Deer ko Piin Ma Bieg

Ba kireb ni ngan li’ reb e gamanman ni yima chuguliy ni bochan ni kari m’ar ara kari pillibthir?

Boor e girdi’ ni ma lemnag boch e gamanman nib fel’ ma yima falfalan’ ngay. Boch e gamanman ni yima chuguliy u tabinaw e ma par nib fel’ thilrad e girdi’ ni ba t’uf rok e eni fak. Ni bod rogon, e kus ni yimanang ni ri yad ma fol ma ri yad baadag daken e masta rorad. Arfan, nib fel’ thilin e girdi’ nge pi gamanman nem ni yima chuguliyrad u tabinaw ni goo yimanang ni rib ga’ ni reb e pi gamanman nem ni ke n’uw nap’an ni ke par rorad.

Machane, n’umngin nap’an e yafas u boor ko pi gamanman nem ni yima chuguliy u tabinaw e gathi rib n’uw nap’an. Kus e rayog ni par nib fas ni gonapan 10 i yan ko 15 e duw fa mang, ma gatuw, e be yan u rogon ere miti gatuw. Yad ra pillibthir, ma rayog ni ngaur gafgowgad ko m’ar nge marwoth ni rayog ni nge ngochan’ e piin ni yad e fakrad ngorad, ni yad manang rogorad ko ngiyal’ ni kab gel’ ni ri kab pasig e pi gamanman ney. Ere ba kireb ni yira talegrad ko gafgow, ni ngan li’rad?

Reb e Kristiano ma rogon ni baadag ni nge ngongol nib puluw nga rogon e n’en nib m’agan’ Got ngay ni ngan rin’ ko gamanman. Ra uni gafgownagrad ma rib mudugil nib togopuluw ko n’en nib m’agan’ Got ngay, ya Thin rok e gaar: “Ani ba mat’aw e ma ayuweg e yafas ko gamanman ni fak.” (Proverbs 12:10, NW) Machane, re n’ey e gathi fan e ma lemnag Got e gamanman ni taareb rogon ko girdi’. Nap’an ni sunmiy Got e girdi’, me dag ni ba’ e thil ni rib gagiyel u thilrad nge gamanman. Ni bod rogon, ni pi’ athap ko yafas ni manemus ko girdi’, ma ri de pi’ e biney e athap ko gamanman. (Roma 6:23; 2 Peter 2:12) Bochan ni ir e an Tasunmiy, ma aram e bay mat’awun ni nge dugliy rogon e bin nib m’ag e tha’ u thilin e girdi’ nge gamanman.

Genesis 1:28 (NW) e be yog ngodad ko mang e re tha’ nem. I gaar Got ko bin som’mon e girdi’: “Ngam suwey e nig u maday nge pi n’en nib fas ni ma changeg u lan e lang nge urngin mit e n’en nib fas ni be mithmith u daken e but’.” Ma kub chugur i aram rogon ko, Psalm 8:6-8 (NW) ni gaar: “Urngin ban’en me gur [Got] e kam ta’ nga tan e rifrif u ay [girdi’]: tin ba achig e garbaw nge tin ba ga’, yad gubin, maku arrogon e pi gamanman ni maloboch nge arche u lan e lang nge nig u maday.”

I tamilangnag Got ni gamanman e rayog ni ngaun fanay nib fel’ rogon ma rayog ni nga i li’ e girdi’ e gamanman. Ni bod ni, keru’ e gamanman e rayog ni ngan fanay ni mad. Ma ki pithig Got e thin ko girdi’ni ngar longuyed e ufin ko gamanman u tomuren fare Ran ni tharey e fayleng u nap’an Noah, ni nge thufeg e ggan ni yima yung ni ir e som’mon nni pi’.​—Genesis 3:21; 4:4; 9:3.

Re ney e der pi’ mat’awuy ni ngaun li’ e gamanman ni demtrug rogon ara dariy fan fa nga un gosgos ngak. U Genesis 10:9, (NW) e be weliy fare Bible murung’agen Nimrod ni “be’ nib gel ni ba tamakol gamanman.” Maku re verse nem e yog ni re ney e ta’ ir ni “ke mang togopuluw rok Jehovah.”

Arfan, ni yugu aram rogon ma girdi’ e suwrad e gamanman, ma thingari dabi kirebnag rogon ere mat’awun nem ma nga i fanay nib puluw nga rogon kenggin e motochiyel ko Thin rok Got. Re n’ey e sana ra un ngay ni nge dabni pag reb e gamanman ni fakey u tabinaw nga i gafgow ni dariy rogon ya bochan ni ke pillibthir, fa ke maadad nib gel, fa bm’ar ni dabki gol. Ra yan ni aram rogon, ma aram e ba mil fan ngak fare Kristiano ni nge lemnag ko mang e nge rin’. Faanra be lemnag ni kab fel’ ni nge dabni pag fare gamanman nga i gafgow i yan ni dakuriy e n’en ra rin’ miki gol, ma aram e rayog ni nge li’ ngem’.