiano ni kan dugliyrad e yad bod e girdi’ nu bang ni be par u tan e pi tento nib dar ko re m’ag ney. (1 Peter 2:11) ‘Mus nga taareb e gafgow ma yog ni nge chugur ko tento rorad.’ Demtrug ko athap rodad e gad ra yan nga tharmiy ara gad ra par uroy u fayleng, ma gathi gadad bang ko fayleng, ma de af ngodad e gafgow ko tirok Got ban’en ni yima yim’ riy ni bod e ngongol ni darngal, nge chogow, nge teliw ni googsur, nge liyor ko “fare gamanman ni maloboch” nge “yaan,” ni fare ulung ni United Nations.​—Revelation 9:20, 21; 13:1-18; John 17:16.

15. Uw rogon ni ma yib ngodad e ayuw rok e pi engel?

¹⁵ Murung’agen e ayuw ni bay rodad, me uneg fare psalmist boch e thin ngay ni gaar: “Ra pi’ [Jehovah] e pi engel rok nguur matanagiyed gur, ma yad be yoror rom ko gin’en ni ga be yan riy i yan. Yad ra fekem nge dabi maad’ad em ko malang.” (Psalm 91:11, 12) Kan pi’ ngak fapi engel gelngirad ni fan ni ngara ayuweged gadad. (2 Kings 6:17; Psalm 34:7-9; 104:4; Matthew 26:53; Luke 1:19) Yad be matanagiydad ko ‘urngin e kanawo’ rodad.’ (Matthew 18:10) Ra pow’iydad e pi engel ma ra matanagiydad ni gadad e pi tamachib ko Gil’ilungun ma dabda wargad ko tirok Got. (Revelation 14:6, 7) Musko ‘pi malang’ ni aram e ngan taleg e maruwel rodad e de k’aringdad ni nge war lanin’dad ma de digeydad Got.

16. Mang e bthil u thilin ba “layon” nge ba “porchoyog” u rogon ni yow ma cham, ma mang e gad ra rin’ ngorow ngay?

¹⁶ Me ulul fare psalmist ngay ni gaar: “Bay umut’ e layon nga but’ nge porchoyog, ma umut’ ba layon ni bay bunuen lolgen nib n’uw nge fare porchoyog ni baga’.” (Psalm 91:13, NW) Bod rogon e layon ni ma yib ko cham, ma boch ko fapi toogor rodad e ra cham ngodad nrogon nib tamilang ma yad ra wereg boch e motochiyel ni fan ni ngan taleg e maruwel rodad ni ngan wereg e machib. Machane fare cham ni dan lemnag ni bod rogon e n’en ni ma rin’ fare porchoyog ni ma yib ko cham ni be par u bang nib mith e ku yima rin’ ngodad. Yu ngiyal’ ma piin tayugang ko teliw e ma cham ngodad nib mith u daken e piin ni ma ngongliy e motochiyel’ nge piin tapuf oloboch, nge yugu boch e girdi’. Machane u daken e ayuw rok Jehovah, ma gad ma gay e kanawo’ u rogon ni ngan pithig e magawon u court, ma aram rogon ma gad ‘be ayuweg ma gad be gelnag fare thin nib fel’ nrogon nib puluw ko motochiyel.’​—Filippi 1:7; Psalm 94:14, 20-22.

17. Uw rogon ni ngada yited nga but’ “fare layon nib bunuen lolgen”?

¹⁷ Ke yog fare psalmist ni ngan yit’ daken “fare layon nib n’uw bunuen nge fare porchoyog nib ga’.” Fare layon nib n’uw bunuen rib tadamumuw, ma fare porchoyog e sana rib ga’ nib ga’. (Isaiah 31:4) Yugu demtrug rogon feni gel e damumuw ni ma yib ngak fare layon ni bay bunuen lolgen ǹib n’uw ni ngeb nge cham, ma bochan ni gad ma fol rok Got ko bin ni gad ra fol ko girdi’ ni bod ba layon ara ulung ni bod e layon ma aram bod ni gad be yit’ daken. (Acts 5:29) Ma fare “layon” ni ngan ayuw riy e dabi kirebnag e tirok Got ni bay rodad.

18. “Fare porchoyog nib ga’” e ra puguran ngodad murung’agen mini’, ma mang e ba t’uf ni ngada rin’ed u nap’an ni ra cham ngodad?

¹⁸ U lan fare Greek Septuagint, ma “fare porchoyog nib ga’” e yibe pining “fare dragon” ngay. Ma ra puguran ngodad e re n’ey ko “fare dragon nib ga’. . . , ni fare porchoyog ni ke kakrom, ni kan tunguy fithingan ni Moonyan nge Satan.” (Revelation 12:7-9; Genesis 3:15) Ir bod e porchoyog ni rib ga’ ni bay rogon ni nge bilbilig nge rayog ni nge ful’ e n’en ni ke kol. (Jeremiah 51:34) Nap’an ni ra guy rogon Satan ni nge yabachbach ngodad nge dunufdad nga gelngin e mochuch ko re fayleng ney me ful’dad ma ngad pithiged gadad ngad mulgad ma gad yit nga but’ e “re porchoyog ney nib ga’.” (1 Peter 5:8) Piin ni kan dugliyrad e thingara rin’ed ban’en ni aray rogon u nap’an ni ra lebug fare thin u Roma 16:20.

Jehovah​—e Ir Tabolngin e Ayuw ko Yafas Rodad

19. Mang fan ni ngada pared u tan e ayuw ku Jehovah?

¹⁹ Murung’agen e tapigpig nib riyul’, ma kan ta’ e en owchen Got me yog ni gaar: “Bochan nke dag ngog ni gub t’uf rok, mang kugu gagiyegnag ni nge mil rok e toogor rok. Ma gu ra yoror rok ya bochan nke nang fithingag.” (Psalm 91:14, NW) Fare bugithin ni “Gu ra ayuweg” e ri aram fan, “Gu ra tolangnag,” ni aram e dabiyog ni ngan leth ngak. Kadarod ngak Jehovah ni nge ayuwegdad ni gadad e pi tapigpig rok ya bochan ‘kada daged ngak nib t’uf rodad.’ (Mark 12:29, 30; 1 John 4:19) Ma puluwon riy, e ke ‘gagiyegnag ni rayog ni ngada milgad’ rok e pi toogor rodad. Ri dabiyog ni ngan kirebnagdad ngan chuwegdad ko re fayleng ney. Gathi aram rogon ya, gad ra magay nib fas ya bochan ni gad manang fithingan Got ma gad ma pining u fithik’ e michan’. (Roma 10:11-13) Ma ke mudugil lanin’dad ni ‘nguu darod u fithingan Jehovah ndariy n’umngin nap’an.’​—Mikah 4:5; Isaiah 43:10-12.

20. Nap’an ni kan museg fare Psalm 91, ma mang e ke micheg Jehovah ngak e pi tapigpig rok nib yul’yul’?

²⁰ Ma tungun ko Psalm 91, me weliy Jehovah murung’agen e tapigpig rok nib yul’yul’ ni gaar: “Ra piningeg, ma gu fulweg lungun. Ma gu bay rok ko ngiyal’ ni ke gafgow. Baygu ayuweg ma gu ra tolangnag. Baygu pi’ ngak boor e rran nge fel’ rogon riy, ma baygu gagiyegnag nge guy rogon ni nggu ayuweg nge magay nib fas.” (Psalm 91:15, 16, NW) Nap’an ni gad ra pining Got u fithik’ e meybil nib puluw ko tin nib m’agan’ ngay, ma ra fulweg lungudad. (1 John 5:13-15) Kadarod u fithik’ boor e gafgow ya bochan nib adag Satan ni nge gelnag e togopuluw. Machane fare bugithin ni “gu bay rok u nap’an ni keb e gafgow ngak” e be fal’eg rogodad ko skeng ni ra yib ngodad boch nga m’on ma be micheg ngodad ni ra ayuwegdad Got u nap’an ni ran thang e re m’ag nib kireb ney.

21. Uw rogon ni piin ni kan dugliyrad e kan tolangnagrad?

²¹ Yugu aram rogon ni ke togopuluw Satan u fithik’ e damumuw, ma piin ni kan dugliyrad ni yad urngin ni yad bay rodad e yira tolangnagrad u tharmiy u nap’an ni ra taw ko ngiyal’ ni ke dugliy Jehovah​—u tomren “boor e rran” u roy u fayleng. Yugu aram rogon, ma rogon ni ma ayuweg Got ni yira ngat ngay e ke tolangnag e piin ni kan dugliyrad ko tirok Got. Ma kar ni tayfarad ya yibe fanayrad ni ngar pow’iyed boch e girdi’ ni yad e Pi Mich rok Jehovah u roy u fayleng ko ngiyal’ ney ni tin tomren e rran! (Isaiah 43:10-12) Ma ayuw ni th’abi ga’ nra pi’ Jehovah ngak e girdi’ rok e ra buch u nap’an nra yib fare mahl nib ga’ ni fare Armageddon ko ngiyal’ ni nge tolangnag e gagiyeg rok me thothupnag fithingan nib thothup.​—Psalm 83:18; Ezekiel 38:23; Revelation 16:14, 16.

22. Mini’ e ra guy e ‘ayuw nra pi’ Jehovah’?

²² Demtrug ko gadad e piin Kristiano ni kan dugliyrad ara piin ni kar ognaged e yafas rorad ni ba chag ngorad, ma ba pagan’dad ku Got nra ayuweg e yafas rodad. Nap’an “fare rran rok Jehovah ni ri ma karing e marus,” ma piin ni yad be pigpig ku Got u fithik’ e yul’yul’ e ra fas. (Joel 2:30-32, NW) Piin ni yad bang ko fare “ulung ni baga’” nra magaygad nib fas ma ngar pared u lan e bin nib biech e fayleng rok Got mi yad par nib yul’yul’ u nap’an e skeng ni bin tomur e ‘ran pi’ ngorad boor e rran nra fel’ rogorad riy’​—ni aram e yafas ni manemus. Maku ra faseg boor e girdi’ ni kar m’ad. (Revelation 7:9; 20:7-15) Riyul’ nra falan’ Jehovah ni nge ‘gagiyegnag ni ngada guyed u rogon ni ngan ayuweg e yafas’ u daken Jesus Kristus. (Psalm 3:8) Bochan e re athap rodad ney nrib fel’ ni kan ta’ nga p’eowchedad, ma ngada ululgad ni nge pagan’dad ngak Got ni nge ayuwegdad ko uw rogon ni ngad theeged e rran rodad ni fan ni ngan pining e sorok ngak. U daken e thin rodad nge pi n’en ni gad ma rin’, manga yigi da ululgad ni ngad micheged ni Jehovah e ir e en ni be ayuwegdad.

[Footnotes]

Uw Rogon ni Ngam Pi’ e Fulweg?

• Be mang e “gi n’en nib mith ni ma par e en Th’abi Tolang riy”?

• Mang fan ni dabda rusgad?

• Uw rogon ‘ma dabi aw ngodad e buch waathan nib gel’?

• Mang fan nrayog ni nga dogned ni Jehovah ir tabolngin ni ma ayuweg e yafas rodad?

[Picture on page 15]

Ga manang ko uw rogon ma yul’yul’ rok Jehovah e ir fa gin’en nib ga’ ni yima mith nga fon ko cham ni fan ngodad?

[Pictures on page 16]

Ma ayuweg Jehovah e pi tapigpig rok ni ngar wereged e machib nyugu aram rogon ni keb be’ ni nge cham ndan lemnag nge togopuluw ni de mith

[Credit Line]

Cobra: A. N. Jagannatha Rao, Trustee, Madras Snake Park Trust