Yafas u Tan Gelngin e Superstition

KAM marow ni ngam chafin gow be’ u nap’an ni kam chuw u tabinaw rom. Ke tun buguli em ko malang. Ba mit e arche’ ni ma yor ni nep’. Lik’ay ni be sulsul u daken. Pi n’eney, e yug gathi bay rogon maku dariy ban’en ni manga yira maadad riy u wan’ boch e girdi’. Machane boch e girdi’ ko gin Ngal u Africa, e pi n’eney e yad ma changar ngay ni boch e pow, fapi n’en ni nge buch, ara thin ni ke yib ko birok e kan e giyow. Ni reb fel’ waathan fa fan ko gafgow ni ba yib ni be yan u rogon e pow riy nge rogon ni kan lemnag fan.

Superstition, e riyul’, ni ku bay u wuru’ yu Africa. Dariy fan ni ke yoor e duw ni kar pired ko yungin ni de mich Got u wan’uy riy, ya yira gin nga oren e girdi’ u China nge girdi’ ko gin ni un nog e Soviet Union ngay ko som’mon ni ri kab mich u wan’rad e superstition. Ma tin baaray e nam nga ngalngin e fayleng, e boor i yad e ma yan i guy e horoscope rorad, ni bod e Biernes ni ke puluw ko 13 fene pul, ma kiy ma guy rogon ni ngan pilo’ ko gatuw ni talumor. Boch e girdi’ aram nga palog ko lel’uch ko fayleng e yad ma lemnag fare n’en ma mat ko lel’uch ni ba pow ko mahl nge m’ar nib pey ni maaf. U India, e ke garer e AIDS riy ni bochan e piin ni ma yannag fapi karo ni gagang’ ni ma mich u wan’rad nib t’uf ni ngar pired e ppin ni bochan ni nge par e garbed u dowrad nib fel’ rogon ko yu rran nib gel e gawel. U Sapan, e piin ni yad ma maruwel ko kanawo’ ni yan u tan e but’ e ma mich u wan’rad ni ra yib e buch waathan ni faan ra yan be’ ni ppin nga lan u m’on ni nge may. Superstition e ku bay ko gosgos ni kan yarmiy. Reb i gothon e volleyball e yog ni bochan ni ma chuw ko sitokin nib talumor ma gathi wech wech ma aram fan ni i gel. Pi n’eney e ri ka boor ni dabi mus.

Me gur uw rogom? Sana bay ban’en nib mith, ni ban’en ni ga be tamdag ngay ni dabiyog ni ngan weliy rogon? Ke magawonnagem ba “michan’, ara ba ngongol ni be m’ug ni dariy ban’en ni fan”? Rogon e fulweg rom e ra dag ko yafas rom e be gagiyegnag e superstition fa danga’. Ya aram rogon reb e thin ni be weliy ni ireram fan e “superstition.”

Be’ ni ma pag e superstition nge suwey e tin be lemnag nge n’en ni ma rin’ ni yu rran e aram e ke pag ir nga i gagiyegnag ban’en ni gathi rim nang fan. Ba fel’ e re n’eney? Ere thingarda pied gadad nga ban’en ni dan nang fan ni ra yog ni gelngin e kireb? Ere superstition e dariy e riya’ riy fa ban’en ni bay e riya’ riy?