“Mfeked e Mat’ Rog Ngam Tiyed Nga Pomed”
1 Boor ban’en ni be magafan’dad ngay ko re fayleng ney, machane ke fel’ lanin’dad ya gad be pirieg e toffan u tan e mat’ rok Jesus. (Matt. 11:29, 30) Ngan fek fare mat’ ko ngan mang reb i gachalpen Jesus e ba muun ngay ba maruwel nib mo’maw machane ku ma pi’ e toffan. Ba muun ngay fare maruwel ni ngan machibnag fare thin nib fel’ u murung’agen Gil’ilungun Got min ayuweg e girdi’ nge yog nra pirieged e toffan u tan e mat’ rok Jesus nib munguy.—Matt. 24:14; 28:19, 20.
2 Ran Un ko Machib Min Pirieg e Toffan: De yog Jesus ngak pi gachalpen ni nge yin’ daken gilbarad nib tomal ni yad be fek. Ke yog ngorad ni ngar feked gilban nib baud nga ron’ed nga luwan gilbarad nib tomal. Dakir tomal lanin’dad ko tin nibe magafan’uy ngay ko re m’ag ney; maku dakrur da maruweliyed nib elmirin ni nge yog e fel’ rogon ngodad. (Luke 21:34; 1 Tim. 6:17) Yugu aram rogon nthingar da maruwelgad ni nge yog e tin nib t’uf ngodad, machane gad ma mon’eg u wan’dad e liyor rodad ku Got. (Matt. 6:33) Faanra rib fel’ rogon ni gad be lemnag e tin nib ga’ fan ban’en, ma gubin ngiyal’ nra ud pirieged e toffan ko machib ni gad be tay.—Fil. 1:10.
3 Gadad baadag ni gad ma weliy e tin ni bay u gum’erchadad. (Luke 6:45) Urngin e Kristiano mab t’uf Jehovah rorad nge pi tow’ath ko Gil’ilungun ni ke micheg. Ere rib fel’ ni ngad weliyed murung’agen fare “thin nib fel’” ma gad tay nga tomur e tin ni be magawonnag lanin’dad u nap’an ni gad be un ko machib! (Rom. 10:15) Ma riyul’ ni faanra ud rin’ed ban’en ni gubin ngiyal’ ma gad ra salap riy, maku ra gel e falfalan’ rodad. Ere, gad ra tay e tayim ni boor ni fan ko machib, ma ra yibnag e toffan ngodad. Ma rra fel’ lanin’dad u nap’an nra adag e girdi’ e machib ni gad be tay! (Acts 15:3) Mus ko ngiyal’ ni kad mada’naged e togopuluw, ma rayog ni ngad pirieged e toffan ni faan gad ra tay u lanin’dad ni athamgil ni gad be tay e be felan’nag Jehovah ma angin nib fel’ nra yib riy e bochan e be tow’athnagdad.—Acts 5:41; 1 Kor. 3:9.
4 Ra yib e felfelan’ ngodad ni faan gad ra un ngak Jesus nguud maruwelgad u taabang ni gad e Pi Mich Rok Jehovah. (Isa. 43:10; Rev. 1:5) Dariy ban’en ni kab gel e toffan riy ko re n’ey!