Mang e Ga Baadag ni Ngam Fith Ngak Got?

GIRDI’ u fayleng i yan e bay e deer rorad ni rib ga’ fan u wan’rad u murung’agen e yafas. Me gur? Boor e girdi’ ni kar fithed e deer rorad ko piin ni yad ma tay murung’agen e yuraba’ i teliw machane dawori yog e fulweg ngorad nib fel’ u wan’rad. Boch e girdi’ e yad rorad e yad ma lemnag e pi deer ney. Ma boch e yad ma meybil ni ngan pow’iyrad. Gur ri rayog ni nge yib e fulweg rok Got ngom u rogon e pi n’en ni be balyangnag an’um? U fithik’ e pi deer ma boor e piin ni ka rogned ni yad baadag ni ngar fithed ku Got e pi n’ey.

Got, mini’ e an riyul’ ni gur?

Rogon ni ma changar e girdi’ ngak Got e ba’ gelngin e yalen rorad, nge teliw ko gallabthir rorad riy, nge ku rayog ni rogon ni yad ra mel’eg. Boch e girdi’ e yad ma pining reb e ngochol ngak Got; ma boch e kemus ni yad ma pining Got ngak. Gur ri ba’ fan? Gur ba’ taareb e Got nib riyul’ ni yog ir nge fithingan ngodad?

Mang fan ni kari yoor e gafgow?

Faanra de tayan’ be’ ara i ngongol nib kireb ko yafas e ke kirebnag fithik’ i dow ara kebnag e gafgow ngak, ma rayog ni nga i nonnon ni de fel’ rogon e par rok. Machane ri manang ko mang fan ni be gafgow.

Machane, boor e girdi’ e yad ma gafgow ni rib gel ni gathi fan ko kireb rorad. Boch e bay e m’ar rorad ni dabi gol. Ma boch e yad be gafgow nib gel ya der yog rorad ni nge yog e naun ngorad nge ggan nib gaman ko tabinaw rorad. Bokum milyon e yad k’on e ngongol ni kireb, mahl, nge ngongol ni maangach u fithik’ e dakunir nang e n’en ngan rin’, nge tin ka ma buch ko fayleng nib gel e magothgoth riy, ara ngongolen e pi tayugang’ nib kireb.

Ere yimnang fan, ni boor e girdi’ e yad be fith ni be lungurad: ‘Mang fan e pi n’eney ni ke garer i yan? Mang fan ni ke pag Got urngin e pi gafgow ney ni be buch?’

[Picture Credit Line on page 2]

COVER: Chad Ehlers/Index Stock Photography

[Picture Credit Line on page 3]

Mountain: Chad Ehlers/Index Stock Photography