Deer Ko Piin Ma Bieg

Uw rogon ni rin’ fare porchoyog u lan e milay u Eden me nang Efa fare n’en ni nge th’ab e motochiyel rok Got ni aram fare ke gek’iy ko tamilangan’ ko tin nib fel’ nge tin nib kireb?

Genesis 3:1 e gaar: “Ma porchoyog e ir th’abi llowan’ ko sabanban u fithik’ e gamanman ni Got e ke sunmeg. Me fith fare porchoyog ngak fare pin ni gaar: ‘Riyul’ ni yog Got ngomew ni dab mu koyew waamngin urngin e gek’iy ni ba’ ko gi woldug ney?’” Boor bogi ban’en ni goo kan weliy u rogon ni non fare porchoyog ngak Efa me nang fan. Reb e yibe lemnag ni i yan u yaan ara i fanathin. Ni bod rogon, ni be’ u Ngalis ni reb e tayugang ko teliw ni Joseph Benson e gaar: “Be m’ug nib dake n’en nib ga’ ni yira rin’ e ngan yan nu yaan. Ma boch, e kari, sananag ni tafinay nge welthin e ban’en i rin’ e porchoyog e ngiyal’ nem, . . . machane biney e dariy e mich riy.”

Faanra un yan u yaan ban’en, fa mang, me ere uw rogon ni rayog rok fare porchoyog ni nge guy rogon nge nang Efa ni ra kay fare waamngin e gek’iy ni kan ta’ chilen ni dabni kay me bod Got, nge yog ni i turguy e n’en nib fel’ nge n’en nib kireb? Maku reb, e ki un Efa ko numon, nge fulweg fare deer ni fith fare porchoyog. (Genesis 3:2-5) Faan yira lemnag ni fare porchoyog e rogon ni yog e pi n’enem e sayin ara mithmith u dow me ere ku ra yan i aw ni Efa e fulweg ni ku be fanathinnag, machane amu lemnag i yog e Bible ni non.

Bochan e re n’eney ni buch, me ta’ apostal Paul chilen ko pi Kristiano ni gaar: “Gu be rusnag, ya richey ni bod rogon ni bannag fare porchoyog Efa u feni llowan’ me pingeg lanin’med nge kireb.” Re magawon nem ni be yog Paul e yib ko “apostal ni de riyul’, piin ni yad ma maruweliy ni nge mich u wan’uy ban’en ni de riyul’.” Re magawon nem ni pi’ e “pi apostal ni yad ma lemnag ni sororad” e ra daged e gathi yigoo yan u yaan nge fanathin. Ya ku ba muun ngay e welthin rorad​—nge salap rorad ko thin ni sabanban, ni yima yog ni nge chefeg boch e girdi’ nga bang.​—2 Korinth 11:3-5, 13, NW.

Yugu aram rogon ni welthin e ir e olobochiy Efa u lan e milay u Eden, ma dariy ban’en ni manga be yog ni porchoyog ni riyul’ e bay e gin ni ma yib lunguy riy. Ya bin riyul’ riy e de t’uf rok e pi n’em. Nap’an ni non e engel rok Got ngak Balaam u lugun ba os ni ppin, ma re gamanman nem e dariy rok tagil e gin ma yib lunguy riy u k’ongan ni taareb rogon nga rogon k’ongan e girdi’. (Numbers 22:26-31) Ba gagiyel, ni nap’an ni re ‘gamanman ney ni der ma non ma ke tomal e be non ni bod laman be’ nib moon,’ ma aram e re gelngin nem ni ke buch e yib ko birok e kan e giyow.​—2 Peter 2:16.

Fare kan ni immoy u keru’ fare porchoyog nib mith ni be non ngak Efa e be yog e Bible ni aram “fare porchoyog ni ke kakrom, ni faani kan pining Moonyan’ ara Satan ngak.” (Revelation 12:9) Fapi thin ni yira rungaag ni rungaag Efa me fulweg e yib rok Satan, ni ir e yugu ma “piliyeg ir nga i ngal’ ni ba engel ko tamilang.”​—2 Korinth 11:14, NW.

[Picture on page 19]

“Ma rayog ni ngam bod Got, ngam nang e fel’ nge kireb”