ARTICLE NI NGAN FIL 18
Nge Bagadad Me Pi’ e Athamgil Nga Laniyan’ Bagadad u Nap’an e Muulung
“Nge bagadad ma ngi i lemnag bagadad, . . . ma nge bagadad me pi’ e athamgil nga laniyan’ bagadad.”—HEB. 10:24, 25.
TANG 88 Mu Fil Ngog e Tirom e Kanawo’
TIN YIRA WELIYa
1. Mang fan ni gad ma pi’ e fulweg u nap’an e muulung?
MANG fan ni gad ma un ko muulung? Bin th’abi ga’ i fan e bochan ni ngad pininged e sorok ngak Jehovah. (Ps. 26:12; 111:1) Ku gad ma un ko muulung ya nge bagadad me pi’ e athamgil nga laniyan’ bagadad ko ngiyal’ ney ni ke mo’maw’ e par riy. (1 Thess. 5:11) Gad ma rin’ e gali n’ey u nap’an ni gad ra pi’ e fulweg u nap’an e muulung.
2. Mingiyal’ e rayog ni ngad pied e fulweg u nap’an e muulung?
2 Gubin e wik nrayog ni ngad pied e fulweg u nap’an e muulung. Bod nrayog ni ngad pied e fulweg u nap’an e Fol Wulyang ko Damit ni gad ma tay u tungun e wik. Ma nap’an e muulung ni gad ma tay u lan e wik ma rayog ni ngad pied e fulweg u nap’an ni yibe weliy e n’en bay ko Boch Ban’en nib Ga’ Fan ko Thin rok Got, nge Fol Bible ko Ulung, nge ku boch e welthin ni yima fith e deer riy.
3. Mang magawon e rayog ni ngad mada’naged, ma uw rogon nrayog ni nge ayuwegdad e Hebrews 10:24, 25?
3 Gad gubin ni gad baadag ni ngad pininged e sorok ngak Jehovah ma gad pi’ e athamgil nga laniyan’ pi walagdad. Machane bay l’agruw e magawon nrayog ni nge mo’maw’nag ngodad ni ngad pied e fulweg. Reb e rayog ni gad be rus ni ngad pied e fulweg. Ma reb e sana ri gad baadag ni ngad pied e fulweg machane danir piningdad u nap’an ni gad ra tining pa’dad nga lang. Ere mang e rayog ni nge ayuwegdad? Rayog ni ngad nanged e fulweg riy ko fagi babyor ni yoloy apostal Paul nge pi’ ngak e pi Hebrew. Nap’an ni be weliy murung’agen feni ga’ fan ni ngaud muulunggad nga taabang, me yog nsusun e ngad tedan’dad nga rogon ni “nge bagadad me pi’ e athamgil nga laniyan’ bagadad.” (Mu beeg e Hebrews 10:24, 25.) Nap’an ni gad ra nang nrayog ni ngad pied e athamgil nga laniyan’ yugu boch e girdi’ ni yugu aram rogon nib ngoch e fulweg ni kad pied, ma aram e rayog ni nge war e marus rodad ni ngad tininged pa’dad nga lang. Ma faanra gathi gubin ngiyal’ ni yibe piningdad u nap’an ni gad ra tining pa’dad nga lang, ma rayog ni ngad felfelan’gad ni be yag rok yugu boch e girdi’ u lan e ulung ni ngar pied e fulweg.—1 Pet. 3:8.
4. Mang dalip ban’en ni gad ra weliy ko re article ney?
4 Som’on e gad ra weliy ko re article ney rogon nrayog ni nge bagadad me pi’ e athamgil nga laniyan’ bagadad ni faanra gad ma un nga reb e ulung nib achig ni buchuuw e girdi’ ni ma pi’ e fulweg riy. Ngemu’ ma gad weliy rogon nrayog ni ngad rin’ed e re n’ey ni faanra gad ma un nga reb e ulung nib ga’ ni boor e girdi’ ni ma pi’ e fulweg riy. Ma bin tomur e gad ra weliy rogon nrayog ni ngad pied e athamgil nga laniyan’ yugu boch e girdi’ u daken e n’en gad ma yog u nap’an ni gad be pi’ e fulweg.
NGAN PI’ E ATHAMGIL NGA LANIN’UY U LAN E ULUNG NIB ACHIG
5. Uw rogon nrayog ni nge bagadad me pi’ e athamgil nga laniyan’ bagadad ni faanra buchuuw e girdi’ ni ke un ko muulung?
5 Faanra ba achig reb e ulung ma buchuuw e girdi’ nrayog ni nge pining e en be yarmiy e muulung ni nge pi’ e fulweg. Yu ngiyal’ e rayog nib t’uf ni nge son buchuuw u m’on ni nge tining be’ pa’ nga lang. Bochan e re n’ey, ma rayog ni nge chalbay u nap’an e muulung ma dabi yib e athamgil riy nga laniyan’ e girdi’. Ere mang e rayog ni ngam rin’? Rayog ni ngaum tining paam nga lang ni boor yay. Ga ra rin’ e re n’ey, ma aram e rayog ni ngam pi’ e athamgil nga laniyan’ yugu boch e girdi’ ni ngaur pied e fulweg.
6-7. Uw rogon nrayog ni nge war e marus rodad ni ngad pied e fulweg?
6 Uw rogon ni faanra ri ga be rus ni ngam pi’ e fulweg? Boor e girdi’ ni aray rogon e lem rorad. Machane rayog ni ngam gay boch e kanawo’ nra ayuwegem ni nge war e marus rom ni ngam pi’ e fulweg ya nge yag ni ngarim pi’ e athamgil nga laniyan’ pi walagem. Uw rogon nrayog ni ngam rin’ e re n’ey?
7 Rayog ni ngam sul u daken boch ban’en ni kan tay nga lan yu ken e Wulyang ko Damit nge yugu boch e babyor rodad.b Mu fal’eg rogom nib fel’ rogon u m’on riy. (Prov. 21:5) Faanra tamilangan’um ko n’en yira fil, ma aram e ra war boch e marus rom ni ngam tining paam nga lang ni ngam pi’ e fulweg. Maku reb e, ngam guy rogon ni nge ngoch e fulweg rom. (Prov. 15:23; 17:27) Ra ba ngoch e fulweg rom, ma aram e rayog ni nge war boch e marus rom. Ga ra pi’ reb e fulweg nib ngoch nsana taareb ara l’agruw e sentence n’umngin, ma rayog ni nge mom ngak pi walagem ni ngar nanged fan ko bin ni ngam pi’ reb e fulweg nib n’uw ni boor ban’en ni ga be weliy riy. Ga ra pi’ e fulweg nib ngoch nrogon ni kam nang fan, ma aram e ra m’ug riy ni kam fal’eg rogom nib fel’ rogon ma kam nang fan e n’en yibe fil.
8. Uw rogon u wan’ Jehovah e athamgil ni gad ma tay ni ngad rin’ed e tin nrayog rodad?
8 Uw rogon ni faanra kam rin’ boch ko pi n’ey machane ka ga be rus ni ngam pi’ e fulweg ni boor yay? Nge pagan’um ngay nib ga’ fan u wan’ Jehovah e athamgil ni ga be tay ni ngam rin’ e tin nrayog rom. (Luke 21:1-4) Der ma yog Jehovah ngodad ni ngad rin’ed ban’en ndabiyog rodad. (Ps. 103:13, 14) Ere mu lemnag e tin nrayog ni ngam rin’, mag nameg ni ngam rin’ e pi n’em, mag yibilay ni nge gapas lanin’um. Som’on e rayog ni ngam nameg ni ngam pi’ reb e fulweg nib ngoch.
NGAN PI’ E ATHAMGIL NGA LANIN’UY U LAN E ULUNG NIB GA’
9. Mang magawon e rayog ni ngan mada’nag u lan e ulung nib ga’?
9 Faanra boor e walag ko ulung rom, ma bay reb e magawon nib thil nrayog ni ngam mada’nag. Sana rayog ni boor e walag ni ma tining pa’ nga lang ni nge pi’ e fulweg, ma aram fan nib ga’ ndanir piningem. Danielle e gubin ngiyal’ ni baadag ni ma pi’ e fulweg u nap’an e muulung.c Ma lemnag ni aram bang ko liyor ni ma tay, maku aram reb e kanawo’ nrayog ni nge pi’ e athamgil riy nga laniyan’ yugu boch e girdi’, miki gel feni mich e n’en be fil e Bible u wan’. Machane nap’an ni chuw nge yan nga reb e ulung nib ga’, ma gathi gubin ngiyal’ ni yima pining ni nge pi’ e fulweg, ma yu ngiyal’ e ra m’ay reb e muulung ma dariy bayay ni kan pining ni nge pi’ e fulweg. I gaar: “I kankanan’ug ya gu lemnag ni aram reb e tow’ath ndakuriy rog. Faanra buch e re n’ey rom ni boor bayay, ma rayog ni ngam tabab ni ngam lemnag ni lem rok fare walag ndabi piningem.”
10. Uw rogon me yag nda pied reb e fulweg?
10 Bay ba ngiyal’ ni kam lem ni bod Danielle, fa? Faanra bay, ma rayog ni nge mulan’um mag lemnag ni kemus ni bay mmotoyil u nap’an e muulung. Machane dab mu tal i guy rogon ni ngam pi’ e fulweg. Ere mang e rayog ni ngam rin’? Rayog ni ngam fal’eg rogon in e fulweg ni ngam pi’. Ma faanra dan piningem ni ngam pi’ e fulweg u nap’an ni kan tabab ko n’en ni yibe fil, maku bay bayay nrayog ni ngkum pi’ reb e fulweg. Nap’an ni ga be fal’eg rogom ni fan nga reb e article ni yira fil u nap’an e Fol Wulyang ko Damit, ma rayog ni ngam lemnag rogon nib peth e pi paragraph riy nga kenggin fare article. Faan ga ra rin’ e re n’ey, ma dabisiy ni bay ban’en nrayog ni ngam weliy ko n’en ni yibe fil. Maku reb e, rayog ni ngam fal’eg rogom ni ngam pi’ e fulweg ko pi paragraph ni be weliy murung’agen boch e machib u Bible nib mo’maw’ ni ngan weliy fan. (1 Kor. 2:10) Mang fan? Ya sana buchuuw e girdi’ nra tining pa’ nga lang ni nge weliy e pi n’ey. Machane uw rogon ni faanra kam rin’ e pi n’ey, ma ke yan in e muulung ni ka danir piningem ni ngam pi’ e fulweg? Rayog ni nga mog ngak e en nra yarmiy e muulung u m’on riy e re deer ni ga baadag ni ngam pi’ e fulweg riy.
11. Mang e be pi’ e Filippi 2:4 e athamgil riy nga lanin’dad ni ngad rin’ed?
11 Mu beeg e Filippi 2:4. Nni thagthagnag nga laniyan’ apostal Paul ni nge pi’ e athamgil nga laniyan’ e pi Kristiano ni ngaur lemnaged yugu boch e girdi’. Uw rogon nrayog ni ngad folgad ko re fonow ney u nap’an e muulung? Susun e dab da paged talin ni ku baadag boch e girdi’ ni ngar pied e fulweg ni bod gadad.
Mu pag yugu boch e girdi’ ni ngar pied e fulweg u nap’an e muulung ni bod ni ga ma pag yugu boch e girdi’ ni ngar nonad u nap’an ni gimed be sabethin (Mu guy e paragraph 12)
12. Mang reb e kanawo’ nib fel’ nrayog ni ngan pi’ e athamgil riy nga laniyan’ yugu boch e girdi’ u nap’an e muulung? (Kum guy e sasing.)
12 Baaray rogon nrayog ni ngam lemnag e re n’ey. Nap’an ni gimed be sabethin e pi fager rom, ma gur, ga ra pagrad ni ngar nonad fa kemus ni yigoo gur e ngaum non? Danga’! Ya ga baadag ni ngar uned ko non. Ku arrogon u nap’an e muulung ni gad baadag ni nge mab e kanawo’ ngak urngin e girdi’ nrayog ni ngar pied e fulweg. Bin riyul’ riy e, reb e kanawo’ nib fel’ nrayog ni ngad pied e athamgil riy nga laniyan’ pi walagdad e aram e ngad paged yad ni ngar weliyed e michan’ rorad. (1 Kor. 10:24) Ere ngad weliyed rogon nrayog ni ngad rin’ed e re n’ey.
13. Uw rogon nrayog ni ngkud paged yugu boch e girdi’ ni ngar pied e fulweg?
13 Reb e ban’en nrayog ni ngad rin’ed e aram e ngad pied e fulweg nib ngoch ya nge yag ni ngki pi’ yugu boch e girdi’ e fulweg. Piin piilal nge pi walag ni ke n’uw nap’an ni kar pied e fulweg e rayog ni ngar daged e kanawo’ nrayog ni ngan folwok riy. Mus ni faanra kam pi’ reb e fulweg nib ngoch, ma ngam guy rogon ndabi yoor ban’en ni ngam weliy murung’agen. Faanra mu weliy gubin ban’en u lan fare paragraph, ma aram e dakuriy ban’en nrayog ni nge weliy yugu boch e girdi’. Bod nu lan e re paragraph ney e kan weliy l’agruw ban’en riy nrayog ni ngam rin’ ni aram e ngam pi’ e fulweg nib ngoch, mag guy rogon ndabi yoor ban’en ni ngam weliy murung’agen. Ere faanra gur e som’on ni kan piningem ni ngam pi’ e fulweg ko re paragraph ney, ma mang ndab mu weliy taareb riy?
Mingiyal’ e gad ra dugliy ndab da tininged pa’dad nga lang u nap’an e muulung? (Mu guy e paragraph 14)f
14. Mang e rayog ni nge ayuwegdad ni ngad dugliyed urngin yay ni ngad tininged pa’dad nga lang? (Kum guy e sasing.)
14 Mu gonopiy urngin yay ni ga be tining paam nga lang ni ngam pi’ e fulweg. Faanra gubin ngiyal’ ni gad be tining pa’dad nga lang, ma rayog ni nge k’aring facha’ ni be yarmiy e muulung ni nge lemnag nthingari piningdad ni boor yay ni yugu aram rogon ni ka bay yugu boch e girdi’ ndawor ra pied e fulweg. Re n’ey e rayog ni nge muleg laniyan’ yugu boch e girdi’ ndab kur tininged pa’rad nga lang.—Ekl. 3:7.
15. (a) Mang e susun ni ngad rin’ed ni faanra dan piningdad ni ngad pied e fulweg? (b) Uw rogon nrayog ni nge dag e en be yarmiy e muulung ni be lemnag gubin e girdi’? (Mu guy fare kahol ni kenggin e “Faanra Ga Be Yarmiy e Muulung.”)
15 Faanra boor e walag ni be tining pa’ nga lang u nap’an e muulung, ma rayog ndabkiyog ni ngaud pied e fulweg ni urngin yay ni gad baadag. Ma yu ngiyal’ e sana dabi piningdad e en be yarmiy e muulung. Ere rayog ni nge kireban’dad ko re n’ey. Machane susun e ngad guyed rogon ndabi aw nga lanin’dad.—Ekl. 7:9.
16. Uw rogon nrayog ni ngad pied e athamgil nga laniyan’ e piin kar pied e fulweg?
16 Faanra der yag ni ngam pi’ e fulweg ni urngin yay ni ga baadag, ma mang ndab mu fal’eg e motoyil u nap’an ni be pi’ yugu boch e girdi’ e fulweg mag pining e magar ngorad u tomuren e muulung? Ga ra rin’ e re n’ey, ma aram e rayog ni ngam pi’ e athamgil nga laniyan’ pi walagem, ni bod ni faanra kam pi’ e fulweg u nap’an e muulung maku ra yib e athamgil nga lanin’rad. (Prov. 10:21) Ra ud pininged e magar, ma aram reb e kanawo’ nrayog ni nge bagadad me pi’ e athamgil riy nga laniyan’ bagadad.
YUGU BOCH E KANAWO’ NI NGAN PI’ E ATHAMGIL RIY NGA LANIN’UY
17. (a) Uw rogon nrayog ni nge ayuweg e piin gallabthir pi fakrad ni ngar fal’eged rogon e fulweg ni ngar pied nib puluw nga yangarrad? (b) Mang aningeg ban’en nrayog ni ngan rin’ u nap’an ni yibe fal’eg rogon reb e fulweg ni ngan pi’ nrogon nib puluw ko fare video? (Kum guy e footnote.)
17 Ku mang reb e kanawo’ nrayog ni nge bagadad me pi’ e athamgil riy nga laniyan’ bagadad u nap’an e muulung? Faanra gur reb e gallabthir, mag ayuweg pi fakam ni ka yad bbitir ni ngar fal’eged rogon e fulweg ni ngar pied nib puluw nga yangarrad. (Matt. 21:16) Yu ngiyal’ e rayog ni ngan weliy murung’agen boch ban’en ni bod e magawon u lan e mabgol ara boch e ngongol nde m’agan’ Got ngay, machane dabisiy ni bay reb ara l’agruw e paragraph nrayog ni nge pi’ reb e bitir e fulweg riy. Maku reb e ngam ayuweg pi fakam ni ngar nanged fan ni gathi gubin ngiyal’ ni yad ra tining pa’rad nga lang ma yira piningrad. Ga ra rin’ e re n’ey, ma aram e rayog ni nge dabi kireban’rad ni faanra kan pining yugu be’ ma gathi yad.—1 Tim. 6:18.d
18. Uw rogon ni nge dab da weliyed murung’agdad nge pag rogon u nap’an ni gad be pi’ e fulweg? (Proverbs 27:2)
18 Gad gubin nrayog ni ngad fal’eged rogon e fulweg ni ngad pied nra pining e sorok ngak Jehovah me pi’ e athamgil nga laniyan’ pi walagdad. (Prov. 25:11) Yugu aram rogon ni bay yu ngiyal’ nrayog ni ngad weliyed ban’en ni ke buch rodad, machane susun e dab da weliyed murung’agdad nge pag rogon. (Mu beeg e Proverbs 27:2; 2 Kor. 10:18) Ya ngad guyed rogon ni nge par ni Jehovah, nge Thin rok, nge girdi’ rok ni gubin e aram e n’en ni ngaud weliyed murung’agen. (Rev. 4:11) Machane faanra deer ko fare paragraph e be yog ni ngad weliyed rogon lanin’dad u ban’en mab puluw ni ngad rin’ed e re n’ey. Bay reb e pi deer ney ko bin migid e paragraph ko re article ney.
19. (a) Mang e ra buch ni faanra ud lemnaged gubin e girdi’ ni kar bad ko muulung? (Roma 1:11, 12) (b) Mang e ga baadag u rogon e fulweg ni yima pi’ u nap’an e muulung?
19 Yugu aram rogon ndariy e motochiyel u rogon ni ngaun pi’ e fulweg, machane gad gubin nrayog ni ngad guyed rogon ni nge bagadad me pi’ e athamgil nga laniyan’ bagadad. Re n’ey e rayog ni be yip’ fan nib t’uf ni ngaud pied e fulweg ni boor yay. Fa reb e ba t’uf ni nge fel’ u wan’dad urngin yay ni kad pied e fulweg, ma ka gad ba felfelan’ nrayog ni nge pi’ yugu boch e girdi’ e fulweg ni bod gadad. Faan gad ra tedan’dad ngaud lemnaged yugu boch e girdi’ u nap’an e muulung, ma aram e gad gubin nrayog ni nge bagadad me ‘fel’ rogon ko michan’ rok’ bagadad.—Mu beeg e Roma 1:11, 12.
TANG 93 Mu Ayuweg e Muulung ni Gamad Ma Tay
a Nap’an ni gad ra pi’ e fulweg u nap’an e muulung, ma aram e ra bagadad ma be pi’ e athamgil nga laniyan’ bagadad. Machane bay boch e girdi’ ni yad ma rus ni ngar pied e fulweg. Ma boch e yad baadag ni yad ma pi’ e fulweg machane yad ma athapeg ni manga yugu ni piningrad. Demtrug rogon, ma uw rogon nrayog ni nge bagadad me dag ni be lemnag bagadad ya nge yag ni nge gubin e girdi’ min pi’ e athamgil nga laniyan’? Ma uw rogon nrayog ni ngad pied e fulweg nra k’aring pi’ walagdad ni ngar daged e t’ufeg nge ngongol nib fel’? Ireray e n’en yira weliy ko re article ney.
b Mu sul u daken boch ban’en nrayog ni nge ayuwegem ni bay ko Fare Wulyang ko Damit ko January 2019 ko pp. 8-13, nge Machib Ko Gil’ilungun ko March 2008 ko pp. 4-6.
c Kan thilyeg fithingan e cha’ney.
d Mu yaliy fare video ni Become Jehovah’s Friend—Prepare Your Comment ni bay ko jw.org.
f MURUNG’AGEN E SASING: Reb e walag ni ma un nga reb e ulung nib ga’ e be pag yugu boch e girdi’ ni ngar pied e fulweg u tomuren ni ke pi’ reb e fulweg.