Mu Machibnag e N’en ni Ir e Ri Be Fil e Bible
“Mmarod ngak girdien e pi nam u gubin yang . . . mi gimed fil ngorad.”—MATTHEW 28:19, 20.
1. Uw fene yoor e Bible ni bay u fayleng?
THIN ROK JEHOVAH, ni aram e Bible nib thothup, e ir e bin th’abi kakrom ma bin th’abi yoor ken e babyor ni kan wereg u fayleng i yan. Kan pilyeg e Bible ni polo’ ara yu yang riy nga 2,300 mit e thin. Ke pag 90 e pasent ko urngin e girdi’ nu fayleng ni rayog ni ngar beeged e Bible ko thin rorad.
2, 3. (a) Mang fan ni ke wagey laniyan’ e girdi’ ko n’en ni ma machibnag e Bible? (b) Mang boch e deer ni gad ra weliy?
2 Bokum milyon e girdi’ ni ma beeg yu yang ko Bible ni gubin e rran. Boch i yad e kar beeged e Bible ni polo’ ni boor yay. Bokum biyu’ ra ba’ e teliw ni ma yog ni machib rorad e sum u Bible, machane de taareban’rad ko machib ni bay u Bible. Maku ma wagey laniyan’ e girdi’ ni bochan e der taareban’ girdien taa barba’ e teliw. Boch e girdi’ e ma maruwar e machib nu Bible u wun’rad, nge gini sum riy, nge feni ga’ fan. Boor e girdi’ e ma tay ni ba thothup e Bible ni ke mus ni fan e ngan tay paey nga daken u kourt ngan micheg ni ngan weliy e tin riyul’.
3 Bin riyul’ riy e bay e thin rok Got u Bible, ara ba machib ni bay gelngin ni fan ko girdi’ nu fayleng. (Hebrews 4:12) Gadad e Pi Mich Rok Jehovah e gad ba adag ni nge fil e girdi’ e n’en ni ma machibnag e Bible. Gad ma felfelan’ ni ngada rin’ed fare maruwel ni pi’ Jesus Kristus ngak pi gachalpen ni gaar: “Mmarod ngak girdien e pi nam u gubin yang ngam pingeged yad ngar manged pi gachalpeg, . . . mi gimed fil ngorad.” (Matthew 28:19, 20) Nap’an ni gad ma machibnag e girdi’ ma gad ma pirieg e piin nib yul’yul’ ni ke kireban’rad ni bochan e machib ni ke wagey u fayleng i yan. Yad baadag ni ngar nanged e machib nriyul’ u murung’agen e en ni Tasunmiy ma yad ba adag ni ngar nanged ko mang e be yog e Bible u murung’agen fan e yafas. Ngada weliyed dalip e deer ni boor e girdi’ ni ba adag ni nge nang e fulweg riy. Som’on e gad ra weliy e n’en ni ma weliy e pi tamachib ko pi yurba’ i teliw ni yad ba oloboch riy fin gad ra weliy ko mang e ri be fil e Bible. Ba aray fa dalip i deer: (1) Ma runguydad Got, fa? (2) Mang fan ni gad bay u fayleng? (3) Mang e ra buch rodad u nap’an ni gad ra yim’?
Ma Runguydad Got, Fa?
4, 5. Mang fan ni ma lemnag e girdi’ ni der ma runguydad Got?
4 Ngada tababgad ko bin som’on e deer, Ma runguydad Got, fa? Boor e girdi’ e ma lemnag ni der ma runguydad Got. Mang fan ni yad ma lemnag ni aram rogon? Reb i fan e gad ma par u ba fayleng ni boor e fanenikay, ara mahl, ara gafgow riy. Yima lemnag ni, ‘Faan manga ri ma runguydad Got ma dabi siy ni ra taleg e pi kireb nem.’
5 Ma reb i fan ni ma lemnag e girdi’ ni der ma runguydad Got e bochan e machib rok e pi tamachib ko pi yurba’ i teliw. Mang e ma yog boch e pi tamachib u nap’an ni ra yib e gafgow? Nap’an ni yim’ l’agruw e bitir rok be’ ni ppin ko maad’ad u karrow me yog e tamachib rok ni gaar: “Aram e n’en nib m’agan’ Got ngay. Ba adag Got ni nge yog l’agruw e engel ngak.” Faanra arrogon e thin rok e tamachib ma bin riyul’ riy e yad be yog ni Got e ke k’aring ni nge buch e pi n’en nib kireb. Machane i yog James ni gachalpen Jesus ni gaar: “Ma faanra yib e mit nem e skeng ngak be’ nrayog ni nge waliy faanem nge denen, ma thingari dabi gaar u laniyan’, ‘Re n’ey ni be n’en nge waliyeg nggu denen e yib rok Got.’ Ya dariy ban’en nib kireb nrayog rok ni nge yan i guy rogon nge waliy Got nge denen, mi Got e der rin’ ngak be’.” (James 1:13) Der ma rin’ Jehovah e n’en nib kireb. Bin riyul’ riy e “rib palog rok e bin riyul’ e Got ni nge rin’ e n’en nib kireb.”—Job 34:10, NW.
6. Mini’ e ir tapgin e kireb nge gafgow u fayleng?
6 Ere mang fan ni bay e kireb nge gafgow? Reb i fan e boor e girdi’ nu fayleng ni dubrad ni nge mang Got e Pilung rorad, ma dubrad ni ngar folgad ko pi motochiyel nge machib rok. Der naab e girdi’ ngay, machane yad be fol rok Satan ni ir e Toogor rok Got ya “tin ni ka ba’ e girdi’ nu fayleng e ke suweyrad Faanem nib Kireb.” (1 John 5:19) Faanra tamilang u wun’dad ni arrogon, ma gad ra nang fan ni bay e kireb u fayleng. Ya Satan e ir e ba kireb, mab fanenikay, mab sasalap, ma dariy e runguy rok. Aram fan ni ku arrogon laniyan’ e girdi’ nu fayleng ni yad be folwok rok e pilung rorad. Aram fan ni boor e kireb u fayleng!
7. Mang boch i fan ni gad ma gafgow?
7 Ku reb i fan ni gad be gafgow e bochan e de flont e girdi’. Girdi’ ni de flont e ma guy rogon ni ngar suweyed yugu boch e girdi’ me sum e mahl riy, maku ma sum e togopluw, nge gafgow riy. Rib puluw e thin u Eklesiastes 8:9 (NW) ni gaar: “Ma suwey e girdi’ yugu boch e girdi’ me sum e gafgow riy.” Ma reb i fan ni bay e gafgow e bochan ‘ngal’an nge n’en ni dan lemnag nra buch.’ (Eklesiastes 9:11) Ma yib e riya’ ngak e girdi’ ni bochan e yad bay ko gin ni bay e riya’ riy ko ngiyal’ nib kireb.
8, 9. Ke diin ma kad nanged ni ri ma runguydad Got?
8 Ere ke fel’ lanin’dad ni bochan e kada filed ni gathi Jehovah tapgin e gafgow. Machane ma runguydad Jehovah ma ma lemnag e pi n’en ni ma buch rodad, fa? Ri ma runguydad! Gad manang ni ma runguydad Jehovah ya Thin Rok e ma weliy ngodad fan ni ke pag e girdi’ ni nga ranod u kanawoen e kireb. Bay l’agruw i fan ni ke pag Got e kireb: mat’awen ni nge gagiyeg nge feni yul’yul’ e girdi’. Jehovah e ir e En ni Ga’ ma ir e en ni Tasunumiy ere de t’uf rok ni nge weliy ngodad fan ni ke pag e kireb. Machane ke tamilangnag fan ngodad ni bochan e ma runguydad.
9 Ku mu lemnag yugu boch e thin nu Bible ni ma micheg ni ma runguydad Got. I “taganan’ ngay” u nap’an ni sug e fayleng ko kireb u nap’an Noah. (Genesis 6:5, 6) Ke thil laniyan’ Got e ngiyal’ ney, fa? Danga’, ya der ma thil. (Malaki 3:6) Dabun Got e tin ni de mat’aw ma dabun ni nge yib e gafgow ngak e girdi’. Be yog e Bible ni dabi n’uw nap’an ma ra thilyeg Got urngin e kireb ni sum ni bochan e gagiyeg rok e girdi’ nge bochan e maruwel rok Moonyan’. Pi n’en ney e gathi ma micheg ni ma runguydad Got?
10. Uw rogon e gafgow ni be tay e girdi’ u wan’ Jehovah?
10 Pi tamachib e ma kirebnag murung’agen Got u nap’an ni yad ma yog nib m’agan’ Got ngay ni ngada gafgowgad. Gathi arrogon, ya ri baadag Got ni nge chuweg urngin e gafgow rok e girdi’. Be gaar 1 Peter 5:7, “Be lemnag rogomed.” Ireray e n’en ni ri be fil e Bible!
Mang Fan ni Gad Bay u Fayleng?
11. Mang e ma yog e yurba’ i teliw u fan ni bay e girdi’ u fayleng?
11 Ere chiney e ngada weliyed e bin l’agruw e deer ni boor e girdi’ ni ma lemnag, Mang fan ni gad bay u roy u fayleng? Ma yog e yurba’ i teliw ni bay e girdi’ u fayleng ni ngar pared riy bochi ngiyal’. Yima lemnag ni fayleng e bang ni ngan toffan riy bochi ngiyal’ ni yibe milekag nga bang ni ngan par riy. Ba oloboch e machib rok boch e tamachib ni yad ma yog ni ra gothey Got e re fayleng ney. Bochan ni aram rogon e machib rok e yurba’ i teliw, ma boor e girdi’ ni ma finey ni kab fel’ ni ngar rin’ed urngin ban’en nrayog rorad e chiney ya ke mus ni yam’ e bay nga m’on rorad. Machane mang e ri be fil e Bible u murung’agen fan ni gad bay u fayleng?
12-14. Mang e machib nu Bible u murung’agen e n’en nib m’agan’ Got ngay ni fan ko fayleng nge girdi’?
12 Bay ban’en nib fel’ nib m’agan’ Got ngay ni fan ko fayleng nge girdi’ riy. Ir e “sunumeg e fayleng, ke ngongliy rogon ke par. De ngongliy nge tay ni bangi ted ndariy ban’en riy ma der tugul ban’en riy, yi tay ni ngi i par e girdi’ riy.” (Isaiah 45:18) “Fayleng e kam tay nga daken e def riy nri be par nib mudugil, ndabiyog ni ngan mithmitheg.” (Psalms 104:5) Pi thin ney e ma ayuwegdad ni nge tamilang u wun’dad e n’en nib m’agan’ Got ngay ni fan ko fayleng nge girdi’ riy ma ra ayuwegdad ni ngada nanged fan ni gad bay u fayleng.
13 Genesis ko guruy ni 1 nge 2 e ma tamilangnag ni ri i kol ayuw Jehovah i fal’eg rogon e fayleng ni fan e nge par e girdi’ riy. Tomren ni sunmiy urngin ban’en u fayleng me guy urngin e n’en ni ke ngongliy ma “rib fel’ u wan’.” (Genesis 1:31) I tay Got e bin som’on e pumoon nge ppin, ni Adam nge Efa, nga lan fare milay’ nrib fel’ nu Eden me pi’ ngorow e ggan nib fel’ ma boor. Me yog ngorow ni gaar: “Mu diyengow nge yoor pi fakmew, nge wer e piin ni owchemew nga gubin yang u fayleng ngar pired riy mi yad suwey.” Mm’agan’ Got ngay ni nge yog e bitir ngorow ni yad ba flont, ma nge paradis ga’ngin yang e fayleng me suwey e girdi’ e pi gamanman riy.—Genesis 1:26-28.
14 Mm’agan’ Jehovah ngay ni nge sug e fayleng ko girdi’ nib flont ni yad taab tabinaw mar pared u fayleng ni manemus. Be gaar e Thin Rok Got: “Piin ni yad mmat’aw e bay ra pired u daken e binaw u fithik’ e gapas, me par ni taferad ni dariy n’umngin nap’an.” (Psalms 37:29) Arrogon, susun e nge par e girdi’ ni manemus u fithik’ e felfelan’ u Paradis u fayleng. Aram e n’en nib m’agan’ Got ngay, ma aram e n’en ni ri be fil e Bible!
Mang e Ra Buch u Nap’an ni Gad Ra Yim’?
15. Mang e machib ko yurba’ i teliw nu fayleng u murung’agen e n’en ni ra buch rodad u nap’an ni gad ra yim’?
15 Chiney e ngada weliyed e bin dalip e deer ni boor e girdi’ ni ma magawonnag lanin’rad: Mang e ra buch rodad u nap’an ni gad ra yim’? Boor raba’ i teliw nu fayleng ni ma yog ni bay ban’en u fithik’ e girdi’ ni ma par ni kab fas u tomren nra yim’ e dowef. Boor raba’ e teliw ni ka yad ma machibnag ni ma gechignag Got e piin nib kireb u fithik’ e nifiy u infierno mi yad gafgow riy ni manemus. Riyul’ e re machib nem, fa? Mang e ri be fil e Bible u murung’agen?
16, 17. Rogon e machib nu Bible, uw rarogon e piin ni kar m’ad?
16 Be gaar e Thin Rok Got: “Piin ni kab fas e yad manang ni yad ra yim’; machane piin ni kar m’ad, e dariy e chi n’en ni yad manang ku dariy e tow’ath rorad, ya kan pagtilrad.” “Dariy e chi n’en ni yad manang,” ere dabkiyog ni ngar rung’aged ban’en, ara ra guyed ban’en, ara numon, ara thamiy, ara lemnag ban’en. Dab kun pi’ puluwrad. Ra diin min pi’ puluwrad? Dabkiyog ni ngar maruwelgad! Maku reb e “t’ufeg rorad nge fanenikan rorad nge awan’ rorad e ki m’ay,” ya dabkiyog ni ngar thamiyed ban’en.—Eklesiastes 9:5, 6, 10, NW.
17 Rib tamilang ma rib mom e n’en ni yog e Bible—piin ni kar m’ad e gathi ka yad be par nib fas u yugu bang. Dariy ban’en u fithik’ i dowdad ni ma chuw u nap’an ni gad ra yim’ miki par ni kab fas. Maku de chuw u fithik’ i dowdad me fas bayay u yugu reb e dowef ko girdi’ fa gamanman ni bod ni ma machibnag boch e girdi’. Rayog ni ngan tamilangnag e machib nu Bible ni aray rogon: Yafos ni bay rodad e chiney e bod e nifiy u ba magal ara kendel. Nap’an ni ga ra thang fare magal ma der yan e nifiy riy nga bayang. Ya dakuriy.
18. Mang e ra tamilang u wan’ be’ u nap’an ni ra fil u Bible ni dakuriy ban’en ni manang e piin ni kar m’ad?
18 Amu lemnag fan e re machib nem ni rib mom machane tin riyul’ ni ba gel gelngin. Nap’an ni ra beeg be’ e Bible me fil ni dakuriy ban’en ni manang e piin ni kar m’ad, ma ra tamilang u wan’ ni demtrug fene damumuw e pi girdi’ rok u nap’an ni ka yad ba fas, machane dabiyog ni ngar magawonniged e chiney ni kar m’ad. Ma ra tamilang u wan’ ni pi girdi’ rok ni kar m’ad e dabkiyog ni ngar rung’aged ban’en, fa ra guyed ban’en ara numon ara thamtham ara lem. Ere dab ra tawrenggad nib gel u purgatorio, ara ur gafgowgad u fithik’ e nifiy. Machane bay e machib u Bible ni dawori pag talin Got e piin ni kar m’ad ma bay ra fosgad ko yam’. Rib fel’ e re athap nem!—John 5:28, 29.
Ba Ken e Babyor ni Beech ni Fan Ngodad
19, 20. Mang e mmil fan ngodad e Kristiano, ma mang babyor e kan fal’eg ni fan ko machib rodad u mit e tabinaw?
19 Kada weliyed dalip e deer ni boor e girdi’ ni ma fith. Ba tamilang mab mom e machib ko Bible u murung’agen e dalip i deer nem. Ri gad ba felfelan’ ngay ni rayog ni ngada weliyed e machib nriyul’ nu Bible ngak e piin ni yad ba adag ni ngar nanged e machib nu Bible! Machane ku bay boch e deer ni ku ba ga’ fan ni thingari nang e piin ni yad ba yul’yul’. Mab mil fan ngodad ni gad e Kristiano ni ngada ayuweged e pi girdi’ nem ni ngar nanged e fulweg ko deer rorad.
20 Ba mo’maw’ ni ngan fil e machib nu Bible ngak e girdi’ nrogon nib tamilang mab fel’ u wan’rad. Ere ke fal’eg “fare tapigpig nib yul’yul’ mab gonop” ba ken e babyor ni nge ayuwegdad ni ngada weliyed e machib nrogon nib tamilang mab fel’ u wan’ e girdi’. Ma kan fal’eg fare ke babyor ni fan ko machib ni gad ma tay u mit e tabinaw. (Matthew 24:45-47) Re babyor ney e 224 e page riy ma fithingan e What Does the Bible Really Teach? (Mang e Ri Be Fil e Bible?)
21, 22. Mang boch ban’en ni bay ko fare ke babyor ni What Does the Bible Really Teach?
21 Kan pi’ e re ke babyor nem u nap’an e “Fol Rok Got” District Convention ko Pi Mich Rok Jehovah ko duw ni 2005 ara 2006, ma boor ban’en nib fel’ ko re ke babyor nem. Bay ba guruy u tabolngin ni lal e page riy ni ra ayuwegdad ni ngada tababnaged e fol Bible. Rayog ni ngam weliy fapi sasing nge fapi thin ko Bible ni bay ko re guruy nem. Ma rayog ni ngam weliy e thin ko re guruy nem ni ngam ayuweg e piin ni yad be fil e Bible u rogon ni ngar gayed fapi guruy u lan e Bible.
22 Rib mom mab tamilang rogon ni kan yoloy e re ke babyor nem. Un guy rogon ni nge rich e machib nga gumir’chaen e en ni be fil e Bible ni yibe guy rogon ni nge un ko numon. U tabolngin urngin e guruy ma bay boch e deer riy ni n’en ni yira fil ko re guruy nem ma tungun urngin e guruy u lan e kahol e bay riy e “N’en ni Be Fil e Bible.” Ma bay e thin ko Bible riy ni fulweg ko fapi deer ni bay ko tabolngin. Bay boch e sasing nib fel’ nge boch e fanathin u lan e re ke babyor nem ni ra ayuweg e en ni be fil e Bible ni nge tamilang boch e machib ni beech u wan’. Mmom e machib ni bay ko re ke babyor nem, machane bay boch e thin u tungun fare ke babyor ni ra ayuwegem ni ngam weliy 14 e machib nib mo’maw’ i nang fan ni faanra ba adag e en ni ga be machibnag ni nge fil e pi thin nem.
23. Mang boch ban’en nrayog ni ngam rin’ u nap’an ni ga be fanay fare Bible Teach ko fol Bible?
23 Kan fal’eg fare ke babyor ni Bible Teach ni fan ko girdi’ nib thilthil e skul rorad ara ba thilthil e teliw rorad. Faanra gathi ri manang e en ni be fil e machib e Bible, ma sana dabiyog ni nge fil reb e guruy u lan reb e wik. Dab mu gur ni ngam m’aynag reb e guruy ya ngam guy rogon ni nge rich e machib nga gum’irchaen e en ni be fil e Bible. Faanra de tamilang reb e fanathin u lan fare ke babyor u wan’, ma ga weliy fan ara mu weliy yugu reb e fanathin. Mu fil fare ke babyor, ma ga athamgil ni ngam weliy e machib riy ya nge yib angin, ma ga yibilay e ayuw rok Got ya nge yog rom ni ngam “machibnag e thin rok Got nrogon.”—2 Timothy 2:15.
Mu Pining e Magar u Wan’um ni Bochan e Gab Tow’ath
24, 25. Mang tow’ath e ke pi’ Jehovah ngak e girdi’ rok?
24 Ke pi’ Got ba tow’ath ngak e girdi’ rok ni reb e tow’ath ni ri ba ga’ fan. Ke ayuwegdad ni ngada nanged e machib nriyul’ u murung’agen. Thingar dab da darifannaged e re tow’ath nem! Ya ke mithag Got e pi n’en nib m’agan’ ngay rok e piin ni yad ba tolangan’ ma ke tamilangnag ngak e piin ni yad ba sobut’an’. Aram e n’en ni yog Jesus ni gaar: “Chitamag, ni gur e Somol nu tharmiy ngu fayleng! Kari mmagar ya kam dag ngak e piin ndar skulgad e n’en ni kam mithag rok e piin ni yad ba llowan’ nge piin ni yad ba skul.” (Matthew 11:25) Ri gad ba tow’ath ni gad bay u fithik’ e piin nib sobut’an’ ni yad be pigpig ngak Jehovah ni ir e En ni Th’abi Pilung.
25 Miki pi’ Got e tow’ath ngodad ni ngada machibniged yugu boch e girdi’ ngar nanged Got. Dab mu pag talin ni kan t’ar e thin nga daken Got ya yibe weliy e machib ni yugu ban’en u murung’agen. Ere boor e girdi’ e be oloboch u wun’rad ya yad ma lemnag ni der ma runguydad Jehovah. Me gur, ga ba adag ni ngam yal’uweg e machib nib oloboch u murung’agen Got, fa? Ga ba adag ni nge nang e piin ni yad ba yul’yul’ e machib nriyul’ u murung’agen Got, fa? Ere mu dag ni ga ma fol rok Got ni gab pasig i machibnag e n’en ni ma weliy e Bible. Thingari nang e piin ni yad be gay e machib nriyul’ e n’en ni ri be fil Bible.
Mang e Fulweg Rom?
• Uw rogon ni gad manang ni ma runguydad Got?
• Mang fan ni gad bay u fayleng?
• Mang e ra buch rodad u nap’an ni gad ra yim’?
• Mang boch ban’en ko fare Bible Teach ni ga ba adag?
[Pictures on page 8]
Ma machibnag e Bible ni ra m’ay e gafgow
[Credit Lines]
Sasing ko fare rugod ni be er nga lang ko ba’ ni mat’aw: © Bruno Morandi/age fotostock; fare pin ni bay ko ba’ ni gilay’: AP Photo/Gemunu Amarasinghe; fapi girdi’ ni bay u but’ ko ba’ ni mat’aw, refugees: © Sven Torfinn/Panos Pictures
[Picture on page 9]
Piin nib mat’aw e ra par nib fas ni manemus u Paradis