Jehovah E Ma Skulnag E Piin Ma Gafaliy E Saf Ni Ngar Ayuweged E Saf Rok

“Jehovah e ma pi’ e gonop; ma l’ugun e bay e tamilangan’ nge llowan’ riy.”​—PROVERBS 2:6, NW.

1, 2. Mang fan ni pumoon ni kan taufenagrad e yad be nameg ni nge yoor boch e maruwel rorad u lan e ulung?

NICK ni i pigpig ko ulung ni medlip e duw e yog ni gaar, “Kari gu felfelan’ ko ngiyal’ ni kan dugliy ni nggu mang reb e piilal. Mug guy ni re tow’ath ney nra bing e kanawo’ ngog me yog ni nggu yoornag e tayim rog ko pigpig ngak Jehovah. Kug lemnag ni bay e malulifith rog nbochan urngin ban’en ni ke rin’ ngog. Maku gu baadag ni nggu ayuweg boch e girdi’ ko ulung nrogon rayog rog, ni bod rogon ni ke ayuwegeg boch e piilal.” Machane, felfelan’ rok e ku bay e magafan’ riy. I ul’ul Nick ngay ni gaar, “Ya bochan nap’an ni kug mang piilal ko ulung ni dawori 30 e duw rog, ma ke magafan’ug nbochan e de gaman e salap rog​—ni aram e llowan’ rog nge gonop—​ni nge yog ni nggu gafaliy e ulung nib fel’ rogon.”

² Piin ma dugliyrad Jehovah ni ngar ayuweged e girdi’ rok e boor fan ni ngar felfelan’gad. I puguran Paul ni apostal ngak e piin ni piilal nu Efesus reb i fan ni ngar felfelan’gad u nap’an ni fanay e thin ni yog Jesus, ni gaar: “Ba gel e felfelan’ ni ma yib ko pi’ ban’en ngak be’ ko bin ni be’ e nge pi’ ban’en ngom.” (Acts 20:35) Ngan pigpig ni ministerial servant ara piilal e be pi’ boch e kanawo’ ngak e piin kar taufegad nrayog ni ngar rin’ed boch ban’en ni fan ngak Jehovah nge ulung. Ni bod rogon, e pi ministerial servant ni ma ayuweg e piin piilal. Pi ministerial servant ney e ku yad ma rin’ boor e maruwel ni baga’ e tayim ni ma fek machane baga’ fan. T’ufeg ngak Got nge piin buguli yoror e ke k’aring e pi walag ney ni ngar pigpiggad.​—Mark 12:30, 31.

3. Mang fan ni boch e girdi’ e ma maruwaran’rad ni ngar maruweliyed nge yog boch e maruwel ngorad u lan e ulung?

³ Ma uw rogon reb e pumoon ni Kristiano ni be maruwaran’ ko rayog rok e tow’ath ni nge mang reb e ministerial servant me munmun ma ra mang reb e piilal ya be lemnag ni dabiyog rok? Ni bod Nick, rayog ni nge magafan’ nbochan e be lemnag ni de gaman e salap rok ma dabiyog ni nge mang reb e tagafaliy e saf nib manging’. Ma yib ngan’um ban’en ni aram rogon fa? Re lem ney e gathi dariy tapgin. Ma tay Jehovah ni piin ni ma gafaliy e saf e yad e ngar weliyed ngak rogon ni yad ma ayuweg fare ulung i saf. I gaar Jesus: “Ya cha’ ni boor e tin ni kan pi’ ngak e yibe finey ni ba ga’ labgen ni nge fulweg; ma cha’ ni ka boor boch e tin ni kan pi’ ngak e yibe finey ni ka boor boch e tin ni nge fulweg ni labgen.”​—Luke 12:48.

4. Uw rogon ni ma ayuweg Jehovah e piin ni ke dugliyrad ni ngar ayuweged e girdi’ rok?

⁴ Gur ma lemnag Jehovah ni piin ni ke dugliy ni nge mang ministerial servants nge piin piilal ni ngar rin’ed boor e maruwel e dariy be’ ni nge ayuwegrad? Danga’, ma pi’ e ayuw ni gathi kemus ni ngar rin’ed e maruwel rorad ya ku ra fel’ rogorad riy. Rogon ni kan weliy ko fare article ni ke yan, e Jehovah e ma pi’ e kan ni thothup ngorad, ni fare wom’engin e ra ayuwegrad ni ngar ayuweged e girdi’ u fithik’ e runguy. (Acts 20:28; Galatia 5:22, 23) Maku reb, e ma pi’ Jehovah e gonop, nge tamilangan’, nge llowan’ ngorad. (Proverbs 2:6) Uw rogon ni ma rin’ e re n’ey? Ngada weliyed dalip e kanawo’ u rogon ni ma skulnag Jehovah be’ nge be’ ni ke dugliy ni nge ayuweg e girdi’ rok.

Pi Tachugol Saf nib Salap e Ur Skulnaged

5. Mang fan ni Peter nge John e yow ma gafaliy e saf nib manging’?

⁵ Nap’an ni apostal Peter nge John e ra sak’iygow nga p’eowchen fare Sanhedrin, ma faen ni tapuf oloboch u tafen e puf oloboch e lemnag ni fa gal pumoon ni “yow l’agruw ndariy e skul rorow.” Ah, yow manang e yol, machane de yog rorow ni ngar unew ko skul ni fan ko piin tayugang’ ko teliw rok piyu Jew. Yugu aram rogon, ma Peter nge John nge boch pi gachalpen e kar daged ni yad e pi tamachib nib manging’, ya boor e girdi’ ni kar motoyilgad ngorad ma ke michan’rad. Uw rogon ma pi cha’ nem ni dar uned ko skul nib tolang e ra manged e pi sensey nrib fel’? Tomuren ni kan motoyil ngak Peter nge John, u tafen e puf oloboch “mi yad nang ni yow l’agruw ni’ ni ur unew i yan ngak Jesus.” (Acts 4:1-4, 13) Rriyul’, ni bay e kan ni thothup rorow. (Acts 1:8) Machane kub tamilang​—ni mus ko fapi tapuf oloboch nib malmit ko tirok Got—​ma ke tamilangan’rad ni ke skulnag Jesus e pi cha’ nem. Nap’an ni immoy Jesus u fayleng, me fil ngak fapi apostal ni gathi kemus ni ngar nanged rogon ni ngan kunuy e girdi’ ni bod e saf ya ki fil ngorad rogon ni ngar gafaliyed yad u tomren ni kar manged bang ko ulung.​—Matthew 11:29; 20:24-28; 1 Peter 5:4.

6. Mang kanawo’ e ke dag Jesus nge Paul rogon ni ngan skulnag e girdi’?

⁶ Tomren ni ke fas Jesus ko yam’, ma ki ul’ul i skulnag e piin ke dugliyrad ni nguur gafaliyed e saf. (Revelation 1:1; 2:1–3:22) Ni bod rogon, ni ir e ke mel’eg Paul me gagiyegnag rogon ni ngan skulnag. (Acts 22:6-10) Ke felfelan’ Paul ko tin kan skulnag ngak ma ke fil ngak boch e piilal e tin ke fil. (Acts 20:17-35) N’en ni rin’, e fanay boor e tayim nge gelngin nge skulnag Timothy ni nge mang be’ ni “girdien e maruwel” rok Got, “nder tamra’ ko maruwel rok.” (2 Timothy 2:15) Rib fel’ thilin e gali cha’ ney. Yol Paul ngak Timothy, u m’on riy ni gaar: “Ke par ni bod be’ ni fakag ngog ni be un ngak e chitamangin ko maruwel ni fan ko Thin Nib Fel’ ni yib rok Got.” (Filippi 2:22) De guy rogon Paul Timothy ara yugu be’ ni nge mang gachalpen. N’en ni rin’, e ke pi’ e athamgil nga laniyan’ e piin ke michan’rad ni gaar, ‘um folwokgad rog, ni bod rogon ni gu be folwok rok Kristus.’​—1 Korinth 11:1.

7, 8. (a) Mang e n’en ni buch ni be dag ni ba’ angin nib fel’ ni faanra ngan folwok rok Jesus nge Paul? (b) Wuin e thingari tabab e piin piilal ngar skulnaged e piin nrayog ni ngar manged e ministerial servants nge piilal?

⁷ Ra ngan folwok rok Jesus nge Paul, ma piin ni ma gafaliy e saf nib salap e yad ma gay e kanawo’ ni ngar skulnaged e pi walag ni pumoon, ni ku ba’ angin. Amu lemnag e n’en ni buch rok Chad. Kan chuguliy u reb e tabinaw ni ruw raba’ e teliw riy machane kefin dugliy ni nge mang reb e piilal. Ke gaar: “U lan boor e duw, ma boch e piilal nib salap e kar ayuweged gag nggu mon’og ko tirok Got. Ya chitamag e de michan’, ma pi piilal nem e kar daged ni ri gub t’uf rorad ni yad ma ayuwegeg ko tirok Got ni bod e chitamag. Yad ma pi’ e tayim rorad ni ngar skulnaged gag ko machib, ngemu’ ma reb e piilal e ke fil ngog rogon ni nggu ayuweg e maruwel ko ulung ni kan pi’ ngog.”

⁸ N’en ni buch rok Chad, e be dag ni girdi’ ni ma gafaliy e saf nib fel’ e darur sowathgad ni ngar skulnaged e piin nrayog ni ngar manged e ministerial servants nge piin piilal boch nga ram. Mang fan? Ya bochan ni be motochiyelnag e Bible ni piin ministerial servants nge piilal e ngaur folgad ko motochiyel rok Got u m’on ni ngan pi’ ngorad e re maruwel n’ey. Ya “susun e som’on e ngan skengnagrad.”​—1 Timothy 3:1-10.

9. Mang maruwel nib t’uf ni nge rin’ e piin ni ma gafaliy e saf ni kar ilalgad ko tirok Got, ma mang fan?

⁹ Faanra ngan skengnag e walag ni pumoon u lan e ulung, ma ba puluw ni ngan skulnag ni som’on. Ni bod ni: Faanra kan nog ngak reb e bitir u skul ni nge un ko skeng nib mo’maw’ ma de skulnag e sensey rok u m’on riy, ma rayog ni nge pi’ e fulweg nib puluw u nap’an e skeng fa? Baga’ ni danga’. Ere, ba t’uf ni ngan skulnag ko som’on. Machane, pi sensey nib fel’ e yad ma skulnag e pi bitir u skul ni gathi kemus ni fan e ngar pied e fulweg nib puluw u nap’an e skeng ya ku yad baadag ni ngar fanayed e tin kar filed. Maku arrogon e piin ni piilal nib fel’ ni yad ma skulnag e pi walag ni pumoon u lan e ulung ni kan taufenagrad u rogon ni nge yog ngorad e pi fel’ngin nib t’uf rok e piin ni ma ayuweg e ulung. Yad ma rin’ e re n’ey ni gathi kemus ni fan ni nge bung rogorad ko re maruwel ney ya yad be ayuwegrad ni nge yog ni ngar ayuweg girdien e ulung. (2 Timothy 2:2) Riyul’ ni, pi walag ni pumoon ni kan taufenagrad e thingara athamgilgad ni nge bung rogorad ngar manged ministerial servant ara piilal. (Titus 1:5-9) Yugu aram rogon, ma faanra skulnag e piin ni ma gafaliy e saf ni kar ilalgad ko tirok Got e piin yad be maruweliy ni nge yog ngorad boch e maruwel u lan e ulung, ma yad ra mon’og nib papey.

10, 11. Uw rogon ni nge skulnag e piin ma gafaliy e saf boch e girdi’ nge yog ni ngar uned nga boch e maruwel u lan e ulung?

¹⁰ Uw rogon ni nge skulnag e piin ni ma gafaliy e saf ni kar salapgad e girdi’ ni ngar ayuweged e maruwel ko ulung? Som’on, e nga ra daged ni yad baadag ni ngar ayuweged e pi walag u lan e ulung​—ni yad ma un ngorad u nap’an ni ngan machib u mit e tabinaw i yan ma ngar ayuweged yad ngar mon’oggad i “machibnag e thin rok Got nrogon.” (2 Timothy 2:15) Piin ni ma gafaliy e saf ni kar ilalgad ko tirok Got e ngaur weliyed ngak e pi walag nem e felfelan’ ni ma yib ko pigpig ngak boch e girdi’ nge felfelan’ ni ngeb ngorad nbochan kar mon’oggad ko tirok Got ban’en. Maku yad ma pi’ e fonow nib tamilang u fithik’ e gol ko uw rogon ni nge mon’og reb e walag nge yog ni nge dag ‘pangin nib fel’ ngak e girdi’ u lan e ulung.’​—1 Peter 5:3, 5.

¹¹ Nap’an reb e walag ni pumoon e ra mang reb e ministerrial servant, ma piin ni ma gafaliy e saf nib gonop e ngaura skulnaged e cha’ nem. Bruce, ni ke pigpig nib piilal nib n’uw nap’an, e yog ni gaar: “Gu baadag ni nggu pirew be’ nga but’ ni kafin ni mang reb e ministerial servant nggu sulow u daken boch e fonow ni fal’eg fare tapigpig nib yul’yul’ mab gonop. Maku gamow ra beeg boch e babyor ni be weliy murung’agen e maruwel rok, ma gu baadag ni nggu maruwelgow u taabang nge mada’ ko ngiyal’ ni kari tamilang u wan’ e maruwel rok.” U nap’an ni be yoor e tamilangan’ rok e en ministerial servant, maku rayog ni ngan skulnag rogon ni nge guy girdien e ulung nge ayuweg e michan’ rorad. Me ul’ul Bruce ngay ni gaar, “U nap’an ni nggu warow reb e ministerial servant ni nggu guyew reb e girdi’ u lan e ulung, ma gu ma ayuweg ni nge mel’eg boch e thin nu Bible nra pi’ e athamgil nga laniyan’ ara tabinaw rok e cha’ nem ni nggu warow nggu guyew. Ngan fil rogon ni ngan fanay e Thin nu Bible ni nge bit nga gum’irchaey e baga’ fan ni faanra nge mang fare ministerial servant e en ma gafaliy e saf nib manging’.”​—Hebrews 4:12; 5:14.

12. Uw rogon ni nge ayuweg e piin ni ma gafaliy e saf nib salap e piin ni kefin ra manged piilal?

¹² Piin ni kefin ra manged tagafaliy e saf e kub fel’ ni ngan skulnag boch ban’en ngorad. Nick, ni kan weliy ko som’on, e gaar: “Pi n’en ni ke skulnageg l’agruw e piilal ni kar ilalgow riy e riyul’ ni ke ayuwegeg. Baga’ ni yow manang ko uw rogon ni ngan ayuweg reb e magawon. Yow ma motoyil ngog u fithik’ e gol ma yow ma fal’eg i lemnag e thin ni gu ma yog ngorow​—nyugu ra de taareban’row ngay. Kug fil boor ban’en u rogon ni yow ma ayuweg e pi walag ni pumoon nge ppin u lan e ulung u fithik’ e sobut’an’ ngu fithik’ tayfan. Gali piilal nem e kar ayuwegew gag ni nggu nang nib t’uf ni ngan fanay e Bible u fithik’ e gonop u rogon ni ngan pithig e magawon ara ngan pi’ e athamgil nga lanin’uy.”

Kan Skulnag ko Thin Rok Got

13. (a) Mang e n’en nib t’uf rok reb e walag ni pumoon ni nge mon’og u rogon ni nge gafaliy e girdi’ u lan e ulung? (b) Mang fan ni yog Jesus ni: “N’en ni gu be machibnag e gathi gag e yib rog”?

¹³ Tin riyul’ riy, e Thin rok Got, ni fare Bible, e ba’ riy e pi motochiyel, nge kenggin e motochiyel, nge boch ban’en nib t’uf rok reb e en ma gafaliy e saf ni nge “bung rogon nrayog ni nge rin’ urngin mit e ngongol nib fel’.” (2 Timothy 3:16, 17) Sana reb e walag e ke un ko skul nib tolang, machane tamilangan’ rok ko Thin nu Bible nge rogon ni nge fol riy e ra ayuweg ni nge mon’og rogon ni ma gafaliy e saf u lan e ulung. Mu lemnag e n’en ni rin’ Jesus. Ir be’ ni i par u fayleng ni ir e th’abi yoor e tamilangan’ rok, ma rib llowan’, ma rib fel’ rogon ni ma ayuwegey ko tirok Got; yugu aram rogon, ma der taga’ nga daken e gonop rok u nap’an ni i fil ban’en ngak e pi tapigpig rok Jehovah. I gaar: “N’en ni gu be machibnag e gathi gag e yib rog, yi yib rok Got, ni ir e ke l’ugeg ku gub.” Mang fan ni yog Jesus ni thin ni i machibnag e yib rok e Chitamangin u tharmiy? I weliy fan ni gaar: “Ya en ni thin rok e be weliy e be guy rogon ni nge mang ir e yog e girdi’ e sorok ngak.”​—John 7:16, 18.

14. Uw rogon ni nge pilo’ e piin ni ma gafaliy e saf ko ngan pining e sorok ngorad?

¹⁴ Piin ni ma gafaliy e saf nib yul’yul’ e yad ma pilo’ ko nga nog e sorok ngorad. Yad ma fonownagey ma yad ma pi’ e athamgil nga lanin’uy, ni yad ma fanay e Thin rok Got ma gathi gonop rorad. Yad manang ni maruwel ko piin ni piilal e ra ayuweg e girdi’ ni nge yog ngak fare “lem rok Kristus,” ma gathi lem rorad. (1 Korinth 2:14-16) Uw rogon ni faanra reb e piilal ni be ayuweg ba wu’ i mabgol ni bay e magawon ko mabgol rorow ma be fonownagrow ni be fanay e tin ke buch rok ko bin ni nge fanay e kenggin e motochiyel u Bible nge pi babyor ni ke fal’eg “fare tapigpig nib yul’yul’ ma ba gonop”? (Matthew 24:45) Rayog ni fonow rok e rib l’ag ko yalen ko binaw rok nge tamilangan’ ni ba achig. Riyul’ ni, boch e yalen e de kireb, ma faen ni piilal e sana bay e tamilangan’ nge salap rok. Machane baga’ angin ni faanra pi’ e piin ni ma gafaliy e saf e athamgil nga lanin’rad ni ngar motoyilgad nga laman Jesus nge thin rok Jehovah ma gathi lem ko girdi’ ara yalen ko binaw.​—Psalms 12:6; Proverbs 3:5, 6.

“Fare Tapigpig nib Yul’yul’ mab Gonop” e Ke Skulnagrad

15. Mang maruwel e ke pi’ Jesus ngak “fare tapigpig nib yul’yul’ mab gonop,” ma mang reb i fan ni keb angin ngorad?

¹⁵ Piin ni ma gafaliy e saf ni bod apostal Peter, nge John, nge Paul e yad bang ko ulung ni weliy Jesus ni “fare tapigpig nib yul’yul’ mab gonop”. Pi walagen Jesus u fayleng ni kan dugliyrad ni ngar uned ngak Kristus ko gagiyeg u tharmiy e yad bang ko re ulung ney. (Revelation 5:9, 10) Ngiyal’ ney ni ka nog ni tin tomren e rran ko re m’ag ney ngay, e dabisiy ni ke buchuuw e pi walagen Kristus u fayleng. Machane, fare maruwel ni ke pi’ Jesus ngorad​—ni ngan machibnag fare thin nib fel’ ko Gil’ilungun u m’on ni nge yib fare tomur—​e kan wereg e chiney ko binaw ni ke yoor ko kafram. Yugu aram rogon, ma fare tapigpig nib yul’yul’ mab gonop e ri baga’ angin ni keb ngorad! Mang fan? Reb, e bochan ni kar skulnaged “yugu boch e saf” ni ngar ayuweged yad ko maruwel ni ngan machib. (John 10:16; Matthew 24:14; 25:40) Chiney, e baga’ ni re ulung ney nib yul’yul’ ni ka nog e yugu boch e saf ngorad e ma rin’ e re maruwel ney.

16. Uw rogon ni ma skulnag fare tapigpig nib yul’yul’ mab gonop e piin ni kan tayrad nga boch e maruwel?

¹⁶ Uw rogon ni ke pi’ fare tapigpig nib yul’yul’ mab gonop e re skul ney? U nap’an e bin som’on e chibog, ma piin ni owchen e pi tapigpig nib yul’yul’ mab gonop e kan pi’ mat’awrad ni ngar skulnaged ma ngar dugliyed e piin ni piilal u lan e pi ulung, ma pi piilal nem e kar skulnaged e girdi’ u lan e ulung. (1 Korinth 4:17) Ku arrogon e ngiyal’ ney. Fare Governing Body​—ni aram e piin ni piilal ni kan dugliyrad ni dar yoorgad ni yad e piin owchen fare tapigpig nib yul’yul’ mab gonop—​e kar l’oged boch e girdi’ ni ngar skulnaged ma ngar dugliyed e piin ni ministerial servant nge piilal u lan bokum biyu’ e ulung u ga’ngin yang e fayleng. Maku, fare Governing Body e ra yarmiyed boch e skul ni nge skulnag e Branch Committee members, nge piin ma lekag e ulung, nge piin piilal nge piin ministerial servant ko rogon ni nga ra ayuweged e girdi’ u lan e ulung nib fel’ rogon. Maku yad ma skulnagrad u daken e pi babyor ni yad ma pi’ ngorad, ngu daken e pi article ko Wulyang Ntagil E Damit, nge boch e babyor, ni bod fare babyor ni Organized to Do Jehovah’s Willa (Kan Yarmiy ni Ngan Rin’ e Tin nib M’agan’ Jehovah Ngay).

17. (a) Uw rogon ni dag Jesus ni ke pagan’ ngak fare tapigpig nib yul’yul’ mab gonop? (b) Uw rogon ni nge dag e piin ni ma gafaliy e saf ni yad be pagan’rad ngak e pi tapigpig nib yul’yul’ mab gonop?

¹⁷ Kari pagan’ Jesus ngak e pi tapigpig nib yul’yul’ mab gonop me tay ni “nge mil fan urngin ban’en rok” ngorad​—ni aram e urngin ban’en ni tirok u fayleng. (Matthew 24:47) Piin ni ma gafaliy e saf e ku kar daged ni ke pagan’rad ngak fare tapigpig nib yul’yul’ mab gonop ya yad be fol ko thin ni ma pi’ fare ulung ko piilal ara Governing Body ngorad. Arrogon, nap’an ni ra skulnag e piin ni ma gafaliy e saf boch e girdi’, ma ngar paged e Thin rok Got ni nge skulnagrad, ma ngar folgad ko pi n’en ni ke skulnagrad fare tapigpig nib yul’yul’ mab gonop, ma yad be ayuweg ni nge taareban’ e ulung. Ri gad be pining e magar ya ke skulnag Jehovah e girdi’ ni riyul’ ni ma lemnag rarogon e girdi’ u lan e ulung ko Kristiano!

[Footnote]

Uw Rogon ni Ngam Pi’ e Fulweg?

• Uw rogon ni ma skulnag e piin ni ma gafaliy e saf ni kar ilalgad ko tirok Got boch e girdi’?

• Mang fan ni piin ni ma gafaliy e saf e darur filed ban’en ngak e girdi’ ni yad be fanay e lem rorad?

• Uw rogon ma mang fan ni piin ni ma gafaliy e saf e yad be pagan’ ngak fare tapigpig nib yul’yul’ mab gonop?

[Pictures on page 10, 11]

Piin piilal ni Kristiano yad ma skulnag e pi pagel u lan e ulung

[Pictures on page 12]

“Fare tapigpig nib yul’yul’ mab gonop” e ri yad ma skulnag e piin piilal