Kristiano Ni Ma Par U Mathilin Ko Tin Tomren E Rran

“Gathi yad e girdi’ nu roy u fayleng ni bod gag ni gathi gag e girdi’ nu fayleng.”​—JOHN 17:16.

1, 2. Mang e i yog Jesus u murung’agen e tha’ u thilin pi gachalpen nge fare fayleng, ma mang boch e deer ni i m’ug ko fapi thin rok?

NAP’AN e bin tomur e nep’ ko yafas rok Jesus nib girdi’ nib flont, me fek e meybil nib n’uw ni pi gachalpen e ur rung’aged. U lan e re meybil nem, e yog boch e thin ni bay rogon ko yafas ko tin riyul’ e Kristiano ni urngin. Be yog murung’agen pi gachalpen, me gaar: “Ku gog ngorad e thin rom ni mpi’ ngog ma ke fanenikayrad e girdi’ nu fayleng, ya gathi yad girdien e fayleng, ni bod gag ni gathi gag e girdi’ nu fayleng. Ma gathi gu be wenignag ngom ni ngam fekrad ngar chuwgad u fayleng, machane gu be wenignag ngom ni ngam ayuwegrad rok Faanem nib Kireb. Gathi yad e girdi’ nu roy u fayleng ni bod gag ni gathi gag e girdi’ nu fayleng.”​—John 17:14-16.

² L’agruw yay, ni yog Jesus ni pi gachalpen e gathi yad bang ko fayleng. Maku reb, bochan ni gathi yad bang ko fayleng ma aram ra yib e cham riy​—ya ra fanenikayrad e fayleng. Yugu aram rogon, ma piin Kristiano e de t’uf ni ngar rusgad; ya ra matanagiyrad Jehovah. (Proverbs 18:10; Matthew 24:9, 13) Bochan e thin ni yog Jesus, ma rayog ni ngad fithed ko: ‘Mang fan ni tin riyul’ e Kristiano e gathi yad bang ko fayleng? Mang e be yip’ fan ni ngan par ni gathi bang ko fayleng? Faanra be fanenikay e fayleng e piin Kristiano, ma nge uw rogon e fayleng u wan’rad? Ma reb nib ga’ fan, uw rogon e am nu fayleng u wan’rad?’ Fulweg ko pi deer ney u Bible e baga’ fan ya bochan gad gubin e gad ba l’ag ngay.

“Kad Bad Rok Got”

3. (a) Bochan e mang ma kad manged girdi’ nib dar ko fayleng? (b) Mang e mich riy ni fare fayleng e be “par u tan gelngin faanem nib kireb”?

³ Bochan nib fel’ thildad Jehovah ma ireray reb i fan ni gathi gad bang ko fayleng. I yoloy John ni apostal ni gaar: “Gadad manang nib mil fadad ngak Got, ma tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Thin ni yog John u murung’agen e fayleng e rib riyul’. Fare mahl, nge cham, nge damumuw nib pag rogon, nge ngan magawonnag be’, nge dabku yul’yul’, nge ngongol ni darngal ni ke garer iyan e chiney e be micheg ni Satan, ma gathi Got e be gagiyegnag. (John 12:31; 2 Korinth 4:4; Efesus 6:12) Nap’an ni ra mang be’ reb e Mich Rok Jehovah, ma dabki rin’ ara dabki lemnag e pi ngongol nib kireb ney, ma aram ra mang be’ nib dar ko fayleng.​—Roma 12:2; 13:12-14; 1 Korinth 6:9-11; 1 John 3:10-12.

4. Mang boch e kanawo’ ni ngada daged ni gadad e girdi’ rok Jehovah?

⁴ I yog John ni fapi Kristiano, e yad ba thil ko fare fayleng, ya “kar bad rok Got.” Urngin e girdi’ ni kar ognaged yad ngak Jehovah e kar manged girdien. I yog Paul ni apostal ni gaar: “Faanra ud pired ni gadad ba fas ma fan ngak Somol, ma gadad ra yim’ ma ngad m’ad ni fan ngak Somol. Demtrug ko gadad ba fos ara gadad ba yam’ machane mmil fadad ngak Somol.” (Roma 14:8; Psalm 116:15) Bochan gadad girdien Jehovah, ma aram fan ni ngad pigpiggad ngak ni goo ir. (Exodus 20:4-6) Ma arfan ni, tin riyul’ e Kristiano e dabi ognag e yafas rok ni polo’ nga boch ban’en u fayleng. Ma yugu aram rogon ni ma tayfan fare yaan ban’en ko nam, ma dabi liyor ngay, maku dabi dag e re liyor rok ney ko ngongol rok nge lem rok. Mmutrug ni dabi liyor ngak girdien e gosgos nib gilbuguwan nge yugu boch ban’en ni ma liyor boch e girdi’ ngay e ngiyal’ ney. Riyul ni susun ni nge tayfan mat’awun yugu boch e girdi’ ni ngar rin’ed e tin yad baadag, machane karimus ni En Tasunmiy e nge liyor ngak. (Matthew 4:10; Revelation 19:10) Bochan e re n’en ney e ke mang be’ nib dar ko fayleng.

“Gin Nsuwog e Dariy u Roy u Fayleng”

5, 6. Uw rogon ma ngan par u tan Gil’ilungun Got nib dar ko fayleng?

⁵ Piin Kristiano e yad gachalpen Jesus Kristus ma yad ma par u tan Gil’ilungun Got, ni bochan e re n’ey e ku kar manged e girdi’ nib dar ko fayleng. Nap’an ni yibe skengnag Jesus u p’eowchen Pontius Pilate, me yog ni gaar: “Gin nsuwog e dariy u roy u fayleng; faan mang e gin nsuwog e bay u roy u fayleng ma ra cham e tirog e girdi’ ni nge dabiyog nni koleg ngan pieg ngak piyu Israel. Gin nsuwog e dariy u roy u fayleng.” (John 18:36) U daken fare Gil’ilungun e yira thothupnag fithingan Jehovah riy, ma yira tamilangnag e gagiyeg rok nth’abi tolang, ma yira rin’ e tin nib m’agan’ ngay u roy u but’ ni bod rogon ni yibe rin’ u tharmiy. (Matthew 6:9, 10) N’umngin nap’an e maruwel rok e i wereg e machib, me machibnag Jesus fare thin nib fel’ ko Gil’ilungun, me yog ni pi gachalpen e ra machibnag e re n’en ney nge ni mada’ ko tomur ko re m’ag ney. (Matthew 4:23; 24:14) U lan e duw ni 1914 ma fare thin ni kan yiiynag ni bay ko Revelation 11:15 e ke lebug ni gaar: “Ke yib gelngin Somol rodad nge Messiah rok ni ngar gagiyegnigew e girdi’ nu fayleng, ma bayi gagiyeg ndariy n’umngin nap’an.” Dabi n’uw nap’an nga m’on, ma fare Gil’ilungun u tharmiy e ireray e am ni ra gagiyegnag e girdi’. (Daniel 2:44) Ra taw nga nap’an, ma ki mus ko piin pilung nu fayleng ma demtrug rogon ma yad nang mat’awon Gil’ilungun.​—Psalm 2:6-12.

⁶ Ra ngan lemnag e pi n’en nem ni urngin, ma tin riyul’ e Kristiano e ngiyal’ ney e yad ma par u tan Gil’ilungun Got, ma yad ma fol ko fonow ni pi’ Jesus ni nguura ‘m’oneged u wan’rad e gagiyeg rok Got nge tin nib m’agan’ ngay ni ngar rin’ed.’ (Matthew 6:33) Dab ra manged girdi’ nde yul’yul’ ko nam ni yad ma par riy nbochan e re nen n’em, machane kar manged girdi’ nib dar ko fayleng ko tirok Got. Fare maruwel ni th’abi ga’ fan ko piin Kristiano e ngiyal’ ney, ni taab rogon ko fa bin som’mon e chibog, e aram e ‘ngan machibnag murung’agen Gil’ilungun Got nge mus rogon.’ (Acts 28:23) Dariy reb e am ko girdi’ ni bay mat’awun ni nge taleg e re maruwel nem ni Got e ke pi’.

7. Mang fan ni ma par u mathilin e tin riyul’ e Kristiano, ma uw rogon ni kar daged e re n’en ney?

⁷ Rogon nib puluw ko tin baaray ni Pi Mich Rok Jehovah e kar manged girdien Jehovah nge pi gachalpen Jesus ma yad be par u tan Gil’ilungun Got, ma aram fan ni kar pared u mathilin u nap’an ni be mahl e pi nam nu fayleng ko bin 20 nge 21 e chibog. Dariy barba’ ni kara mel’eged ni ngar ayuweged, ma dar fanayed e talin e cham ngar chamgad be’, ma dar wereged e thin nbochan e n’en be rin’ e girdi’ nu fayleng. Kar daged e michan’ rorad u nap’an ni yad be mada’nag e togopuluw ni be m’ug ndabkiyog ni ngan taleg, ma aram kar folgad ko thin ni ka nog ngak e piin pilung nu Nazi ni yad be gagiyeg u Chiyamen ko duw ni 1934 ni gaar: “Dabmad ni nggu uned ko tin yima rin’ nib l’ag ko politics, machane gamad ba yul’yul’ ko gil’ilungun Got u tan pa’ Kristus ni Pilung. Dabgu kirebnaged be’ ndemtrug ko mini’. Gamad ba felfelan’ ni nggu pared u fithik’ e gapas ma nggu rin’ed e tin nib fel’ ngak urngin e girdi’ ko ngiyal’ ni ke mab e kanawo’ ngomad.”

Piin Ambassador nge Envoy ni Fan Ngak Kristus

8, 9. Uw rogon ma Pi Mich Rok Jehovah e chiney e yad e piin ni ambassador nge envoy, ma bochan e re n’ey ma uw rarogon e tha’ u thilrad e pi nam?

⁸ I weliy Paul murung’agen nge pi walagen ni yad e Kristiano ni kan dugliyrad ni piin “ambassador ni pa’ Kristus, ni gowa be wenig Got u l’ugunmad.” (2 Korinth 5:20; Efesus 6:20) Ka nap’an e duw ni 1914, ma piin Kristiano ni kan dugliyrad ko kan ni thothup e ba puluw ni ngan piningrad ni yad e piin ambassador ni fan ko Gil’ilungun Got, ni yad “pi fak.” (Matthew 13:38; Filippi 3:20; Revelation 5:9, 10) Maku, ke fek Jehovah fare “ulung ni baga’” ko “yugu boch e saf” ni kar bad u boch e nam,” ni piin Kristiano ni athap rorad e yad ra par u fayleng, ni ngar ayuweged e piin pi fak ni kan dugliyrad ko maruwel ko ambassador. (Revelation 7:9; John 10:16) Piin “yugu boch e saf” e rayog ni ngan pining “envoy” ngorad ara piin kan l’ograd ko Gil’ilungun Got.

⁹ Ani ambassador nge girdi’ rok ni ma ayuweg e dabi un ko tin ma rin’ fare nam ni kan l’ograd ngay. Maku arrogon e piin Kristiano ni nguura pared u mathilin ko tin ma rin’ e pi am nu fayleng nib l’ag ko politics. Dabra folgad nga barba’ maku dabra togopuluwgad nga reb e ulung ni fan ko am, nge ramaen dowey, nge social, ara yalen e par rorad. (Acts 10:34, 35) Machane, yad ma “ngongliy e ngongol nib fel’ ngak urngin e girdi’.” (Galatia 6:10) Tin baaray e Pi Mich Rok Jehovah ni ma par u mathilin e be yip’ fan ni ri dariy be’ nra dariyfannag e machib rorad nga rogned ni yad ma un nga barba’ ni be togopuluw ngak e girdi’ nib thil ramaen dowrad ngorad, ara nam nib thil, ara yugu reb e ganong.

Bochan e T’ufeg Ma Yira Nangrad

10. Uw feni ga’fan e t’ufeg ni fan ko Kristiano?

¹⁰ Ra ngan uneg boch ngay, ma piin Kristiano e fan ni yad ma par u mathilin ko tin ma rin’ e fayleng e bochan e tha’ u thilrad nge yugu boch e Kristiano. I yog Jesus ngak pi gachalpen ni gaar: “Faanra um pired nib t’uf bigimed rok bigimed, ma aram e urngin e girdi’ ni yad ra nang ni gimed pi gachalpeg.” (John 13:35) T’ufeg ngak e walag u lan e ulung e ban’en ni baga’ fan ngak e en ke mang Kristiano. (1 John 3:14) Bochan ni bay rogon e re n’ey ko tha’ u thilin Jehovah nge Jesus, ma aram fan ni tha’ u thilin reb e Kristiano nge reb ni rib chuchugur. T’ufeg rok e gathi kemus ni fan ko girdi’ ni bay u lan e ulung rok. Ba muun ngay e “ulung ko pi walag [ni walagen] u fayleng ni polo’.”​—1 Peter 5:9.

11. Mang e ke rin’ e t’ufeg ni ma dag e Pi Mich Rok Jehovah u fithik’ e ngongol rorad?

¹¹ Ngiyal’ ney, ma Pi Mich Rok Jehovah e yad ma dag e t’ufeg rorad ngak e pi walagrad ya kar lebuguyed e thin ni bay ko Isaiah 2:4 ni gaar: “Bay ra pirdiiyed e pi sayden rorad ngar ngongliyed talin e maruwel riy ni ma gi’ e but’, mi yad yodoromnag e pi sarey rorad nge mang yar ni yima th’ab papa’ngin e woldug ngay. Pi nam e dab kur mahlgad bayay, ma dab kur fal’eged rogorad bayay ni fan ko mahl.” Bochan ni ke fil Jehovah ngak e tin riyul’ e Kristiano ni aram rogon ma ke aw e gapas u thilrad Got nge yug girdi’. (Isaiah 54:13) Bochan e ba t’uf Got nge pi walagrad rorad, ma de puluw ni ngara fanayed talin e cham ngar lied e piin ni Kristiano ni walagrad​—fa yugu be’ ndemtrug ko mini’—​u yug boch e binaw. Bang nib ga’ fan ko liyor rorad e baaray ni bay e gapas u thilrad mab taareban’rad, aram e n’en ni be dag ni rib t’uf fare kan ni thothup rok Got rorad. (Psalm 133:1; Mikah 2:12; Matthew 22:37-39; Koloses 3:14) Yad ma “athamgil ni nge yog ngorad e gapas . . . mi yad fol riy,” ya yad manang ni “Somol e ma matanagiy e piin ni yad mmat’aw.”​—Psalm 34:14, 15.

Uw Rogon fare Fayleng u Wan’ e Piin Kristiano

12. Uw rogon e girdi’ nu fayleng u wan’ Jehovah ni aram e n’en ni be folwok e Pi Mich Rok Jehovah riy, ma uw rogon?

¹² Kari weliy Jehovah e pufthin nrib gel ko re fayleng ney, machane dawori pufthinnag e girdi’ ko fayleng ni be’ nge be’. Ra rin’ e re n’en nem u daken Jesus u nap’an ni ra taw ko ngiyal’ ni Ke dugliy. (Psalm 67:3, 4; Matthew 25:31-46; 2 Peter 3:10) Chiney, ma dag e t’ufeg rok nib gel ngak e girdi’. Ma ku ke pi’ Fak ni kari maagirag rok ma aram e urngin e girdi’ e kan bing e kanawo’ ngorad ni nge yog ngorad e yafas ndariy n’umngin nap’an. (John 3:16) Bochan ni gadad e piin Kristiano, ngad folwokgad rok Got u rogon ni ke dag e t’ufeg rok ma aram e nga dogned ngak yugu boch e girdi’ murung’agen e yaram rok ni nge thapeg e girdi’ ngak, nyugu aram rogon ni maruwel rorad e yima dariyfannag.

13. Susun uw rogon e pi pilung nu fayleng u wan’dad?

¹³ Susun uw rogon e pi pilung nu fayleng u wan’dad? I fulweg Paul ere deer ney u nap’an ni yoloy ni gaar: “Gubin e girdi’ ma thingar ra folgad ko am; ya dariy reb e am ni bay ni gathi Got e pag nge yib, ma pi am ni bay e Got e ke tayrad.” (Roma 13:1, 2) Girdi’ e ke yog ngorad boch e liw ni “bay e gin ni mus riy” ni (ba tolang ara ba sobut’ u rogon ni ngan taarebnag reb nga reb, machane gubin ngiyal’ ni kab sobut’ ngak Jehovah) bochan ke pagrad e En ni Gubin Ma Rayog Rok. Ani Kristiano e ma par u tan pa’ e am ya bochan ireray reb e kanawo’ nrogon ni nge fol rok Jehovah. Machane uw rogon, ni faanra ba togopuluw e tin baadag Got ni ngan rin’ ko tin baadag e am ko girdi’ ni ngan rin’.

Motochiyel Rok Got nge Tirok Caesar

14, 15. (a) Mang reb e kanawo’ ni yog rok Daniel ni nge siyeg e magawon ko mini’ e nge fol rok u l’agruw ban’en nib togopuluw reb nga reb? (b) Mang e ke dugliy fa dalip i Jew ni nga rin’ed u nap’an fare magawon ni ngan mel’eg ko mini’ e ngar folgad rok e dabkiyog ni ngan siyeg?

¹⁴ Daniel nge fa dalip i fager rok e kar daged rogon ni ngan fol ko am ko girdi’ nge am rok Got nib thabthabel. Nap’an ni kan pi’ fa aningeg i pagel nga Babylon, ma kar folgad ko pi motochiyel ko re binaw nem ma de n’uw nap’an min mel’egrad ngar uned nga reb e skul ni yugub thil. Manang Daniel ni re skul nem e baga’ ni ra munmun ma bay ban’en riy nib togopuluw ko Motochiyel rok Jehovah, ma aram mi weliy murung’agen ngak reb e ga’ ko piin tamaruwel u rom. Ma angin ni keb riy, e kan yarmiy ban’en ni fan ni ngan tayfan e nangan’ ko fa aningeg e girdi’ nu Israel. (Daniel 1:8-17) Pi Mich Rok Jehovah e yad be fol ko tin ni rin’ Daniel u nap’an ni ngar weliyed e tin bay u lanin’rad ngak e piin nib tolang e liw rorad ni fan ni ngan palog ko magawon.

¹⁵ Machane, n’en ni buch boch nga tomren e dakiyog ni ngan siyeg e magawon u l’agruw ban’en nib togopuluw. Piyu Babylon e ka ra toyed reb e liyos ni baga’ ko tagpas u Dura min tay chilen ngak e girdi’ rok nib tolang e liw rorad, mab muun ngay e girdi’ ni kan ta’ ni ir e nge ayuweg reb e binaw, ni ngar muulunggad u taabang ni fan ko re madenom nem. Ngiyal’ nem, ma fa dalip i fager rok Daniel e kan dugliyrad ni ra bagayad ma nge ayuweg reb e binaw u Babylon, ere fare motochiyel e ku fan ngorad. Reb e tayim ko re madenom nem, ma urngin e girdi’ ni yad be muulung u rom e kan ta’ chilen ngorad ni ngar siro’gad nge p’eowchen fare liyos. Machane piyu Israel e yad manang ni ireray e n’en nib togopuluw ko motochiyel rok Got. (Deuteronomy 5:8-10) Ere ngiyal’ ni urngin e girdi’ e kar siro’gad ngay, mi yad e kar pared ni yad ba sak’iy. Bochan dar folgad ko thin ni yog fare pilung, rayog ni ngar m’ad u reb e kanawo’ nib gel e marus riy, ma kemus nu daken e maangang min ayuweg e yafas rorad; machane kar mel’eged ni nge par e yafas rorad u thatharen e riya’ ko bin nge dabra folgad ku Jehovah.​—Daniel 2:49–3:29.

16, 17. Mang e ke rin’ fapi apostal u nap’an ni kan motochiyel ngorad ni ngar talgad i wereg e machib, ma mang fan?

¹⁶ Nap’an fa bin som’mon e chibog, ma fapi apostal rok Jesus Kristus e kan piningrad nga ranod nga p’eowchen fapi tayugang u Jerusalem ni piyu Jew ma kan ta’ chilen ngorad ni dab kuura machibnaged fithingan Jesus. Mang e kar rin’ed? I tay Jesus chilen ngorad ni nga ranod ngar pingenged e girdi’ u urngin e nam ngar manged pi gachalpen, ni kub muun ngay yu Judea. Maku i yog ngorad ni ngar manged pi mich rok u Jerusalem nge urngin yang u fayleng. (Matthew 28:19, 20; Acts 1:8) Manang fapi apostal ni motochiyel rok Jesus e ireray e tin baadag Got ni ngara rin’ed. (John 5:30; 8:28) Arfan, ni ke lungurad: “Thingar gu folgad rok Got ko bin ni nggu folgad rok e girdi’.”​—Acts 4:19, 20; 5:29.

¹⁷ Fapi apostal e gathi girdi’ ni tatogopuluw. (Proverbs 24:21) Yugu aram rogon, ma nap’an ni yog e pi pilung ni ngar talgad i rin’ e tin nib m’agan’ Got ngay, ma ke mus ni ke lungurad, ‘Thingar gu folgad rok Got, ma gathi girdi’.’ I yog Jesus ni thingarda “pied ngak Caesar e tirok, ma ngad pied ngak Got e tirok.” (Mark 12:17, NW) Faanra dabda folgad ko motochiyel ku Got ya bochan ni girdi’ e ke yog ngodad ni ngad rin’ed, me ere kad pied ngak e girdi’ e tirok Got. Tin susun ni ngan rin’ e, ngada pied ngak Caesar urngin e malfith ni kad ted ngak, machane ngada ted fan e liw rok Jehovah nth’abi tolang. Ir fa en ni Th’abi Tolang u Palpalthib, nge En Tasunmiy, ni fare Tabolngin mat’awuy.​—Revelation 4:11.

Nguuda Pared ni Gadad Ba Mudugil

18, 19. Mang e ke dugliy boch e piin walagdad nib fel’ ni ngan fol riy, ma uw rogon ni ngad folgad ko tin ni kar rin’ed?

¹⁸ Chiney, boor ko fapi am ko girdi’ e yad be tayfan e n’en ni ke turguy e Pi Mich Rok Jehovah ni yad ma par u mathilin, ma bochan e re n’ey e ngad pininged e magar. Machane, u yu yang, ma Pi Mich e kara mada’naged e togopuluw nib gel. N’umngin nap’an e fa bin 20 e chibog nge mada’ ko chiney, ma boch ko fapi walagdad ni pumoon nge ppin e kara maruwelgad nib elmerin, ma kara uned ko cham ko tirok Got ni aram “fare cham nib fel’ ni fan ko michan’.”​—1 Timothy 6:12.

¹⁹ Uw rogon ni ngad pared ni gadad ba mudugil ni bod yad? Som’mon, dabda paged talin ni riyul’ ni rayog ni ngeb ngodad e togopuluw. De t’uf ni ngad rusgad ara ngad gingad ngay ni faanra kad mada’naged. I ginang Paul Timothy ni gaar: “Urngin e girdi’ ni yad baadag ni ngar pired u reb e pangin nib m’agan’ Got ngay ma kar taab girdi’gad Kristus Jesus e bay ni gafgownagrad.” (2 Timothy 3:12; 1 Peter 4:12) U lan e fayleng ni be par u tan gelngin Satan, ma mangfan ni dabi yib e togopuluw ngodad? (Revelation 12:17) Gad ra par nib yul’yul’, ma susun ni bay boch e girdi’ ni kar ‘gingad ma yad be yog e thin nib kireb ngodad.’​—1 Peter 4:4.

20. Mang etin riyul’ nra gelnag ni kan puguran ngodad?

²⁰ Bin l’agruw, ma be pagan’dad ni Jehovah nge fapi engel rok e ra ayuwegdad. Rogon ni yog Elisha kakrom ni, “kab pire’ e piin ni bay u ba’ rodad ko piin ni bay u ba’ rorad.” (2 Kings 6:16; Psalm 34:7) Rayog rok Jehovah, nbochan e tin nib fel’ ni baadag ni nge rin’, e nge pag e piin tatogopuluw ni nguura magawonaged gadad nib ngoch nap’an. Yugu aram rogon, ni gubin ngiyal’ ma ma pi’ gelngidad nib t’uf rodad ni fan ni rayog ni ngad kadedan’dad. (Isaiah 41:9, 10) Boch i yad e kan li’rad kar m’ad, machane dabda wargad. I yog Jesus ni gaar: “Dabmu rusgad ngak e piin ni rayog rorad ni ngar lied ngem’ fare dowef machane dabiyog ni ngar lied fare yaal ngem’; machane ngam rusgad ngak e en rayog ni nge thang fare yaal nge fare dowef u Gehenna.” (Matthew 10:16-23, 28, NW) Gadad be par ko re m’ag ney ni “ba’ n’umngin nap’an”. U roy e ngada fanayed e tayim rodad ni “ngarda chichiiyed pa’dad ko yafas ni ir e bin riyul’ e yafas,” ni aram e yafas ndariy n’umngin nap’an u lan e bin nib biech e fayleng. (1 Peter 2:11; 1 Timothy 6:19) Dariy be’ nrayog rok ni nge taleg e taw’ath ni nge dabi taw ngodad nfaan gadra par nib yul’yul’ ku Got.

21. Mang e n’en ni nguuda lemnaged ni gubin ngiyal’?

²¹ Arfan, ni dabda paged talin e tha’ u thildad Jehovah Got ni rib ga’ fan. Yibe athapeg ni nguuda pininged e magar ko fare taw’ath ni kad manged gachalpen Kristus ma gad be par u tan fare Gil’ilungun. Ma ngad t’ufeged e pi walagdad u polo’ i gum’irchadad, ma nga yigi felfelan’dad nbochan e t’ufeg rorad ngodad. Ma tin kab ga’fan riy, e ngad folgad ko thin ko fare psalmist ni gaar: “Mu pagan’um ngak Somol! Nge michan’um ngak, dabi mulan’um. Mu pagan’um ngak Somol.” (Psalm 27:14; Isaiah 54:17) Ma gadad, ni taareb rogon ko Kristiano nib m’on ngodad, e ngada pared ni gad ba mudugil ko athap rodad​—nge piin Kristiano nib yul’yul’ ni ma par u mathilin nib dar ko fare fayleng.

Rayog ni Ngam Weliy?

• Uw rogon ma tha’ u thildad Jehovah e ra daregdad ko re fayleng ney?

• Bochan gadad be par u tan Gil’ilungun Got, ma uwrogon nrayog ni uda pared u mathilin ko re fayleng ney?

• Uw rogon ma t’ufeg rodad ngak e pi walagdad e ra ayuwegdad ni ngad pared u mathilin, nib dar ko fayleng?

[Picture on page 25]

Mang e ra buch ko tha’ u thildad nge fayleng nbochan gad be par u tan Gil’ilungun Got?

[Picture on page 26]

Be’ ni Hutu nge be’ ni Tutsi e yow be maruwel u taabang u fithik’ e felfelan’

[Picture on page 27]

Be’ ni Jew nge be’ ni Arab e yow e walag ni Kristiano

[Picture on page 27]

Piin Kristiano ni be’ nu Serbia, nge be’ nu Bosnia, nge be’ nu Croatia e kar pared u taabang u fithik’ e felfelan’

[Picture on page 28]

Mang e ba mat’aw ni ngan rin’ u nap’an nra yog e pilung ngodad ni ngad th’abed e motochiyel rok Got?