Ngan Pining e Sorok Ngak Jehovah “u Lan e Muulung”
1. Uw rogon ni pi muulung ni gad ma un ngay e aram reb e kanawo’ nrayog ngad daged e t’ufeg riy?
1 Pi muulung ko Kristiano e ban’en ni ke pi’ Jehovah ni nge ayuweg e girdi’ rok ni ngar pired nib gel ko tirok ban’en. Faan gad ra un ko muulung ni gubin ngiyal’ ma aram e gad be dag ni gad be tay fan e n’en ni ke pi’ Jehovah ni fan ngodad. Maku aram rogon nrayog ni nge ‘bagadad mi i ayuweg bagadad ma be dag ngak nib t’uf rok ma be rin’ e tin nib fel’ ngak,’ ma gad be dag ni gad be t’ufeg pi walagdad. (Heb. 10:24; John 13:35) Uw rogon ni ngad ayuweged pi walagdad u nap’an e pi muulung?
2. Mang e yog David ni Pilung ni ke mudugilan’ ngay?
2 Ngan Weliy Ban’en u Fithik’ e Yoor: I weliy David ni Pilung murung’agen ni gaar: “Bay gu weliy ngak e tirog e girdi’ e tin ni kam rin’; bay gu pining e sorok ngom u lan e muulung rorad. Ra sug e girdi’ nga lan tafen e muulung ma gu ra pining e sorok ngom ko tin ni kam rin’.” “Gu ra pining e sorok ngom u lan e ulung ni baga’; u fithik’ e girdi’ ni yoor ma gu ra pining e sorok ngom.” “Ku gog fare bugithin nib fel’ ni murung’agem ni ga ma mat’awnag e girdi’ ngom, ni kug weliy u lan e muulung rok urngin e tirom e girdi’.” (Ps. 22:22, 25; 35:18; 40:9)
3. (a) Nap’an apostal Paul, ma pi muulung ni yima tay e ke bing e kanawo’ ko mang?(b) Mang fan ni nga i un e girdi’ rok Got ko pi muulung ni yima tay ni gubin ngiyal’?
3 Nap’an ni i muulung e pi Kristiano nga taabang u nap’an apostal Paul, ma ke mab e kanawo’ ngorad ni ngar daged e michan’ rorad ngak Jehovah mar pininged e sorok ngak. Aram rogon ni yad ma pi’ e athamgil nga lanin’rad ma yad be dag nib t’uf bagayad rok bagayad. Ngiyal’ ney ni ke yan boor e chibog nap’an ni immoy David nge Paul riy e rriyul’ ni “gad be guy ni be chugur iyib e rran rok Jehovah.” (Heb. 10:24, 25) Ke chugur ni ngan thang e m’ag rok Satan ma magawon e ku be yoor i yan. Rib t’uf ni ngad ‘guman’naged gadad.’ (Heb. 10:36) Faanra gathi pi walagdad, ma mini’ e rayog ni nge pi’ e athamgil nga lanin’dad nge yog nda gum’an’gad?
4. Mang fel’ngin e pi fulweg ni yima pi’ u nap’an e muulung?
4 Ngiyal’ ney u ku bod kakrom nrayog ko piin nib yul’yul’ ni ngar tamilangnaged e michan’ rorad u “lan e ulung.” Reb e kanawo’ ni ngan rin’ ere n’ey riy e ngan pi’ e fulweg ko pi deer ni yima fith u nap’an e pi muulung. Dabin darifannag angin ere n’ey. Bod ni, pi fulweg ni be dag rogon ni ngan gel ko magawon e ma pi’ e athamgil nga laniyan’ e pi walag ni ngar folgad u kenggin e pi motochiyel nu Bible. Pi fulweg ni ma weliy e thin ko Bible ara ma tamilangnag ban’en ni kan fl’eg i gay murung’agen e rayog ni nge pi’ e athamgil nga laniyan’ e girdi’ nge fel’ rogon e fol babyor ni yad ma tay.
5. (a) Uw rogon nrayog ni ngad gelgad ko tamra’? (b) Mini’ e piin ni yad ma dag e kanawo’ ni ngan folwok riy u rogon e fulweg ni yima pi’ nge wub ni yima tay ko pi muulung?
5 Faanra fel’ u wan’dad angin e fulweg ni gad ma pi’ u nap’an e pi muulung ma aram e ra k’aring urngin e Pi Mich Rok Jehovah ni ngar gelgad ko tamra’. Rib ga’ fan ni nga i pi’ e piin piilal nge ministerial servant e fulweg u nap’an e pi muulung ni bochan e yad e ngar daged e kanawo’ nrayog ni ngan folwok riy u rogon ni ngaun pi’ e fulweg u nap’an e muulung nge wub ni ngaun tay ko muulung. Machane uw rogon nrayog ni nge mon’og be’ ni faanra ba mo’maw’ rok ni nge rin’ ere n’ey nreb e maruwel ko Kristiano?
6. Uw rogon u wan’ reb e walag ni ppin e pi’ fulweg ni ma pi’?
6 Boch Ban’en Nra Ayuwegey ni Ngan Mon’og Iyan: Dabin pagtalin ni bay rogon Jehovah ngay. Reb e walag ni ppin e ke weliy rogon ni ma lemnag e pi fulweg ni ma pi’ u nap’an e muulung. “Aram rogon ni gu ma pi’ e fulweg ku Satan ni be guy rogon ni nge taleg e girdi’ rok Got ndabkur daged e michan’ rorad.” Reb e walag ni pumoon ni ka fini un ko taufe ma ku ma un ko re ulung nem e gaar: “Gubi ngiyal’ ni gu ma yibilay murung’agen e fulweg ni gu ma pi’.”
7. Mang e ra ayuwegdad nge yib angin e fulweg ni gad ma pi’? (Mu guy fare kahol ni “Rogon ni Ngan Pi’ e Fulweg u Nap’an e Muulung.”)
7 Mu fl’eg rogom nib fel’ rogon. Faanra dabmu fil e babyor rom u m’on riy ma ra mo’maw’ ngom ni ngam pi’ e fulweg maku dabi yib angin e fulweg rom.
8. Mang fan nib fel’ ni ngad nameged ban’en u nap’an ni gad be pi’ e fulweg ko muulung, ma uw rogon ni ngad yognaged ere n’ey?
8 Mu nameg ni ngam pi’ reb e fulweg u gubin e muulung. Re n’ey e be yip’ fan ni ngam gay in e fulweg, ya faanra yoor yay nim tining paam nga lang ma aram e rayog ni ngan piningem. Ku rayog ni nga mog u m’on riy ngak e en nra yarmiy e fol babyor e pi deer ni kam fl’eg rogom ni ngam pi’ e fulweg riy. Faanra kafin mu tabab i un ko muulung ma ireray ban’en nrayog ni nge ayuwegem. Yugu aram rogon ni ga be tamra’ ni ngam tining paam nga lang ‘u lan e ulung ni ba ga’’ ma faanra ga manang ni aram e paragraph rom ma faen ni be yarmiy e muulung e be sapnag paam ma ra pi’ e athamgil nga lanin’um ni ngam pi’ e fulweg.
9. Mang fan nib fel’ ni ngan pi’ e fulweg u tabolngin e study?
9 Mu pi’ e fulweg u tabolngin e study. Ba maruwel nib mo’maw’ e faanra dab ni gay rogon ngan rin’ maku dabi mom. Bfel’ ni ngam pi’ e fulweg u tabolngin e study. Ga ra guy ni ke mom ni ngam pi’ e fulweg u biyay ngu biyay u tomren ni kam pi’ e bin som’on e fulweg rom.
10. Mang fan nib fel’ ni ngan par nib chugur nga m’on u lan e Kingdom Hall?
10 Mu mel’eg bang nib fel’ ngam par ngay. Boch e girdi’ e kar pirieged nib mom ngorad ni ngar pied e fulweg ni faanra ra pared nib chugur nga m’on u lan e Kingdom Hall. Ya aram e gin ni buchuuw e wagagey riy ma faen ni be yarmiy e muulung e ba mom rok ni nge guyey u rom. Faanra ngam rin’ e re n’ey ma dabmu pagtalin ni ngam non nib ga’ boch lamam nfaanra dariy e microphone ko ulung.
11. Mang fan nib ga’ fan ni ngan motoyil ko girdi’ u nap’an ni yad be pi’ e fulweg?
11 Mmotoyil nib fel’ rogon. Re n’ey e ra ayuwegem ndabkum weliy taa ban’en ni ka fini yog be’. Maku fulweg ni ke pi’ be’ e rayog ni nge ayuwegem ngki yib reb e thin nu Bible ara ban’en ngan’um nib fel’ ni kag ra weliy. Yu ngiyal’ e rayog ni ngan weliy e experience nra tamilangnag e n’en ni yibe weliy. Fulweg ni aram rogon e bay angin.
12. Ga ra fulweg reb e deer nrogon ni ke sum u lanin’um ma be dag e mang?
12 Mu fil rogon ni ngam pi’ e fulweg nrogon ni ke sum u lanin’um. Gara beeg e fulweg ni kam fek ko babyor ni yibe fil ma be dag ni kam pi’ e fulweg nib puluw, ma aram rogon nib fel’ ni ngan tabab i pi’ e fulweg ko muulung. Machane faanra mu mon’og ngam pi’ e fulweg nrogon ni ke sum u lanin’um ma aram e be dag ni kam nang fan e n’en ni yibe weliy. De t’uf ni ngan beeg e thin u lan e pi babyor rodad nreb nge reb. Ya Pi Mich Rok Jehovah e gathi ke mus ni yad ma yog e thin ni bay u lan e pi babyor rorad.
13. Mang fan dab ni weliy ban’en ni gathi ir e yibe weliy murung’agen?
13 Dab mu weliy ban’en ni gathi ir e yibe weliy murung’agen. De fel’ ni ngan weliy ban’en nde m’ag ko n’en ni yibe weliy murung’agen. Ere fulweg rom e susun ni nge puluw ko n’en ni yibe weliy murung’agen. Ya ra aram rogon ma n’en ni yibe weliy e ra pi’ e athamgil nga laniyan’ e girdi’.
14. Mang e ngad nameged u nap’an ni gad be pi’ e fulweg, ma uw rogon nrayog ni ngad rin’ed ere n’ey?
14 Mu nameg ni ngam pi’ e athamgil nga laniyan’ e girdi’. Bochan nreb i fan ni gad ma pi’ e fulweg e ngad pied e athamgil nga laniyan’ e girdi’, ma arfan nthingar dab dogned boch e thin nra mulegan’rad. Maku, dabmu weliy urngin e thin ni bay u lan fare paragraph ya ra yan i aw ni ke buchuuw ara dakuriy e n’en nrayog ni ngki weliy boch e girdi’. Fulweg nib n’uw ara kayigi yoor ban’en nibe weliy e ba mo’maw’ ni nge nang fan e girdi’. Fulweg nib ngoch e ba ga’ angin ma ma pi’ e athamgil nga laniyan’ e piin ni ka kad beech ni ngkur pied e fulweg rorad nib ngoch.
15. Mang nrib ga’ fan ni nge motoyil faen ni be yarmiy e muulung ngak e piin ni yad be pi’ e fulweg?
15 Maruwel rok e Piin ni be Yarmiy e Muulung: Ba mil fan ngak faen ni be yarmiy e muulung ni nge pi’ e athamgil nga laniyan’ e girdi’. Thingari motoyil nib fel’ rogon ko fulweg ni yibe pi’ ma ngki sap ngak faen ni be pi’ e fulweg ma gathi nge tiyan’ nga yugu ban’en. Dabi fel’ ni faanra dabi motoyil nib fel’ rogon miki weliy e n’en ni ka fini yog be’ ara deeriy ban’en ni kafin ni pi’ e fulweg riy!
16. (a) Mang e ra buch nfaanra faen ni be yarmiy e muulung e gubin ngiyal’ ma be sul u daken e fulweg ni kan pi’ ma mang fan? (b) Bmiti mang deer e ra yib angin ni ngan fith ma mang fan?
16 Ku ra mulan’ e girdi’ nfaanra faen ni be yarmiy e muulung e gubin ngiyal’ ni ma sul u daken e fulweg ni kan pi’ ni yugu ba thil rogon ni nge yan i m’ug nde fel’ e fulweg ni yibe pi’. Maku reb e, rra yib e athamgil nga lanin’uy nfaanra fulweg ni yira pi’ e ku ra k’aring boch e girdi’ ngar weliyed boch ban’en u murung’agen ban’en nib ga’ fan. ‘Uw rogon nrayog ni ngad folgad ko re n’ey u lan e ulung?’ ara, ‘Mang thin ko Bible u lan e paragraph e ku bay rogon ko n’en ni kanog?’ e aram boch e deer nra pi’ e athamgil nga laniyan’ e girdi’ ngar weliyed e thin nib fel’, nra yib angin.
17. Uw rogon nrayog nge pi’ e en ni be yarmiy e muulung e athamgil nga laniyan’ e piin ni ka yad ba beech nge piin nib tamra’?
17 Riyul’, nsusuna ngan pining e magar ngak e piin ni ka yad ba beech nge piin ni yad ba tamra’ u nap’an ni kar pied e fulweg. Rayog ni ngan rin’ ere n’ey u tomren e muulung nge siy ni k’aring e tamra’ ku be’ maku aray e ngiyal’ nrayog ni nge pi’ faen ni be yarmiy e muulung e fonow riy nfaanra ba t’uf.
18. Mang e ra buch ni faanra en ni be yarmiy e muulung e ir e yugu be non?
18 Nap’an e sabethin ma be’ ni yugu ma non e ma k’aring e chalban ko girdi’ ni yad be sabethin. Ya piin ni yad be motoyil ngak e yad ra guy ndaki t’uf ni ngar weliyed e lem rorad. Ra yan i aw ni kemus ni ngar motoyilgad ni yugu aram rogon ni gathi ri yad be tedan’rad ko n’en ni be yog faanem. Rayog ni nge buch ban’en ni aram rogon nfaanra en ni be yarmiy e muulung e ir e yugu be non. Machane, rayog ni nge pug e tafinay ko piin ni yad be motoyil nfaanra ki fith yugu boch e deer. Mit ney e deer e de t’uf ni ngan fith ni gubin ngiyal’.
19. Mang fan nib fel’ ni nge son faen ni be yarmiy e fol babyor u m’on ni nge pining be’ ni nge pi’ e fulweg?
19 Faen ni be yarmiy e fol babyor e de t’uf ni nge pining e en som’on ni ke tining pa’ nga lang. Ya sana ra mulan’ e piin nib t’uf ni ngar lemgad boch mfin nra tininged pa’rad nga lang. Ra son buchuuw ma aram e rayog ni ngki pag e piin ndawora pied e fulweg nge yog nra pied e fulweg rorad. Maku dabi pining e bitir ni ngar pied e fulweg u boch e deer nib mo’maw ni ngar nanged fan.
20. Uw rogon nfaanra nde puluw e fulweg ni ke pi’ be’?
20 Ma uw rogon nfaanra nde puluw e fulweg ni ke pi’ be’? Facha’ ni be yarmiy e susun ndabi k’aring e tamra’ ngak e en ni ke pi’ fare fulweg. Yugu aram rogon nde puluw fare fulweg machane bay e thin nriyul’ riy. Faen ni be yarmiy e rayog ni fith bayay fare deer u yugu reb e kanawo’, ara ki fith yugu reb e deer nge yog ni yal’uweg e n’en ni ka nog ndabi k’aring e tamra’ ku be’.
21. Mang boch e deer e bfel’ ndabin fith ma mang fan?
21 Ra nge pi’ faen ni be yarmiy e fol babyor e athamgil nga laniyan’ e girdi’ ni ngar pied e fulweg ma de fel’ ni nge gaar, ‘Ka bay ban’en ni nge yog be’?’ Ma fare deer ni, ‘Mini’ e dawori pi’ reb e fulweg? Ereray e bin tomur e deer!’ e sana ba fel’ ni nga nog, machane dabi pi’ e athamgil ngak be’ ni nge weliy e n’en ni be lemnag nib fel’ rogon. Susun ndabni k’aring e kireban’ ngak e pi walag ni bochan e dar pied e fulweg u nap’an nni tabab ko fol babyor. Ya susun ni ngan pi’ e athamgil nga lanin’rad ni ngar weliyed e tin ni yad manang ni bochan e aram rogon nrayog ni ngar daged e t’ufeg rorad. Tin kub muun ngay e tomren ni ke pining faen ni be yarmiy e fol babyor be’ ni nge pi’ e fulweg, ma bfel’ ndabi gaar, “Ngemu’ ma gad ra pining Brother n’en-nge-n’en nge migid ma Sister n’en-nge-n’en.” Ya nge motoyil ko chaen nra pi’ e fulweg mfin ki guy ko ba t’uf ni ngkun weliy boch e thin fa danga’.
22. Mang e be micheg nfaanra ud uned ko tin ni yibe rin’ u nap’an e pi muulung?
22 Fulweg ni Yima Pi’ e Ba Tow’ath: Ba t’uf ni ngan un ko pi muulung ko Kristiano maku reb e tow’ath ni ngan pi’ e fulweg. Rogon ni gad be un i pining e sorok ngak Jehovah “u lan e ulung” e aram rogon ni gad be folwok ko n’en ni rin’ David ma gad be fol ko fonow rok Paul. Ra ud uned ko tin ni yibe rin’ u nap’an e muulung ma aram e mich riy ni gad be t’ufeg pi walagdad ma gad bang ko fare ulung nib ga’ rok Jehovah. Uw e ga baadag ni ngam moy riy u nap’an “ni be chugur iyib fare rran”?—Heb. 10:25.
[Sasing ko page 5]
ROGON NI NGAN PI’ E FULWEG U NAP’AN E MUULUNG
◼ Faanra kan piningem nsom’on mag pi’ e fulweg nib mom mab puluw ko fare deer
◼ Faanra ngkun weliy boch e thin ma (1) mu dag rogon nib m’ag reb e thin nu Bible ko n’en ni yibe fil, (2) mu weliy rogon nra rin’ fare n’em ban’en ko yafas rodad, (3) mu weliy rogon nrayog ni ngan fanay e pi thin nem, ara (4) mu weliy reb e experience nib ngoch ni be tamilangnag ban’en nib ga’ fan
◼ Mu fal’eg e motoyil ko fulweg ni yibe pi’ nge yog nim nang rogon ni ngkum weliy boch e thin nrayog ni ngki tamilangnag boch e n’en ni yibe weliy
◼ Mu gay rogon ni ngam pi’ e fulweg nrogon ni ke sum u lanin’um