“Mu Chugurgad Ngak Got Me Chugur Ngomed”

Kari Thil e Ngongol Rok

RI DARIY e felfelan’ ma dakuriy fan e yafas rok Matsepang kafram! Matsepang e bochi rugod ni ma par u Lesotho, ni ba nam ni bay u lukngun e Yimuch u Afrika. Teliw rok e Katolic. Machane, teliw rok e de ayuweg ni nge chuchugur ngak Got, ya n’en ni buch e ke pi’ boch e sibester e salpiy ngak ni fan ni nge adag ni nge un ngorad ko ngongol ni darngal.

Angin ni yib riy, e ke chuwan’ ko teliw ma daki mich u wan’ ni bay e en Ta Sunmiy ni ma t’ufegey ni riyul’ ni ma lemnag e girdi’. Bochan e gafgow ni kan ta’ ngak, ma ke par nib kireban’ ma be lemnag ndakuriy fan e yafas rok. Me mang be’ nib ta cham mab damumuw. Ma ke mang be’ nib kireb.

Tomur riy me un Matsepang nga ba ulung e girdi’ ni kireb ni yad ma iring e chugum ko girdi’ u lan e train. Min kol min ta’ nga kalbus u Yimuch u Africa. Me munmun min pi’ nge sul ko binaw rok u Lesotho miki ulul ko ngongol ni kireb, ni chingaw nge cham, nge ngongol ni darngal.

U nap’an ni kari kireban’ Matsepang, me meybil ni be ning e ayuw ngak Got. Me micheg ni gaar: “Got, faanra dab gum’ ma gu ra pigpig ngom nrogon nrayog rog.”

De n’uw nap’an, me yib boch e missionary ko Pi Mich rok Jehovah ngak Matsepang me adag ni ngar filed e Bible. Ma nap’an ni ke fil e Bible, ma ke tamilang u wan’ ni bay fan e girdi’ u wan’ Got. Bin riyul’ riy, me nang ni Satan e ir e “chitamangin urngin e malulifith,” ma ma saliyebnag e girdi’ ma be tay nga lanin’rad ni dariy fan e yafas rorad ma be k’aringrad ngar lemnaged ndar t’ufgad rok Jehovah.​—John 8:44; Efesus 6:11.

Machane, kari felfelan’ Matsepang u nap’an ni ke nang nrayog ni ngad lemnaged nib ga’ fadad nfaanra ngad kalgadngan’dad ko kireb ni kad rin’ed kafram, ma ngad weniggad ngak Got nge n’ag fan rodad, ma ngad rin’ed e tin nib m’agan’ ngay! Kan ayuweg ke nang fan ni Got e “ka ba ga’ nga lanin’dad” ma rogon ni be sap ngodad e bathil nga rogon ni gad ma sap ngodad.​—1 John 3:19, 20.

Kari felfelan’ Matsepang ni ke beeg fare thin rok David ni fare psalmist ni gaar: “I Somol e ba chugur ngak e piin ni ke mulan’rad; ma piin ni ke math e liyeb ngorad e ma chuwegrad u fithik’ e tin ni ke yib ngorad ni kar gafgowgad riy.” (Psalm 34:18) Matsepang ni bagayad e piin ni “ke math e liyeb” ngak, e ke nang ndabi pag Jehovah e pi tapigpig rok, ni mus nfaanra bay boch i yad ni ke kireban’ fa ke lemnag ni daki ga’ fan. Ke felfelan’ ni ke nang ni Got e ma lemnag rarogon urngin e pi saf rok ma ma ayuwegrad ko ngiyal’ ni kar magawongad. (Psalm 55:22; 1 Peter 5:6, 7) Ma kari ayuweg fare thin nu Bible ni gaar: “Mu chugurgad ngak Got, me chugur ngomed.”​—James 4:8.

De n’uw nap’an ma ke gagiyel ni gelngin e Thin rok Got nu Bible e ke ayuweg e yafas rok Matsepang. Ma ke tabab ni nge un ko muulung ni gubin ngiyal’ ma ke pag e ngongol rok nib kireb. Mang angin ni yib? Daki lemnag ni dariy fan u wan’ Got. Nap’an ni un ko taufe ni mang reb e Mich Rok Jehovah, ma ke thognag bokum biyu’ e awa ni be un i machibnag fare thin nib fel’ ni murung’agen fare Gil’ilungun. Yugu aram rogon fare kireban’ rok kafam, ma chiney e ke felfelan’ ma ke yib fan e yafas rok. Rib tamilang ni gelngin e Thin nu Bible e ra thiliyeg e yafas ko girdi’!​—Hebrews 4:12.

[Blurb on page 11]

“Got, faanra dab gum’, ma gu ra pigpig ngom nrogon nrayog rog”

[Box on page 11]

Kenggin e Motochiyel nu Bible e Be Ayuwegey

Kenggin e motochiyel u Bible ni ke ayuweg e girdi’ ni kan gafgownagrad e baaray:

“Yu ngiyal’ ni der paslagan’ug ma ke magafan’ug, ma ga fal’eg lanin’ug nggu felan’”. (Psalm 94:19) Thin rok Jehovah ni ma ‘fal’eg lanin’uy’ e ri ma ayuwegey. Nap’an ni gad be fal’eg i lemnag e Thin rok Got ma meybil e ra ayuwegey nge chuw e n’en ni be wageynag lanin’uy me gelnag e pagan’ rodad ngak Got ni ba Fager nib fel’.

“Ma be golnag laniyan’ e piin ke kireban’rad ma be taflaynag e maad’ad rorad.” (Psalm 147:3) Faan gad ra pining e magar ko runguy rok Jehovah nge fare maligach ni pi’ Jesus ni nge upunguy e denen rodad, ma rayog ni ngad chuchugurgad ngak Got nib pagan’dad ma dabda lemnaged ni dabi ayuwegdad. Re n’ey e ra fal’eg lanin’uy ma ra yibnag e gapas laniyan’.

“Dariy be’ nrayog ni nge yib ngog ni faanra gathi en ni Chitamangiy e pow’iy nge yib ngog, ni ir e ke l’ugeg ku gub; ma bay gu faseg ko yam’ ko chirofen ni tomur ko rran.” (John 6:44) U daken gelngin Jehovah nge fare maruwel ni yibe machibnag Gil’ilungun e ma ayuwegdad ni ngad chugurgad ngak Fak ma ke pi’ ngodad fare athap ko yafas ndariy n’umngin nap’an.