Ngan Pagan’uy Ngak Jehovah Ni Polo’ U Nap’an Ni Keb E Gafgow

“I Got e ir e manaf rodad me ir gelngidad, gubin ngiyal’ ni ke fal’eg rogon ke par ni ra yib e gafgow ngodad me ayuwegdad.”​—PSALM 46:1.

1, 2. (a) Mang e n’en ni be dag ni de gaman ni kemus ni nga u nog ni ba pagan’dad ngak Got? (b) Mang fan ni thingar ku da rin’ed ban’en ko bin baaray ni kemus ni nga u dogned ni be pagan’dad ngak Jehovah?

BA MOM ni nga nog ni ngad pagedan’dad ngak Got ko bini baaray ni ngad daged ko ngongol rodad. Ni bod rogon, fare bugithin ni “I Got e ke Pagan’dad ngak” ni ke n’uw nap’an ni be m’ug ni kan yoloy ko salpiy ni babyor nge salpiy ni wasey rok yu Meriken.a Lan e duw ni 1956, ma congress nu Meriken e ra ngongliyed reb e motochiyel ni ke tamilangnag e re bugithin nem ni ke mang motto rok yu Meriken. Ma rib gagiyal, ni boor e girdi’​—ni gathi kemus ni goo binem e nam ya gaangin yang e fayleng—​e kar tayed e pagan’ rorad nga daken e salpiy nge fel’ rogon nu fayleng ko bin ngar ted ngak Got.​—Luke 12:16-21.

² Bochan ni gad e tin riyul e Kristiano, ma thingarda rin’ed boor ban’en ko bin ni kemus ni nge lungudad ba pagan’dad ngak Jehovah. Ni ri bod ni “michan’ ni dariy e maruwel riy e ba yam’,” ere kaygi yoor e piin ni be yog ni gad be pagan’dad ngak Got nib m’ay fan ni faanra dabi m’ug ko ngongol rodad. (James 2:26) Fa bin m’on e article, e da filed riy ni pagan’ rodad ngak Jehovah e ma yib i m’ug ni faanra ud meybilgad ngak, nge faanra udi gaweged e kanawo’ ko Thin rok, ma gad sap ko ulung rok nga i pow’iydad. Chiney e ngad guyed ko uw rogon ni gad ra rin e dalip i n’enem ko ngiyal’ ni keb e gafgow nib gel.

Nap’an ni Yira Chuwegey ko Maruwel ara Salpiy ni Be Yib e Rib Lich

3. Mang magawon ko par e be pirieg e pi tapigpig rok Jehovah ko yu ngiyal’ i n’ey ni “kari mo’maw’,” ma uw rogon ni gadad manang ni Got e ba m’agan’ ngay ni nge ayuwegdad?

³ Yu ngiyal’ i n’ey ni “kari gel e magawon riy,” e gad e Kristiano e ka gad be pirieg e gafgow ko par ni bod e yugu girdi’. (2 Timothy 3:1) Arfan, ni bayi n’en ma rayog ni kun talegdad nib tomgin ko maruwel rodad. Ara dariy e n’en ngada rin’ed ya nga kuda maruwelgad nge yoor boch e awa rodad ni bochan ni rib sobut puluwey. Ra taw ko yu ngiyal’ i n’em, ma bayi n’en ma gad pirieg ni ke mo’maw ni ‘ngad ayuweged pi be’ rodad.’ (1 Timothy 5:8) Gur fare Got ni Tha’bi Tolang gathi ba m’aguwan’ ni nge ayuwegdad ko ngiyal’ i n’em? Ri mudugil! Ri arrogon, Jehovah e dera yoror rodad ko urngin e magawon ko yafas ko re m’ag ney. Machane, faanra pagan’dad ngak, ma fare thin ko Psalm 46:1 e ra micheg nib riyul’ u puluwdad ni faani gaar: “I Got e ir e manaf rodad me ir gelngidad, gubin ngiyal’ ni ke fal’eg rogon ke par ni ra yib e gafgow ngodad me ayuwegdad.” Ere, uw rogon, ni gad ra dag ni ke pagan’dad ni polo’ ngak Jehovah ko yu ngiyal’ ni aray rogon ni kan gafgow ni salpiy?

4. Nap’an ni gad ra mada’nag e magawon ko salpiy, ma mang e n’en ni rayog ni ngada yibiliyed, ma uw rogon ni ma fulweg Jehovah e tinem e meybil?

⁴ Reb e kanawo’ ni ngada daged e pagan’ rodad ngak Jehovah riy e ngada sapgad ngak ngad meybilgad ngak. Machane mang e n’en ni rayog ni ngad yibilayed? Faan, gad ra mada’nag e magawon ko salpiy, ma ra t’uf ni nge gel rogon e gonop rodad ko kafram. Ere aray urngin, ni dabisiy, ngaum yibilay! Thin rok Jehovah e micheg ngodad ni gaar: “Machane faanra dariy e gonop rok bigimed, ma nge wenignag ngak Got, ye ir e ra pi’ ngak; yi Got e ba gol ngak urngin e girdi’.” (James 1:5) Arrogon, mu ning e gonop ngak Jehovah​—nge gelngin ni nge yog ni um fanay e llowan’, nge nang fan ban’en, nge tamilangan’ rom ko tinib fel’—​ni bochan ni tini ngau mu dugliy e ra fel’ ma tin ni ga ra mel’eg e ba mat’aw. Chitamangidad nu tharmiy ni rib tarunguyey e micheg ngodad ni ra motoyil ko meybil ni aram rogon. Ma rib m’agan’ ngay ni nge yal’uweg wa’en e piin ni yad be pagan’rad ngak u polo’ i gum’ircharad.​—Psalm 65:2; Proverbs 3:5, 6.

5, 6. (a) Mang ni rayog ni ngad sapgad ko Thin rok Got ni nge ayuwegdad ko magafan’ ko rarogon e par? (b) Mang e gomanga rayog ni ngada rin’ed me achignag e magafan’ rodad u nap’an ni yima talegdad ko maruwel?

⁵ Ra un i sap ko Thin rok Got ni nga i pow’iyey ma ku reb e kanawo’ ni yima dag riy ni ke pagan’dad ngak Jehovah. Pi n’en ni ba’ fan u lan e Bible ni ta’ ni nga i puguran ban’en ngodad e ke m’ug e mich riy ni “rayog ni ngan pagan’uy ngay.” (Psalm 93:5) Yugu aram rogon ni m’ay ni ke pag e 1,900 e duw ni ke yan, ma re ke babyor ko yiiy nem e ba’ riy e fonow ni rayog ni ngan pagan’uy ngay nge tamilangan’ ni rib fel’ ni rayog ni nge ayuwegdad ngaud pared nib fel’ rogon u fithik’ e magawon ko salpiy ni be diliiyey. Mu lemnag bochi rarogon e gonop nu Bible.

⁶ Solomon ni Pilung nib llowan’ e gu’ kakrom me gaar: “Ba fel’ e chuchuw ko ani ma pigpig, ni demtrug ko ba lich fa boor e n’en ni kay; machane pi n’en ni boor ni fan e ani boor ban’en rok e dabiyog ni nge mol ni bochan.” (Eklesiastes 5:12, NW) Ba t’uf e tayim nge salpiy ni fan ko ngan fal’eg rogon ban’en, min klinnag, muun i fal’eg nga i par nib fel’ rogon, nge ayuweg e chugum rodad. Ere faan yira talegdad ko maruwel, ma susun e ngad fal’eged i lemnag ngaud yaliyed rarogon e par rodad, ngad guyed rogon ni nge yog ni ngada nanged e tinib t’uf nge tin ni bochan e gadad baadag. Ra ngad achigniged e magafan’, ma sana ba fel’ ni ngad thiliyeged boch ban’en ko par rodad. Ni bod rogon, ni ngad guyed ko rayog ni ngad pared ko tin ba sobut puluwon fa, ni bod rogon, ni ngada chuweged boch e chugum rodad ni yugu de ga’ fan fa?​—Matthew 6:22.

7, 8. (a) Uw rogon ni dag ni manang ni girdi’ ni de flont e ba mom ni nge pag rogon e magafan’ rorad ko chugum? (Kum guy e footnote.) (b) Mang e fonow nib gonop ni ke pi’ Jesus u rogon ni ngan pilo’ ko magafan’ nib pag rogon?

⁷ Fare Machib u daken e Burey, me fil Jesus ni gaar: “Dabi magafan’med ko ggan nge garbod ni nge yog ngomed ni fan ni ngam pired ni gimed ba fas, fa mad ni fan nga dowmed.”b (Matthew 6:25) Manang Jesus ni girdi’ ni dar flontgad e ka ban’en ni yad ma rin’ ni ma lemnag ni ngar yogniged e tin nib ga’ fan. Ere, ra uw rogon, ma rayog ni ngad “talgad ni dabki magafan’dad” ni bochan e pi n’enem? I gaar Jesus, “Ngam m’oneged u wan’med . . . e gagiyeg rok Got.” Demtrug ko mang magawon nra yib ngodad, ma thingarda ululgad i ta’ e liyor ngak Jehovah ni ir e nge m’on ko yafas rodad. Faan gad ra rin’ ni aram rogon, ma urngin e tin ba t’uf rodad ko yu rran e “ra puthuy” e Chitamangidad nu tharmiy ko tirodad. Dan nang rogon, machane ra ayuwegdad nge yog ngodad e tin ba t’uf rodad.​—Matthew 6:33.

⁸ Ki pi’ Jesus reb e fonow ni baaray ni gaar: “Ri dabi magafan’med nga rogon e bin migid e rran, ya bin migid e rran e ba’ e tirok e magafan’.” (Matthew 6:34, NW) De gonop ni nge pag rogon e magafan’ ko mang e ra fek e gabul i yib. Reb e llowan’ e yoloy ni gaar: “Pi n’en ni gadad ma rusnag ni bochan ko gabul nge langlath e baga ni gathi ri ma yan i aw nib puluw ko tin ni riyul’ ni ma buch.” Faan gad ra sobut’an’ ngad motoyilgad ko fonow nu Bible ni ngaud tayedan’dad ko tin thingari m’on mu ud pired ni ngau da lemnaged reb e rran ngemu ma gad lemnag reb ma rayog ni nge ayuwegdad ko magafan’ nib pag rogon.​—1 Peter 5:6, 7.

9. Nap’an ni gad ra mada’nag e magawon ko salpiy, ma mang e ayuw e gad ra pirieg ko fapi babyor ni be fal’eg “fare tapigpig nib yul’yul’ mab gonop”?

⁹ Nap’an ni gad ra pirieg e gafgow ko salpiy, maku rayog ni ngada daged e pagan’ rodad ngak Jehovah ni aram e ngad sapgad ko pi babyor ni ke fal’eg “fare tapigpig nib yul’yul’ ma ba gonop” nge ayuwegdad. (Matthew 24:45) Munmun, ma fare babyor ni Awake! e ma yib i m’ug boch e thin riy ni murung’agen boch e fonow nge boch ban’en ni yibe yog rogon e n’en ngaun rin’ ko magawon ko par nge salpiy. Fare kenggin ni “Kan talegey ko maruwel​—Uw rogon ni ngan pithig?” u lan fake nem ni August 8, 1991, e ke gagiyelnag riy meruk ban’en ni rayog ni ngan rin’ ma boor e girdi’ ni ke ayuwegrad kar pired nib bagaman e salpiy rorad ma ba baudan’rad ko ngiyal’ ni dakuriy e maruwel rorad.c Machane riyul’, ni pi n’em ni be yog rogon e n’en ngaud rin’ed e thingari fel’ i lemnag nge fel’ rogon i nang fan e riyul’ nib ga’ fan e salpiy. Re ney e kun weliy ko fare article “Ban’en ni Kab Ga’ Fan ko Salpiy,” ni ku be m’ug u lan ere ke babyor nem.​—Eklesiastes 7:12.

Ngal’an e Gafgow nib Gel ni Bochan e M’ar

10. Uw rogon ma n’en ni rin’ David ni Pilung e dag ni ba puluw ni ngaun pagan’uy ngak Jehovah ko ngiyal’ ni kan m’ar nib gel?

¹⁰ Ba riyul’ ni ngaun i pagan’uy ku Jehovah ko ngiyal’ ni keb e m’ar nib gel fa? Ri arrogon! Jehovah e ma thamiy e m’ar ko piin ni kar m’argad u fithik e girdi’ rok. Maku reb, e ba m’agan’ ngay ni nge pi’ e ayuw. Amu lemnag, ni bod rogon, David ni Pilung. I ir rok ma sana m’ar nib ubchiya u nap’an ni faani yoloy rogon e n’en ma rin’ Got ngak e ani ba yal’uw ni ke m’ar. I gaar: “Jehovah e ir e ra ayuweg e yafas rok u daken e bet ko m’ar; bet rok ni gaangin e ra umu thiliyeg u nap’an e m’ar rok.” (Psalm 41:1, 3, 7, 8, NW) Pagan’ rok David ngak Got e par nib gel, me tomur riy me gol fare pilung ko m’ar rok. Ere, ba uw rogon, ni gad ra dag e pagan’ ngak Got ko ngiyal’ ni ke magafan’dad nib gel ko magawon ko m’ar?

11. Nap’an ni rayib e m’ar ngodad, ma mang e rayog ni ngada ninged ngak e Chitamangidad nu tharmiy?

¹¹ Nap’an ni ra yib e m’ar, ma reb e kanawo’ ni gadra dag e pagan’ rodad ngak Jehovah riy e ngad weniggad ngak u fithik’ e meybil ni nge ayuwegdad nge yog ni ngada athamagilgad. Rayog ni ngada ninged ngak nge ayuwegdad ngad “maruwelgad ko gonop” nge yog ni ngada gayed ere dodow ko rogon fel’ngin fithik’ i dowdad ni rayog ni ngad tawgad ngay. (Proverbs 3:21) Ku rayog ni ngada ninged ngak ni nge ayuwegdad nge yog rodad e kadan’ nge guman’ ni bochan ni nge yog ni ngada athamgilgad u fithik’ fare m’ar. Ma bin tha’bi ga’ fan, e gadad baadag ni ngad ninged ngak Jehovah ni nge ayuweg e yafas rodad, me pi’ gelngidad ni ngad pared ni gad ba yul’yul’ ni dabda paged gadad, ni demtrug ko mang e ra buch. (Filippi 4:13) Gad ra par ni gadad ba yul’yul’ ku Got e ri kab ga’ fan ko bin ngad ayuweged e bin chiney e yafas rodad. Faan gad ra par ni gad ba yul’yul’, ma en Ga’ ko Towaath e ra pi’ ngodad e yafas nib flont ni manemus ma dariy e m’ar riy.​—Hebrews 11:6.

12. Mang e pi Kenggin e Motochiyel u Bible e rayog ni ayuwegdad nge yog ni uda dugliyed e tinib fel’ u nap’an ni ra taw e tafalay ko m’ar?

¹² Pagan’ rodad ngak Jehovah e ku ma k’aringdad ni ngad changargad ko Thin rok ni fare Bible, ni fan nge yog ni pow’iydad. Fapi Kenggin e motochiyel ni ba’ u Bible e rayog ni ayuwegdad ngad dugliyed e tin nib gonop ko ngiyal’ ni ke taw ngay ni ngan tafalaynag e m’ar. Ni bod rogon, ni yira nang ni fare Bible e ke yog nib kireb e “ngongol ko pig,” ma rayog ni ngad pilo’gad ko ngan gay e m’ar rom ngan nang ara tafalay ni ba muun e pig ngay. (Galatia 5:19-21; Deuteronomy 18:10-12) Kub aray reb i rogon e gonop nu Bible ni rayog ni pagan’uy ngay ko bin baaray ni: “Ani denang ban’en e ma mich u wan’ urngin bugithin, machane anib gonop e ma lemnag rogon ni nge furuy ay.” (Proverbs 14:15, NW) Arfan, ni nap’an ni gad be lemnag rogon e tafalay, ma gad ba gonop ni faan gad ra fal’eg i gay murung’agen ko rayog ni ngan pagan’uy ngay fa nge “mich u wan’dad urngin e tin ka nog.” Binem e “tafinay nib fel’ rogon” e rayog ni nge ayuwegdad ngad fal’eged i lemnag e n’en ni kad mel’eged me yog ni ngada dugliyed e bin nib fel’.​—Titus 2:12.

13, 14. (a) Mang thin nib ga’ fan ni murung’agen rarogon e health ni kan yoloy nga lan e babyor ni Wulyang Ntagil’ e Damit nge Awake!? (b) Mang fonow u murung’agen rogon e n’en nga un rin’ ko magawon ko m’ar ni ke n’uw nap’an ma der chuw ni kan dag ko babyor ni Awake! ko January 22, 2001?

¹³ Maku rayog ni ngada daged e pagan’ rodad ngak Jehovah ni ngaud gayed fapi babyor ni be fal’eg e pi tapigpig nib yul’yul’ ma ba gonop. Fare babyor ni Wulyang Ntagil’ e Damit nge fare Awake! e yu ngiyal’ ma yi ma yoloy ngay boch ban’en nib ga’ fan ni murung’agen boor mit e m’ar nge magawon ko m’ar.d Yu ngiyal’, ma yu ke babyor ney e ba’ boch e thin riy nib ga’ fan ni yoloy boch e girdi’ ni ke yog ni ra athamgilgad u fithik’ boor mit e magawon u yuyang u dowey, nge m’ar, nge marwoth ni dabkiyog ni ngar rin’ed boch ban’en. Maku reb, e ba’ boch e thin riy ni be yog boch ban’en nu Bible maku e ri tay boch e fonow nib puluw u rogon ni ngaun par u fithik’ e pi magawon ko m’ar ni ke n’uw nap’an ma der chuw.

¹⁴ Ni bod rogon, ni fare ke Awake ko January 22, 2001, ni faani kenggin e thin ni bay u wuru’ e “Ngan Fal’eg laniyan’ e Piin nib M’ar.” Re kenggin ney e be dag e pi kenggin e motochiyel nu Bible nib gel e ayuw ni ra pi’ maku e ri tay ni pi thin ney e ni fek ko gini sum riy ni fek rok e piin ni ri yad manang fan ya kar pared u fithik’ ni bokum e duw ni yad ba m’ar ni marwoth. Fa binem e article ni “Bay e M’ar Rom ma Be Yog Rom ni Ngaum Par​—Uw Rogon?” be pi’ e tin baaray e fonow ni gaar: Ngam fil ngam nang oren e tin rayog ni ngam nang u murung’agen e m’ar rom. (Proverbs 24:5) Ma ga duguliy e pi n’en, ngam nameg ni ngam ayuweg boch e girdi’ riy, machane ngam nang ni sana dabiyog rom ni ngam rin’ boch e ban’en ni be nameg yugu boch e girdi’ ni rayog rorad. (Acts 20:35; Galatia 6:4) Dab mu palognagem nga orel ko girdi’. (Proverbs 18:1) Ma ga ta’ e piin ni yad be yib ra guyed gur ni yad ba falfalan’ ko wub ni kar ted. (Proverbs 17:22) Ma bin th’abi ga’, e ngam ta’ nib chugur e m’ag u thilmew Jehovah nge ulung rok. (Nahum 1:7; Roma 1:11, 12) Ere gathi gad be falfalan’ ni bochan e fonow ni rayog ni pagan’uy ngay ni be pi’ Jehovah ngodad u daken e ulung rok?

Nap’an ni Be Ulul e War Laniyan’

15. Uw rogon me yog ni gel apostal Paul ko cham rok ni i togopuluw ko meewar ko dawef ni de flont, ma mang e n’en ni be micheg ngodad?

¹⁵ “U fithik’ i dowag, e dariy ban’en ni be par riy nib fel’,” rogon ni yoloy apostal Paul. (Roma 7:18, NW) Ri manang Paul nib fel’ rogon ni bochan ni ke buch rok ere ke nang ko uw feni mo’maw’ ni nge yog ni ngan athamagil ngan togopuluw ko arar nge meewar ko dowef ni de flont. Machane, Paul e ba mich u wan’ ni rayog ni nge gel. (1 Korinth 9:26, 27) Uw rogon? Bochan ni ri ma pagan’ ngak Jehovah. Arfan ni rayog ni nge gaar Paul: “Ere kar gu gafgow! I mini’ e ra chuwegeg u pa’ ere dowef ney ni ir e be fekeg i yan ko yam’? Ke magar Got u daken e Somol rodad i Jesus Kristus!” (Roma 7:24, 25) Ma uw rogodad? Ku arrogodad ni ka gadad be cham ni gad be togopuluw ko meewar ko dowef. Nap’an gad be athamgiliy ni ngad gelgad ko tiney e meewar, ma ba mom ni ra chuw e pagan’ rodad, me mich u wandad ni dabiyog ni ngad gelgad. Machane Jehovah e ra ayuwegdad ni faanra, ngad boded Paul, ni rriyul’ ni gad be pagan’dad ngak Got ma gathi kemus gelngidad.

16. Nap’an ni ra ulul i yan reb e meewar ko dowef, ma mang e n’en nib t’uf ni ngad yibiliyed, ma mang e thingarda rin’ed ni faanra kad sulod bayay ko kireb ni kad paged?

¹⁶ Nap’an ni ri i ulul i yan e meewar ko dowef, ma rayog ni ngada daged ni be pagan’dad ngak Jehovah ko wenig ni gad ra tay ngak u fithik’ e meybil. Ba t’uf ni ngad ninged, ni gad be wenig, ku Jehovah ni fan ko ayuw ko kan ni thothup rok. (Luke 11:9-13) Rayog ni ngada ninged e kadan’, ni ir reb i waamngin e kan ni thothup rok Got. (Galatia 5:22, 3) Mang e thingarda rin’ed ni faanra kad sulod ko meewar rodad ni kad paged fram? Demtrug rogon, ma thingari dabda talgad. Ngada pared ni ri dabda chalbangad ko meybil u fithik’ e sobutan’ ngak e Got rodad nib tarunguyey, ngada ninged ngak ni nge n’ag fan rodad me ayuwegdad. Jehovah e ri dabi n’ag ara siyeg, ba gum’ircha’ ni ke “kireban’ ma ke pasingsing” ni bochan tomalngin e kireb rok ni ke kalngan’ riy. (Psalm 51:17) Faan gad ra wenig ngak u fithik’ e yul’yul’, ni kad kalgadngan’dad, ma ra ayuwegdad Jehovah ngad chamgad ko pi n’en ni ma waliy e girdi’ nge denen.​—Filippi 4:6, 7.

17. (a) Mang fan nib ga’ fan ni ngaun lemnag rogon e lem rok Jehovah ko fare meewar ni gad be chamnag? (b) Mang thin nu Bible e ngad tayed u wan’dad ni faanra gad be chamnag e damumuw nib papey? ngad koled ayuwngin blowthdad? ngad siyeged e gosgos ni kireb?

¹⁷ Maku rayog ni ngada daged nib pagan’dad ngak Jehovah ni aram e ngaud gayed e ayuw u fithik’ e Thin rok. Ru uni fanay e Bible concordance ara fare Watch Tower Publications Index, ma rayog ni ngada gayed e fulweg ko fare deer ni, ‘Uw rogon u wan’ Jehovah e biney e meewar ni gu be chamnag?’ Gad ra nang ko uw rogon ni be lemnag Jehovah rogon fare n’en ma rayog ni pi’ gelngin ni ngada adaged ni ngada falan’niged. Ma aram e, sana gad ra lem ni bod ni ma lem, ngad fanenikayed e tin nib fanenikan. (Psalm 97:10) Boch e girdi’ e ke pirieg nib gel e ayuw ni ngan tay fan e yuyang ko pi thin nu Bible ni ba’ rogon ko fare meewar ni yad be chamnag. Faanra gad be cham ko damumuw ni yugub papey? Ma aram e rayog ni ngada lemniged boch e thin nu Bible ni bod e Proverbs 14:17 nge Efesus 4:31. Ma faanra kad pirieged nib mo’maw’ rogon ni ngada gagiyegniged blowthadad? Ma rayog ni ngada lemniged e thin nu Bible ni bod e Proverbs 12:18 nge Efesus 4:29. Ma faanra ba mom ni ga ma adag e gosgos nib kireb? Ma rayog ni ngada guyed rogon nge mit ngodad e Efesus 5:3 nge Kolose 3:5.

18. Mang fan ni thingar dabda paged e tamra’ nge talegdad ni nge dabda ninged e ayuw ngak e piin piilal ni ngan ayuwegdad ngada gelgad ko meewar rodad?

¹⁸ Ra uni gay e ayuw ko piin ni piilal ni ke dugliyrad e kan ni thothup u lan e ulung maku reb e n’en ni be dag e pagan’ rodad ngak Jehovah. (Acts 20:28) Ma demtrug rogon, ma pi “pumoon ni towath” ney e ban’en ni ke pi’ Jehovah u daken Kristus ni nge gafaliy me ayuweg e saf rok. (Efesus 4:7, 8, 11-14, NW) Ba mudugil, ni sana dabi mom ni ngan ning e ayuw ni fan ko meewar rodad. Rayog ni ngada tamra’gad, ni gad be rusnag ni ri da kud fel’gad u wan’ e piin piilal. Machane dariy e maruwar riy ni pi pumoon ney ni kar ilalgad ko tirok Got ban’en e yad ra ta’ fadad ni bochan ke yog rodad ni ngad ninged e ayuw ngorad. Maku reb, piin piilal e kar lemniged ni ngar daged e pi felngin Jehovah u rogon ni yad be ayuweg e saf. Rogon ni yad ma fal’eg lanin’uy, nge fonow nib puluw nge fonow ko Thin rok Got e rayog ni ri ireram e n’en ni ke t’uf rodad ni nge gelnag e lem rodad ngada gelgad ko meewar rodad.​—James 5:14-16.

19. (a) Mang e kanawo’ e ma guy Satan rogon ni nge fanay e pi n’en nib m’ay fan ko yafas ko re fayleng ney? (b) Mang e pi n’en nib maun ko pagan’, ma mang e thingarda dugliyed?

¹⁹ Ri dabda paged talin ni manang Satan ni kari ngoch e tayim rok. (Revelation 12:12) Baadag ni nge fanay e tin ni dariy fan ko yafas ko re fayleng ney nge mulegan’dad ngada talgad. Ngarda pagedan’dad ko tin ka nog ko Roma 8:35-39, (NW): “Mini’ e rayog ni nge daregdad ko fare t’ufeg rok Kristus? Gur gafgow nib gel ara magafan’ ara gafgow ni yibe tay ngodad nib kireb ara uyungol ara par u tamilang ara riya’ ara sayden? . . . Ba thil, ya urngin e pi n’eney e kad bad u fithik’ nga wuru’ ni kad gelgad ni polo’ u daken faanem ni gad ba t’uf rok. Ya ke mich u wan’ug ni gathi yam’ fa yafas fapi engel fapi am ara pi n’en ni bay e chiney u roy ara pi n’en ni nga fini yib ara ba gelngin ara ba tolangin ara toarngin ara yug boch ban’en ni ngan sunmiy ni rayog ni daregdad ko t’ufeg rok Got ni ba’ rok Kristus ni Somol rodad.” Uw feni fel’ e biney e thin ko pagan’ ngak Jehovah! Machane re pagan’ nem, e kab gel ko kemus ni ngan lemnag. Ya rogon e, ba pagan’ nib maun ngay nib fel’ rogon ni gadad ma dugliy rogon ban’en ko yu rran ko yafas rodad. Ere, ngarda dugliyed ni ngaud pagedan’dad ni polo’ ngak Jehovah u nap’an e gafgow.

[Footnotes]

Ka Be Yib Ngan’um?

• Nap’an ni gad ra pirieg e magawon ko par rodad, ma mang e ra pi e kanawo’ ni rayog ni ngada daged ni gadad be pagan’dad ngak Jehovah?

• Uw rogon ni rayog ni ngada daged e pagan’ ngak Got ko ngiyal’ ni ke magafan’dad ko magawon ko m’ar?

• Nap’an ni ra ulul iyan e meewar ko dowef, ma uw rogon ni gad ra dag ni rriyul’ nib pagan’dad ngak Jehovah?

[Picture on page 27]

Faan ni yira chuwegdad ko maruwel, ma ba gonop ni nga kudi fal’eged i yaliy rogon e par rodad

[Picture on page 28]

N’en ni rin’ Loida e dag rogon ni pagan’ ngak Jehovah e ra ayuweg be’ nge yog ni kadan’

[Picture on page 30]

Dabda tamra’gad ni ngad ninged e ayuw ni bochan e ngad gelgad ko meewar rodad