Rogon ni Kan Fulweg e Deer Rok Boch e Girdi’

BOKUM milyon e girdi’ e ma meybil. Boch i yad e ke mich u wan’ ni kan fulweg taban e meybil rorad. Ma boch e yad be lem ko yima rung’ag e meybil rok fa danga’. Maku ba’ boch e girdi’ ni yad be gay e fulweg ko deer rorad ma dawori yib ngan’rad ni ngar pi’ed e n’en ni yad be ning u fithik’ e meybil ngak Got.

Fare Bible e ke dag rogon e bin riyul’ e Got ni en “Ta motoyil ko meybil.” (Psalm 65:2, New World Translation) Faan ga ra meybil, ma be riyul’ u wan’um ni meybil rom e be puluw ko bin riyul’ e Got? Pi meybil rom e tin baaray e meybil ni ra pi’ e fulweg riy?

Rogon u wan’ e girdi’ u ga’ngin yang e fayleng, e fare fulweg e ke micheg ni arrogon! Uw rogon ni ke yog ngorad e fulweg rorad? Mang e n’en kar filed?

Got​—Ir Mini’?

Reb e sensey ko skul nu Portugal ni pi sibester nge padrey e u ra skulnaged e ri i yul’yul’ i maruweliy e michan’ rok. Ma nap’an ni thil fare galesiya nge digey e tin baaram e ngongol ni fil ngak nib ga’ fan, me balyang laniyan’. Milekag ni tay me yan i nang rogon kanawoen e liyor ko Oriental, ma aram me tabab i lemnag ko ri taareb e Got nib riyul’ fa. Uw rogon ni thingari i liyor? Nap’an ni ra fith e padrey rok ma dabni fulweg e deer rok, me kireban’.

Galesiya ko Catholic e kar pied bochi ke babyor be yan u lan e mach ko re sensey ney i yan ni be yog ko girdi’ ko pi galesiya ni dab ur nonad ngak e Pi Mich rok Jehovah. Machane ri ka bay ere deer rok nem u wan’. Me reb e rran ni nap’an ni yib reb e Pi Mich ko mab rok, me motoyil me dag nib adag e n’en ni ke rung’ag. Aram e yay ni som’mon ni ke non ngorad.

Ra nge yog e fulweg ko pi deer rok ni boor, ma re pin ney e aram e tabab e fol Bible ni yad e Pi Mich. Ra reb e wik, ma bay e deer rok ni ke yoloy ni boor ni nge fith ngorad. Baadag ni nge nang fithingan Got, nge rriyul’ ni taareb e Got ni ba’ nib riyul’ fa, nge ba fel’ u wan’ ni ngaun fanay e liyos ko liyor fa danga’, nge ku boch. Me guy ni urngin e fulweg ni kan pi’ ngak e yib ko Bible, gathi lem ku be’, ma aram mi ri gin ngay ma ke falfalan’ ko n’en ni ke fil. Munmun, min pi’ e fulweg ko pi deer rok. Chiney, e be liyor ku Jehovah u daken e kan ni thothup ngo fithik’ e yul’yul’, ni bod rogon ni yog Jesus Kristus ni ra rin’ e “piin riyul’” ni yad be liyor.​—John 4:23.

Gafgow​—Mang fan?

Fare moon ni Job e ri gafgow nge taw nga reb e dodow nib pag rogon. Urngin e bitir rok nni li’rad u tan e yoko’, mi ri gafgow. Maku arrogon ni ri gafgow ko m’ar nib gel e amith riy me gum’an ko mochuch ni i tay e pi fager rok ni de riyul’ ngak. U fithik’ e pi n’eney, mi yigi gurgur Job nge yog boch ban’en ni de fel’ i lemnag rok. (Job 6:3) Machane me par Got nge lemnag rogon e re ngiyal’ i n’enem. (Job 35:15) Manang e n’en ni bay u lan gum’irchaen Job ma aram me pi’ e fonow nib t’uf rok Job. Ku ma rin’ e re n’enem ni fan ko girdi’ e chiney.

U Mozambique, me Castro ni kemus ni ragag e duw rok me yim’ e chitiningin. Me par ni kari kireban’. Me fith ni gaar, “Mang fan ni nge yim’ nge digeymad?” Yugu aram rogon ni gallabthir rok ni bay madgun Got u wan’row e ra chuguliyew, ma chiney ma ke balyangan’. Mang e n’en ni ra fal’eg laniyan’ nge gum’irchaen? Yan i pirieg ni ke fel’ laniyan’ ni poy bochi ke Bible mu ura weliyew e bini ilal i walagen ni pumoon.

Munmun, me yan i nang Castro fan ni chitiningin e ke yim’, ni gathi bochan de mat’aw Got, ya bochan ni dakun flont e ke af ngodad. (Roma 5:12; 6:23) Fare n’en ni micheg e Bible ni fas ko yam’ e fal’eg laniyan’ nib th’abi gel ya yan i nang ni aram kenggin e pagan’ rok ni ku ra guy e chitiningin bayay. (John 5:28, 29; Acts 24:15) Ba kireban’, ya aningeg e duw nga tomuren, me yim’ e chitamangin. Machane ya ney e ke fel’ boch rogon Castro ni ke yan u fithik’ e biney e magawon. Chiney, e ke t’uf Jehovah rok ma be yul’yul’ i fanay e yafas rok ko pigpig ku Got. Falfalan’ ni ke pirieg e ri ba gagiyel ngak e piin yad manang Castro.

Boor e girdi’ ni ke yim’ e piin nib t’uf rorad e kar pirieged ni ke fel’ lanin’rad ko tin riyul’ nu Bible ni ka pi n’en baaram nib nag e fel’ laniyan’ ngak Castro. Boch e girdi’ ni kar pirieged e mo’maw’ ni bochan e ngongol ko girdi’ ni kireb e ku yad be fith, ni bod ni fith Job: “Mang fan ni piin ni kireb e ka yad be par nib fas?” (Job 21:7, NW) Nap’an ni ra fal’eg e girdi’ e motoyil ko n’en be yog Got ko rogon e fulweg ko Thin rok, ma yad ra nang ni rogon kanawoen ni be ngongliy Got bogi ban’en e rib fel’ rogon ni yad e be fel’ ngorad.​—2 Peter 3:9.

Barbara, ni be’ nni chuguliy u Meriken, ni ir rok e dawori pirieg e marus nib gel ko mahl. Machane ke ilal ko ngiyal’ ni be mahl e fayleng. Murung’agen e magothgoth nge kireb ko mahl e ir e thin ni yima weliy ko news ni gubin e rran. Nap’an ni be skul, me balyangan’ ko pi n’en i buch ko chep ni be m’ug u boch e kanawo’ nib dake dabiyog i weliy murung’agen. Mang e n’en tapgin? Gur bay fan u wan’ Got e n’en ni be buch? Ba mich u wan’ ni ba’ Got nib fas, machane de fel’ rogon nim nang.

Machane, rogon ni be sap ko yafas e munmun me thil ni bochan e i chag ngak e Pi Mich rok Jehovah. I motoyil ngorad ma yad be fil e Bible ngak. Mi i un ko muulung u reb e Kingdom Hall. Mi ki un nga reb e pi muulung ni gagang’. Maku reb, e nap’an ni ra fith e deer, me pirieg ni danir pi’ e fulweg nib thilthil ni ra reb e Pi Mich ma rogon e lem rok. Ya rogon, e fapi Mich e ba taareb e n’en ni yad be yog ya Bible e kenggin e n’en ni yad ma lemnag.

Fapi Mich e ra daged e mich u Bible ni fayleng e ba’ u tan gelngin Satan ni fare Moonyan’, ni ir e pilung riy, ma ir e be m’ug gosgoson riy. (John 14:30; 2 Korinth 4:4; Efesus 2:1-3; 1 John 5:19) Ra weliyed ngak ni pi n’en baaram ni be balyangan’ Barbara ngay e ke m’ay i weliy u lan e Bible. (Daniel, chapters 2, 7, nge 8) Got e ke m’ay i weliy rok e pi n’enem ya bay gelngin ni nge guy e tin ka ba’ nga m’on ni faanra baadag ni nge rin’ ni aram rogon. Bay boch e pi n’enem ni Got e be k’aring. Ma boch e ke pag be buch. Me dag e Pi Mich ngak Barbara ni fare Bible e ku ke yog reb e fayleng nib biech ni tin nib mat’aw e bay riy ma gafgow e bay i aw ni ban’en ko kakrom ni ke m’ay.​—2 Peter 3:13; Revelation 21:3, 4.

Munmun, me ni nang Barbara fan ni aram rogon ni Jehovah Got e gathi ir tapgin e gafgow ni be tay e girdi’, ma der taleg ni baaray ni nge towasariy e girdi’ ni ngan fol ko pi motochiyel rok ni kar mel’eged ni nge dab ra folgad riy. (Deuteronomy 30:19, 20) Me turguy Barbara u wan’ ni nge fil e pi n’en nib adag Got ni ngan rin’ mi i par ni be fol riy. Miki pirieg rok e Pi Mich rok Jehovah fa binem e t’ufeg ni faani yog Jesus ni ra lingagilnag e piin riyul’ ni gachalpen.​—John 13:34, 35.

Ku arrogon gur ni ku rayog ni yib angin e binem e ayuw ni ayuweg Barbara ngom.

Gathi ban’en ni ke m’ay i dugliy ni piin baaram ni kan weliy murung’agrad ko re thin ney e yad ra pirieg e yafas u reb e kanawo’ nib fel’ rogon. Demtrug rogon, ma kar nanged ni fan e t’ufeg rok Jehovah Got e ke m’agan’ ngak urngin e piin ke fel’ u wan’rad kar mel’eged ni ngar folgad ko pi motochiyel rok. (Acts 10:34, 35) Re m’agan’ nem e ba muun ngay e yafas ni manemus u lan ba fayleng ni dariy e mahl riy, ma kan chuweg e m’ar nge uyungol riy​—nge mada’ ko yam’ ni dakuriy. (Isaiah 2:4; 25:6-8; 33:24; John 3:16) Aram e n’en ni ga baadag? Faanra arrogon, ma rayog ni kum fil boch ni ga ra un ko pi muulung u reb e Kingdom Hall ko Pi Mich rok Jehovah ni kenggin e thin riy e Bible. Ri yibe piningem ni nga mub.

[Picture Credit Line on page 4]

Hiker: Chad Ehlers/Index Stock Photography