Ga Ma Fith Ko, “Ba Uw Jehovah?”

“Kar pared nib palog rog . . . Ma da rogned ko, ‘Ba uw Jehovah?’”​—JEREMIAH 2:5, 6, NW.

1. Nap’an ni ra fith e girdi’ ko, “Ba uw Got?,” mang e n’en bay u wan’rad?

“BA UW Got?” Boor e girdi’ ni ma fith e re deer nem. Boch i yad e ke mus ni yad be athamgil ni ngar nanged boch ban’en u murung’agen e En Ta Sunmiy, ko u uw e ma par riy? Boch e girdi’ e kar fithed e re deer ney u tomren ni keb e gafgow nib gel nga boor e binaw ara nap’an ni keb e magawon ngorad nib gel ma dar nanged ko mang fan ni de rin’ Got ban’en ngay. Machane boch e girdi’ e ri der ma fith murung’agen Got ya bochan ni ri de mich u wan’rad ni bay Got nib fas.​—Psalm 10:4.

2. Chon mini’ e kar gayed Got ma keb angin ngorad?

² Riyul’ ni boor e girdi’ ni kar guyed boor e mich ni bay Got. (Psalm 19:1; 104:24) Boch i yad e ke fel’ u wan’rad ni ke mus ni bay ba mit e teliw rorad. Machane t’ufeg ko thin riyul’ nib gel e ke k’aring bokum milyon e girdi’, ko urngin e nam, ni ngar fal’eged i gay fare Got nib riyul’. De aw nib m’ay fan e maruwel ni kar ted ya bochan “ndariy bagadad nib mal’af Got rok nga orel.”​—Acts 17:26-28.

3. (a) U uw e ma par Got riy? (b) Mang e be yip’ fan fare deer u Bible ni, “Ba uw Jehovah?”

³ Nap’an ni ra pirieg be’ Jehovah, me tamilang u wan’ ni “Got e reb e Kan,” ndabi guy e girdi’ nga owchen. (John 4:24) I yog Jesus e “Chitamag ni bay u tharmiy” ngak e bin riyul’ e Got. Mang fan e re n’em? Ya bochan fare giyow ni be par e chitamangidad riy, ni be yip’ fan, e gin ni yima ta’fan, ni taareb rogon ko tharmiy nib riyul’ ni bay u lan e lang ni kab tolang ko fare fayleng. (Matthew 12:50; Isaiah 63:15) Yugu aram rogon ni dabiyog ni ngad guyed Got nga owchedad, machane, ke gagiyegnag ni ngad nanged murung’agen ma ngad filed boch murung’agen e tin nib m’agan’ ngay. (Exodus 33:20; 34:6, 7) Ma fulweg boch e deer ni ma fith e piin nib yul’yul’ ni yad be athamgil ni ngar nanged fan e yafas. Rogon e pi n’en ni bay rogon ko yafas rodad, e pi’ boch ban’en ni yima pagan’ ngay ni fan ni ngad nanged e lem rok u murung’agen, ko uw rogon e pi n’en nem u wan’ ma ngad nanged ko ba puluw e tin ni gad baadag ko tin nib m’agan’ ngay fa. Baadag ni ngad filed ngad nanged murung’agen e pi n’en ney ma ngad athamgilgad ni ngad nanged e fulweg riy. U daken Jeremiah ni profet, me puwan’ Jehovah ngak e girdi’ nu Israel kakrom ya bochan de yog rorad ni ngar rin’ed e re n’en ney. Yad manang fithingan Got, machane dar fithed ko, “Ba uw Jehovah?” (Jeremiah 2:6, NW) Gathi ri yad ma lemnag e tin nib m’agan’ Jehovah ngay. Dar gayed kenggin e motochiyel rok. Nap’an nib t’uf ni ngam dugliy ban’en, ni tin baga’ nge tin nib achichig, ma ga ma fith ko, “Ba uw Jehovah?”

Piin Ma Fith Got ni Nge Pow’iyrad

4. Uw rogon ni nge fel’ rogodad ko tin ni rin’ David ni be ning ngak Jehovah ni nge pow’iy?

⁴ Nap’an ni kab pagal David, ni fak Jesse, me par ni kari mich Jehovah u wan’. Ke nang ni Jehovah e ir “fare Got nib fas.” David e ir rok ma ke pirieg e ayuw rok Jehovah. Bochan e michan’ nge t’ufeg nga “fithingan Jehovah” e ke k’aring David, me li’ Goliath ni be’ nu Philistine ni ri boor e talin e cham rok. (1 Samuel 17:26, 34-51) Machane, angin nib ngak David e de k’aring ni nge pagan’ ngak. De yog ni urngin ban’en ni nge rin’ e chiney, ma ra taw’athnag Jehovah. Biyay nge biyay u lan e pi duw u tomren, ma ma fith David Jehovah ni nge pow’iy u nap’an nib t’uf ni nge dugliy ban’en. (1 Samuel 23:2; 30:8; 2 Samuel 2:1; 5:19) Me ulul ko meybil ni gaar: “Jehovah, mfil ngog e tirom e kanawo’; mu dag ngog nggu nang. Mfil ngog rogon ni nguug lem ma gu be ngongol nib mat’aw ko thin rom nib riyul’; yi gur e Taayuw rog. Kakadabul nge mada’ ko nep’ ni gu be par ni gur e ba pagan’ug ngom.” (Psalm 25:4, 5, NW) Ireray e n’en ni rib fel’ ni ngad folgad riy!

5, 6. Uw rogon ni i gay Jehoshaphat Jehovah ko tayim nib thil thil ko yafas rok?

⁵ U nap’an Jehoshaphat ni Pilung, ni bin lal e pilung nib u tabinaw rok David, ma fapi salthaw u dalip e nam ni yad be maruwel u taabang e kar bad ni ngar chamgad piyu Judah. Ngiyal’ ni mada’nag e re magawon ney me tiyan’ Jehoshaphat ni “nge fal’eg i gay Jehovah.” (2 Kronicles 20:1-3, NW) Gathi ireray e bin som’mon ni ke fal’eg Jehoshaphat i gay Jehovah. Kari dabuy fare pilung e liyor ku Baal ni aram e ngongol ni ri ma rin’ e girdi’ ni apostate u northern kingdom nu Israel me me’leg ni nge yan ko kanawo’ rok Jehovah. (2 Kronicles 17:3, 4) Ere chiney ni ke mada’nag Jehoshaphat reb e magawon, ma uw rogon ni ke “fal’eg i gay Jehovah”?

⁶ Nap’an ni fek e meybil u fithik’ e yoor u Jerusalem ko re ngiyal’ ney nib mo’maw’, me dag Jehoshaphat ni keb ngan’ gelngin Jehovah nth’abi gel. Kari lemnag murung’agen e tin nib m’agan’ Jehovah ngay ni i dag ko ngiyal’ ni tuluf girdien yugu boch e nam me pi’ reb e binaw ngak piyu Israel ngar pared riy. Ba puluw u wan’ fare pilung nib t’uf rok e ayuw nib rok Jehovah. (2 Kronicles 20:6-12) I pag Jehovah ni ngan pirieg ko ngiyal’ nem? Ri arrogon. U daken Jahaziel, ni reb e Levite, me pi’ Jehovah boch e thin nib tamilang ngar folgad riy, ma bin migid e rran ma Ke gagiyegnag ni nge gel e girdi’ rok ko mahl. (2 Kronicles 20:14-28) Uw rogon ni nge mudugil lanin’um ni Jehovah e ku rayog ni ngam pirieg ko ngiyal’ ni ga ra yan ngak ya ga baadag ni nge pow’iyem?

7. Meybil rok mini’ e ma motoyil Got ngay?

⁷ Jehovah e der laniyan’. Ke pining urngin e pi nam ni ngar gayed u daken e meybil. (Psalm 65:2; Acts 10:34, 35) Manang ko mang e tin ni bay u lan gum’irchaen e piin ni ma ning ban’en ngak u fithik’ e yul’yul’. Ke micheg ngodad ni nge motoyil ko meybil ko piin nib mat’aw. (Proverbs 15:29) Me pag boch e girdi’ ni ngara pirieged ni kafram ma kar daged ni dariyfan u wan’rad machane chiney e yad be gay u fithik’ e sobut’an’ ni nge pow’iyrad. (Isaiah 65:1) Maku ra motoyil ko piin ni dar folgad ko motochiyel rok kafram machane chiney e kar kalgad ngan’rad u fithik’ e sobut’an’. (Psalm 32:5, 6; Acts 3:19) Machane, faanra gum’irchaen be’ e der ma fol ku Got, ma ra aw ndariy fan e meybil ni ma tay. (Mark 7:6, 7) Mu lemnag boch ban’en ni dag ni aram rogon.

Kar Ninged machane Dan Pi’ Ngorad

8. Mang fan ni ke dabuy Jehovah fare meybil ni fek Saul ni Pilung?

⁸ Tomren ni ke yog Samuel ni profet ngak Saul ni Pilung ni ke n’ag Got ya bochan der ma fol rok, me paraw nga but’ u mit Jehovah. (1 Samuel 15:30, 31) Machane n’en ni rin’ e de yib u gum’irchaen. De nameg Saul ni nge fol ku Got, ya n’en ni baadag e ngan n’uf u p’eowchen e girdi’. Me taaboch, u nap’an nib piyu Philistine ni ngar chamgad ngak piyu Israel, me Saul e i ngongol ni be dake be gay Jehovah. Machane, nap’an ni de yib e fulweg, me yan nge guy reb e sothuw, ni yugu aram rogon ni manang ni ke m’ay i yog rok Jehovah ni ireray e tin nib kireb. (Deuteronomy 18:10-12; 1 Samuel 28:6, 7) Be sumarnag e re n’en ney, ma 1 Kronicles 10:14 (NW) e be yog murung’agen Saul ni gaar: “De gay Jehovah ni nge pow’iy.” Mang fan ni be yog ni aram rogon? Bochan ni pi meybil rok Saul e de yib ko michan’ rok. Ere, gowa de meybil.

9. Mang e ba kireb riy u nap’an ni ke wenignag Zedekiah ngak Jehovah ni nge pow’iy?

⁹ Taareb rogon ko ngiyal’ ni ke chuchugur ni nge mus fare am nu Judah, ma kan fek boor e meybil ma kan yan ngak e profet rok Jehovah ngan fith boch e deer ngorad. Machane, girdi’ e ka rogned ni yad ma ta’fan Jehovah maku yad ma meybil ko liyos. (Zephaniah 1:4-6) Yugu aram rogon ni ka ranod ngar fithed boch e deer ku Got nde yib u gum’ircha’rad, ma dar fal’eged gum’ircharad ngar folgad ko tin nib m’agan’ ngay. Zedekiah ni fare Pilung e ke wenig ngak Jeremiah ni nge fith boch ban’en ni fan ngak. Ke m’ay i yog rok Jehovah ko mang e susun ni nge rin’. Machane ke war e michan’ rok ma ke rus ko girdi’, ma de fol fare pilung ko thin ni yog Jehovah, ma daki fulweg Jehovah taban e thin ni ra adag fare pilung.​—Jeremiah 21:1-12; 38:14-19.

10. Mang e ba kireb u rogon ni ke ning Johanan ku Jehovah ni nge pow’iy, ma mang e gad ra fil ko kireb rok?

¹⁰ Tomren ni kan gothey yu Jerusalem ma fapi salthaw nu Babylon e kar chuwgad u rom ma kar koled piyu Jew ni kar manged kalbus, me fal’eg Johanan rogon ni nge fek piyu Jew ni tin ka ba’ u Juda ni de yoor nga ranod nga Egypt. Kan yarmiy e pi n’en ni ngan rin’, machane u m’on ndawora chuwgad e wenignag Jeremiah ni nge fek e meybil ni fan ngorad ma nge wenignag ngak Jehovah ni nge pow’iyrad. Machane, nap’an ni dan fulweg ngorad nrogon e n’en ni yad baadag, maku kar ululgad i rin’ e tin kar yarmiyed kafram. (Jeremiah 41:16–43:7) Kam guy boch ban’en ko pi n’en ney nra fel’ rogom riy nfaan ga ra gay Jehovah ni nge ayuwegem, ma ra pag ni ngam pirieg?

“Nguun Guy Rogon Ngan Nang e Tin Riyul’”

11. Mang fan nib t’uf ni ngad folgad ko thin ni bay ko Efesus 5:10?

¹¹ Liyor ni bin riyul’ e gathi ke mus ni ngad daged ni kad ognaged ku Got u daken e taufe, ma ngad uned ko pi muulung, ma ngad machibnaged e girdi’. Yafas rodad ni polo’ e ba muun ngay. Gubin e rran ni bay ban’en ni be diliiy lanin’dad​—ni boch riy e mo’maw’ ni ngan guy, ma boch e rib gagiyel—​ni rayog ni nge chifegdad nga orel ko kanawo’ nib puluw ko pigpig ku Got. Mang e gad ra rin’ nbochan e pi n’en ney ni be diliiy lanin’dad? Nap’an ni yol Paul ni apostal ngak e pi Kristiano nib yul’yul’ u Efesus, me fonownagrad ni gaar: “Mu guyed rogon ngam nanged e n’en ni ir e mm’agan’ Somol ngay.” (Efesus 5:10) Taw’ath ni yib ko ngan rin’ ban’en ni aram rogon e kan dag ni boor yay u lan e Bible.

12. Mang fan ni de felfelan’ Jehovah u nap’an ni ke fek David fare kiwaren e m’ag nga Jerusalem?

¹² Tomren ni kan sulweg fare kiwaren e m’ag nga Israel ma kan chaariy u Kiriath-jearim ni boor e duw, me David ni Pilung e baadag ni nge fek’ nge tay nga Jerusalem. Me non ngak e pi pilung ko girdi’ ni ngan fek fare Kiwaren e M’ag ‘nfaanra be m’ug nib fel’ u wan’rad mab fel’ u wan’ Jehovah.’ Machane de yog rok ni nge yaliy nib fel’ rogon nge nang ko ri mang e tin nib m’agan’ Jehovah ngay. Faan ma nge rin’, ma ri dabni tay fare Kiwaren e M’ag nga daken e karro. Susun piin ni Kohathite Levites e yad ra mat’nag, rogon ni yog Got ngorad nib tamilang. Yugu aram rogon ni gubin ngiyal’ ni ma fith David boch ban’en ngak Jehovah ni nge pow’iy, ma ngiyal’ ney e de yog rok ni nge yodor u kanawo’ nib puluw. Ma rib gel e buch waathan ni keb nbochan. Me taaboch me yog David ni gaar: “Ke yib e damumuw rok Jehovah nib gel ngodad, ya bochan dada fal’eged i gay nrogon ko yalen ni yima rin’.”​—1 Kronicles 13:1-3; 15:11-13, NW; Numbers 4:4-6, 15; 7:1-9.

13. U lan reb e tang ni kan nin’ u tomren ni ke fel’ rogon ni kan fek fare Kiwaren e m’ag nga bang, ma mang e puguran ni kan uneg ngay?

¹³ Nap’an ni fek piyu Levites fare Kiwaren e M’ag u naun rok Obed-edom nga Jerusalem, mi nin’ reb e tang ni David e ke yoloy. Ba muun ngay reb e puguran ni yib u gum’irchaey ni gaar: “Ngan fal’eg i gay Jehovah nge gelngin, mu gay owchen ni gubin ngiyal’. Dab mu pagtalin e maruwel ni ke rin’ ni yira ngat ngay, nge pi maangang ni fal’eg nge pufthin ni ma yib u l’ugun.”​—1 Kronicles 16:11, 12, NW.

14. Uw rogon ni nge fel’ rogodad ko tin nib fel’ ni dag Solomon nge tin kireb ni ke rin’ ko tomur ko yafas rok?

¹⁴ U m’on ni dawori yim’ David, me fonownag Solomon ni fak ni gaar: “Faan ram fal’eg i gay [Jehovah], ma ra pag ni ngam pirieg.” (1 Kronicles 28:9, NW) Nap’an ni i tabab Solomon ko gagiyeg, me yan nga Gibeon, ni aram e binaw ni bay fare tento riy ni yima muulung ngay, min pi’ e maligach ngak Jehovah. Mu rom i pining Jehovah Solomon riy ni gaar: “Mu ning! Mang e gu ra pi’ ngom?” Ma rogon ni i fulweg Jehovah ko n’en ni ke ning Solomon ngak, e pi’ e gonop nge tamilangan’ ngak ni boor ni fan ni nge pow’iy piyu Israel, ma ki uneg ngay e flaab nge ta’ fan. (2 Kronicles 1:3-12, NW) I fanay yaan e naun ni pi’ Jehovah ngak David, me toy Solomon e tempel nrib pag fene fel’ yaan. Machane murung’agen e mabgol ni tay, ma de yog rok Solomon ni nge fal’eg i gay Jehovah. I leengiy Solomon boch e ppin ni gathi tapigpig rok Jehovah. Bang ko tomur ko yafas rok, ma kar chefeged gum’irchaen nga orel rok Jehovah. (1 Kings 11:1-10) Demtrug rogon ni be m’ug feni gilbuguwdad, ma gadad ba llowan’, ara feni yoor e tamilangan’ rodad, mab ga’ fan ni nguud “guyed rogon ni ngad nanged e n’en nib m’agan’ Somol ngay”!

15. Nap’an Zerah ni be’ nu Ethiopia e ke yib ni nge cham nga Judah, ma mang fan ni ke meybil Asa u fithik’ e pagan’ nra ayuweg Jehovah piyu Judah?

¹⁵ Kan dag ni rib t’uf e re n’ey ko fare chep u murung’agen e gagiyeg ni tay Asa, ni rebi fak tungin Solomon. Ragag nge taareb e duw u tomren ni ke mang Asa pilung, ma Zerah ni be’ nu Ethiopia e ke gagiyegnag taareb e milyon e salthaw ni ngar chamgad piyu Judah. Ra ayuweg Jehovah piyu Judah? Ke pag 500 e duw u m’on riy, me weliy Jehovah nib tamilang ko mang e rayog ni ngeb ngak e girdi’ rok nfaanra ur motoyilgad ngak mi yad fol ko motochiyel rok nge n’en nra yib ngorad nfaan dabra folgad. (Deuteronomy 28:1, 7, 15, 25) U nap’an ni tabab ko gagiyeg rok, me chuweg e pi altar nge pi pillar u Juda ni kan fanay ko liyor ni googsur. I fonownag e girdi’ ngar “fal’eged i gay Jehovah.” De sonnag Asa ni ngeb e gafgow ngak fin ni rin’ e re n’em. Ere u daken e michan’ rok Asa ngak Jehovah, me meybil ngak ni nge rin’ ban’en ni fan ngorad. Mang angin ni yib? Bochan e re n’em ma kari gel Judah ko mahl.​—2 Kronicles 14:2-12, NW.

16, 17. (a) Yugu aram rogon ni ke gel Asa ko mahl, ma mang puguran e ke pi’ Jehovah ngak? (b) Nap’an ni ke rin’ Asa ban’en ni de fel’, ma mang e ayuw ni kan pi’ ngak, machane mang e ke rin’? (c) Uw rogon ni nge fel’ rogodad nfaan gad ra lemnag e ngongol rok Asa?

¹⁶ Yugu aram rogon, ma nap’an ni ke sul Asa ni ka fini gel ko mahl, me l’og Jehovah Azariah ni nge mada’nag fare pilung ma nge yog ni gaar: “Mmotoyil ngog, O Asa nge Judah ni polo’ nge Benjamin! Ra un Jehovah ngomed nfaan gimed ra un ngak; ma ngam fal’eged i gay, ma ra pag ni ngam pirieged, machane faanra ngam digeyed ma ku ra digeymed.” (2 Kronicles 15:2, NW) Asa ni ke pasigan’ biyay, i m’oneg e bin riyul’ e liyor. Machane 24 e duw nga tomren, u nap’an ni ke mada’anag e mahl biyay, ma de yog rok Asa ni nge fal’eg i gay Jehovah. De bieg e Thin rok Got, ma de yib ngan’ e tin ni rin’ Jehovah u nap’an ni yib e pi salthaw nu Ethiopia ngar chamgad piyu Judah. Me rin’ e tin ndariy fan me un ngak piyu Syria.​—2 Kronicles 16:1-6.

¹⁷ Bochan e re n’ey, me l’og Jehovah Hanani ni be’ ni ma tamilangnag ban’en ara seer ni nge fonownag Asa nib gel. Mus u roy, u nap’an ni kan weliy e n’en ni be lemnag Jehovah u murung’agen e re magawon nem, ma susun ni nge fel’ rogon Asa riy. Bathil e n’en ni rin’, ya ke damumuw me tay Hanani nga tafen e chugum. (2 Kronicles 16:7-10) Rib gel e kireban’ riy! Ma uw rogon gadad? Gad ma fal’eg i gay Got machane ma gad dariyfannag e fonow? U nap’an ni ra fanay reb e piilal ni ma lemnag rogodad e Bible ni nge fonownagdad ya bochan ke sor lanin’dad ko fayleng, gad ma pining e magar ko ayuw ni pi’ u fithik’ e t’ufeg ni fan ni ngad nanged e “n’en ni ir e mm’agan’ Somol ngay fa?

Dabmu Pagtalin ni Ngam Fith

18. Uw rogon ni nge fel’ rogodad ko thin ni yog Elihu ngak Job?

¹⁸ Nap’an ni yira mochuch, ma mus ko en ni ki i pigpig ku Jehovah u fithik’ e yul’yul’ e rayog ni nge oloboch. Nap’an ni keb e m’ar ngak Job nrib sonogor, ma ke yim’ e pi bitir rok ma ke kireb boch ban’en rok, ma boch e girdi’ ni yad ba pach e ka rogned boch e thin nib kireb ma de riyul’ u murung’agen, ma bochan e re n’em e kari man laniyan’. Me puguran Elihu ngak ni gaar: “Dariy be’ ni ke yog ni gaar, ‘Bay u uw e Got ni Ani Ga’ ni Ke Sunmiyeg?’” (Job 35:10, NW) Ba t’uf rok Job ni nge tiyan’ ngak Jehovah ma nge yaliy ko uw rogon fare magawon u wan’. I fol Job u fithik’ e sobutan’ ko re puguran nem, ma tin ni dag e ra ayuwegdad ni ngad folgad riy.

19. Mang e n’en ni girdi’ nu Israel e boor yay ni dar ma rin’ed?

¹⁹ Girdi’ nu Israel e yad manang rogon ni ke rin’ Got ban’en ni fan ko nam rorad. Machane ri yad ma pagtalin e re n’en nem u nap’an ni yad ra mada’nag reb e magawon ko yafas rorad. (Jeremiah 2:5, 6, 8) Ngiyal’ ni bay e tayim ni susun ni ngar dugliyed ban’en ko yafas rorad, ma kemus ni yad ma gay e felfelan’ rorad ko bin ngan fith ko, “Ba uw Jehovah?”​—Isaiah 5:11, 12, NW.

Yug Um Fith ko, “Ba Uw Jehovah?”

20, 21. (a) Mini’ e chiney e kar daged e ngongol rok Elisha u rogon ni ke gay Jehovah ni nge pow’iy? (b) Uw rogon ni ngad folwokgad rorad ma uw rogon ni nge fel’ rogodad ko michan’ ni kar daged?

²⁰ Nap’an ni ke m’ay e maruwel ko machib ni tay Elijah, ma Elisha ni tapigpig rok e fek fare wuru’ e mad ni ke mul rok Elijah, me yan nga marichilen e lul’ ni Jordan, me toy nga daken e ran, me fith ni gaar: “Ba uw Jehovah ni fare Got rok Elijah?” (2 Kings 2:14, NW) Me fulweg Jehovah ni be dag ni kan ni thothup rok e bay ku Elisha e chiney. Mang e gad ra fil u roy?

²¹ Bay ban’en ni buch ko ngiyal’ ney ni ba chuchugur ni nge taareb rogon ngay. Boch e piin Kristiano ni kan dugliyrad ni kar ayuweged e maruwel ni ngan wereg e machib e kar m’ad. Ere, piin ni kan pag fan ngorad ni ngar ayuweged e ulung e kar yaliyed e Thin nu Bible ma kar meybilgad ku Jehovah ni nge pow’iyrad. Gubin ngiyal’ ni yad ma fith ko, “Ba uw Jehovah?” Angin nib riy, e be ulul Jehovah ngay ni be pow’iy e girdi’ rok be mon’ognag e maruwel rorad. Gad be folwok ko michan’ rorad fa? (Hebrews 13:7) Faanra aram rogon, ma gad ra par ni gadad ba chuchugur ko ulung rok Jehovah, ma ngad folgad ko n’en be yog, ma ngad uned ko maruwel ni yibe rin’ u tan Jesus Kristus ni ir e be pow’iyey.​—Zekariah 8:23.

Uw Rogon ni Ngam Pi’ e Fulweg?

• Mang fan ni gad ma fith ko, “Ba uw Jehovah?”

• Ngiyal’ ney ma uw rogon ni ngad pirieged e fulweg ko fare deer, ni “Ba uw Jehovah?”

• Mang fan ni boch e meybil ku Got ni nge pow’iyey e der fulweg taban?

• Mang e n’en bay u lan e Bible ni be dag nib t’uf ni “ngan guy rogon ni ngan nang e n’en ni ir e mm’agan’ Somol ngay”?

[Picture on page 17]

Uw rogon ni ke fal’eg Jehoshaphat ni Pilung i gay Jehovah?

[Picture on page 18]

Mang fan ni ke fith Saul boch ban’en ngak e sothuw?

[Pictures on page 19]

Meybil, nge fol Bible, min fal’eg i lemnag ban’en ni fan ni ngari mudugil ko ‘ba uw Jehovah’