Ngan Chuw Ko Mochuch​—Ragon I Yal’uweg Nib Puluw

“Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed.”​—MATTHEW 11:28.

1, 2. (a) Mang e n’en ni bay ko Bible ni be ayuweg i baudeg e mochuch nib gel? (b) Uw feni ga’ fan e pi n’en i fil Jesus?

SANA ra taareban’um ngay ni mochuch nib gel e ba kireb; ya ra yan i taareb gelngin ko kireban’ nib gel. Fare Bible e be yog ni urngin e tin girdi’ e sunmiy e ba tomal nga malngin bogi ban’en ni be magfan’nag boor e girdi’ ni ke l’agan’rad ngay ni yad be son ni ngan chuwegrad riy ni aram e mochuch ko yafas ko ngiyal’ ney. (Roma 8:20-22) Ma thin u Bible e ku be dag rogon e n’en ni gad be finey ni ngad chuwgad riy ni gafgow nge kireban’ e chiney. Ni aram e re n’enem e ra yib ko fol ni gad ra lek e fonow nge kanawoen ba pagal ni immoy ni gonapan 20 e chibog ni ke yan. Immoy ni ba daykusang, machane bin baga’ riy e rib t’uf e girdi’ rok. Ma non nib fel’ ni ma fal’eg laniyan’ e girdi’, ma ma rin’ e tin nib t’uf rorad, ma ma ayuweg e piin ni meewar me fal’eg laniyan’ e piin ni ke kireban’rad. Ma ka ba’ boch, ki ayuweg e girdi’ ni boor nge yog nra salapgad ko tirok Got ban’en. Ma aram fan ni ra pirieged rogon ni ngar chuwgad ko mochuch nib gel, mus ngom ni ku rayog rom.​—Luke 4:16-21; 19:47, 48; John 7:46.

² Re moon ney, ni Jesus nu Nazareth, e gathi i pow’iyey ko llowan ni yima fil u fayleng ni ma gay boch e girdi’ kakrom u Roma, ngu Athens, ngu Alexandria. Machane, pi n’en i fil e ba gilbuguwan. Ma ba’ kenggin: ni fare am ni ir e bayi fana’ Got nge gagiyegnag nib fel’ rogon e fayleng rodad. Jesus e ki fal’eg i weliy e tin ni ba riyul’ nib ga’ fan ko yafas​—pi n’en nib riyul’ ni bay e chiney. Piin ni mit ngorad mar faned e pin’en i fil Jesus e yad ba falfalan’ nga angin ni keb ngorad, nib muun ngay ni kar pogofangad ko mochuch ni ke pag rogon. Ere dabmu falfalan’ ko re n’em?

3. Mang fare pong nib ga’ ni ke garareg Jesus?

³ Rayog ni nge maruwaran’um. ‘Rayog rok be’ ni rib kakrom ma ka bay angin gelngin ko yafas rog e chiney?’ Mu son, mmotoyil ko n’en ni yog Jesus’: “Mired ngog, ni gimed gubin e piin ni ke aw parowmed i fek e n’en nib tomal ni gimed be fek, mu gu pi’ e toffan ngomed. Mfeked e mat’ rog ngam tiyed nga pomed, mi gimed folwok rog ya gub munguy ma gub sobut’an: mi gimed pirieg e toffan. Ya re mat’ ni gu ra pi’ ngomed e mmom, ma tomalngin e re n’en ni gu ra tay nga pomed e bbaud.” (Matthew 11:28-30) Mang e be yip’ fan? Ngada fal’eged i gay min lemnag e piyu bugithin ney ngad guyed ko uw rogon ni ra ayuwegey ngan pogofan ko mochuch nib gel.

4. Chon mini’ e i non Jesus ngorad, ma mang fan ni piin ur motoyilgad ngak e sana ra pirieged ni n’en ni ka nog ngorad ni ngar rin’ed e ba mo’maw?

⁴ I non Jesus ngak boch e girdi’ ni kar m’ad ni bochan ni yad be guy rogon ni ngar rin’ed e tin nib puluw ko motochiyel machane ka rin “tomalnagrad” ni bochan ni pi tayugang ko piyu Jew e ka ra tayed ni teliw ban’en ni rib tomal. (Matthew 23:4) Kar pared ni yug yad be changar ko motochiyel ni boor ni dabi m’ay ni ba chugur i urngin nochi ban’en ko yafas. Gathi ga ra pirieg nib gel e kankanan riy ni faan yugu ra umu rungaag ni yibe gaar ri “dabmu rin’ e biney” mu rin’ e biney ara binem? Ma rib thil, ya Jesus e i pining e girdi’ ko tin riyul’, nge tin mat’aw, nge yafas nib fel’ rogon ni faan yira motoyil ngak. Arrogon, kanawoen min nang e bin riyul’ e Got e ba muun ngay e ngan motoyil ku Jesus Kristus, ya ir e, rayog​—ni nge—​guy e girdi’ rarogon Jehovah rok. I gaar Jesus: “En ni ke guyeg e ku ke guy e en Chitamangiy.”​—John 14:9, New World Trnslation.

Kaygi Gel e Mochuch ko Yafas Rom?

5, 6. Uw rogon e maruwel nge tolngin puluwon e girdi’ u nap’an Jesus ni kan taareb rogonnag ko tiney e rran?

⁵ Re n’ey e sana ba’ rogon ngom ya goma nga rogon e maruwel rom ara tabinaw rom e kari tomalnigem. Fa ku yugu boch e maruwel e kaygi yoor ara kaygi elmerin ni dabkiyog rom. Faanra aram rogon, ma aram e taareb rogom ngak e pi cha’ ni baaram ni yad ba yul’yul’ ni mada’nagrad Jesus me ayuwegrad. Ni bod rogon, e magawon ko baaray ni nge yog nim par nib gab fas ma ba fel’ rogon e par rom. Boor e girdi’ ni be athamgiliy e pi n’em e chiney, maku boor e girdi’ ni ku aram rogon u nap’an Jesus.

⁶ Nap’an e ngiyal’ nem, ma ra reb e girdien e maruwel ma ma maruwel nib gel ni 12 e awa u lan reb e rran, ma 6 e rran u reb e wik, ma puluwon e taareb e denarius u rebo rran. (Matthew 20:2-10) Uw rogon ni yira taarebnag nga puluwom ara puluwon e piin ni fager rom? Rayog ni ra magawon ni faanra ngani taareb rogonnag puluwey kakrom nga puluwey e chiney. Reb i kanawoen e ngan lemnag rogon e chuway’, n’en ni rayog ni ngan chuwiy ko salpiy. Reb e llowan’ e yog ni nap’an Jesus ma ra reb e lof e flowa nni ngongliy u aningeg e kap e flowa ma gonapan puluwon be’ u reb e awa. Maku reb e llowan’ e yog ni ra reb e kap e ti nib fel’ e wain ma puluwon e nap’an puluwon be’ u l’agruw e awa. Ere rayog nim guy ko pinen kad weliyed ni girdi’ ko ngiyal’ nem e u ra maruwelgad nib n’uw nap’an ma ba gel ni bochan ni nge yog ni u ra pared ni yad ba fas. Ba t’uf rorad ni ngar chuwgad ko gafgow, ngar toffangad ni bod rogodad. Ra ga be maruwel, ma ga be thamiy ni nga kum ngongliy boch ban’en. Baga’ ni bayi n’en madab duda pirieged e tayim ni nge fel’ i lemnag ban’en rodad. Rayog ni mog ni riyul’ ni kamum’ ni bochan ni nga yug mu pogofan boch.

7. Mang e rin’ e girdi’ ni faan rrungaaged e thin ku Jesus?

⁷ Rib tamilang, ni pong ni tay Jesus ngak e piin ni yad be “maruwel nib gel ma kar mak’ gad nga but’” ko mochuch e aram e re n’en th’abi fel’ u wan’ e piin ur motoyilgad ko ngiyal’ nem. (Matthew 4:25; Mark 3:7, 8) Ma nga kum lemnag ni faan ki puthuy Jesus ngay fare n’en ni micheg ni gaar, “gu ra baudegmed.” Re nn’em ni micheg e ku bay angin e chiney. Rayog ni nge buch rodad ni faanra gadad be “maruwel nib gel ma kad tomalgad.” Maku rayog ni nge buch ko piin ni ba t’uf rodad, ni n’en ni yad bam rin’ e ku taareb rogon ngodad.

8. Uw rogon ma chugul bitir nge pillibthir e ku ke peth ko mochuch?

⁸ Ku bay boch ban’en ni ku ma tomalnag e girdi’. Chugul bitir e ku reb e magawon nib ga’. Ki mus ni reb e bitir maku rayog ni ngki mang reb e magawon. Ku ra yoor e girdi’ ko gubin e yangar maku ra bi m’ug reb e magawon ko lem nge dowef. Ma nap’an ni ma nga ra par e girdi’ nib fas nib n’uw nap’an, ma piin ni pillibthir e ku ke mang reb e magawon rorad e nga kun maruweliy nib elmerin, ni dariy fan ni ke mon’og rogon e tafalay.​—Eklesiastes 12:1.

Tan Fare Mat’

9, 10. U nap’an kakrom, mang e n’en be yip’ fan fare mat’, ma mang fan ni pining Jesus e girdi’ ni ngar feked e mat’ rok ngar ted nga porad?

⁹ Kam guy fapi thin ni kan fek ko Matthew 11:28, 29, ni faani yog Jesus ni gaar: “Mfeked e mat’ rog ngam tiyed nga pomed mi gimed folwok rog.” Ngiyal’ nem, e yug girdi’ e bayi n’en ma yad be maruwel ni yad be lemnag ni gowa yad bay u tan e mat’. Re ngiyal’ i n’em kakrom, ma fare mat’ e pow ko sib fa girdi’ ni yibe towasariyrad ko maruwel. (Genesis 27:40; Leviticus 26:13; Deuteronomy 28:48) Boor e tamaruwel e ngiyal’ nem ni mada’nagrad Jesus ni yad be maruwel ni ri bay e mat’ u porad, ni yad be fek bogi ban’en ni ba tomal. Ma yan u rogon nni ngongliy e pi mat’ nem, bay boch nib fel’ ya ba ayal nga daken bilel’uguney nge poy ma boch e ra p’alnag e biyech. Bochan ni ba daykusang, ma rayog ni fal’eg Jesus e mat’, ma ra nang rogon ni nge fal’eg reb nib “munguy.” Sana ra ta’ keru’ e gamanman fa mad ko gin baaram ni ma math nga poy nge bilel’uguney ni nge fel’ rogon nge munguy u bilel’uguney nge poy.

¹⁰ Faani gaar Jesus, “Mu feked e mat’ rog ngam tayed nga pomed,” ma rayog ni be taareb rogonnag ir ngak be’ ni ma pi’ e mat’ nib fel’ rogon ya ba “ayal” nga pon nge bilel’ugun e en be maruwel ngay. Arfan, ni puthuy Jesus ngay ni gaar: “Gilbag e bbaud.” Re n’ney e be yip’ fan ni fare mat’ e de kireb rogon ni ngan maruwel ngay, ma maruwel riy e ku gathi maruwel ko sib. Riyul’, re pong nem ni ke pining urngin e piin ni yad be motoyil ngak ma kar adaged e mat’ rok, e gathi ka chiney e nge pithigey ko urngin e pi magawon ney nge tin ni bay e chiney. Machane, n’en nib thil ni ke dag e ra yibnag e toffan nib ga’. Yad ra fal’eg rogon e par ko yafas rorad nge rogon e ngongol rorad maku yad ra baud. Ma bin th’abi ga’ fan, e tamilangan’ nib fel’ rogon nge athap nib mudugil e ku ra ayuwegrad ngar pirieged e yafas ni ke achig boch e tomal riy.

Rayog nim Pirieg e Toffan

11. Mang fan ni gathi kemus ni be yog Jesus ni ngan thiliyeg e mat’ nga reb?

¹¹ Wenig ngom ngam gu’, ni Jesus e gathi be yog ko girdi’ ni nge pi’ reb e mat’ ni fan nga reb. Yu Roma e ka yad be yog e thin ko re nam nem, ni ku bod rogon e chiney ni am e yad be gagiyeg ko yungi n’en be par e Kristiano riy. Bin som’mon e chibog ma tax ni i fek yu Roma e de mus. Magawon ko dowef nge salpiy e be par ni kargon. Ngongol ni kireb nge denen e ka be gafgownag e girdi’. Machane, rayog ni ngar pirieged e toffan ni faan yad ra fana’ e n’en ni i fil Jesus, ni bod rogon ni ku rayog ngodad ko tiney e rran.

12, 13. Mang e n’en ni be ga’nag Jesus fan ni ir e ra yibnag e toffan, ma uw rogon ni rin’ boch e girdi’?

¹² Reb e n’en ni rib ga’ fan nni fanay ngay fare fanathin rok Jesus ni murung’agen fare mat’ e keb i gagiyel ni fan ko fare maruwel ni yibe pingeg e girdi’ nge mang pi gachalpen Jesus. Dariy e maruwar riy ni kenggin e maruwel rok Jesus e ngan skulnag boch e girdi’ ni ngan ga’nag fan, fare Gil’ilungun Got. (Matthew 4:23) Ere faani gaar, “Mu feked e mat’ rog ngam tayed nga pomed,” ma aram e rib mudugil nib muun ngay ni ngan lek ngan un ngak ko pi n’en be rin’. Rogon ni be dag e n’en kan yoloy ko Gospel e mithmitheg boch e girdi’ ni boor ni yad ba yul’yul’ ni ngar thiliyeged e n’en ni yad ma maruweliy, nib n’en ni rib ga’ fan ko yafas rok e pi girdi’ nem. Mu lemnag fare pong rok ni pining Peter, nge Andrew, nge James, nge John ni gaar: “Mu uned ngog, mu gu fil ngomed rogon i yognag e girdi’.” (Mark 1:16-20) I dag rogon ngak e pi pumoon ni tafita’ nem rogon e falfalan’ ni yad ra tay ni faan yad ra rin’ fare maruwel ni ir e ba m’on ko yafas rok, ni ngar rin’ed u tan e ayuw rok ma ra pow’iyrad.

¹³ Boch e girdi’ ni Jew ni ur motoyilgad ngak e ra nanged fan e n’en be fil Jesus ma ra folgad riy. Mu lemnag yaan e n’en ni buch faram u dap’e ran ni faan kad bieged ko Luke 5:1-11. Aningeg i girdi’ ni tafita’ nib gel e maruwel ni ur ted ni ra fita’gad nib elmerin ni reb e nep ni polo’ ma dar koled ban’en. Ma rib tomgin, ni sug e nug rorad! Re n’ney e gathi yigi buch ya bochan angin e ngongol rok Jesus. Ma nap’an ni ra sapgad nga dap’e ran, mar guyed e girdi’ ni pire’ ni pire’ ni yad be tedan’rad ni ri yad baadag e pi n’en be fil Jesus. Aram e n’en ni ayuweg nge tamilangnag fan fare n’en ni yog Jesus ngak fa aningeg i pumoon ni gaar: “Chiney i yan e ngaram e bay u mu yognaged e girdi’ nib fas.” Ma mang e ra rin’ed? “Ra fulweged fapi boch ko binaw mar digeyed urngin ban’en mar leked.”

14. (a) Uw rogon ni gad ra pirieg e toffan e chiney? (b) Mang e thin nib fel’ ni ra baudnigey ni yog Jesus?

¹⁴ Rogon ri’, e ku rayog nim rin’ ni ku aram rogon. Fare maruwel ni yibe fil ko girdi’ e tin riyul’ ni bay u Bible e ka be yan ni dawori tal. Gonapan nel’ milyon e Pi Mich rok Jehovah u gaangin yang e fayleng e ka ra adaged e pong ni ke tay Jesus ngorad ni ngar “feked e mat’ [rok] ngar ted nga porad”; kar manged “tafita’ ni girdi’ e yad be yognag.” (Matthew 4:19) Bay boch e girdi’ ni ke mang maruwel rorad; ma boch e girdi’ e yad be maruwel ni rogon ni ba m’ag ko tayim nge magawon rorad. Yad gubin ni kar pirieged e toffan, ere yafas rorad e ke achig e mochuch riy. Ba muun ngay ni yad be rin’ e n’en ni yad be falfalan’ ngay, ni aram e yibe yog ngak boch e girdi’ fare thin nib fel’​—“fare thin nib fel’ ni murung’agen fare gil’ilungun.” (Matthew 4:23) Yima falfalan’ ni yima weliy e thin nib fel’ machane rib ga’ ni biney e thin nib fel’. Fare Bible e bay riy e pi n’en nib t’uf rodad ko som’mon ni nge yog ni da micheged ngak boor e girdi’ ni rayog ni ngar pired u reb e yafas nib baud ma ba achig e mochuch riy.​—2 Timothy 3:16, 17.

15. Uw rogon me yib angin ngom e pi fonow ni i tay Jesus u murung’agen e yafas?

¹⁵ Yu ngiyal’, ma mus ko girdi’ ni kafini yigi tabab i fil murung’agen Gil’ilungun Got e keb angin ngorad e pi n’en i fil Jesus u rogon ni nga un par. Boor e girdi’ ni rayog yad ra yul’yul’ nga rogned ni pi n’en i fil Jesus e ke baudegrad ma ke ayuwegrad kar thiliyeged e yafas rorad. Rayog ni nga kum rin’ e re n’em ni fan ngom ni ngam fal’eg i gu’ rogon e pi n’en nib ga’ fan ko par ni rogon ni kan weliy nib fel’ rogon u rogon e yafas ku Jesus nge machib ni i tay, ni rib ga’ ni fapi Gospel ni yoloy Matthew, Mark, nge Luke.

Kanawoen Min Pirieg e Toffan

16, 17. (a) U uw e ga ra pirieg riy bochi kenggin e fonow ni i tay Jesus? (b) Mang e n’en nib t’uf ni fan e ngan pirieg e toffan ni bochan ni yibe rin’ e pi n’en i fil Jesus?

¹⁶ Nap’an e spring ko duw ni 31 C.E., me pi’ Jesus ba welthin nib gilbuguwan u fayleng ke mada’ko chiney. Baga’ ni yima yog ni fare Machib u daken e Burey. Bay ni kan yoloy ko Matthew guruy 5 nge mada’ko 7 nge Luke guruy ni 6, ni be weliy e tin nib ga’ fan ko urngin e pi n’en i fil. Ku rayog nim pirieg boch ban’en ni ki i fil Jesus u lan e pi Gospel nem. Oren e pi n’en i weliy e ba mom ni yira nang fan, machane baaray ni ngan rin’ e rayog ni nge mo’ma’. Mang fan ni dabmu bieg e yu guruy i n’nem nib fel’ rogon, ma ga fal’eg i lemnag fan? Mu pag gelngin e lem rok nge gagiyegnag e lem rom nge ngongol rom.

¹⁷ Ba gagiyel, ni pi n’en i fil Jesus e ba thilthil rogon ni rayog ni ngan yarmiy. Ngada yu ulung naged e tin nib ga’ fan ko pi n’en i fil nge yog ni ra reb e rran ma reb u reb e pul, ma bay reb ni ngam poy ni ngam nameg ni ngam rin’ ara mu fanay e pi n’en kam poy ko yafas rom. Uw rogon? Aram e, dabmu man u daken nib papey. Mu lemnag fare tayugang ni boor ban’en rok ni faani fith Jesus Kristus ni gaar: “Mang e nga gu rin’ me yog e yafas ni manemus ngog?” Ma nap’an ni sul Jesus u daken e tin nib ga’ fan ni thingar ni rin’ ko Motochiyel rok Got, me yog fare pumoon ni goo ke rin’ e tinem. Machane, ka manang ni ka ba’ boch ban’en nib t’uf ni ngki rin’. Me yog Jesus ngak ni nge yoornag i rin’ nib fel’ rogon e tirok Got ban’en nib ga’ fan, ni nge mang reb i gachalpen nib gel ko maruwel. Meni m’ug, ni fare moon e dawori fel’ rogon ni nge maruwel ni aram gelngin. (Luke 18:18-23) Arfan, ni be’ ni baadag ni nge fil e chiney e pi n’en ni i fil Jesus e ba t’uf ni nge nang ni bay e thil u thilin ni nge fel’ u wan’um e pi n’en ni i fil Jesus nge baaray ni ngari nang fan mfini rin’, aray rogon kanawoen me achignag e tomal laniyan’.

18. Mu weliy rogon ni ga ra fanay e n’en bay ko fare kahol ni beer nib fel’ rogon.

¹⁸ Nap’an ni nga fin mu tabab ni ngam fal’eg i gay mag rin’ e pi n’en ni i fil Jesus, me ere mu sap ko bin 1 u lan ere kahol ni beer. Ba sor ko Matthew 5:3-9. Ba mudugil, ni demtrug bagadad ma rayog ni fanay e tayim rok nib ga’ nge fal’eg i lemnag e pi fonow ni felel’ ni bay ko pi verses nem. Ga ra changar ngay ni gaangin, ma mang e ga ra yog ko u rogon e ngongol? Faanra ri ga baadag ni ngam gel ko mochuch nib pag rogon u lan e yafas rom, ma mang e ra ayuwegem? Mang e ra buch rom ni faan ga ra yoornag boch rogon nga mu tayan’um ko tirok Got ban’en, ma ga pag nge mang ir e suguy e lem rom? Bay boch ban’en u lan e yafas rom ni rayog ni mu achignag, ya gathi rib ga’ fan me yog ni mu gelnag boch i tiyan’um ko tirok Got ban’en? Faan ga ra rin’ ni aram rogon, ma ra ga’ boch e falfalan’ rom e chiney.

19. Mang e rayog nim rin’ ni nge gel bochi nang fan rom me gel e tamilangan’ rom?

¹⁹ Chiney e ka bay ban’en ni rayog ni kum rin’. Mang ni dabmu weliy e pi verse ney ngak reb e tapigpig ku Got, nga kum weliyew boch fa be’ ni sana mabgol rom, ara be’ ni gimew tabinaw, fa fager rom? (Proverbs 18:24; 20:5) Dabmu pag talin ni fare tayugang ni boor ban’en rok e ki deeriy be’​—Jesus—​u murung’agen reb e ban’en ni ku bay rogon ko biney. Fare fulweg riy e rayog ni gelnag e falfalan’ rok ko yafas ni manemus. Re tapigpig ni gimew ra weliy e pi verses nem e dabi taareb rogon ngak Jesus; machane, gimew ra weliy murung’agen e pi n’en i fil Jesus maku ra yib angin ngomew ni gimew l’agruw. Mu guy rogon ngam rin’ ni kane’.

20, 21. Mang e n’en ni ba’ ni ga ra fol riy ni ngam fil e pi n’en i fil Jesus, ma uw rogon ni ga ra guy rogon ngam nang rogon e mon’og ni ga be tay?

²⁰ Kum changar biyay ko fare kahol, “Pi fonow ni nge ayuwegem.” Pi fonow ney e kani yu ulungnag ni bochan ni nge reb e rran mmba’ reb ni ngam poy muum fal’eg i lemnag. Som’mon ma rayog nim bieg ko mang e ba’ ni ke yog Jesus u lan e pi verse ni kan mel’eg. Ma ga lemnag rogon e pi thin rok nem. Ma ga lemnag ko uw rogon ni ngam fanay u nap’an e yafas rom. Faanra ga be lemnag ni ga be rin’ ni bod ni ke yog, mu kuum lemnag boch ko mang e ka bay ni ku rayog nim rin’ nguum par ko re fonow ku Got nem. Mu maruweliy nge yog nim fanay e pi fonow nem e rofen nem. Ma faanra be mo’maw rogon i nang fan rom fa rogon ni nge yog nim fanay, mu kum mon’ reb e rran ngay nga kum fil boch. Machane, ngam lemnag, ni gathi nga rim cheg u reb mfin kum man ko bin migid e fonow. Bin migid e rran, ma rayog nim mu lemnag reb e fonow. Tomuren reb e wik, ma rayog ni ngam guy ko uw fene fel’ rogon ni ke yog ni ngam fol u aningeg fa lal ko fapi fonow rok Jesus. Bin l’agruw e wik ma ga puthuy boch ngay, ni rebo rran nge reb. Ma faan ga ra yan mu pirieg ni ke yan boch e fonow ni de yog nim fol riy, ma dabi mulan’um. Urngin e Kristiano ma ma rin’ ban’en ni aram rogon. (2 Chronicles 6:36; Psalm 130:3; Eklesiastes 7:20; James 3:8) Kum ulul ngay nguum fanay e pi fonow nem ko bin dalip e wik nge bin aningeg.

²¹ Tomuren reb e pul fa mang, ma rayog ni kam mu’nag 31 fapi kinggen. Ma yugu demtrug rogon, ma sagonapan uw rogon lanin’um ni rani par ni bochan angin e pi n’en kam rin’ nem? Gathi gowa kam falfalan’ boch, ma sana kam baud boch? Ku yugu ra ba achig e mon’og ni kam tay, ma ga ra thamiy ni ke achig boch e mochuch rom, fa reb e kam nang rogon e n’en nga um rin’ u fithik’ e mochuch, ma kam nang reb e kanawo’ ni rayog ni nga um par riy. Dabmu pag talin ni ka boor boch ban’en nib fel’ ko tin i fil Jesus ni dariy ko tiney. Mang ni dabku mu gaweg mag guy rogon i fanay?​—Filippi 3:16.

22. Mang felngin ni ra yib ni faan yira fol ko pi n’en i fil Jesus, ma mang e ka ba’ nib ga’ fan ni ngan fil?

²² Ke yog nim guy ni mat’ rok Jesus, e yugu aram rogon ni gathi dariy tomalngin, machane riyul’ ni ba munguy. Tomalngin e fonow rok nge ngan mang pi gachalpen e bbaud. Tomuren 60 e duw ni ke yan, ma ke nang ma ke rin’, John ni apostal, ni fager ku Jesus, ni yow ba pach e ki yani taareban’ ngay me gaar: “Ya baaray fan ni nge t’uf Got rodad, fan e ngad folgad ko tin ni ke yog ni ngad rin’ed; ma tin ni ke yog ni ngad rin’ed e gathi rib tomal.” (1 John 5:3, NW) Rayog ni nge taareb rogon e pagan’ romew. Ra i n’uw nap’an ni ga be rin’ e pi n’en ke fil Jesus, ma ga ra pirieg ni pi n’en ni ma k’aring e mochuch ko yafas ko girdi’ ni yoor e chiney e dabki k’aring e mochuch ngom nib gel. Ga ra guy ni kam pirieg ni kam baud. (Psalm 34:8) Machane, ka bay reb e ban’en ko fare mat’ rok Jesus nib fel’ nib t’uf ni ngan lemnag. Ki weliy Jesus murung’agen “nib munguy ma ba sobut’an.” U rogon ni ra m’ag ni faanra ngad filed ban’en rok Jesus ma gad folwok riy? Bin migid e article, e gad ra fal’eg i lemnag e biney.​—Matthew 11:29.

Mang e Fulweg Rom?

• Mang fan ni ngad chelgad ku Jesus u nap’an ni gad be gay e baud ko mochuch ni ke gel?

• Mang e be yip’ fan fare mat’, ma mang fan?

• Mang fan ni pining Jesus e girdi’ ni ngar feked e mat’ rok?

• Ra diin me yog e toffan rok Got ngom?

[Blurb on page 26]

Re bugithin u Bible ni nge fanay e Pi Mich rok Jehovah ko duw 2002 e: “Mired ngog, . . . mu gu pi’ e toffan ngomed.”​—Matthew 11:28.

[Box/​Picture on page 24, 25]

Pi N’en ni Yibe Fil ni Ra Ayuwegem

Mang e pi n’en nib fel’ ni ga ra pirieg ko Matthew guruy 5 nge mada’ ko 7? Pi yu guruy ney e bay riy e n’en ni un fil u barba’ fachi burey nu Galile nib rok fare Masta ko Sensey, ni Jesus. Wenig ngom mu bieg e yuyang ni beer ni kan mel’eg kan yoloy aray u but’, mu bieg ko Bible rom, ma ga fithem ko pi deer nib l’eg ngay.

1. 5:3-9 Mang e n’en be yog e re n’ey ngog u rogon pangig? Ra diin me yog ni nggu maruwel i yan ko falfalan’ nib gel boch? Uw rogon ni nggu tayan’ug boch ko tin nib t’uf rog ni tirok Got ban’en?

2. 5:25, 26 Mang e nen ni kab fel’ ko ngan damumuw fani maluagthin ni bod ni ma rin’ boch e girdi’?​—Luke 12:58, 59.

3. 5:27-30 Mang e n’en i yog Jesus ni i ta’ chilen u murung’agen e lem ni darngal? Uw rogon ni faan gu ra pilo’ ko pi n’em ma ra gel boch e falfalan’ rog nge gapas laniyan’?

4. 5:38-42 Mang fan ni nggu athamgil ni nga gu pilo’ ko pi n’en ni goo be rin’ e girdi’ e chiney nib pag rogon?

5. 5:43-48 Uw rogon ni ra fel’ rogog ko chag ni nga ugu chag ngak e piin ni gu be lemnag ni sana yad e toogor rog? Mang e n’en goma nga rayog ni nge achignag ara chuweg e tinna?

6. 6:14, 15 Faanra yu ngiyal’ ma be dake dabug ni nga gu n’ag fan e kireb ku be’ u wan’ug, ma rayog ni goma nga bochan e awan’ ara damumuw? Uw rogon ni gu ra thiliyeg e re n’em?

7. 6:16-18 Rayog ni nge gel i lemnag rog rogon yaag ko rogon e bin riyul’ i gag? Mang e n’en ni thingar gu fal’eg i lemnag?

8. 6:19-32 Mang angin ni ra yib ni faanra pag rogon i lemnag rog e salpiy nge chugum? Gu be lemnag ko mang e n’en ni ra ayuwegeg nge par nib fel’ malngin e pi n’eney ni nga ugu lemnag?

9. 7:1-5 Uw rogon ni gu ma thamiy ni faanra gu bay u fithik’ e girdi’ ni yad ma turguy rarogon be’ ma ba mo’maw ni ngan chag ngorad, ma ba m’uth owcherad ko kireb ku be’? Mang fan nib ga’ fan ni nga gu palog ni nge dabgu bodrad?

10. 7:7-11 Faanra towasar e ba fel’ u nap’an ni gu be ning ban’en ku Got, me ere uw rogon boch ban’en u rarogon e yafas?​—Luke 11:5-13.

11. 7:12 Yugu aram rogon ni gumanang fare motochiyel ni Golden Rule, uw oren yay ni gu ma rin’ ngak boch e girdi’?

12. 7:24-27 Faanra gag e ba mil fan ngog ni nguugu gagiyegnag e yafas rog, ma uw rogon ni rayog ni gu fal’eg rogog ko ngiyal’ ni ra cham e lang ngog ko gafgow nge kireb nib elmerin? Ma mang fan ni thingar gu lemnag e pi n’ey e chiney?​—Luke 6:46-49.

Ku boch e fonow ni rayog ni gu fal’eg i lemnag:

13. 8:2, 3 Uw rogon ni nga gu dag ni ke kireban’ug ko piin ni gafgow, ni bod rogon ni yigi i rin’ Jesus?

14. 9:9-38 Tamaniyang ko yafas rog e be dag e runguy, ma uw rogon ni gu ra dag boch?

15. 12:19 Gu be fil boch ban’en u murung’agen Jesus, ere gu be athamgiliy ni nguug palog ko maluagthin fa?

16. 12:20, 21 Mang e n’en nib fel’ ni gu ra rin’ ni faanra dab gu kirebnag be’ ko thin rog ara ngongol rog?

17. 12:34-37 Mang e n’en nib ga’ ni gu ma weliy murung’agen? Gu manang ni gu ra udiy ba gurgur, ma logowen e gurgur e ra yib riy nga but’, ere mang ni ngar gu lemnag e n’en ni bay u fithik’ag, u lan gum’erchaeg?​—Mark 7:20-23.

18. 15:4-6 Pi n’en ni i yog Jesus, mang e n’en kug guy riy u rogon e t’ufeg ni nga uni ta’ ko piin ni pilibthir?

19. 19:13-15 Mang e n’en nib t’uf rog ni nga gu fanay e tayim rog ngay ni nga gu rin’?

20. 20:25-28 Mang fan ni dariy felngin ni ngan guy rogon ngeb mat’awuy ni kemus fan ngay? Uw rogon ni ra gu bod Jesus ko re n’ey?

Ku bay bochi, murung’agen ko Mark:

21. 4:24, 25 Mang e baga’ fan u rogon e n’en ni nguug rin’ ngak boch e girdi’?

22. 9:50 Faanra tin gu be yog nge tin gu be rin’ e ba fel’ lamen, ma mang angin nib fel’ ni manga ra yib riy?

Tomuren, e in e fonow ni ba’ ko Luke:

23. 8:11, 14 Faan gu ra pag e magafan’, nge fel’ rogon, nge falfalan’ nge gagiyegnag e yafas rog, ma mang angin ni ra yib riy?

24. 9:1-6 Yugu aram rogon ni ba’ gelngin Jesus ni nge golnag e m’ar, ma mang e ba m’on u wan’?

25. 9:52-56 Ba papey ni ma yib e kireban’ ara damumuw ngog fa? Gu ma palog ko lem ni ngan fulweg taban ban’en fa?

26. 9:62 Uw rogon ni gu ma changar ko maruwel rog ni nga gu weliy murung’agen Gil’ilungun Got?

27. 10:29-37 Uw rogon ni nga gu micheg ni gag be’ ni gub buguli yoror, ma gathi gag be’ u bang?

28. 11:33-36 Mang e pi n’en ni nga gu thiliyeg ko ngongol rog me mom e par rog?

29. 12:15 Mang tha’ ni bay u thilin e yafas ku be’ nge pi n’en ba’ rok?

30. 14:28-30 Faan gu ra fanay e tayim rog nga gu fal’eg i lemnag rogon felngin ni nga gu turguy ni sasafog, ma mang e gu ra pilo’ riy, ma mang angin ni ra yib ngog?

31. 16:10-12 Mang angin ni ra yog ngog ni faan gu ra par ni gub yul’yul’ u nap’an e yafas rog?

[Pictures on page 22]

Fare maruwel ni ma ayuweg e yafas u tan fare mat’ rok Jesus e ma baudegey