“Um Pared Ni Gimed Be Dag E Ngongol Nib Fel’ U Fithik’ E Pi Nam”
“Mi gimed liyor ngak urngin mit i girdi’, mi gimed t’ufeg fare ulung i walag ni polo’.”—1 PETER 2:17, NW.
1, 2. (a) WMang e ke yog be’ ni girdien e shimbung u murung’agen e Pi Mich Rok Jehovah? (b) Mang fan ni Pi Mich Rok Jehovah e yad ma athamgil ni ngar folgad ko kenggin e motochiyel nib mo’maw ni ngan rin’?
BOCH e duw ni ke yan, ma reb i girdien e shimbung ni be’ nu Amarillo, Texas, U.S.A., e ke yan i guy fapi galesya nib thilthil ko re binaw nem me weliy e n’en ni ke pirieg riy. Ma reb e ulung e ke guy nib thil. Me yog ni gaar: “U lan dalip e duw, ma gu ma un ngak e Pi Mich Rok Jehovah ko pi convention rorad ni yima ta’ u Amarillo Civic Center. Ngiyal’ ni gu ma un ngorad, ma dariy taab yay ni ku guy be’ ni be tamagow, ara be bing baley e biya, ara be yaba’. Yad e piin nth’abi klin, nge th’abi fel’ pangirad, ma de pag rogon e munmad rorad, ma yad e tin som’mon e girdi’ ni kug mada’nag ni ba felfelan’.” Thin ni aram rogon u murung’agen e Pi Mich Rok Jehovah e ke yoor ni yima yoloy murung’agen. Mang fan ni piin nib thil e teliw rorad e ri yad ma n’uf murung’agen e Pi Mich?
2 Baga’ ni, yima yog e thin nib fel’ u murung’agrad ya bochan pangiyrad ni ba fel’. Yugu aram rogon ni tin ma rin’ e girdi’ e be kireb i yan, ma Pi Mich Rok Jehovah e be lemnag ni mil fan ngorad ni ngar folgad ko kenggin e motochiyel, ya aram bang ko liyor rorad. Yad ma nang ni ngongol rorad e ra k’aring yugu boch e girdi’ ni ngar lemanaged ban’en u murung’agen Jehovah nge pi walagrad ni Kristiano ma ngongol rorad nib fel’ e ra gagiyelnag e tin riyul’ ni yad ma machibnag. (John 15:8; Titus 2:7, 8) Ere ngada guyed, ko uw rogon me yog ni par ni gad be dag e ngongol nib fel’ ma aram e gad be ayuweg ni nge par thin Jehovah nib fel’ nge Pi Mich Rok ma nge rogon ni ra fel’ rogodad riy.
Tabinaw ni Kristiano
3. Ba t’uf ni ngan ayuweg e tabinaw ni Kristiano rok e mang?
3 Ngad lemnaged e ngongol rodad u lan e tabinaw. Fare babyor ni Die Neuen Inquisitoren: Religionsfreiheit und Glaubensneid (Fapi Inquisitor nib Biech: Puf Rogon ko Teliw nge Awan’ ko Tilew), ni Gerhard Besier nge Erwin K. Scheuch e kar yoloyew, ni yow be gaar: “Rogon ni be lemnag e [Pi Mich Rok Jehovah] ni fare tabinaw e ban’en nrib t’uf ni ngan ayuweg.” Riyul’ e pi thin nem, ya ke yoor e magawon e chiney ni rib t’uf ni ngan ayuweg e tabinaw riy. Bay e piin bitir ni “dabkur folgad ko gallabthir rorad” nge piin ni kar ilalgad ni “dabkur runguyed e girdi’” ara piin ni “dar ma t’ar lanin’rad.” (2 Timothy 3:2, 3) Fapi tabinaw e ir e gin ke mang tagil e cham ko mabgol, nge gallabtir ni be gafgownag ara be dariyfannag e pi fakrad, nge piin bitir ni ma togopuluw, ma ke l’ag ko drug nib pag rogon nge ngongol ni darngal, ara yad ma mil ngar digeyed e tabinaw rorad. Urngin e pi n’ey e ke kireb nbochan ‘fare nifengin e fayleng’ ni be suruy lanin’uy. (Efesus 2:1, 2) Ba t’uf ni ngad ayuweged e tabinaw rodad ni dabi gel e re lem nem. Uw rogon? Ngan fol ko fonow rok Jehovah nge tin be pow’iy ni nge rin’ girdien e tabinaw.
4. Chon e tabinaw ni urngin e mang e ke mil fan ngorad ni ngar rin’ed ni fan ngak urngin e girdi’ riy ni be’ nge be’?
4 Yu wu i mabgol ni Kristiano e yad manang ni ra bagayad mab mil fan ngak ni nge ayuweg e ani mabgol rok ko tin baadag laniyan’, nge tirok got ban’en, nge tin nib t’uf ko dowef. (1 Korinth 7:3-5; Efesus 5:21-23; 1 Peter 3:7) Pi Kristiano ni gallabthir e bay e maruwel rorad nib gel ni fan ko pi bitir rorad. (Proverbs 22:6; 2 Korinth 12:14; Efesus 6:4) Ma piin bitir ni be ilal i yan u lan e tabinaw ni Kristiano, e yad ra nang ni ku bay boch e maruwel ni thingara rin’ed. (Proverbs 1:8, 9; 23:22; Efesus 6:1; 1 Timothy 5:3, 4, 8) Rogon ni ngan lebuguy e pi maruwel u lan e tabinaw e bat’uf ni ngan maruwel nib elmerin, nge lem nib mudugil, nge ngan dag e t’ufeg ko tirok Got ban’en nge pag fan. Machane, nap’an ni ra lebuguy chon e tabinaw e maruwel ni ke pi’ Got ngorad ma aram e yad ra flaab nge girdien e ulung. Tin kab ga’ fan riy, e yad be liyor ko en Tabolngin e tabinaw, i Jehovah Got.—Genesis 1:27, 28; Efesus 3:15.
Fapi Kristiano ni Yad Walag
5. Mang taw’ath e ra yog ngodad ko bin ngad chaggad ngak e pi walagdad ni Kristiano?
5 Gadad e piin Kristiano, e ku bay e maruwel rodad ni fan ngak e pi walag u lan e ulung, ma tomur riy, e fan ngak e piin ni yad bang ko “ulung ko . . . pi walag u ga’ngin yang e fayleng ni polo’.” (1 Peter 5:9) Tha’ u thildad nge girdien e ulung e baga’ fan ni fan ni nge mon’og ko tirok Got. Nap’an ni gad ra chag ngak e pi walagdad ni Kristiano, ma rayog ni ngara pied e athamgil nga lanin’dad ma ku arrogon fare ggan nib spiritual nib fel’ ni yib rok “fare tapigpig nib yul’yul’ mab gonop” ni ma ayuwegdad. (Matthew 24:45-47) Faanra bay e magawon rodad, ma rayog ni nga darod ngak e pi walagdad ni ngar pied e fonow ngodad nib fel’ nni fek ko kenggin e motochiyel u Bible. (Proverbs 17:17; Eklesiastes 4:9; James 5:13-18) Nap’an ni ra bay ban’en nib t’uf rodad, ma dabi pagdad e pi walagdad. Uw feni gel e falfalan’ rodad ni gadad bang ko ulung rok Got!
6. Uw rogon ni dag Paul ni bay ban’en ni ke milfan ngodad ni fan ngak yugu boch e Kristiano?
6 Machane, gathi gad bay u lan e ulung ni kemus ni fan ni nge yog boch ban’en ngodad; ya ba t’uf ni ngad pied boch ban’en ngorad. Arfan ni yog Jesus ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) I gagiyelnag Paul ni apostal fare ngongol ni pi’ ban’en ngak be’ u nap’an ni yoloy ni gaar: “Ere ngad chichiyed pa’dad ko re n’en ni ir e ke l’agan’dad ngay ni ir e gadad be weliy murung’agen, ya ba pagan’dad ngak Got nra rin’ e tin ni ke yog. Ere nge bagadad ma ngi i lemang bagadad, ma nge bagadad ma ngi i ayuweg bagadad ma be dag ngak nib t’uf rok ma be rin’ e tin nib fel’ ngak. Ma ngad guyed rogon ndabda paged e muulung rodad, ni bod rogon ni be rin’ boch e girdi’. Ma nge bagadad me pi’ e athamgil nga laniyan’ bagadad, ngari gel ni fan e gimed be guy ni Chirofen ni bay yib Somol riy e be chugur.”—Hebrews 10:23-25.
7, 8. Uwrogon ni ngad daged ni gad baadag ni ngad pied ban’en u lan e ulung rodad nge ngak e piin Kristiano u yu yang?
7 U lan e ulung, ma gad “ma machibnag e athap rodad” u nap’an ni gad ra pi’ e fulweg u nap’an e muulung rodad ara gad ra un ko yugu boch ban’en ni yima rin’ riy. Ma mutrug ni pi’ n’en nem e ra pi’ e athamgil nga laniyan’ pi walagdad. Maku gad ma pi’ e athamgil nga lanin’rad u nap’an nra ud sabethingad u m’on nge tomren e muulung. Ireray e tayim ni rayog ni ngad gelnaged laniyan’ e en meewar, ma ngad fal’eged laniyan’ e en ni be mochuch, nge en nib m’ar. (1 Thessalonika 5:14) Piin Kristiano nib yul’yul’ e re yad ba gol ko re wo’ ney, ma arfan ni ri boor e girdi’ ni kar uned ko muulung rodad ko yay ni som’mon ma kar felfelan’gad ko t’ufeg ni kar guyed u fithik’dad.—Psalm 37:21; John 15:12; 1 Korinth 14:25.
8 Yugu aram rogon, ma t’ufeg rodad e gathi ke mus ni fan ko ulung rodad. Ba muun ngay e pi walagdad u ga’ngin e fayleng ni polo’. Arfan ni urngin e Kingdom Hall ma bay e contribution box riy ni fare Kingdom Hall Fund. Sana fare Kingdom Hall rodad e kab fel’ rogon, machane bokum biyu’ e pi walagdad u yugu boch e nam ndariy e gin nib fel’ ni ngar muulunggad riy. Nap’an ni gad ra pi’ boch e salpiy nga Kingdom Hall Fund, ma gad be dag e t’ufeg rodad ngak boch e girdi’ nyugu aram rogon ni daworda nanged owcherad.
9. Ri mang fan ni Pi Mich Rok Jehovah e yad be par nib t’uf bagayad rok bagayad?
9 Mang fan ni Pi Mich Rok Jehovah e ba t’uf bagayad rok bagayad? Ya Jesus e ke tay chilen ngorad ni ngar rin’ed e n’en ni aram rogon. (John 15:17) Ma rogon ni bagayad e ba t’uf rok bagayad e aram e mich riy ni kan ni thothup rok Got e be maruwel u dakenrad ni be’ nge be’ nreb e ulung. T’ufeg e bang ko “fare woomengin e kan ni thothup.” (Galatia 5:22, 23) Bochan ni Pi Mich rok Jehovah e yad ma fil e Bible, ma yad ma un ko muulung ni Kristiano, ma yad ma meybil ngak Got ni gubin ngiyal’, ma aram fan ni yug ma yib e t’ufeg ngorad nyugu aram rogon ni yad be par ko fayleng ni ‘baga’ ni girdi’ riy e ke war e t’ufeg rorad.’—Matthew 24:12.
Ngan Rin’ Ban’en ni Fan ko Re Fayleng Ney
10. Mang maruwel ni ke mil fan ngodad ni fan ko re fayleng ney?
10 Ngiyl’ ni weliy Paul ni ngad “machibnaged e athap rodad ngak e girdi’ ni yoor” ma be puguran’ ngodad yugu reb e maruwel nib mil fan ngodad. Re machib ney ni fan ko yoor e ba l’ag ngay fare maruwel ni ngan machibnag fare thin nib fel’ ngak e girdi’ ni dawor ra manged pi walagdad ni Kristiano. (Matthew 24:14; 28:19, 20; Roma 10:9, 10, 13-15) Re maruwel n’ey e ku yugu reb e kanawo’ ko pi’ ban’en ngak be’. Rogon ni nge un be’ ngay e ba t’uf e tayim rok, nge gelngin, ma nge fal’eg rogon, ma nge fil ban’en, ma nge fanay boch ban’en ni bay rok. Yugu aram rogon, mi yoloy Paul ni gaar: “I gag e thingar gu ayuweg e girdi’ ko pi nam, ni piin ni kar mon’oggad nge piin ndawor, nge piin ni yad ba skul nge piin ndar skulgad. Aram fan ni gub adag ngku gu machibnag e Thin Nib Fel’ ni yib rok Got ngomaed e piin ni gimed ma par u Roma.” (Roma 1:14, 15) Ni bod rogon Paul, ni ma nga yug uda thanged e re “malfith” ney.
11. Mang l’agruw e kenggin e motochiyel u Bible e be gagiyegnag e tha’ u thildad nge fare fayleng, machane mang e kad nanged riy?
11 Ka bay e maruwel nib mil fan ngodad ni thingarda rin’ed ni fan ngak e girdi’ ndawori michan’rad fa? Riyul’ ni ba’. Riyul’ ni kad nanged ni “fare fayleng ni polo’ e be par u tan gelngin faanem nib kireb.” (1 John 5:19) Gad manang ni ke yog Jesus ngak pi gachalpen ni gaar: “Gathi yad e girdi’ nu roy u fayleng ni bod gag ni gathi gag e girdi’ nu fayleng.” Yugu aram rogon, ma ka gadad be par u fayleng, ma ka gad be un ko maruwel riy, ma yima pi’ boch e ayuw ngodad riy. (John 17:11, 15, 16) Ere bay boch e maruwel ni thingarda rin’ed ni fan ko re fayleng ney. Mang e pi n’en ney? Peter ni apostal e i fulweg e re deer nem. Dawori n’uw nap’an u m’on ni kan gothey Jerusalem, me yoloy reb e babyor ni fan ko Kristiano ni ma par u Asia Minor, ma bang ko re babyor nem e ra ayuwegdad ni nge par e tha’ u thildad nge fayleng nib thabthabel.
12. Uw rogon ma piin Kristiano e yad bod e “girdi’ nu bang ni ma par ni ba’ n’umngin nap’an,” ma bochan e re n’ey, mang e dabda uned ngay?
12 Som’mon, i yog Peter ni gaar: “Pi tafager rog, ri gu be wenig ngomed, ya gimed e milekag ni kam bad ngaray nga fayleng! Dab mu paged gimed ngak e tin ni be yim’ e dowef romed ni bochan, ni gubin ngiyal’ ma be cham ngak lanin’med.” (1 Peter 2:11) Tin riyul’ e Kristiano e bod e “girdi’ nu bang ma ma par ni ba’ n’umngin nap’an” ya bochan yad ma tiyan’rad ko athap ko yafas ni dariy n’umngin nap’an—ni piin ni kan dugliyrad ko kan ni thohtup e yad ra yan nga tharmiy ma “yugu boch e saf” e bay ra pared u paradis u fayleng boch nga m’on. (John 10:16; Filippi 3:20, 21; Hebrews 11:13; Revelation 7:9, 14-17) Ere, mang e tin ni be yim’ dowdad nbochan? Ba muun ngay e tafinay ni ngari yoor ban’en rok be’, ara nge gilbuguwan, nge arar ko darngal, nge tafinay ni ka nog e “awan” ngay nge “chogow.”—Kolose 3:5; 1 Timothy 6:4, 9; 1 John 2:15, 16.
13. Uw rogon ma tin ni ke yim’ e dowef rodad nbochan e be “cham ngak e yaal [rodad]”?
13 Riyul’ ni tafinay ni aram rogon e “be cham ko yaal [rodad].” Ma ma kirebnag thildad Got ma ma magawonnag e athap rodad (“yaal” rom, ara yafas). Ni bod ni, faan gad ra maruweliy ni nge gel e arar rodad ko ngongol ni darngal, ma uwrogon ni ngada pied gadad ni “maligach nib fas, mab thothup, ma gad fel’ u wan’ Got”? Faanra kad awgad ko fare wup ni chogowen e chugum, ma uw rogon ni ngad “m’oneged u wan’dad e gagiyeg rok Got”? (Roma 12:1, 2; Matthew 6:33; 1 Timothy 6:17-19) Rib fel’ ni ngan fol ko tin ni rin’ Moses, ma ngad pied keru’dad ko tin ma ognag fare fayleng, ma ngada m’onneged ko yafas rodad e pigpig ku Jehovah. (Matthew 6:19, 20; Hebrews 11:24-26) Ireray e n’en ni baga’ fan ni faanra nge par e tha’ u thildad nge fayleng nib thabthabel.
‘Ngi i Par e Ngongol nib Fel’’
14. Mangfan ni ngad athamgilgad ni ngad daged e ngongol nib fel’ ni gadad e Kristiano?
14 Maku reb nra pow’iyey nib ga’fan e yira pirieg ko bin migid e thin ni yog Peter ni gaar: “Ma susun e ngar um pired u fithik’ e piin ndar nanged Got nib fel’ pangimed, ya nga rogned nib kireb e ngongol romed, me Chirofen ni sul Kristus riy mi yad guy nga owcherad nib fel’ e ngongol romed, ma aram mi yad yog e sorok ngak Got.” (1 Peter 2:12) Ngada athamgilgad ni ngad daged e tin nib fel’ ni rogon e Kristiano. U skul ma ngada filed ban’en nib elmerin. U tabon e maruwel, ma ngad maruwelgad nib gel ma nguud yul’yulgad—nyugu aram rogon ni be m’ug ni masta rodad e de thabthabel laniyan’. U lan reb a tabinaw ni ke yoor raba’, ma ani figirngiy ara leengiy ni ke michan’ e ngar athamgil ni nge fol ko kenggin e motochiyel ko Kristiano. Gathi ban’en nib mom ni ngan rin’, machane gad manang ni ngongol rodad nib fel’ e ra felfelan’nag Jehovah ma baga’ ni ra yib angin nib fel’ ngak e girdi’ ni gathi yad Pi Mich.—1 Peter 2:18-20; 3:1.
15. Uwrogon ni gad ra nang ni rogon ni ma dag e Pi Mich Rok Jehovah e ngongol nib mo’maw’ ni ngan fol riy e ri yimanang?
15 Angin ni ke yib ngak e Pi Mich Rok Jehovah ni nbochan ni yad be par ni yad be dag e ngongol nib fel’ e rayog ni ngan guy ko thin ni kan wereg u murung’agrad ni kan yoloy u lan fapi duw ni ke yan. Ni bod ni, fare shimbung ni Il Tempo nu Italy e ke yog ni gaar: “Girdi’ ni bay e Pi Mich Rok Jehovah ni yad be maruwel u taabang e be weliy murung’agrad ni yad e piin ta maruwel nib yul’yul’, ma ri be pagan’rad ko teliw rorad ni be m’ug ni goo ir e yad be lemnag ni gubin ngiyal; yugu aram rogon, thingar ni tay farad nbochan e yad ba yul’yul’.” Fare shimbung ni Herald u Buenos Aires, Argentina, e ke yog ni gaar: “U lan e pi duw ni ke yan ma Pi Mich Rok Jehovah e kar daged ni yad e girdi’ ni ta maruwel, ma yad ma tiyan’rad ko tin yibe rin’, ma da ra adbeyed ban’en, ma yad e girdi’ ni bay madgun Got u wan’rad.” Reb e scholar ni be’ nu Russia ni Sergei Ivanenko fithingan e yog ni gaar: “Pi Mich Rok Jehovah e yimanangrad u fayleng ni polo’ ni yad e girdi’ ni ri yad ma fol ko motochiyel ma ri yad ma dag e ngongol nib fel u rogon ni yad ma pi’ e tax rorad.” Ani ga’ ko reb e naun nib ga’ u Zimbabwe ni ke fanay e Pi Mich Rok Jehovah ko convention rorad e yog ni gaar: “Ku guy boch e Pi Mich ni yad be fen boch e babyor ma yad be klinnag e kolosis. Fa gin ni yima dag yaan ban’en riy e kan klinnag ni ka ri biech ko kafram. Piin nib fel’yangaren romed e bay kenggin e motochiyel rorad. Gu be athapeg ni ma nga yigi sug e fayleng ko Pi Mich Rok Jehovah.”
Kristiano e Nge Par u Tan Pa’ Be’
16. Mang e tha’ u thildad nge girdien e am, ma mangfan?
16 Maku be yog Peter murung’agen e tha’ u thildad nge girdien e am. Be yog ni gaar: “Bochan Somol ma aram fan ni ngam folgad rok urngin e piin ni yad be tay murung’agen e girdi’; ni aram e en ni pilung ni ga’, nge pi am, ni en ni pilung e l’ograd ni ngar gechigniged e piin nib kireb e ngongol rorad mi yad yog e sorok ngak e piin ni yad be ngongliy e ngongol nib fel’. Ya baaray e n’en nib m’agan’ Got ngay: ba adag ni ngam th’abed gulungan e piin ni balyang ndar nanged fan e n’en ni yad be yog, ni ngam th’abed gulungrad ko ngongol nib fel’ ni gimed be rin’.” (1 Peter 2:13-15) Gad be pining e magar ko taw’ath ni ke yib ngodad nbochan e am nib yaram, ma bochan e thin rok Peter ni be powiydad, ma ngad folgad ko pi motochiyel ma ngad pied pulowon e tax rodad. Yugu aram rogon ni gad ma tayfan mat’awun e am ni ke pi’ Got ni ngar gechignaged e piin ni ke th’ab e motochiyel, ma kenggin i fan ni gad ma par u tan e am ko girdi’ e “bochan Somol.” Ireray e tin nib m’agan’ Got ngay. Maku reb, dabudad ni nge kireb fithingan Jehovah ni bochan ni kan gechignagdad ko kireb ni kada rin’ed.—Roma 13:1, 4-7; Titus 3:1; 1 Peter 3:17.
17. Nap’an ni nge togopuluw ngodad e piin “de thabthabel lanin’rad”, ma mang e rayog ni ngad pagedan’dad ngay?
17 Bay e kireban’ riy, ya boch e girdien e am “nde thabthabel lanin’rad” e ma gafgownagdad ara ma togopuluw ngodad u yugu boch e kanawo’—ni bod ni ur wereged e thin nde riyul’ nib togopuluw ngodad. Yugu aram rogon, nap’an nra taw ko Tayim ni ke dugliy Jehovah, ma yira nang e ban rorad, ma thin ni yad ma yog “ndariy fan” e yira th’ab gulungrad riy. Ma ngongol nib fel’ ni kad rin’ed e ra m’ug ko mini’ e ke yog e thin riyul’. Arfan ni girdien e am nib yul’yul’ e baga’ ni ma yog ni gadad e girdi’ ni ma rin’ e tin nib fel’.—Roma 13:3; Titus 2:7, 8.
Pi Sib Rok Got
18. Uw rogon ni ngad siyeged ni dabda fanayed mat’awdad ni ngad mel’eged ban’en nib pag rogon ya gadad e Kristiano?
18 Chiney be ginangey Peter ni gaar: “Ngam boded e girdi’ nib puf rogorad, machane ngam chaariyed e puf rogon ni bay romed, ni gathi ni fan ni ngam upunguyed e tin nib kireb, machane ngam manged pi sib rok Got.” (1 Peter 2:16, NW; Galatia 5:13) Chiney, e tamilangan’ rodad ko thin riyul’ u Bible e ke pithigdad ko machib ko pi teliw nde riyul’. (John 8:32) Maku reb, ba puf rogodad, ma bay mat’awdad ni ngad mel’eged ban’en. Yugu aram rogon, dabda fanayed mat’awdad nib pag rogon. Nap’an ni gad ra mel’eg e girdi’ ni ngad chaggad ngorad, nge rogon e mad rodad, nge rogon ni ngad fal’eged yaadad, nge fafel ni ngad uned ngay—ni mus ko ggan nge garbod—e ngad lemnaged ni tin riyul’ e Kristiano e yad e pi sib rok Got, ni dabra folgad ko tin ni baadag dowrad. Ngad duguliyed ni ngad pigpiggad ngak ma dabda paged ni ngad manged sib ko tin ni be yim’ dowdad nbochan ara tin ni ri ma fanay e fayleng.—Galatia 5:24; 2 Timothy 2:22; Titus 2:11, 12.
19-21. (a) Uw rogon u wan’dad e piin ni bay ko liw ko am? (b) Uw rogon ni ke dag boch e girdi’ e “t’ufeg rorad ngak e pi walag u fayleng ni polo’”? (c) Mang e maruwel rodad ni rib th’abi ga’fan?
19 Me ulul Peter ngay ni gaar: “Mi gimed ta’ fan urngin e girdi’, ma nge t’uf romed e pi cha’ ni gimed ni ke mich Got u wan’rad, mi gimed ta’ fan e en ni ir e pilung ni ga’.” (1 Peter 2:17) Bochan ke pag Jehovah Got ni nge yog ngak e girdi’ e liw nib thilthil, ma ngad daged ngak e pi cha’ nem e ta’fan ni ra be’ ma rogon nib puluw ngak. Maku ngada meybilgad ni fan ngorad nibochan ni ngar paged gadad ni ngad ululgad ko machib u fithik’ e gapas ngu fithik’ e yul’yul’. (1 Timothy 2:1-4) Machane, ku gad ra dag e “t’ufeg rodad ni fan ngak e pi walagdad u fayleng ni polo’.” Gubin ngiyal’ ni ngad maruweliyed e tin nib fel’, ma gathi tin ni ra kirebnag, pi walagdad ni Kristiano.
20 Ni bod, u nap’an reb e nam nu Africa ni ke yoor raba’ nbochan e cham ni i ta’ e girdi’ u rom, ma ke gagiyel e ngongol ko Kristiano ni ma dag e Pi Mich Rok Jehovah. Fare shimbung ni Reformierte Presse u Switzerland e yog ni gaar: “Nap’an e duw ni 1995, ma fare ulung ni African Rights . . . e kara micheged murung’agen urngin e teliw ni kar uned ko [cham] ni goo Pi Mich Rok Jehovah e dar uned ngay.” Nap’an ni kan wereg nga yugu boch e nam e thin u murung’agen e tin ke buch ni ri ma k’aring e kireban’, ma Pi Mich Rok Jehovah u Europe e rib papey ni kar pied boch e ggan nge falay ngak e pi walagrad nge boch e girdi’ ni ur moyed ko binaw ni kar gafgowgad. (Galatia 6:10) Kar folgad ko thin ni bay ko Proverbs 3:27 (NW) “Dab mu taleg ni ngam pi’ e tin ffel’ ngak e en ni nge yan ngak, u nap’an ni bay gelngin u paam ni gur e ngam rin’.”
21 Machane, ka bay ban’en ni kab ga’fan ko tayfan ni gad ra dag ngak girdien e am nge t’ufeg ni thingarda daged ngak e pi walagdad. Be mang e re n’en nem? I yog Peter ni gaar: “Nge yib madgun Got u wan’um.” Kab boor e malfith ni kad ted ngak Jehovah ko malfith ni kad ted ngak e girdi’. Uw rogon? Ma uwrogon ni gad ra thabthabelnag e tin ni thingarda rin’ed ni fan ku Got ko tin ni susun ni ngad pied ngak girdien e am? Gali deer ney e yira fulweg ko bin migid e article.
Ka Ga Manang?
• Mang maruwel e ba mil fan ko Kristiano u lan e tabinaw?
• Uwrogon ni ngad daged ni gad baadag ni ngad pied ban’en u lan e ulung?
• Mang e n’en ni ke milfan ngodad ni ngad rin’ed ni fan ko re fayleng ney?
• Mang boch angin ni yib nbochan ni gad ma ayuweg ni ngad daged e ngongol nib mo’maw’ ni ngan rin’?
[Picture on page 19]
Uwrogon ma tabinaw ni Kristiano e nge mang tabolngin e felfelan’ nib gel?
[Pictures on page 20]
Mangfan ni Pi Mich Rok Jehovah e ba t’uf bagayad rok bagayad?
[Pictures on page 20]
Rayog ni ngad daged e t’ufeg rodad ngak e pi walagdad nyugu aram rogon ni dada nanged owcherad?